ເຢເຣມີຢາ
29 ນີ້ແມ່ນຈົດໝາຍທີ່ຜູ້ພະຍາກອນເຢເຣມີຢາສົ່ງຈາກເຢຣູຊາເລັມໄປຫາພວກຜູ້ນຳຂອງປະຊາຊົນ ພວກປະໂລຫິດ ພວກຜູ້ພະຍາກອນ ແລະປະຊາຊົນທັງໝົດທີ່ຖືກກະສັດເນບູກາດເນັດຊາຈັບຈາກເຢຣູຊາເລັມໄປເປັນຊະເລີຍຢູ່ບາບີໂລນ 2 ຫຼັງຈາກທີ່ກະສັດເຢໂກນີຢາ+ ແມ່ຂອງກະສັດ+ ພວກຂ້າລາຊະການ ພວກເຈົ້ານາຍຂອງຢູດາແລະເຢຣູຊາເລັມ ພວກຊ່າງທີ່ມີສີໄມ້ລາຍມື ແລະພວກຊ່າງເຫຼັກ*ໄດ້ອອກຈາກເຢຣູຊາເລັມໄປແລ້ວ.+ 3 ຄົນທີ່ເຢເຣມີຢາໃຊ້ໃຫ້ໄປບາບີໂລນເພື່ອສົ່ງຈົດໝາຍນີ້ແມ່ນເອລາສາລູກຊາຍຂອງຊາຟານ+ແລະເກມາຣີຢາລູກຊາຍຂອງຮິນກີຢາຜູ້ທີ່ເຊເດກີຢາ+ກະສັດຂອງຢູດາສົ່ງໄປຫາເນບູກາດເນັດຊາກະສັດຂອງບາບີໂລນ. ເນື້ອໃນຈົດໝາຍນັ້ນບອກວ່າ:
4 “ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນເວົ້າກັບປະຊາຊົນທຸກຄົນທີ່ເພິ່ນເຮັດໃຫ້ເຂົາເຈົ້າຖືກຈັບຈາກເຢຣູຊາເລັມໄປເປັນຊະເລີຍຢູ່ບາບີໂລນວ່າ 5 ‘ໃຫ້ປຸກເຮືອນແລະອາໄສຢູ່ບ່ອນນີ້. ໃຫ້ເຮັດສວນແລະກິນໝາກໄມ້ຈາກສວນ. 6 ໃຫ້ພວກເຈົ້າເອົາເມຍແລະມີລູກຊາຍລູກສາວ. ໃຫ້ພວກເຈົ້າຫາເມຍໃຫ້ລູກຊາຍແລະຫາຜົວໃຫ້ລູກສາວເພື່ອເຂົາເຈົ້າຊິໄດ້ມີລູກມີຫຼານຄືກັນ. ໃຫ້ພວກເຈົ້າເພີ່ມຈຳນວນຫຼາຍຂຶ້ນຢູ່ຫັ້ນແລະຢ່າໃຫ້ຫຼຸດລົງ. 7 ໃຫ້ຊອກຫາຄວາມສະຫງົບສຸກໃນເມືອງທີ່ເຮົາໃຫ້ພວກເຈົ້າໄປຢູ່ນັ້ນແລະອະທິດຖານເຖິງພະເຢໂຫວາຂໍໃຫ້ເມືອງນັ້ນມີຄວາມສະຫງົບສຸກ ຍ້ອນຖ້າເມືອງນັ້ນມີຄວາມສະຫງົບສຸກ ພວກເຈົ້າກໍຈະມີຄວາມສະຫງົບສຸກຄືກັນ.+ 8 ເຮົາເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນເວົ້າວ່າ “ຢ່າໃຫ້ພວກຜູ້ພະຍາກອນແລະພວກໝໍມໍຫຼອກພວກເຈົ້າ+ ແລະຢ່າໄປຟັງຄວາມຝັນທີ່ເຂົາເຈົ້າເລົ່າໃຫ້ພວກເຈົ້າຟັງ 9 ‘ຍ້ອນເຂົາເຈົ້າພະຍາກອນເລື່ອງຕົວະໂດຍອ້າງຊື່ຂອງເຮົາ. ເຮົາບໍ່ໄດ້ສົ່ງເຂົາເຈົ້າມາ.’+ ພະເຢໂຫວາເວົ້າໄວ້ແນວນີ້.”’
