ບົດທີ 23
ຂ້ອຍຈະອະທິບາຍທັດສະນະຂອງຄຳພີໄບເບິນຈັ່ງໃດຕໍ່ການມັກຄົນເພດດຽວກັນ?
ພິທີມອບລາງວັນມີຄວາມເຮຮາຢ່າງສຸດຂີດເມື່ອນັກສະແດງຍິງທີ່ມີຊື່ສຽງສອງຄົນທັກທາຍກັນດ້ວຍການຈູບທີ່ຫວານຊຶ້ງ! ຜູ້ຊົມພາກັນຕົກຕະລຶງ ແລ້ວກໍໂຫ່ຮ້ອງດີໃຈ. ຄົນຮັກຮ່ວມເພດຖືວ່າເປັນໄຊຊະນະ. ບາງຄົນເຊື່ອວ່າເຂົາເຈົ້າເຮັດແນວນັ້ນເພື່ອໃຫ້ເປັນຂ່າວດັງ. ຂ່າວທາງໂທລະພາບຈະເອົາພາບວິດີໂອການຈູບນັ້ນໄປອອກອາກາດເທື່ອແລ້ວເທື່ອອີກ ແລະຈະມີຄົນເຂົ້າໄປເບິ່ງພາບນັ້ນຫຼາຍລ້ານຄັ້ງໃນອິນເຕີເນັດອີກຫຼາຍວັນ.
ຈາກເຫດການຂ້າງເທິງນັ້ນ ເກືອບບໍ່ມີອັນໃດຈະເປັນຂ່າວຄຶກໂຄມໄດ້ຫຼາຍກວ່າການທີ່ຄົນໂດ່ງດັງປະກາດຢ່າງເປີດເຜີຍວ່າມັກຜູ້ຊາຍນຳກັນ ມັກຜູ້ຍິງນຳກັນ ຫຼືມັກທັງສອງເພດ. ບາງຄົນຍົກຍ້ອງບຸກຄົນເຫຼົ່ານັ້ນສຳລັບຄວາມກ້າຫານຂອງເຂົາເຈົ້າ ສ່ວນຄົນອື່ນໆຕຳໜິເຂົາເຈົ້າສຳລັບການມົ້ວສຸມທາງເພດ. ລະຫວ່າງສອງທັດສະນະນີ້ກໍມີຫຼາຍຄົນທີ່ເບິ່ງວ່າການມັກຄົນເພດດຽວກັນບໍ່ມີພິດໄພຫຍັງນອກເໜືອຈາກເປັນຮູບແບບຊີວິດທີ່ເປັນທາງເລືອກຢ່າງໜຶ່ງ. ທ້າວດານຽນອາຍຸ 21 ປີ ເລົ່າວ່າ: “ຕອນທີ່ຮຽນໜັງສືຢູ່ໂຮງຮຽນ ແມ່ນແຕ່ພວກນັກຮຽນທີ່ເວົ້າວ່າເຂົາເຈົ້າມັກເພດກົງກັນຂ້າມ ກໍຮູ້ສຶກວ່າ ຖ້າລັງກຽດເລື່ອງການມັກຄົນເພດດຽວກັນ ກໍເປັນຄົນມີອະຄະຕິແລະມັກວິຈານ.”
ຄົນຕ່າງໄວແລະຄົນທີ່ຢູ່ຄົນລະປະເທດອາດມີທ່າທີແຕກຕ່າງກັນຕໍ່ກັບການມັກຄົນເພດດຽວກັນ. ແຕ່ຄລິດສະຕຽນບໍ່ຖືກ “ພັດໄປພັດມາແລະຫຼົບໄປຫຼົບມາດ້ວຍລົມແຫ່ງຄຳສັ່ງສອນທຸກຢ່າງ.” (ເອເຟດ 4:14) ແຕ່ເຂົາເຈົ້າຍຶດໝັ້ນກັບທັດສະນະຂອງຄຳພີໄບເບິນ.
