ເຊຄາຣີຢາ
1 ໃນເດືອນທີ 8 ຂອງປີທີ 2 ທີ່ກະສັດດາຣິອຸດ*ປົກຄອງ+ ພະເຢໂຫວາໄດ້ເວົ້າກັບຜູ້ພະຍາກອນເຊຄາຣີຢາ*+ລູກຊາຍຂອງເບເຣກີຢາຫຼານຊາຍຂອງອິດໂດວ່າ: 2 “ພະເຢໂຫວາໃຈຮ້າຍໃຫ້ປູ່ຍ່າຕານາຍຂອງເຈົ້າຫຼາຍ.+
3 ໃຫ້ເຈົ້າບອກປະຊາຊົນວ່າພະເຢໂຫວາຜູ້ບັນຊາການກອງທັບເວົ້າວ່າ ‘ພະເຢໂຫວາຜູ້ບັນຊາການກອງທັບເວົ້າແນວນີ້ “ໃຫ້ກັບມາຫາເຮົາ ແລ້ວເຮົາຈະກັບໄປຫາພວກເຈົ້າ.”+ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
4 ພະເຢໂຫວາເວົ້າວ່າ “ພວກເຈົ້າຢ່າເປັນຄືກັບປູ່ຍ່າຕານາຍຂອງພວກເຈົ້າເດີ້. ເຮົາເຄີຍໃຫ້ຜູ້ພະຍາກອນຄົນກ່ອນໆໄປບອກເຂົາເຈົ້າວ່າ ‘ພະເຢໂຫວາຜູ້ບັນຊາການກອງທັບເວົ້າວ່າ “ຂໍໃຫ້ພວກເຈົ້າຖິ້ມແນວທາງທີ່ບໍ່ດີແລະເຊົາເຮັດຊົ່ວ ແລ້ວກັບມາຫາເຮົາ.+
ແຕ່ເຂົາເຈົ້າບໍ່ຟັງເຮົາແລະບໍ່ສົນໃຈເຮົາເລີຍ.”’”+
5 ກະແມ່ນຢູ່ວ່າປູ່ຍ່າຕານາຍຂອງພວກເຈົ້າແລະພວກຜູ້ພະຍາກອນຕາຍໄປໝົດແລ້ວ 6 ແຕ່ເຮົາກໍເຄີຍໃຫ້ກົດໝາຍກັບປູ່ຍ່າຕານາຍຂອງພວກເຈົ້າ ແລະເຮົາໄດ້ສົ່ງພວກຜູ້ພະຍາກອນທີ່ເປັນຜູ້ຮັບໃຊ້ຂອງເຮົາໄປເຕືອນເຂົາເຈົ້າວ່າຖ້າເຂົາເຈົ້າບໍ່ເຮັດຕາມກົດໝາຍເຫຼົ່ານັ້ນຈະເກີດຫຍັງຂຶ້ນ. ແລ້ວທຸກສິ່ງທີ່ເຮົາເວົ້າໄວ້ກໍເກີດຂຶ້ນແທ້ບໍ່ແມ່ນບໍ?’+ ເຂົາເຈົ້າຈຶ່ງກັບມາຫາເຮົາແລະເວົ້າວ່າ ‘ພະເຢໂຫວາຜູ້ບັນຊາການກອງທັບລົງໂທດພວກເຮົາສົມກັບຄວາມຜິດທີ່ພວກເຮົາໄດ້ເຮັດແລ້ວ ຄືກັບທີ່ເພິ່ນໄດ້ບອກໄວ້.’”+
7 ໃນວັນທີ 24 ຂອງເດືອນທີ 11 ເຊິ່ງແມ່ນເດືອນເຊບັດ*ຂອງປີທີ 2 ທີ່ດາຣິອຸດປົກຄອງ+ ພະເຢໂຫວາໄດ້ເວົ້າກັບຜູ້ພະຍາກອນເຊຄາຣີຢາລູກຊາຍຂອງເບເຣກີຢາຫຼານຊາຍຂອງອິດໂດ. 8 ເຊຄາຣີຢາເວົ້າວ່າ: “ຂ້ອຍໄດ້ເຫັນນິມິດໜຶ່ງໃນຕອນກາງຄືນ. ໃນນິມິດນັ້ນມີຜູ້ຊາຍຄົນໜຶ່ງທີ່ຂີ່ມ້າສີແດງມາ ແລະມາຢືນຢູ່ກາງປ່າຕົ້ນໄມ້ຫອມໃນຮ່ອມພູ. ຢູ່ທາງຫຼັງຂອງລາວມີມ້າສີແດງ ມ້າສີນ້ຳຕານແດງ ແລະມ້າສີຂາວ.”
9 ຂ້ອຍຈຶ່ງຖາມທູດສະຫວັນທີ່ເວົ້ານຳຂ້ອຍວ່າ: “ທ່ານເອີ້ຍ ຄົນຂີ່ມ້າເຫຼົ່ານີ້ແມ່ນໃຜ?”
ທູດສະຫວັນກໍຕອບຂ້ອຍວ່າ: “ຂ້ອຍຈະຊ່ວຍໃຫ້ເຈົ້າຮູ້ວ່າເຂົາເຈົ້າແມ່ນໃຜ.”
10 ແລ້ວຄົນທີ່ຢືນຢູ່ກາງປ່າຕົ້ນໄມ້ຫອມກໍເວົ້າວ່າ: “ຄົນເຫຼົ່ານີ້ແມ່ນຄົນທີ່ພະເຢໂຫວາສົ່ງມາກວດເບິ່ງແຜ່ນດິນໂລກ.” 11 ແລ້ວເຂົາເຈົ້າກໍເວົ້າກັບທູດສະຫວັນຂອງພະເຢໂຫວາທີ່ຢືນຢູ່ກາງປ່າຕົ້ນໄມ້ຫອມວ່າ: “ພວກເຮົາໄປກວດເບິ່ງທົ່ວໂລກແລ້ວ. ພວກເຮົາເຫັນວ່າມີຄວາມສະຫງົບດີແລະບໍ່ມີຄວາມວຸ່ນວາຍຫຍັງ.”+
12 ແລ້ວທູດສະຫວັນຂອງພະເຢໂຫວາກໍເວົ້າວ່າ: “ພະເຢໂຫວາຜູ້ບັນຊາການກອງທັບເອີ້ຍ ເມື່ອໃດພະອົງຈະເມດຕາເຢຣູຊາເລັມແລະເມືອງຕ່າງໆຂອງຢູດາ?+ ພະອົງໃຈຮ້າຍໃຫ້ເຂົາເຈົ້າມາໄດ້ 70 ປີແລ້ວ.”+
13 ພະເຢໂຫວາໄດ້ຕອບທູດສະຫວັນທີ່ເວົ້ານຳຂ້ອຍ. ເພິ່ນເວົ້າແບບນຸ້ມນວນແລະໃຫ້ກຳລັງໃຈລາວ. 14 ແລ້ວທູດສະຫວັນທີ່ເວົ້ານຳຂ້ອຍກໍບອກຂ້ອຍວ່າ: “ໃຫ້ເຈົ້າປະກາດອອກໄປແນວນີ້ ‘ພະເຢໂຫວາຜູ້ບັນຊາການກອງທັບເວົ້າວ່າ “ເຮົາຈະປົກປ້ອງເຢຣູຊາເລັມແລະຊີໂອນ. ເຮົາຈະປົກປ້ອງເຂົາເຈົ້າສຸດຫົວໃຈ.+ 15 ເຮົາໃຈຮ້າຍແຮງໃຫ້ຊາດຕ່າງໆທີ່ຍິ່ງຈອງຫອງ+ຍ້ອນເຮົາຄິດວ່າຈະລົງໂທດປະຊາຊົນຂອງເຮົາແຕ່ໜ້ອຍດຽວ+ ແຕ່ເຂົາເຈົ້າພັດທຳຮ້າຍປະຊາຊົນຂອງເຮົາຫຼາຍກວ່າທີ່ເຮົາໄດ້ຕັ້ງໃຈໄວ້.”’+
16 ຍ້ອນແນວນີ້ ພະເຢໂຫວາຈຶ່ງເວົ້າວ່າ ‘ເຮົາຈະກັບມາເມດຕາເຢຣູຊາເລັມອີກເທື່ອໜຶ່ງ+ແລະສ້າງວິຫານຂອງເຮົາຂຶ້ນໃໝ່ຢູ່ຫັ້ນ.+ ຊ່າງກໍ່ສ້າງຈະເນັ່ງສາຍແທກໄປທົ່ວເມືອງເຢຣູຊາເລັມ.’+ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
17 ໃຫ້ປະກາດອີກວ່າ ‘ພະເຢໂຫວາຜູ້ບັນຊາການກອງທັບເວົ້າແນວນີ້ “ເມືອງຕ່າງໆຂອງເຮົາຈະເຕັມແຕ່ສິ່ງດີໆ ແລະພະເຢໂຫວາຈະປອບໃຈຊີໂອນ+ແລະເລືອກເຢຣູຊາເລັມອີກເທື່ອໜຶ່ງ.”’”+
18 ຈາກນັ້ນ ຂ້ອຍເງີຍໜ້າຂຶ້ນ ແລ້ວກໍເຫັນເຂົາສັດ 4 ເຂົາ.+ 19 ຂ້ອຍເລີຍຖາມທູດສະຫວັນຜູ້ທີ່ເວົ້ານຳຂ້ອຍວ່າ: “ເຂົາສັດເຫຼົ່ານີ້ໝາຍເຖິງຫຍັງ?” ທູດສະຫວັນຕອບຂ້ອຍວ່າ: “ເຂົາສັດເຫຼົ່ານີ້ໝາຍເຖິງຕົວແທນຂອງອຳນາດທີ່ເຮັດໃຫ້ປະຊາຊົນຂອງຢູດາ+ ອິດສະຣາເອນ+ ແລະເຢຣູຊາເລັມກະຈັດກະຈາຍກັນໄປ.”+
20 ແລ້ວພະເຢໂຫວາກໍໃຫ້ຂ້ອຍເຫັນຊ່າງທີ່ມີສີໄມ້ລາຍມື 4 ຄົນ. 21 ຂ້ອຍຖາມເພິ່ນວ່າ: “ຄົນເຫຼົ່ານີ້ພາກັນມາເຮັດຫຍັງ?”
ເພິ່ນຕອບຂ້ອຍວ່າ: “ເຂົາສັດເຫຼົ່ານີ້ໝາຍເຖິງຕົວແທນຂອງອຳນາດທີ່ເຮັດໃຫ້ປະຊາຊົນຂອງຢູດາກະຈັດກະຈາຍກັນໄປຈົນບໍ່ມີຜູ້ໃດເງີຍໜ້າຂຶ້ນມາໄດ້. ແຕ່ຊ່າງທີ່ມີສີໄມ້ລາຍມືຈະເຮັດໃຫ້ເຂົາສັດເຫຼົ່ານີ້ຢ້ານ ແລະທຳລາຍເຂົາສັດຂອງຊາດຕ່າງໆທີ່ມາຕໍ່ສູ້ຢູດາ ເພື່ອຈະເຮັດໃຫ້ພວກຢູດາກະຈັດກະຈາຍກັນໄປ.”
2 ຂ້ອຍເງີຍໜ້າຂຶ້ນແລະເຫັນຜູ້ຊາຍຄົນໜຶ່ງຖືສາຍແທກ+ຢູ່ໃນມື. 2 ຂ້ອຍຖາມລາວວ່າ: “ເຈົ້າຈະໄປໃສ?”
ລາວຕອບວ່າ: “ຈະໄປແທກເມືອງເຢຣູຊາເລັມເບິ່ງວ່າມັນກວ້າງມັນຍາວເທົ່າໃດ?”+
3 ແລ້ວທູດສະຫວັນທີ່ລົມນຳຂ້ອຍກໍອອກໄປ ແລະທູດສະຫວັນອີກອົງໜຶ່ງກໍມາຫາລາວ. 4 ທູດສະຫວັນອົງນັ້ນເວົ້າກັບລາວວ່າ: “ໃຫ້ແລ່ນໄປບອກຜູ້ຊາຍຄົນນັ້ນແດ່ວ່າ ‘“ເມືອງເຢຣູຊາເລັມຈະມີຄົນຢູ່+ແລະຈະເປັນເມືອງທີ່ບໍ່ມີກຳແພງ ຍ້ອນຄົນແລະຝູງສັດທີ່ອາໄສຢູ່ຫັ້ນຈະມີຈຳນວນຫຼາຍຂຶ້ນ.”+ 5 ພະເຢໂຫວາເວົ້າວ່າ “ເຮົາຈະເປັນກຳແພງໄຟອ້ອມເມືອງນີ້+ ແລະເຮົາຈະເປັນສະຫງ່າລາສີຂອງເມືອງນີ້.”’”+
6 ພະເຢໂຫວາບອກວ່າ: “ໄວໆ ໃຫ້ຟ້າວມາ! ໃຫ້ໜີອອກມາຈາກປະເທດທາງທິດເໜືອ.”+
ພະເຢໂຫວາບອກວ່າ: “ເຮົາເຄີຍເຮັດໃຫ້ພວກເຈົ້າກະຈັດກະຈາຍໄປທຸກທິດທຸກທາງ.+
7 ຄົນເມືອງຊີໂອນເອີ້ຍ ໃຫ້ພວກເຈົ້າໜີອອກມາຈາກບາບີໂລນເດີ້.+ 8 ຫຼັງຈາກພະເຢໂຫວາຜູ້ບັນຊາການກອງທັບສະແດງຄວາມຍິ່ງໃຫຍ່*ຂອງເພິ່ນແລ້ວ ເພິ່ນກໍສົ່ງຂ້ອຍໄປຫາພວກຊາດຕ່າງໆທີ່ເຄີຍປຸ້ນພວກເຈົ້າແລະບອກວ່າ+ ‘ໃຜທີ່ແຕະຕ້ອງພວກເຈົ້າກໍສ່ຳກັບແຕະຕ້ອງໜ່ວຍຕາຂອງເຮົາ.+ 9 ເຮົາຈະຍົກກຳປັ້ນ*ໃສ່ເຂົາເຈົ້າ ແລະເຂົາເຈົ້າຈະຖືກພວກທາດຂອງໂຕເອງປຸ້ນ.’+ ແລ້ວພວກເຈົ້າຈະຮູ້ວ່າພະເຢໂຫວາຜູ້ບັນຊາການກອງທັບໄດ້ສົ່ງຂ້ອຍມາ.”
