ພະບັນຍັດ
15 “ທຸກໆ 7 ປີ ເຈົ້າຕ້ອງຍົກໜີ້*ໃຫ້ກັນ.+ 2 ວິທີຍົກໜີ້ເປັນແນວນີ້. ເຈົ້າໜີ້ທຸກຄົນຕ້ອງຍົກໜີ້ໃຫ້ເພື່ອນບ້ານຂອງລາວ. ລາວຕ້ອງບໍ່ທວງໜີ້ກັບເພື່ອນບ້ານຫຼືພີ່ນ້ອງຂອງລາວ ຍ້ອນພະເຢໂຫວາສັ່ງໃຫ້ມີການຍົກໜີ້.+ 3 ເຈົ້າຈະທວງໜີ້ກັບຄົນຕ່າງຊາດໄດ້+ ແຕ່ຕ້ອງຍົກໜີ້ໃຫ້ພີ່ນ້ອງຂອງເຈົ້າ. 4 ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຊິເອົາໃຫ້ເຈົ້າເປັນມໍລະດົກແລະເຈົ້າຊິໄດ້ເຂົ້າໄປຢູ່ນັ້ນ+ ຄືຊິບໍ່ມີຜູ້ໃດທຸກຍາກດອກ ເພາະພະເຢໂຫວາຈະອວຍພອນເຈົ້າແນ່ນອນ. 5 ແຕ່ເຈົ້າຕ້ອງເຊື່ອຟັງພະເຢໂຫວາພະເຈົ້າຂອງເຈົ້າ ແລະເຮັດຕາມຄຳສັ່ງທຸກຢ່າງຂອງເພິ່ນທີ່ຂ້ອຍກຳລັງບອກເຈົ້າໃນມື້ນີ້ຢ່າງເຄັ່ງຄັດ.+ 6 ພະເຢໂຫວາພະເຈົ້າຂອງເຈົ້າຊິອວຍພອນເຈົ້າຄືກັບທີ່ເພິ່ນໄດ້ສັນຍາໄວ້. ຊາດຕ່າງໆຊິມາຢືມນຳເຈົ້າ ແຕ່ເຈົ້າຊິບໍ່ຕ້ອງຢືມເຂົາເຈົ້າ.+ ເຈົ້າຊິປົກຄອງຊາດຕ່າງໆ ແຕ່ເຂົາເຈົ້າຊິບໍ່ປົກຄອງເຈົ້າ.+
7 ເມື່ອເຈົ້າເຂົ້າໄປຢູ່ໃນແຜ່ນດິນທີ່ພະເຢໂຫວາພະເຈົ້າຂອງເຈົ້າຊິເອົາໃຫ້ເຈົ້າແລ້ວ ຖ້າໃນເມືອງທີ່ເຈົ້າຢູ່ມີພີ່ນ້ອງຂອງເຈົ້າກາຍເປັນຄົນທຸກຍາກ ຢ່າໃຈດຳແລະບໍ່ຊ່ວຍເຫຼືອລາວ.+ 8 ເຈົ້າຕ້ອງເອື້ອເຟື້ອແລະຊ່ວຍເຫຼືອລາວ.+ ໃຫ້ລາວຢືມສິ່ງທີ່ຈຳເປັນ. 9 ໃຫ້ລະວັງຢ່າຄິດບໍ່ດີວ່າ ‘ໃກ້ຊິຮອດປີທີ 7 ເຊິ່ງເປັນປີຂອງການຍົກໜີ້ແລ້ວ’+ ແລະບໍ່ເອື້ອເຟື້ອຕໍ່ພີ່ນ້ອງຂອງເຈົ້າທີ່ເປັນຄົນທຸກ ແລະບໍ່ໄດ້ໃຫ້ຫຍັງລາວ. ຖ້າລາວຈົ່ມເລື່ອງຂອງເຈົ້າໃຫ້ພະເຢໂຫວາຟັງ ເຈົ້າຊິມີຄວາມຜິດ.+ 10 ເຈົ້າຕ້ອງເອື້ອເຟື້ອໃຫ້ລາວຢືມ+ໂດຍບໍ່ຄິດເສຍດາຍ. ຖ້າເຈົ້າເຮັດແນວນີ້ ພະເຢໂຫວາພະເຈົ້າຂອງເຈົ້າກໍຊິອວຍພອນທຸກສິ່ງທີ່ເຈົ້າເຮັດ.+ 11 ຈະມີຄົນທຸກຢູ່ໃນແຜ່ນດິນຂອງເຈົ້າສະເໝີ.+ ຍ້ອນແນວນີ້ ເຮົາຈຶ່ງສັ່ງເຈົ້າວ່າ ‘ເຈົ້າຕ້ອງເອື້ອເຟື້ອຊ່ວຍເຫຼືອພີ່ນ້ອງທີ່ທຸກຍາກໃນແຜ່ນດິນຂອງເຈົ້າ.’+
