ເອຊາຢາ
25 ພະເຢໂຫວາ ພະອົງເປັນພະເຈົ້າຂອງລູກ.
ລູກຂໍຍົກຍ້ອງແລະສັນລະເສີນຊື່ຂອງພະອົງ
ຍ້ອນພະອົງເຮັດສິ່ງທີ່ເປັນຕາງຶດຫຼາຍຢ່າງ.+
ພະອົງຕັ້ງໃຈເຮັດສິ່ງເຫຼົ່ານີ້ຕັ້ງແຕ່ດົນແລ້ວ.+
ພະອົງເຮັດຕາມທີ່ເວົ້າໄວ້ແລະເຮັດໃຫ້ເຫັນວ່າພະອົງໄວ້ໃຈໄດ້.+
2 ພະອົງເຮັດໃຫ້ເມືອງໜຶ່ງກາຍເປັນກອງຫີນ
ແລະເຮັດໃຫ້ເມືອງທີ່ມີກຳແພງອ້ອມກາຍເປັນຊາກຫັກພັງ.
ພະອົງເຮັດໃຫ້ປ້ອມທີ່ເປັນບ່ອນຢູ່ຂອງຄົນຕ່າງຊາດບໍ່ມີອີກຕໍ່ໄປ
ແລະເມືອງນັ້ນຈະບໍ່ຖືກສ້າງຂຶ້ນມາອີກເລີຍ.
3 ຍ້ອນແນວນີ້ ຊາດໜຶ່ງທີ່ເຂັ້ມແຂງຈະສັນລະເສີນພະອົງ
ແລະເມືອງຂອງຊາດຕ່າງໆທີ່ມັກກົດຂີ່ຈະຢ້ານພະອົງ.+
4 ພະອົງເປັນປ້ອມໃຫ້ຄົນທີ່ຕ່ຳຕ້ອຍ
ແລະເປັນປ້ອມໃຫ້ຄົນທີ່ທຸກໃຈ.+
ພະອົງເປັນບ່ອນປົກປ້ອງຈາກພາຍຸຝົນ
ແລະເປັນຮົ່ມບັງແສງແດດທີ່ຮ້ອນໆ.+
ເມື່ອການຕໍ່ຕ້ານຂອງສັດຕູເປັນຄືກັບພາຍຸຝົນທີ່ຊັດໃສ່ກຳແພງ
5 ແລະເປັນຄືກັບແດດຮ້ອນໆທີ່ຢູ່ບ່ອນກັນດານ
ພະອົງກໍເຮັດໃຫ້ເຂົາເຈົ້າເຊົາຕໍ່ຕ້ານ.
ພະອົງເຮັດໃຫ້ພວກສັດຕູມິດຢູ່
ຄືກັບຂີ້ເຝື້ອບັງແດດທີ່ຮ້ອນໆໄວ້.
6 ຢູ່ພູໜ່ວຍນີ້+ ພະເຢໂຫວາຜູ້ບັນຊາການກອງທັບ
ຈະຈັດງານລ້ຽງໃຫຍ່ສຳລັບຄົນທຸກຊາດ.+
ຢູ່ງານລ້ຽງນີ້ຈະມີຂອງກິນທີ່ດີທີ່ສຸດເຊິ່ງມີແຕ່ຊີ້ນດີໆ*
ມີເຫຼົ້າແວງທີ່ດີທີ່ສຸດ
ແລະເຫຼົ້າແວງທີ່ຕອງດີແລ້ວ.*
7 ຢູ່ພູໜ່ວຍນີ້ ເພິ່ນຈະທຳລາຍ*ຜ້າທີ່ປົກທຸກຄົນໄວ້
ແລະເພິ່ນກໍຈະທຳລາຍຜ້າທີ່ຕ່ຳເອົາທີ່ປົກທຸກຊາດໄວ້ຄືກັນ.
8 ເພິ່ນຈະທຳລາຍຄວາມຕາຍໃຫ້ດັບສູນຕະຫຼອດໄປ.+
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈະເຊັດນ້ຳຕາໃຫ້ທຸກຄົນ.+
ເພິ່ນຈະກຳຈັດຄຳຕຳໜິທີ່ເວົ້າໃຫ້ປະຊາຊົນຂອງເພິ່ນໃຫ້ໝົດໄປຈາກໂລກນີ້.
ພະເຢໂຫວາເວົ້າຈັ່ງຊີ້.
9 ໃນມື້ນັ້ນ ເຂົາເຈົ້າຈະເວົ້າວ່າ:
“ນີ້ແມ່ນພະເຈົ້າຂອງພວກເຮົາ.+
ນີ້ແມ່ນພະເຢໂຫວາ.
ພວກເຮົາໄວ້ວາງໃຈເພິ່ນ.
ໃຫ້ພວກເຮົາດີໃຈແລະມີຄວາມສຸກຍ້ອນເພິ່ນຊ່ວຍພວກເຮົາໃຫ້ລອດ.”+
10 ພະເຢໂຫວາຈະໃຊ້ມືຂອງເພິ່ນປົກປ້ອງພູທີ່ບໍລິສຸດນີ້.+
ໂມອາບຈະຖືກຢຽບຈົນແປໃນແຜ່ນດິນຂອງໂຕເອງ+
ຄືກັບເຟືອງທີ່ຖືກຢຽບຢູ່ກອງຂີ້ສັດ.
11 ເພິ່ນຈະເດ່ມືອອກຟາດໂມອາບ
ຄືກັບຄົນລອຍນ້ຳເດ່ມືອອກຟາດນ້ຳຕອນທີ່ລອຍຢູ່
ແລະເພິ່ນຈະເຮັດໃຫ້ໂມອາບເຊົາຍິ່ງຈອງຫອງ+
ໂດຍໃຊ້ມືຟາດເຂົາເຈົ້າ.
12 ເພິ່ນຈະທຳລາຍ
ເມືອງທີ່ມີກຳແພງສູງໆອ້ອມໄວ້ປ້ອງກັນ
ແລະເພິ່ນຈະເຮັດໃຫ້ກຳແພງນັ້ນມຸ່ນຢູ່ພື້ນ.