ກິດຈະການຂອງອັກຄະສາວົກ
17 ໂປໂລກັບພວກໝູ່ໃຊ້ທາງທີ່ຜ່ານເມືອງອຳຟີໂປລີແລະເມືອງອາໂປໂລເນຍເພື່ອໄປເມືອງເທຊະໂລນິກ.+ ໃນເມືອງນີ້ມີບ່ອນປະຊຸມຂອງຄົນຢິວບ່ອນໜຶ່ງ. 2 ໂປໂລເຂົ້າໄປຫາພວກຢິວຢູ່ຫັ້ນໃນວັນຊະບາໂຕແບບທີ່ເຄີຍເຮັດເປັນປະຈຳ.+ ລາວຍົກເຫດຜົນຈາກພະຄຳພີມາລົມກັບພວກນັ້ນໃນວັນຊະບາໂຕ 3 ອາທິດຕໍ່ກັນ.+ 3 ໂປໂລອະທິບາຍແລະໃຊ້ຂໍ້ພະຄຳພີຫຼາຍຂໍ້ເພື່ອພິສູດວ່າພະຄລິດຕ້ອງທົນທຸກທໍລະມານ+ແລະຄືນມາຈາກຕາຍ.+ ລາວບອກວ່າ: “ພະຄລິດກໍແມ່ນພະເຢຊູຜູ້ນີ້ແຫຼະທີ່ຂ້ອຍປະກາດໃຫ້ພວກເຈົ້າຟັງ.” 4 ຄົນຢິວບາງຄົນຈຶ່ງມາເປັນລູກສິດຂອງພະເຢຊູແລະເຂົ້າຮ່ວມກັບໂປໂລແລະຊີລາ.+ ນອກຈາກນັ້ນ ຄົນກຣີກບັກຫຼາຍໆທີ່ນະມັດສະການພະເຈົ້າ ລວມທັງພວກຜູ້ຍິງຈຳນວນຫຼາຍທີ່ເປັນຄົນຊັ້ນສູງກໍເຮັດແບບນັ້ນຄືກັນ.
5 ແຕ່ພວກຢິວຮູ້ສຶກອິດສາ+ຈຶ່ງລວບລວມພວກນັກເລງທີ່ບໍ່ເຮັດວຽກເຊິ່ງຢູ່ຕາມຕະຫຼາດ. ເມື່ອລວບລວມໄດ້ແລ້ວກໍສ້າງຄວາມປັ່ນປ່ວນວຸ່ນວາຍໃນເມືອງ. ເຂົາເຈົ້າບຸກເຂົ້າໄປເຮືອນຂອງຢາໂຊນແລະພະຍາຍາມຊອກຫາໂປໂລກັບຊີລາເພື່ອເອົາອອກມາໃຫ້ຄົນທີ່ຢູ່ຫັ້ນ. 6 ເມື່ອບໍ່ເຫັນ 2 ຄົນນັ້ນ ເຂົາເຈົ້າກໍລາກຢາໂຊນກັບພີ່ນ້ອງບາງຄົນໄປຫາພວກຜູ້ປົກຄອງເມືອງແລະຮ້ອງສຽງດັງວ່າ: “ພວກທີ່ກໍ່ຄວາມວຸ່ນວາຍໃນທຸກບ່ອນກໍມາຢູ່ນີ້ຄືກັນ+ 7 ແລະຢາໂຊນໄດ້ໃຫ້ເຂົາເຈົ້າມາພັກຢູ່ເຮືອນຂອງລາວ. ພວກນີ້ເຮັດຜິດກົດໝາຍຂອງກາຍຊາ.* ເຂົາເຈົ້າບອກວ່າເຢຊູກໍແມ່ນກະສັດຄືກັນ.”+ 8 ເມື່ອປະຊາຊົນກັບພວກຜູ້ປົກຄອງເມືອງໄດ້ຍິນກໍພາກັນຕົກໃຈ 9 ແຕ່ຫຼັງຈາກໃຫ້ຢາໂຊນກັບຄົນອື່ນໆຈ່າຍຄ່າປະກັນໂຕແລ້ວ ຄົນເຫຼົ່ານັ້ນກໍປ່ອຍເຂົາເຈົ້າໄປ.
