ຫ້ອງສະໝຸດອອນລາຍຂອງວັອດສ໌ທາວເວີ້
ຫໍສັງເກດການ
ຫ້ອງສະໝຸດອອນລາຍ
ລາວ
  • ຄຳພີໄບເບິນ
  • ສິ່ງພິມ
  • ການປະຊຸມ
  • pr ພາກ 2 ໜ້າ 6-10
  • ໃຜ​ຈະ​ບອກ​ເຮົາ​ໄດ້?

ສ່ວນນີ້ບໍ່ມີວິດີໂອ

ຂໍອະໄພ ບໍ່ສາມາດເປີດວິດີໂອໄດ້

  • ໃຜ​ຈະ​ບອກ​ເຮົາ​ໄດ້?
  • ຈຸດມຸ່ງໝາຍຂອງຊີວິດຄືຫຍັງ? ທ່ານຈະພົບໄດ້ຢ່າງໃດ?
  • ຫົວຂໍ້ຍ່ອຍ
  • ຊີວິດ​ເກີດ​ຂຶ້ນ​ໂດຍ​ບັງ​ເອີນ​ບໍ?
  • ແບບ​ຕ້ອງ​ມີ​ຜູ້​ອອກ​ແບບ
  • ສິ່ງ​ທີ່​ຄຳພີ​ໄບເບິນ​ບອກ​ໄວ້
  • “ຖືກ​ສ້າງ​ຢ່າງ​ໜ້າ​ພິດສະຫວົງ”
ຈຸດມຸ່ງໝາຍຂອງຊີວິດຄືຫຍັງ? ທ່ານຈະພົບໄດ້ຢ່າງໃດ?
pr ພາກ 2 ໜ້າ 6-10

ພາກ 2

ໃຜ​ຈະ​ບອກ​ເຮົາ​ໄດ້?

1, 2. ວິທີ​ດີ​ທີ່​ສຸດ​ເພື່ອ​ຄົ້ນ​ຫາ​ຈຸດ​ມຸ່ງ​ໝາຍ​ຂອງ​ບາງ​ສິ່ງ​ບາງ​ຢ່າງ​ຊຶ່ງ​ຖືກ​ອອກ​ແບບ​ຂຶ້ນ​ນັ້ນ​ຄື​ຢ່າງ​ໃດ?

1 ໃຜ​ຈະ​ບອກ​ເຮົາ​ໄດ້​ວ່າ ຈຸດ​ມຸ່ງ​ໝາຍ​ທີ່​ແທ້​ຈິງ​ຂອງ​ຊີວິດ​ຄື​ຫຍັງ? ຖ້າ​ທ່ານ​ໄປ​ຢາມ​ນັກ​ອອກ​ແບບ​ເຄື່ອງ​ກົນ​ຈັກ​ຄົນ​ນຶ່ງ​ແລ້ວ​ເບິ່ງ​ລາວ​ເຮັດ​ວຽກ​ກັບ​ຊິ້ນ​ສ່ວນ​ທີ່​ຊັບຊ້ອນ​ຂອງ​ເຄື່ອງ​ກົນ​ຈັກ​ຊິ້ນ​ນຶ່ງ​ຊຶ່ງ​ທ່ານ​ບໍ່​ຮູ້​ຈັກ ທ່ານ​ຈະ​ຮູ້​ໄດ້​ຢ່າງ​ໃດ​ວ່າ​ຊິ້ນ​ສ່ວນ​ນັ້ນ​ແມ່ນ​ສຳລັບ​ຫຍັງ? ວິທີ​ດີ​ທີ່​ສຸດ​ສຳລັບ​ທ່ານ​ກໍ່​ຄື​ການ​ຖາມ​ຜູ້​ອອກ​ແບບ​ນັ້ນ​ເອງ.

2 ແຕ່​ແລ້ວ​ຈະ​ເວົ້າ​ຢ່າງ​ໃດ​ກ່ຽວ​ກັບ​ການ​ອອກ​ແບບ​ອັນ​ຍອດ​ຢ້ຽມ​ທີ່​ເຮົາ​ເຫັນ​ຢູ່​ອ້ອມ​ຮອບ​ໂຕ​ເຮົາ​ເອງ​ເທິງ​ແຜ່ນດິນ​ໂລກ ເຊັ່ນ ໃນ​ບັນດາ​ສິ່ງ​ມີ​ຊີວິດ​ຕ່າງໆ ໄປ​ຈົນ​ເຖິງ​ຈຸລັງ​ຊີວິດ​ທີ່​ນ້ອຍ​ທີ່​ສຸດ? ແມ່ນ​ແຕ່​ໂມເລກູນ​ແລະ​ປະລະມານູ​ທີ່​ນ້ອຍ​ກວ່າ​ນັ້ນ​ຫຼາຍ​ໃນ​ຈຸລັງ​ກໍ່​ຖືກ​ອອກ​ແບບ​ຢ່າງ​ດີ​ຢ້ຽມ​ແລະ​ເປັນ​ລະບຽບ. ເຊັ່ນ​ດຽວ​ກັນ​ຈະ​ເວົ້າ​ຢ່າງ​ໃດ​ກ່ຽວ​ກັບ​ຈິດ​ໃຈ​ມະນຸດ​ຊຶ່ງ​ມີ​ການ​ອອກ​ແບບ​ຢ່າງ​ອັດສະຈັນ? ແລະ​ລະບົບ​ສຸລິຍະ​ຈັກ​ກະ​ວານ​ຂອງ​ເຮົາ, ກາແລັກຊີ​ທາງ​ຊ້າງ​ເຜືອກ​ຂອງ​ເຮົາ ແລະ​ເອກະພົບ​ເປັນ​ຢ່າງ​ໃດ? ການ​ອອກ​ແບບ​ອັນ​ໜ້າ​ເກງ​ຂາມ​ທັງ​ປວງ​ນີ້​ຍ່ອມ​ຕ້ອງ​ມີ​ຜູ້​ອອກ​ແບບ​ບໍ່​ແມ່ນ​ບໍ? ຢ່າງ​ແນ່​ແທ້ ພະອົງ​ສາມາດ​ບອກ​ເຮົາ​ວ່າ​ເພາະ​ເຫດ​ໃດ​ພະອົງ​ຈຶ່ງ​ໄດ້​ອອກ​ແບບ​ສິ່ງ​ເຫຼົ່າ​ນັ້ນ​ຂຶ້ນ​ມາ.

ຊີວິດ​ເກີດ​ຂຶ້ນ​ໂດຍ​ບັງ​ເອີນ​ບໍ?

3, 4. ມີ​ທາງ​ເປັນ​ໄປ​ໄດ້​ພຽງ​ໃດ​ທີ່​ຊີວິດ​ຈະ​ເກີດ​ຂຶ້ນ​ໂດຍ​ບັງ​ເອີນ?

3 ສາລານຸກົມ​ອາເມລິກາ​ນາ ໃຫ້​ຂໍ້​ສັງເກດ​ເຖິງ “ລະດັບ​ຄວາມ​ສະລັບ​ຊັບຊ້ອນ​ແລະ​ຄວາມ​ເປັນ​ລະບຽບ​ໃນ​ສິ່ງ​ມີ​ຊີວິດ” ແລະ​ກ່າວ​ວ່າ: “ການ​ກວດ​ສອບ​ຢ່າງ​ລະອຽດ​ໃນ​ດອກ​ໄມ້, ແມງ​ໄມ້, ຫຼື​ສັດ​ລ້ຽງ​ລູກ​ດ້ວຍ​ນົມ ເຜີຍ​ໃຫ້​ເຫັນ​ເຖິງ​ການ​ຈັດ​ອົງ​ປະກອບ​ຕ່າງໆ ທີ່​ແນ່​ນອນ​ຈົນ​ບໍ່​ໜ້າ​ເຊື່ອ.” ເຊີ ເບີນາດ ໂລເອນ ນັກ​ດາລາສາດ​ຊາວ​ອັງກິດ ເມື່ອ​ກ່າວ​ເຖິງ​ອົງ​ປະກອບ​ທາງ​ເຄມີ​ຂອງ​ສິ່ງ​ມີ​ຊີວິດ​ໄດ້​ຂຽນ​ວ່າ: “ຄວາມ​ເປັນ​ໄປ​ໄດ້​ທີ່. . .ເຫດ​ບັງ​ເອີນ ນຳ​ໄປ​ສູ່​ການ​ປະກອບ​ກັນ​ຂຶ້ນ​ຂອງ​ໂມເລກູນ​ໂປຣຕີນ​ຂະໜາດ​ນ້ອຍ​ທີ່​ສຸດ​ນັ້ນ​ມີ​ນ້ອຍ​ຈົນ​ບໍ່​ອາດ​ຈະ​ຄຶດ​ພາບ​ອອກ​ໄດ້. . . .ແທ້​ຈິງ​ແລ້ວ​ຄວາມ​ເປັນ​ໄປ​ໄດ້​ນັ້ນ​ຄື​ສູນ.”