ຄຳພີໄບເບິນມີ ທັດສະນະແນວໃດໃນເລື່ອງການມັກຄົນເພດດຽວກັນ? ຖ້າເຈົ້າດຳເນີນຊີວິດຕາມຫຼັກການດ້ານສິລະທຳຂອງຄຳພີໄບເບິນ ເຈົ້າຈະຕອບແນວໃດຕໍ່ກັບຜູ້ທີ່ເບິ່ງວ່າເຈົ້າມີອະຄະຕິ ມັກວິຈານ ຫຼືຊັງແລະຢ້ານຄົນທີ່ມັກເພດດຽວກັນ? ຂໍໃຫ້ພິຈາລະນາຄຳຖາມຫຼືຄຳກ່າວຕໍ່ໄປນີ້ແລະຕອບຄຳຖາມທີ່ອາດຈະຕອບໄດ້.
“ຄຳພີໄບເບິນເວົ້າແນວໃດໃນເລື່ອງການມັກຄົນເພດດຽວກັນ?”
“ຄຳພີໄບເບິນເວົ້າຢ່າງຈະແຈ້ງວ່າພະເຈົ້າຕັ້ງການຮ່ວມເພດໄວ້ລະຫວ່າງຜູ້ຊາຍແລະຜູ້ຍິງ ແລະພາຍໃນສາຍສຳພັນທີ່ແຕ່ງດອງກັນແລ້ວເທົ່ານັ້ນ. (ຕົ້ນເດີມ 1:27, 28; ພວກເລວີ 18:22; ສຸພາສິດ 5:18, 19) ເມື່ອຄຳພີໄບເບິນຕຳໜິການຜິດປະເວນີ ນັ້ນໝາຍລວມເຖິງການປະພຶດທັງຂອງການມັກຄົນທີ່ເປັນເພດດຽວກັນແລະການປະພຶດທີ່ຜິດສິລະທຳທາງເພດກັບເພດກົງກັນຂ້າມ.”a—ຄາລາຊີ 5:19-21.
“ເຈົ້າມີທັດສະນະຈັ່ງໃດຕໍ່ການມັກຄົນເພດດຽວກັນ?”
“ຂ້ອຍບໍ່ໄດ້ຊັງຄົນທີ່ມັກຄົນທີ່ເປັນເພດດຽວກັນ ແຕ່ບໍ່ເຫັນດີກັບການປະພຶດຂອງເຂົາເຈົ້າ.”
ຂໍໃຫ້ຈື່ໄວ້ວ່າ ຖ້າເຈົ້າໄດ້ຮັບການຊີ້ນຳໂດຍຫຼັກການດ້ານສິລະທຳຂອງຄຳພີໄບເບິນ ນັ້ນເປັນຮູບແບບຊີວິດທີ່ເຈົ້າເລືອກ ແລະເຈົ້າມີສິດທີ່ຈະເລືອກແບບນັ້ນ. (ໂຢຊວຍ 24:15) ຢ່າຮູ້ສຶກອາຍທີ່ມີທັດສະນະແບບນັ້ນ.—ຄຳເພງ 119:46.
“ຄລິດສະຕຽນຄວນປະຕິບັດດ້ວຍຄວາມນັບຖືຕໍ່ຄົນທັງປວງບໍ່ແມ່ນບໍ ບໍ່ວ່າເຂົາເຈົ້າຈະມີຄວາມມັກແບບໃດກໍຕາມໃນເລື່ອງເພດ?”
ແມ່ນແລ້ວ. ພະຄຳພີກ່າວວ່າ: “ຈົ່ງນັບຖືຄົນທັງປວງ.” (1 ເປໂຕ 2:17) ດ້ວຍເຫດນັ້ນ ຄລິດສະຕຽນຈຶ່ງບໍ່ໄດ້ຊັງຄົນທີ່ມັກຄົນເພດດຽວກັນ. ຄລິດສະຕຽນສະແດງຄວາມກະລຸນາຕໍ່ຄົນທັງປວງລວມທັງຄົນທີ່ມັກຄົນເພດດຽວກັນ.—ມັດທາຍ 7:12.
