ປະຖົມມະການ

15 ຫຼັງ​ຈາກ​ນັ້ນ ພະ​ເຢໂຫວາ​ເວົ້າ​ກັບ​ອັບຣາມ​ຜ່ານ​ທາງ​ນິມິດ*ວ່າ: “ອັບຣາມ ບໍ່​ຕ້ອງ​ຢ້ານ​ເດີ້.+ ເຮົາຈະ​ປົກປ້ອງເຈົ້າ*+ ແລະ​ຈະ​ໃຫ້​ລາງວັນ​ທີ່​ຍິ່ງໃຫຍ່ກັບເຈົ້າ.”+ 2 ອັບຣາມ​ຕອບ​ວ່າ: “ພະ​ເຢໂຫວາ​ຜູ້​ຍິ່ງໃຫຍ່​ສູງ​ສຸດ ພະອົງ​ຈະ​ເອົາ​ຫຍັງ​ໃຫ້​ລູກ? ມັນ​ຈະ​ບໍ່​ມີ​ປະໂຫຍດ​ຫຍັງ​ດອກ ເພາະ​ລູກ​ເອງ​ກໍ​ຍັງ​ບໍ່​ມີ​ລູກ​ເທື່ອ. ຜູ້​ທີ່​ຈະ​ໄດ້​ມູນ​ຂອງ​ລູກ​ແມ່ນ​ເອລີເອເຊ​ຄົນ​ດາມາເຊ.”+ 3 ອັບຣາມ​ເວົ້າ​ຕື່ມ​ວ່າ: “ພະອົງ​ບໍ່​ໄດ້​ໃຫ້​ລູກ​ມີ​ຜູ້​ສືບ​ເຊື້ອ​ສາຍ+ ແລະ​ຄົນ​ທີ່​ເຮັດ​ວຽກ​ໃຫ້​ລູກ​ຈະ​ໄດ້​ຮັບ​ສິດ​ນັ້ນ​ແທນ.” 4 ແຕ່​ພະ​ເຢໂຫວາ​ບອກ​ລາວ​ວ່າ: “ຜູ້​ຊາຍ​ຄົນ​ນັ້ນ​ຈະ​ບໍ່​ໄດ້​ສືບ​ເຊື້ອ​ສາຍ​ຂອງ​ເຈົ້າ. ແຕ່​ລູກ​ແທ້​ໆ​ຂອງ​ເຈົ້າ​ຈະ​ໄດ້​ຮັບ​ສິດ​ນັ້ນ.”+

5 ພະເຈົ້າ​ພາ​ອັບຣາມ​ອອກ​ມາ​ທາງ​ນອກ​ແລະ​ເວົ້າ​ວ່າ: “ຂໍ​ໃຫ້​ເຈົ້າ​ແນມ​ເບິ່ງ​ຟ້າ​ແລະ​ນັບ​ດາວ​ເບິ່ງ. ເຈົ້າ​ນັບ​ໄດ້​ບໍ?” ແລ້ວ​ເພິ່ນ​ກໍ​ເວົ້າ​ອີ​ກວ່າ: “ລູກ​ຫຼານ​ຂອງ​ເຈົ້າ​ກໍ​ຈະ​ຫຼາຍ​ຄື​ກັບ​ດາວ​ເຫຼົ່າ​ນີ້​ແຫຼະ.”+ 6 ອັບຣາມ​ເຊື່ອ​ໃນ​ພະ​ເຢໂຫວາ+ ແລະ​ເພິ່ນ​ກໍ​ຖື​ວ່າ​ອັບຣາມ​ເຮັດ​ສິ່ງ​ທີ່​ດີ.+ 7 ເພິ່ນ​ເວົ້າ​ຕື່ມ​ວ່າ: “ເຮົາ​ແມ່ນ​ເຢໂຫວາ​ຜູ້​ທີ່​ພາ​ເຈົ້າ​ອອກ​ຈາກ​ເມືອງ​ອູເຣ​ຂອງ​ພວກ​ການເດອາ ເພື່ອ​ຈະ​ໃຫ້​ເຈົ້າ​ໄດ້​ຮັບ​ແຜ່ນດິນ​ນີ້.”+ 8 ລາວ​ຖາມ​ວ່າ: “ພະ​ເຢໂຫວາ​ຜູ້​ຍິ່ງໃຫຍ່​ສູງ​ສຸດ ລູກ​ຈະ​ຮູ້​ໄດ້​ແນວ​ໃດ​ວ່າ​ລູກ​ຊິ​ໄດ້​ແຜ່ນດິນ​ນີ້?” 9 ເພິ່ນ​ຕອບ​ວ່າ: “ໃຫ້​ເຈົ້າ​ເອົາ​ງົວ​ໂຕ​ແມ່​ອາຍຸ 3 ປີ ແບ້​ໂຕ​ແມ່​ອາຍຸ 3 ປີ ແກະ​ໂຕ​ຜູ້​ອາຍຸ 3 ປີ ນົກ​ເຂົາ​ແລະ​ນົກ​ກາງແກ ທັງ​ໝົດ​ນີ້​ແນວ​ລະ​ໂຕ​ມາ​ໃຫ້​ເຮົາ.” 10 ອັບຣາມ​ເອົາ​ສັດ​ເຫຼົ່າ​ນັ້ນ​ມາ​ແລະ​ຜ່າ​ເຄິ່ງ ແລ້ວ​ວາງ​ໄວ້​ຄົນ​ລະ​ຟາກ. ແຕ່​ນົກ​ລາວ​ບໍ່​ໄດ້​ຜ່າ​ເຄິ່ງ. 11 ຈາກ​ນັ້ນ ພວກ​ນົກ​ທີ່​ກິນ​ຊີ້ນ​ກໍ​ມາ​ສັບ​ມາ​ຕອດ​ຊີ້ນ​ສັດ​ທີ່​ລາວ​ຂ້າ​ໄວ້. ແຕ່​ອັບຣາມ​ເຝົ້າ​ຢູ່​ຫັ້ນ​ແລະ​ໄລ່​ພວກ​ມັນ​ໜີ.

12 ຫຼັງ​ຈາກ​ຕາເວັນ​ຕົກ​ດິນ ອັບຣາມ​ກໍຫຼັບ​ສະໜິດ ແລ້ວ​ລາວ​ກໍ​ຝັນ​ເຫັນ​ຄວາມ​ມືດ​ທີ່​ເປັນ​ຕາ​ຢ້ານ. 13 ຈາກ​ນັ້ນ ພະເຈົ້າ​ເວົ້າ​ກັບ​ອັບຣາມ​ວ່າ: “ລູກ​ຫຼານ​ຂອງ​ເຈົ້າ​ຈະ​ໄປ​ຢູ່​ໃນ​ແຜ່ນດິນ​ຂອງ​ຄົນ​ອື່ນ. ເຂົາ​ເຈົ້າ​ຈະ​ເປັນທາດຂອງ​ພວກ​ນັ້ນ​ແລະ​ຖືກ​ກົດ​ຂີ່​ເປັນ​ເວລາ 400 ປີ.+ 14 ເຮົາ​ຈະ​ລົງໂທດ​ຊາດ​ທີ່​ປົກຄອງ​ເຂົາ​ເຈົ້າ+ ແລະ​ຈາກ​ນັ້ນ ເຂົາ​ເຈົ້າ​ຈະ​ອອກ​ຈາກ​ປະເທດ​ນັ້ນ​ພ້ອມ​ກັບ​ຊັບ​ສົມບັດ​ຈຳນວນ​ຫຼາຍ.+ 15 ເຈົ້າ​ຈະ​ອາຍຸ​ຍືນ​ຍາວ​ຈົນ​ເຖົ້າ​ຈົນ​ແກ່​ແລະ​ຕາຍ​ຢ່າງ​ສະຫງົບ ແລ້ວ​ຈະ​ຖືກ​ຝັງ​ຄື​ກັບ​ປູ່​ຍ່າ​ຕາ​ນາຍ​ຂອງ​ເຈົ້າ.+ 16 ແຕ່​ໃນ​ຊົ່ວ​ອາຍຸ​ທີ 4 ລູກ​ຫຼານ​ຂອງ​ເຈົ້າ​ຈະ​ກັບ​ຄືນ​ມາ​ນີ້+ ເພາະ​ຍັງ​ບໍ່​ຮອດ​ເວລາ​ທີ່ພວກ​ອາໂມ​ຈະຖືກ​ລົງໂທດ​ເທື່ອ.”*+

17 ຫຼັງ​ຈາກ​ຕາເວັນ​ຕົກ​ດິນ​ແລະມືດ​ແລ້ວ ລາວ​ເຫັນ​ເຕົາ​ໄຟ​ທີ່​ມີ​ຄວັນ​ແລະ​ເຫັນ​ກະບອງ​ໄຟ​ຜ່ານ​ລະຫວ່າງ​ຊີ້ນ​ສັດທີ່​ຜ່າ​ເຄິ່ງ. 18 ໃນ​ມື້​ນັ້ນ​ພະ​ເຢໂຫວາ​ໄດ້​ເຮັດ​ສັນຍາ​ກັບ​ອັບຣາມ+​ວ່າ: “ເຮົາ​ຈະ​ເອົາ​ແຜ່ນດິນ​ນີ້+ໃຫ້​ລູກ​ຫຼານ​ຂອງ​ເຈົ້າ​ຕັ້ງ​ແຕ່​ແມ່ນ້ຳ​ເອຢິບ​ຈົນ​ຮອດແມ່ນ້ຳ​ເອິຟາຣາດ+​ເຊິ່ງ​ເປັນ​ແມ່ນ້ຳ​ໃຫຍ່. 19 ແຜ່ນດິນ​ທີ່​ເຮົາ​ຈະ​ເອົາ​ໃຫ້​ມີ​ແຜ່ນດິນ​ຂອງ​ພວກ​ເກ​ນີ+​ ພວກ​ເກນິດຊີ ພວກ​ກັດໂມ 20 ພວກ​ເຮດ+ ພວກ​ເປຣິຊີ+ ພວກ​ເຣຟາຢິມ+ 21 ພວກ​ອາໂມ ພວກ​ການາອານ ພວກ​ກີກາຊີ ແລະ​ພວກ​ເຢບຸດ.”+