ບົດທີ 5
ທ່ານຈະສຳຜັດກັບຫຍັງແດ່ຢູ່ທີ່ການປະຊຸມຄລິດສະຕຽນ?
ອາກຊັງຕິນ
ເຊຍຣາເລໂອນ
ແບນຊິກ
ມາເລເຊຍ
ຫຼາຍຄົນເຊົາເຂົ້າຮ່ວມພິທີທາງສາສະໜາເພາະຮູ້ສຶກວ່າບໍ່ໄດ້ຮັບການປອບໂຍນຫຼືຄວາມຊ່ວຍເຫຼືອທີ່ຈະພົບຄຳຕອບສຳລັບຄຳຖາມສຳຄັນທີ່ສຸດໃນຊີວິດ. ຄັນຊັ້ນ ເປັນຫຍັງທ່ານຄວນເຂົ້າຮ່ວມການປະຊຸມຕ່າງ ໆ ທີ່ຈັດໂດຍພະຍານພະເຢໂຫວາ? ທ່ານຈະພົບກັບຫຍັງແດ່ຢູ່ການປະຊຸມ?
ຄວາມຍິນດີທີ່ໄດ້ຢູ່ກັບຄົນທີ່ມີຄວາມຮັກແລະຄວາມຫ່ວງໃຍ. ໃນສະຕະວັດທຳອິດ ມີການຈັດຕັ້ງຄລິດສະຕຽນໃຫ້ເປັນປະຊາຄົມ ແລະເຂົາເຈົ້າໄດ້ຈັດການປະຊຸມຕ່າງ ໆ ເພື່ອນະມັດສະການພະເຈົ້າ ສຶກສາພະຄຳພີ ແລະໜູນໃຈກັນແລະກັນ. (ເຫບເລີ 10:24, 25) ການເຕົ້າໂຮມກັນໃນບັນຍາກາດທີ່ເຕັມໄປດ້ວຍຄວາມຮັກ ເຮັດໃຫ້ເຂົາເຈົ້າຮູ້ສຶກວ່າຕົນເອງຢູ່ກັບເພື່ອນແທ້ ເຊິ່ງກໍຄືອ້າຍເອື້ອຍນ້ອງຄລິດສະຕຽນ. (2 ເທຊະໂລນີກ 1:3; 3 ໂຢຮັນ 14) ພວກເຮົາເຮັດຕາມແບບຢ່າງຂອງຄລິດສະຕຽນໃນສະຕະວັດທຳອິດແລະກໍປະສົບຄວາມຍິນດີທີ່ຄ້າຍ ໆ ກັນ.
ໄດ້ຮັບປະໂຫຍດຈາກການຮຽນຮູ້ວິທີນຳໃຊ້ຫຼັກການໃນຄຳພີໄບເບິນ. ດັ່ງທີ່ເປັນຈິງໃນສະໄໝທີ່ຂຽນຄຳພີໄບເບິນ ສະໄໝນີ້ມີທັງຜູ້ຊາຍ ຜູ້ຍິງ ແລະເດັກນ້ອຍໄດ້ມາເຕົ້າໂຮມກັນ. ຜູ້ສອນທີ່ມີຄຸນວຸທິໄດ້ໃຊ້ຄຳພີໄບເບິນເພື່ອຊ່ວຍເຮົາໃຫ້ຮູ້ວິທີນຳໃຊ້ຫຼັກການໃນຄຳພີໄບເບິນໃນຊີວິດປະຈຳວັນ. (ພະບັນຍັດ 31:12; ເນເຫມີ 8:8) ທຸກຄົນອາດຈະມີສ່ວນຮ່ວມໃນສ່ວນພິຈາລະນາກັບຜູ້ຟັງແລະໃນການຮ້ອງເພງ ເຊິ່ງເປັນໂອກາດທີ່ຈະສະແດງຄວາມຫວັງຂອງເຮົາໃນຖານະເປັນຄລິດສະຕຽນ.—ເຫບເລີ 10:23
ໄດ້ຮັບພະພອນເພື່ອເຮັດໃຫ້ຄວາມເຊື່ອໃນພະເຈົ້າເຂັ້ມແຂງຂຶ້ນ. ອັກຄະສາວົກໂປໂລບອກກັບປະຊາຄົມໜຶ່ງໃນສະໄໝຂອງລາວວ່າ: “ເຮົາປາຖະໜາຈະເຫັນພວກທ່ານ . . . ຄືວ່າເພື່ອພວກເຮົາຈະມີຄວາມເລົ້າໂລມດ້ວຍກັນໃນທ່າມກາງທ່ານທັງຫຼາຍ ເພາະເຫດຄວາມເຊື່ອທີ່ຢູ່ໃນພວກທ່ານແລະຢູ່ໃນເຮົາດ້ວຍ.” (ໂລມ 1:11, 12) ຢູ່ການປະຊຸມ ການພົບປະເປັນປະຈຳກັບເພື່ອນຮ່ວມຄວາມເຊື່ອຈະເສີມສ້າງຄວາມເຊື່ອຂອງເຮົາໃຫ້ເຂັ້ມແຂງ ແລະເສີມຄວາມຕັ້ງໃຈຂອງເຮົາທີ່ຈະດຳເນີນຊີວິດໃຫ້ສອດຄ່ອງກັບຫຼັກການໃນຄຳພີໄບເບິນ.
ເປັນຫຍັງບໍ່ຮັບເອົາການເຊີນນີ້ເພື່ອເຂົ້າຮ່ວມການປະຊຸມຂອງພວກເຮົາໃນຄັ້ງຕໍ່ໄປ ແລະສຳຜັດກັບສິ່ງຕ່າງ ໆ ເຫຼົ່ານີ້ດ້ວຍຕົວເອງ? ທ່ານຈະໄດ້ຮັບການຕ້ອນຮັບຢ່າງອົບອຸ່ນ. ການປະຊຸມທຸກລາຍການແມ່ນບໍ່ໄດ້ເສຍຄ່າ ແລະບໍ່ເຄີຍມີການແຜ່ເງິນ.
ການປະຊຸມປະຈຳປະຊາຄົມຂອງພວກເຮົາເຮັດຕາມຕົວຢ່າງອັນໃດ?
ໂດຍການເຂົ້າຮ່ວມການປະຊຸມຕ່າງ ໆ ເຮົາເອງຈະໄດ້ຮັບປະໂຫຍດແນວໃດ?