ກິດຈະການຂອງອັກຄະສາວົກ
12 ຕອນນັ້ນ ກະສັດເຮໂຣດເລີ່ມທຳຮ້າຍບາງຄົນໃນປະຊາຄົມ.+ 2 ລາວສັ່ງທະຫານໃຫ້ເອົາດາບຂ້າຢາໂກໂບທີ່ເປັນອ້າຍນ້ອງກັບໂຢຮັນ.+ 3 ເມື່ອເຫັນວ່າພວກຢິວພໍໃຈ ລາວຈຶ່ງຈັບເປໂຕນຳ. (ຕອນນັ້ນເປັນຍາມເທດສະການກິນເຂົ້າຈີ່ບໍ່ມີເຊື້ອ.)+ 4 ເມື່ອລາວຈັບເປໂຕໄດ້ແລ້ວກໍຂັງໄວ້ໃນຄຸກ+ ແລະໃຫ້ມີທະຫານຄຸມມື້ລະ 4 ກະ ກະລະ 4 ຄົນ ແລະຕັ້ງໃຈວ່າຫຼັງຈາກເທດສະການປັດສະຄາຈະເອົາເປໂຕອອກມາຕັດສິນຕໍ່ໜ້າປະຊາຊົນ. 5 ເປໂຕຈຶ່ງຕ້ອງຢູ່ໃນຄຸກ ແລະພີ່ນ້ອງໃນປະຊາຄົມກໍອະທິດຖານເຖິງພະເຈົ້າເພື່ອເປໂຕຢ່າງຈິງຈັງ.+
6 ໃນຄືນກ່ອນທີ່ເຮໂຣດຈະເອົາເປໂຕອອກມາຕັດສິນຕໍ່ໜ້າປະຊາຊົນ ເປໂຕກຳລັງນອນຫຼັບຢູ່. ມີໂສ້ 2 ເສັ້ນລ່າມລາວໄວ້ກັບທະຫານເບື້ອງລະຄົນ ແລະມີຄົນຍາມເຝົ້າຢູ່ໜ້າປະຕູຄຸກ. 7 ທັນໃດນັ້ນກໍມີທູດສະຫວັນຂອງພະເຢໂຫວາ*ມາຢືນຢູ່ຫັ້ນ+ ແລະມີແສງສະຫວ່າງເຈີດຈ້າສ່ອງໄປທົ່ວຄຸກ. ທູດສະຫວັນອົງນັ້ນຕົບຂ້າງເປໂຕໃຫ້ຕື່ນແລະບອກວ່າ: “ຟ້າວລຸກຂຶ້ນໄວໆ!” ແລ້ວໂສ້ກໍຫຼຸດອອກຈາກມືເປໂຕ.+ 8 ທູດສະຫວັນບອກເປໂຕວ່າ: “ນຸ່ງເຄື່ອງ*ແລະໃສ່ເກີບ” ເປໂຕກໍເຮັດຕາມ ແລ້ວທູດສະຫວັນບອກວ່າ: “ໃສ່ເສື້ອຄຸມແລ້ວນຳຫຼັງຂ້ອຍມາໄວໆ.” 9 ເປໂຕກໍນຳຫຼັງທູດສະຫວັນອອກໄປ ແຕ່ລາວບໍ່ຮູ້ວ່າເຫດການທີ່ເກີດຂຶ້ນຢູ່ນັ້ນເປັນເລື່ອງຈິງ. ລາວຄິດວ່າກຳລັງເຫັນນິມິດ. 10 ເມື່ອຜ່ານທະຫານຍາມຊັ້ນທີ 1 ແລະຊັ້ນທີ 2 ເຂົາເຈົ້າກໍມາຮອດປະຕູເຫຼັກທີ່ເປັນທາງເຂົ້າໄປໃນເມືອງ ແລ້ວປະຕູນັ້ນກໍເປີດເອງ. ເມື່ອອອກໄປແລ້ວທັງສອງຄົນກໍໄປຫົນທາງເສັ້ນໜຶ່ງ ແລະທັນໃດນັ້ນທູດສະຫວັນກໍຫາຍໂຕໄປ. 11 ເມື່ອເປໂຕຮູ້ເມື່ອກໍເວົ້າວ່າ: “ຕອນນີ້ ຂ້ອຍຮູ້ແລ້ວວ່າພະເຢໂຫວາ*ໃຊ້ທູດສະຫວັນຂອງເພິ່ນມາຊ່ວຍຂ້ອຍໃຫ້ລອດຈາກເຮໂຣດແລະຈາກທຸກສິ່ງທີ່ພວກຢິວຢາກໃຫ້ເກີດຂຶ້ນກັບຂ້ອຍ.”+
