ບົດໜຶ່ງ
ເອກະພາບໃນການນະມັດສະການໃນສະໄໝຂອງເຮົາໝາຍຄວາມຢ່າງໃດ?
1, 2. (ກ) ໃນສະໄໝຂອງເຮົາກຳລັງມີການດຳເນີນການອັນໃດທີ່ໜ້າຕື່ນເຕັ້ນ? (ຂ) ຄົນສັດຊື່ສຸດຈະລິດມີຄວາມຫວັງຫຍັງທີ່ດີເລີດ?
ທົ່ວໂລກມີການດຳເນີນການທີ່ໜ້າຕື່ນເຕັ້ນເພື່ອການນະມັດສະການທີ່ມີຄວາມເປັນເອກະພາບ. ນັ້ນແມ່ນການໂຮມເອົາຫຼາຍລ້ານຄົນຈາກທຸກຊາດ, ທຸກຊົນເຜົ່າ ແລະທຸກພາສາ. ໃນແຕ່ລະປີມີຈຳນວນຄົນເພີ່ມຂຶ້ນ. ຄຳພີໄບເບິນໄດ້ລະບຸຕົວຄົນເຫຼົ່ານີ້ວ່າ “ພິຍານ” ຂອງພະເຢໂຫວາ ແລະເອີ້ນເຂົາເຈົ້າວ່າ “ຝູງຄົນເປັນອັນມາກ.” ເຂົາເຈົ້າ “ບົວລະບັດພະອົງໃນວິຫານຂອງພະອົງທັງກາງເວັນທັງກາງຄືນ.” (ເອຊາອີ 43:10-12; ຄຳປາກົດ 7:9-15) ເປັນຫຍັງເຂົາເຈົ້າຈຶ່ງເຮັດເຊັ່ນນີ້? ເປັນຍ້ອນວ່າເຂົາເຈົ້າໄດ້ມາຮູ້ຈັກພະເຢໂຫວາໃນຖານະພະເຈົ້າທ່ຽງແທ້ແຕ່ອົງດຽວ. ສິ່ງນີ້ກະຕຸ້ນເຂົາເຈົ້າໃຫ້ນຳຊີວິດຂອງຕົນເຂົ້າມາປະສານກັບມາດຕະຖານທີ່ຊອບທຳຂອງພະອົງ. ນອກຈາກນັ້ນ ເຂົາເຈົ້າໄດ້ຮຽນຮູ້ວ່າເຂົາເຈົ້າກຳລັງມີຊີວິດຢູ່ໃນ “ເວລາວັນທັງຫຼາຍທີ່ສຸດ” ຫຼືສະໄໝສຸດທ້າຍແຫ່ງໂລກຊົ່ວນີ້, ຮູ້ວ່າພະເຈົ້າຈະທຳລາຍໂລກນີ້ໃນອີກບໍ່ດົນ, ແລະຮູ້ວ່າພະອົງຈະນຳເອົາໂລກໃໝ່ທີ່ເປັນອຸທິຍານເຂົ້າມາແທນ.—2 ຕີໂມເຕ 3:1-5, 13; 2 ເປໂຕ 3:10-13.
2 ພະຄຳຂອງພະເຈົ້າສັນຍາວ່າ “ຍັງສັກເວລາໜ້ອຍແລະຄົນຮ້າຍຈະບໍ່ຢູ່ຕໍ່ໄປ . . . ແລະຄົນທັງຫຼາຍທີ່ມີໃຈອ່ອນຫວານ [“ຜູ້ຖ່ອມຕົວ,” ທ.ປ.] ຈະມີແຜ່ນດິນໄວ້ ແລະມີຄວາມສະຫນຸກດ້ວຍຄວາມສຸກສຳລານອັນບໍລິບູນ.” (ຄຳເພງ 37:10, 11) “ຄົນຊອບທຳທັງຫຼາຍຈະມີແຜ່ນດິນໄວ້ແລະເຂົາຈະຕັ້ງຢູ່ທີ່ນັ້ນສືບໆໄປເປັນນິດ.” (ຄຳເພງ 37:29) “ພະເຈົ້າຈະເຊັດນ້ຳຕາທັງຫຼາຍຈາກຕາຂອງເຂົາ ແລະຄວາມຕາຍຈະບໍ່ມີຕໍ່ໄປ ແລະຄວາມທຸກໂສກແລະຮ້ອງໄຫ້ແລະເຈັບປວດຈະບໍ່ມີຕໍ່ໄປ ເຫດວ່າສິ່ງທັງຫຼາຍທີ່ເປັນເມື່ອກ່ອນນັ້ນກໍລ່ວງໄປແລ້ວ.”—ຄຳປາກົດ 21:4.
3. ຄວາມເປັນນ້ຳໜຶ່ງໃຈດຽວກັນໃນການນະມັດສະການເກີດຂຶ້ນຢ່າງໃດ?
