ພະບັນຍັດ
8 “ພວກເຈົ້າຕ້ອງຕັ້ງໃຈເຮັດຕາມກົດໝາຍທັງໝົດທີ່ຂ້ອຍຈະບອກພວກເຈົ້າໃນມື້ນີ້ ເພື່ອພວກເຈົ້າຈະມີຊີວິດຢູ່+ ມີຈຳນວນຫຼາຍຂຶ້ນ ແລະເຂົ້າໄປຍຶດເອົາແຜ່ນດິນທີ່ພະເຢໂຫວາສັນຍາກັບປູ່ຍ່າຕານາຍຂອງພວກເຈົ້າວ່າຈະເອົາໃຫ້ພວກເຈົ້າ.+ 2 ຢ່າລືມວ່າພະເຢໂຫວາໄດ້ຊີ້ນຳພວກເຈົ້າຕະຫຼອດການເດີນທາງທີ່ດົນນານ 40 ປີຢູ່ບ່ອນກັນດານ.+ ເພິ່ນເຮັດໃຫ້ພວກເຈົ້າຖ່ອມໂຕລົງ ແລະທົດສອບພວກເຈົ້າ+ເພື່ອຈະຮູ້ວ່າຫົວໃຈພວກເຈົ້າເປັນແນວໃດ+ ແລະເບິ່ງວ່າພວກເຈົ້າຈະເຮັດຕາມກົດໝາຍຂອງເພິ່ນຫຼືບໍ່. 3 ເພິ່ນເຮັດໃຫ້ພວກເຈົ້າຖ່ອມໂຕລົງ ຍອມໃຫ້ພວກເຈົ້າຫິວ+ ແລະໄດ້ລ້ຽງພວກເຈົ້າດ້ວຍມານາ+ເຊິ່ງພວກເຈົ້າກັບປູ່ຍ່າຕານາຍຂອງພວກເຈົ້າບໍ່ເຄີຍໄດ້ກິນມາກ່ອນ ເພື່ອພວກເຈົ້າຈະຮູ້ວ່າຄົນເຮົາຈະມີຊີວິດຢູ່ໄດ້ ບໍ່ແມ່ນດ້ວຍອາຫານເທົ່ານັ້ນ ແຕ່ດ້ວຍຄຳເວົ້າທຸກຄຳທີ່ອອກມາຈາກປາກພະເຢໂຫວາ.+ 4 ຕະຫຼອດ 40 ປີນີ້ ເຄື່ອງນຸ່ງຂອງພວກເຈົ້າກໍບໍ່ຫ້ຽນບໍ່ຂາດ ແລະຕີນຂອງພວກເຈົ້າກໍບໍ່ບວມບໍ່ໃຄ່.+ 5 ພວກເຈົ້າກໍຮູ້ດີວ່າພະເຢໂຫວາພະເຈົ້າສັ່ງສອນພວກເຈົ້າຄືກັບພໍ່ສັ່ງສອນລູກ.+
6 ເຈົ້າຕ້ອງເຮັດຕາມກົດໝາຍຂອງພະເຢໂຫວາພະເຈົ້າຂອງເຈົ້າໂດຍເຊື່ອຟັງເພິ່ນແລະຢ້ານຢຳເພິ່ນ 7 ເພາະພະເຢໂຫວາພະເຈົ້າຂອງເຈົ້າຈະພາເຈົ້າເຂົ້າໄປໃນແຜ່ນດິນທີ່ດີຫຼາຍ+ ເຊິ່ງເປັນແຜ່ນດິນທີ່ມີນ້ຳຫ້ວຍ ນ້ຳອອກບໍ່ ແລະນ້ຳພຸ*ທີ່ໄຫຼຕາມທົ່ງພຽງກັບເຂດພູຕ່າງໆ 8 ເປັນແຜ່ນດິນທີ່ມີເຂົ້າວີດ* ເຂົ້າບາເລ ຕົ້ນໝາກລະແຊັງ ຕົ້ນໝາກເດື່ອ ແລະຕົ້ນໝາກພິລາ+ ເປັນແຜ່ນດິນທີ່ມີນ້ຳມັນໝາກກອກ ແລະນ້ຳເຜີ້ງ+ 9 ເປັນແຜ່ນດິນທີ່ມີອາຫານທີ່ອຸດົມສົມບູນ ແລະເຈົ້າຈະບໍ່ຂາດບໍ່ເຂີນຫຍັງ. ແຜ່ນດິນນັ້ນມີຫີນທີ່ເຕັມແຕ່ແຮ່ເຫຼັກ ແລະເຈົ້າຈະໄດ້ຂຸດແຮ່ທອງແດງຈາກພູຕ່າງໆ.