“ທັດສະນະຂອງເຈົ້າໃນເລື່ອງການມັກຄົນເພດດຽວກັນຈະສົ່ງເສີມໃຫ້ມີອະຄະຕິຕໍ່ກັບເຂົາເຈົ້າບໍ່ແມ່ນບໍ?”
“ບໍ່ແມ່ນແນວນັ້ນຈັກໜ້ອຍ. ຂ້ອຍບໍ່ຍອມຮັບພຶດຕິກຳ ຂອງຄົນທີ່ມັກຄົນເພດດຽວກັນ ແຕ່ບໍ່ໄດ້ກຽດຊັງຄົນທີ່ມັກຄົນເພດດຽວກັນ.”
ເຈົ້າອາດເວົ້າຕື່ມວ່າ: “ເພື່ອເປັນການສົມທຽບ ຂ້ອຍເລືອກທີ່ຈະບໍ່ສູບຢາ. ທີ່ຈິງແລ້ວ ຂ້ອຍຮູ້ສຶກວ່າການສູບຢາເປັນສິ່ງທີ່ໜ້າລັງກຽດຫຼາຍ. ແຕ່ສົມມຸດວ່າເຈົ້າເປັນຄົນທີ່ສູບຢາແລະຄິດຕ່າງຈາກຂ້ອຍ. ຂ້ອຍຈະບໍ່ມີອະຄະຕິຕໍ່ເຈົ້າເພາະຄວາມຄິດເຫັນຂອງເຈົ້າ ແລະຂ້ອຍກໍໝັ້ນໃຈວ່າເຈົ້າກໍເຊັ່ນກັນຈະບໍ່ມີອະຄະຕິຕໍ່ຂ້ອຍເພາະທັດສະນະຂອງຂ້ອຍ ແມ່ນບໍ? ຫຼັກການນີ້ໃຊ້ໄດ້ກັບທັດສະນະທີ່ແຕກຕ່າງກັນຂອງເຮົາໃນເລື່ອງການມັກຄົນທີ່ເປັນເພດດຽວກັນ.”
“ພະເຍຊູສອນໃຫ້ຍອມຮັບຄົນອື່ນບໍ່ແມ່ນບໍ? ຖ້າເປັນເຊັ່ນນັ້ນ ຄລິດສະຕຽນກໍຄວນຈະຍອມຮັບໃນເລື່ອງການມັກຄົນເພດດຽວກັນບໍ່ແມ່ນບໍ?”
ພະເຍຊູບໍ່ໄດ້ສະໜັບສະໜູນຜູ້ຕິດຕາມພະອົງໃຫ້ຍອມຮັບວິຖີຊີວິດທຸກຮູບແບບ. ແທນທີ່ຈະເປັນເຊັ່ນນັ້ນ ພະອົງສອນວ່າຫົນທາງສູ່ຄວາມລອດເປີດໄວ້ໃຫ້ກັບ “ທຸກຄົນທີ່ເຊື່ອໃນພະບຸດ.” (ໂຢຮັນ 3:16) ການສະແດງຄວາມເຊື່ອໃນພະເຍຊູລວມເອົາການປະຕິບັດຕາມຫຼັກການດ້ານສິລະທຳຂອງພະເຈົ້າ ເຊິ່ງຫ້າມການປະພຶດບາງຢ່າງ ລວມເຖິງການມັກຄົນເພດດຽວກັນ.—ໂລມ 1:26, 27.
“ຄົນທີ່ມັກຄົນເພດດຽວກັນບໍ່ສາມາດປ່ຽນແປງຄວາມມັກຂອງຕົນ ເພາະເຂົາເຈົ້າເປັນແນວນັ້ນມາແຕ່ເກີດ.”
