ບົດທີ 48

ເລືອກຄົບໝູ່ຢ່າງສະຫຼາດ

ສະບັບພິມ

ເຮົາມີຄວາມສຸກທີ່ໄດ້ມີໝູ່ສະໜິດ ເພາະບໍ່ວ່າເຮົາຈະສຸກຫຼືທຸກເຂົາເຈົ້າກໍຈະຄອຍຊ່ວຍເຫຼືອແລະຢູ່ຄຽງຂ້າງເຮົາສະເໝີ. ແຕ່ຄຳພີໄບເບິນກໍເຕືອນວ່າບໍ່ແມ່ນທຸກຄົນຈະເປັນໝູ່ທີ່ດີໄດ້. ແລ້ວເຈົ້າຈະເລືອກໝູ່ທີ່ດີໄດ້ແນວໃດ? ໃຫ້ເຮົາມາລົມກ່ຽວກັບເລື່ອງນີ້ນຳກັນ.

1. ໝູ່ທີ່ເຈົ້າເລືອກຄົບຈະມີຜົນແນວໃດກັບເຈົ້າ?

ຖ້າເຮົາໃຊ້ເວລາກັບໃຜຫຼາຍໆ ແມ່ນແຕ່ຄົນທີ່ເຮົາໃຊ້ເວລານຳທາງອິນເຕີເນັດ ເຮົາກໍຈະເລີ່ມຄິດແລະເຮັດສິ່ງຕ່າງໆຄືເຂົາເຈົ້າ. ຄືກັບທີ່ຄຳພີໄບເບິນບອກວ່າ “ຄົນທີ່ຄົບກັບຄົນສະຫຼາດຈະສະຫຼາດ ແຕ່ຄົນທີ່ຄົບກັບຄົນໂງ່ [ຄົນທີ່ບໍ່ຮັກພະເຢໂຫວາ] ຈະເດືອດຮ້ອນ.” (ສຸພາສິດ 13:20) ໝູ່ທີ່ຮັກແລະນະມັດສະການພະເຢໂຫວາຈະຊ່ວຍເຈົ້າໃຫ້ສະໜິດກັບເພິ່ນແລະສະໜັບສະໜູນເຈົ້າໃຫ້ເຮັດສິ່ງທີ່ດີ. ແຕ່ຖ້າເຈົ້າສະໜິດກັບຄົນທີ່ບໍ່ຮັກພະເຢໂຫວາ ເຂົາເຈົ້າກໍອາດເຮັດໃຫ້ເຈົ້າບໍ່ໄດ້ເປັນໝູ່ກັບເພິ່ນອີກຕໍ່ໄປ. ນີ້ເປັນເຫດຜົນທີ່ຄຳພີໄບເບິນບອກໃຫ້ເຮົາເລືອກໝູ່ຢ່າງສະຫຼາດ! ຖ້າເຮົາເລືອກເປັນໝູ່ກັບຄົນທີ່ຮັກພະເຢໂຫວາກໍຈະມີຜົນດີທັງຕໍ່ໂຕເຮົາແລະໝູ່ຂອງເຮົາ ເພາະເຮົາຈະ “ໃຫ້ກຳລັງໃຈກັນແລະເສີມສ້າງກັນໃຫ້ເຂັ້ມແຂງຢູ່ສະເໝີ.”—1 ເທຊະໂລນິກ 5:11

2. ການເລືອກໝູ່ຂອງເຈົ້າອາດເຮັດໃຫ້ພະເຢໂຫວາຮູ້ສຶກແນວໃດ?

ພະເຢໂຫວາເລືອກຢ່າງດີວ່າຈະເປັນໝູ່ກັບໃຜ. “ເພິ່ນເປັນໝູ່ສະໜິດກັບຄົນທີ່ເຮັດສິ່ງທີ່ຖືກຕ້ອງ.” (ສຸພາສິດ 3:32) ພະເຢໂຫວາຈະຮູ້ສຶກແນວໃດຖ້າເຮົາເລືອກເປັນໝູ່ກັບຄົນທີ່ບໍ່ໄດ້ຮັກເພິ່ນ? ເພິ່ນຄືຊິເສຍໃຈຫຼາຍແທ້ໆ. (ອ່ານຢາໂກໂບ 4:4) ຖ້າເຮົາພະຍາຍາມສະໜິດກັບພະເຢໂຫວາແລະສະໜິດກັບຄົນທີ່ຮັກເພິ່ນ ແລ້ວກໍເຊົາເປັນໝູ່ກັບຄົນທີ່ບໍ່ດີ ເຮົາກໍຈະເຮັດໃຫ້ພະເຢໂຫວາມີຄວາມສຸກແລະເພິ່ນກໍຈະເປັນໝູ່ກັບເຮົາ.—ເພງສັນລະເສີນ 15:1-4

