ບົດ 72
ພະເຈົ້າຊ່ວຍກະສັດເອເຊເກຍເຊ
ເຈົ້າຮູ້ບໍວ່າເປັນຫຍັງຊາຍຄົນນີ້ພວມອະທິດຖານເຖິງພະເຢໂຫວາ? ເປັນຫຍັງເພິ່ນຈຶ່ງເອົາຈົດໝາຍເຫຼົ່ານີ້ມາວາງທີ່ໜ້າແທ່ນບູຊາຂອງພະເຢໂຫວາ? ຊາຍຄົນນີ້ຄືເອເຊເກຍເຊ. ເພິ່ນຄືກະສັດແຫ່ງຍິດສະລາເອນສອງກະກູນທາງພາກໃຕ້. ແລະເພິ່ນຕົກຢູ່ໃນສະພາບທີ່ລຳບາກຫຼາຍ. ເປັນຫຍັງ?
ເພາະວ່າກອງທັບຊາດອາຊີລີໄດ້ທຳລາຍສິບກະກູນທາງພາກເໜືອແລ້ວ. ພະເຢໂຫວາໃຫ້ເຫດການເຊັ່ນນີ້ເກີດຂຶ້ນເພາະວ່າຜູ້ຄົນເຫຼົ່ານັ້ນຊົ່ວຫຼາຍ. ແລະຕອນນີ້ກອງທັບອາຊີລີຍົກມາເພື່ອຕໍ່ສູ້ລາຊະອານາຈັກສອງກະກູນ.
ກະສັດແຫ່ງອາຊີລີຫາກໍ່ສົ່ງຈົດໝາຍເຖິງກະສັດເອເຊເກຍເຊ. ນີ້ຄືຈົດໝາຍທີ່ເອເຊເກຍເຊວາງລົງທີ່ນີ້ຕໍ່ໜ້າພະເຢໂຫວາ. ຈົດໝາຍເຫຼົ່ານີ້ຫຍໍ້ຫຍັນພະເຢໂຫວາ ແລະບອກເອເຊເກຍເຊໃຫ້ຍອມຈຳນົນສາ. ເພາະເຫດນີ້ເອງເອເຊເກຍເຊຈຶ່ງອະທິດຖານ: ‘ໂອ້ພະເຢໂຫວາ ຂໍຊ່ວຍພວກຂ້າພະເຈົ້າໃຫ້ພົ້ນຈາກກະສັດອາຊີລີເຖີດ. ແລ້ວຊາດທັງໝົດຈະໄດ້ຮູ້ວ່າພະອົງຜູ້ດຽວເປັນພະເຈົ້າ.’ ພະເຢໂຫວາຈະຟັງເອເຊເກຍເຊບໍ?
ເອເຊເກຍເຊເປັນກະສັດທີ່ດີ. ເພິ່ນບໍ່ຄືພວກກະສັດຊົ່ວຂອງສິບກະກູນແຫ່ງລາຊະອານາຈັກຍິດສະລາເອນຫຼືຄືກະສັດອາກາເຊພໍ່ທີ່ຊົ່ວຂອງເພິ່ນ. ເອເຊເກຍເຊເຄີຍເອົາໃຈໃສ່ເຊື່ອຟັງກົດໝາຍຂອງພະເຢໂຫວາທັງໝົດ. ດັ່ງນັ້ນ ຫຼັງຈາກເອເຊເກຍເຊຈົບການອະທິດຖານ ຜູ້ທຳນວາຍເອຊາອີສົ່ງຂ່າວນີ້ຈາກພະເຢໂຫວາມາຍັງເພິ່ນວ່າ: ‘ກະສັດອາຊີລີຈະບໍ່ເຂົ້າມາໃນນະຄອນເຢຣຶຊາເລມ. ທະຫານຂອງເຂົາຈະບໍ່ມີຈັກຄົນເຂົ້າມາໃກ້. ພວກເຂົາຈະບໍ່ຍິງລູກທະນູໃສ່ນະຄອນແມ່ນແຕ່ລູກດຽວ.’
ຈົ່ງເບິ່ງທີ່ຮູບໜ້ານີ້. ເຈົ້າຮູ້ບໍວ່າທະຫານທີ່ຕາຍເຫຼົ່ານີ້ແມ່ນໃຜ? ເຂົາຄືພວກທະຫານຊາດອາຊີລີ. ພະເຢໂຫວາສົ່ງທູດສະຫວັນຂອງພະອົງມາ ແລະໃນຄືນດຽວທູດສະຫວັນຂ້າທະຫານອາຊີລີ 185,000 ຄົນ. ດັ່ງນັ້ນກະສັດອາຊີລີຈຶ່ງຍອມແພ້ແລ້ວເມືອບ້ານ.
ລາຊະອານາຈັກສອງກະກູນຈຶ່ງປອດໄພແລະຜູ້ຄົນມີຄວາມສະຫງົບສຸກຢູ່ຊົ່ວຂະນະນຶ່ງ. ແຕ່ຫຼັງຈາກເອເຊເກຍເຊຕາຍ ມານາເຊບຸດຊາຍຂອງເພິ່ນກໍ່ເປັນກະສັດ. ມານາເຊແລະອາໂມນບຸດຂອງທ່ານຊຶ່ງມາທີຫຼັງທັງສອງເປັນກະສັດທີ່ຊົ່ວຫຼາຍ. ດັ່ງນັ້ນແຜ່ນດິນຈຶ່ງເຕັມໄປດ້ວຍອາດຊະຍາກຳແລະຄວາມຮຸນແຮງອີກ. ເມື່ອກະສັດອາໂມນຖືກລອບຂ້າໂດຍຜູ້ຮັບໃຊ້ຂອງທ່ານ ໂຢເຊຍເຊບຸດຊາຍຂອງທ່ານໄດ້ຖືກແຕ່ງຕັ້ງເປັນກະສັດແຫ່ງລາຊະອານາຈັກສອງກະກູນ.
2 ກະສັດ 18:1-36; 19:1-37; 21:1-25.