10 ເມື່ອຄ່ຳແລ້ວ ພວກພີ່ນ້ອງກໍຟ້າວສົ່ງໂປໂລກັບຊີລາໄປເມືອງເບເຣຍ. ເມື່ອໄປຮອດ ທັງສອງຄົນກໍເຂົ້າໄປໃນບ່ອນປະຊຸມຂອງຄົນຢິວ. 11 ຄົນໃນເມືອງເບເຣຍເປີດໃຈຟັງຫຼາຍກວ່າຄົນໃນເມືອງເທຊະໂລນິກ. ເຂົາເຈົ້າເຕັມໃຈຮັບເອົາຄຳສອນຂອງພະເຈົ້າແລະຢາກຮຽນຮູ້. ເຂົາເຈົ້າສຶກສາຄົ້ນຄວ້າພະຄຳພີຢ່າງລະອຽດທຸກມື້ ເພື່ອເບິ່ງວ່າສິ່ງທີ່ເຂົາເຈົ້າໄດ້ຍິນຈະກົງກັບພະຄຳພີຫຼືບໍ່. 12 ຜົນກໍຄືຫຼາຍຄົນໃນເມືອງນີ້ໄດ້ເຂົ້າມາເປັນລູກສິດ ລວມທັງຜູ້ຊາຍແລະຜູ້ຍິງຄົນກຣີກທີ່ເປັນຄົນຊັ້ນສູງ. 13 ເມື່ອພວກຢິວໃນເມືອງເທຊະໂລນິກຮູ້ວ່າໂປໂລປະກາດຄຳສອນຂອງພະເຈົ້າໃນເມືອງເບເຣຍນຳ ເຂົາເຈົ້າກໍພາກັນມາປຸກລະດົມຄົນຢູ່ເມືອງນີ້.+ 14 ພວກພີ່ນ້ອງຈຶ່ງໃຫ້ໂປໂລໄປແຄມທະເລທັນທີ+ ສ່ວນຊີລາກັບຕີໂມທຽວຍັງຢູ່ເມືອງເບເຣຍ. 15 ພີ່ນ້ອງໄປສົ່ງໂປໂລຮອດເມືອງອາແຖນ ແລະຕອນທີ່ເຂົາເຈົ້າຈະກັບເມືອ ໂປໂລກໍຝາກເຂົາເຈົ້າໃຫ້ບອກຊີລາກັບຕີໂມທຽວ+ວ່າໃຫ້ຟ້າວມາຫາລາວໄວໆ.
16 ຕອນທີ່ໂປໂລຍັງຖ້າຊີລາກັບຕີໂມທຽວຢູ່ເມືອງອາແຖນ ລາວຮູ້ສຶກເຄືອງໃຈທີ່ເຫັນຮູບບູຊາເຕັມເມືອງ. 17 ໂປໂລໄປບ່ອນປະຊຸມຂອງຄົນຢິວ ແລ້ວຍົກເຫດຜົນມາລົມກັບຄົນຢິວແລະຄົນອື່ນໆທີ່ນັບຖືພະເຈົ້າ. ທຸກໆມື້ ໂປໂລໄດ້ລົມກັບຄົນທີ່ລາວເຈິຢູ່ຕະຫຼາດ.* 18 ນັກປັດຊະຍາບາງຄົນທີ່ເປັນພວກເອປີກູຣຽວແລະພວກຊະໂຕອິກໄດ້ມາຖຽງກັບໂປໂລ. ບາງຄົນເວົ້າວ່າ: “ຜູ້ນີ້ທີ່ເວົ້າໂລໆເລໆຊິມາສອນຫຍັງພວກເຮົາ?” ບາງຄົນເວົ້າວ່າ: “ເບິ່ງຄືວ່າລາວເປັນຄົນມາເຜີຍແຜ່ພະເຈົ້າຕ່າງຊາດ.” ເຂົາເຈົ້າເວົ້າແບບນີ້ຍ້ອນໂປໂລປະກາດຂ່າວດີເລື່ອງພະເຢຊູແລະເລື່ອງການຄືນມາຈາກຕາຍ.+ 19 ເຂົາເຈົ້າຈຶ່ງເອົາໂປໂລໄປໂນນພູອາເຣໂອປາໂຄ*ແລະເວົ້າວ່າ: “ບອກພວກເຮົາດຸວ່າຄຳສອນໃໝ່ທີ່ເຈົ້າມາສອນນັ້ນເປັນແນວໃດ? 20 ພວກເຮົາບໍ່ເຄີຍໄດ້ຍິນເລື່ອງທີ່ເຈົ້າເວົ້າ ພວກເຮົາຈຶ່ງຢາກຮູ້ວ່າມັນໝາຍເຖິງຫຍັງແທ້ໆ.” 21 ຄົນອາແຖນກັບຄົນຕ່າງຊາດທີ່ຢູ່*ຫັ້ນມັກໃຊ້ເວລາວ່າງເພື່ອເວົ້າແລະຟັງເລື່ອງໃໝ່ໆ. 22 ໂປໂລຢືນຢູ່ກາງໂນນພູອາເຣໂອປາໂຄ+ແລ້ວເວົ້າວ່າ:
“ຄົນອາແຖນເອີ້ຍ ຂ້ອຍເຫັນວ່າພວກເຈົ້າເບິ່ງຄືເປັນຄົນເຄັ່ງສາສະໜາແລະນັບຖືພະເຈົ້າຕ່າງໆຫຼາຍກວ່າຄົນອື່ນ.+ 23 ຕອນທີ່ຍ່າງກາຍມາ ຂ້ອຍສັງເກດວ່າພວກເຈົ້າຂາບໄຫວ້ບູຊາ*ຫຼາຍສິ່ງ ແລະຂ້ອຍກໍເຫັນແທ່ນບູຊາແທ່ນໜຶ່ງຂຽນວ່າ ‘ສຳລັບພະເຈົ້າທີ່ພວກເຮົາບໍ່ຮູ້ຈັກ.’ ຂ້ອຍກຳລັງເວົ້າເຖິງພະເຈົ້າອົງນັ້ນແຫຼະທີ່ພວກເຈົ້າຂາບໄຫວ້ທັງໆທີ່ບໍ່ຮູ້ຈັກ. 24 ເພິ່ນເປັນພະເຈົ້າທີ່ສ້າງໂລກແລະທຸກສິ່ງໃນໂລກ. ເພິ່ນບໍ່ໄດ້ຢູ່ໃນວິຫານທີ່ມະນຸດສ້າງຂຶ້ນ+ຍ້ອນເພິ່ນເປັນພະເຈົ້າຂອງສະຫວັນແລະໂລກ.+ 25 ເພິ່ນບໍ່ຈຳເປັນຕ້ອງເພິ່ງມະນຸດໃຫ້ມາຮັບໃຊ້ຄືກັບວ່າເພິ່ນຂາດສິ່ງໃດສິ່ງໜຶ່ງ.+ ແຕ່ເພິ່ນເປັນຜູ້ທີ່ໃຫ້ຊີວິດ ລົມຫາຍໃຈ+ ແລະທຸກສິ່ງທຸກຢ່າງກັບມະນຸດທຸກຄົນ. 26 ເພິ່ນສ້າງຄົນທຸກຊາດໃຫ້ຢູ່ທົ່ວໂລກ+ຈາກຄົນໆດຽວ.+ ເພິ່ນກຳນົດເວລາຂອງສິ່ງຕ່າງໆແລະກຳນົດບ່ອນຢູ່ໃຫ້ມະນຸດ+ 27 ເພື່ອເຂົາເຈົ້າຈະຊອກຫາພະເຈົ້າ. ຖ້າເຂົາເຈົ້າພະຍາຍາມຊອກຫາເພິ່ນແທ້ໆ+ ເຂົາເຈົ້າຈະຮູ້ຈັກເພິ່ນ ຍ້ອນເພິ່ນບໍ່ໄດ້ຢູ່ໄກຈາກພວກເຮົາແຕ່ລະຄົນ. 28 ພວກເຮົາມີຊີວິດຢູ່ແລະເຄື່ອນໄຫວໄປມາໄດ້ກໍຍ້ອນເພິ່ນ. ຄືກັບທີ່ນັກແຕ່ງກາບກອນບາງຄົນຂອງພວກເຈົ້າບອກໄວ້ວ່າ ‘ພວກເຮົາກໍເປັນລູກຂອງພະເຈົ້າຄືກັນ.’
29 ໃນເມື່ອພວກເຮົາເປັນລູກຂອງພະເຈົ້າ+ ພວກເຮົາກໍບໍ່ຄວນຄິດວ່າພະເຈົ້າເປັນຄືກັບຄຳ ເງິນ ກ້ອນຫີນ ຫຼືເປັນຄືກັບບາງສິ່ງທີ່ແກະສະຫຼັກຂຶ້ນມາດ້ວຍສີມືແລະຄວາມຄິດຂອງມະນຸດ.+ 30 ແຕ່ກ່ອນພະເຈົ້າບໍ່ຖືສາມະນຸດຍ້ອນເຂົາເຈົ້າຍັງບໍ່ຮູ້+ ແຕ່ດຽວນີ້ເພິ່ນປະກາດໃຫ້ມະນຸດທຸກຄົນທີ່ຢູ່ທຸກບ່ອນຮູ້ວ່າເຂົາເຈົ້າຕ້ອງກັບໃຈ 31 ຍ້ອນເພິ່ນກຳນົດວັນໜຶ່ງໄວ້ແລ້ວທີ່ຈະໃຫ້ຜູ້ໜຶ່ງທີ່ເພິ່ນແຕ່ງຕັ້ງມາຕັດສິນ+ໂລກດ້ວຍຄວາມຍຸຕິທຳ. ເພິ່ນປຸກຜູ້ນັ້ນໃຫ້ຄືນມາຈາກຕາຍແລະພິສູດກັບທຸກຄົນວ່າວັນນັ້ນຈະຕ້ອງມາແນ່ນອນ.”+
32 ເມື່ອເຂົາເຈົ້າໄດ້ຍິນເລື່ອງການຄືນມາຈາກຕາຍ ບາງຄົນກໍເຍາະເຍີ້ຍ+ ແຕ່ບາງຄົນກໍເວົ້າວ່າ: “ເທື່ອໜ້າພວກເຮົາຈະຟັງເຈົ້າເວົ້າເລື່ອງນີ້ອີກ.” 33 ໂປໂລຈຶ່ງໄປຈາກບ່ອນນັ້ນ 34 ແຕ່ມີບາງຄົນໄປນຳໂປໂລແລະເຂົ້າມາເປັນລູກສິດ. ຜູ້ໜຶ່ງຊື່ດີໂອນີຊີໂອທີ່ເປັນຜູ້ພິພາກສາໃນສານຢູ່ໂນນພູອາເຣໂອປາໂຄ. ອີກຜູ້ໜຶ່ງແມ່ນຜູ້ຍິງຊື່ດາມາຣີ ແລະຍັງມີຄົນອື່ນໆນຳອີກ.