10 ພະເຢໂຫວາບອກວ່າ: “ຄົນເມືອງຊີໂອນເອີ້ຍ ໃຫ້ໂຫ່ຮ້ອງດີໃຈ+ຍ້ອນເຮົາກຳລັງຈະມາ.+ ເຮົາຈະມາຢູ່ກັບພວກເຈົ້າ.+ 11 ໃນມື້ນັ້ນ ຄົນຈາກຫຼາຍໆຊາດຈະມາຫາເຮົາ+ແລະເຂົາເຈົ້າຈະເປັນຄົນຂອງເຮົາ ແລະເຮົາເຢໂຫວາຈະຢູ່ນຳພວກເຈົ້າ.” ແລ້ວພວກເຈົ້າຈະຮູ້ວ່າພະເຢໂຫວາຜູ້ບັນຊາການກອງທັບໄດ້ສົ່ງຂ້ອຍມາຫາພວກເຈົ້າ. 12 ພະເຢໂຫວາຈະເອົາຢູດາມາເປັນຊັບສົມບັດຂອງເພິ່ນຢູ່ບ່ອນບໍລິສຸດແລະເພິ່ນຈະເລືອກເຢຣູຊາເລັມອີກເທື່ອໜຶ່ງ.+ 13 ຂໍໃຫ້ທຸກຄົນມິດຢູ່ຊື່ໆເມື່ອຢູ່ຕໍ່ໜ້າພະເຢໂຫວາ ເພາະເພິ່ນຈະລົງມືເຮັດບາງຢ່າງຈາກບ່ອນບໍລິສຸດຂອງເພິ່ນ.
3 ແລ້ວຂ້ອຍກໍເຫັນປະໂລຫິດໃຫຍ່ໂຢຊວຍ+ຢືນຢູ່ຕໍ່ໜ້າທູດສະຫວັນຂອງພະເຢໂຫວາ ແລະຊາຕານ+ກໍຢືນຢູ່ເບື້ອງຂວາມືຂອງໂຢຊວຍເພື່ອຕໍ່ຕ້ານລາວ. 2 ທູດສະຫວັນຂອງພະເຢໂຫວາເວົ້າກັບຊາຕານວ່າ: “ຊາຕານ ຂໍໃຫ້ພະເຢໂຫວາຕຳໜິເຈົ້າ+ ຂໍໃຫ້ພະເຢໂຫວາທີ່ເລືອກເຢຣູຊາເລັມ+ຕຳໜິເຈົ້າ. ຜູ້ຊາຍຄົນນີ້ເປັນຄືກັບດົ້ນຟືນທີ່ຖືກດຶງອອກມາຈາກກອງໄຟບໍ່ແມ່ນບໍ?”
3 ໂຢຊວຍຢືນຢູ່ຕໍ່ໜ້າທູດສະຫວັນແລະເຄື່ອງທີ່ລາວນຸ່ງຢູ່ກໍເປື້ອນຫຼາຍ. 4 ທູດສະຫວັນກໍເວົ້າກັບຄົນທີ່ຢືນຢູ່ຕໍ່ໜ້າໂຢຊວຍວ່າ: “ແກ້ເຄື່ອງນຸ່ງທີ່ເປື້ອນໆຂອງລາວອອກ.” ແລະເວົ້າກັບໂຢຊວຍວ່າ: “ເຮົາເຮັດໃຫ້ເຈົ້າບໍ່ມີຄວາມຜິດແລ້ວ ແລະເຈົ້າຈະໄດ້ນຸ່ງເຄື່ອງດີໆງາມໆ.”*+
5 ຂ້ອຍເວົ້າວ່າ: “ເອົາຜ້າຄຽນຫົວທີ່ສະອາດມາຄຽນຫົວໃຫ້ລາວແດ່.”+ ແລະເຂົາເຈົ້າກໍເອົາຜ້າຄຽນຫົວທີ່ສະອາດມາຄຽນຫົວໃຫ້ລາວແລະເອົາເຄື່ອງນຸ່ງມານຸ່ງໃຫ້ລາວ. ທູດສະຫວັນຂອງພະເຢໂຫວາກໍຢືນຢູ່ໃກ້ໆ. 6 ທູດສະຫວັນຂອງພະເຢໂຫວາເວົ້າກັບໂຢຊວຍວ່າ: 7 “ພະເຢໂຫວາຜູ້ບັນຊາການກອງທັບເວົ້າວ່າ ‘ຖ້າເຈົ້າໃຊ້ຊີວິດຕາມແນວທາງຂອງເຮົາແລະເຮັດວຽກທີ່ເຮົາມອບໃຫ້ ເຈົ້າຈະໄດ້ເປັນຜູ້ຕັດສິນປະຊາຊົນຢູ່ວິຫານຂອງເຮົາ+ແລະເບິ່ງແຍງ*ເດີ່ນວິຫານຂອງເຮົາ. ເຮົາຈະໃຫ້ເຈົ້າເຂົ້າອອກໄດ້ສະດວກຕໍ່ໜ້າເຮົາຄືກັບຄົນທີ່ຢືນຢູ່ນີ້.
8 ປະໂລຫິດໃຫຍ່ໂຢຊວຍເອີ້ຍ ຂໍໃຫ້ເຈົ້າແລະພວກປະໂລຫິດທີ່ນັ່ງຢູ່ຕໍ່ໜ້າເຈົ້າຕັ້ງໃຈຟັງເດີ້. ພວກເຈົ້າເປັນສັນຍະລັກສະແດງເຖິງສິ່ງທີ່ຈະເກີດຂຶ້ນໃນອະນາຄົດ. ເຮົາຈະພາຜູ້ຮັບໃຊ້ຂອງເຮົາມາ.+ ລາວມີຊື່ວ່າໜໍ່.+ 9 ເບິ່ງຫີນທີ່ເຮົາຕັ້ງໄວ້ຕໍ່ໜ້າໂຢຊວຍແມ້! ຢູ່ເທິງຫີນກ້ອນນັ້ນມີຕາ 7 ໜ່ວຍແລະເຮົາກຳລັງແກະສະຫຼັກໃສ່ຫີນນັ້ນ. ເຮົາຈະເອົາຄວາມຜິດຂອງແຜ່ນດິນນັ້ນອອກໄປພາຍໃນມື້ດຽວ.’+ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
10 ພະເຢໂຫວາຜູ້ບັນຊາການກອງທັບບອກວ່າ ‘ໃນມື້ນັ້ນ ພວກເຈົ້າແຕ່ລະຄົນຈະຊວນເພື່ອນບ້ານມານັ່ງຢູ່ກ້ອງຕົ້ນໝາກລະແຊັງແລະກ້ອງຕົ້ນໝາກເດື່ອຂອງໂຕເອງ.’”+
4 ທູດສະຫວັນທີ່ເຄີຍເວົ້າກັບຂ້ອຍໄດ້ກັບມາແລະໄດ້ປຸກຂ້ອຍໃຫ້ຕື່ນຄືກັບປຸກຄົນທີ່ນອນຫຼັບຢູ່ໃຫ້ຕື່ນ. 2 ແລ້ວລາວກໍຖາມຂ້ອຍວ່າ: “ເຈົ້າເຫັນຫຍັງ?”
ຂ້ອຍຕອບລາວວ່າ: “ຂ້ອຍເຫັນຂາຕະກຽງທີ່ເປັນຄຳ.+ ມີຕະກຽງ 7 ອັນຢູ່ເທິງຂາຕະກຽງນັ້ນ+ ມີຊາມໜ່ວຍໜຶ່ງຢູ່ເທິງຂາຕະກຽງ ແລະມີທໍ່ 7 ທໍ່ທີ່ຕໍ່ລົງມາໃສ່ຕະກຽງ 7 ອັນ. 3 ຢູ່ທາງຂ້າງຂາຕະກຽງນັ້ນມີຕົ້ນໝາກກອກ 2 ຕົ້ນ.+ ຕົ້ນໜຶ່ງຢູ່ເບື້ອງຂວາແລະອີກຕົ້ນໜຶ່ງຢູ່ເບື້ອງຊ້າຍ.”
4 ແລ້ວຂ້ອຍກໍຖາມທູດສະຫວັນອົງນັ້ນວ່າ: “ສິ່ງເຫຼົ່ານີ້ແມ່ນຫຍັງ?” 5 ລາວກໍຖາມຂ້ອຍວ່າ: “ເຈົ້າບໍ່ຮູ້ບໍວ່າສິ່ງເຫຼົ່ານີ້ໝາຍເຖິງຫຍັງ?”
ຂ້ອຍຕອບລາວວ່າ: “ທ່ານເອີ້ຍ ຂ້ອຍບໍ່ຮູ້.”
6 ລາວຈຶ່ງເວົ້າກັບຂ້ອຍວ່າ: “ພະເຢໂຫວາບອກເຊຣູບາເບນວ່າ ‘“ເລື່ອງນີ້ຈະເກີດຂຶ້ນໄດ້ ບໍ່ແມ່ນຍ້ອນກຳລັງຂອງທະຫານຫຼືກຳລັງຂອງມະນຸດ+ ແຕ່ແມ່ນຍ້ອນພະລັງຂອງເຮົາ.”+ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້. 7 ເຖິງວ່າອຸປະສັກທີ່ຢູ່ຕໍ່ໜ້າເຊຣູບາເບນ+ຈະໃຫຍ່ຄືກັບພູ ແຕ່ມັນກໍຈະກາຍເປັນດິນພຽງ.+ ລາວຈະເອົາກ້ອນຫີນທີ່ຢູ່ເທິງສຸດຂອງວິຫານໄປໃສ່ໃນບ່ອນຂອງມັນ ແລະຜູ້ຄົນຈະໂຫ່ຮ້ອງວ່າ: “ຈັ່ງແມ່ນງາມແທ້ໆ ຈັ່ງແມ່ນງາມເອົາແທ້ເອົາວ່າ!”’”
8 ພະເຢໂຫວາເວົ້າກັບຂ້ອຍອີກວ່າ: 9 “ເຊຣູບາເບນເປັນຜູ້ທີ່ວາງຮາກຖານຂອງວິຫານຫຼັງນີ້+ ແລະລາວກໍຈະສ້າງຈົນມັນແລ້ວດ້ວຍມືຂອງລາວເອງ.+ ແລ້ວເຈົ້າຈະຮູ້ວ່າພະເຢໂຫວາຜູ້ບັນຊາການກອງທັບສົ່ງຂ້ອຍມາຫາເຈົ້າ. 10 ໃຜຊິກ້າມາດູຖູກຈຸດເລີ່ມຕົ້ນນ້ອຍໆ?+ ເຂົາເຈົ້າຈະດີໃຈເມື່ອເຫັນເຊຣູບາເບນຈັບລູກດິ່ງ.* ຕະກຽງ* 7 ອັນນີ້ແມ່ນຕາຂອງພະເຢໂຫວາທີ່ກຳລັງເບິ່ງໄປທົ່ວໂລກ.”+
11 ແລ້ວຂ້ອຍຖາມທູດສະຫວັນວ່າ: “ຕົ້ນໝາກກອກ 2 ຕົ້ນທີ່ຢູ່ເບື້ອງຂວາແລະເບື້ອງຊ້າຍຂອງຂາຕະກຽງໝາຍເຖິງຫຍັງ?”+ 12 ແລະຂ້ອຍກໍຖາມລາວອີກວ່າ: “ງ່າ*ຂອງຕົ້ນໝາກກອກ 2 ຕົ້ນທີ່ມີນ້ຳມັນສີຄຳໄຫຼອອກມາຈາກທໍ່ 2 ທໍ່ໝາຍເຖິງຫຍັງ?”
13 ລາວກໍຖາມຂ້ອຍວ່າ: “ເຈົ້າບໍ່ຮູ້ບໍວ່າສິ່ງເຫຼົ່ານີ້ໝາຍເຖິງຫຍັງ?”
ຂ້ອຍຕອບລາວວ່າ: “ທ່ານເອີ້ຍ ຂ້ອຍບໍ່ຮູ້.”
14 ລາວບອກຂ້ອຍວ່າ: “ສິ່ງເຫຼົ່ານີ້ໝາຍເຖິງຜູ້ທີ່ໄດ້ຮັບການແຕ່ງຕັ້ງ 2 ຄົນທີ່ຢືນຢູ່ທາງຂ້າງພະເຈົ້າທີ່ປົກຄອງໂລກນີ້ທັງໝົດ.”+
5 ຂ້ອຍເງີຍໜ້າຂຶ້ນອີກເທື່ອໜຶ່ງ ແລ້ວຂ້ອຍກໍເຫັນມ້ວນໜັງສືບິນຢູ່. 2 ທູດສະຫວັນຖາມຂ້ອຍວ່າ: “ເຈົ້າເຫັນຫຍັງ?”
