ບົດທີ 29

ຕາຍແລ້ວເປັນແນວໃດ?

ສະບັບພິມ

ເມື່ອຄົນທີ່ເຈົ້າຮັກຕາຍຈາກໄປ ເຈົ້າຄືຊິເສຍໃຈແລະເຈັບປວດຫຼາຍ ແລະອາດຄິດວ່າ ‘ເມື່ອຄົນເຮົາຕາຍໄປແລ້ວຈະເປັນແນວໃດ? ເຮົາຈະມີວັນໄດ້ເຈິກັບຄົນທີ່ເຮົາຮັກທີ່ຕາຍໄປແລ້ວບໍ?’ ໃນບົດນີ້ແລະບົດຕໍ່ໄປ ເຮົາຈະໄດ້ຄຳຕອບທີ່ໃຫ້ກຳລັງໃຈຈາກຄຳພີໄບເບິນ.

1. ຕາຍແລ້ວເປັນແນວໃດ?

ພະເຢຊູປຽບທຽບຄວາມຕາຍວ່າເປັນຄືກັບການນອນຫຼັບສະໜິດ. ຄົນທີ່ຫຼັບສະໜິດຈະບໍ່ຮູ້ວ່າມີຫຍັງເກີດຂຶ້ນອ້ອມໂຕລາວ. ແລ້ວຄວາມຕາຍເປັນຄືກັບການນອນຫຼັບແນວໃດ? ຫຼັງຈາກທີ່ຄົນໜຶ່ງຕາຍ ລາວຈະບໍ່ຮູ້ສຶກເຈັບປວດອີກຕໍ່ໄປ ແລະເຖິງວ່າຕອນທີ່ລາວມີຊີວິດຢູ່ ລາວຈະຮັກຄອບຄົວແລະສະໜິດກັບໝູ່ຄູ່ຫຼາຍສ່ຳໃດ ແຕ່ເມື່ອລາວຕາຍ ລາວຈະບໍ່ສາມາດຄິດຮອດໃຜໄດ້ອີກແລ້ວ. ຄຳພີໄບເບິນບອກວ່າ “ຄົນຕາຍແລ້ວບໍ່ຮູ້ຫຍັງເລີຍ.”—ອ່ານປັນຍາຈານ 9:5

2. ເຮົາໄດ້ຮັບປະໂຫຍດຫຍັງເມື່ອຮູ້ຄວາມຈິງເລື່ອງຄວາມຕາຍ?

ຫຼາຍຄົນຢ້ານຄວາມຕາຍແລະກໍຢ້ານຄົນທີ່ຕາຍໄປແລ້ວນຳ! ແຕ່ເຈົ້າຈະບໍ່ຮູ້ສຶກຢ້ານຖ້າເຈົ້າຮູ້ວ່າຄຳພີໄບເບິນບອກຫຍັງກ່ຽວກັບຄວາມຕາຍ. ພະເຢຊູບອກວ່າ: “ຄວາມຈິງຈະເຮັດໃຫ້ພວກເຈົ້າເປັນອິດສະຫຼະ.” (ໂຢຮັນ 8:32) ບາງສາສະໜາສອນວ່າຫຼັງຈາກທີ່ຄົນເຮົາຕາຍຈະມີວິນຍານທີ່ຍັງຢູ່ຕໍ່ໄປ ແຕ່ຄຳພີໄບເບິນບໍ່ໄດ້ສອນແນວນັ້ນ. ຄົນທີ່ຕາຍໄປແລ້ວບໍ່ໄດ້ທຸກທໍລະມານອີກຕໍ່ໄປ. ເຂົາເຈົ້າບໍ່ຮູ້ຫຍັງເລີຍແລະເຮັດຫຍັງກໍບໍ່ໄດ້ອີກແລ້ວ. ດັ່ງນັ້ນ ເຂົາເຈົ້າຈຶ່ງທຳຮ້າຍເຮົາບໍ່ໄດ້ ແລະເຮົາກໍບໍ່ຕ້ອງໄປຂາບໄຫວ້ບູຊາຄົນຕາຍຫຼືເຮັດບຸນໃຫ້ເຂົາເຈົ້າ.