3 ຄົນເຫຼົ່ານັ້ນທີ່ເຂົ້າມາຢ່າງເປັນນ້ຳໜຶ່ງໃຈດຽວກັນໃນການນະມັດສະການແທ້ ໃນເວລານີ້ ປະກອບກັນເປັນປະຊາກອນໝວດທຳອິດຂອງໂລກໃໝ່. ເຂົາເຈົ້າຮຽນຮູ້ສິ່ງທີ່ເປັນພະປະສົງຂອງພະເຈົ້າແລ້ວປະຕິບັດຕາມຢ່າງສຸດຄວາມສາມາດ. ເພື່ອໃຫ້ເຫັນຄວາມສຳຄັນຂອງເລື່ອງນີ້ ພະເຍຊູກ່າວວ່າ “ນີ້ແຫຼະໝາຍເຖິງຊີວິດຕະຫຼອດໄປ ຄືການທີ່ເຂົາຮັບເອົາຄວາມຮູ້ຕໍ່ໄປກ່ຽວກັບພະອົງ ຜູ້ເປັນພະເຈົ້າທ່ຽງແທ້ອົງດຽວ ແລະກ່ຽວກັບຜູ້ທີ່ພະອົງໃຊ້ມາ ຄືພະເຍຊູຄລິດ.” (ໂຢຮັນ 17:3) ອັກຄະສາວົກໂຢຮັນຂຽນໄວ້ວ່າ “ໂລກນີ້ ກັບຄວາມຄຶດຢາກໄດ້ຂອງໂລກພວມໄປເສຍ ແຕ່ວ່າຜູ້ທີ່ກະທຳຕາມນ້ຳໃຈແຫ່ງພະເຈົ້າກໍຕັ້ງຢູ່ໄປເປັນນິດ.”—1 ໂຢຮັນ 2:17.
ທີ່ຈິງແລ້ວສິ່ງນີ້ໝາຍຄວາມຢ່າງໃດ?
4. (ກ) ໃນສະໄໝຂອງເຮົາການໂຮມເອົາຄົນຈຳນວນຫຼວງຫຼາຍເຂົ້າມານະມັດສະການຢ່າງເປັນເອກະພາບ ແທ້ຈິງແລ້ວໝາຍຄວາມຢ່າງໃດ? (ຂ) ຄຳພີໄບເບິນພັນລະນາເຖິງການເຕົ້າໂຮມກັນນີ້ຢ່າງໃດ?
4 ການໂຮມເອົາຄົນຈຳນວນຫຼວງຫຼາຍເຂົ້າມາຮ່ວມກັນນະມັດສະການຢ່າງເປັນເອກະພາບໃນສະໄໝຂອງເຮົາ ທີ່ຈິງແລ້ວໝາຍຄວາມຢ່າງໃດ? ນັ້ນເປັນຫຼັກຖານຊັດເຈນວ່າເຮົາຢູ່ໃກ້ອະວະສານຂອງໂລກຊົ່ວນີ້ຫຼາຍແລ້ວ ຫຼັງຈາກນັ້ນ ໂລກໃໝ່ຂອງພະເຈົ້າຈະເລີ່ມຕົ້ນທັນທີ. ເຮົາເປັນປະຈັກພິຍານເຖິງຄວາມເປັນຈິງຂອງຄຳພະຍາກອນຕ່າງໆໃນຄຳພີໄບເບິນ ເຊິ່ງບອກລ່ວງໜ້າເຖິງການເຕົ້າໂຮມຄັ້ງສຳຄັນນີ້. ຄຳພະຍາກອນຂໍ້ໜຶ່ງບອກວ່າ “ຢູ່ມາໃນຄາວທີ່ສຸດ [ໃນສະໄໝສຸດທ້າຍນີ້] ພູແຫ່ງວິຫານຂອງພະເຢໂຫວາ [ການນະມັດສະການແທ້ຂອງພະອົງທີ່ໄດ້ຮັບການຍົກຊູຂຶ້ນ] ຈະຕັ້ງຢູ່ເທິງຍອດພູທັງຫຼາຍ [ສູງກວ່າການນະມັດສະການອື່ນໆ] . . . ແລະຊາວປະເທດທັງຫຼາຍຈະໂຮມໄປທີ່ນັ້ນ. ແລະພວກຕ່າງປະເທດທັງຫຼາຍຈະໄປແລະກ່າວວ່າ ຈົ່ງມາແລະຈົ່ງພາກັນຂຶ້ນໄປພູແຫ່ງພະເຢໂຫວາແລະໄປວິຫານແຫ່ງພະເຈົ້າຂອງຢາໂຄບ ແລະພະອົງຈະສັ່ງສອນພວກເຮົາໃຫ້ຮູ້ຈັກຮີດຄອງທັງຫຼາຍຂອງພະອົງ ແລະພວກເຮົາຈະທຽວໄປໃນທາງທັງຫຼາຍຂອງພະອົງ.”—ມີເກ 4:1, 2; ຄຳເພງ 37:34.
5, 6. (ກ) ທີ່ຈິງແລ້ວຊາດຕ່າງໆຫັນເຂົ້າຫາພະເຢໂຫວາຢ່າງໃດ? (ຂ) ເຮົາຄວນຈະຖາມຕົວເອງແນວໃດ?
5 ເຖິງແມ່ນວ່າບໍ່ແມ່ນໝົດທຸກຄົນຈາກຊາດຕ່າງໆເຂົ້າມານະມັດສະການທີ່ວິຫານຝ່າຍວິນຍານຂອງພະເຢໂຫວາ ແຕ່ກໍມີຫຼາຍລ້ານຄົນຈາກເຊື້ອຊາດຕ່າງໆກຳລັງເຮັດເຊັ່ນນັ້ນຢູ່. ເມື່ອເຂົາເຈົ້າຮຽນຮູ້ເລື່ອງພະປະສົງທີ່ປ່ຽມໄປດ້ວຍຄວາມຮັກ ແລະບຸກຄະລິກພາບທີ່ໜ້າດຶງດູດໃຈຂອງພະເຢໂຫວາພະເຈົ້າ ຫົວໃຈຂອງເຂົາເຈົ້າຖືກກະຕຸ້ນຢ່າງສຸດຊຶ້ງ. ເຂົາເຈົ້າພະຍາຍາມຮຽນຮູ້ເຖິງສິ່ງທີ່ພະເຈົ້າຮຽກຮ້ອງຈາກເຂົາເຈົ້າຢ່າງຖ່ອມໃຈ. ຄຳອະທິດຖານຂອງເຂົາເຈົ້າຄືກັບຄຳອະທິດຖານຂອງທ່ານຜູ້ຂຽນຄຳເພງທີ່ໄດ້ກ່າວໄວ້ວ່າ “ຂໍໂຜດສັ່ງສອນຂ້ານ້ອຍໃຫ້ເຮັດການທີ່ຊອບໃຈພະອົງ ເຫດວ່າພະອົງແມ່ນພະເຈົ້າຂອງຂ້ານ້ອຍ.”—ຄຳເພງ 143:10.