“ຄຳພີໄບເບິນບໍ່ໄດ້ກ່າວເຖິງເລື່ອງຊີວະວິທະຍາຂອງຄົນທີ່ມັກຄົນເພດດຽວກັນ ເຖິງແມ່ນຈະຍອມຮັບກັນວ່າລັກສະນະນິດໄສບາງຢ່າງຝັງຮາກເລິກຢູ່ໃນຕົວຄົນເຮົາ. (2 ໂກລິນໂທ 10:4, 5) ເຖິງແມ່ນວ່າບາງຄົນຈະມີທ່າອ່ຽງມັກຄົນທີ່ເປັນເພດດຽວກັນ ແຕ່ຄຳພີໄບເບິນບອກໃຫ້ຄລິດສະຕຽນຫຼີກໜີຈາກການປະພຶດທີ່ມັກຄົນເພດດຽວກັນ.”
ຄຳແນະນຳ ແທນທີ່ຈະຕົກເຂົ້າສູ່ການໂຕ້ຖຽງເລື່ອງສາເຫດຂອງຄວາມປາຖະໜາ ຂອງການມັກຄົນເພດດຽວກັນ ໃຫ້ເນັ້ນວ່າຄຳພີໄບເບິນຫ້າມພຶດຕິກຳ ການມັກຄົນເພດດຽວກັນ. ເພື່ອເປັນການສົມທຽບ ເຈົ້າອາດເວົ້າວ່າ: “ເຈົ້າຮູ້ບໍ ຫຼາຍຄົນເວົ້າວ່າການປະພຶດທີ່ຮຸນແຮງມີສາເຫດມາຈາກກຳມະພັນ ແລະຜົນກໍຄືບາງຄົນອາດມີທ່າອ່ຽງຈະມີພຶດຕິກຳທີ່ຮຸນແຮງ. (ສຸພາສິດ 29:22) ຈະວ່າແນວໃດຖ້າເລື່ອງນັ້ນເປັນຄວາມຈິງ? ດັ່ງທີ່ເຈົ້າອາດຮູ້ແລ້ວ ຄຳພີໄບເບິນຕຳໜິການໂມໂຫຮ້າຍ. (ຄຳເພງ 37:8; ເອເຟດ 4:31) ຈະຖືວ່າມາດຕະຖານນັ້ນບໍ່ຍຸຕິທຳຍ້ອນວ່າບາງຄົນມີທ່າອ່ຽງທີ່ຈະເປັນຄົນຮຸນແຮງແບບນັ້ນບໍ?”
“ພະເຈົ້າຈະສັ່ງຜູ້ທີ່ມີຄວາມສົນໃຈໃນເພດດຽວກັນໃຫ້ຫຼີກໜີຈາກການມັກຄົນເພດດຽວກັນໄດ້ແນວໃດ? ນັ້ນຟັງຄືວ່າໂຫດຮ້າຍແທ້.”
“ການຫາເຫດຜົນແບບນັ້ນອາໄສຄວາມເຂົ້າໃຈຜິດໆທີ່ວ່າມະນຸດຈຳເປັນຕ້ອງ ເຮັດຕາມຄວາມປາຖະໜາທາງເພດຂອງຕົນ. ພະຄຳພີໄບເບິນໃຫ້ກຽດມະນຸດໂດຍຮັບຮອງວ່າ ເຂົາເຈົ້າສາມາດ ເລືອກທີ່ຈະບໍ່ເຮັດຕາມຄວາມປາຖະໜາທາງເພດທີ່ບໍ່ເໝາະສົມໄດ້ ຖ້າເຂົາເຈົ້າຕ້ອງການທີ່ຈະເຮັດແບບນັ້ນແທ້ໆ.”—ໂກໂລດ 3:5.
“ເຖິງແມ່ນວ່າເຈົ້າບໍ່ໄດ້ເປັນຄົນທີ່ມັກເພດດຽວກັນ ແຕ່ເຈົ້າຄວນປ່ຽນແປງທັດສະນະໃນເລື່ອງການມັກຄົນເພດດຽວກັນ.”