4 ໂດຍ​ທຳ​ນອງ​ດຽວ​ກັນ ເຟຣດ ຮອຍລ໌ ນັກ​ດາລາ​ສາດ​ກ່າວ​ວ່າ: “ໂຄງ​ສ້າງ​ທັງ​ໝົດ​ຂອງ​ຊີວະວິທະຍາ​ແຕ່​ເດີມ​ຍັງ​ຖື​ວ່າ​ຊີວິດ​ເກີດ​ຂຶ້ນ​ໂດຍ​ບັງ​ເອີນ. ເຖິງ​ຢ່າງ​ນັ້ນ​ກໍ່​ດີ ຂະນະ​ທີ່​ນັກ​ຊີວະ​ເຄມີ​ຄົ້ນ​ພົບ​ຄວາມ​ຊັບຊ້ອນ​ອັນ​ໜ້າ​ເກງ​ຂາມ​ຂອງ​ຊີວິດ​ຫຼາຍ​ຂຶ້ນ​ເລື້ອຍໆ ກໍ່​ປາກົດ​ຊັດເຈນ​ວ່າ ໂອກາດ​ຕ່າງໆ ທີ່​ຊີວິດ​ຈະ​ເກີດ​ຂຶ້ນ​ໂດຍ​ບັງ​ເອີນ​ນັ້ນ​ມີ​ນ້ອຍ​ຫຼາຍ​ຈົນ​ເຮົາ​ສາມາດ​ຕັດ​ອອກ​ໄປ​ໄດ້​ເລີຍ. ຊີວິດ​ເກີດ​ຂຶ້ນ​ໂດຍ​ບັງ​ເອີນ​ບໍ່​ໄດ້.”

5-7. ວິຊາ​ຊີວະວິທະຍາ​ທາງ​ໂມເລກູນ​ພິສູດ​ຢືນ​ຢັນ​ຢ່າງ​ໃດ​ວ່າ​ຊີວິດ​ບໍ່​ອາດ​ຈະ​ເກີດ​ຂຶ້ນ​ໄດ້​ໂດຍ​ບັງ​ເອີນ?

5 ຊີວະວຶທະຍາ​ທາງ​ໂມເລກູນ ນຶ່ງ​ໃນ​ສາຂາ​ວິຊາ​ໃໝ່ໆ ທາງ​ວິທະຍາສາດ ເປັນ​ການ​ສຶກສາ​ກ່ຽວ​ກັບ​ສິ່ງ​ມີ​ຊີວິດ​ໃນ​ລະດັບ​ຂອງ​ຈີນ​ຫຼື​ຈຸລັງ (ໜ່ວຍ​ຖ່າຍ​ສືບ​ພັນ), ໂມເລກູນ, ແລະ​ປະລະມານູ. ໄໝເກີນ ເດນຕັນ ນັກ​ຊີວະວຶທະຍາ​ໂມເລກູນ​ຊີ້​ແຈງ​ກ່ຽວ​ກັບ​ສິ່ງ​ທີ່​ມີ​ການ​ຄົ້ນ​ພົບ​ວ່າ: “ຄວາມ​ສະລັບ​ຊັບຊ້ອນ​ຂອງ​ຈຸລັງ​ທີ່​ລຽບ​ງ່າຍ​ທີ່​ສຸດ​ເທົ່າ​ທີ່​ຮູ້​ຈັກ​ກັນ​ນັ້ນ​ມີ​ຫຼາຍ​ຈົນ​ບໍ່​ສາມາດ​ຍອມ​ຮັບ​ໄດ້​ວ່າ​ສິ່ງ​ນີ້​ໄດ້​ຮວມ​ຕົວ​ກັນ​ເອງ​ຢ່າງ​ກະທັນຫັນ​ໄດ້​ໂດຍ​ເຫດການ​ພິລຶກພິໂລ​ຊຶ່ງ​ບໍ່​ໜ້າ​ຈະ​ເກີດ​ຂຶ້ນ​ໄດ້​ເລີຍ.” “ແຕ່​ບໍ່​ແມ່ນ​ພຽງ​ຄວາມ​ສະລັບ​ຊັບຊ້ອນ​ຂອງ​ລະບົບ​ຂອງ​ສິ່ງ​ມີ​ຊີວິດ​ເທົ່າ​ນັ້ນ​ຊຶ່ງ​ເປັນ​ສິ່ງ​ທີ່​ທ້າ​ທາຍ​ຢ່າງ​ຍິ່ງ ຍັງ​ມີ​ຄວາມ​ປະນີດ​ລະອຽດ​ອ່ອນ​ຈົນ​ເຫຼືອ​ເຊື່ອ​ອີກ​ດ້ວຍ​ຊຶ່ງ​ປາກົດ​ໃຫ້​ເຫັນ​ເລື້ອຍໆ ໃນ​ການ​ອອກ​ແບບ​ສິ່ງ​ເຫຼົ່າ​ນັ້ນ.” “ໃນ​ລະດັບ​ຂອງ​ໂມເລກູນ​ນັ້ນ​ເອງ​ຊຶ່ງ . . . ຄວາມ​ສະຫຼາດ​ຫຼັກ​ແຫຼມ​ແຫ່ງ​ການ​ອອກ​ແບບ​ດ້ານ​ຊີວະວຶທະຍາ​ແລະ​ຄວາມ​ສົມບູນ​ພ້ອມ​ແຫ່ງ​ເປົ້າ​ໝາຍ​ທີ່​ບັນລຸ​ຜົນ​ສຳເລັດ​ໄດ້​ປາກົດ​ຢ່າງ​ເດັ່ນ​ຊັດ.”

6 ເດນ​ຕັນ​ກ່າວ​ຕໍ່​ໄປ​ວ່າ: “ທຸກ​ທີ່​ທຸກ​ບ່ອນ​ທີ່​ເຮົາ​ເບິ່ງ ບໍ່​ວ່າ​ຈະ​ເລິກ​ທໍ່​ໃດ​ກໍ່​ຕາມ​ເຮົາ​ພົບ​ຄວາມ​ງົດງາມ​ແລະ​ຄວາມ​ປານີດ​ລະອຽດ​ອ່ອນ​ແຫ່ງ​ຄຸນ​ລັກສະນະ​ອັນ​ລ້ຳ​ເລີດ​ສົມບູນ ຊຶ່ງ​ເຮັດ​ໃຫ້​ແນວ​ຄວາມ​ຄຶດ​ໃນ​ເລື່ອງ​ຄວາມ​ບັງ​ເອີນ​ອ່ອນ​ໄປ. ເປັນ​ເລື່ອງ​ທີ່​ເຊື່ອ​ຖື​ໄດ້​ແທ້​ບໍ​ທີ່​ວ່າ ຂັ້ນ​ຕອນ​ໂດຍ​ບັງ​ເອີນ​ຕ່າງໆ ໄດ້​ສາມາດ​ສ້າງ​ສິ່ງ​ທີ່​ເປັນ​ຈິງ​ຂຶ້ນ​ມາ ຊຶ່ງ​ສ່ວນ​ປະກອບ​ນ້ອຍ​ທີ່​ສຸດ—ໂປຣຕີນ​ຫຼື​ຈີນ (ໜ່ວຍ​ຖ່າຍ​ສືບ​ພັນ) ທີ່​ໃຊ້​ວຽກ​ໄດ້—ສະລັບ​ຊັບຊ້ອນ​ເກີນ​ຄວາມ​ສາມາດ​ຂອງ​ເຮົາ​ໃນ​ການ​ສ້າງ​ຂຶ້ນ ຄວາມ​ເປັນ​ຈິງ​ຊຶ່ງ​ກົງ​ກັນ​ຂ້າມ​ກັບ​ຄວາມ​ບັງ​ເອີນ​ຢ່າງ​ຫຼວງ​ຫຼາຍ ຊຶ່ງ​ເໜືອ​ກວ່າ​ສິ່ງ​ໃດໆ ທີ່​ສ້າງ​ຂຶ້ນ​ໂດຍ​ສະຕິ​ປັນຍາ​ຂອງ​ມະນຸດ​ໃນ​ທຸກ​ດ້ານ?” ທ່ານ​ຍັງ​ກ່າວ​ອີກ​ວ່າ: “ລະຫວ່າງ​ຈຸລັງ​ທີ່​ມີ​ຊີວິດ​ກັບ​ລະບົບ​ທີ່​ມີ​ລະບຽບ​ສູງ​ສຸດ​ທີ່​ບໍ່​ແມ່ນ​ທາງ​ຊີວະວິທະຍາ​ເຊັ່ນ​ສະເກັດ​ແກ້ວ​ໃສ​ຫຼື​ເກັດ​ຫິມະ​ມີ​ຊ່ອງ​ວ່າງ​ທີ່​ກວ້າງ​ໃຫຍ່​ເຫຼືອ​ເກີນ​ເທົ່າ​ທີ່​ຈະ​ຄຶດ​ອອກ​ໄດ້.” ແລະ​ເຊດເຣໂມ ສາດສະດາຈານ​ດ້ານ​ຟິສິກ​ກ່າວ​ວ່າ: “ຂ້ອຍ​ຮູ້ສຶກ​ປະທັບ​ໃຈ​ຫຼາຍ . . . ເບິ່ງ​ຄື​ວ່າ​ທຸກໆ ໂມເລກູນ​ຖືກ​ອອກ​ແບບ​ໄວ້​ສຳລັບ​ວຽກ​ຂອງ​ມັນ.”

