ສິ່ງທີ່ເຮົາຮຽນຈາກພະເຍຊູ
ເລື່ອງຊີວິດຄອບຄົວ
ເພື່ອເຮັດໃຫ້ຄອບຄົວມີຄວາມສຸກ ຄວນຖືວ່າການແຕ່ງດອງເປັນເລື່ອງແບບໃດ?
ການແຕ່ງດອງເປັນສາຍສຳພັນທີ່ສັກສິດ. ເມື່ອມີຄົນຖາມພະເຍຊູວ່າອັນໃດຄືເຫດຜົນທີ່ຈະຢ່າຮ້າງກັນ ພະອົງຕອບວ່າ: “ທ່ານທັງຫຼາຍບໍ່ໄດ້ອ່ານຫຼືວ່າພະເຈົ້າຜູ້ໄດ້ສ້າງມະນຸດແຕ່ຕົ້ນເດີມໄດ້ສ້າງເຂົາເປັນຊາຍເປັນຍິງ ແລະພະອົງໄດ້ກ່າວວ່າ ‘ເພາະເຫດນັ້ນຜູ້ຊາຍຈະລາພໍ່ແມ່ໄປຕິດພັນຢູ່ກັບເມຍ ແລະເຂົາທັງສອງຈະເປັນເນື້ອອັນດຽວກັນ’? ຢ່າງນັ້ນເຂົາບໍ່ເປັນ 2 ຕໍ່ໄປແຕ່ວ່າເປັນເນື້ອອັນດຽວກັນ. ເຫດສັນນີ້ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກແຕກຈາກກັນເຖີ້ນ. . . . ຄົນທຸກຄົນທີ່ຈະປະເມຍແຫ່ງຕົນບໍ່ໃຊ່ເພາະເຫດຜິດກັບຊາຍຜູ້ອື່ນແລະຈະເອົາເມຍໃໝ່ ຜູ້ນັ້ນກະທຳຜິດຫຼິ້ນຊູ້.” (ມັດທາຍ 19:4-6, 9) ເມື່ອຜົວແລະເມຍປະຕິບັດຕາມຄຳແນະນຳນີ້ແລະສັດຊື່ຕໍ່ກັນແລະກັນ ທຸກຄົນໃນຄອບຄົວກໍຮູ້ສຶກໝັ້ນຄົງແລະມີຄວາມສຸກ.
ເປັນຫຍັງການມີຄວາມຮັກຕໍ່ພະເຢໂຫວາຈຶ່ງເຮັດໃຫ້ຄອບຄົວມີຄວາມສຸກ?
ພະເຍຊູກ່າວວ່າ: “‘ເຈົ້າຈົ່ງຮັກພະເຢໂຫວາຜູ້ເປັນພະເຈົ້າຂອງເຈົ້າ ເຈົ້າຈົ່ງຮັກດ້ວຍສຸດໃຈແລະດ້ວຍສຸດຈິດແລະດ້ວຍສຸດຄວາມຄຶດຂອງເຈົ້າ.’ ຂໍ້ນີ້ເປັນຂໍ້ອັນຕົ້ນແລະຂໍ້ອັນໃຫຍ່.” ພະບັນຍັດຂໍ້ທີສອງເຊິ່ງສຳຄັນທີ່ສຸດແມ່ນຫຍັງ? ພະເຍຊູກ່າວວ່າ: “ເຈົ້າຈົ່ງຮັກເພື່ອນບ້ານ [ລວມເຖິງຜູ້ທີ່ຢູ່ໃກ້ຊິດເຮົາທີ່ສຸດ ນັ້ນຄືຄອບຄົວ] ເໝືອນຮັກຕົວເອງ.” (ມັດທາຍ 22:37-39) ດັ່ງນັ້ນ ເຄັດລັບທີ່ພາໃຫ້ຄອບຄົວມີຄວາມສຸກແມ່ນການມີສາຍສຳພັນທີ່ດີກັບພະເຢໂຫວາ ເພາະວ່າຄວາມຮັກທີ່ມີຕໍ່ພະອົງຈະກະຕຸ້ນໃຫ້ເຮົາຮັກກັນແລະກັນ.
ຜົວຫຼືເມຍຈະເຮັດໃຫ້ອີກຝ່າຍໜຶ່ງມີຄວາມສຸກໄດ້ແນວໃດ?
ຖ້າຜູ້ເປັນຜົວເຮັດຕາມຕົວຢ່າງຂອງພະເຍຊູ ລາວຈະເຮັດໃຫ້ເມຍມີຄວາມສຸກ. ພະອົງມີຄວາມຮັກແບບເສຍສະລະຕົວເອງຕໍ່ປະຊາຄົມ. (ເອເຟດ 5:25) ພະເຍຊູກ່າວວ່າ: “ເໝືອນດັ່ງບຸດມະນຸດໄດ້ມາບໍ່ໃຊ່ຈະເປັນທີ່ບົວລະບັດ ແຕ່ວ່າເພື່ອຈະບົວລະບັດ.” (ມັດທາຍ 20:28) ພະເຍຊູບໍ່ເຄີຍໃຊ້ສິດອຳນາດແບບຜະເດັດການຫຼືເຄັ່ງຄັດເກີນໄປກັບຜູ້ທີ່ຢູ່ພາຍໃຕ້ການດູແລຂອງພະອົງ ແຕ່ເຮັດໃຫ້ເຂົາເຈົ້າຮູ້ສຶກສົດຊື່ນໃຈ. (ມັດທາຍ 11:28) ສະນັ້ນ ຜູ້ເປັນຜົວຄວນໃຊ້ສິດອຳນາດແບບທີ່ກະລຸນາເພື່ອປະໂຫຍດຂອງຄອບຄົວ.