6 ທ່ານນຶກພາບວ່າຕົນເອງຢູ່ໃນທ່າມກາງຝູງຄົນເປັນອັນມາກເຊິ່ງພະເຢໂຫວາກຳລັງເຕົ້າໂຮມເຂົ້າສູ່ການນະມັດສະການທີ່ເປັນເອກະພາບບໍ? ການຮັບເອົາຄຳສອນທີ່ມາຈາກພະຄຳຂອງພະອົງສະແດງວ່າທ່ານເອງຮູ້ຄ່າຢ່າງແທ້ຈິງວ່າພະເຢໂຫວາເປັນບໍ່ເກີດແຫ່ງຄຳສອນນັ້ນບໍ? ທ່ານຈະ “ທຽວໄປໃນທາງທັງຫຼາຍຂອງພະອົງ” ເຖິງຂັ້ນໃດ?
ວິທີບັນລຸຄວາມເປັນເອກະພາບໃນການນະມັດສະການ
7. (ກ) ໃນທີ່ສຸດ ການນະມັດສະການຢ່າງເປັນເອກະພາບຈະບັນລຸຜົນເຖິງຂັ້ນໃດ? (ຂ) ເປັນຫຍັງຈຶ່ງນັບວ່າເປັນເລື່ອງຮີບດ່ວນທີ່ຈະເຂົ້າມານະມັດສະການພະເຢໂຫວາແຕ່ບັດນີ້ໄປ ແລະເຮົາຈະຊ່ວຍຄົນອື່ນໃຫ້ເຮັດຢ່າງນັ້ນໄດ້ຢ່າງໃດ?
7 ພະປະສົງຂອງພະເຢໂຫວາແມ່ນໃຫ້ສັບພະສິ່ງທີ່ສ້າງຂຶ້ນມາເຊິ່ງມີຄວາມຮູ້ສຶກນຶກຄິດຮ່ວມກັນໃນການນະມັດສະການແທ້ຢ່າງເປັນເອກະພາບ. ເຮົາປາຖະໜາຫຼາຍສ່ຳໃດທີ່ຈະເຫັນ ເມື່ອທຸກຄົນເຊິ່ງມີຊີວິດຢູ່ຈະນະມັດສະການພະເຈົ້າທ່ຽງແທ້ອົງດຽວເທົ່ານັ້ນ! (ຄຳເພງ 103:19-22) ເຖິງແນວນັ້ນກໍຕາມ ກ່ອນຈະເປັນເຊັ່ນນັ້ນ ພະເຢໂຫວາຕ້ອງກຳຈັດທຸກຄົນທີ່ບໍ່ຍອມເຮັດຕາມພະໄທປະສົງອັນຊອບທຳຂອງພະອົງ. ດ້ວຍຄວາມເມດຕາ ພະອົງແຈ້ງໃຫ້ຮູ້ລ່ວງໜ້າເຖິງສິ່ງທີ່ພະອົງຈະກະທຳເພື່ອຄົນຈາກທຸກຫົນທຸກແຫ່ງຈະມີໂອກາດປ່ຽນແປງແນວທາງການປະພຶດຂອງຕົນ. (ເອຊາອີ 55:6, 7) ສະນັ້ນ ໃນສະໄໝຂອງເຮົາຈຶ່ງມີການໃຫ້ຄຳເຊື້ອເຊີນອັນຮີບເຮ່ງ “ແກ່ທຸກປະເທດແລະກະກູນແລະພາສາແລະຊາດ” ດັ່ງນີ້: “ຈົ່ງຢ້ານຢຳພະເຈົ້າ ແລະຖວາຍລັດສະໝີແກ່ພະອົງ ເພາະວ່າເວລາໂມງທີ່ພະອົງຈະຕັດສິນມາເຖິງແລ້ວ ແລະຈົ່ງຂາບໄຫວ້ນະມັດສະການພະອົງຜູ້ໄດ້ສ້າງຟ້າສະຫວັນແລະແຜ່ນດິນໂລກແລະນ້ຳທະເລແລະນ້ຳພຸທັງຫຼາຍ.” (ຄຳປາກົດ 14:6, 7) ເຮົາເອງໄດ້ຮັບເອົາຄຳເຊີນນັ້ນແລ້ວບໍ? ຖ້າວ່າຮັບເອົາຄຳເຊີນນັ້ນແລ້ວ ເຮົາກໍມີສິດທິພິເສດທີ່ຈະເຊີນຄົນອື່ນໆໃຫ້ມາຮູ້ຈັກ ແລະນະມັດສະການພະເຈົ້າອົງທ່ຽງແທ້.
8. ຫຼັງຈາກຮຽນຮູ້ຄຳສອນພື້ນຖານຂອງຄຳພີໄບເບິນແລ້ວ ເຮົາຄວນພະຍາຍາມຢ່າງຈິງຈັງທີ່ຈະກ້າວໜ້າຕໍ່ໄປຢ່າງໃດ?