7 ເດນ​ຕັນ ນັກ​ຊີວະວິທະຍາ​ດ້ານ​ໂມເລກູນ​ລົງ​ຄວາມ​ເຫັນ​ວ່າ “ຄົນ​ທີ່​ຍັງ​ຄົງ​ດື້​ດັ້ນ​ສະໜັບສະຫນູນ​ວ່າ ສິ່ງ​ເປັນ​ຈິງ​ໃໝ່ໆ ທັງ​ໝົດ​ນີ້​ເປັນ​ຜົນ​ຈາກ​ຄວາມ​ບັງ​ເອີນ​ແທ້ໆ” ນັ້ນ​ພວມ​ເຊື່ອ​ເລື່ອງ​ເທບ​ນິຍາຍ. ທີ່​ຈິງ ທ່ານ​ເອີ້ນ​ຄວາມ​ເຊື່ອ​ໃນ​ທິດສະດີ​ຂອງ​ດາຣ໌ວິນ​ອັນ​ກ່ຽວ​ກັບ​ເລື່ອງ​ສິ່ງ​ມີ​ຊີວິດ​ທີ່​ເກີດ​ຂຶ້ນ​ໂດຍ​ບັງ​ເອີນ​ວ່າ​ເປັນ “ເທບ​ນິຍາຍ​ທີ່​ຍິ່ງ​ໃຫຍ່​ແຫ່ງ​ສະຕະວັດ​ທີ່​ຊາວ​ເລື່ອງ​ການ​ກຳເນີດ​ຂອງ​ຈັກ​ກະ​ວານ.”

ແບບ​ຕ້ອງ​ມີ​ຜູ້​ອອກ​ແບບ

8, 9. ຈົ່ງ​ຍົກ​ຕົວຢ່າງ​ທີ່​ສະແດງ​ວ່າ​ທຸກ​ສິ່ງ​ຊຶ່ງ​ມີ​ແບບ​ແຜນ​ຍ່ອມ​ຕ້ອງ​ມີ​ຜູ້​ອອກ​ແບບ.

8 ແນວ​ຄວາມ​ຄຶດ​ທີ່​ວ່າ ວັດຖຸ​ທີ່​ບໍ່​ມີ​ຊີວິດ​ອາດ​ກາຍ​ເປັນ​ສິ່ງ​ມີ​ຊີວິດ​ຂຶ້ນ​ໄດ້​ໂດຍ​ບັງ​ເອີນ​ໂດຍ​ອຸບັດ​ເຫດ​ບາງ​ຢ່າງ​ນັ້ນ​ເປັນ​ເລື່ອງ​ທີ່​ບໍ່​ມີ​ທາງ​ເປັນ​ໄປ​ໄດ້​ເລີຍ. ບໍ່​ມີ​ສິ່ງ​ມີ​ຊີວິດ​ອັນ​ໃດ​ເທິງ​ແຜ່ນດິນ​ໂລກ​ຊຶ່ງ​ຖືກ​ອອກ​ແບບ​ຢ່າງ​ຍອດ​ຢ້ຽມ​ສາມາດ​ເກີດ​ຂຶ້ນ​ໄດ້​ໂດຍ​ບັງ​ເອີນ ເນື່ອງ​ຈາກ​ທຸກ​ສິ່ງ​ທີ່​ຖືກ​ອອກ​ແບບ​ຍ່ອມ​ຕ້ອງ​ມີ​ຜູ້​ອອກ​ແບບ. ທ່ານ​ຮູ້​ຈັກ​ບາງ​ສິ່ງ​ທີ່​ເປັນ​ກໍລະນີ​ຍົກ​ເວັ້ນ​ບໍ? ບໍ່​ມີ. ແລະ​ຍິ່ງ​ທີ່​ແບບ​ຊັບຊ້ອນ​ຜູ້​ອອກ​ແບບ​ກໍ່​ຍິ່ງ​ຕ້ອງ​ມີ​ຄວາມ​ສາມາດ​ຫຼາຍ.

9 ເຮົາ​ອາດ​ຈະ​ຍົກ​ຕົວຢ່າງ​ປະກອບ​ເພື່ອ​ອະທິບາຍ​ເລື່ອງ​ນັ້ນ​ໄດ້​ຢ່າງ​ນີ້: ເມື່ອ​ເຮົາ​ເຫັນ​ຮູບ​ແຕ້ມ ເຮົາ​ຍອມ​ຮັບ​ວ່າ​ມັນ​ເປັນ​ຫຼັກຖານ​ວ່າ​ມີ​ຜູ້​ແຕ້ມ. ເມື່ອ​ເຮົາ​ອ່ານ​ໜັງສື ເຮົາ​ກໍ່​ຍອມ​ຮັບ​ວ່າ​ມີ​ຜູ້​ປະ​ພັນ. ເມື່ອ​ເຮົາ​ເຫັນ​ເຮືອນ ເຮົາ​ຍອມ​ຮັບ​ວ່າ​ມີ​ຜູ້​ສ້າງ​ເຮືອນ​ນັ້ນ. ເມື່ອ​ເຮົາ​ເຫັນ​ໄຟ​ຈະລາຈອນ ເຮົາ​ຮູ້​ວ່າ​ມີ​ສະພາ​ນິຕິບັນຍັດ. ສິ່ງ​ທັງ​ປວງ​ນັ້ນ​ຖືກ​ສ້າງ​ຂຶ້ນ​ພ້ອມ​ດ້ວຍ​ວັດຖຸ​ປະສົງ​ໂດຍ​ຜູ້​ທີ່​ສ້າງ​ມັນ​ຂຶ້ນ​ມາ. ແລະ​ເຖິງ​ແມ່ນ​ວ່າ​ເຮົາ​ອາດ​ຈະ​ບໍ່​ເຂົ້າ​ໃຈ​ທຸກ​ສິ່ງ​ກ່ຽວ​ກັບ​ຜູ້​ຄົນ​ທີ່​ອອກ​ແບບ​ສິ່ງ​ເຫຼົ່າ​ນັ້ນ ເຮົາ​ກໍ່​ບໍ່​ສົງໄສ​ວ່າ​ມີ​ຜູ້​ຄົນ​ເຫຼົ່າ​ນັ້ນ.

10. ເຮົາ​ຈະ​ສາມາດ​ເຫັນ​ພະຍານ​ຫຼັກຖານ​ອັນ​ໃດ​ໄດ້​ແດ່​ກ່ຽວ​ກັບ​ຜູ້​ອອກ​ແບບ​ອົງ​ສູງ​ສຸດ?

