ຄຳນຳ
ປຶ້ມຂໍ້ຄຳພີສຳລັບການໃຊ້ຊີວິດຂອງຄລິດສະຕຽນ ຈະຊ່ວຍໃຫ້ເຈົ້າພົບຂໍ້ຄຳພີແລະເລື່ອງລາວທີ່ສາມາດຊ່ວຍເຈົ້າໃຫ້ຈັດການກັບບັນຫາທີ່ເຈົ້າເຈິໄດ້ຢ່າງງ່າຍດາຍ. ນອກຈາກນີ້ຍັງຈະຊ່ວຍເຈົ້າໃນການຊອກຫາຂໍ້ຄຳພີທີ່ຖືກຕ້ອງເພື່ອໃຫ້ກຳລັງໃຈຜູ້ອື່ນແລະຊ່ວຍເຂົາເຈົ້າໃນການຕັດສິນໃຈໃນແບບທີ່ໃຫ້ກຽດພະເຢໂຫວາ. ເລືອກຫົວຂໍ້ທີ່ເຈົ້າສົນໃຈ. ແຕ່ລະຫົວຂໍ້ມີຄຳຖາມທີ່ເປັນປະໂຫຍດແລະຄຳອະທິບາຍສັ້ນໆກ່ຽວກັບເລື່ອງລາວໃນຄຳພີໄບເບິນ. (ເບິ່ງ ຂອບ “ວິທີໃຊ້ປຶ້ມນີ້.”) ບໍ່ດົນເຈົ້າຈະພົບຂໍ້ຄຳພີທີ່ຈະໃຫ້ຄຳແນະນຳແລະກຳລັງໃຈທີ່ເຈົ້າຕ້ອງການ. ແລະເຈົ້າຍັງຈະພົບຫຼັກການທີ່ເປັນປະໂຫຍດຈາກຄຳພີໄບເບິນທີ່ເຈົ້າສາມາດໃຊ້ເພື່ອຊ່ວຍເຫຼືອແລະໃຫ້ກຳລັງໃຈຜູ້ອື່ນໄດ້.
ແນ່ນອນ ສຳລັບເລື່ອງໃດກໍຕາມມີຂໍ້ຄຳພີຫຼາຍກວ່າທີ່ບອກໄວ້ໃນປຶ້ມນີ້. ປຶ້ມນີ້ໄດ້ຮັບການອອກແບບມາເພື່ອຊ່ວຍໃຫ້ເຈົ້າພົບຂໍ້ຄຳພີທີ່ມີປະໂຫຍດຫຼາຍທີ່ສຸດ ແລະຫຼັງຈາກນັ້ນເຈົ້າສາມາດນຳໃຊ້ເຄື່ອງມືອື່ນໆເພື່ອຮຽນຮູ້ເພີ່ມເຕີມໄດ້ຖ້າຈຳເປັນ. (ສພສ 2:1-6) ຖ້າຕ້ອງການຮຽນຮູ້ຫຼາຍຂຶ້ນ ໃຫ້ໃຊ້ຂໍ້ອ້າງໂຍງແລະຂໍ້ມູນສຳລັບສຶກສາໃນຄຳພີໄບເບິນສະບັບແປໂລກໃໝ່ ໃນພາສາທີ່ເຈົ້າເຂົ້າໃຈ. ຖ້າຕ້ອງການຮຽນຮູ້ເພີ່ມເຕີມກ່ຽວກັບຂໍ້ຄຳພີບາງຂໍ້ ໃຫ້ເບິ່ງໃນສ່ວນ “ອະທິບາຍຂໍ້ຄຳພີ” ຂອງຄູ່ມືຄົ້ນຄວ້າສຳລັບພະຍານພະເຢໂຫວາ ຫຼືໃນດັດຊະນີສັບພະໜັງສືຂອງວັອດສ໌ທາວເວີ້ (ພາສາອັງກິດ). ເຄື່ອງມືເຫຼົ່ານັ້ນຈະສະແດງໃຫ້ເຈົ້າເຫັນວ່າເຮົາໄດ້ຈັດພິມຫຍັງໄປແດ່ແລ້ວທີ່ອະທິບາຍກ່ຽວກັບຂໍ້ຄຳພີນັ້ນ. ແຫຼ່ງອ້າງອີງຫຼ້າສຸດຈະສະແດງໃຫ້ເຈົ້າເຫັນຄວາມເຂົ້າໃຈໃນປັດຈຸບັນຂອງເຮົາກ່ຽວກັບຂໍ້ຄຳພີນັ້ນ.
ຂໍໃຫ້ປຶ້ມຂໍ້ຄຳພີສຳລັບການໃຊ້ຊີວິດຂອງຄລິດສະຕຽນ ຊ່ວຍໃຫ້ເຈົ້າຄົ້ນພົບສະຕິປັນຍາ ຄວາມຮູ້ ແລະຄວາມເຂົ້າໃຈທີ່ມີຢູ່ໃນຄຳພີໄບເບິນ. ເມື່ອເຈົ້າໃຊ້ປຶ້ມນີ້ ເຈົ້າຈະໝັ້ນໃຈຫຼາຍຂຶ້ນວ່າ “ຖ້ອຍຄຳຂອງພະເຈົ້າມີຊີວິດ ມີພະລັງຫຼາຍ.”—ຮຣ 4:12