“ສົມມຸດວ່າຂ້ອຍບໍ່ເຫັນດີກັບການຫຼິ້ນການພະນັນ ແຕ່ເຈົ້າພັດເຫັນດີ. ຈະມີເຫດຜົນບໍທີ່ເຈົ້າຈະຮຽກຮ້ອງໃຫ້ຂ້ອຍປ່ຽນແປງທັດສະນະຍ້ອນວ່າຫຼາຍລ້ານຄົນເລືອກທີ່ຈະຫຼິ້ນການພະນັນ?”
ຂໍໃຫ້ຈື່ໄວ້ວ່າ ຄົນທີ່ມັກເພດດຽວກັນ ລວມທັງຄົນອື່ນສ່ວນຫຼາຍມີມາດຕະຖານສິລະທຳບາງຂໍ້ທີ່ພາໃຫ້ເຂົາເຈົ້າຖືວ່າການກະທຳບາງຢ່າງຜິດ ອາດຈະແມ່ນການສໍ້ໂກງ ຄວາມບໍ່ຍຸຕິທຳ ຫຼືສົງຄາມ. ຄຳພີໄບເບິນກໍຫ້າມການປະພຶດເຫຼົ່ານັ້ນ ແລະຍັງຫ້າມການປະພຶດທາງເພດບາງຢ່າງອີກດ້ວຍ ລວມເຖິງການມັກຄົນເພດດຽວກັນ.—1 ໂກລິນໂທ 6:9, 10.
ຄຳພີໄບເບິນມີເຫດຜົນແລະບໍ່ສົ່ງເສີມການມີອະຄະຕິ. ພະຄຳພີພຽງແຕ່ບອກຜູ້ທີ່ມີຄວາມຮູ້ສຶກມັກຄົນເພດດຽວກັນໃຫ້ເຮັດແບບດຽວກັນກັບຄົນທີ່ມີຄວາມສົນໃຈໃນເພດກົງກັນຂ້າມ ນັ້ນຄື “ຈົ່ງປົບໜີຈາກການຜິດຊາຍຍິງເສຍເຖີ້ນ.”—1 ໂກລິນໂທ 6:18.
ຄວາມຈິງກໍຄືວ່າ ຫຼາຍລ້ານຄົນທີ່ມັກຄົນທີ່ເປັນເພດກົງກັນຂ້າມ ເຊິ່ງຕ້ອງການດຳເນີນຕາມມາດຕະຖານຂອງຄຳພີໄບເບິນກໍຕ້ອງຄວບຄຸມຕົວເອງ ເຖິງແມ່ນວ່າອາດປະເຊີນການລໍ້ໃຈໃດໆກໍຕາມ. ຄົນເຫຼົ່ານີ້ລວມເຖິງຄົນທີ່ເປັນໂສດເຊິ່ງບໍ່ມີໂອກາດທີ່ຈະແຕ່ງດອງ ແລະຫຼາຍຄົນທີ່ແຕ່ງດອງກັບຜູ້ທີ່ມີຄວາມພິການທາງຮ່າງກາຍເຊິ່ງບໍ່ສາມາດໃຫ້ການຕອບສະໜອງທາງເພດໄດ້. ເຂົາເຈົ້າກໍສາມາດມີຊີວິດຢ່າງມີຄວາມສຸກໄດ້ໂດຍບໍ່ໄດ້ຮັບການຕອບສະໜອງຄວາມຕ້ອງການທາງເພດ. ຜູ້ທີ່ມີທ່າອ່ຽງທີ່ຈະມັກຄົນເພດດຽວກັນກໍສາມາດເຮັດໄດ້ແບບດຽວກັນນັ້ນ ຖ້າເຂົາເຈົ້າຕ້ອງການເຮັດໃຫ້ພະເຈົ້າພໍໃຈແທ້ໆ.—ພະບັນຍັດ 30:19.