10 ໃນ​ທຳ​ນອງ​ດຽວ​ກັນ ພະຍານ​ຫຼັກຖານ​ຂອງ​ການ​ດຳລົງ​ຢູ່​ຂອງ​ຜູ້​ອອກ​ແບບ​ອົງ​ສູງ​ສຸດ​ກໍ່​ສາມາດ​ເຫັນ​ໄດ້​ໃນ​ແບບ ລະບຽບ ແລະ​ຄວາມ​ສະລັບ​ຊັບຊ້ອນ​ຂອງ​ສິ່ງ​ມີ​ຊີວິດ​ເທິງ​ແຜ່ນດິນ​ໂລກ. ສິ່ງ​ເຫຼົ່າ​ນັ້ນ​ລ້ວນ​ບົ່ງ​ຊີ້​ວ່າ​ມີ​ຜູ້​ຊົງ​ເຊົາ​ປັນຍາ​ອັນ​ລ້ຳ​ເລີດ. ເລື່ອງ​ນີ້​ກໍ່​ເປັນ​ຄວາມ​ຈິງ​ດ້ວຍ​ກ່ຽວ​ກັບ​ແບບ ລະບຽບ ແລະ​ຄວາມ​ສະລັບ​ຊັບຊ້ອນ​ຂອງ​ເອກະພົບ​ຊຶ່ງ​ມີ​ຫຼາຍ​ພັນ​ລ້ານ​ກາແລັກຊີ ແຕ່​ລະ​ກາແລັກຊີ​ມີ​ດວງ​ດາວ​ຫຼາຍ​ພັນ​ລ້ານ​ດວງ. ດວງ​ດາວ​ຕ່າງໆ, ດາວ​ພະ​ເຄາະ​ແລະ​ສິ່ງ​ອື່ນໆ ໃນ​ທ້ອງຟ້າ​ທັງ​ໝົດ​ຖືກ​ຄວບ​ຄຸມ​ໂດຍ​ກົດ​ອັນ​ແມ່ນ​ຢຳ ເຊັ່ນ ກົດ​ກ່ຽວ​ກັບ​ການ​ເຄື່ອນ​ໄຫວ ຄວາມ​ຮ້ອນ, ແສງ, ສຽງ, ແມ່​ເຫຼັກ​ໄຟ​ຟ້າ ແລະ​ຄວາມ​ດຶງ​ດູດ. ຈະ​ມີ​ກົດ​ໂດຍ​ບໍ່​ມີ​ຜູ້​ຕັ້ງ​ກົດ​ໄດ້​ບໍ? ນັກ​ວິທະຍາສາດ​ດ້ານ​ຈະຫຼວດ ດຣ. ເວີເນີ ຟອນ ບຣາວນ໌ ກ່າວ​ວ່າ: “ກົດ​ທຳມະຊາດ​ຂອງ​ເອກະພົບ​ມີ​ຄວາມ​ແນ່​ນອນ​ຫຼາຍ​ຈົນ​ເຮົາ​ບໍ່​ມີ​ຄວາມ​ຫຍຸ້ງຍາກ​ໃນ​ການ​ສ້າງ​ເຮືອ​ບິນ​ອະວະກາດ​ໃຫ້​ບິນ​ສູ່​ດວງ​ເດືອນ​ແລະ​ສາມາດ​ກຳນົດ​ເວລາ​ການ​ບິນ​ດ້ວຍ​ຄວາມ​ແມ່ນ​ຢຳ​ເຖິງ​ສ່ວນ​ນ້ອຍ​ຂອງ​ວິນາທີ. ກົດ​ເຫຼົ່າ​ນີ້​ຕ້ອງ​ມີ​ຜູ້​ໃດ​ຜູ້​ນຶ່ງ​ຕັ້ງ​ຂຶ້ນ.”

11. ເປັນ​ຫຍັງ​ເຮົາ​ບໍ່​ຄວນ​ປະຕິເສດ​ການ​ດຳລົງ​ຢູ່​ຂອງ​ຜູ້​ອອກ​ແບບ​ອົງ​ສູງ​ສຸດ​ພຽງ​ແຕ່​ເພາະ​ເຮົາ​ບໍ່​ສາມາດ​ເຫັນ​ພະອົງ?

11 ເຮົາ​ບໍ່​ສາມາດ​ເຫັນ​ຜູ້​ອອກ​ແບບ​ແລະ​ຜູ້​ປະທານ​ກົດ​ອົງ​ສູງ​ສຸດ​ດ້ວຍ​ຕາ​ຂອງ​ເຮົາ​ໄດ້. ແຕ່​ເຮົາ​ປະຕິເສດ​ການ​ມີ​ຢູ່​ຂອງ​ສິ່ງ​ຕ່າງໆ ບໍ່​ພຽງ​ແຕ່​ເພາະ​ວ່າ​ເຮົາ​ບໍ່​ສາມາດ​ເຫັນ​ສິ່ງ​ເຫຼົ່າ​ນັ້ນ​ໄດ້ ເຊັ່ນ ຄວາມ​ດຶງ​ດູດ, ອຳນາດ​ແມ່​ເຫຼັກ, ກະແສ​ໄຟ​ຟ້າ, ຫຼື​ຄື້ນ​ວິທະຍຸ? ບໍ່ ເຮົາ​ບໍ່​ປະຕິເສດ ເພາະ​ເຮົາ​ສັງເກດ​ເຫັນ​ຜົນ​ຂອງ​ສິ່ງ​ເຫຼົ່າ​ນັ້ນ​ໄດ້. ຖ້າ​ເຊັ່ນ​ນັ້ນ ເປັນ​ຫຍັງ​ເຮົາ​ຈະ​ປະຕິເສດ​ການ​ດຳລົງ​ຢູ່​ຂອງ​ຜູ້​ອອກ​ແບບ​ແລະ​ຜູ້​ປະທານ​ກົດ​ອົງ​ສູງ​ສຸດ​ເພາະ​ເຮົາ​ເບິ່ງ​ເຫັນ​ພະອົງ​ບໍ່​ໄດ້ ໃນ​ເມື່ອ​ເຮົາ​ສາມາດ​ສັງເກດ​ເຫັນ​ຜົນ​ຕ່າງໆ ແຫ່ງ​ສີ​ມື​ອັນ​ໜ້າ​ອັດສະຈັນ​ຂອງ​ພະອົງ?

12, 13. ພະຍານ​ຫຼັກຖານ​ບອກ​ຢ່າງ​ໃດ​ເຖິງ​ການ​ດຳລົງ​ຢູ່​ຂອງ​ພະ​ຜູ້​ສ້າງ?

12 ພອລ ເດວີສ໌ ສາດສະດາຈານ​ດ້ານ​ຟິສິກ​ລົງ​ຄວາມ​ເຫັນ​ວ່າ ການ​ດຳລົງ​ຢູ່​ຂອງ​ມະນຸດ​ບໍ່​ແມ່ນ​ເປັນ​ພຽງ​ປາກົດ​ການ​ປະຫຼາດ. ທ່ານ​ກ່າວ​ວ່າ: “ເຮົາ​ຖືກ​ກະກຽມ​ໄວ້​ໃຫ້​ຢູ່​ທີ່​ນີ້​ຢ່າງ​ແທ້​ຈິງ.” ແລະ​ທ່ານ​ເວົ້າ​ເຖິງ​ເອກະພົບ​ວ່າ: “ໂດຍ​ວຽກ​ງານ​ທາງ​ວິທະຍາສາດ​ຂອງ​ຂ້ອຍໆ ໄດ້​ມາ​ເຊື່ອ​ຢ່າງ​ໜຽວ​ແໜ້ນ​ຂຶ້ນ​ເລື້ອຍໆ ວ່າ ເອກະພົບ​ທີ່​ປະກອບ​ດ້ວຍ​ວັດຖຸ​ທຳມະຊາດ​ນັ້ນ​ຖືກ​ເອົາ​ເຂົ້າ​ມາ​ປະກອບ​ຮວມ​ກັນ​ດ້ວຍ​ຄວາມ​ລະອຽດ​ອ່ອນ​ໜ້າ​ປະຫຼາດ​ໃຈ​ຫຼາຍ ຈົນ​ຂ້ອຍ​ບໍ່​ອາດ​ຈະ​ຍອມ​ຮັບ​ໄດ້​ວ່າ ມັນ​ເປັນ​ພຽງ​ຂໍ້​ເທດ​ຈິງ​ທີ່​ບໍ່​ໄດ້​ເກີດ​ຂຶ້ນ​ດ້ວຍ​ເຫດ​ດ້ວຍ​ຜົນ. ຂ້ອຍ​ຮູ້ສຶກ​ວ່າ ຈະ​ຕ້ອງ​ມີ​ຄຳ​ອະທິບາຍ​ທີ່​ເລິກ​ເຊິ່ງ​ກວ່າ​ນັ້ນ.”