8 ພະເຢໂຫວາບໍ່ປະສົງການນະມັດສະການຈາກຄົນທີ່ບອກວ່າເຊື່ອໃນພະອົງ ແຕ່ຍັງຄົງມົວມຸ່ງຕິດຕາມຜົນປະໂຫຍດຂອງຕົນເອງຕໍ່ໄປ. ພະເຈົ້າຕ້ອງການໃຫ້ຄົນເຮົາບັນລຸເຖິງ “ຄວາມຮູ້ຖ້ອງແທ້ເລື່ອງພະປະສົງຂອງພະອົງ” ແລະສະທ້ອນອອກມາໃນຊີວິດຂອງຕົນ. (ໂກໂລດ 1:9, 10, ລ.ມ.) ເພາະເຫດນີ້ ຄົນທີ່ມີໃຈຮູ້ຄຸນຄ່າເຊິ່ງໄດ້ຮຽນຮູ້ຄຳສອນພື້ນຖານຂອງຄຳພີໄບເບິນຈຶ່ງຕ້ອງການມຸ່ງສູ່ຄວາມອາວຸໂສຝ່າຍຄລິດສະຕຽນ. ເຂົາເຈົ້າປາຖະໜາທີ່ຈະຮູ້ຈັກພະເຢໂຫວາໃກ້ຊິດຂຶ້ນ, ເຂົ້າໃຈພະຄຳຂອງພະອົງເພີ່ມຂຶ້ນແລະເລິກເຊິ່ງຍິ່ງຂຶ້ນ, ແລ້ວເອົາຄວາມຮູ້ນັ້ນໄປໃຊ້ໃນຊີວິດຢ່າງຄົບຖ້ວນຂຶ້ນ. ເຂົາເຈົ້າພະຍາຍາມສະທ້ອນຄຸນລັກສະນະຂອງພະບິດາທາງພາກສະຫວັນ ແລະມີທັດສະນະຕໍ່ສິ່ງຕ່າງໆຄືກັບພະອົງ. ສິ່ງເຫຼົ່ານີ້ກະຕຸ້ນເຂົາເຈົ້າໃຫ້ພະຍາຍາມຫາວິທີເພື່ອຈະເຂົ້າຮ່ວມໃນວຽກງານຊ່ວຍຊີວິດທີ່ພະເຈົ້າບັນຊາໃຫ້ກະທຳເທິງແຜ່ນດິນໂລກໃນສະໄໝຂອງເຮົາ. ເຮົາເອງຕ້ອງການເຮັດເຊັ່ນນັ້ນຄືກັນບໍ?—ມາລະໂກ 13:10; ເຫບເລີ 5:12–6:3.
9. ໃນຂະນະນີ້ຄວາມເປັນນ້ຳໜຶ່ງໃຈດຽວກັນແທ້ເປັນໄປໄດ້ຢ່າງໃດ?
9 ຄຳພີໄບເບິນສະແດງວ່າຜູ້ທີ່ຮັບໃຊ້ພະເຢໂຫວາຕ້ອງມີຄວາມເປັນນ້ຳໜຶ່ງໃຈດຽວກັນ. (ເອເຟດ 4:1-3) ຄວາມເປັນນ້ຳໜຶ່ງໃຈດຽວກັນນີ້ຕ້ອງມີຈິງໃນຕອນນີ້ ເຖິງແມ່ນວ່າເຮົາຈະຢູ່ໃນໂລກທີ່ແບ່ງແຍກ ແລະຍັງຕ້ອງຕໍ່ສູ້ກັບຄວາມບໍ່ສົມບູນຂອງເຮົາເອງ. ພະເຍຊູອະທິດຖານຢ່າງຈິງຈັງເພື່ອສາວົກຂອງພະອົງທຸກຄົນຈະເປັນອັນໜຶ່ງອັນດຽວກັນ ຄືມີເອກະພາບແທ້ໆ. ສິ່ງນັ້ນໝາຍຄວາມວ່າຢ່າງໃດ? ປະການທຳອິດ ເຂົາເຈົ້າຈະຕ້ອງມີສຳພັນທະພາບອັນດີກັບພະເຢໂຫວາແລະພະບຸດຂອງພະອົງ. ປະການທີສອງ ເຂົາເຈົ້າຈະຕ້ອງມີຄວາມເປັນນ້ຳໜຶ່ງໃຈດຽວກັນ. (ໂຢຮັນ 17:20, 21) ເພື່ອບັນລຸເປົ້າໝາຍນັ້ນ ພະເຢໂຫວາສອນໄພ່ພົນຂອງພະອົງໂດຍທາງປະຊາຄົມຄລິດສະຕຽນທີ່ມີຖານະເປັນອົງການ.
ມີປັດໄຈໃດແດ່ທີ່ສົ່ງເສີມຄວາມເປັນນ້ຳໜຶ່ງໃຈດຽວກັນ?
10. (ກ) ເມື່ອເຮົາໃຊ້ຄຳພີໄບເບິນຫາຄຳຕອບສຳລັບຄຳຖາມຕ່າງໆທີ່ມີຜົນກະທົບຕໍ່ເຮົາ ຈະຊ່ວຍໃຫ້ເຮົາພັດທະນາສິ່ງໃດ? (ຂ) ຈົ່ງວິເຄາະປັດໄຈທີ່ເຮັດໃຫ້ມີຄວາມເປັນນ້ຳໜຶ່ງໃຈດຽວກັນຝ່າຍຄລິດສະຕຽນ ໂດຍຕອບຄຳຖາມທີ່ໃຫ້ໄວ້ໃນວັກນີ້.