12 ຖ້າພີ່ນ້ອງຄົນເຮັບເຣີຂອງເຈົ້າ ບໍ່ວ່າຈະເປັນຜູ້ຊາຍຫຼືຜູ້ຍິງໄດ້ຂາຍໂຕເອງເປັນທາດຂອງເຈົ້າ ແລະໄດ້ເຮັດວຽກໃຫ້ເຈົ້າ 6 ປີແລ້ວ ໃນປີທີ 7 ເຈົ້າຕ້ອງປ່ອຍລາວເປັນອິດສະຫຼະ.+ 13 ຕອນທີ່ເຈົ້າປ່ອຍລາວໄປ ກໍຢ່າໃຫ້ລາວໄປແຕ່ໂຕ. 14 ເຈົ້າຕ້ອງເປັນຄົນເອື້ອເຟື້ອ ແລະເອົາສັດ ເຂົ້າ ນ້ຳມັນໝາກກອກ ແລະເຫຼົ້າແວງຂອງເຈົ້າໃຫ້ລາວໄປນຳ. ຄືກັບທີ່ພະເຢໂຫວາພະເຈົ້າຂອງເຈົ້າໄດ້ອວຍພອນເຈົ້າໃຫ້ມີສິ່ງເຫຼົ່ານີ້ ເຈົ້າຄວນເອົາໃຫ້ລາວຄືກັນ. 15 ຢ່າລືມວ່າເຈົ້າກໍເຄີຍເປັນທາດຢູ່ໃນເອຢິບ ແລະພະເຢໂຫວາພະເຈົ້າຂອງເຈົ້າໄດ້ປົດປ່ອຍເຈົ້າ. ຍ້ອນແນວນີ້ ຂ້ອຍຈຶ່ງສັ່ງເຈົ້າໃນມື້ນີ້ໃຫ້ເຮັດແບບນັ້ນ.
16 ແຕ່ຖ້າທາດຂອງເຈົ້າບອກວ່າ ‘ຂ້ອຍຈະບໍ່ໄປຈາກເຈົ້າດອກ!’ ຍ້ອນລາວຮັກເຈົ້າກັບຄົນໃນເຮືອນຂອງເຈົ້າ ແລະມີຄວາມສຸກທີ່ໄດ້ເຮັດວຽກໃຫ້ເຈົ້າ+ 17 ໃຫ້ເອົາເຫຼັກຊີເຈາະຫູລາວຢູ່ປະຕູ ແລ້ວລາວຈະເປັນທາດຂອງເຈົ້າຕະຫຼອດຊີວິດຂອງລາວ. ຖ້າທາດເປັນຜູ້ຍິງກໍໃຫ້ເຮັດແນວນີ້ຄືກັນ. 18 ເມື່ອເຈົ້າປ່ອຍລາວເປັນອິດສະຫຼະ ຢ່າຄິດເສຍດາຍ ເພາະຕະຫຼອດ 6 ປີນັ້ນ ຖ້າເຈົ້າບໍ່ມີລາວ ເຈົ້າຕ້ອງຈ່າຍຄ່າຈ້າງ 2 ເທົ່າເພື່ອໃຫ້ຄົນມາເຮັດວຽກແທນລາວ ແລະພະເຢໂຫວາພະເຈົ້າຂອງເຈົ້າກໍອວຍພອນເຈົ້າທຸກຢ່າງແລ້ວ.
19 ເຈົ້າຕ້ອງແຍກລູກສັດໂຕຜູ້ໂຕທຳອິດຈາກຝູງສັດໄວ້ສຳລັບພະເຢໂຫວາພະເຈົ້າຂອງເຈົ້າ+ ຖ້າເປັນງົວກໍບໍ່ໃຫ້ເອົາໄປໃຊ້ວຽກ ຖ້າເປັນແກະກໍບໍ່ໃຫ້ຕັດຂົນມັນ. 20 ໃນແຕ່ລະປີ ເຈົ້າກັບຄົນໃນເຮືອນຂອງເຈົ້າຈະຕ້ອງກິນຊີ້ນຂອງສັດເຫຼົ່ານີ້ຕໍ່ໜ້າພະເຢໂຫວາພະເຈົ້າຂອງເຈົ້າໃນບ່ອນທີ່ພະເຢໂຫວາໄດ້ເລືອກໄວ້.+ 21 ແຕ່ຖ້າສັດໂຕໃດບໍ່ສົມບູນ ພິການ ຕາບອດ ຫຼືມີສ່ວນທີ່ບໍ່ດີບ່ອນໃດບ່ອນໜຶ່ງ ຫ້າມເຈົ້າເອົາສັດໂຕນັ້ນໄປເປັນເຄື່ອງບູຊາໃຫ້ພະເຢໂຫວາພະເຈົ້າຂອງເຈົ້າ.+ 22 ແຕ່ເຈົ້າຈະກິນຊີ້ນສັດໂຕນັ້ນໄດ້ຢູ່ໃນເມືອງຂອງເຈົ້າ. ຄົນທີ່ຖືວ່າສະອາດແລະຄົນທີ່ຖືວ່າບໍ່ສະອາດກໍກິນຊີ້ນສັດໂຕນັ້ນໄດ້ຄືກັບກິນຊີ້ນກວາງ.+ 23 ແຕ່ຫ້າມກິນເລືອດຂອງມັນ.+ ເຈົ້າຕ້ອງເທເລືອດລົງດິນຄືກັບເທນ້ຳ.”+