ບົດທີ 71
ພະເຢໂຫວາປົກປ້ອງພະເຢຊູ
ມີຄົນໃນປະເທດໜຶ່ງທີ່ຢູ່ທາງທິດຕາເວັນອອກຂອງອິດສະຣາເອນເຊື່ອວ່າດວງດາວສາມາດນຳທາງເຂົາເຈົ້າໄດ້. ຄືນມື້ໜຶ່ງ ເມື່ອຄົນກຸ່ມໜຶ່ງຈາກທາງທິດຕາເວັນອອກເຫັນບາງຢ່າງທີ່ຄ້າຍຄືກັບດາວສ່ອງແສງແຈ້ງເຄື່ອນທີ່ຢູ່ເທິງຟ້າ ເຂົາເຈົ້າຈຶ່ງນຳດາວດວງນັ້ນໄປ. ແລ້ວ “ດາວ” ດວງນັ້ນກໍພາເຂົາເຈົ້າໄປເມືອງເຢຣູຊາເລັມ. ເຂົາເຈົ້າເລີ່ມຖາມຄົນຢູ່ຫັ້ນວ່າ: ‘ເດັກນ້ອຍທີ່ຈະເປັນກະສັດຂອງຄົນຢິວຢູ່ໃສ? ພວກເຮົາມາສະແດງຄວາມນັບຖືລາວ.’
ເມື່ອກະສັດເຮໂຣດທີ່ປົກຄອງເມືອງເຢຣູຊາເລັມໄດ້ຍິນເລື່ອງກະສັດອົງໃໝ່ ລາວກໍຮູ້ສຶກກັງວົນຫຼາຍ. ລາວຖາມພວກຫົວໜ້າປະໂລຫິດວ່າ: ‘ກະສັດອົງນີ້ຈະມາເກີດຢູ່ໃສ.’ ເຂົາເຈົ້າຕອບວ່າ: ‘ພວກຜູ້ພະຍາກອນບອກໄວ້ວ່າລາວຈະມາເກີດຢູ່ເມືອງເບັດເລເຮັມ.’ ເຮໂຣດຈຶ່ງເອີ້ນຄົນທີ່ມາຈາກທາງທິດຕາເວັນອອກໃຫ້ມາຫາແລະສັ່ງເຂົາເຈົ້າວ່າ: ‘ໃຫ້ໄປຊອກຫາເດັກນ້ອຍຄົນນັ້ນຢູ່ເມືອງເບັດເລເຮັມ. ເມື່ອເຫັນແລ້ວໃຫ້ກັບມາບອກ ຂ້ອຍກໍຈະໄປສະແດງຄວາມນັບຖືລາວຄືກັນ.’ ແຕ່ເຮໂຣດເວົ້າຕົວະ.
“ດາວ” ດວງນັ້ນເລີ່ມເຄື່ອນທີ່ອີກເທື່ອໜຶ່ງ. ມັນພາເຂົາເຈົ້າໄປເມືອງເບັດເລເຮັມແລະຢຸດຢູ່ເຮືອນຫຼັງໜຶ່ງ. ເມື່ອເຂົາເຈົ້າເຂົ້າໄປໃນເຮືອນຫຼັງນັ້ນ ເຂົາເຈົ້າກໍເຈິມາຣິອາແລະພະເຢຊູ. ເຂົາເຈົ້າໝູບລົງສະແດງຄວາມນັບຖືພະເຢຊູ ແລ້ວກໍເອົາຄຳ ກຳຍານ ແລະມົດຍອບໃຫ້ລາວເປັນຂອງຂວັນ. ພະເຢໂຫວາໄດ້ສົ່ງຄົນກຸ່ມນີ້ມາຫາພະເຢຊູບໍ? ບໍ່.
ໃນຄືນມື້ນັ້ນ ພະເຢໂຫວາມາບອກໂຢເຊັບທາງຄວາມຝັນວ່າ: ‘ເຮໂຣດຢາກຂ້າລູກຂອງເຈົ້າ. ໃຫ້ເຈົ້າພາລູກກັບເມຍໜີໄປເອຢິບແລະຢູ່ຫັ້ນຈົນກວ່າເຮົາຈະບອກໃຫ້ກັບມາ.’ ແລ້ວໂຢເຊັບກໍພາລູກກັບເມຍໜີໄປເອຢິບທັນທີ.
ພະເຢໂຫວາບອກຄົນທີ່ມາຈາກທາງທິດຕາເວັນອອກວ່າບໍ່ໃຫ້ກັບໄປຫາເຮໂຣດ. ເມື່ອເຮໂຣດຮູ້ວ່າເຂົາເຈົ້າບໍ່ກັບມາ ລາວກໍໃຈຮ້າຍຫຼາຍ. ເຮໂຣດບໍ່ຮູ້ວ່າຈະຊອກຫາພະເຢຊູຢູ່ໃສ ລາວກໍເລີຍສັ່ງໃຫ້ຂ້າເດັກນ້ອຍຜູ້ຊາຍທຸກຄົນໃນເມືອງເບັດເລເຮັມທີ່ອາຍຸລຸ້ນດຽວກັບພະເຢຊູ. ແຕ່ພະເຢຊູປອດໄພ ຍ້ອນເພິ່ນຢູ່ໃນເອຢິບແລ້ວ.
ເມື່ອເຮໂຣດຕາຍ ພະເຢໂຫວາບອກໂຢເຊັບວ່າ: ‘ຕອນນີ້ປອດໄພແລ້ວ ໃຫ້ເຈົ້າພາຄອບຄົວກັບມາ.’ ໂຢເຊັບ ມາຣິອາ ແລະພະເຢຊູຈຶ່ງກັບໄປອິດສະຣາເອນແລະໄປຢູ່ເມືອງນາຊາເຣັດ.
“ຄຳເວົ້າທີ່ອອກຈາກປາກຂອງເຮົາ . . . ເຮົາເວົ້າໄວ້ແນວໃດ ມັນກໍຈະເປັນໄປຕາມນັ້ນ.”—ເອຊາຢາ 55:11