12 ເມື່ອເປໂຕຄິດກ່ຽວກັບເລື່ອງທີ່ເກີດຂຶ້ນ ລາວກໍໄປເຮືອນຂອງມາຣິອາທີ່ເປັນແມ່ຂອງໂຢຮັນທີ່ມີອີກຊື່ໜຶ່ງວ່າມາຣະໂກ.+ ຢູ່ຫັ້ນມີຫຼາຍຄົນມາລວມກັນແລະອະທິດຖານ. 13 ເປໂຕເຄາະປະຕູຮົ້ວ ແລ້ວສາວໃຊ້ຊື່ໂຣເດກໍມາເບິ່ງວ່າແມ່ນໃຜເຄາະ. 14 ເມື່ອຈື່ໄດ້ວ່າເປັນສຽງເປໂຕ ລາວກໍດີໃຈຫຼາຍຈົນລືມເປີດປະຕູໃຫ້ ແຕ່ພັດແລ່ນເຂົ້າໄປບອກຄົນໃນເຮືອນວ່າເປໂຕຢືນຢູ່ໜ້າປະຕູຮົ້ວ. 15 ຄົນໃນເຮືອນເວົ້າກັບໂຣເດວ່າ: “ເຈົ້າເປັນບ້າລະຕີ້” ແຕ່ລາວຢືນຢັນວ່າແມ່ນເປໂຕແທ້ໆ. ເຂົາເຈົ້າຈຶ່ງບອກວ່າ: “ຄືຊິແມ່ນທູດສະຫວັນປະຈຳໂຕເປໂຕຕີ້.” 16 ເປໂຕຍັງຢືນເຄາະປະຕູຢູ່ຫັ້ນຈົນເຂົາເຈົ້າມາເປີດປະຕູແລະເຫັນລາວ. ເມື່ອເຂົາເຈົ້າເຫັນລາວກໍພາກັນແປກໃຈຫຼາຍ. 17 ເປໂຕຍົກມືຂຶ້ນບອກໃຫ້ເຂົາເຈົ້າມິດ ແລ້ວເລົ່າໃຫ້ເຂົາເຈົ້າຟັງຢ່າງລະອຽດວ່າພະເຢໂຫວາ*ຊ່ວຍລາວອອກມາຈາກຄຸກໄດ້ແນວໃດ ແລະເວົ້າວ່າ: “ໄປບອກເລື່ອງນີ້ໃຫ້ຢາໂກໂບ+ແລະພວກພີ່ນ້ອງຮູ້ເດີ້.” ແລ້ວເປໂຕກໍເດີນທາງໄປບ່ອນອື່ນ.
18 ເມື່ອຮອດຕອນເຊົ້າກໍມີຄວາມສັບສົນວຸ່ນວາຍຫຼາຍໃນພວກທະຫານ. ເຂົາເຈົ້າພາກັນສົງໄສວ່າເປໂຕໄປໃສ. 19 ເຮໂຣດພະຍາຍາມຊອກຫາເປໂຕຢູ່ທຸກບ່ອນ ແຕ່ກໍບໍ່ເຫັນ. ລາວຈຶ່ງສອບສວນພວກທະຫານຍາມແລະສັ່ງໃຫ້ລົງໂທດເຂົາເຈົ້າ.+ ແລ້ວເຮໂຣດກໍອອກຈາກແຂວງຢູດາຍໄປຢູ່ເມືອງກາຍຊາເຣຍໄລຍະໜຶ່ງ.
20 ຕອນນັ້ນ ເຮໂຣດກຳລັງໃຈຮ້າຍໃຫ້ຄົນໃນເມືອງຕີເຣແລະຊີໂດນ. ຄົນຈາກ 2 ເມືອງນັ້ນຈຶ່ງພາກັນມາຫາເຮໂຣດ. ເຂົາເຈົ້າໂນ້ມນ້າວລາຊະໂຕທີ່ເປັນຜູ້ເບິ່ງແຍງວັງໃຫ້ຊ່ວຍ ແລະເຂົາເຈົ້າໄດ້ໄປຂໍຄືນດີກັບເຮໂຣດ ຍ້ອນເມືອງຂອງເຂົາເຈົ້າຕ້ອງເພິ່ງຂອງຢູ່ຂອງກິນຈາກແຜ່ນດິນຂອງກະສັດເຮໂຣດ. 21 ເມື່ອຮອດມື້ສຳຄັນ ເຮໂຣດແຕ່ງຊຸດກະສັດເຕັມຍົດແລະນັ່ງເທິງບັນລັງຕັດສິນແລ້ວເວົ້າຕໍ່ໜ້າປະຊາຊົນ. 22 ຄົນທີ່ມາລວມກັນກໍຮ້ອງຂຶ້ນວ່າ: “ນີ້ແມ່ນສຽງພະເຈົ້າ ບໍ່ແມ່ນສຽງມະນຸດ!” 23 ທັນໃດນັ້ນ ທູດສະຫວັນຂອງພະເຢໂຫວາ*ກໍລົງໂທດເຮໂຣດຍ້ອນລາວບໍ່ໄດ້ໃຫ້ກຽດພະເຈົ້າ ລາວຈຶ່ງເຈັບປ່ວຍແລະຖືກໜອນກັດກິນຈົນຕາຍ.
24 ຄຳສອນຂອງພະເຢໂຫວາ*ກໍແພ່ອອກໄປແລະຄົນກໍເຂົ້າມາເຊື່ອຫຼາຍຂຶ້ນເລື້ອຍໆ.+
25 ເມື່ອບາຣະນາບາ+ກັບໂຊໂລເຮັດວຽກຊ່ວຍເຫຼືອພີ່ນ້ອງໃນເມືອງເຢຣູຊາເລັມແລ້ວໆ+ ເຂົາເຈົ້າກໍກັບໄປແລະພາໂຢຮັນທີ່ມີອີກຊື່ໜຶ່ງວ່າມາຣະໂກໄປນຳ.+