ຜູ້ເປັນເມຍກໍໄດ້ຮັບປະໂຫຍດຈາກຕົວຢ່າງຂອງພະເຍຊູເຊັ່ນກັນ. ຄຳພີໄບເບິນກ່າວວ່າ “ຫົວຂອງພະຄລິດເປັນພະເຈົ້າ.” ຄຳພີໄບເບິນຍັງກ່າວອີກວ່າ “ຜູ້ຊາຍເປັນຫົວຂອງຜູ້ຍິງ.” (1 ໂກລິນໂທ 11:3) ພະເຍຊູບໍ່ໄດ້ຄຶດວ່າເສຍສັກສີທີ່ຈະຢູ່ໃຕ້ສິດອຳນາດຂອງພະເຢໂຫວາ. ພະອົງນັບຖືພໍ່ຫຼາຍ ແລະກ່າວວ່າ “ເຮົາກະທຳການທີ່ເປັນຊອບໃຈແກ່ພະເຈົ້າຢູ່ເລື້ອຍ.” (ໂຢຮັນ 8:29) ເມຍທີ່ຢູ່ໃຕ້ສິດອຳນາດຂອງຜົວເນື່ອງຈາກມີຄວາມຮັກແລະຄວາມນັບຖືຕໍ່ພະເຢໂຫວາກໍປະກອບສ່ວນໄດ້ຫຼາຍໃນການເຮັດໃຫ້ຄອບຄົວມີຄວາມສຸກ.
ພໍ່ແມ່ຈະຮຽນຮູ້ຫຍັງຈາກວິທີທີ່ພະເຍຊູປະຕິບັດກັບເດັກນ້ອຍ?
ພະເຍຊູໃຊ້ເວລາກັບເດັກນ້ອຍແລະສົນໃຈຄວາມຮູ້ສຶກຂອງເຂົາເຈົ້າ. ຄຳພີໄບເບິນກ່າວວ່າ: “ພະເຍຊູໄດ້ເອີ້ນເຂົາມາວ່າ ‘ຈົ່ງໃຫ້ໝູ່ເດັກນ້ອຍມາຫາເຮົາເຖີ້ນ.’” (ລືກາ 18:15, 16) ໃນໂອກາດໜຶ່ງ ມີຄົນຕຳໜິເດັກນ້ອຍທີ່ຮ້ອງສັນລະເສີນພະເຍຊູດ້ວຍຄວາມເຊື່ອ. ແຕ່ພະເຍຊູພັດຍ້ອງພວກເດັກນ້ອຍ ແລະເວົ້າຕອບຄືນວ່າ: “ທ່ານທັງຫຼາຍບໍ່ໄດ້ອ່ານສັກເທື່ອຫຼືຂໍ້ທີ່ວ່າ ‘ພະອົງໄດ້ຕັ້ງຄວາມສັນລະເສີນແຫ່ງຕົນໄວ້ດ້ວຍປາກຂອງພວກເດັກນ້ອຍ’?”—ມັດທາຍ 21:15, 16
ເດັກນ້ອຍຈະຮຽນຮູ້ຫຍັງຈາກພະເຍຊູ?
ພະເຍຊູວາງຕົວຢ່າງທີ່ດີເລີດໃຫ້ແກ່ເດັກນ້ອຍໃນເລື່ອງການສົນໃຈຮຽນຮູ້ກ່ຽວກັບພະເຢໂຫວາ. ຕອນອາຍຸ 12 ປີ ພະເຍຊູ “ນັ່ງຢູ່ໃນວິຫານທ່າມກາງພວກນາຍຄູສອນ ພວມຟັງແລະສືບຖາມເຂົາ.” ຜົນເປັນແນວໃດ? “ຄົນທັງປວງທີ່ໄດ້ຍິນພະອົງໄດ້ປະຫຼາດໃຈດ້ວຍສະຕິປັນຍາແລະດ້ວຍຄຳຕອບຂອງພະອົງ.” (ລືກາ 2:42, 46, 47) ຄວາມຮູ້ທີ່ພະເຍຊູມີບໍ່ໄດ້ເຮັດໃຫ້ພະອົງຍິ່ງຈອງຫອງ ແຕ່ເຮັດໃຫ້ພະອົງນັບຖືພໍ່ແມ່. ຄຳພີໄບເບິນກ່າວວ່າ: “ພະອົງ . . . ໄດ້ຢູ່ໃຕ້ບັງຄັບເຂົາ [ຕໍ່ໄປ].”—ລືກາ 2:51
ສຳລັບລາຍລະອຽດເພີ່ມເຕີມ ຂໍໃຫ້ເບິ່ງບົດທີ 14 ຂອງປຶ້ມຄຳພີໄບເບິນສອນແນວໃດແທ້ໆ?a
[ຂໍ້ຄວາມໄຂເງື່ອນ]
a ຈັດພິມໂດຍພະຍານພະເຢໂຫວາ