ຈົດໝາຍສະບັບທີສອງເຖິງຄລິດສະຕຽນໃນເມືອງໂກຣິນໂທ
8 ພີ່ນ້ອງເອີ້ຍ ພວກເຮົາຢາກໃຫ້ພວກເຈົ້າຮູ້ເລື່ອງທີ່ພະເຈົ້າສະແດງຄວາມກະລຸນາທີ່ຍິ່ງໃຫຍ່ຕໍ່ປະຊາຄົມຕ່າງໆໃນແຂວງມາເກໂດເນຍ.+ 2 ຕອນທີ່ເຂົາເຈົ້າເຈິຄວາມທຸກເຊິ່ງເປັນການທົດສອບຄັ້ງໃຫຍ່ ເຂົາເຈົ້າກໍຍັງມີຄວາມຍິນດີແລະມີນ້ຳໃຈເອື້ອເຟື້ອທັງໆທີ່ທຸກຍາກຂາດເຂີນ. 3 ເຂົາເຈົ້າໃຫ້ຕາມຄວາມສາມາດຂອງໂຕເອງ.+ ທີ່ຈິງ ຂ້ອຍບອກໄດ້ເລີຍວ່າ ເຂົາເຈົ້າໃຫ້ເກີນຄວາມສາມາດຊ້ຳ.+ 4 ເຂົາເຈົ້າເຖິງຂັ້ນອ້ອນວອນພວກເຮົາເພື່ອໃຫ້ເຂົາເຈົ້າມີສ່ວນຮ່ວມໃນການບໍລິຈາກແລະຊ່ວຍເຫຼືອບັນເທົາທຸກພວກຜູ້ບໍລິສຸດ.*+ ເຂົາເຈົ້າຖືວ່າເປັນກຽດທີ່ໄດ້ເຮັດແບບນັ້ນ. 5 ເຂົາເຈົ້າເຮັດຫຼາຍກວ່າທີ່ພວກເຮົາຄາດໝາຍໄວ້ຊ້ຳ. ສິ່ງສຳຄັນທີ່ສຸດສຳລັບເຂົາເຈົ້າແມ່ນ ການເຮັດຕາມທີ່ພະເຈົ້າຕ້ອງການໂດຍທຸ່ມເທໂຕເອງເພື່ອຜູ້ເປັນນາຍແລະເພື່ອພວກເຮົາ. 6 ດັ່ງນັ້ນ ພວກເຮົາຈຶ່ງບອກຕີໂຕ+ໃຫ້ໄປລວບລວມເອົາເຄື່ອງບໍລິຈາກນຳພວກເຈົ້າໃຫ້ແລ້ວ ຍ້ອນລາວເປັນຄົນເລີ່ມວຽກນີ້. 7 ພວກເຈົ້າມີພ້ອມທຸກຢ່າງຢູ່ແລ້ວ ທັງຄວາມເຊື່ອ ຄວາມສາມາດໃນການເວົ້າ ຄວາມຮູ້ ຄວາມກະຕືລືລົ້ນ ແລະຄວາມຮັກທີ່ໄດ້ຈາກພວກເຮົາ. ດັ່ງນັ້ນ ຂໍໃຫ້ມີນ້ຳໃຈບໍລິຈາກຢ່າງໃຈກວ້າງນຳ.+
8 ຂ້ອຍເວົ້າແບບນີ້ບໍ່ແມ່ນວ່າຈະສັ່ງພວກເຈົ້າ ແຕ່ຢາກໃຫ້ພວກເຈົ້າຮູ້ວ່າຄົນອື່ນມີຄວາມກະຕືລືລົ້ນສ່ຳໃດ ແລະເພື່ອທົດສອບວ່າພວກເຈົ້າມີຄວາມຮັກແທ້ບໍ. 9 ພວກເຈົ້າກໍຮູ້ວ່າພະເຢຊູຄລິດຜູ້ເປັນນາຍຂອງພວກເຮົາມີຄວາມກະລຸນາທີ່ຍິ່ງໃຫຍ່. ເຖິງວ່າເພິ່ນຮັ່ງຫຼາຍ ແຕ່ກໍຍອມທຸກຍາກຍ້ອນເຫັນແກ່ພວກເຈົ້າ+ ເພື່ອຄວາມທຸກຍາກຂອງເພິ່ນຈະເຮັດໃຫ້ພວກເຈົ້າຮັ່ງ.