ບາງຄົນບອກວ່າເຂົາເຈົ້າສາມາດຕິດຕໍ່ລົມກັບຄົນຕາຍໄດ້. ແຕ່ທີ່ຈິງ “ຄົນຕາຍແລ້ວບໍ່ຮູ້ຫຍັງເລີຍ.” ດັ່ງນັ້ນ ຄົນທີ່ຄິດວ່າເຂົາເຈົ້າກຳລັງລົມກັບຄົນຕາຍ ແທ້ໆແລ້ວເຂົາເຈົ້າກໍກຳລັງລົມກັບພວກປີສາດທີ່ຮຽນແບບສຽງຂອງຄົນທີ່ຕາຍໄປແລ້ວ. ການທີ່ເຮົາຮູ້ເລື່ອງນີ້ຊ່ວຍປົກປ້ອງເຮົາຈາກພວກປີສາດ. ພະເຢໂຫວາເຕືອນເຮົາວ່າຢ່າພະຍາຍາມຕິດຕໍ່ກັບຄົນຕາຍເພາະເພິ່ນຮູ້ວ່ານັ້ນເປັນການຕິດຕໍ່ກັບພວກປີສາດ ແລະເຮົາກໍອາດຈະຖືກກໍ່ກວນຫຼືທຳຮ້າຍໄດ້.—ອ່ານພະບັນຍັດ 18:10-12

ຮຽນຮູ້ຫຼາຍຂຶ້ນ

ເບິ່ງວ່າຄຳພີໄບເບິນບອກຫຍັງອີກກ່ຽວກັບຄວາມຕາຍ ແລະເຮົາຈະໄດ້ຮຽນສິ່ງທີ່ເຮັດໃຫ້ໝັ້ນໃຈວ່າພະເຢໂຫວາເປັນພະເຈົ້າທີ່ຮັກເຮົາແລະບໍ່ທໍລະມານຄົນທີ່ຕາຍໄປແລ້ວ.

ຜູ້ຊາຍຄົນໜຶ່ງກັບລູກຂອງລາວສອງຄົນນັ່ງຢູ່ໃນງານສົບຂອງເມຍລາວ. ໝູ່ເພື່ອນແລະຄອບຄົວພາກັນມາປອບໃຈແລະໃຫ້ກຳລັງໃຈເຂົາເຈົ້າ.

3. ເກີດຫຍັງຂຶ້ນເມື່ອຄົນເຮົາຕາຍ?

ຜູ້ຄົນທົ່ວໂລກມີຄວາມເຊື່ອທີ່ແຕກຕ່າງກັນກ່ຽວກັບຄວາມຕາຍ.ແຕ່ເປັນໄປບໍ່ໄດ້ທີ່ທຸກເລື່ອງທີ່ຜູ້ຄົນເຊື່ອຈະເປັນເລື່ອງຈິງ.

ຄົນທົ່ວໄປຄິດວ່າຕາຍແລ້ວເປັນແນວໃດ?

ເບິ່ງວ່າຄຳພີໄບເບິນສອນແນວໃດໃນເລື່ອງນີ້ ເປີດວິດີໂອ.

ວິດີໂອ: ຄົນຕາຍແລ້ວເປັນແນວໃດ?—ວິດີໂອສັ້ນ (1:19)

ຮູບ: ສາກຈາກວິດີໂອ ‘ຄົນຕາຍແລ້ວເປັນແນວໃດ?—ວິດີໂອສັ້ນ.’ 1. ສົບຄົນຕາຍນອນຢູ່ເທິງຕຽງໂຮງໝໍ. 2. ຜູ້ຊາຍຄົນໜຶ່ງນັ່ງຫຼັບຢູ່ລະຫວ່າງກາງສອງຄົນຕອນຂີ່ລົດໄຟ.

ອ່ານປັນຍາຈານ 3:20 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຕາມຂໍ້ຄຳພີນີ້ ເກີດຫຍັງຂຶ້ນເມື່ອຄົນເຮົາຕາຍ?
ຫຼັງຈາກຄົນເຮົາຕາຍຈະມີວິນຍານທີ່ຍັງຢູ່ຕໍ່ໄປບໍ?

ຄຳພີໄບເບິນບອກເຮົາກ່ຽວກັບການຕາຍຂອງລາຊະໂຣທີ່ເປັນໝູ່ສະໜິດຂອງພະເຢຊູ. ຕອນທີ່ອ່ານໂຢຮັນ 11:11-14 ໃຫ້ເບິ່ງວ່າພະເຢຊູບອກວ່າລາຊະໂຣເປັນແນວໃດຫຼັງຈາກທີ່ລາວຕາຍ. ແລ້ວລົມກັນກ່ຽວກັບຄຳຖາມຕໍ່ໄປນີ້:

ພະເຢຊູປຽບທຽບວ່າຄວາມຕາຍເປັນຄືກັບຫຍັງ?
ການປຽບທຽບຂອງພະເຢຊູເຮັດໃຫ້ເຮົາຮູ້ວ່າຄົນທີ່ຕາຍແລ້ວເປັນແນວໃດ?
ເຈົ້າຮູ້ສຶກແນວໃດກັບສິ່ງທີ່ຄຳພີໄບເບິນບອກເລື່ອງຄວາມຕາຍ?