ສາມາດອ່ານເພີ່ມເຕີມກ່ຽວກັບຫົວເລື່ອງນີ້ໃນບົດທີ 28 ຂອງເຫຼັ້ມທີ 2
ຍິງສາວບາງຄົນເຊື່ອວ່າການມີເພດສຳພັນກັບແຟນຈະເສີມສ້າງສາຍສຳພັນໃຫ້ດີຂຶ້ນ. ມັນບໍ່ເປັນແນວນັ້ນ! ຂໍໃຫ້ພິຈາລະນາເຫດຜົນ.
[ຂໍ້ຄວາມໄຂເງື່ອນ]
a ຄຳວ່າ “ຜິດປະເວນີ” ໃນຄຳພີໄບເບິນບໍ່ໄດ້ໝາຍເຖິງແຕ່ການຮ່ວມເພດກັນເທົ່ານັ້ນ ແຕ່ຍັງໝາຍເຖິງການກະທຳຕ່າງໆເຊັ່ນ ການສະໜອງຄວາມຕ້ອງການທາງເພດໃຫ້ກັນ ຫຼືຮ່ວມເພດທາງປາກ ຫຼືທາງຮູທະວານ.
ຂໍ້ພະຄຳພີຫຼັກ
“ເຫດສັນນີ້ສ່ວນອາການຂອງທ່ານທັງຫຼາຍທີ່ຢູ່ເທິງແຜ່ນດິນໂລກຈົ່ງກະທຳໃຫ້ຕາຍເຖີ້ນ ຄືວ່າການຜິດຊາຍຍິງ ການຂີ້ດຽດ ຄວາມຕັນຫາ ຄວາມຄຶດຢາກໄດ້ອັນຊົ່ວ ແລະຄວາມໂລບທີ່ເປັນການໄຫວ້ຮູບພະ.”—ໂກໂລດ 3:5.
ຄຳແນະນຳ
ໃນຂະນະທີ່ການປະພຶດຂອງບາງຄົນອາດເຮັດໃຫ້ເຈົ້າເສົ້າໃຈ ຂໍໃຫ້ເຈົ້າຫຼີກລ່ຽງການວາງທ່າເປັນຄົນຊອບທຳ. ທີ່ຈິງແລ້ວ ເຂົາເຈົ້າມີອິດສະຫຼະທີ່ຈະເລືອກໃນສິ່ງທີ່ເຂົາເຈົ້າຕ້ອງການທີ່ຈະເຊື່ອ ແບບດຽວກັບຕົວເຈົ້າ.
ເຈົ້າຮູ້ບໍ . . .?
ຄລິດສະຕຽນບາງຄົນໃນສະຕະວັດທຳອິດທີ່ເຄີຍພົວພັນກັບການມັກຄົນເພດດຽວກັນໃນອະດີດ ສາມາດປ່ຽນແປງແນວທາງທີ່ບໍ່ສະອາດຂອງຕົນ ແລະໄດ້ຮັບການ “ຊຳຮະລ້າງ” ໃນສາຍຕາຂອງພະເຈົ້າ.—1 ໂກລິນໂທ 6:9-11.
ແຜນພາກປະຕິບັດ!
ຖ້າບາງຄົນເວົ້າວ່າທັດສະນະຂອງຄຳພີໄບເບິນເລື່ອງການມັກຄົນເພດດຽວກັນເປັນສິ່ງຫຼ້າສະໄໝ ຂ້ອຍຈະເວົ້າວ່າ ․․․․․
ເພື່ອເຮັດໃຫ້ຈະແຈ້ງວ່າຂ້ອຍບໍ່ຍອມຮັບການປະພຶດຂອງຄົນທີ່ມັກຄົນເພດດຽວກັນ ບໍ່ແມ່ນບໍ່ຍອມຮັບຕົວບຸກຄົນ ຂ້ອຍຈະເວົ້າວ່າ ․․․․․
ສິ່ງທີ່ຂ້ອຍຢາກຖາມພໍ່ (ແມ່) ກ່ຽວກັບເລື່ອງນີ້ແມ່ນ ․․․․․
ເຈົ້າຄິດວ່າແນວໃດ?