10 ປັດໄຈສຳຄັນເຈັດຢ່າງເຊິ່ງສົ່ງເສີມໃຫ້ມີຄວາມເປັນນ້ຳໜຶ່ງໃຈດຽວກັນໃນການນະມັດສະການມີຢູ່ຕໍ່ຈາກວັກນີ້. ຕອນທີ່ເຮົາຕອບຄຳຖາມທ້າຍວັກ ໃຫ້ພິຈາລະນາເຖິງວິທີທີ່ແຕ່ລະຈຸດມີຜົນກະທົບຕໍ່ສຳພັນທະພາບຂອງເຮົາກັບພະເຢໂຫວາແລະເພື່ອນຄລິດສະຕຽນ. ການຫາເຫດຜົນໃນຈຸດຕ່າງໆເຫຼົ່ານີ້ ແລະການເປີດເບິ່ງຂໍ້ພະຄຳພີທີ່ອ້າງເຖິງແຕ່ບໍ່ໄດ້ຍົກຂຶ້ນມາ ຈະຊ່ວຍເຮົາໃຫ້ເຮັດຄວາມກ້າວໜ້າດ້ານສະຕິປັນຍາ, ຄວາມສາມາດໃນການຄິດ, ແລະການສັງເກດເຂົ້າໃຈໃນແນວທາງຂອງພະເຈົ້າ ເຊິ່ງເປັນຄຸນລັກສະນະທີ່ເຮົາທຸກຄົນຈຳຕ້ອງມີ. (ສຸພາສິດ 5:1, 2; ຟີລິບ 1:9-11) ຂໍໃຫ້ພິຈາລະນາປັດໄຈເຫຼົ່ານີ້ເທື່ອລະຈຸດ.
(1) ເຮົາຍອມຮັບສິດຂອງພະເຢໂຫວາໃນການຕັ້ງມາດຕະຖານເລື່ອງຄວາມດີແລະຄວາມຊົ່ວ. “ຈົ່ງປົງໃຈໃນພະເຢໂຫວາດ້ວຍສຸດຈິດ ແລະຢ່າວາງໃຈໃນສະຕິປັນຍາຂອງເຈົ້າ. ໃນຮີດຄອງທັງຫຼາຍຂອງເຈົ້າຈົ່ງຍອມຮູ້ຈັກພະເຈົ້າ ແລະພະອົງຈະນຳໜ້າເຈົ້າໄປໃນຫົນທາງທັງຫຼາຍຂອງເຈົ້າ.”—ສຸພາສິດ 3:5, 6.
ເມື່ອເຮົາຕັດສິນໃຈໃນເລື່ອງຕ່າງໆ ເປັນຫຍັງເຮົາຈຶ່ງຄວນສະແຫວງຫາຄຳແນະນຳ ແລະການຊີ້ນຳຈາກພະເຢໂຫວາ? (ຄຳເພງ 146:3-5; ເອຊາອີ 48:17)
(2) ເຮົາໃຫ້ພະຄຳຂອງພະເຈົ້າຊີ້ນຳທາງ. “ເມື່ອທ່ານທັງຫຼາຍໄດ້ຮັບເອົາພະຄຳທີ່ໄດ້ຍິນແຕ່ພວກເຮົາ ທ່ານທັງຫຼາຍໄດ້ຮັບແຕ່ພະເຈົ້າ ບໍ່ໃຊ່ຖ້ອຍຄຳແຫ່ງມະນຸດ ແຕ່ວ່າເໝືອນເປັນອີ່ຫຼີພະຄຳແຫ່ງພະເຈົ້າ ແລະພະຄຳນັ້ນກະທຳການໃນທ່ານທັງຫຼາຍທີ່ເຊື່ອ.”—1 ເທຊະໂລນີກ 2:13.
ຫາກເຮົາກະທຳແຕ່ສິ່ງທີ່ຕົນ “ຮູ້ສຶກ” ວ່າຖືກເທົ່ານັ້ນຈະມີອັນຕະລາຍຫຍັງ? (ສຸພາສິດ 14:12; ເຢເຣມີ 10:23, 24; 17:9)
ໃນເລື່ອງໃດເລື່ອງໜຶ່ງ ຖ້າເຮົາບໍ່ຮູ້ເຖິງສິ່ງທີ່ຄຳພີໄບເບິນແນະນຳໄວ້ ເຮົາຄວນຈະເຮັດຫຍັງ? (ສຸພາສິດ 2:3-5; 2 ຕີໂມເຕ 3:16, 17)
(3) ເຮົາທຸກຄົນໄດ້ປະໂຫຍດຈາກໂຄງການລ້ຽງດູທາງຝ່າຍວິນຍານຢ່າງດຽວກັນ. “ລູກຊາຍທັງປວງຂອງເຈົ້າຈະສຶກສາດ້ວຍພະເຢໂຫວາ.” (ເອຊາອີ 54:13) “ພວກເຮົາຈົ່ງລະວັງຄຶດເຖິງກັນແລະກັນ ເພື່ອຈະໄດ້ເຕືອນໃຈກັນ ໃຫ້ປົງໃຈຮັກກັນແລະກັນແລະກະທຳການດີ. ຢ່າໃຫ້ປະການຊຸມນຸມກັນນັ້ນ ເໝືອນດັ່ງຜູ້ລາງຄົນເຄີຍປະ ແຕ່ວ່າຈົ່ງເຕືອນສະຕິກັນແລະກັນ ແລະມາກກວ່ານັ້ນອີກ ເພາະທ່ານທັງຫຼາຍເຫັນວ່າ ວັນ [ແຫ່ງການທຳລາຍລ້າງ] ນັ້ນພວມຫຍັບເຂົ້າມາ.”—ເຫບເລີ 10:24, 25.