ຂ້ອຍຕອບລາວວ່າ: “ຂ້ອຍເຫັນມ້ວນໜັງສືບິນຢູ່. ມັນຍາວ 20 ສອກ* ແລະກວ້າງ 10 ສອກ.”*
3 ລາວບອກຂ້ອຍວ່າ: “ນີ້ແມ່ນມ້ວນໜັງສືທີ່ມີຄຳສາບແຊ່ງທີ່ຖືກສົ່ງໄປທົ່ວໂລກ ຍ້ອນຄົນຂີ້ລັກ+ຍັງບໍ່ທັນໄດ້ຖືກລົງໂທດຕາມທີ່ຂຽນໄວ້ໃນມ້ວນໜັງສືໃນໜ້າຂ້າງນີ້ ແລະຄົນທີ່ສາບານຕົວະ+ຍັງບໍ່ທັນໄດ້ຖືກລົງໂທດຕາມທີ່ຂຽນໄວ້ໃນໜ້າອີກຂ້າງໜຶ່ງ. 4 ພະເຢໂຫວາເວົ້າວ່າ ‘ເຮົາໄດ້ສົ່ງມັນອອກໄປແລ້ວ ແລະມັນຈະເຂົ້າໄປໃນເຮືອນຂອງຄົນຂີ້ລັກກັບເຮືອນຂອງຄົນທີ່ສາບານຕົວະໂດຍໃຊ້ຊື່ຂອງເຮົາ. ມັນຈະຢູ່ເຮືອນຂອງເຂົາເຈົ້າ. ມັນຈະທຳລາຍເຮືອນ ໄມ້ ແລະຫີນທີ່ຢູ່ໃນເຮືອນຈົນໝົດ.’”
5 ແລ້ວທູດສະຫວັນທີ່ເຄີຍເວົ້ານຳຂ້ອຍກໍມາເວົ້າກັບຂ້ອຍວ່າ: “ເບິ່ງແມ້ ມີຫຍັງກຳລັງອອກໄປ?”
6 ຂ້ອຍຈຶ່ງຖາມວ່າ: “ມັນແມ່ນຫຍັງຫັ້ນ?”
ລາວຕອບວ່າ: “ມັນແມ່ນຖັງເອຟາ.”* ລາວເວົ້າຕື່ມອີກວ່າ: “ຄົນຊົ່ວໃນໂລກກໍເປັນແນວນີ້ແຫຼະ.” 7 ແລ້ວຂ້ອຍກໍເຫັນຝາເຫຼັກມົນໆເປີດອອກແລະມີຜູ້ຍິງຄົນໜຶ່ງນັ່ງຢູ່ໃນຖັງເອຟານັ້ນ. 8 ລາວບອກຂ້ອຍວ່າ: “ຜູ້ຍິງຄົນນີ້ແມ່ນຄວາມຊົ່ວ.” ຫຼັງຈາກນັ້ນ ລາວກໍຍູ້ຜູ້ຍິງຄົນນັ້ນກັບເຂົ້າໄປໃນຖັງເອຟາ. ແລ້ວເອົາຝາເຫຼັກທີ່ໜັກໆປິດໄວ້ຄືເກົ່າ.
9 ຂ້ອຍເງີຍໜ້າຂຶ້ນ ແລ້ວກໍເຫັນຜູ້ຍິງອີກ 2 ຄົນບິນເວີ່ນມາຕາມສາຍລົມ. ປີກຂອງເຂົາເຈົ້າຄືກັບປີກຂອງນົກກະສາ. ແລ້ວເຂົາເຈົ້າກໍຫິ້ວເອົາຖັງນັ້ນຂຶ້ນໄປເທິງຟ້າ.* 10 ຂ້ອຍຈຶ່ງຖາມທູດສະຫວັນທີ່ລົມນຳຂ້ອຍວ່າ: “ເຂົາເຈົ້າຊິເອົາຖັງເອຟາໄປໃສ?”
11 ລາວຕອບວ່າ: “ເອົາໄປແຜ່ນດິນຊີນາ*+ເພື່ອສ້າງເຮືອນໃຫ້ຜູ້ຍິງຄົນນັ້ນ. ເມື່ອສ້າງແລ້ວໆ ລາວຈະຕ້ອງຢູ່ຫັ້ນເພາະເປັນບ່ອນທີ່ລາວສົມຄວນຢູ່.”
6 ເມື່ອຂ້ອຍເງີຍໜ້າຂຶ້ນອີກ ຂ້ອຍກໍເຫັນລົດຮົບ 4 ຄັນກຳລັງແລ່ນອອກມາຈາກຮ່ອມທີ່ຢູ່ລະຫວ່າງພູ 2 ໜ່ວຍ. ພູ 2 ໜ່ວຍນັ້ນເປັນພູທອງແດງ. 2 ລົດຮົບຄັນທຳອິດມີມ້າສີແດງແກ່ມາ ລົດຮົບຄັນທີ 2 ມີມ້າສີດຳແກ່ມາ+ 3 ລົດຮົບຄັນທີ 3 ມີມ້າສີຂາວແກ່ມາ ແລະລົດຮົບຄັນທີ 4 ມີມ້າສີດ່າງແກ່ມາ.+
4 ຂ້ອຍຖາມທູດສະຫວັນທີ່ເວົ້າກັບຂ້ອຍວ່າ: “ທ່ານເອີ້ຍ ນີ້ແມ່ນຫຍັງ?”
5 ລາວຕອບວ່າ: “ນີ້ແມ່ນກອງກຳລັງຂອງສະຫວັນ 4 ກອງ+ທີ່ກຳລັງອອກໄປຫຼັງຈາກເຂົ້າໄປຫາພະເຈົ້າຜູ້ທີ່ປົກຄອງໂລກນີ້ທັງໝົດ.+ 6 ລົດຮົບມ້າສີດຳອອກໄປແຜ່ນດິນທາງທິດເໜືອ+ ລົດຮົບມ້າສີຂາວອອກໄປແຜ່ນດິນທາງທິດຕາເວັນຕົກ* ແລະລົດຮົບມ້າສີດ່າງອອກໄປແຜ່ນດິນທາງທິດໃຕ້. 7 ລົດຮົບມ້າສີດ່າງນັ້ນຫ້າວຫຼາຍແລະຢາກອອກໄປແຜ່ນດິນທີ່ໄດ້ຮັບມອບໝາຍ.” ແລ້ວລາວກໍເວົ້າວ່າ: “ໄປ໋ ອອກໄປແຜ່ນດິນນັ້ນ.” ແລ້ວເຂົາເຈົ້າກໍອອກໄປທົ່ວແຜ່ນດິນນັ້ນ.
8 ແລ້ວລາວກໍເອີ້ນຂ້ອຍແລະເວົ້າວ່າ: “ເບິ່ງແມ້ ລົດຮົບທີ່ອອກໄປທາງທິດເໜືອເຮັດໃຫ້ພະເຢໂຫວາເຊົາໃຈຮ້າຍໃຫ້ແຜ່ນດິນນັ້ນແລ້ວ.”
9 ພະເຢໂຫວາເວົ້າກັບຂ້ອຍອີກວ່າ: 10 “ເຄື່ອງບໍລິຈາກທີ່ລວບລວມໄດ້ຈາກຄົນທີ່ເປັນຊະເລີຍຢູ່ບາບີໂລນ ໃຫ້ເຈົ້າໄປເອົານຳເຮນດາຍ ໂຕບີຢາ ແລະເຢດາຢາ. ເພື່ອຈະເຮັດແນວນັ້ນ ມື້ນີ້ໃຫ້ເຈົ້າໄປຫາເຂົາເຈົ້າຢູ່ເຮືອນຂອງໂຢສີຢາລູກຊາຍຂອງເຊຟານີຢາ. 11 ໃຫ້ເຈົ້າເອົາເງິນເອົາຄຳໄປເຮັດມົງກຸດ ແລ້ວເອົາໄປສຸບໃສ່ຫົວຂອງປະໂລຫິດໃຫຍ່ໂຢຊວຍ+ລູກຊາຍຂອງເຢໂຮຊາດັກ. 12 ເຈົ້າຕ້ອງເວົ້າກັບລາວວ່າ
‘ພະເຢໂຫວາຜູ້ບັນຊາການກອງທັບບອກວ່າ “ຜູ້ຊາຍຄົນນີ້ມີຊື່ວ່າໜໍ່.+ ລາວຈະປົ່ງອອກຈາກບ່ອນຂອງລາວແລະລາວຈະສ້າງວິຫານຂອງພະເຢໂຫວາ.+ 13 ລາວຈະເປັນຜູ້ສ້າງວິຫານຂອງພະເຢໂຫວາແລະລາວຈະໄດ້ຮັບກຽດ. ລາວຈະນັ່ງຢູ່ເທິງບັນລັງເປັນກະສັດປົກຄອງແລະເປັນປະໂລຫິດນຳ.+ ລາວຈະເຮັດທັງສອງຢ່າງນີ້ເພື່ອເອົາສັນຕິສຸກມາໃຫ້ປະຊາຊົນ. 14 ມົງກຸດນີ້ຈະຖືກເອົາໄປເກັບໄວ້ຢູ່ວິຫານຂອງພະເຢໂຫວາ ເພື່ອເພິ່ນຈະບໍ່ລືມສິ່ງທີ່ເຮເລັມ* ໂຕບີຢາ ເຢດາຢາ+ ແລະເຮັນ*ລູກຊາຍຂອງເຊຟານີຢາໄດ້ເຮັດ. 15 ຄົນທີ່ຢູ່ໄກໆຈະມາຊ່ວຍສ້າງວິຫານຂອງພະເຢໂຫວາ.” ສິ່ງເຫຼົ່ານີ້ຈະເກີດຂຶ້ນແນ່ນອນ ຖ້າເຈົ້າຟັງສຽງຂອງພະເຢໂຫວາພະເຈົ້າຂອງເຈົ້າ ແລະເຈົ້າກໍຈະຮູ້ວ່າພະເຢໂຫວາຜູ້ບັນຊາການກອງທັບໄດ້ສົ່ງຂ້ອຍມາຫາເຈົ້າ.’”
7 ໃນວັນທີ 4 ຂອງເດືອນທີ 9 ເຊິ່ງແມ່ນເດືອນກິດສະເລັບ*ຂອງປີທີ 4 ທີ່ກະສັດດາຣິອຸດປົກຄອງ ພະເຢໂຫວາໄດ້ມາເວົ້າກັບເຊຄາຣີຢາ.+ 2 ຄົນເບເທນໄດ້ສົ່ງຊາເຣັດເຊແລະເຣເກມເມເລັກກັບຄົນຂອງລາວໄປຂໍພອນຈາກພະເຢໂຫວາ. 3 ເຂົາເຈົ້າເວົ້າກັບປະໂລຫິດທີ່ຢູ່ວິຫານຂອງພະເຢໂຫວາຜູ້ບັນຊາການກອງທັບແລະພວກຜູ້ພະຍາກອນວ່າ: “ຊິໃຫ້ພວກເຮົາຮ້ອງໄຫ້ແລະອົດເຂົ້າໃນເດືອນທີ 5+ ຄືກັບທີ່ພວກເຮົາເຄີຍເຮັດໃນຫຼາຍປີຜ່ານມາບໍ?”
4 ພະເຢໂຫວາຜູ້ບັນຊາການກອງທັບບອກຂ້ອຍອີກວ່າ: 5 “ໃຫ້ໄປບອກປະຊາຊົນແລະພວກປະໂລຫິດທຸກຄົນໃນແຜ່ນດິນວ່າ ‘ທີ່ພວກເຈົ້າອົດເຂົ້າແລະຮ້ອງໄຫ້ໃນເດືອນທີ 5 ກັບເດືອນທີ 7+ ມາຕະຫຼອດ 70 ປີນັ້ນ+ ພວກເຈົ້າໄດ້ເຮັດເພື່ອເຮົາແທ້ໆຊັ້ນບໍ? 6 ທີ່ພວກເຈົ້າກິນແລະດື່ມ ພວກເຈົ້າກໍເຮັດເພື່ອໂຕເອງບໍ່ແມ່ນບໍ? 7 ພວກເຈົ້າຄວນຈະເຊື່ອຟັງຄຳສັ່ງຂອງພະເຢໂຫວາທີ່ບອກຜ່ານທາງພວກຜູ້ພະຍາກອນຕັ້ງແຕ່ສະໄໝແຕ່ກີ້+ ຕອນທີ່ເມືອງເຢຣູຊາເລັມກັບເມືອງທີ່ຢູ່ອ້ອມແອ້ມຍັງມີຄວາມສະຫງົບສຸກແລະຍັງມີຄົນອາໄສຢູ່ ແລະຕອນທີ່ເນເກັບກັບເຊເຟລາຍັງມີຄົນອາໄສຢູ່.’”