10 ຂ້ອຍຂໍອອກຄວາມເຫັນວ່າ+ ການເຮັດວຽກນີ້ເປັນປະໂຫຍດຕໍ່ພວກເຈົ້າເອງ ຍ້ອນໜຶ່ງປີແລ້ວທີ່ພວກເຈົ້າເລີ່ມເຮັດວຽກນີ້. ພວກເຈົ້າບໍ່ພຽງແຕ່ໄດ້ເລີ່ມວຽກນີ້ເທົ່ານັ້ນ ແຕ່ພວກເຈົ້າຢາກເຮັດແທ້ໆ. 11 ດັ່ງນັ້ນ ຕອນນີ້ຂໍໃຫ້ພວກເຈົ້າເຮັດສິ່ງທີ່ໄດ້ເລີ່ມໄວ້ນັ້ນໃຫ້ສຳເລັດ ເພື່ອພວກເຈົ້າຈະເຮັດໃຫ້ແລ້ວຕາມຄວາມສາມາດຂອງພວກເຈົ້າຄືກັບທີ່ຕັ້ງໃຈໄວ້ຕັ້ງແຕ່ຕອນເລີ່ມຕົ້ນ. 12 ຖ້າຜູ້ໃດມີໃຈພ້ອມຢູ່ແລ້ວແລະໃຫ້ຕາມທີ່ໃຫ້ໄດ້+ ພະເຈົ້າກໍພໍໃຈ. ເພິ່ນບໍ່ຄາດໝາຍເກີນກວ່າທີ່ຈະໃຫ້ໄດ້. 13 ບໍ່ແມ່ນວ່າຂ້ອຍຢາກໃຫ້ຄົນອື່ນສະບາຍ ແລ້ວໃຫ້ພວກເຈົ້າຕ້ອງລຳບາກ 14 ແຕ່ຢາກໃຫ້ສະເລ່ຍກັນ. ສິ່ງທີ່ພວກເຈົ້າມີເຫຼືອໃນຕອນນີ້ອາດຊ່ວຍໃຫ້ເຂົາເຈົ້າໄດ້ໃນສິ່ງທີ່ເຂົາເຈົ້າຂາດຢູ່ ແລະສິ່ງທີ່ເຂົາເຈົ້າມີເຫຼືອອາດຊ່ວຍໃຫ້ພວກເຈົ້າໄດ້ໃນສິ່ງທີ່ພວກເຈົ້າຂາດຢູ່ຄືກັນ. ແບບນີ້ແຫຼະຈຶ່ງເປັນການສະເລ່ຍກັນ. 15 ຖ້າເຮັດແນວນີ້ກໍຈະເປັນຄືກັບທີ່ພະຄຳພີບອກໄວ້ວ່າ: “ຄົນທີ່ມີຫຼາຍບໍ່ໄດ້ມີຈົນເຫຼືອເຟືອ ສ່ວນຄົນທີ່ມີໜ້ອຍກໍບໍ່ໄດ້ຂາດເຂີນຫຍັງ.”+
16 ຂອບໃຈພະເຈົ້າທີ່ໃຫ້ຕີໂຕມີໃຈຄືກັບພວກເຮົາທີ່ກະຕືລືລົ້ນຢາກຊ່ວຍພວກເຈົ້າ.+ 17 ລາວບໍ່ພຽງແຕ່ເຮັດຕາມທີ່ພວກເຮົາບອກ ແຕ່ລາວເອງກໍກະຕືລືລົ້ນຢາກໄປຫາພວກເຈົ້າ. 18 ພວກເຮົາຍັງໃຫ້ພີ່ນ້ອງຊາຍຄົນໜຶ່ງໄປນຳຕີໂຕ. ລາວໄດ້ຮັບຄຳຊົມເຊີຍຈາກທຸກປະຊາຄົມຍ້ອນສິ່ງທີ່ລາວເຮັດເພື່ອຂ່າວດີ. 19 ນອກຈາກນັ້ນ ປະຊາຄົມຕ່າງໆຍັງໄດ້ແຕ່ງຕັ້ງລາວໃຫ້ເດີນທາງຮ່ວມກັບພວກເຮົາເພື່ອເບິ່ງແຍງການແຈກຢາຍເຄື່ອງບໍລິຈາກ. ສິ່ງນີ້ເຮັດໃຫ້ຜູ້ເປັນນາຍໄດ້ຮັບການຍົກຍ້ອງ ແລະສະແດງວ່າພວກເຮົາມີນ້ຳໃຈຢາກຊ່ວຍເຫຼືອຄົນອື່ນ. 20 ພວກເຮົາເຮັດແບບນີ້ເພື່ອບໍ່ໃຫ້ມີຜູ້ໃດຕຳໜິພວກເຮົາໄດ້ໃນເລື່ອງການແຈກຢາຍເຄື່ອງບໍລິຈາກຈຳນວນຫຼາຍທີ່ພວກເຮົາເບິ່ງແຍງຢູ່ນັ້ນ.+ 21 ພວກເຮົາ ‘ເຮັດທຸກສິ່ງຢ່າງສັດຊື່ ທັງໃນສາຍຕາພະເຢໂຫວາ*ແລະໃນສາຍຕາມະນຸດ.’+
22 ພວກເຮົາຍັງໃຫ້ພີ່ນ້ອງຊາຍອີກຄົນໜຶ່ງໄປນຳເຂົາເຈົ້າ. ພວກເຮົາທົດສອບພີ່ນ້ອງຜູ້ນີ້ແລ້ວວ່າລາວເປັນຄົນດຸໝັ່ນ ແລະຕອນນີ້ລາວແຮ່ງດຸໝັ່ນຫຼາຍຂຶ້ນອີກຍ້ອນລາວໝັ້ນໃຈໃນພວກເຈົ້າຫຼາຍ. 23 ແຕ່ຖ້າມີຜູ້ໃດສົງໄສໃນໂຕຕີໂຕ ກໍໃຫ້ຮູ້ວ່າລາວເປັນໝູ່ເຮັດວຽກຮັບໃຊ້ນຳຂ້ອຍແລະເຮັດວຽກເພື່ອປະໂຫຍດຂອງພວກເຈົ້າ ຫຼືຖ້າຜູ້ໃດສົງໄສໃນໂຕພີ່ນ້ອງທີ່ໄປນຳລາວ ກໍຢ່າລືມວ່າເຂົາເຈົ້າເປັນຕົວແທນ*ຂອງປະຊາຄົມຕ່າງໆແລະເປັນຄົນທີ່ຍົກຍ້ອງພະຄລິດ. 24 ດັ່ງນັ້ນ ຂໍໃຫ້ເຮັດໃຫ້ເຂົາເຈົ້າເຫັນວ່າພວກເຈົ້າຮັກເຂົາເຈົ້າແທ້ໆ+ ແລະເຮັດໃຫ້ປະຊາຄົມຕ່າງໆຮູ້ວ່າເປັນຫຍັງພວກເຮົາຈຶ່ງອວດເລື່ອງພວກເຈົ້າ.