ຄົນເຫຼົ່ານັ້ນທີ່ສວຍເອົາປະໂຫຍດຢ່າງເຕັມທີຈາກການຈັດຕຽມເພື່ອການລ້ຽງດູຝ່າຍວິນຍານຂອງພະເຢໂຫວາໄດ້ຜົນດີຫຍັງແດ່? (ເອຊາອີ 65:13, 14)
(4) ພະເຍຊູຄລິດເປັນຜູ້ນຳຂອງເຮົາ ບໍ່ແມ່ນມະນຸດຄົນໃດຄົນໜຶ່ງ. “ຝ່າຍທ່ານທັງຫຼາຍ ຢ່າເປັນທີ່ເອີ້ນຊື່ວ່າ ອາຈານເຈົ້າຂ້າ ເພາະວ່າຜູ້ໜຶ່ງຜູ້ດຽວເປັນພະອາຈານຂອງທ່ານທັງຫຼາຍ ແມ່ນພະຄລິດ ແລະທ່ານທັງຫຼາຍເປັນພີ່ນ້ອງກັນທຸກຄົນ. ແລະຢ່າຊູເອີ້ນຊື່ຜູ້ໃດວ່າ ພໍ່ໃນແຜ່ນດິນໂລກ ເພາະວ່າຜູ້ໜຶ່ງຜູ້ດຽວເປັນພະບິດາຂອງທ່ານທັງຫຼາຍ ແມ່ນຜູ້ຢູ່ໃນສະຫວັນ. ຢ່າໃຫ້ຜູ້ໃດເອີ້ນຊື່ທ່ານທັງຫຼາຍວ່າ ເຈົ້ານາຍ [“ຜູ້ນຳ,” ລ.ມ.] ເພາະວ່າຜູ້ໜຶ່ງຜູ້ດຽວເປັນເຈົ້ານາຍ [“ຜູ້ນຳ,” ລ.ມ.] ຂອງທ່ານທັງຫຼາຍ ແມ່ນພະຄລິດ.”—ມັດທາຍ 23:8-10.
ຖ້າຄົນໃດຄົນໜຶ່ງໃນພວກເຮົາຈະຖືວ່າຕົນເໜືອກວ່າຄົນອື່ນນັ້ນເໝາະສົມບໍ? (ໂລມ 3:23, 24; 12:3)
(5) ເຮົາໝາຍເພິ່ງລັດຖະບານແຫ່ງລາຊະອານາຈັກຂອງພະເຈົ້າເປັນຄວາມຫວັງອັນດຽວທໍ່ນັ້ນສຳລັບມະນຸດ. “ທ່ານທັງຫຼາຍຈົ່ງອ້ອນວອນຕາມຢ່າງນີ້ວ່າ ພະບິດາຂອງຂ້າພະເຈົ້າທັງຫຼາຍຜູ້ຢູ່ໃນສະຫວັນ. ຂໍໃຫ້ນາມຊື່ຂອງພະອົງເປັນທີ່ນັບຖືອັນບໍລິສຸດ. ຂໍໃຫ້ແຜ່ນດິນ [“ລາຊະອານາຈັກ,” ລ.ມ.] ຂອງພະອົງມາຕັ້ງຢູ່ ນ້ຳໃຈຂອງພະອົງສຳເລັດແລ້ວໃນສະຫວັນຢ່າງໃດ ຂໍໃຫ້ສຳເລັດທີ່ແຜ່ນດິນໂລກຢ່າງນັ້ນ. ຈົ່ງຊອກຫາແຜ່ນດິນແຫ່ງພະເຈົ້າແລະຄວາມຊອບທຳແຫ່ງພະອົງກ່ອນ.”—ມັດທາຍ 6:9, 10, 33.
ການ ‘ຊອກຫາລາຊະອານາຈັກກ່ອນ’ ຊ່ວຍຮັກສາຄວາມເປັນນ້ຳໜຶ່ງໃຈດຽວກັນຂອງເຮົາໄດ້ຢ່າງໃດ? (ມີເກ 4:3; 1 ໂຢຮັນ 3:10-12)
(6) ພະວິນຍານບໍລິສຸດເຮັດໃຫ້ຜູ້ນະມັດສະການພະເຢໂຫວາມີຄຸນລັກສະນະຕ່າງໆທີ່ຈຳເປັນທີ່ສຸດຕໍ່ເອກະພາບຂອງຄລິດສະຕຽນ. “ໝາກແຫ່ງພະວິນຍານນັ້ນຄື ຄວາມຮັກ, ຄວາມຍິນດີ, ສັນຕິສຸກ, ຄວາມອົດກັ້ນດົນນານ, ຄວາມກະລຸນາ, ຄວາມດີ, ຄວາມເຊື່ອ, ຄວາມອ່ອນໂຍນ, ການຮູ້ຈັກບັງຄັບຕົນ.”—ຄາລາຊີ 5:22, 23, ລ.ມ.
ເຮົາຕ້ອງເຮັດຫຍັງເພື່ອໃຫ້ພະວິນຍານຂອງພະເຈົ້າເກີດໝາກໃນຕົວເຮົາ? (ກິດຈະການ 5:32)
ການມີພະວິນຍານຂອງພະເຈົ້າຈະສົ່ງຜົນຕໍ່ສຳພັນທະພາບຂອງເຮົາກັບເພື່ອນຄລິດສະຕຽນຢ່າງໃດ? (ໂຢຮັນ 13:35; 1 ໂຢຮັນ 4:8, 20, 21)
(7) ຜູ້ນະມັດສະການແທ້ຂອງພະເຈົ້າທຸກຄົນມີສ່ວນຮ່ວມໃນການປະກາດຂ່າວດີເລື່ອງລາຊະອານາຈັກຂອງພະອົງ “ຄຳປະເສີດນີ້ແຫ່ງແຜ່ນດິນ [“ລາຊະອານາຈັກ,” ລ.ມ.] ຂອງພະເຈົ້າຈະເປັນທີ່ເທສະໜາປ່າວປະກາດໄປທົ່ວແຜ່ນດິນໂລກ ເພື່ອຈະເປັນພິຍານແກ່ພວກຕ່າງປະເທດທັງປວງ ແລະເມື່ອນັ້ນທີ່ສຸດຈະມາເຖິງ.”—ມັດທາຍ 24:14.