8 ພະເຢໂຫວາມາເວົ້າກັບເຊຄາຣີຢາອີກວ່າ: 9 “ພະເຢໂຫວາຜູ້ບັນຊາການກອງທັບເວົ້າແນວນີ້ ‘ໃຫ້ພວກເຈົ້າຕັດສິນຢ່າງຖືກຕ້ອງແລະຍຸຕິທຳ.+ ໃຫ້ຮັກກັນຢ່າງໝັ້ນຄົງ+ແລະເມດຕາກັນ. 10 ຢ່າໂກງແມ່ໝ້າຍ ລູກກຳພ້າພໍ່*+ ຄົນຕ່າງຊາດ+ແລະຄົນທຸກ+ ແລະຢ່າຄິດວາງແຜນທຳຮ້າຍກັນ.’+ 11 ແຕ່ເຂົາເຈົ້າພັດບໍ່ສົນໃຈ+ ເປັນຄົນຫົວແຂງ*+ ແລະບໍ່ຍອມຟັງເພິ່ນ.*+ 12 ພະເຢໂຫວາຜູ້ບັນຊາການກອງທັບໄດ້ໃຫ້ກົດໝາຍ*ແລະຄຳສັ່ງກັບເຂົາເຈົ້າຜ່ານທາງຜູ້ພະຍາກອນດ້ວຍພະລັງຂອງເພິ່ນ+ ແຕ່ເຂົາເຈົ້າພັດຫົວແຂງ*+ແລະບໍ່ເຊື່ອຟັງເລີຍ. ພະເຢໂຫວາຜູ້ບັນຊາການກອງທັບຈຶ່ງໃຈຮ້າຍຫຼາຍ.+
13 ພະເຢໂຫວາຜູ້ບັນຊາການກອງທັບເວົ້າວ່າ ‘ຕອນທີ່ເຮົາບອກຫຍັງກັບເຂົາເຈົ້າ ເຂົາເຈົ້າກໍບໍ່ຟັງເຮົາເລີຍ.+ ດັ່ງນັ້ນ ຕອນທີ່ເຂົາເຈົ້າຮ້ອງຂໍໃຫ້ເຮົາຊ່ວຍ ເຮົາກໍຈະບໍ່ຟັງເຂົາເຈົ້າຄືກັນ.+ 14 ເຮົາໄດ້ໃຫ້ລົມພາຍຸພັດເຂົາເຈົ້າກະຈັດກະຈາຍໄປຢູ່ປະເທດຕ່າງໆທີ່ເຂົາເຈົ້າບໍ່ເຄີຍຮູ້ຈັກ.+ ແຜ່ນດິນຂອງເຂົາເຈົ້າຈຶ່ງຖືກປະໃຫ້ຮ້າງເປົ່າ ບໍ່ມີຜູ້ໃດຜ່ານໄປຜ່ານມາຫຼືກັບໄປຢູ່ຫັ້ນອີກ+ ຍ້ອນເຂົາເຈົ້າໄດ້ເຮັດໃຫ້ແຜ່ນດິນທີ່ເປັນຕາຢູ່ກາຍເປັນແຜ່ນດິນທີ່ເປັນຕາຢ້ານ.’”
8 ພະເຢໂຫວາຜູ້ບັນຊາການກອງທັບບອກຂ້ອຍອີກວ່າ: 2 “ພະເຢໂຫວາຜູ້ບັນຊາການກອງທັບບອກວ່າ ‘ເຮົາຈະປົກປ້ອງຊີໂອນ ເຮົາຈະປົກປ້ອງຊີໂອນສຸດຫົວໃຈ.+ ເຮົາໃຈຮ້າຍຫຼາຍ ແລະເຮົາຈະປົກປ້ອງຊີໂອນແທ້ໆ.’
3 ພະເຢໂຫວາບອກວ່າ ‘ເຮົາຈະກັບໄປຊີໂອນ+ແລະຢູ່ໃນເຢຣູຊາເລັມ.+ ເຢຣູຊາເລັມຈະຖືກເອີ້ນວ່າເມືອງແຫ່ງຄວາມຈິງ*+ ແລະພູຂອງພະເຢໂຫວາຜູ້ບັນຊາການກອງທັບຈະຖືກເອີ້ນວ່າພູບໍລິສຸດ.’+
4 ພະເຢໂຫວາຜູ້ບັນຊາການກອງທັບບອກວ່າ ‘ຈະມີຜູ້ເຖົ້ານັ່ງຢູ່ຕາມເດີ່ນຂອງເມືອງເຢຣູຊາເລັມອີກເທື່ອໜຶ່ງ. ແຕ່ລະຄົນຈະຖືໄມ້ຄ້ອນເທົ້າຂອງໂຕເອງຍ້ອນວ່າເຖົ້າຫຼາຍແລ້ວ+ 5 ແລະຈະມີເດັກນ້ອຍແລ່ນຫຼິ້ນຢູ່ຕາມເດີ່ນຂອງເມືອງ.’+
6 ພະເຢໂຫວາຜູ້ບັນຊາການກອງທັບບອກວ່າ ‘ເຖິງວ່າປະຊາຊົນໃນສະໄໝນັ້ນຄິດວ່າເລື່ອງນີ້ເປັນໄປບໍ່ໄດ້ ແຕ່ສຳລັບເຮົາມັນບໍ່ໄດ້ຍາກເລີຍ.’ ພະເຢໂຫວາຜູ້ບັນຊາການກອງທັບເວົ້າໄວ້ແນວນີ້.
7 ພະເຢໂຫວາຜູ້ບັນຊາການກອງທັບບອກວ່າ ‘ເຮົາຈະຊ່ວຍປະຊາຊົນຂອງເຮົາໃຫ້ລອດຈາກປະເທດຕ່າງໆທີ່ຢູ່ທາງທິດຕາເວັນອອກແລະທາງທິດຕາເວັນຕົກ.+ 8 ເຮົາຈະພາເຂົາເຈົ້າມາເຢຣູຊາເລັມແລະໃຫ້ເຂົາເຈົ້າຢູ່ຫັ້ນ.+ ເຂົາເຈົ້າຈະເປັນປະຊາຊົນຂອງເຮົາ ແລະເຮົາຈະເປັນພະເຈົ້າທີ່ສັດຊື່ແລະຍຸຕິທຳຂອງເຂົາເຈົ້າ.’+
9 ພະເຢໂຫວາຜູ້ບັນຊາການກອງທັບບອກວ່າ ‘ໃຫ້ພວກເຈົ້າກ້າຫານໄວ້ເດີ້.+ ເລື່ອງທີ່ພວກເຈົ້າໄດ້ຍິນຈາກພວກຜູ້ພະຍາກອນໃນມື້ນີ້+ ແມ່ນເລື່ອງດຽວກັນກັບເລື່ອງທີ່ເຄີຍເວົ້າໄວ້ແລ້ວຕອນທີ່ມີການວາງຮາກຖານເພື່ອຈະສ້າງວິຫານຂອງພະເຢໂຫວາຜູ້ບັນຊາການກອງທັບ. 10 ກ່ອນໜ້ານີ້ຄົນແລະສັດເຮັດວຽກແຕ່ກໍບໍ່ໄດ້ຮັບຄ່າຈ້າງ.+ ຜູ້ໃດໄປໃສມາໃສກໍບໍ່ປອດໄພເພາະມີສັດຕູ ຍ້ອນເຮົາເຮັດໃຫ້ທຸກຄົນຕໍ່ສູ້ກັນເອງ.’
11 ພະເຢໂຫວາຜູ້ບັນຊາການກອງທັບບອກວ່າ ‘ແຕ່ຕອນນີ້ ເຮົາຈະບໍ່ເຮັດກັບປະຊາຊົນທີ່ເຫຼືອຢູ່ນີ້ຄືກັບແຕ່ກ່ອນແລ້ວ.+ 12 ເຂົາເຈົ້າຈະຫວ່ານເມັດພືດທີ່ເຮັດໃຫ້ເກີດສັນຕິສຸກ. ຕົ້ນໝາກລະແຊັງຈະເກີດໝາກ. ແຜ່ນດິນຈະໃຫ້ຜົນຜະລິດຫຼາຍ+ ແລະຈະມີນ້ຳຄ້າງຕົກລົງມາຈາກຟ້າ. ເຮົາຈະໃຫ້ປະຊາຊົນຂອງເຮົາທີ່ເຫຼືອຢູ່ນີ້ໄດ້ຮັບສິ່ງເຫຼົ່ານີ້ທັງໝົດ.+ 13 ພວກຢູດາແລະພວກອິດສະຣາເອນເອີ້ຍ ເຖິງວ່າຊາດຕ່າງໆຈະເວົ້າວ່າເຈົ້າເປັນຊາດທີ່ຖືກສາບແຊ່ງ+ ແຕ່ເຮົາຈະຊ່ວຍເຈົ້າ. ເຈົ້າຈະເປັນຊາດທີ່ໄດ້ຮັບພອນ.+ ບໍ່ຕ້ອງຢ້ານ.+ ໃຫ້ເຈົ້າກ້າຫານໄວ້ເດີ້.’+
14 ພະເຢໂຫວາຜູ້ບັນຊາການກອງທັບບອກວ່າ ‘ຕອນນັ້ນ ພະເຢໂຫວາຜູ້ບັນຊາການກອງທັບຕັ້ງໃຈຈະທຳລາຍພວກເຈົ້າ ຍ້ອນປູ່ຍ່າຕານາຍຂອງພວກເຈົ້າເຮັດໃຫ້ເຮົາໃຈຮ້າຍຫຼາຍແລະເຮົາບໍ່ໄດ້ປ່ຽນຄວາມຄິດ.*+ 15 ແຕ່ຕອນນີ້ບໍ່ຕ້ອງຢ້ານເດີ້+ ເຮົາຈະເຮັດດີຕໍ່ຄົນເຢຣູຊາເລັມແລະຄົນຢູດາ.+
16 ພວກເຈົ້າຕ້ອງເວົ້າຄວາມຈິງຕໍ່ກັນ.+ ຕອນທີ່ພວກເຈົ້າຕັດສິນຢູ່ປະຕູເມືອງ ພວກເຈົ້າຕ້ອງຕັດສິນຢ່າງຍຸຕິທຳແລະເຮັດໃຫ້ເກີດສັນຕິສຸກ.+ 17 ຢ່າຄິດວາງແຜນທຳຮ້າຍກັນ+ແລະໃຫ້ເຊົາສາບານຕົວະ*+ ຍ້ອນເຮົາຊັງສິ່ງເຫຼົ່ານີ້ຫຼາຍ.’+ ພະເຢໂຫວາເວົ້າໄວ້ແນວນີ້.”
18 ພະເຢໂຫວາຜູ້ບັນຊາການກອງທັບເວົ້າກັບຂ້ອຍອີກວ່າ: 19 “ພະເຢໂຫວາຜູ້ບັນຊາການກອງທັບບອກວ່າ ‘ການອົດເຂົ້າໃນເດືອນທີ 4+ ໃນເດືອນທີ 5+ ໃນເດືອນທີ 7+ ແລະໃນເດືອນທີ 10+ ຈະເປັນໄລຍະທີ່ມີແຕ່ຄວາມມ່ວນຊື່ນ ແລະຈະເປັນເວລາທີ່ພວກຢູດາມີຄວາມສຸກຄວາມຍິນດີຫຼາຍ.+ ດັ່ງນັ້ນ ໃຫ້ຮັກຄວາມຈິງແລະເຮັດສິ່ງທີ່ເຮັດໃຫ້ເກີດສັນຕິສຸກ.’
20 ພະເຢໂຫວາຜູ້ບັນຊາການກອງທັບເວົ້າວ່າ ‘ຈະມີມື້ໜຶ່ງທີ່ຄົນຈາກຊາດຕ່າງໆແລະເມືອງຕ່າງໆຈະມາເມືອງນີ້ 21 ແລະຄົນຈາກເມືອງໜຶ່ງຈະໄປຫາຄົນອີກເມືອງໜຶ່ງແລ້ວເວົ້າວ່າ “ໄປ໋ ໃຫ້ພວກເຮົາໄປຂໍໃຫ້ພະເຢໂຫວາອວຍພອນແລະໄປຮັບໃຊ້ພະເຢໂຫວາຜູ້ບັນຊາການກອງທັບ. ຂ້ອຍກໍຈະໄປຄືກັນ.”+ 22 ຄົນຈາກຊາດຕ່າງໆແລະຈາກປະເທດມະຫາອຳນາດຕ່າງໆຈະພາກັນມາຮັບໃຊ້ພະເຢໂຫວາຜູ້ບັນຊາການກອງທັບຢູ່ເມືອງເຢຣູຊາເລັມ+ ແລະມາຂໍໃຫ້ພະເຢໂຫວາອວຍພອນ.’
23 ພະເຢໂຫວາຜູ້ບັນຊາການກອງທັບເວົ້າວ່າ ‘ໃນມື້ນັ້ນຈະມີ 10 ຄົນຈາກທຸກຊາດທຸກພາສາ+ມາຈັບຍອຍເສື້ອຂອງຄົນຢິວ*ຜູ້ໜຶ່ງໄວ້ບັກແໜ້ນໆ ແລະເວົ້າວ່າ “ພວກເຮົາຢາກໄປນຳເຈົ້າ+ ຍ້ອນພວກເຮົາໄດ້ຍິນວ່າພະເຈົ້າຢູ່ນຳພວກເຈົ້າ.”’”+
9 ຕໍ່ໄປນີ້ແມ່ນຄຳປະກາດຂອງພະເຈົ້າ.
“ຍ້ອນພະເຢໂຫວາເຝົ້າເບິ່ງມະນຸດ+
ແລະເຝົ້າເບິ່ງອິດສະຣາເອນທຸກຕະກູນ
ພະເຢໂຫວາຈຶ່ງສົ່ງຂ່າວເລື່ອງການຕັດສິນຕໍ່ແຜ່ນດິນຮັດຣັກ
ແລະດາມາເຊ+
3 ຕີເຣສ້າງກຳແພງ*ເພື່ອປົກປ້ອງໂຕເອງ.