10 ເມື່ອເຈົ້າໄດ້ກິນຈົນອີ່ມແລະພໍໃຈແລ້ວ ໃຫ້ເຈົ້າສັນລະເສີນພະເຢໂຫວາພະເຈົ້າຂອງເຈົ້າທີ່ໄດ້ໃຫ້ແຜ່ນດິນດີໆກັບເຈົ້າ.+ 11 ໃຫ້ລະວັງ ຢ່າລືມພະເຢໂຫວາພະເຈົ້າຂອງເຈົ້າ. ຢ່າຂັດຄຳສັ່ງ ຂໍ້ກຳນົດ ແລະກົດໝາຍຂອງເພິ່ນທີ່ຂ້ອຍຈະໃຫ້ເຈົ້າໃນມື້ນີ້. 12 ເມື່ອເຈົ້າໄດ້ກິນຈົນອີ່ມແລະພໍໃຈ ແລະໄດ້ປຸກເຮືອນງາມໆຢູ່ແລ້ວ+ 13 ເມື່ອເຈົ້າມີຝູງງົວ ຝູງແກະ ຝູງແບ້ ມີເງິນມີຄຳ ແລະມີທຸກສິ່ງທຸກຢ່າງຫຼາຍຂຶ້ນແລ້ວ 14 ຢ່າປ່ອຍໃຫ້ໂຕເອງຍິ່ງ+ຈົນລືມພະເຢໂຫວາພະເຈົ້າຂອງເຈົ້າຜູ້ທີ່ພາເຈົ້າອອກມາຈາກເອຢິບ ແລະປົດປ່ອຍເຈົ້າອອກຈາກການເປັນທາດ.+ 15 ເພິ່ນເປັນຜູ້ທີ່ພາເຈົ້າຜ່ານຜ່າບ່ອນກັນດານທີ່ກວ້າງໃຫຍ່ແລະເປັນຕາຢ້ານ+ ທີ່ເຕັມແຕ່ງູພິດກັບແມງງອດ ແລະເປັນບ່ອນທີ່ແຫ້ງແລ້ງບໍ່ມີນ້ຳ. ເພິ່ນເຮັດໃຫ້ນ້ຳໄຫຼອອກມາຈາກຫີນແຂງໆ.*+ 16 ຢູ່ບ່ອນກັນດານເພິ່ນລ້ຽງເຈົ້າດ້ວຍມານາ+ທີ່ປູ່ຍ່າຕານາຍຂອງເຈົ້າບໍ່ເຄີຍໄດ້ກິນ. ເພິ່ນເຮັດໃຫ້ເຈົ້າຖ່ອມໂຕລົງ+ ແລະໄດ້ທົດສອບເຈົ້າເພື່ອປະໂຫຍດຂອງເຈົ້າໃນອະນາຄົດ.+ 17 ຖ້າເຈົ້າຄິດວ່າ ‘ຊັບສົມບັດແລະເຄື່ອງຂອງທັງໝົດທີ່ຂ້ອຍມີຢູ່ນີ້ ຂ້ອຍຫາມາໄດ້ດ້ວຍເຫື່ອດ້ວຍແຮງຂອງຂ້ອຍເອງ.’+ 18 ຢ່າລືມວ່າພະເຢໂຫວາພະເຈົ້າຂອງເຈົ້າເຮັດໃຫ້ເຈົ້າມີຊັບສົມບັດທັງໝົດນີ້+ ຍ້ອນເພິ່ນເຮັດຕາມຄຳສັນຍາທີ່ໃຫ້ກັບປູ່ຍ່າຕານາຍຂອງເຈົ້າຄືກັບທີ່ເປັນຢູ່ຕອນນີ້.+
19 ຖ້າພວກເຈົ້າລືມພະເຢໂຫວາພະເຈົ້າຂອງພວກເຈົ້າ ແລ້ວຖິ້ມເພິ່ນໄປຂາບໄຫວ້ແລະນະມັດສະການພະເຈົ້າອື່ນໆ. ຂ້ອຍເຕືອນພວກເຈົ້າມື້ນີ້ເລີຍວ່າ ພວກເຈົ້າຊິຖືກທຳລາຍແທ້ໆ.+ 20 ພະເຢໂຫວາຊິທຳລາຍພວກເຈົ້າຄືກັບທີ່ເພິ່ນໄດ້ທຳລາຍຊາດຕ່າງໆເຫຼົ່ານັ້ນ ຍ້ອນວ່າພວກເຈົ້າບໍ່ໄດ້ເຊື່ອຟັງພະເຢໂຫວາພະເຈົ້າຂອງພວກເຈົ້າ.”+