ບົດທີ 103
“ຂໍໃຫ້ພະອົງເລີ່ມປົກຄອງພວກເຮົາ”
ພະເຢໂຫວາສັນຍາວ່າ: ‘ສຽງຮ້ອງໄຫ້ເສຍໃຈ ຄວາມເຈັບປວດ ຄວາມເຈັບປ່ວຍ ແລະຄວາມຕາຍຈະບໍ່ມີອີກຕໍ່ໄປ. ເຮົາຈະເຊັດນ້ຳຕາທຸກຢົດຈາກຕາຂອງເຂົາເຈົ້າ ແລະຈະບໍ່ມີໃຜຈື່ສິ່ງທີ່ບໍ່ດີທີ່ຜ່ານມາອີກເລີຍ.’
ຕອນທຳອິດ ພະເຢໂຫວາໃຫ້ອາດາມກັບເອວາຢູ່ໃນສວນເອເດັນຢ່າງປອດໄພແລະມີຄວາມສຸກ. ເຂົາເຈົ້າຕ້ອງນະມັດສະການພະເຈົ້າຜູ້ເປັນພໍ່ໃນສະຫວັນແລະມີລູກຫຼານຈົນເຕັມໂລກ. ເຖິງວ່າອາດາມກັບເອວາບໍ່ເຊື່ອຟັງພະເຢໂຫວາ ແຕ່ຄວາມຕ້ອງການຂອງເພິ່ນກໍບໍ່ເຄີຍປ່ຽນ. ໃນປຶ້ມຫົວນີ້ເຮົາໄດ້ເຫັນແລ້ວວ່າພະເຈົ້າຈະເຮັດໃຫ້ຄຳສັນຍາທັງໝົດຂອງເພິ່ນເກີດຂຶ້ນແທ້. ການປົກຄອງຂອງພະເຢໂຫວາຈະເຮັດໃຫ້ມີສິ່ງດີໆຫຼາຍຢ່າງເກີດຂຶ້ນໃນໂລກຄືກັບທີ່ເພິ່ນສັນຍາໄວ້ກັບອັບຣາຮາມ.
ອີກບໍ່ດົນຊາຕານ ພວກປີສາດ ແລະຄົນຊົ່ວຈະບໍ່ມີອີກແລ້ວ. ມະນຸດທຸກຄົນໃນໂລກຈະນະມັດສະການພະເຢໂຫວາ. ເຮົາຈະບໍ່ເຈັບບໍ່ປ່ວຍແລະບໍ່ຕາຍ. ເມື່ອເຮົາຕື່ນນອນມາຕອນເຊົ້າ ເຮົາຈະສົດຊື່ນ ມີເຫື່ອມີແຮງ ແລະມີຄວາມສຸກກັບຊີວິດ. ໂລກຈະກາຍເປັນສວນອຸທິຍານ. ທຸກຄົນຈະໄດ້ກິນອາຫານດີໆ ແລະມີບ້ານທີ່ປອດໄພ. ໃນໂລກຈະມີແຕ່ຄົນດີມີເມດຕາ ບໍ່ມີຄົນຊົ່ວ ບໍ່ມີຄົນຮຸນແຮງ ສັດປ່າຈະບໍ່ຢ້ານເຮົາ ແລະເຮົາກໍຈະບໍ່ຢ້ານພວກມັນ.
ພວກເຮົາຄືຊິຕື່ນເຕັ້ນຫຼາຍແທ້ໆຕອນທີ່ພະເຢໂຫວາເລີ່ມປຸກຄົນຕາຍໃຫ້ຟື້ນຄືນມາມີຊີວິດອີກ. ເຮົາຈະໄດ້ຕ້ອນຮັບຄົນໃນສະໄໝບູຮານທີ່ຕາຍໄປແລ້ວ ເຊັ່ນ: ອາເບັນ ໂນອາ ອັບຣາຮາມ ຊາຣາ ໂມເຊ ຣຸດ ເອັດສະເທີ ແລະດາວິດ. ເຂົາເຈົ້າຈະຊ່ວຍເຮົາເຮັດໃຫ້ໂລກກາຍເປັນສວນອຸທິຍານ. ເຮົາຈະມີວຽກທີ່ດີແລະບໍ່ໜ້າເບື່ອໃຫ້ເຮັດຕະຫຼອດ.
ພະເຢໂຫວາຢາກໃຫ້ເຈົ້າໄດ້ຢູ່ໃນສວນອຸທິຍານ. ຕອນນັ້ນ ເຈົ້າຈະໄດ້ຮຽນຮູ້ເລື່ອງໃໝ່ໆກ່ຽວກັບເພິ່ນອີກຫຼາຍຢ່າງ. ຂໍໃຫ້ເຮົາເຂົ້າມາໃກ້ຊິດກັບພະເຢໂຫວາຫຼາຍຂຶ້ນເລື້ອຍໆທັງໃນຕອນນີ້ແລະຕະຫຼອດໄປ!
“ພະເຢໂຫວາພະເຈົ້າຂອງພວກເຮົາ ພະອົງສົມຄວນໄດ້ຮັບການຍ້ອງຍໍສັນລະເສີນ ຄວາມນັບຖື ແລະອຳນາດຍ້ອນພະອົງໄດ້ສ້າງທຸກສິ່ງ.”—ພະນິມິດ 4:11