ເຂົາເຈົ້າສະສົມເງິນໄວ້ບັກຫຼາຍໆຄືກັບຂີ້ຝຸ່ນ
ແລະລວບລວມຄຳໄວ້ຫຼາຍແທ້ຫຼາຍວ່າຄືກັບຂີ້ດິນຢູ່ຕາມຫົນທາງ.+
4 ພະເຢໂຫວາຈະຍຶດເອົາຊັບສົມບັດຂອງເຂົາເຈົ້າໄປ.
ເພິ່ນຈະທຳລາຍກອງທັບຂອງເຂົາເຈົ້າຢູ່ທະເລ+
ແລະເມືອງນີ້ຈະຖືກຈູດຖິ້ມ.+
5 ອາຊະກາໂລນຈະເຫັນເຫດການນີ້ແລະຈະຢ້ານຫຼາຍ.
ຄາຊາຈະເຈັບປວດໃຈຫຼາຍ.
ເອັກໂຣນກໍຈະເຈັບປວດໃຈຫຼາຍຄືກັນ ຍ້ອນຜູ້ທີ່ລາວໝາຍເພິ່ງຖືກເຮັດໃຫ້ອັບອາຍຂາຍໜ້າ.
ກະສັດຂອງຄາຊາຈະຕາຍ
ແລະຈະບໍ່ມີໃຜອາໄສຢູ່ອາຊະກາໂລນຈັກຄົນ.+
6 ຄົນຕ່າງຊາດຈະມາອາໄສຢູ່ອາຊະໂດດ
ແລະເຮົາຈະກຳຈັດຄວາມຍິ່ງຂອງຟີລິດສະຕີນ.+
7 ເຮົາຈະເອົາສິ່ງທີ່ເປື້ອນເລືອດອອກຈາກປາກເຂົາເຈົ້າ
ແລະເອົາສິ່ງທີ່ເປັນຕາຂີ້ດຽດທີ່ເຂົາເຈົ້າຄາບຢູ່ອອກມາ.
ຄົນຂອງເຂົາເຈົ້າທີ່ຍັງເຫຼືອຢູ່ຈະເປັນຂອງພະເຈົ້າ.
ເຂົາເຈົ້າຈະເປັນຄືກັບຫົວໜ້າເຜົ່າໃນຢູດາ.+
ຄົນເອັກໂຣນຈະເປັນຄືກັບຄົນເຢບຸດ.+
8 ເຮົາຈະຕັ້ງຄ້າຍໃຫ້ເປັນຄືກັບຄົນຍາມ*ປົກປ້ອງວິຫານຂອງເຮົາ+
ເພື່ອຈະບໍ່ໃຫ້ໃຜເຂົ້າຫຼືອອກໄດ້
ແລະບໍ່ໃຫ້ພວກທີ່ຕໍ່ຕ້ານເຂົ້າມາໄດ້ອີກ+
ຍ້ອນຕອນນີ້ເຮົາເຫັນແລ້ວວ່າເກີດຫຍັງຂຶ້ນແດ່.*
9 ຄົນຊີໂອນເອີ້ຍ ໃຫ້ດີໃຈເຕັມທີໂລດ.
ຄົນເຢຣູຊາເລັມເອີ້ຍ ໃຫ້ໂຫ່ຮ້ອງດ້ວຍຄວາມດີໃຈ.
ກະສັດຂອງພວກເຈົ້າກຳລັງມາ.+
ລາວເປັນຄົນຍຸຕິທຳ ເປັນຜູ້ຊ່ວຍໃຫ້ລອດ*
ເປັນຄົນຖ່ອມ+ ແລະລາວກຳລັງນັ່ງຢູ່ເທິງຫຼັງລາ
ເຊິ່ງເປັນລານ້ອຍໂຕຜູ້.+
10 ເຮົາຈະຍຶດເອົາລົດຮົບຂອງເອຟຣາຢິມ
ຈະຍຶດເອົາມ້າຂອງເຢຣູຊາເລັມ
ແລະຈະຍຶດເອົາທະນູຂອງພວກທະຫານ.
ກະສັດຂອງພວກເຈົ້າຈະປະກາດເລື່ອງສັນຕິສຸກຕໍ່ຊາດຕ່າງໆ.+
ລາວຈະປົກຄອງຈາກທະເລຟາກນີ້ໄປຈົນຮອດທະເລຟາກນັ້ນ
ແລະຈາກແມ່ນ້ຳເອິຟາຣາດໄປຈົນຮອດສຸດຂອບໂລກ.+
11 ຊີໂອນ*ເອີ້ຍ ເຮົາຈະໃຊ້ສັນຍາທີ່ຖືກເຮັດໃຫ້ມີຜົນບັງຄັບໃຊ້ດ້ວຍເລືອດເຊິ່ງເຮົາໄດ້ເຮັດກັບເຈົ້າ
ເພື່ອຊ່ວຍນັກໂທດຂອງເຈົ້າໃຫ້ອອກມາຈາກຂຸມທີ່ບໍ່ມີນ້ຳ.+
12 ພວກນັກໂທດທີ່ມີຄວາມຫວັງເອີ້ຍ ໃຫ້ພວກເຈົ້າກັບໄປປ້ອມທີ່ແຂງແຮງ.+
ມື້ນີ້ເຮົາຈະບອກພວກເຈົ້າວ່າ
‘ເຮົາຈະຕອບແທນ ພວກເຈົ້າສອງເທົ່າ.+
13 ເຮົາຈະໃຊ້ຢູດາເປັນຄັນທະນູຂອງເຮົາ.
ເຮົາຈະໃຫ້ເອຟຣາຢິມເປັນລູກທະນູທີ່ວາງໃສ່ຄັນທະນູຂອງເຮົາ.
ຊີໂອນເອີ້ຍ ເຮົາຈະປຸກພວກລູກຂອງເຈົ້າ
ເພື່ອຕໍ່ສູ້ກັບພວກລູກຂອງກຣີກ
ແລະເຮົາຈະເຮັດໃຫ້ເຈົ້າເປັນຄືກັບດາບຂອງທະຫານ.’
14 ພະເຢໂຫວາຈະສະແດງໃຫ້ເຫັນຢ່າງຈະແຈ້ງວ່າເພິ່ນຢູ່ກັບປະຊາຊົນຂອງເພິ່ນ
ແລະທະນູຂອງເພິ່ນຈະຍິງອອກໄປຄືກັບສາຍຟ້າ.
ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈະເປົ່າແກ.+
ເພິ່ນຈະບຸກໂຈມຕີສັດຕູຄືກັບລົມພາຍຸທີ່ພັດມາຈາກທາງທິດໃຕ້.
15 ພະເຢໂຫວາຜູ້ບັນຊາການກອງທັບຈະປົກປ້ອງປະຊາຊົນຂອງເພິ່ນ.
ສັດຕູຈະໃຊ້ເຊືອກແກວ່ງກ້ອນຫີນໂຈມຕີເຂົາເຈົ້າ ແຕ່ເຂົາເຈົ້າຈະຈັດການສັດຕູໄດ້.+
ເຂົາເຈົ້າຈະມ່ວນຊື່ນແລະເຂົາເຈົ້າຈະພາກັນໂຫ່ຮ້ອງຄືກັບໄດ້ກິນເຫຼົ້າແວງ.
ເຂົາເຈົ້າຈະເປັນຄືກັບຖ້ວຍທີ່ມີເຫຼົ້າແວງຢູ່ເຕັມ
ແລະເປັນຄືກັບແຈຂອງແທ່ນບູຊາທີ່ມີແຕ່ເລືອດຕິດຢູ່.+
16 ໃນມື້ນັ້ນ ພະເຢໂຫວາພະເຈົ້າຂອງເຂົາເຈົ້າຈະຊ່ວຍເຂົາເຈົ້າໃຫ້ລອດ
ຄືກັບຜູ້ລ້ຽງແກະທີ່ຊ່ວຍຝູງແກະຂອງເພິ່ນ.+
ເຂົາເຈົ້າຈະເປັນຄືກັບເພັດຢູ່ມົງກຸດທີ່ເຫຼື້ອມມາບໆໄປທົ່ວແຜ່ນດິນຂອງເພິ່ນ.+
17 ເພິ່ນດີແທ້ໆ.+
ເພິ່ນສະຫງ່າງາມອີ່ຫຼີ.
ເຂົ້າແລະເຫຼົ້າແວງໃໝ່ຈະເຮັດໃຫ້ຄົນໜຸ່ມ
ແລະຜູ້ຍິງບໍລິສຸດແຂງແຮງ.”+
10 “ໃຫ້ຂໍຝົນຈາກພະເຢໂຫວາໃນລະດູໃບໄມ້ປົ່ງ.
ພະເຢໂຫວາເປັນຜູ້ເຮັດໃຫ້ມີຂີ້ເຝື້ອມືດຄຶ້ມ
ເຮັດໃຫ້ຝົນຕົກ+
ແລະເຮັດໃຫ້ແຕ່ລະຄົນໄດ້ຮັບຜົນລະປູກຈາກໄຮ່ຈາກສວນຂອງໂຕເອງ.
ເຂົາເຈົ້າມັກເລົ່າຄວາມຝັນທີ່ບໍ່ມີປະໂຫຍດ
ແລະເຂົາເຈົ້າພະຍາຍາມປອບໃຈຄົນອື່ນ ແຕ່ກໍບໍ່ມີໃຜໄດ້ກຳລັງໃຈເລີຍ.
ຍ້ອນແນວນີ້ ຜູ້ຄົນຈະຫຼົງທາງຄືກັບແກະທີ່ຫຼົງທາງ.
ເຂົາເຈົ້າຈະຕົກທຸກໄດ້ຍາກຍ້ອນບໍ່ມີຜູ້ລ້ຽງ.
3 ‘ເຮົາໃຈຮ້າຍໃຫ້ພວກຜູ້ລ້ຽງແກະຫຼາຍ
ແລະເຮົາຈະລົງໂທດພວກຜູ້ນຳທີ່ກົດຂີ່.’*
ພະເຢໂຫວາຜູ້ບັນຊາການກອງທັບຈະກັບມາສົນໃຈພວກຢູດາເຊິ່ງເປັນແກະຂອງເພິ່ນ+
ແລະເພິ່ນຈະເຮັດໃຫ້ເຂົາເຈົ້າເປັນຄືກັບມ້າທີ່ສະຫງ່າງາມໃນສະໜາມຮົບ.
4 ຈະມີຜູ້ນຳ*ຄົນໜຶ່ງມາຈາກເຂົາເຈົ້າ
ຜູ້ປົກຄອງທີ່ສະໜັບສະໜູນ*ຈະມາຈາກເຂົາເຈົ້າ
ທະນູຂອງທະຫານຈະມາຈາກເຂົາເຈົ້າ
ແລະພວກຜູ້ເບິ່ງແຍງ*ຈະມາຈາກເຂົາເຈົ້າຄືກັນ. ທັງໝົດນີ້ຈະອອກມາຈາກເຂົາເຈົ້າ.
5 ເຂົາເຈົ້າຈະເປັນຄືກັບທະຫານ
ທີ່ແລ່ນຜ່ານຂີ້ຕົມໃນສະໜາມຮົບ.
6 ‘ເຮົາຈະເຮັດໃຫ້ພວກຢູດາຍິ່ງໃຫຍ່
ແລະເຮົາຈະຊ່ວຍລູກຫຼານຂອງໂຢເຊັບໃຫ້ລອດ.+
ເຮົາຈະໃຫ້ເຂົາເຈົ້າກັບມາຢູ່ແຜ່ນດິນຂອງເຂົາເຈົ້າ.
ເຮົາຈະເມດຕາເຂົາເຈົ້າ.+
ມັນຈະເປັນຄືກັບວ່າເຮົາບໍ່ເຄີຍຖິ້ມເຂົາເຈົ້າເລີຍ+
ຍ້ອນເຮົາເຢໂຫວາເປັນພະເຈົ້າຂອງເຂົາເຈົ້າ ແລະເຮົາຈະຕອບຄຳອະທິດຖານຂອງເຂົາເຈົ້າ.’
7 ຄົນເອຟຣາຢິມຈະເປັນຄືກັບທະຫານທີ່ເກັ່ງໆ
ແລະເຂົາເຈົ້າຈະມີຄວາມສຸກຄືກັບຄົນທີ່ໄດ້ກິນເຫຼົ້າແວງ.+
ລູກຂອງເຂົາເຈົ້າຈະເຫັນເຫດການນີ້ແລະຈະດີໃຈຄືກັນ.
ເຂົາເຈົ້າຈະມີຄວາມຍິນດີຍ້ອນພະເຢໂຫວາ.+
8 ‘ເຮົາຈະຫວີດປາກເອີ້ນເຂົາເຈົ້າມາແລະໃຫ້ເຂົາເຈົ້າມາລວມໂຕກັນ
ຍ້ອນເຮົາຈະໄຖ່ເຂົາເຈົ້າ.+ ເຂົາເຈົ້າຈະມີຫຼາຍຂຶ້ນ
ແລະຫຼາຍຂຶ້ນເລື້ອຍໆ.
9 ເຖິງວ່າເຮົາຈະເຮັດໃຫ້ເຂົາເຈົ້າກະຈັດກະຈາຍກັນຢູ່ຕາມຊາດຕ່າງໆຄືກັບຫວ່ານແນວປູກ
ແຕ່ເຂົາເຈົ້າຈະຄິດເຖິງເຮົາຕອນທີ່ເຂົາເຈົ້າຢູ່ໃນບ່ອນຫ່າງໄກເຫຼົ່ານັ້ນ.
ເຂົາເຈົ້າກັບລູກຫຼານຂອງເຂົາເຈົ້າຈະມີເຫື່ອແຮງອີກເທື່ອໜຶ່ງແລະຈະກັບມາຫາເຮົາ.
