ປະຖົມມະການ

12 ພະ​ເຢໂຫວາ​ບອກ​ອັບຣາມ​ວ່າ: “ໃຫ້​ເຈົ້າ​ອອກ​ຈາກ​ແຜ່ນດິນ​ນີ້ ໄປຈາກ​ຍາດ​ຕິພີ່ນ້ອງ​ຂອງ​ເຈົ້າ​ແລະ​ຍາດ​ຕິ​ພີ່ນ້ອງ​ຂອງ​ພໍ່​ເຈົ້າ. ເຮົາ​ຈະ​ໃຫ້​ເຈົ້າ​ເຫັນ​ອີ​ກ​ແຜ່ນດິນ​ໜຶ່ງ.+ 2 ເຮົາ​ຈະ​ເຮັດ​ໃຫ້​ລູກ​ຫຼານ​ຂອງ​ເຈົ້າ​ຈະ​ກາຍ​ເປັນ​ຊາດ​ໃຫຍ່. ເຮົາ​ຈະ​ອວຍ​ພອນ​ເຈົ້າ. ເຮົາຈະ​ເຮັດ​ໃຫ້​ທຸກ​ຄົນ​ຮູ້ຈັກ​ຊື່​ຂອງ​ເຈົ້າ ແລະ​ຄົນ​ອື່ນ​ໆ​ຈະໄດ້​ຮັບ​ພອນ​ຍ້ອນເຈົ້າ.+ 3 ເຮົາ​ຈະ​ອວຍ​ພອນ​ໃຫ້​ຄົນ​ທີ່​ອວຍ​ພອນ​ເຈົ້າ ເຮົາ​ຈະ​ສາບ​ແຊ່ງ​ຄົນ​ທີ່​ສາບ​ແຊ່ງ​ເຈົ້າ+ ແລະ​ທຸກຊົນຊາດຈະ​ໄດ້​ຮັບ​ພອນ​ຍ້ອນ​ເຈົ້າ.”+

4 ອັບຣາມ​ໄປ​ຕາມ​ທີ່​ພະ​ເຢໂຫວາ​ບອກ ແລະ​ໂລດ​ກໍ​ໄປ​ນຳ. ອັບຣາມ​ອອກ​ຈາກ​ເມືອງ​ຮາຣານ​ຕອນ​ອາຍຸ 75 ປີ.+ 5 ລາວ​ເດີນ​ທາງ​ໄປ​ການາອານ+ ພ້ອມ​ກັບ​ຊາຣາຍ+​ເມຍ​ຂອງ​ລາວ ໂລດ​ຫຼານ​ຊາຍ+ ແລະ​ພວກ​ຄົນ​ຮັບໃຊ້. ລາວ​ເອົາ​ທຸກ​ສິ່ງ​ທີ່​ລາວ​ມີ+​ໃນ​ເມືອງ​ຮາຣານ​ໄປ​ນຳ. ເມື່ອ​ເຂົາເຈົ້າ​ໄປ​ຮອດ​ແຜ່ນດິນ​ການາອານ 6 ອັບຣາມ​ເດີນ​ທາງ​ໄປ​ຮອດ​ບ່ອນ​ທີ່​ເອີ້ນ​ວ່າ​ເຊເຄັມ +ໃກ້​ຕົ້ນ​ໄມ້​ໃຫຍ່​ຢູ່​ໂມເຣ.+ ໃນ​ຕອນ​ນັ້ນ​ພວກ​ການາອານ​ຢູ່​ຫັ້ນ. 7 ພະ​ເຢໂຫວາ​ມາ​ຫາ​ອັບຣາມ​ແລະ​ເວົ້າ​ວ່າ: “ເຮົາ​ຈະ​ເອົາ​ແຜ່ນດິນ​ນີ້+​ໃຫ້​ລູກ​ຫຼານ​ຂອງ​ເຈົ້າ.”+ ອັບຣາມ​ສ້າງ​ແທ່ນ​ບູຊາ​ໃຫ້​ພະ​ເຢໂຫວາ​ຢູ່​ຫັ້ນ ຍ້ອນ​ວ່າ​ເພິ່ນ​ມາ​ຫາ​ລາວ​ຢູ່​ຫັ້ນ. 8 ຫຼັງ​ຈາກ​ນັ້ນ ລາວ​ໄດ້​ຍ້າຍ​ໄປ​ຢູ່​ເຂດ​ທີ່​ມີ​ພູ​ຫຼາຍ ທາງ​ທິດ​ຕາເວັນ​ອອກ​ຂອງ​ເມືອງ​ເບເທນ.+ ລາວ​ກາງເຕັ້ນ​ຢູ່​ລະຫວ່າງ​ເມືອງ​ເບເທນກັບ​ເມືອງ​ອາອີ.+ (ເມືອງ​ເບເທນ​ຢູ່​ທາງ​ທິດ​ຕາເວັນ​ຕົກ ແລະ​ເມືອງ​ອາອີ​ຢູ່​ທາງ​ທິດ​ຕາເວັນ​ອອກ.) ລາວ​ສ້າງ​ແທ່ນ​ບູຊາ​ໃຫ້​ພະ​ເຢໂຫວາ+​ແລະສັນລະເສີນ​ຊື່ພະ​ເຢໂຫວາ​ຢູ່​ຫັ້ນ.+ 9 ຫຼັງ​ຈາກ​ນັ້ນ ອັບຣາມ​ກໍ​ມຸ່ງ​ໜ້າເດີນ​ທາງ​ໄປ​ເນເກັບ*+ແລະຍ້າຍ​ເຕັ້ນຂອງ​ລາວ​ໄປ​ບ່ອນ​ອື່ນ​ເລື້ອຍ​ໆ​.

