ບົດ 68
ເດັກນ້ອຍຊາຍສອງຄົນກັບຄືນມີຊີວິດອີກ
ຖ້າເຈົ້າຕາຍ ແມ່ຂອງເຈົ້າຈະຮູ້ສຶກຢ່າງໃດຖ້າເຈົ້າກັບຄືນມີຊີວິດ? ນາງຄົງຈະມີຄວາມດີໃຈຢ່າງເຫຼືອລົ້ນ! ແຕ່ຄົນທີ່ຕາຍແລ້ວຈະສາມາດກັບຄືນມີຊີວິດອີກໄດ້ບໍ? ເລື່ອງຢ່າງນີ້ເຄີຍເກີດຂຶ້ນບໍ?
ຈົ່ງເບິ່ງຊາຍທີ່ຢູ່ໃນຮູບນີ້ ແລະຜູ້ຍິງກັບເດັກນ້ອຍຜູ້ຊາຍ. ຊາຍຄົນນີ້ຄືຜູ້ທຳນວາຍເອລີ. ຍິງຄືແມ່ໝ້າຍຄົນນຶ່ງອາໄສຢູ່ໃນເມືອງຊາເຣບຕາ ແລະເດັກນ້ອຍເປັນລູກຊາຍຂອງນາງ. ມື້ນຶ່ງເດັກຊາຍເລີ່ມບໍ່ສະບາຍ. ອາການປ່ວຍຂອງເດັກກໍ່ໜັກຂຶ້ນທຸກທີຈົນໃນທີ່ສຸດເດັກຕາຍ. ຕໍ່ຈາກນັ້ນເອລີບອກກັບຜູ້ຍິງນັ້ນວ່າ: ‘ຈົ່ງເອົາເດັກຊາຍໃຫ້ເຮົາ.’
ເອລີກໍ່ເອົາເດັກຊາຍທີ່ຕາຍນັ້ນຂຶ້ນໄປຫ້ອງຊັ້ນເທິງແລະວາງເທິງຕຽງ. ຫຼັງຈາກນັ້ນທ່ານອະທິດຖານວ່າ: ‘ໂອ້ພະເຢໂຫວາ ຂໍໂຜດກະທຳໃຫ້ເດັກຄົນນີ້ຄືນມາມີຊີວິດອີກເຖີດ.’ ແລະເດັກຊາຍນັ້ນກໍ່ເລີ່ມຫາຍໃຈ! ດັ່ງນັ້ນເອລີກໍ່ຈຶ່ງນຳເຂົາລົງມາຍັງຫ້ອງລຸ່ມແລະກ່າວແກ່ຍິງນັ້ນວ່າ: ‘ຈົ່ງເບິ່ງ ລູກຊາຍຂອງເຈົ້າມີຊີວິດຢູ່!’ ນີ້ເປັນເຫດທີ່ເຮັດໃຫ້ແມ່ມີຄວາມດີອົກດີໃຈເຫຼືອລົ້ນ.
ຍັງມີຜູ້ທຳນວາຍສຳຄັນອີກຄົນນຶ່ງຂອງພະເຢໂຫວາຊື່ວ່າເອລີເຊ. ທ່ານເປັນຜູ້ຊ່ວຍຂອງເອລີ. ແຕ່ໃນເວລາຕໍ່ມາພະເຢໂຫວາກໍ່ໃຊ້ເອລີເຊເຮັດການອັດສະຈັນຕ່າງໆກັນດ້ວຍ. ມື້ນຶ່ງເອລີເຊໄປເມືອງຊຶເນມ ທີ່ນັ້ນມີຜູ້ຍິງຄົນນຶ່ງໄດ້ສະແດງຄວາມເມດຕາແກ່ທ່ານຫຼາຍ. ຕໍ່ມາຜູ້ຍິງຄົນນີ້ມີລູກຊາຍ.
ຫຼັງຈາກເດັກຊາຍເຕີບໂຕຂຶ້ນ ເຊົ້າມື້ນຶ່ງ ເດັກຊາຍອອກໄປຫາພໍ່ຜູ້ທີ່ພວມເຮັດງານຢູ່ທົ່ງນາ. ໃນທັນໃດນັ້ນເດັກຊາຍຮ້ອງອອກມາວ່າ: ‘ຂ້ອຍເຈັບຫົວຫຼາຍ!’ ຫຼັງຈາກນຳເຂົາກັບບ້ານແລ້ວ ເດັກນັ້ນກໍ່ຕາຍ. ແມ່ຂອງເດັກຮູ້ສຶກເສົ້າໂສກຫຼາຍ! ນາງຈຶ່ງໄປຕາມເອລີເຊທັນທີ.
ເມື່ອເອລີເຊມາເຖິງ ທ່ານເຂົ້າໄປໃນຫ້ອງຊຶ່ງເດັກນ້ອຍທີ່ຕາຍແລ້ວນັ້ນຢູ່. ທ່ານອະທິດຖານຕໍ່ພະເຢໂຫວາ ແລະນອນລົງເທິງຮ່າງກາຍ. ບໍ່ດົນຕົວຂອງເດັກກໍ່ອຸ່ນຄືນມາ ແລະເດັກໄດ້ຈາມເຈັດເທື່ອ. ເມື່ອແມ່ເຂົ້າໄປໃນຫ້ອງກໍ່ເຫັນວ່າລູກຊາຍນ້ອຍມີຊີວິດຢູ່ນາງຮູ້ສຶກຍິນດີອີ່ຫຼີ!
ມີຄົນມາກຫຼາຍທີ່ຕາຍໄປແລ້ວ. ຊຶ່ງເຮັດໃຫ້ຄອບຄົວແລະເພື່ອນໂສກເສົ້າຫຼາຍ. ພວກເຮົາບໍ່ມີອຳນາດທີ່ຈະປຸກຄົນຕາຍໃຫ້ຄືນມາໄດ້. ແຕ່ພະເຢໂຫວາມີອຳນາດເຮັດໄດ້. ຕອນຫຼັງເຮົາຈະຮຽນຮູ້ເຖິງວິທີທີ່ພະອົງຈະນຳເອົາຫຼາຍໆລ້ານຄົນກັບຄືນມາມີຊີວິດອີກ.
1 ກະສັດ 17:8-24; 2 ກະສັດ 4:8-37.