10 ເຮົາຈະພາເຂົາເຈົ້າກັບມາຈາກແຜ່ນດິນເອຢິບ
ແລະເຮົາຈະລວບລວມເຂົາເຈົ້າມາຈາກອັດຊີເຣຍ.+
ເຮົາຈະພາເຂົາເຈົ້າໄປຢູ່ແຜ່ນດິນກິລຽດ+ແລະເລບານອນ
ຈົນບໍ່ມີບ່ອນພໍທີ່ຈະໃຫ້ເຂົາເຈົ້າຢູ່.+
11 ຕອນທີ່ທະເລຂວາງທາງເຂົາເຈົ້າ
ເຮົາກໍຈະຜ່ານມັນໄປແລະຟາດຄື້ນຂອງມັນ.+
ຕອນທີ່ແມ່ນ້ຳນິນຂວາງທາງເຂົາເຈົ້າ ເຮົາກໍຈະເຮັດໃຫ້ນ້ຳນັ້ນແຫ້ງໄປ.
ເຮົາຈະເຮັດໃຫ້ອັດຊີເຣຍທີ່ຍິ່ງຈອງຫອງອັບອາຍຂາຍໜ້າ
ແລະຈະເຮັດໃຫ້ການປົກຄອງຂອງເອຢິບເຖິງຈຸດຈົບ.+
12 ເຮົາເຢໂຫວາຈະເຮັດໃຫ້ເຂົາເຈົ້າຍິ່ງໃຫຍ່+
ແລະເຂົາເຈົ້າຈະໃຊ້ຊີວິດໃນແບບທີ່ນັບຖືຊື່ຂອງເຮົາ.’+ ພະເຢໂຫວາເວົ້າໄວ້ແນວນີ້.”
11 “ເລບານອນເອີ້ຍ ເປີດປະຕູຂອງເຈົ້າແມ້!
ເພື່ອໄຟຈະໄດ້ເຜົາຕົ້ນຊີດ້າ*ຂອງເຈົ້າ.
2 ຕົ້ນຈູນິເປີ້*ເອີ້ຍ ຮ້ອງໄຫ້ເສຍໃຈແມ້! ຍ້ອນຕົ້ນຊີດ້າຖືກຫຼົກໝົດຮາກໝົດເຫງົ້າແລ້ວ
ແລະຕົ້ນໄມ້ໃຫຍ່ໆກໍຖືກໂຄ່ນລົ້ມແລ້ວ.
ຕົ້ນໂອກຢູ່ບາຊານເອີ້ຍ ຮ້ອງໄຫ້ແມ້!
ຍ້ອນປ່າຕຶບໜາຖືກທຳລາຍແລ້ວ.
3 ໃຫ້ຟັງສຽງພວກລ້ຽງແກະທີ່ກຳລັງຮ້ອງໄຫ້ແມ້!
ຍ້ອນກຽດຂອງເຂົາເຈົ້າບໍ່ເຫຼືອແລ້ວ.
ໃຫ້ຟັງສຽງຂອງໂຕສິງຮ້ອງແມ້!
ຍ້ອນປ່າທີ່ຕຶບໜາທີ່ຢູ່ແຄມແມ່ນ້ຳຈໍແດນຖືກທຳລາຍຈົນບໍ່ເຫຼືອແລ້ວ.
4 ພະເຢໂຫວາພະເຈົ້າຂອງຂ້ອຍບອກວ່າ ‘ໃຫ້ລ້ຽງຄົນເຫຼົ່ານີ້ເຊິ່ງເປັນຄືກັບຝູງແກະທີ່ຖືກເລືອກໄວ້ເພື່ອຈະເອົາໄປຂ້າ.+ 5 ຜູ້ທີ່ຊື້ພວກມັນໄປຂ້າ+ກໍບໍ່ມີຄວາມຜິດ. ຜູ້ທີ່ຂາຍພວກມັນ+ກໍເວົ້າວ່າ “ຂໍໃຫ້ພະເຢໂຫວາໄດ້ຮັບຄຳສັນລະເສີນ ຍ້ອນຂ້ອຍຈະລວຍແລ້ວ” ແລະຜູ້ທີ່ລ້ຽງພວກມັນກໍບໍ່ອີ່ຕົນພວກມັນເລີຍ.’+
6 ພະເຢໂຫວາເວົ້າວ່າ ‘ເຮົາຈະບໍ່ອີ່ຕົນຄົນໃນແຜ່ນດິນນີ້ອີກຕໍ່ໄປ. ເຮົາຈະເຮັດໃຫ້ເຂົາເຈົ້າຂົ່ມເຫງກັນເອງແລະກະສັດຂອງເຂົາເຈົ້າຈະກົດຂີ່ເຂົາເຈົ້າ. ແຜ່ນດິນຈະຖືກທຳລາຍຍ້ອນເຂົາເຈົ້າແລະເຮົາຈະບໍ່ຊ່ວຍເຂົາເຈົ້າໃຫ້ລອດ.’”
7 ແລ້ວຂ້ອຍກໍລ້ຽງຝູງແກະນັ້ນທີ່ຕ້ອງຖືກຂາຍໃຫ້ຄົນຂ້າສັດ.+ ພວກເຈົ້າທີ່ເປັນຝູງແກະທີ່ທຸກຍາກເອີ້ຍ ຂ້ອຍເຮັດແນວນີ້ກໍເພື່ອປະໂຫຍດຂອງພວກເຈົ້າ. ຂ້ອຍເອົາໄມ້ຄ້ອນເທົ້າມາ 2 ອັນ ແລະຂ້ອຍຕັ້ງຊື່ໃຫ້ໄມ້ຄ້ອນເທົ້າອັນໜຶ່ງວ່າຄວາມດີ ແລະຕັ້ງຊື່ໃຫ້ອີກອັນໜຶ່ງວ່າອັນໜຶ່ງອັນດຽວກັນ.+ ແລ້ວຂ້ອຍກໍເລີ່ມລ້ຽງແກະຝູງນັ້ນ. 8 ແຕ່ພາຍໃນເດືອນດຽວ ຂ້ອຍໄດ້ໄລ່ຜູ້ລ້ຽງແກະ 3 ຄົນອອກ ຍ້ອນຂ້ອຍໝົດຄວາມອົດທົນກັບເຂົາເຈົ້າ ແລະເຂົາເຈົ້າກໍຊັງຂ້ອຍຫຼາຍ. 9 ຂ້ອຍເລີຍເວົ້າວ່າ: “ຂ້ອຍຈະບໍ່ລ້ຽງພວກເຈົ້າອີກຕໍ່ໄປແລ້ວ. ໃຜຊິຕາຍກະຕາຍໂລດ. ໃຜຊິຖືກທຳລາຍກະຢ່າ. ສ່ວນຄົນທີ່ເຫຼືອຢູ່ກະໃຫ້ກິນຊີ້ນກັນເອງ.” 10 ຈາກນັ້ນ ຂ້ອຍໄດ້ເອົາໄມ້ຄ້ອນເທົ້າທີ່ຊື່ຄວາມດີ+ມາຕັດເປັນທ່ອນໆ ເພື່ອໃຫ້ຮູ້ວ່າຂ້ອຍໄດ້ຍົກເລີກສັນຍາທີ່ຂ້ອຍໄດ້ເຮັດກັບປະຊາຊົນຂອງຂ້ອຍແລ້ວ. 11 ດັ່ງນັ້ນ ສັນຍາຈຶ່ງຖືກຍົກເລີກໃນມື້ນັ້ນ ແລະພວກເຈົ້າທີ່ເປັນຝູງແກະທີ່ທຸກຍາກເຊິ່ງກຳລັງເບິ່ງຂ້ອຍກໍຈະຮູ້ວ່ານີ້ແມ່ນສິ່ງທີ່ພະເຢໂຫວາບອກໄວ້.
12 ຈາກນັ້ນ ຂ້ອຍກໍເວົ້າກັບເຂົາເຈົ້າວ່າ: “ຖ້າພວກເຈົ້າຄິດວ່າມັນເໝາະສົມທີ່ຈະເຮັດ ກໍໃຫ້ເອົາຄ່າຈ້າງມາໃຫ້ຂ້ອຍ. ແຕ່ຖ້າບໍ່ເຫັນດີ ກໍບໍ່ຕ້ອງເອົາໃຫ້.” ແລ້ວເຂົາເຈົ້າກໍຈ່າຍເງິນ 30 ເຊເກນ*ໃຫ້ຂ້ອຍເປັນຄ່າຈ້າງ.+
13 ພະເຢໂຫວາເວົ້າກັບຂ້ອຍວ່າ: “ເຂົາເຈົ້າຄິດວ່າເຮົາມີຄ່າແຕ່ສ່ຳນີ້ບໍ? ຄັນຊັ້ນ ໃຫ້ເຈົ້າໂຍນເງິນເຫຼົ່ານີ້ເຂົ້າໄປໃນຄັງຊັບສິນໃນວິຫານຂອງເຮົາ.”+ ຂ້ອຍກໍເລີຍໂຍນເງິນ 30 ເຊເກນເຂົ້າໄປໃນຄັງຊັບສິນໃນວິຫານຂອງພະເຢໂຫວາ.+
14 ແລ້ວຂ້ອຍກໍເອົາໄມ້ຄ້ອນເທົ້າອັນທີສອງທີ່ຊື່ອັນໜຶ່ງອັນດຽວກັນມາຕັດເປັນທ່ອນ+ ເພື່ອໃຫ້ຮູ້ວ່າຢູດາແລະອິດສະຣາເອນຕັດຄວາມເປັນພີ່ເປັນນ້ອງກັນແລ້ວ.+
15 ພະເຢໂຫວາເວົ້າກັບຂ້ອຍວ່າ: “ຕອນນີ້ ໃຫ້ເຈົ້າໄປເອົາເຄື່ອງໃຊ້ຂອງພວກຜູ້ລ້ຽງແກະທີ່ບໍ່ມີປະໂຫຍດມາ+ 16 ຍ້ອນເຮົາຈະຍອມໃຫ້ມີຜູ້ລ້ຽງແກະຄົນໜຶ່ງເບິ່ງແຍງທົ່ວແຜ່ນດິນ. ລາວຈະບໍ່ເບິ່ງແຍງແກະທີ່ກຳລັງຈະຕາຍ.+ ລາວຈະບໍ່ຊອກຫາແກະນ້ອຍທີ່ຫຼົງທາງ ບໍ່ປິ່ນປົວແກະທີ່ບາດເຈັບ+ ແລະບໍ່ເກືອອາຫານໃຫ້ແກະທີ່ຍັງແຂງແຮງ. ແຕ່ລາວຈະກິນຊີ້ນຂອງແກະໂຕທີ່ຕຸ້ຍໆຈົນໝົດ+ແລະຈະຈີກກີບຕີນຂອງມັນ.+
17 ຜູ້ລ້ຽງແກະທີ່ບໍ່ມີປະໂຫຍດທີ່ປະຖິ້ມຝູງແກະຈະຕ້ອງຈິບຫາຍ.+
ລາວຈະຖືກດາບຟັນແຂນແລະຖືກດາບເຈາະຕາ.
ແຂນຂອງລາວຈະລີບ
ແລະຕາເບື້ອງຂວາຂອງລາວຈະບອດ.”
12 ຕໍ່ໄປນີ້ແມ່ນຄຳປະກາດຂອງພະເຈົ້າ
ຜູ້ທີ່ພືທ້ອງຟ້າຄືກັບພືຜ້າອອກ+
ຜູ້ທີ່ວາງຮາກຖານຂອງໂລກ+
ແລະຜູ້ທີ່ໃຫ້ມະນຸດມີຊີວິດ.*
ພະເຢໂຫວາເວົ້າວ່າ: “ນີ້ແມ່ນສິ່ງທີ່ເຮົາເຢໂຫວາຈະເວົ້າກ່ຽວກັບຄົນອິດສະຣາເອນ.
