ນາງຣຸດ
3 ນາໂອມີບອກຣຸດວ່າ: “ລູກເອີ້ຍ ແມ່ຢາກໃຫ້ລູກມີຄອບມີຄົວ+ເພື່ອລູກຈະມີຊີວິດທີ່ໝັ້ນຄົງແລະມີຄວາມສຸກ. 2 ໂບອາດເປັນພີ່ນ້ອງຂອງເຮົາ+ ແລະລາວກໍເປັນຜູ້ທີ່ອະນຸຍາດໃຫ້ລູກໄປເກັບເຂົ້ານຳພວກຜູ້ຍິງທີ່ເຮັດວຽກໃຫ້ລາວ. ແລງນີ້ລາວຈະໄປຝັດເຂົ້າຢູ່ລານຟາດເຂົ້າ. 3 ໃຫ້ລູກໄປອາບນ້ຳແລະເອົານ້ຳມັນຫອມທາໂຕ ແລ້ວນຸ່ງເຄື່ອງງາມໆແລະໄປລານຟາດເຂົ້າ. ແຕ່ລູກຢ່າໃຫ້ລາວເຫັນເດີ້ ຈົນກວ່າລາວຈະກິນແລະດື່ມແລ້ວ. 4 ເມື່ອລາວໄປນອນ ໃຫ້ເບິ່ງວ່າລາວໄປນອນຢູ່ໃສ. ໃຫ້ລູກໄປເປີດຜ້າປົກຕີນລາວແລະນອນຢູ່ຫັ້ນ. ແລ້ວລາວຈະບອກລູກວ່າຄວນເຮັດແນວໃດ.”
5 ຣຸດຈຶ່ງຕອບວ່າ: “ລູກຈະເຮັດຕາມທີ່ແມ່ບອກທຸກຢ່າງ.” 6 ແລ້ວຣຸດກໍໄປລານຟາດເຂົ້າ ແລະເຮັດທຸກຢ່າງຕາມທີ່ແມ່ຍ່າບອກ. 7 ເມື່ອໂບອາດກິນແລະດື່ມຢ່າງມີຄວາມສຸກແລ້ວ ລາວກໍໄປນອນຢູ່ທາງຂ້າງກອງເຂົ້າທີ່ຟາດແລ້ວ. ຈາກນັ້ນ ຣຸດກໍຈອບເຂົ້າມາ ແລະເປີດຜ້າປົກຕີນຂອງໂບອາດ ແລ້ວນອນຢູ່ຫັ້ນ. 8 ໃນຕອນເດິກໆ ເມື່ອໂບອາດຮູ້ເມື່ອແລະພິກໂຕ ລາວກໍເຫັນຜູ້ຍິງຄົນໜຶ່ງນອນຢູ່ໃກ້ໆຕີນຂອງລາວ. 9 ໂບອາດຈຶ່ງຖາມວ່າ: “ເຈົ້າແມ່ນໃຜ?” ຣຸດຕອບວ່າ: “ຂ້ອຍແມ່ນຣຸດ ຄົນຮັບໃຊ້ຂອງທ່ານ. ຂໍຊ່ວຍຂ້ອຍແດ່* ເພາະທ່ານເປັນຜູ້ທີ່ມີສິດໄຖ່ຂ້ອຍໄດ້.”+ 10 ໂບອາດເວົ້າວ່າ: “ຂໍໃຫ້ພະເຢໂຫວາອວຍພອນເຈົ້າເດີ້ລູກ. ຄວາມຮັກທີ່ໝັ້ນຄົງທີ່ເຈົ້າສະແດງໃນເທື່ອນີ້ ເຮັດໃຫ້ເຫັນແຈ້ງຫຼາຍກວ່າທຸກໆເທື່ອທີ່ຜ່ານມາ+ ເພາະເຈົ້າບໍ່ໄດ້ໄປຊອກຫາຜູ້ບ່າວທີ່ຮັ່ງຫຼືທຸກຍາກ. 11 ລູກເອີ້ຍ ບໍ່ຕ້ອງຢ້ານເດີ້. ຂ້ອຍຈະເຮັດທຸກຢ່າງຕາມທີ່ເຈົ້າຂໍ+ ເພາະທຸກຄົນທີ່ຢູ່ໃນເມືອງຮູ້ວ່າເຈົ້າເປັນຜູ້ຍິງທີ່ດີຫຼາຍ. 12 ແມ່ນຢູ່ວ່າຂ້ອຍມີສິດໄຖ່ເຈົ້າ+ ແຕ່ຍັງມີອີກຜູ້ໜຶ່ງທີ່ມີສິດໄຖ່ເຈົ້າໄດ້ກ່ອນຂ້ອຍ ເພາະລາວເປັນພີ່ນ້ອງທີ່ໃກ້ຊິດຫຼາຍກວ່າຂ້ອຍ.+ 13 ຄືນນີ້ໃຫ້ເຈົ້ານອນຢູ່ນີ້ ແລະຖ້າເບິ່ງວ່າມື້ອື່ນເຊົ້າລາວຈະໄຖ່ເຈົ້າຫຼືບໍ່. ຖ້າລາວຈະໄຖ່ເຈົ້າກໍໃຫ້ລາວໄຖ່+ ແຕ່ຖ້າລາວບໍ່ຢາກໄຖ່ ຂ້ອຍຈະເປັນຄົນໄຖ່ເຈົ້າເອງ ຂ້ອຍຂໍສາບານຕໍ່ໜ້າພະເຢໂຫວາພະເຈົ້າຜູ້ມີຊີວິດຢູ່. ໃຫ້ເຈົ້ານອນຢູ່ນີ້ຈົນຮອດມື້ອື່ນເຊົ້າ.”
14 ດັ່ງນັ້ນ ຣຸດຈຶ່ງນອນຢູ່ໃກ້ໆຕີນຂອງໂບອາດຈົນຮອດຕອນເຊົ້າ ແລ້ວລາວກໍລຸກອອກໄປແຕ່ເຊົ້າຕອນທີ່ຍັງມືດຢູ່ເພື່ອບໍ່ໃຫ້ຄົນເຫັນ. ໂບອາດເວົ້າວ່າ: “ຢ່າໃຫ້ໃຜຮູ້ວ່າມີຜູ້ຍິງມາລານຟາດເຂົ້າ.” 15 ໂບອາດຍັງເວົ້າອີກວ່າ: “ພືຜ້າຕຸ້ມຂອງເຈົ້າອອກ.” ຣຸດກໍພືຜ້າຕຸ້ມອອກ ແລ້ວໂບອາດກໍເອົາເຂົ້າບາເລ 6 ຊີ*ຖອກໃສ່ຜ້າຕຸ້ມນັ້ນແລະໃຫ້ຣຸດແບກເມືອ. ຈາກນັ້ນ ໂບອາດກໍກັບເຂົ້າໄປໃນເມືອງ.
16 ເມື່ອຣຸດກັບມາຫາແມ່ຍ່າ ແມ່ຍ່າກໍຖາມວ່າ: “ເປັນຈັ່ງໃດລູກ?” ລາວກໍເລົ່າໃຫ້ແມ່ຍ່າຟັງທຸກຢ່າງວ່າໂບອາດໄດ້ເຮັດຫຍັງເພື່ອລາວແດ່. 17 ຣຸດຍັງບອກອີກວ່າ: “ລາວເອົາເຂົ້າບາເລ 6 ຊີ*ນີ້ໃຫ້ລູກແລະບອກລູກວ່າ ‘ຢ່າກັບເມືອຫາແມ່ຍ່າເຈົ້າລ້າໆ ເອົາເຂົ້ານີ້ໄປນຳ.’” 18 ນາໂອມີຈຶ່ງບອກຣຸດວ່າ: “ລູກເອີ້ຍ ນັ່ງຖ້າຢູ່ນີ້ກ່ອນຈົນກວ່າຈະຮູ້ວ່າເລື່ອງມັນຈະເປັນແນວໃດ. ລາວຈະບໍ່ຢູ່ຊື່ໆຈົນກວ່າຈະຈັດການເລື່ອງຕ່າງໆໃຫ້ຮຽບຮ້ອຍພາຍໃນມື້ນີ້.”