ຮຽນຮູ້ຫຼາຍຂຶ້ນ

ເປັນຫຍັງການເລືອກໝູ່ຈຶ່ງເປັນເລື່ອງສຳຄັນຫຼາຍ ການເປັນໝູ່ທີ່ດີຈະເຮັດໃຫ້ເຮົາມີຊີວິດທີ່ມີຄວາມສຸກ ແຕ່ເຮົາເອງຈະເປັນໝູ່ທີ່ດີໄດ້ແນວໃດ.

3. ລະວັງການຄົບໝູ່ທີ່ບໍ່ດີ

ຖ້າເຮົາໃຊ້ເວລາຫຼາຍເກີນໄປກັບຄົນທີ່ບໍ່ໄດ້ຮັກພະເຈົ້າແລະມາດຕະຖານຂອງເພິ່ນ ເຮົາກໍກຳລັງຄົບກັບໝູ່ທີ່ບໍ່ດີ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:

ວິດີໂອ: ຝຶກວິທີປະຕິເສດການຄົບຄົນທີ່ບໍ່ດີ (6:17)

ເຮົາອາດເລີ່ມຄົບໝູ່ທີ່ບໍ່ດີໂດຍບໍ່ຮູ້ໂຕໄດ້ແນວໃດ?

ອ່ານ 1 ໂກຣິນໂທ 15:33 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເຈົ້າຄິດວ່າຄົນແບບໃດອາດເປັນໝູ່ທີ່ບໍ່ດີສຳລັບເຈົ້າ? ຍ້ອນຫຍັງເຈົ້າຈຶ່ງຄິດແບບນັ້ນ?

ອ່ານເພງສັນລະເສີນ 119:63 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີນີ້ ໝູ່ທີ່ດີຕ້ອງເປັນຄົນແບບໃດ?

ມີແອັບເປິ້ນຫຼາຍໜ່ວຍຢູ່ໃນຖ້ວຍ. ແອັບເປິ້ນໜ່ວຍໜຶ່ງເນົ່າມີແມງວັນຕອມແລະແອັບເປິ້ນໜ່ວຍທີ່ເນົ່າກໍເລີ່ມເຮັດໃຫ້ໜ່ວຍອື່ນໆເນົ່າເສຍໄປນຳ. — ໝາກແອັບເປິ້ນເນົ່າພຽງໜ່ວຍດຽວອາດເຮັດໃຫ້ໝາກແອັບເປິ້ນໜ່ວຍອື່ນເນົ່າເສຍໄປນຳ. ການຄົບໝູ່ທີ່ບໍ່ດີອາດມີຜົນກັບເຈົ້າແນວໃດ?

4. ຄົນທີ່ແຕກຕ່າງຈາກເຮົາກໍເປັນໝູ່ທີ່ດີຂອງເຮົາໄດ້

ຄຳພີໄບເບິນເວົ້າເຖິງຄົນອິດສະຣາເອນສອງຄົນທີ່ຊື່ດາວິດແລະໂຢນາທານ. ເຂົາເຈົ້າແຕກຕ່າງກັນຫຼາຍ ໂຢນາທານອາຍຸຫຼາຍກວ່າດາວິດແຖມຍັງເປັນລູກຊາຍຂອງກະສັດນຳ ແຕ່ເຂົາເຈົ້າກໍເປັນໝູ່ທີ່ສະໜິດກັນຫຼາຍ. ອ່ານ 1 ຊາມູເອນ 18:1 ແລ້ວລົມກັນກ່ຽວກັບຄຳຖາມຕໍ່ໄປນີ້: