ບົດທີ 6
ເປັນຫຍັງການຄົບຫາກັບເພື່ອນຄລິດສະຕຽນຈຶ່ງເປັນປະໂຫຍດຕໍ່ເຮົາ?
ມາດາກາສະກາ
ນອກແວ
ລີບັງ
ອີຕາລີ
ເຖິງແມ່ນວ່າເຮົາຕ້ອງຍ່າງເປັນໄລຍະທາງທີ່ໄກ ຜ່ານປ່າຕຶບດົງໜາຫຼືຝ່າຟັນສະພາບອາກາດທີ່ຮ້າຍແຮງ ພວກເຮົາກໍຍັງເຂົ້າຮ່ວມການປະຊຸມຄລິດສະຕຽນເປັນປະຈຳ. ເຖິງແມ່ນວ່າມີສິ່ງທ້າທາຍຕ່າງ ໆ ໃນຊີວິດແລະຮູ້ສຶກອິດເມື່ອຍຫຼັງຈາກທີ່ເຮັດວຽກໜັກມາໝົດມື້ ເປັນຫຍັງພະຍານພະເຢໂຫວາຈຶ່ງອອກຄວາມພະຍາຍາມເຊັ່ນນັ້ນເພື່ອຄົບຫາກັບເພື່ອນຮ່ວມຄວາມເຊື່ອ?
ການຄົບຫາດີຕໍ່ສະຫວັດດີພາບຂອງເຮົາ. ໂປໂລຂຽນວ່າ ໃຫ້ “ຄຶດເຖິງກັນແລະກັນ” ນີ້ເປັນການເວົ້າເຖິງຄົນທີ່ເຮົາຄົບຫານຳໃນປະຊາຄົມ. (ເຫບເລີ 10:24) ຖ້ອຍຄຳນີ້ໝາຍຄວາມວ່າໃຫ້ຮູ້ຈັກເຊິ່ງກັນແລະກັນ. ດັ່ງນັ້ນ ຖ້ອຍຄຳຂອງທ່ານອັກຄະສາວົກກະຕຸ້ນໃຫ້ເຮົາທີ່ຈະຄຳນຶງເຖິງຄົນອື່ນ. ໂດຍການຮູ້ຈັກກັບສະມາຊິກຄົນອື່ນຂອງປະຊາຄົມ ພວກເຮົາຈະເຫັນວ່າເຂົາເຈົ້າບາງຄົນເອົາຊະນະສິ່ງທ້າທາຍຕ່າງ ໆ ຄ້າຍຄືກັບທີ່ເຮົາມີໄດ້ຢ່າງປະສົບຜົນສຳເລັດ ແລະເຂົາເຈົ້າສາມາດຊ່ວຍເຮົາໃຫ້ປະສົບຜົນສຳເລັດແບບດຽວກັນນັ້ນ.
ການຄົບຫາເສີມສ້າງມິດຕະພາບທີ່ແໜ້ນແຟ້ນ. ຢູ່ທີ່ການປະຊຸມ ພວກເຮົາເຕົ້າໂຮມກັນບໍ່ແມ່ນພຽງແຕ່ໃນນາມຄົນທີ່ຮູ້ຈັກກັນເທົ່ານັ້ນ ແຕ່ເປັນແບບໝູ່ເພື່ອນທີ່ຮັກແພງກັນ. ໃນໂອກາດອື່ນ ໆ ພວກເຮົາໃຊ້ເວລານຳກັນໃນການພັກຜ່ອນຢ່ອນໃຈທີ່ດີງາມ. ການຄົບຫາເຊັ່ນນັ້ນມີຜົນດີແນວໃດ? ສ້າງໃຫ້ເຮົາຮູ້ຄຸນຄ່າກັນແລະກັນຫຼາຍຂຶ້ນ ແລະນັ້ນເສີມສ້າງສາຍສຳພັນແຫ່ງຄວາມຮັກຂອງພວກເຮົາ. ເມື່ອເພື່ອນຂອງເຮົາກຳລັງປະເຊີນກັບບັນຫາ ເຮົາກໍພ້ອມທີ່ຈະຊ່ວຍເຫຼືອເຂົາເຈົ້າເພາະໄດ້ມີການສ້າງມິດຕະພາບທີ່ແໜ້ນແຟ້ນໄວ້ແລ້ວ. (ສຸພາສິດ 17:17) ໂດຍການຄົບຫາກັບສະມາຊິກທຸກຄົນໃນປະຊາຄົມ ເຮົາກໍສະແດງໃຫ້ເຫັນວ່າເຮົາມີ ‘ຄວາມຫ່ວງໃຍແບບດຽວກັນນັ້ນຕໍ່ກັນແລະກັນ.’—1 ໂກລິນໂທ 12:25, 26
ເຮົາຂໍສະເໜີໃຫ້ທ່ານຊອກໝູ່ຜູ້ທີ່ກຳລັງເຮັດຕາມໃຈປະສົງຂອງພະເຈົ້າ. ທ່ານຈະພົບໝູ່ເຊັ່ນນັ້ນໃນທ່າມກາງພະຍານພະເຢໂຫວາ. ຂໍຢ່າຍອມໃຫ້ສິ່ງໃດກໍຕາມຖ່ວງດຶງທ່ານໄວ້ຈາກການຄົບຫາກັບພວກເຮົາ.
ເປັນຫຍັງການຄົບຫາກັນຢູ່ການປະຊຸມຕ່າງ ໆ ຈຶ່ງເປັນປະໂຫຍດຕໍ່ເຮົາ?
ເມື່ອໃດທີ່ທ່ານຢາກຮູ້ຈັກກັບປະຊາຄົມຂອງພວກເຮົາ?