10 ພະເຢໂຫວາເວົ້າວ່າ ‘ເມື່ອຄົບໄລຍະ 70 ປີໃນບາບີໂລນແລ້ວ ເຮົາຈະເບິ່ງແຍງພວກເຈົ້າ+ແລະເຮົາຈະເຮັດຕາມສັນຍາຂອງເຮົາໂດຍພາພວກເຈົ້າກັບມາບ່ອນນີ້.’+
11 ພະເຢໂຫວາເວົ້າວ່າ ‘ເຮົາຮູ້ວ່າເຮົາຕັ້ງໃຈຈະໃຫ້ຫຍັງກັບພວກເຈົ້າ. ເຮົາຢາກໃຫ້ພວກເຈົ້າມີຊີວິດທີ່ສະຫງົບສຸກແລະບໍ່ຢາກໃຫ້ພວກເຈົ້າເຈິແນວບໍ່ດີ.+ ເຮົາຈະໃຫ້ພວກເຈົ້າມີອະນາຄົດທີ່ດີແລະມີຄວາມຫວັງ.+ 12 ພວກເຈົ້າຈະເອີ້ນເຮົາແລະຈະມາອະທິດຖານຫາເຮົາ ແລະເຮົາຈະຟັງພວກເຈົ້າ.+
13 ພວກເຈົ້າຈະຊອກຫາເຮົາແລະຈະພົບເຮົາ.+ ຍ້ອນພວກເຈົ້າຊອກຫາເຮົາດ້ວຍສຸດຫົວໃຈ+ 14 ເຮົາຈະໃຫ້ພວກເຈົ້າພົບເຮົາ.’+ ພະເຢໂຫວາເວົ້າໄວ້ແນວນີ້. ‘ເຮົາຈະລວບລວມພວກເຈົ້າທີ່ຖືກຈັບໄປເປັນຊະເລີຍ ແລະເຮັດໃຫ້ພວກເຈົ້າກັບມາຈາກຊາດທັງໝົດແລະຈາກບ່ອນຕ່າງໆທີ່ເຮົາເຮັດໃຫ້ພວກເຈົ້າກະຈັດກະຈາຍໄປ.+ ແລ້ວເຮົາຈະພາພວກເຈົ້າກັບມາແຜ່ນດິນທີ່ພວກເຈົ້າເຄີຍຢູ່ກ່ອນທີ່ເຮົາຈະເຮັດໃຫ້ພວກເຈົ້າໄປເປັນຊະເລີຍ.’ ພະເຢໂຫວາເວົ້າໄວ້ແນວນີ້.+
15 ແຕ່ພວກເຈົ້າເວົ້າວ່າ ‘ພະເຢໂຫວາໄດ້ແຕ່ງຕັ້ງພວກຜູ້ພະຍາກອນເພື່ອພວກເຮົາຢູ່ບາບີໂລນ.’
16 ພະເຢໂຫວາໄດ້ເວົ້າກັບກະສັດທີ່ນັ່ງເທິງບັນລັງຂອງດາວິດ+ແລະປະຊາຊົນທັງໝົດທີ່ອາໄສຢູ່ໃນເມືອງນີ້ເຊິ່ງເປັນອ້າຍນ້ອງຂອງພວກເຈົ້າທີ່ບໍ່ໄດ້ຖືກຈັບໄປເປັນຊະເລີຍ. 17 ‘ພະເຢໂຫວາຜູ້ບັນຊາການກອງທັບເວົ້າວ່າ “ເຮົາຈະເຮັດໃຫ້ເຂົາເຈົ້າຕາຍດ້ວຍດາບ ດ້ວຍຄວາມອຶດຢາກ ແລະດ້ວຍໂລກລະບາດ*+ ແລະເຮົາຈະເຮັດໃຫ້ເຂົາເຈົ້າເປັນຄືກັບໝາກເດື່ອທີ່ເນົ່າຈົນກິນບໍ່ໄດ້.”+
18 ເຮົາຈະເຮັດໃຫ້ຊາດຕ່າງໆຮູ້ສຶກຢ້ານເມື່ອເຫັນເຂົາເຈົ້າ. ເຮົາຈະໂຈມຕີເຂົາເຈົ້າດ້ວຍດາບ+ ດ້ວຍຄວາມອຶດຢາກ ແລະດ້ວຍໂລກລະບາດ. ເຂົາເຈົ້າຈະຖືກສາບແຊ່ງແລະຖືກເຍາະເຍີ້ຍ*ໃນແຜ່ນດິນທີ່ເຮົາເຮັດໃຫ້ເຂົາເຈົ້າກະຈັດກະຈາຍກັນໄປຢູ່ນັ້ນ.+ ຊາດຕ່າງໆທົ່ວໂລກຈະຮູ້ສຶກຢ້ານ+ແລະຮູ້ສຶກຕົກໃຈເມື່ອເຫັນເຂົາເຈົ້າ+ 19 ຍ້ອນເຂົາເຈົ້າບໍ່ຍອມຟັງຄຳເວົ້າຂອງເຮົາທີ່ເຮົາໃຫ້ພວກຜູ້ພະຍາກອນທີ່ເປັນຜູ້ຮັບໃຊ້ຂອງເຮົາໄປບອກເຂົາເຈົ້າເທື່ອແລ້ວເທື່ອອີກ.’*+ ພະເຢໂຫວາເວົ້າໄວ້ແນວນີ້.
‘ພວກເຈົ້າບໍ່ຟັງຄວາມເຮົາເລີຍ.’+ ພະເຢໂຫວາເວົ້າໄວ້ແນວນີ້.
20 ດັ່ງນັ້ນ ພວກເຈົ້າທຸກຄົນທີ່ເຮົາເຮັດໃຫ້ອອກຈາກເຢຣູຊາເລັມໄປເປັນຊະເລີຍຢູ່ບາບີໂລນ ໃຫ້ຟັງຄຳເວົ້າຂອງພະເຢໂຫວາເດີ້. 21 ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນໄດ້ເວົ້າກ່ຽວກັບອາຮາບລູກຊາຍຂອງໂກລາຢາແລະເຊເດກີຢາລູກຊາຍຂອງມາອາເສຢາ ເຊິ່ງພະຍາກອນເລື່ອງຕົວະໃຫ້ພວກເຈົ້າຟັງໂດຍອ້າງຊື່ຂອງເຮົາ.+ ເພິ່ນເວົ້າວ່າ ‘ເຮົາຈະມອບເຂົາເຈົ້າໄວ້ໃນມືຂອງເນບູກາດເນັດຊາ*ກະສັດຂອງບາບີໂລນ ແລະລາວຈະຂ້າເຂົາເຈົ້າຕໍ່ໜ້າຕໍ່ຕາພວກເຈົ້າ. 22 ເມື່ອຄົນຢູດາທີ່ເປັນຊະເລີຍໃນບາບີໂລນຢາກສາບແຊ່ງຜູ້ໃດ ເຂົາເຈົ້າກໍຈະເວົ້າວ່າ “ຂໍໃຫ້ພະເຢໂຫວາເຮັດໃຫ້ເຈົ້າເປັນຄືກັບເຊເດກີຢາແລະເປັນຄືກັບອາຮາບທີ່ຖືກກະສັດບາບີໂລນເອົາໄຟຈູດ!” 23 ຍ້ອນເຂົາເຈົ້າເຮັດສິ່ງທີ່ເປັນຕາອາຍໃນອິດສະຣາເອນ.+ ເຂົາເຈົ້າຫຼິ້ນຊູ້ກັບເມຍຂອງເພື່ອນບ້ານແລະເວົ້າເລື່ອງຕົວະໂດຍອ້າງຊື່ຂອງເຮົາ ທັງໆທີ່ເຮົາບໍ່ໄດ້ສັ່ງເຂົາເຈົ້າ.+
“ເຮົາຮູ້ເລື່ອງນີ້ແລະເຮົາເປັນພະຍານໄດ້.”+ ພະເຢໂຫວາເວົ້າໄວ້ແນວນີ້.’