4. ການຮູ້ຄວາມຈິງເລື່ອງຄວາມຕາຍເປັນປະໂຫຍດກັບເຮົາ

ການຮູ້ຄວາມຈິງກ່ຽວກັບຄວາມຕາຍເຮັດໃຫ້ເຮົາບໍ່ຕ້ອງຢ້ານຄົນທີ່ຕາຍໄປແລ້ວ. ອ່ານປັນຍາຈານ 9:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄົນທີ່ຕາຍໄປແລ້ວຈະມາທຳຮ້າຍເຮົາໄດ້ບໍ?

ການທີ່ເຮົາຮູ້ຄວາມຈິງກ່ຽວກັບຄວາມຕາຍເຮັດໃຫ້ເຮົາບໍ່ຕ້ອງເຮັດຕາມຄຳສອນຜິດໆຫຼາຍເລື່ອງ ເຊັ່ນ ການຂາບໄຫວ້ບູຊາຄົນຕາຍຫຼືເຮັດບຸນໃຫ້ເຂົາເຈົ້າ. ອ່ານເອຊາຢາ 8:19 ແລະພະນິມິດ 4:11 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຄິດວ່າພະເຢໂຫວາຈະຮູ້ສຶກແນວໃດຖ້າເຮົາຂາບໄຫວ້ບູຊາຄົນຕາຍຫຼືຂໍຄວາມຊ່ວຍເຫຼືອຈາກເຂົາເຈົ້າ?

ຮູບ: ປະເພນີຕ່າງໆທີ່ກ່ຽວຂອງກັບການເຄົາລົບຄົນຕາຍ. 1. ຜູ້ຊາຍຄົນໜຶ່ງຄູ້ເຂົ່າແລະອະທິດຖານຕໍ່ໜ້າຫຼຸມຝັງສົບພ້ອມກັບເຄື່ອງບູຊາ. 2. ຜູ້ຊາຍສາມຄົນໃສ່ຊຸດປະຈຳຊົນເຜົ່າເຕັ້ນ. 3. ຂະບວນຂອງຜູ້ຄົນທີ່ໃສ່ໜ້າກາກກະໂຫຼກແລະຍົກຫົວກະໂຫຼກໃຫຍ່ຂຶ້ນໃນການສະເຫຼີມສະຫຼອງວັນແຫ່ງຄົນຕາຍ. — ຄວາມຈິງເລື່ອງຄວາມຕາຍເຮັດໃຫ້ເຮົາຫຼຸດພົ້ນຈາກທຳນຽມແລະປະເພນີທີ່ພະເຢໂຫວາບໍ່ມັກ.

5. ການຮູ້ຄວາມຈິງເລື່ອງຄວາມຕາຍເຮັດໃຫ້ເຮົາສະບາຍໃຈ

ຫຼາຍຄົນເຊື່ອວ່າຄົນຕາຍຕ້ອງໄປໄຊ້ກຳ. ແຕ່ເຮົາສະບາຍໃຈທີ່ໄດ້ຮູ້ວ່າຄົນຕາຍບໍ່ຕ້ອງທຸກທໍລະມານຫຼືໄປຮັບໂທດເພາະເຄີຍເຮັດສິ່ງບໍ່ດີໄວ້. ອ່ານໂຣມ 6:7 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄຳພີໄບເບິນບອກວ່າຄົນທີ່ຕາຍແລ້ວກໍພົ້ນໂທດຈາກບາບຂອງລາວ. ຖ້າເປັນແນວນັ້ນເຈົ້າຄິດວ່າ ຄົນຕາຍຕ້ອງໄປຮັບໂທດຫຼືຖືກທໍລະມານຍ້ອນຄວາມຜິດທີ່ລາວເຮັດບໍ?

ແຮ່ງເຮົາຮູ້ຈັກພະເຢໂຫວາ ເຮົາແຮ່ງຈະໝັ້ນໃຈວ່າເພິ່ນຈະບໍ່ມີວັນທໍລະມານຄົນທີ່ຕາຍ. ອ່ານພະບັນຍັດ 32:4 ແລະ 1 ໂຢຮັນ 4:8 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຕາມຂໍ້ຄຳພີທີ່ອ່ານໄປ ເຈົ້າຄິດວ່າພະເຈົ້າທີ່ດີເລີດຂະໜາດນີ້ຈະທໍລະມານຄົນຕາຍບໍ?
ເຈົ້າຮູ້ສຶກສະບາຍໃຈຫຼາຍຂຶ້ນບໍທີ່ໄດ້ຮູ້ຄວາມຈິງເລື່ອງຄວາມຕາຍ? ເປັນຫຍັງເຈົ້າຈຶ່ງຮູ້ສຶກແນວນັ້ນ?

ບາງຄົນເວົ້າວ່າ: “ຂ້ອຍຢ້ານວ່າ ຖ້າຄົນທີ່ຂ້ອຍຮັກຕາຍ ລາວຈະຕ້ອງໄປທົນທຸກທໍລະມານ.”