13 ດ້ວຍ​ເຫດ​ນີ້ ພະຍານ​ຫຼັກຖານ​ບອກ​ເຮົາ​ວ່າ ເອກະພົບ ແຜ່ນດິນ​ໂລກ ແລະ​ສິ່ງ​ມີ​ຊີວິດ​ເທິງ​ແຜ່ນດິນ​ໂລກ ບໍ່​ອາດ​ເກີດ​ຂຶ້ນ​ພຽງ​ໂດຍ​ບັງ​ເອີນ. ສິ່ງ​ເຫຼົ່າ​ນັ້ນ​ທັງ​ໝົດ​ໃຫ້​ຫຼັກຖານ​ໂດຍ​ບໍ່​ຕ້ອງ​ອອກ​ສຽງ​ເຖິງ​ພະ​ຜູ້​ສ້າງ​ທີ່​ມີ​ອຳນາດ​ແລະ​ເຊົາ​ປັນຍາ​ອັນ​ສູງ​ສົ່ງ.

ສິ່ງ​ທີ່​ຄຳພີ​ໄບເບິນ​ບອກ​ໄວ້

14. ຄຳພີ​ໄບເບິນ​ລົງ​ຄວາມ​ເຫັນ​ຢ່າງ​ໃດ​ໃນ​ເລື່ອງ​ພະ​ຜູ້​ສ້າງ?

14 ຄຳພີ​ໄບເບິນ ໜັງສື​ເກົ່າ​ແກ່​ທີ່​ສຸດ​ຂອງ​ມະນຸດ​ຊາດ​ໃຫ້​ຂໍ້​ສະຫລຸບ​ຢ່າງ​ດຽວ​ກັນ. ຍົກ​ຕົວຢ່າງ ໃນ​ພະ​ທຳ​ເຫບເລິ​ຊຶ່ງ​ອັກຄະສາວົກ​ໂປໂລ​ເປັນ​ຜູ້​ຈາລຶກ​ບອກ​ເຮົາ​ວ່າ: “ແນ່​ນອນ ເຮືອນ​ທຸກ​ຫຼັງ​ຍ່ອມ​ມີ​ຄົນ​ສ້າງ ແຕ່​ຜູ້​ທີ່​ໄດ້​ສ້າງ​ສັບ​ພະ​ສິ່ງ​ທັງ​ປວງ​ຄື​ພະເຈົ້າ.” (ເຫບເລິ 3:4, ລ.ມ.) ພະ​ທຳ​ເຫຼັ້ມ​ສຸດ​ທ້າຍ​ໃນ​ຄຳພີ​ໄບເບິນ​ຊຶ່ງ​ຈາລຶກ​ໂດຍ​ອັກຄະສາວົກ​ໂຍຮັນ​ກໍ່​ກ່າວ​ຄື​ກັນ​ວ່າ: “ພະ​ເຢໂຫວາ ພະເຈົ້າ​ຂອງ​ຂ້າພະເຈົ້າ​ທັງ​ຫຼາຍ​ພະອົງ​ສົມຄວນ​ຈະ​ໄດ້​ຮັບ​ສະຫງ່າ​ລາສີ​ແລະ​ກຽດຕິຍົດ​ແລະ​ລິດເດດ ເພາະ​ພະອົງ​ໄດ້​ສ້າງ​ສິ່ງ​ທັງ​ປວງ ແລະ​ເນື່ອງ​ດ້ວຍ​ພະໄທ​ປະສົງ​ຂອງ​ພະອົງ ສິ່ງ​ເຫຼົ່າ​ນັ້ນ​ໄດ້​ດຳລົງ​ຢູ່​ແລະ​ຖືກ​ສ້າງ​ຂຶ້ນ.”—ຄຳປາກົດ 4:11, ລ.ມ.

15. ເຮົາ​ຈະ​ສັງເກດ​ຄຸນ​ລັກສະນະ​ບາງ​ຢ່າງ​ຂອງ​ພະເຈົ້າ​ໄດ້​ຢ່າງ​ໃດ?

15 ຄຳພີ​ໄບເບິນ​ສະແດງ​ວ່າ​ເຖິງ​ແມ່ນ​ເຮົາ​ບໍ່​ອາດ​ຈະ​ເຫັນ​ພະເຈົ້າ​ໄດ້ ການ​ທີ່​ພະອົງ​ເປັນ​ພະເຈົ້າ​ຊະນິດ​ໃດ​ກໍ່​ສາມາດ​ສັງເກດ​ເຫັນ​ໄດ້​ໂດຍ​ສິ່ງ​ທີ່​ພະອົງ​ໄດ້​ສ້າງ​ໄວ້. ມີ​ກ່າວ​ວ່າ: “ຄຸນ​ລັກສະນະ​ອັນ​ບໍ່​ປະ​ຈັກ​ແກ່​ຕາ (ຂອງ​ພະ​ຜູ້​ສ້າງ) ນັ້ນ​ຄື​ລິດທານຸພາບ​ອັນ​ຕະຫຼອດ​ໄປ ແລະ​ຄວາມ​ເປັນ​ພະເຈົ້າ​ຂອງ​ພະອົງ​ນັ້ນ​ກໍ່​ປາກົດ​ຊັດ​ແກ່​ຕາ​ແຫ່ງ​ເຫດ​ຜົນ​ໃນ​ສັບ​ພະ​ສິ່ງ​ທີ່​ພະອົງ​ໄດ້​ສ້າງ​ຂຶ້ນ​ນັ້ນ.”—ໂລມ 1:20 ເດິ ນິວ ອິງລິດ ໄບເບິນ.

16. ເພາະ​ເຫດ​ໃດ​ເຮົາ​ຈຶ່ງ​ຕ້ອງ​ຍິນດີ​ທີ່​ມະນຸດ​ບໍ່​ສາມາດ​ເຫັນ​ພະເຈົ້າ​ໄດ້?

16 ດັ່ງ​ນັ້ນ ຄຳພີ​ໄບເບິນ​ຈຶ່ງ​ນຳ​ເຮົາ​ຈາກ​ຜົນ​ໄປ​ຫາ​ເຫດ. ຜົນ—ຄື​ສິ່ງ​ໜ້າ​ເກງ​ຂາມ​ທີ່​ຖືກ​ສ້າງ​ຂຶ້ນ—ເປັນ​ພະຍານ​ຫຼັກຖານ​ແຫ່ງ​ຕົ້ນ​ເຫດ​ທີ່​ມີ​ລິດ​ອຳນາດ​ແລະ​ເຊົາ​ປັນຍາ ພະເຈົ້າ. ນອກ​ຈາກ​ນັ້ນ ເຮົາ​ຄວນ​ຈະ​ຂອບໃຈ​ທີ່​ພະອົງ​ບໍ່​ປາກົດ​ແກ່​ຕາ​ເພາະ​ວ່າ​ເປັນ​ພະ​ຜູ້​ສ້າງ​ເອກະພົບ​ທັງ​ສິ້ນ ຈຶ່ງ​ເປັນ​ທີ່​ແນ່​ນອນ​ວ່າ ພະອົງ​ມີ​ລິດ​ອຳນາດ​ຍິ່ງ​ໃຫຍ່​ຈົນ​ມະນຸດ​ທີ່​ປະກອບ​ດ້ວຍ​ເນື້ອ​ໜັງ​ແລະ​ເລືອດ​ບໍ່​ອາດ​ຄາດ​ຄຶດ​ວ່າ​ຈະ​ເຫັນ​ພະອົງ​ແລ້ວ​ມີ​ຊີວິດ​ລອດ​ຢູ່​ໄດ້. ແລະ​ອັນ​ນັ້ນ​ຄື​ສິ່ງ​ທີ່​ຄຳພີ​ໄບເບິນ​ກ່າວ​ໄວ້: “ເຈົ້າ​ຈະ​ເຫັນ​ໜ້າ​ເຮົາ (ພະເຈົ້າ) ກໍ່​ບໍ່​ໄດ້ ເຫດ​ວ່າ​ມະນຸດ​ເຫັນ​ໜ້າ​ເຮົາ​ແລະ​ມີ​ຊີວິດ​ຢູ່​ກໍ່​ບໍ່​ໄດ້.”—ອຸປະຍົກໜີ 33:20.

17, 18. ເປັນ​ຫຍັງ​ແນວ​ຄຶດ​ໃນ​ເລື່ອງ​ພະ​ຜູ້​ສ້າງ​ຈຶ່ງ​ຕ້ອງ​ສຳຄັນ​ຕໍ່​ເຮົາ?

17 ແນວ​ຄຶດ​ໃນ​ເລື່ອງ​ຜູ້​ອອກ​ແບບ​ອົງ​ຍິ່ງ​ໃຫຍ່​ຜູ້​ເປັນ​ອົງ​ສູງ​ສຸດ​ນັ້ນ ຄື​ພະເຈົ້າ ຄວນ​ເປັນ​ເລື່ອງ​ສຳຄັນ​ຫຼາຍ​ແກ່​ເຮົາ. ຖ້າ​ວ່າ​ເຮົາ​ຖືກ​ສ້າງ​ຂຶ້ນ​ໂດຍ​ພະ​ຜູ້​ສ້າງ​ເຊັ່ນ​ນັ້ນ​ແລ້ວ ພະອົງ​ກໍ່​ຍ່ອມ​ຕ້ອງ​ມີ​ເຫດ​ຜົນ ມີ​ວັດຖຸ​ປະສົງ​ໃນ​ການ​ສ້າງ​ເຮົາ​ຂຶ້ນ​ມາ​ຢ່າງ​ແນ່​ນອນ. ຖ້າ​ວ່າ​ເຮົາ​ຖືກ​ສ້າງ​ໃຫ້​ມີ​ຈຸດ​ມຸ່ງ​ໝາຍ​ໃນ​ຊີວິດ​ເຊັ່ນ​ນັ້ນ​ກໍ່​ມີ​ເຫດ​ຜົນ​ທີ່​ຈະ​ຫວັງ​ວ່າ​ສິ່ງ​ຕ່າງໆ ຄົງ​ຈະ​ດີ​ຂຶ້ນ​ສຳລັບ​ເຮົາ​ໃນ​ອະນາຄົດ. ບໍ່​ດັ່ງ​ນັ້ນ ເຮົາ​ກໍ່​ຄົງ​ໄດ້​ແຕ່​ມີ​ຊີວິດ​ແລ້ວ​ກໍ່​ຕາຍ​ໂດຍ​ບໍ່​ມີ​ຄວາມ​ຫວັງ​ອັນ​ໃດ. ດັ່ງ​ນັ້ນ ເປັນ​ສິ່ງ​ສຳຄັນ​ຫຼາຍ​ທີ່​ເຮົາ​ຈະ​ຄົ້ນ​ຫາ​ພະ​ປະສົງ​ທີ່​ພະເຈົ້າ​ມີ​ສຳລັບ​ເຮົາ. ຄັນ​ແລ້ວ​ເຮົາ​ກໍ່​ສາມາດ​ເລືອກ​ໄດ້​ວ່າ​ເຮົາ​ປາຖະໜາ​ຈະ​ດຳເນີນ​ຊີວິດ​ສອດ​ຄ່ອງ​ກັບ​ພະ​ປະສົງ​ນັ້ນ​ຫຼື​ບໍ.

18 ອີກ​ປະການ​ນຶ່ງ ຄຳພີ​ໄບເບິນ​ຖະແຫຼງ​ວ່າ​ພະ​ຜູ້​ສ້າງ​ເປັນ​ພະເຈົ້າ​ທີ່​ເຕັມ​ໄປ​ດ້ວຍ​ຄວາມ​ຮັກ​ຊຶ່ງ​ເບິ່ງ​ແຍງ​ພວກ​ເຮົາ​ຫຼາຍ. ອັກຄະສາວົກ​ເປໂຕ​ກ່າວ​ວ່າ: “ພະອົງ​ເບິ່ງ​ແຍງ​ທ່ານ​ທັງ​ຫຼາຍ.” (1 ເປໂຕ 5:7, ລ.ມ.; ເບິ່ງ​ໂຍຮັນ 3:16 ກັບ 1 ໂຍຮັນ 4:8, 16 ດ້ວຍ.) ທາງ​ນຶ່ງ​ທີ່​ເຮົາ​ສາມາດ​ເຫັນ​ໄດ້​ວ່າ​ພະເຈົ້າ​ເບິ່ງ​ແຍງ​ເຮົາ​ຫຼາຍ​ປານ​ໃດ​ກໍ່​ໂດຍ​ການ​ພິຈາລະນາ​ວິທີ​ການ​ອັນ​ໜ້າ​ພິດສະຫວົງ​ທີ່​ພະອົງ​ໄດ້​ສ້າງ​ເຮົາ​ທັງ​ດ້ານ​ຈິດ​ໃຈ​ແລະ​ຮ່າງ​ກາຍ.

“ຖືກ​ສ້າງ​ຢ່າງ​ໜ້າ​ພິດສະຫວົງ”

19. ຄວາມ​ຈິງ​ເລື່ອງ​ອັນ​ໃດ​ທີ່​ດາວິດ​ຜູ້​ປະ​ພັນ​ຄຳເພງ​ຮຽກ​ຮ້ອງ​ໃຫ້​ເຮົາ​ເອົາໃຈໃສ່?

19 ໃນ​ຄຳພີ​ໄບເບິນ ດາວິດ​ຜູ້​ປະ​ພັນ​ຄຳເພງ​ຍອມ​ຮັບ​ວ່າ: “ຂ້າພະເຈົ້າ​ຖືກ​ສ້າງ​ຢ່າງ​ໜ້າ​ພິດສະຫວົງ​ໃນ​ວິທີ​ທີ່​ໜ້າ​ເກງ​ຂາມ” (ຄຳເພງ 139:14, ລ.ມ.) ອັນ​ນັ້ນ​ຄື​ຄວາມ​ຈິງ​ແທ້​ແນ່​ນອນ ເພາະ​ສະໝອງ​ແລະ​ຮ່າງ​ກາຍ​ມະນຸດ​ຖືກ​ອອກ​ແບບ​ຂຶ້ນ​ຢ່າງ​ມະຫັດສະຈັນ​ໂດຍ​ຜູ້​ອອກ​ແບບ​ອົງ​ສູງ​ສຸດ.

20. ສາລານຸກົມ​ເຫຼັ້ມ​ນຶ່ງ​ພັນ​ລະ​ນາ​ເຖິງ​ສະໝອງ​ຄົນ​ເຮົາ​ຢ່າງ​ໃດ?

20 ຕົວຢ່າງ​ເຊັ່ນ ສະໝອງ​ຂອງ​ທ່ານ​ມີ​ຄວາມ​ສະລັບ​ຊັບຊ້ອນ​ຫຼາຍ​ກວ່າ​ຄອມພິວເຕີ​ທຸກ​ແນວ. ສາລານຸກົມ ນິວ ບຣິແທນນິກາ ອະທິບາຍ​ວ່າ: “ການ​ສົ່ງ​ຜ່ານ​ຂໍ້​ມູນ​ພາຍ​ໃນ​ລະບົບ​ເສັ້ນ​ປະ​ສາດ​ມີ​ຄວາມ​ສະລັບ​ຊັບຊ້ອນ​ຫຼາຍ​ກວ່າ​ເຄືອ​ຂ່າຍ​ໂທ​ລະ​ສັບ​ທີ່​ໃຫຍ່​ທີ່​ສຸດ​ອີກ​ຊ້ຳ ການ​ແກ້​ບັນຫາ​ໂດຍ​ສະໝອງ​ມະນຸດ​ນັ້ນ​ເໜືອ​ກວ່າ​ສະມັດຖະພາບ​ຂອງ​ຄອມພິວເຕີ​ທີ່​ມີ​ປະ​ສິດທິ​ພາບ​ທີ່​ສຸດ​ຫຼາຍ​ເທົ່າ.”

21. ເມື່ອ​ເຮົາ​ເຫັນ​ສິ່ງ​ທີ່​ສະໝອງ​ເຮັດ ເຮົາ​ຄວນ​ຈະ​ລົງ​ຄວາມ​ເຫັນ​ຢ່າງ​ໃດ?