ສິ່ງໃດຄວນກະຕຸ້ນເຮົາໃຫ້ຢາກມີສ່ວນຮ່ວມຢ່າງເຕັມທີໃນງານປະກາດນີ້? (ມັດທາຍ 22:37-39; ໂລມ 10:10)
11. ເມື່ອນຳເອົາຄວາມຈິງຈາກຄຳພີໄບເບິນມາໃຊ້ໃນຊີວິດຂອງເຮົາ ຈະມີຜົນຢ່າງໃດ?
11 ການນະມັດສະການພະເຢໂຫວາຢ່າງເປັນເອກະພາບດຶງເຮົາໃຫ້ເຂົ້າໃກ້ຊິດພະອົງຫຼາຍຂຶ້ນ ແລະເຮັດໃຫ້ເຮົາຊື່ນຊົມຍິນດີໃນການຄົບຫາກັບເພື່ອນຮ່ວມຄວາມເຊື່ອ. ຄຳເພງ 133:1 ບອກວ່າ “ດັ່ງນີ້ເມື່ອພີ່ນ້ອງທັງຫຼາຍຕັ້ງຢູ່ນຳກັນຕິດພັນຢູ່ນຳກັນເປັນການດີການຊອບໃຈຫຼາຍແທ້ໆ.” ເປັນຕາໜ້າຊື່ນຊົມຫຼາຍແທ້ໆທີ່ໄດ້ຢູ່ຫ່າງໄກຈາກໂລກເຊິ່ງເຕັມໄປດ້ວຍຄວາມເຫັນແກ່ຕົວ, ການຜິດສິນລະທຳ, ແລະຄວາມຮຸນແຮງ ແລ້ວເຂົ້າມາສົມທົບກັບຜູ້ທີ່ຮັກພະເຢໂຫວາ ແລະປະຕິບັດຕາມກົດໝາຍຂອງພະອົງຢ່າງແທ້ຈິງ!
ຫຼີກລ້ຽງອິດທິພົນທີ່ກໍ່ໃຫ້ເກີດຄວາມແຕກແຍກ
12. ເປັນຫຍັງເຮົາຕ້ອງຫຼີກລ້ຽງຈາກນ້ຳໃຈທີ່ບໍ່ຍອມຂຶ້ນກັບຄົນອື່ນ?
12 ເພື່ອບໍ່ໃຫ້ເອກະພາບທົ່ວໂລກທີ່ມີຄ່າຂອງເຮົາຖືກທຳລາຍ ເຮົາຕ້ອງຫຼີກລ້ຽງອິດທິພົນທີ່ເຮັດໃຫ້ແຕກແຍກ. ສິ່ງໜຶ່ງແມ່ນນ້ຳໃຈທີ່ບໍ່ຍອມຂຶ້ນກັບພະເຈົ້າແລະກົດໝາຍຂອງພະອົງ. ພະເຢໂຫວາຊ່ວຍເຮົາໃຫ້ຫຼີກລ້ຽງຈາກນ້ຳໃຈເຊັ່ນນີ້ ໂດຍການເປີດເຜີຍຕົວການຕົ້ນເຫດ ກໍແມ່ນຊາຕານພະຍາມານນັ້ນແຫຼະ. (2 ໂກລິນໂທ 4:4; ຄຳປາກົດ 12:9) ຊາຕານເປັນຜູ້ຊັກຈູງອາດາມກັບເອວາໃຫ້ລະເລີຍຄຳສັ່ງຂອງພະເຈົ້າ ແລະຕັດສິນໃຈເຮັດສິ່ງທີ່ຂັດກັບພະປະສົງຂອງພະເຈົ້າ. ຜົນທີ່ຕາມມາແມ່ນຄວາມຫາຍະນະສຳລັບເຂົາເຈົ້າທັງສອງແລະພວກເຮົາ. (ຕົ້ນເດີມ 3:1-6, 17-19) ໂລກນີ້ເຕັມໄປດ້ວຍນ້ຳໃຈທີ່ບໍ່ຍອມຂຶ້ນກັບພະເຈົ້າແລະກົດໝາຍຂອງພະອົງ. ສະນັ້ນ ເຮົາຈະຕ້ອງຕ້ານທານນ້ຳໃຈແບບນັ້ນທີ່ຢູ່ໃນຕົວເຮົາ.
13. ສິ່ງໃດຈະສະແດງວ່າເຮົາຕຽມຕົວຢ່າງແທ້ຈິງເພື່ອຈະມີຊີວິດໃນໂລກໃໝ່ທີ່ຊອບທຳຂອງພະເຈົ້າ?