• ເປັນຫຍັງພະເຈົ້າຈຶ່ງມີສິດທີ່ຈະຕັ້ງກົດທາງດ້ານສິລະທຳໃຫ້ກັບມະນຸດ?
• ເຈົ້າຈະໄດ້ຮັບປະໂຫຍດແນວໃດຈາກການຍຶດໝັ້ນກັບກົດທາງດ້ານສິລະທຳຂອງຄຳພີໄບເບິນ?
[ຈຸດເດັ່ນໜ້າ 170]
“ຜູ້ຊາຍຄົນໜຶ່ງຢູ່ໂຮງຮຽນຄິດວ່າຂ້ອຍບໍ່ດີແທ້ໆທີ່ປະຕິເສດຮູບແບບຊີວິດຂອງລາວ. ແຕ່ເມື່ອຂ້ອຍອະທິບາຍວ່າບໍ່ໄດ້ປະຕິເສດລາວໃນຖານະເປັນບຸກຄົນ ແລະເມື່ອລາວສຳນຶກວ່າມັນບໍ່ແມ່ນພຽງແຕ່ເລື່ອງການມັກຄົນເພດດຽວກັນເທົ່ານັ້ນ ແຕ່ຂ້ອຍບໍ່ເຫັນດີນຳກັບການຜິດສິລະທຳທຸກຮູບແບບ ລາວກໍເລີ່ມມີຄວາມນັບຖືຕໍ່ຂ້ອຍແລະແມ່ນແຕ່ປົກປ້ອງຂ້ອຍເມື່ອຄົນອື່ນໆຍົກປະເດັນຄັດຄ້ານນີ້ຂຶ້ນມາ.”—ນາງ ອໍບຣີ
[ກອບໜ້າ 168]
ຈະວ່າແນວໃດຕໍ່ເລື່ອງການມັກທັງຜູ້ທີ່ເປັນເພດດຽວກັນແລະເພດກົງກັນຂ້າມ?
ເຖິງແມ່ນວ່າມີການພົບເຫັນການມັກຄົນເພດດຽວກັນແລະເພດກົງກັນຂ້າມທັງໃນຜູ້ຊາຍແລະຜູ້ຍິງ ແຕ່ປາກົດວ່າການມັກທັງສອງເພດມີຈຳນວນເພີ່ມຂຶ້ນຫຼາຍໃນບັນດາຍິງສາວ. ສຳລັບບາງຄົນ ເປັນເລື່ອງຂອງຄວາມຢາກຮູ້ຢາກເຫັນ. ນາງລິຊາອາຍຸ 26 ປີເວົ້າວ່າ: “ເມື່ອມີພາບພະຍົນ ລາຍການໂທລະພາບ ແລະເພງທີ່ສົ່ງເສີມໃຫ້ຜູ້ຍິງຈູບຜູ້ຍິງ ໄວຮຸ່ນຈະຢາກລອງເຮັດເບິ່ງ ໂດຍສະເພາະແລ້ວເມື່ອບໍ່ໄດ້ສຳນຶກວ່າມັນເປັນສິ່ງທີ່ຜິດ.”
ສຳລັບຄົນອື່ນໆ ເບິ່ງຄືວ່າເປັນຄວາມດຶງດູດໃຈຢ່າງແທ້ຈິງ. ນາງວິກກີອາຍຸ 13 ປີເວົ້າວ່າ: “ຢູ່ໃນງານລ້ຽງ ຂ້ອຍພົບກັບຍິງສາວສອງຄົນທີ່ມັກທັງເພດດຽວກັນແລະເພດກົງກັນຂ້າມ ແລະຕໍ່ມາຂ້ອຍກໍຮູ້ຈາກໝູ່ວ່າເຂົາເຈົ້າສົນໃຈຂ້ອຍ. ໃນທີ່ສຸດ ຂ້ອຍເລີ່ມສົ່ງຂໍ້ຄວາມທາງໂທລະສັບກັບໜຶ່ງໃນສອງຄົນນັ້ນ ແລະຂ້ອຍກໍເລີ່ມຮູ້ສຶກມັກລາວ.”
ເຈົ້າເຄີຍຮູ້ສຶກແບບດຽວກັບທີ່ວິກກີເຄີຍຮູ້ສຶກບໍ? ຫຼາຍຄົນອາດພຽງແຕ່ພະຍາຍາມກະຕຸ້ນເຈົ້າໃຫ້ຍອມຮັບທ່າອ່ຽງທາງເພດຂອງຕົນເອງແລະໃຫ້ເປີດເຜີຍວ່າເຈົ້າເປັນຄົນທີ່ມັກທັງເພດດຽວກັນແລະເພດກົງກັນຂ້າມ. ແນວໃດກໍຕາມ ເຈົ້າຄວນຮູ້ສຶກວ່າການຮູ້ສຶກມັກເພດດຽວກັນສ່ວນຫຼາຍເປັນຄວາມຮູ້ສຶກຊົ່ວຄາວ. ນັ້ນຄືສິ່ງທີ່ວິກກີໄດ້ປະສົບ. ນາງລິເຊັດອາຍຸ 16 ປີກໍໄດ້ປະສົບແບບດຽວກັນ. ລິເຊັດເວົ້າວ່າ: “ການເວົ້າລົມກັບພໍ່ແມ່ກ່ຽວກັບຄວາມຮູ້ສຶກຂອງຂ້ອຍເຮັດໃຫ້ຂ້ອຍດີຂຶ້ນຫຼາຍ. ນອກຈາກນັ້ນ ຜ່ານການຮຽນວິຊາຊີວະສາດຢູ່ໂຮງຮຽນ ຂ້ອຍຮຽນຮູ້ວ່າຕອນເປັນໄວໜຸ່ມສາວລະດັບຂອງຮອກໂມນສາມາດປ່ຽນແປງຫຼາຍ. ຂ້ອຍເຊື່ອວ່າຖ້າຄົນໜຸ່ມສາວມີຄວາມຮູ້ຫຼາຍຂຶ້ນກ່ຽວກັບຮ່າງກາຍຂອງຕົນເອງ ເຂົາເຈົ້າຈະເຂົ້າໃຈວ່າຄວາມຮູ້ສຶກທີ່ມັກເພດດຽວກັນເປັນຄວາມຮູ້ສຶກຊົ່ວຄາວ ແລະເຂົາເຈົ້າຈະບໍ່ຮູ້ສຶກວ່າຖືກກົດດັນໃຫ້ມັກຄົນເພດດຽວກັນ.”
ເຖິງແມ່ນວ່າຄວາມຮູ້ສຶກຂອງເຈົ້າຝັງຮາກເລິກຫຼາຍກວ່າເປັນຄວາມຮູ້ສຶກຊົ່ວຄາວໃນລະຫວ່າງໄວໜຸ່ມສາວ ຂໍໃຫ້ເຂົ້າໃຈວ່າຄຳພີໄບເບິນຕັ້ງເປົ້າໝາຍທີ່ເຈົ້າສາມາດບັນລຸໄດ້ ນັ້ນຄືເຈົ້າສາມາດເລືອກທີ່ຈະບໍ່ເຮັດຕາມຄວາມປາຖະໜາທີ່ຜິດບໍ່ວ່າຈະເປັນເລື່ອງໃດກໍຕາມ.
[ຮູບພາບໜ້າ 169]
ຄລິດສະຕຽນກ້າສວນກະແສຄວາມຄິດເຫັນຂອງຄົນສ່ວນຫຼາຍ