21 ຂໍ້​ເທດ​ຈິງ​ແລະ​ຈິນຕະພາບ​ຫຼາຍ​ຮ້ອຍ​ລ້ານ​ເລື່ອງ​ຖືກ​ສະສົມ​ໄວ້​ໃນ​ສະໝອງ​ຂອງ​ທ່ານ ແຕ່​ສະໝອງ​ບໍ່​ແມ່ນ​ເປັນ​ພຽງ​ແຕ່​ສາງ​ເກັບ​ຂໍ້​ມູນ​ຄວາມ​ຈິງ​ຕ່າງໆ ທໍ່​ນັ້ນ. ດ້ວຍ​ສະໝອງ​ຂອງ​ທ່ານ ທ່ານ​ສາມາດ​ຮຽນ​ວິທີ​ຜິວ​ປາກ ເຮັດ​ເຂົ້າຈີ່ ເວົ້າ​ພາສາ​ຕ່າງ​ປະເທດ ໃຊ້​ຄອມພິວເຕີ ຫຼື​ຂັບ​ເຮືອ​ບິນ. ທ່ານ​ສາມາດ​ຈິນຕະນາການ​ວ່າ​ການ​ພັກ​ແລ້ງ​ຈະ​ເປັນ​ຢ່າງ​ໃດ​ຫຼື​ໝາກ​ໄມ້​ຈະ​ມີ​ລົດ​ແຊບ​ປານ​ໃດ. ທ່ານ​ສາມາດ​ວິເຄາະ​ແລະ​ປະດິດ​ສິ່ງ​ຕ່າງໆ ໄດ້. ນອກ​ຈາກ​ນີ້ ທ່ານ​ຍັງ​ສາມາດ​ວາງ​ແຜນ ຢັ່ງ​ຮູ້​ຄ່າ ຮັກ ແລະ​ຄຶດ​ເຖິງ​ເລື່ອງ​ໃນ​ອະດີດ ປັດຈຸບັນ​ແລະ​ອະນາຄົດ. ເນື່ອງ​ຈາກ​ວ່າ​ເຮົາ​ຊຶ່ງ​ເປັນ​ມະນຸດ​ບໍ່​ສາມາດ​ອອກ​ແບບ​ສິ່ງ​ຂອງ​ທີ່​ເປັນ​ເໝືອນ​ສະໝອງ​ອັນ​ໜ້າ​ພິດສະຫວົງ​ນັ້ນ​ໄດ້ ສະນັ້ນ​ຈຶ່ງ​ປາກົດ​ວ່າ​ພະອົງ​ຜູ້​ອອກ​ແບບ​ສະໝອງ​ນັ້ນ​ມີ​ພະ​ສະຕິ​ປັນຍາ​ແລະ​ຄວາມ​ຮອບ​ຮູ້​ສາມາດ​ອັນ​ຍິ່ງ​ໃຫຍ່​ເກີນ​ກວ່າ​ມະນຸດ​ຕັ້ງ​ຫຼາຍ​ເທົ່າ.

22. ພວກ​ນັກ​ວິທະຍາສາດ​ຍອມ​ຮັບ​ອັນ​ໃດ​ກ່ຽວ​ກັບ​ສະໝອງ​ຄົນ​ເຮົາ?

22 ກ່ຽວ​ກັບ​ສະໝອງ ພວກ​ນັກ​ວິທະຍາສາດ​ໃຜໆ ກໍ່​ຍອມ​ຮັບ​ວ່າ: “ການ​ທີ່​ເຄື່ອງ​ຈັກ​ຊິ້ນ​ນີ້​ຊຶ່ງ​ສະລັບ​ຊັບຊ້ອນ​ມາກ​ຫຼາຍ​ເປັນ​ລະບຽບ ແລະ​ໄດ້​ຮັບ​ການ​ອອກ​ແບບ​ຢ່າງ​ດີ​ຢ້ຽມ​ປະຕິບັດ​ງານ​ເຫຼົ່າ​ນີ້​ຢ່າງ​ໃດ​ນັ້ນ ຍັງ​ບໍ່​ທັນ​ເຂົ້າ​ໃຈ​ໄດ້​ເທື່ອ . . . ມະນຸດ​ເຮົາ​ອາດ​ຈະ​ບໍ່​ມີ​ມື້​ທີ່​ຈະ​ແກ້​ປິດສະໜາ​ອັນ​ຊັບຊ້ອນ​ແຕ່​ລະ​ອັນ​ກ່ຽວ​ກັບ​ສະໝອງ​ໄດ້​ທັງ​ໝົດ.” (ໄຊເຍນຕິຟິກ ອາເມລິກັນ ) ແລະ​ເຣຍ໌ໂມ ສາດສະດາຈານ​ສາຂາ​ຟິສິກ​ກ່າວ​ວ່າ: “ຖ້າ​ເວົ້າ​ກັນ​ຕາມ​ຄວາມ​ຈິງ​ແລ້ວ ເຮົາ​ຍັງ​ບໍ່​ຮູ້​ອັນ​ໃດ​ຫຼາຍ​ກ່ຽວ​ກັບ​ວິທີ​ທີ່​ສະໝອງ​ມະນຸດ​ເກັບ​ສະສົມ​ຄວາມ​ຮູ້ ຫຼື​ວິທີ​ທີ່​ສະໝອງ​ສາມາດ​ຄຶດ​ອອກ​ໄດ້​ເຖິງ​ສິ່ງ​ທີ່​ຈື່​ໄວ້​ເມື່ອ​ຕ້ອງການ . . . ມີ​ຈຸລັງ​ປະ​ສາດ​ຫຼາຍ​ເຖິງ​ແສນ​ລ້ານ​ເຊລລ໌​ຫຼື​ຈຸລັງ​ໃນ​ສະໝອງ​ມະນຸດ. ແຕ່​ລະ​ຈຸລັງ​ຢູ່​ໃນ​ເຄືອ​ຂ່າຍ​ການ​ສື່​ສານ​ກັບ​ຈຸລັງ​ອື່ນໆ ຫຼາຍ​ພັນ​ຈຸລັງ​ໂດຍ​ທາງ​ກິ່ງ​ກ້ານ​ສາຂາ​ຂອງ​ຈຸດ​ເຊື່ອມ​ຕໍ່​ລັກສະນະ​ຕົ້ນ​ໄມ້. ຄວາມ​ເປັນ​ໄປ​ໄດ້​ຂອງ​ການ​ເຊື່ອມ​ຕໍ່​ກັນ​ພາຍ​ໃນ​ນັ້ນ​ກໍ່​ສະລັບ​ຊັບຊ້ອນ​ຈົນ​ຕົກຕະລຶງ.”

23, 24. ຈົ່ງ​ບອກ​ຊື່​ອະໄວຍະວະ​ບາງ​ສ່ວນ​ຂອງ​ຮ່າງ​ກາຍ​ຊຶ່ງ​ມີ​ການ​ອອກ​ແບບ​ຢ່າງ​ໜ້າ​ພິດສະຫວົງ ແລະ​ວິສະວະກອນ​ຄົນ​ນຶ່ງ​ໃຫ້​ຄວາມ​ເຫັນ​ຢ່າງ​ໃດ?

23 ຕາ​ຂອງ​ທ່ານ​ເຮັດ​ວຽກ​ຢ່າງ​ລະອຽດ​ແມ່ນ​ຢຳ​ແລະ​ດັດ​ແປງ​ໄດ້​ດີ​ຍິ່ງ​ກວ່າ​ກ້ອງ​ຖ່າຍ​ຮູບ​ໃດໆ; ແທ້​ຈິງ ຕາ​ເປັນ​ຄື​ກ້ອງ​ຖ່າຍ​ຮູບ​ເງົາ​ສີ​ທີ່​ປັບ​ຄວາມ​ຊັດເຈນ​ເອງ​ແບບ​ອັດຕະໂນມັດ​ທັງ​ໝົດ. ຫູ​ຂອງ​ທ່ານ​ສາມາດ​ກວດ​ຟັງ​ສຽງ​ໄດ້​ຫຼາຍ​ຫຼາກ ແລະ​ເຮັດ​ໃຫ້​ທ່ານ​ຮູ້​ທິດ​ທາງ​ແລະ​ດຸນຍະພາກ. ຫົວ​ໃຈ​ຂອງ​ທ່ານ​ເປັນ​ເຄື່ອງ​ສູບ​ຊຶ່ງ​ມີ​ສະມັດຖະພາບ​ທີ່​ນັກ​ວິສະວະກອນ​ຊຶ່ງ​ຊ່ຽວ​ຊານ​ທີ່​ສຸດ​ບໍ່​ເຄີຍ​ຮຽນ​ແບບ​ໄດ້. ນອກ​ຈາກ​ນັ້ນ ຍັງ​ມີ​ສ່ວນ​ອື່ນໆ ຂອງ​ຮ່າງ​ກາຍ ເຊັ່ນ ດັງ ລີ້ນ ແລະ​ມື ແລະ​ຍັງ​ມີ​ລະບົບ​ຫມຸນ​ວຽນ​ຂອງ​ເລືອດ​ແລະ​ລະບົບ​ຍ່ອຍ​ອາຫານ​ດ້ວຍ​ກໍ່​ຍອດ​ຢ້ຽມ​ຄື​ກັນ ອັນ​ນີ້​ເປັນ​ພຽງ​ບາງ​ສ່ວນ​ທໍ່​ນັ້ນ.

24 ດັ່ງ​ນັ້ນ ນັກ​ວິສະວະກອນ​ຄົນ​ນຶ່ງ​ຊຶ່ງ​ຖືກ​ຈ້າງ​ໃຫ້​ອອກ​ແບບ​ແລະ​ສ້າງ​ເຄື່ອງ​ຄອມພິວເຕີ​ຂະໜາດ​ໃຫຍ່​ຊີ້​ແຈງ​ດັ່ງ​ນີ້: “ຖ້າ​ຄອມພິວເຕີ​ຂອງ​ຂ້ອຍ​ຕ້ອງ​ມີ​ຜູ້​ອອກ​ແບບ​ຈະ​ຍິ່ງ​ກວ່າ​ນັ້ນ​ອີກ​ເທົ່າ​ໃດ​ທີ່​ເຄື່ອງ​ຈັກ​ຊຶ່ງ​ປະກອບ​ດ້ວຍ​ກົນ​ໄກ​ທາງ​ຊີວະ ເຄມີ ຟິສິກ ຄື​ຮ່າງ​ກາຍ​ຂອງ​ຂ້ອຍ—ຊຶ່ງ​ເປັນ​ພຽງ​ແຕ່​ສ່ວນ​ເລັກ​ນ້ອຍ​ທໍ່​ນັ້ນ​ແຫ່ງ​ເອກະພົບ​ອັນ​ເກືອບ​ບໍ່​ມີ​ທີ່​ສິ້ນ​ສຸດ ຍ່ອມ​ຕ້ອງ​ມີ​ຜູ້​ອອກ​ແບບ​ຄື​ກັນ.”

25, 26. ຜູ້​ອອກ​ແບບ​ອົງ​ຍິ່ງ​ໃຫຍ່​ຄວນ​ຈະ​ບອກ​ອັນ​ໃດ​ແກ່​ເຮົາ​ໄດ້?

25 ຄົນ​ເຮົາ​ມີ​ຈຸດ​ມຸ່ງ​ໝາຍ​ຢູ່​ໃນ​ໃຈ​ເມື່ອ​ເຂົາ​ສ້າງ​ເຮືອ​ບິນ ຄອມພິວເຕີ ລົດ​ຖີບ ແລະ​ສິ່ງ​ປະດິດ​ອື່ນໆ ສັນ​ໃດ ພະອົງ​ຜູ້​ໄດ້​ອອກ​ແບບ​ສະໝອງ​ແລະ​ຮ່າງ​ກາຍ​ມະນຸດ​ກໍ່​ຍ່ອມ​ມີ​ຈຸດ​ມຸ່ງ​ໝາຍ​ໃນ​ການ​ອອກ​ແບບ​ຕົວ​ເຮົາ​ຄື​ກັນ​ສັນ​ນັ້ນ. ແລະ​ຜູ້​ອອກ​ແບບ​ອົງ​ນີ້​ຍ່ອມ​ຕ້ອງ​ມີ​ສະຕິ​ປັນຍາ​ສູງ​ສົ່ງ​ກວ່າ​ມະນຸດ ເນື່ອງ​ຈາກ​ວ່າ​ບໍ່​ມີ​ຈັກ​ຄົນ​ໃນ​ພວກ​ເຮົາ​ສາມາດ​ເຮັດ​ຮຽນ​ແບບ​ຂອງ​ພະອົງ​ໄດ້. ສະນັ້ນ ຈຶ່ງ​ເປັນ​ເລື່ອງ​ມີ​ເຫດ​ຜົນ​ທີ່​ວ່າ​ພະອົງ​ເປັນ​ຜູ້​ດຽວ​ຊຶ່ງ​ຈະ​ບອກ​ເຮົາ​ໄດ້​ວ່າ ເປັນ​ຫຍັງ​ພະອົງ​ຈຶ່ງ​ໄດ້​ອອກ​ແບບ​ພວກ​ເຮົາ ເປັນ​ຫຍັງ​ພະອົງ​ໃຫ້​ເຮົາ​ຢູ່​ເທິງ​ແຜ່ນດິນ​ໂລກ ແລະ​ເຮົາ​ຈະ​ມຸ່ງ​ໄປ​ສູ່​ທີ່​ໃດ.

26 ເມື່ອ​ເຮົາ​ຮຽນ​ຮູ້​ສິ່ງ​ເຫຼົ່າ​ນີ້ ເຮົາ​ກໍ່​ຈະ​ໃຊ້​ສະໝອງ​ແລະ​ຮ່າງ​ກາຍ​ອັນ​ຍອດ​ຢ້ຽມ​ທີ່​ພະເຈົ້າ​ປະທານ​ໃຫ້​ເຮົາ​ນັ້ນ​ໄດ້​ໃນ​ການ​ເຮັດ​ໃຫ້​ຈຸດ​ມຸ່ງ​ໝາຍ​ໃນ​ຊີວິດ​ຂອງ​ເຮົາ​ສຳເລັດ​ບໍລິບູນ. ແຕ່​ເຮົາ​ຈະ​ຮຽນ​ຮູ້​ເຖິງ​ຈຸດ​ມຸ່ງ​ໝາຍ​ຂອງ​ພະອົງ​ໄດ້​ບ່ອນ​ໃດ? ພະອົງ​ປະທານ​ຄວາມ​ຮູ້​ເຊັ່ນ​ນັ້ນ​ແກ່​ເຮົາ​ຢູ່​ບ່ອນ​ໃດ?

[ຮູບ​ພາບ​ໜ້າ 7]

ວິທີ​ດີ​ທີ່​ສຸດ​ເພື່ອ​ຈະ​ຮູ້​ວ່າ​ເປັນ​ຫຍັງ​ສິ່ງ​ໃດ​ສິ່ງ​ນຶ່ງ​ຈຶ່ງ​ຖືກ​ອອກ​ແບບ ຂຶ້ນ​ມາ​ຄື​ຖາມ​ຜູ້​ອອກ​ແບບ

[ຮູບ​ພາບ​ໜ້າ 8]

ຄວາມ​ສະລັບ​ຊັບຊ້ອນ​ແລະ​ແບບ​ຂອງ​ສິ່ງ​ມີ​ຊີວິດ​ເຫັນ​ໄດ້​ໃນ​ໂມເລກູນ​ດີເອນເອ

[ຮູບ​ພາບ​ໜ້າ 9]

“ການ​ແກ້​ບັນຫາ​ໂດຍ​ສະໝອງ​ມະນຸດ​ເໜືອ​ກວ່າ ສະມັດຖະພາບ​ຂອງ​ຄອມພິວເຕີ​ທີ່​ມີ​ປະ​ສິດທິ​ພາບ​ສູງ​ສຸດ​ນັ້ນ​ຫຼາຍ​ແທ້ໆ”

    ໜັງສືພາສາລາວ (1993-2025)
    ອອກຈາກລະບົບ
    ເຂົ້າສູ່ລະບົບ
    • ລາວ
    • ແຊຣ໌
    • ການຕັ້ງຄ່າ
    • Copyright © 2025 Watch Tower Bible and Tract Society of Pennsylvania
    • ເງື່ອນໄຂການນຳໃຊ້
    • ນະໂຍບາຍກ່ຽວກັບຂໍ້ມູນສ່ວນຕົວ
    • ຕັ້ງຄ່າຄວາມເປັນສ່ວນຕົວ
    • JW.ORG
    • ເຂົ້າສູ່ລະບົບ
    ແຊຣ໌