24 ໃຫ້ເຈົ້າບອກເຊມາຢາ+ຄົນເນເຮລາມວ່າ 25 ‘ພະເຢໂຫວາຜູ້ບັນຊາການກອງທັບພະເຈົ້າຂອງອິດສະຣາເອນບອກວ່າ “ເຈົ້າໄດ້ສົ່ງຈົດໝາຍໃນຊື່ຂອງເຈົ້າເອງໄປຫາປະໂລຫິດເຊຟານີຢາ+ລູກຊາຍຂອງມາອາເສຢາ ພວກປະໂລຫິດທຸກຄົນ ແລະປະຊາຊົນທຸກຄົນທີ່ຢູ່ໃນເຢຣູຊາເລັມ. ເຈົ້າຂຽນວ່າ 26 ‘ເຊຟານີຢາ ພະເຢໂຫວາໄດ້ແຕ່ງຕັ້ງເຈົ້າເພື່ອໃຫ້ເບິ່ງແຍງວິຫານຂອງພະເຢໂຫວາແທນປະໂລຫິດເຢໂຮຢາດາ. ເຈົ້າຈະຕ້ອງຈັດການຄົນບ້າທຸກຄົນທີ່ອ້າງວ່າເປັນຜູ້ພະຍາກອນແລະຈັບເຂົາເຈົ້າໃສ່ຂື່ຄາໄວ້.*+ 27 ແຕ່ເປັນຫຍັງເຈົ້າບໍ່ໄດ້ລົງໂທດເຢເຣມີຢາຄົນອານາໂທດ+ທີ່ອ້າງວ່າເປັນຜູ້ພະຍາກອນ?+ 28 ລາວເຖິງຂັ້ນສົ່ງຈົດໝາຍມາຫາພວກເຮົາຢູ່ບາບີໂລນແລະບອກວ່າ “ເຈົ້າຈະຢູ່ນີ້ອີກດົນ! ໃຫ້ປຸກເຮືອນແລະອາໄສຢູ່ບ່ອນນີ້. ໃຫ້ເຮັດສວນແລະກິນໝາກໄມ້ຈາກສວນນັ້ນ+ . . .”’”’”
29 ຕອນທີ່ປະໂລຫິດເຊຟານີຢາ+ອ່ານຈົດໝາຍນີ້ ຜູ້ພະຍາກອນເຢເຣມີຢາກໍຟັງຢູ່ນຳ. 30 ພະເຢໂຫວາເວົ້າກັບເຢເຣມີຢາວ່າ: 31 “ໃຫ້ເຈົ້າສົ່ງຂ່າວໄປບອກທຸກຄົນທີ່ເປັນຊະເລີຍວ່າ ‘ພະເຢໂຫວາເວົ້າກ່ຽວກັບເຊມາຢາຄົນເນເຮລາມວ່າ “ຍ້ອນເຊມາຢາພະຍາກອນໃຫ້ພວກເຈົ້າຟັງທັງໆທີ່ເຮົາບໍ່ໄດ້ສົ່ງລາວມາແລະພະຍາຍາມເຮັດໃຫ້ພວກເຈົ້າເຊື່ອຄຳຕົວະຂອງລາວ+ 32 ດັ່ງນັ້ນ ພະເຢໂຫວາຈຶ່ງເວົ້າວ່າ ‘ເຮົາຈະລົງໂທດເຊມາຢາຄົນເນເຮລາມແລະລູກຫຼານຂອງລາວ. ລູກຫຼານຂອງລາວຈະບໍ່ມີໃຜລອດຈັກຄົນແລະຈະບໍ່ມີໃຜເຫັນສິ່ງດີທີ່ເຮົາຈະເຮັດໃຫ້ປະຊາຊົນຂອງເຮົາ ຍ້ອນເຊມາຢາກະຕຸ້ນປະຊາຊົນໃຫ້ກະບົດຕໍ່ພະເຢໂຫວາ.’ ພະເຢໂຫວາເວົ້າໄວ້ແນວນີ້.”’”