10 ຕອນ​ນັ້ນ​ມີ​ໄພ​ອຶດຢາກ​ເກີດຂຶ້ນ. ຍ້ອນ​ຄວາມ​ອຶດຢາກ​ນັ້ນ​ຮ້າຍແຮງ​ຫຼາຍ+ ອັບຣາມ​ຈຶ່ງ​ຍ້າຍ​ໄປ​ຢູ່​ເອຢິບ​ໄລຍະ​ໜຶ່ງ.+ 11 ຕອນ​ທີ່​ໃກ້​ຈະ​ຮອດ​ເອຢິບ ລາວ​ເວົ້າ​ກັບ​ຊາຣາຍ​ເມຍ​ຂອງ​ລາວ​ວ່າ: “ຊາຣາຍ ຟັງ​ອ້າຍ​ເດີ້. ນ້ອງ​ເປັນ​ຄົນ​ງາມ​ຫຼາຍ.+ 12 ຖ້າ​ພວກ​ເອຢິບ​ເຫັນ​ນ້ອງ ເຂົາເຈົ້າ​ຊິ​ເວົ້າ​ກັນ​ວ່າ ‘ຜູ້​ນີ້​ແມ່ນ​ເມຍ​ຂອງ​ລາວ’ ແລ້ວ​ເຂົາເຈົ້າ​ກໍ​ຊິ​ຂ້າ​ອ້າຍ​ແລ້ວ​ເອົາ​ນ້ອງ​ໄປ. 13 ຂໍ​ໃຫ້​ນ້ອງ​ບອກ​ວ່ານ້ອງ​ເປັນ​ນ້ອງ​ສາວ​ຂອງ​ອ້າຍ ເພື່ອ​ເຂົາເຈົ້າ​ຈະ​ເບິ່ງ​ແຍງ​ອ້າຍ​ຢ່າງ​ດີ​ແລະ​ຈະ​ບໍ່​ຂ້າ​ອ້າຍ.”+

14 ເມື່ອ​ອັບຣາມ​ໄປ​ຮອດ​ເອຢິບ ຄົນ​ເອຢິບ​ກໍ​ເຫັນ​ວ່າ​ຊາຣາຍ​ເປັນ​ຄົນ​ງາມ​ຫຼາຍ. 15 ເມື່ອ​ພວກ​ເຈົ້າ​ໜ້າ​ທີ່​ລະດັບ​ສູງ​ຂອງ​ຟາໂຣ*ເຫັນ​ຊາຣາຍ ເຂົາເຈົ້າ​ຍ້ອງ​ລາວ​ໃຫ້​ກະສັດ​ຟັງ ແລ້ວ​ກໍ​ພາ​ລາວ​ໄປວັງ​ຂອງ​ກະສັດ. 16 ຍ້ອນ​ຊາຣາຍ ກະສັດ​ຈຶ່ງ​ເບິ່ງ​ແຍງ​ອັບຣາມ​ເປັນ​ຢ່າງ​ດີ ແລະ​ເອົາ​ແກະ ເອົາ​ງົວ ລາ​ຜູ້​ກັບ​ລາ​ແມ່ ແລະ​ອູດ ພ້ອມ​ທັງ​ຄົນ​ຮັບ​ໃຊ້​ຊາຍ​ຍິງ​ໃຫ້​ອັບຣາມ.+ 17 ຈາກ​ນັ້ນ ພະ​ເຢໂຫວາ​ເຮັດ​ໃຫ້​ຟາໂຣ​ກັບ​ຄອບຄົວ​ຂອງ​ລາວ ແລະ​ພວກ​ຂ້າລາຊະການເຈິ​ໄພ​ພິບັດ​ຮ້າຍແຮງ ຍ້ອນ​ຊາຣາຍ​ເມຍ​ຂອງ​ອັບຣາມ.+ 18 ຟາໂຣ​ຈຶ່ງ​ເອີ້ນ​ອັບຣາມ​ມາ​ແລະ​ເວົ້າ​ວ່າ: “ເຈົ້າ​ໄດ້​ເຮັດ​ຫຍັງ​ລົງ​ໄປ? ເປັນ​ຫຍັງ​ເຈົ້າ​ຄື​ບໍ່​ບອກ​ວ່າ​ຊາຣາຍ​ເປັນ​ເມຍ​ເຈົ້າ? 19 ເປັນ​ຫຍັງ​ເຈົ້າ​ຈຶ່ງ​ບອກ​ວ່າ​ລາວ​ເປັນ​ນ້ອງ​ສາວ?+ ຂ້ອຍ​ເກືອບ​ຊິ​ເອົາ​ລາວ​ມາ​ເປັນ​ເມຍ​ແລ້ວ. ໃຫ້​ເຈົ້າ​ພາ​ເມຍ​ໄປ​ໄກ​ໆ​.” 20 ຟາໂຣ​ຈຶ່ງ​ໃຊ້​ຄົນ​ໄປ​ສັ່ງ​ໃຫ້​ອັບຣາມ​ແລະ​ເມຍ​ອອກ​ໄປ​ຈາກ​ແຜ່ນດິນ​ເອຢິບພ້ອມ​ກັບ​ທຸກ​ສິ່ງທີ່​ລາວ​ມີ.+