13 ຕົວຢ່າງເຊັ່ນ ຈົ່ງພິຈາລະນາຄຳສັນຍາອັນໜ້າຕື່ນເຕັ້ນຂອງພະເຢໂຫວາທີ່ຈະນຳເອົາຟ້າສະຫວັນໃໝ່ແລະແຜ່ນດິນໂລກໃໝ່ເຊິ່ງ “ຄວາມຊອບທຳຕັ້ງຢູ່” ມາແທນທີ່ໂລກຊົ່ວນີ້. (2 ເປໂຕ 3:13) ສິ່ງນັ້ນຈະບໍ່ກະຕຸ້ນເຮົາໃຫ້ຕຽມພ້ອມເພື່ອຈະມີຊີວິດຢູ່ໃນໂລກທີ່ເຕັມໄປດ້ວຍຄວາມຊອບທຳບໍ? ນັ້ນໝາຍຄວາມເຖິງການເອົາໃຈໃສ່ຄຳເຕືອນກົງໆທີ່ມາຈາກຄຳພີໄບເບິນວ່າ “ຢ່າຮັກໂລກກໍດີ ກັບສິ່ງຂອງທັງຫຼາຍທີ່ຢູ່ໃນໂລກກໍດີ ຖ້າຜູ້ໜຶ່ງຜູ້ໃດຮັກໂລກ ຄວາມຮັກແຫ່ງພະບິດາບໍ່ຢູ່ໃນຄົນນັ້ນ.” (1 ໂຢຮັນ 2:15) ສະນັ້ນ ເຮົາຈຶ່ງຫຼີກລ້ຽງຈາກນ້ຳໃຈຂອງໂລກເຊິ່ງແມ່ນທັດສະນະບໍ່ຍອມຂຶ້ນກັບໃຜ, ການຄິດເຖິງແຕ່ຕົວເອງຫຼາຍເກີນໄປ, ການຜິດສິນລະທຳແລະຄວາມຮຸນແຮງ. ໃຫ້ເຮົາເຮັດເປັນນິດໄສທີ່ຈະຮັບຟັງ ແລະເຊື່ອຟັງພະເຢໂຫວາຈາກຫົວໃຈຂອງເຮົາເຖິງວ່າເນື້ອໜັງທີ່ບໍ່ສົມບູນຂອງເຮົາໂອນອຽງໄປອີກທາງໜຶ່ງກໍຕາມ. ແນວທາງຊີວິດທັງໝົດຂອງເຮົາຄວນເປັນຫຼັກຖານທີ່ສະແດງວ່າ ຄວາມຄິດແລະເຈຕະຄະຕິຂອງເຮົາມຸ່ງໄປສູ່ການກະທຳຕາມພະປະສົງຂອງພະເຈົ້າ.—ຄຳເພງ 40:8.
14. (ກ) ເປັນຫຍັງການສວຍເອົາໂອກາດທີ່ຈະຮຽນຮູ້ກ່ຽວກັບແນວທາງຂອງພະເຢໂຫວາແລະດຳເນີນຕາມຕັ້ງແຕ່ດຽວນີ້ຈຶ່ງສຳຄັນ? (ຂ) ຂໍ້ຄຳພີທີ່ອ້າງເຖິງໃນຂໍ້ນີ້ມີຄວາມໝາຍຢ່າງໃດຕໍ່ຕົວເຮົາເອງ?
14 ເມື່ອເຖິງເວລາກຳນົດ ພະເຢໂຫວາຈະທຳລາຍລະບົບຊົ່ວນີ້ພ້ອມກັບທຸກໆຄົນທີ່ມັກແນວທາງຊີວິດແບບໂລກນີ້ ພະອົງຈະບໍ່ລ່າຊ້າ. ພະອົງຈະບໍ່ເລື່ອນເວລາ ຫຼືປ່ຽນມາດຕະຖານຂອງພະອົງເພື່ອເຫັນແກ່ບຸກຄົນທີ່ຍັງພະຍາຍາມຍຶດຕິດຢູ່ກັບໂລກນີ້ ໃນຂະນະດຽວກັນກໍຮຽນຮູ້ພະປະສົງຂອງພະເຈົ້າແລະປະຕິບັດຕາມຢ່າງບໍ່ຄ່ອຍເຕັມໃຈ. ບັດນີ້ເຖິງເວລາແລ້ວທີ່ຕ້ອງລົງມືປະຕິບັດ! (ລືກາ 13:23, 24; 17:32; 21:34-36) ດັ່ງນັ້ນ ຈັ່ງແມ່ນອົບອຸ່ນໃຈແທ້ໆທີ່ເຫັນຝູງຄົນເປັນອັນມາກກຳລັງສວຍເອົາໂອກາດທີ່ມີຄ່າອັນນີ້ ຫ້າວຫັນໃນການຊອກຫາຄຳແນະນຳສັ່ງສອນເຊິ່ງພະເຢໂຫວາຈັດໃຫ້ຜ່ານທາງພະຄຳ ແລະອົງການເຊິ່ງດຳເນີນການຢ່າງເປັນເອກະພາບຕາມວິທີຂອງພະອົງໄປສູ່ໂລກໃໝ່! ແຮ່ງເຮົາຮຽນຮູ້ເຖິງພະເຢໂຫວາຫຼາຍສ່ຳໃດ ເຮົາກໍແຮ່ງຈະຮັກພະອົງແລະຕ້ອງການຈະຮັບໃຊ້ພະອົງຫຼາຍຂຶ້ນສ່ຳນັ້ນ.
ການພິຈາລະນາທົບທວນ
• ພະປະສົງຂອງພະເຢໂຫວາໃນເລື່ອງການນະມັດສະການແມ່ນຫຍັງ?
• ຫຼັງຈາກໄດ້ຮຽນຮູ້ຄຳສອນພື້ນຖານຈາກຄຳພີໄບເບິນແລ້ວ ເຮົາຄວນພະຍາຍາມຢ່າງຈິງຈັງທີ່ຈະກ້າວໜ້າຕໍ່ໄປຢ່າງໃດ?
• ເຮົາແຕ່ລະຄົນສາມາດເຮັດຫຍັງແດ່ເພື່ອຈະມີຄວາມເປັນເອກະພາບກັບຄົນອື່ນໆທີ່ນະມັດສະການພະເຢໂຫວາ?
[ຮູບພາບໜ້າ 4]
“ຄົນທັງຫຼາຍທີ່ມີໃຈອ່ອນຫວານຈະມີແຜ່ນດິນໄວ້ ແລະມີຄວາມສະຫນຸກດ້ວຍຄວາມສຸກສຳລານອັນບໍລິບູນ”