2 ເຮົາຈະເຮັດໃຫ້ເຢຣູຊາເລັມເປັນຈອກ*ໃສ່ເຫຼົ້າແວງທີ່ເຮັດໃຫ້ຊາດຕ່າງໆທີ່ຢູ່ອ້ອມຂ້າງເມົາ ແລະພວກສັດຕູຈະມາລ້ອມຢູດາກັບເຢຣູຊາເລັມ.+ 3 ໃນມື້ນັ້ນ ເຮົາຈະເຮັດໃຫ້ເຢຣູຊາເລັມເປັນກ້ອນຫີນທີ່ໜັກຫຼາຍ*ສຳລັບຊາດຕ່າງໆ. ຜູ້ໃດທີ່ມາຍົກມັນຈະຕ້ອງເຈັບໜັກແນ່ນອນ+ ແລະທຸກໆຊາດໃນໂລກກໍຈະມາລວມໂຕກັນຕໍ່ສູ້ເມືອງນັ້ນ.”+ 4 ພະເຢໂຫວາເວົ້າວ່າ: “ໃນມື້ນັ້ນ ເຮົາຈະເຮັດໃຫ້ມ້າທຸກໂຕຕື່ນຕົກໃຈ ແລະເຮັດໃຫ້ຄົນຂີ່ຮູ້ສຶກຢ້ານ. ເຮົາຈະເຝົ້າເບິ່ງພວກຢູດາສະເໝີ ແຕ່ເຮົາຈະເຮັດໃຫ້ມ້າຂອງຊາດຕ່າງໆຕາບອດ. 5 ພວກຫົວໜ້າເຜົ່າຂອງຢູດາຈະຄິດໃນໃຈວ່າ ‘ຄົນໃນເຢຣູຊາເລັມເປັນກຳລັງຂອງພວກເຮົາ ຍ້ອນພະເຢໂຫວາຜູ້ບັນຊາການກອງທັບເປັນພະເຈົ້າຂອງເຂົາເຈົ້າ.’+ 6 ໃນມື້ນັ້ນ ເຮົາຈະເຮັດໃຫ້ພວກຫົວໜ້າເຜົ່າຂອງຢູດາເປັນຄືກັບຖ່ານໄຟທີ່ຮ້ອນໆຢູ່ກອງຟືນ ແລະເປັນຄືກັບກະບອງໄຟຢູ່ກາງຟ່ອນເຂົ້າທີ່ລຽນກັນໄວ້.+ ເຂົາເຈົ້າຈະເຜົາໄໝ້ຊາດຕ່າງໆທີ່ຢູ່ອ້ອມຂ້າງ ທັງເບື້ອງຊ້າຍແລະເບື້ອງຂວາຂອງເຂົາເຈົ້າ+ ແລະເຢຣູຊາເລັມຈະມີຄົນອາໄສອີກເທື່ອໜຶ່ງ.*+
7 ເຮົາເຢໂຫວາຈະຊ່ວຍເຕັ້ນຂອງຢູດາກ່ອນໝູ່ ເພື່ອໃນທີ່ສຸດຄົນຂອງດາວິດແລະຄົນໃນເມືອງເຢຣູຊາເລັມຈະບໍ່ໄດ້ຮັບກຽດຫຼາຍໄປກວ່າຄົນອື່ນໆໃນຢູດາ. 8 ໃນມື້ນັ້ນ ເຮົາເຢໂຫວາຈະປົກປ້ອງຄົນໃນເມືອງເຢຣູຊາເລັມຄືກັບໂລ້.+ ໃນມື້ນັ້ນ ຜູ້ໃດໃນເຂົາເຈົ້າທີ່ສະດຸດລົ້ມ*ກໍຈະແຂງແຮງຄືກັບດາວິດ ແລະລູກຫຼານຂອງດາວິດຈະນຳໜ້າເຂົາເຈົ້າຄືກັບພະເຈົ້າແລະຄືກັບທູດສະຫວັນຂອງພະເຢໂຫວາ.+ 9 ແລະໃນມື້ນັ້ນ ເຮົາຈະທຳລາຍຊາດຕ່າງໆທັງໝົດທີ່ມາຕໍ່ສູ້ເມືອງເຢຣູຊາເລັມ.+
10 ເຮົາຈະເອົາພະລັງບໍລິສຸດຂອງເຮົາໃຫ້ກັບລູກຫຼານຂອງດາວິດແລະຄົນໃນເມືອງເຢຣູຊາເລັມ. ເຂົາເຈົ້າຈະໄດ້ຮັບຄວາມພໍໃຈຈາກເຮົາແລະເຮົາຈະຟັງຄຳອະທິດຖານຂອງເຂົາເຈົ້າ. ເຂົາເຈົ້າຈະແນມເບິ່ງຜູ້ໜຶ່ງທີ່ເຂົາເຈົ້າເອົາຫອກແທງ+ ແລ້ວເຂົາເຈົ້າຈະຮ້ອງໄຫ້ໃຫ້ລາວຄືກັບວ່າລູກຊາຍຄົນດຽວຂອງເຂົາເຈົ້າຕາຍ ແລະຈະຮ້ອງໄຫ້ໂສກເສົ້າຄືກັບວ່າລູກຊາຍຜູ້ທຳອິດຂອງເຂົາເຈົ້າຕາຍ. 11 ໃນມື້ນັ້ນ ສຽງຮ້ອງໄຫ້ໃນເມືອງເຢຣູຊາເລັມຈະດັງແຮງຫຼາຍຄືກັບສຽງຮ້ອງໄຫ້ຢູ່ຮາດັດຣິມໂມນທີ່ຢູ່ທົ່ງພຽງຂອງເມກິດໂດ+ 12 ແລະຢູ່ທົ່ວແຜ່ນດິນຈະມີແຕ່ສຽງຮ້ອງໄຫ້. ແຕ່ລະຄອບຄົວຈະຮ້ອງໄຫ້ຕາມຄອບຄົວໃຜຄອບຄົວລາວ. ລູກຫຼານຂອງດາວິດແຕ່ລະຄົນຈະຮ້ອງໄຫ້ໂດຍແບ່ງຜູ້ຊາຍຢູ່ກຸ່ມໜຶ່ງແລະຜູ້ຍິງຢູ່ອີກກຸ່ມໜຶ່ງ. ລູກຫຼານຂອງນາທານ+ແຕ່ລະຄົນຈະຮ້ອງໄຫ້ໂດຍແບ່ງຜູ້ຊາຍຢູ່ກຸ່ມໜຶ່ງແລະຜູ້ຍິງຢູ່ອີກກຸ່ມໜຶ່ງ. 13 ແຕ່ລະຄົນໃນຕະກູນຂອງເລວີ+ຈະຮ້ອງໄຫ້ໂດຍແບ່ງຜູ້ຊາຍຢູ່ກຸ່ມໜຶ່ງແລະຜູ້ຍິງຢູ່ອີກກຸ່ມໜຶ່ງ. ແຕ່ລະຄົນໃນຄອບຄົວຂອງຊິເມອີ+ຈະຮ້ອງໄຫ້ໂດຍແບ່ງຜູ້ຊາຍຢູ່ກຸ່ມໜຶ່ງແລະຜູ້ຍິງຢູ່ອີກກຸ່ມໜຶ່ງ 14 ແລະຄອບຄົວອື່ນໆທີ່ເຫຼືອຈະຮ້ອງໄຫ້ໂດຍແບ່ງຜູ້ຊາຍຢູ່ກຸ່ມໜຶ່ງແລະຜູ້ຍິງຢູ່ອີກກຸ່ມໜຶ່ງ.”
13 “ໃນມື້ນັ້ນຈະມີນ້ຳສ້າງຖືກຂຸດໄວ້ສຳລັບລູກຫຼານຂອງດາວິດແລະຄົນໃນເມືອງເຢຣູຊາເລັມ ເພື່ອເຮັດໃຫ້ເຂົາເຈົ້າສະອາດຈາກບາບແລະຈາກສິ່ງທີ່ເປັນຕາຂີ້ດຽດທີ່ເຂົາເຈົ້າເຮັດ.+
2 ພະເຢໂຫວາຜູ້ບັນຊາການກອງທັບເວົ້າວ່າ ‘ໃນມື້ນັ້ນ ເຮົາຈະທຳລາຍຮູບບູຊາທັງໝົດໃນແຜ່ນດິນ+ແລະຈະບໍ່ມີໃຜຈື່ພະເຫຼົ່ານັ້ນໄດ້ອີກ. ເຮົາຈະກຳຈັດຜູ້ພະຍາກອນປອມ+ແລະຄົນທີ່ສະໜັບສະໜູນສິ່ງທີ່ເຮົາຖືວ່າບໍ່ສະອາດອອກໄປຈາກແຜ່ນດິນໃຫ້ໝົດ. 3 ຖ້າຜູ້ໃດຍັງພະຍາກອນຕົວະຢູ່ ພໍ່ແມ່ຜູ້ທີ່ເກີດລາວກໍຈະເວົ້າກັບລາວວ່າ “ລູກຊິຕາຍແທ້ໆບາດນິ ຍ້ອນລູກຕົວະວ່າພະເຢໂຫວາໃຫ້ລູກເວົ້າແນວນີ້.” ແລ້ວພໍ່ແມ່ຜູ້ທີ່ເກີດລາວຈະເອົາຫອກແທງລາວຈົນຊອດຍ້ອນລາວພະຍາກອນຕົວະ.+
4 ໃນມື້ນັ້ນ ຜູ້ພະຍາກອນປອມທຸກຄົນຈະຕ້ອງອັບອາຍຕອນທີ່ເຂົາເຈົ້າພະຍາກອນຕົວະກ່ຽວກັບນິມິດທີ່ເຂົາເຈົ້າເຫັນ. ເຂົາເຈົ້າຈະບໍ່ໄດ້ນຸ່ງຊຸດຜູ້ພະຍາກອນ+ເພື່ອຫຼອກລວງຄົນອື່ນອີກ. 5 ເຂົາເຈົ້າແຕ່ລະຄົນຈະເວົ້າວ່າ “ຂ້ອຍບໍ່ໄດ້ເປັນຜູ້ພະຍາກອນເດີ້ ຂ້ອຍເປັນແຕ່ຊາວໄຮ່ຊາວນາ*ຊື່ໆ ຍ້ອນມີຄົນຊື້ຂ້ອຍມາເປັນທາດຕັ້ງແຕ່ຂ້ອຍຍັງນ້ອຍໆ.” 6 ຖ້າມີບາງຄົນຖາມເຂົາເຈົ້າວ່າ “ເປັນຫຍັງຢູ່ໂຕ*ເຈົ້າຄືມີບາດ?” ເຂົາເຈົ້າກໍຈະຕອບວ່າ “ຂ້ອຍຖືກຕີຢູ່ເຮືອນໝູ່ຂອງຂ້ອຍ.”’*
7 ພະເຢໂຫວາຜູ້ບັນຊາການກອງທັບເວົ້າວ່າ ‘ຕື່ນເດີ້ ເຈົ້າຜູ້ທີ່ມີດາບເອີ້ຍ ໃຫ້ເອົາດາບໄປຂ້າຜູ້ລ້ຽງແກະຂອງເຮົາ+
ແລະໄປຂ້າຄົນທີ່ເປັນໝູ່ຂອງເຮົາ.
8 ພະເຢໂຫວາບອກວ່າ ‘ໃນທົ່ວແຜ່ນດິນ
ຄົນໃນແຜ່ນດິນ 2 ໃນ 3 ຈະຖືກຂ້າ
ແຕ່ 1 ໃນ 3 ທີ່ຍັງເຫຼືອຈະມີຊີວິດຢູ່.
9 ເຮົາຈະເອົາຄົນ 1 ໃນ 3 ນັ້ນໃສ່ໄຟ.
ເຮົາຈະຫຼອມເຂົາເຈົ້າຄືກັບຫຼອມເງິນ.
ເຮົາຈະທົດສອບເຂົາເຈົ້າຄືກັບທົດສອບຄຳ.+
ເຂົາເຈົ້າຈະເອີ້ນຊື່ເຮົາ
ແລະເຮົາຈະຕອບເຂົາເຈົ້າ.
ເຮົາຈະເວົ້າວ່າ “ເຂົາເຈົ້າເປັນຄົນຂອງເຮົາ”+
ແລະເຂົາເຈົ້າຈະເວົ້າວ່າ “ພະເຢໂຫວາເປັນພະເຈົ້າຂອງພວກເຮົາ.”’”
14 “ວັນຂອງພະເຢໂຫວາຈະມາແນ່ນອນ. ໃນຕອນນັ້ນ ພວກສັດຕູຈະມາຍຶດເອົາຊັບສົມບັດຂອງເຈົ້າ*ແລະແບ່ງກັນຕໍ່ໜ້າຕໍ່ຕາເຈົ້າ. 2 ເພິ່ນຈະລວບລວມທຸກຊາດມາຕໍ່ສູ້ເຢຣູຊາເລັມ. ເຂົາເຈົ້າຈະຍຶດເມືອງນີ້ ປຸ້ນຕາມເຮືອນຕ່າງໆ ແລະຂົ່ມຂືນຜູ້ຍິງ. ເຂົາເຈົ້າຈະຈັບຄົນໃນເມືອງເຄິ່ງໜຶ່ງໄປເປັນຊະເລີຍ ແຕ່ຄົນອື່ນໆທີ່ເຫຼືອຈະຍັງຢູ່ໃນເມືອງ.
3 ພະເຢໂຫວາຈະຕໍ່ສູ້ກັບຊາດເຫຼົ່ານັ້ນ+ຄືກັບທີ່ເພິ່ນເຄີຍຕໍ່ສູ້ກັບສັດຕູຂອງເພິ່ນໃນອະດີດ.+ 4 ໃນມື້ນັ້ນ ເພິ່ນຈະຢືນຢູ່ເທິງພູໝາກກອກ+ເຊິ່ງປິ່ນໜ້າໄປທາງທິດຕາເວັນອອກຂອງເມືອງເຢຣູຊາເລັມ ແລະພູໝາກກອກຈະຖືກແບ່ງເຄິ່ງຕັ້ງແຕ່ທິດຕາເວັນອອກໄປຈົນຮອດທິດຕາເວັນຕົກ.* ເຄິ່ງໜຶ່ງຂອງພູຈະຖືກເຄື່ອນໄປທາງທິດເໜືອແລະເຄິ່ງໜຶ່ງຂອງພູຈະຖືກເຄື່ອນໄປທາງທິດໃຕ້ ເຊິ່ງຈະເຮັດໃຫ້ເກີດຮ່ອມພູທີ່ກວ້າງໃຫຍ່. 5 ພວກເຈົ້າຈະຕ້ອງໄປລີ້ຢູ່ຮ່ອມພູຂອງເພິ່ນ. ຮ່ອມພູນັ້ນຈະມີໄລຍະທາງຍາວໄປຈົນຮອດອາເຊນ. ພວກເຈົ້າຈະຕ້ອງປົບໜີຄືກັບປົບໜີແຜ່ນດິນໄຫວໃນສະໄໝຂອງອຸດຊີຢາກະສັດຂອງຢູດາ.+ ແລ້ວພະເຢໂຫວາພະເຈົ້າຈະມາຕັດສິນແລະພວກຜູ້ບໍລິສຸດຈະຢູ່ກັບເພິ່ນ.+
6 ໃນມື້ນັ້ນຈະບໍ່ມີແສງສະຫວ່າງ.+ ທຸກສິ່ງຈະເຢັນຈົນແຂງ.* 7 ມື້ນັ້ນຈະເປັນທີ່ຮູ້ຈັກວ່າເປັນວັນຂອງພະເຢໂຫວາ.+ ມື້ນັ້ນຈະບໍ່ມີການແຍກກາງເວັນກັບກາງຄືນ. ເຖິງວ່າຈະເປັນຕອນຄ່ຳແລ້ວ ແຕ່ກໍຈະມີແສງຢູ່. 8 ໃນມື້ນັ້ນຈະມີນ້ຳທີ່ໃຫ້ຊີວິດ+ໄຫຼອອກມາຈາກເຢຣູຊາເລັມ.+ ເຄິ່ງໜຶ່ງຈະໄຫຼໄປທາງທະເລທີ່ຢູ່ທິດຕາເວັນອອກ*+ ແລະອີກເຄິ່ງໜຶ່ງຈະໄຫຼໄປທາງທະເລທີ່ຢູ່ທິດຕາເວັນຕົກ.*+ ມັນຈະເກີດຂຶ້ນໃນລະດູຮ້ອນແລະໃນລະດູໜາວ. 9 ພະເຢໂຫວາເປັນກະສັດປົກຄອງທົ່ວໂລກ.+ ໃນມື້ນັ້ນ ທຸກຄົນຈະນະມັດສະການແຕ່ພະເຢໂຫວາເທົ່ານັ້ນ+ ແລະຈະມີແຕ່ຊື່ຂອງເພິ່ນທີ່ໄດ້ຮັບການສັນລະເສີນ.+
10 ແຜ່ນດິນທັງໝົດຈະກາຍເປັນຄືກັບອາຣາບາ+ ເຊິ່ງເລີ່ມຕັ້ງແຕ່ເມືອງເຄບາ+ໄປຈົນຮອດເມືອງຣິມໂມນ+ທີ່ຢູ່ທາງທິດໃຕ້ຂອງເມືອງເຢຣູຊາເລັມ. ເຢຣູຊາເລັມຈະສູງໂດດເດັ່ນແລະຈະມີຄົນອາໄສຢູ່+ ຕັ້ງແຕ່ປະຕູຂອງເບັນຢາມິນ+ໄປຈົນຮອດປະຕູທຳອິດ ແລະໄປຈົນຮອດປະຕູແຈ. ຕັ້ງແຕ່ປ້ອມຮານາເນນ+ໄປຈົນຮອດອ່າງຢຽບໝາກລະແຊັງຂອງກະສັດ 11 ຈະມີຄົນອາໄສຢູ່ຫັ້ນ. ເມືອງເຢຣູຊາເລັມຈະບໍ່ຖືກສາບແຊ່ງອີກຕໍ່ໄປ+ແລະຄົນໃນເມືອງກໍຈະໃຊ້ຊີວິດຢ່າງປອດໄພ.+
12 ພະເຢໂຫວາຈະເຮັດໃຫ້ຊາດຕ່າງໆທີ່ມາໂຈມຕີເຢຣູຊາເລັມເປັນພະຍາດຮ້າຍແຮງ.+ ຊີ້ນຂອງເຂົາເຈົ້າຈະເນົ່າເປື່ອຍໄປທັງໆທີ່ເຂົາເຈົ້າຢືນຢູ່ ຕາຂອງເຂົາເຈົ້າຈະເນົ່າຄາເບົ້າຕາ ແລະລີ້ນຂອງເຂົາເຈົ້າກໍຈະເນົ່າຄາປາກ.
13 ໃນມື້ນັ້ນ ພະເຢໂຫວາຈະເຮັດໃຫ້ເຂົາເຈົ້າຕື່ນຕົກໃຈແລະຢ້ານຫຼາຍ. ເຂົາເຈົ້າຈະຕໍ່ສູ້ແລະທຳຮ້າຍກັນເອງ.+ 14 ຢູດາຈະຮ່ວມມືກັນກັບເຢຣູຊາເລັມເພື່ອເຮັດສົງຄາມ. ເຂົາເຈົ້າຈະລວບລວມເອົາຊັບສົມບັດທີ່ເປັນເງິນ ຄຳ ແລະເຄື່ອງນຸ່ງຂອງຊາດຕ່າງໆທີ່ຢູ່ອ້ອມຂ້າງເຂົາເຈົ້າມາຫຼາຍແທ້ຫຼາຍວ່າ.+
15 ພະຍາດຮ້າຍແຮງຈະເກີດຂຶ້ນກັບໂຕມ້າ ໂຕລໍ* ໂຕອູດ ໂຕລາ ແລະຝູງສັດທັງໝົດທີ່ຢູ່ໃນຄ້າຍຂອງພວກສັດຕູ.
16 ທຸກຄົນທີ່ເຫຼືອລອດຈາກຊາດຕ່າງໆທີ່ມາຕໍ່ສູ້ເຢຣູຊາເລັມຈະຕ້ອງມາເຢຣູຊາເລັມທຸກໆປີ+ ເພື່ອນະມັດສະການພະເຢໂຫວາຜູ້ບັນຊາການກອງທັບ+ແລະຜູ້ເປັນກະສັດ ແລະເພື່ອສະຫຼອງເທດສະການປຸກຕູບ.*+ 17 ຖ້າຊາດໃດບໍ່ໄດ້ມາເຢຣູຊາເລັມເພື່ອນະມັດສະການພະເຢໂຫວາຜູ້ບັນຊາການກອງທັບແລະຜູ້ເປັນກະສັດ ຝົນຈະບໍ່ຕົກໃຫ້ເຂົາເຈົ້າ.+ 18 ຖ້າຄົນເອຢິບບໍ່ມາແລະບໍ່ເຂົ້າມາໃນເມືອງເຢຣູຊາເລັມ ຝົນກໍຈະບໍ່ຕົກໃຫ້ເຂົາເຈົ້າອີກເລີຍ ແລະພະເຢໂຫວາຈະເຮັດໃຫ້ຄົນເອຢິບເປັນພະຍາດຮ້າຍແຮງ ຄືກັບທີ່ເພິ່ນເຮັດໃຫ້ຊາດຕ່າງໆທີ່ບໍ່ມາສະຫຼອງເທດສະການປຸກຕູບເປັນພະຍາດຮ້າຍແຮງ. 19 ນີ້ແມ່ນການລົງໂທດສຳລັບຄວາມຜິດຂອງຄົນເອຢິບແລະຄວາມຜິດຂອງຊາດຕ່າງໆທີ່ບໍ່ໄດ້ມາສະຫຼອງເທດສະການປຸກຕູບ.
20 ໃນມື້ນັ້ນຄຳວ່າ ‘ພະເຢໂຫວາບໍລິສຸດ’+ ຈະຖືກຂຽນໄວ້ຢູ່ກະລິ່ງຂອງໂຕມ້າ. ໝໍ້+ທີ່ຢູ່ໃນວິຫານຂອງພະເຢໂຫວາຈະເປັນຄືກັບຊາມ+ທີ່ຢູ່ຕໍ່ໜ້າແທ່ນບູຊາ. 21 ໝໍ້ທຸກໜ່ວຍທີ່ຢູ່ໃນເຢຣູຊາເລັມກັບໃນຢູດາຈະບໍລິສຸດແລະຈະເປັນຂອງພະເຢໂຫວາຜູ້ບັນຊາການກອງທັບ. ທຸກຄົນທີ່ເອົາເຄື່ອງບູຊາມາໃຫ້ຈະໃຊ້ໝໍ້ເຫຼົ່ານີ້ເພື່ອຕົ້ມ. ໃນມື້ນັ້ນຈະບໍ່ມີພວກການາອານ*ໃນວິຫານຂອງພະເຢໂຫວາຜູ້ບັນຊາການກອງທັບອີກຕໍ່ໄປ.”+
ດາຣິອຸດທີ 1 ຫຼື ດາຣິອຸດຜູ້ຍິ່ງໃຫຍ່
ແປວ່າ “ພະເຢໂຫວາລະນຶກເຖິງ”
ເບິ່ງພາກຜະໜວກ ຂ15
ແປຕາມໂຕວ່າ “ຫຼັງຈາກໄດ້ຮັບການຍົກຍ້ອງ”
ແປຕາມໂຕວ່າ “ມື”
ຫຼື “ຊຸດປະຈຳຕຳແໜ່ງ”
ຫຼື “ຍາມ”
ແປຕາມໂຕວ່າ “ກ້ອນຫີນ; ກົ່ວ”
ຫຼືອາດແປວ່າ “ຕາ”
ຫຼື “ງ່າທີ່ມີໝາກດົກຫຼາຍ”
8,9 ແມັດ
4,5 ແມັດ
ແປຕາມໂຕວ່າ “ເອຟາ.” ໃນຂໍ້ນີ້ໝາຍເຖິງຖັງຫຼືກະຕ່າສຳລັບຜອງເຄື່ອງແຫ້ງປະລິມານ 1 ເອຟາ. 1 ເອຟາເທົ່າກັບ 22 ລິດ. ເບິ່ງພາກຜະໜວກ ຂ14.
ແປຕາມໂຕວ່າ “ລະຫວ່າງຟ້າກັບດິນ”
ໝາຍເຖິງບາບີໂລນ
ຫຼື “ແຜ່ນດິນທີ່ກາຍທະເລໄປ”
ລາວມີອີກຊື່ໜຶ່ງວ່າເຮນດາຍໃນຂໍ້ 10
ອາດໝາຍເຖິງໂຢສີຢາໃນຂໍ້ 10
ເບິ່ງພາກຜະໜວກ ຂ15
ຫຼື “ລູກກຳພ້າ”
ຫຼື “ປິ່ນຫຼັງໃສ່ແບບຫົວແຂງ”
ຫຼື “ອັດຫູເພື່ອບໍ່ໃຫ້ໄດ້ຍິນ”
ຫຼື “ຄຳສອນ”
ຫຼື “ເຮັດໃຈແຂງຄືກັບເພັດ”
ຫຼື “ຄວາມສັດຊື່”
ຫຼື “ບໍ່ເສຍໃຈ”
ແປຕາມໂຕວ່າ “ຢ່າຮັກຄຳສາບານຕົວະ”
ແປຕາມໂຕວ່າ “ຜູ້ຊາຍຄົນຢິວ”
ອາດໝາຍເຖິງແຜ່ນດິນຮັດຣັກຫຼືດາມາເຊ
ຫຼື “ປ້ອມ”
ຫຼື “ກອງທະຫານ”
ອາດໝາຍເຖິງຄວາມທຸກຂອງປະຊາຊົນຂອງເພິ່ນ
ຫຼື “ຜູ້ໄດ້ໄຊຊະນະ; ຜູ້ຊ່ວຍເຫຼືອ”
ຫຼືອາດແປວ່າ “ເຢຣູຊາເລັມ.” ແປຕາມໂຕວ່າ “ເຈົ້າ.”
ຫຼື “ຮູບພະປະຈຳເຮືອນ; ຮູບປັ້ນ”
ຫຼື “ເວົ້າເລື່ອງເລິກລັບ”
ແປຕາມໂຕວ່າ “ແບ້ໂຕຜູ້”
ແປຕາມໂຕວ່າ “ປ້ອມທີ່ຢູ່ແຈ” ເຊິ່ງເຮັດໃຫ້ຄິດເຖິງຜູ້ຊາຍທີ່ເປັນຄົນສຳຄັນຫຼືຫົວໜ້າ
ແປຕາມໂຕວ່າ “ຕະປູ” ເຊິ່ງເຮັດໃຫ້ຄິດເຖິງຄົນທີ່ສະໜັບສະໜູນຫຼືຜູ້ປົກຄອງ
ຫຼື “ພວກຫົວໜ້າ”
ຕົ້ນແປກຊະນິດໜຶ່ງ
ຕົ້ນແປກຊະນິດໜຶ່ງ
342 ກຣາມ. ເບິ່ງພາກຜະໜວກ ຂ14.
ຫຼື “ລົມຫາຍໃຈ”
ຫຼື “ຖ້ວຍ”
ຫຼື “ເປັນພາລະ”
ຫຼື “ໃນບ່ອນທີ່ສົມຄວນຢູ່”
ຫຼື “ທີ່ອ່ອນທີ່ສຸດ”
ແປຕາມໂຕວ່າ “ຂ້ອຍເປັນຄົນໄຖນາ”
ແປຕາມໂຕວ່າ “ຢູ່ລະຫວ່າງມືທັງສອງເບື້ອງຂອງເຈົ້າ” ໝາຍເຖິງຢູ່ເອິກຫຼືຢູ່ຫຼັງ
ຫຼື “ຂອງຄົນທີ່ຮັກຂ້ອຍ”
ຫຼື “ຝູງແກະ”
ໝາຍເຖິງເຢຣູຊາເລັມ
ແປຕາມໂຕວ່າ “ທະເລ”
ຫຼື “ເໜັງບໍ່ໄດ້” ຄືກັບວ່າເຮັດໃຫ້ແຂງດ້ວຍຄວາມເຢັນ
ໝາຍເຖິງທະເລຕາຍ
ໝາຍເຖິງທະເລເມດີແຕຣາເນ
ລໍມີພໍ່ເປັນລາແລະມີແມ່ເປັນມ້າ
ເອີ້ນອີກຊື່ໜຶ່ງວ່າເທດສະການເກັບກ່ຽວຜົນລະປູກ
ຫຼືອາດແປວ່າ “ພວກພໍ່ຄ້າ”