“ບໍ່ໄດ້ເປັນຄົນຂອງໂລກ”
“ໂລກນີ້ກຽດຊັງພວກເຂົາ ຍ້ອນພວກເຂົາບໍ່ໄດ້ເປັນຄົນຂອງໂລກ.”—ໂຢຮັນ 17:14
ຄຳເວົ້ານີ້ໝາຍຄວາມວ່າແນວໃດ? ເນື່ອງຈາກພະເຢຊູບໍ່ໄດ້ເປັນສ່ວນໜຶ່ງຂອງໂລກ ເພິ່ນຈຶ່ງວາງໂຕເປັນກາງທ່າມກາງຄວາມຂັດແຍ່ງທາງສັງຄົມແລະການເມືອງໃນສະໄໝນັ້ນ. ເພິ່ນອະທິບາຍວ່າ: “ການປົກຄອງຂອງຂ້ອຍບໍ່ໄດ້ເປັນສ່ວນໜຶ່ງຂອງໂລກນີ້. ຖ້າການປົກຄອງຂອງຂ້ອຍເປັນສ່ວນໜຶ່ງຂອງໂລກນີ້ ຄົນຂອງຂ້ອຍຄືຊິຕໍ່ສູ້ບໍ່ໃຫ້ພວກຢິວຈັບຂ້ອຍໄດ້. ແຕ່ທີ່ຈິງແລ້ວ ການປົກຄອງຂອງຂ້ອຍບໍ່ໄດ້ຮັບອຳນາດຈາກໂລກນີ້.” (ໂຢຮັນ 18:36) ນອກຈາກນັ້ນ ເພິ່ນຍັງເຕືອນພວກລູກສິດຂອງເພິ່ນໃຫ້ຫຼີກລ່ຽງການຄິດ ເວົ້າ ແລະເຮັດສິ່ງທີ່ຖ້ອຍຄຳຂອງພະເຈົ້າຕຳໜິ.—ມັດທາຍ 20:25-27
ຄລິດສະຕຽນໃນຍຸກທຳອິດເປັນແບບນັ້ນບໍ? ໂຈນາທານໄດມອນ ນັກຂຽນເລື່ອງທາງສາສະໜາບອກວ່າຄລິດສະຕຽນໃນຍຸກທຳອິດ “ບໍ່ຍອມເຂົ້າຮ່ວມ [ສົງຄາມ] ບໍ່ວ່າຜົນຈະເປັນແນວໃດ ບໍ່ວ່າຈະຖືກກ່າວໂທດ ຖືກຂັງຄຸກ ຫຼືຖືກຂ້າ.” ເຂົາເຈົ້າເລືອກເອົາການທົນທຸກແທນທີ່ຈະຍອມເຮັດຜິດຫຼັກການເລື່ອງຄວາມເປັນກາງ. ນອກຈາກນັ້ນ ຫຼັກສິນລະທຳທີ່ເຂົາເຈົ້າຍຶດຖືຍັງເຮັດໃຫ້ເຂົາເຈົ້າແຕກຕ່າງຈາກຄົນອື່ນ. ຄລິດສະຕຽນໄດ້ຮັບຄຳເຕືອນວ່າ: “ແຕ່ເມື່ອພວກເຈົ້າເຊົາເຮັດສິ່ງຊົ່ວຮ້າຍຄືກັບທີ່ພວກເຂົາເຮັດ ພວກເຂົາກໍແປກໃຈແລະເວົ້າດູຖູກຢຽດຫຍາມພວກເຈົ້າ.” (1 ເປໂຕ 4:4) ນັກປະຫວັດສາດ ວິວ ດູແຣນ ຂຽນວ່າຄລິດສະຕຽນ “ສ້າງຄວາມບໍ່ພໍໃຈໃຫ້ກັບໂລກນອກຮີດທີ່ມັກຄວາມມ່ວນຊື່ນເພີດເພີນເພາະພວກເຂົາມີສັດທາແຮງກ້າໃນສາສະໜາແລະມີການປະພຶດຕົວທີ່ດີງາມ.”
ໃຜກຳລັງເຮັດແບບດຽວກັນໃນທຸກມື້ນີ້? ເມື່ອເວົ້າເຖິງຄວາມເປັນກາງຂອງຄລິດສະຕຽນ ສາລານຸກົມກາໂຕລິກສະບັບໃໝ່ (ພາສາອັງກິດ) ອ້າງວ່າ: “ການປະຕິເສດບໍ່ຍອມຈັບອາວຸດໂດຍອ້າງສະຕິຮູ້ສຶກຜິດຊອບເປັນເລື່ອງທີ່ຟັງບໍ່ຂຶ້ນ.” ບົດຄວາມໃນໜັງສືພິມເຣຟໍເມີເທ ເພຣດເຊີ ບອກວ່າ ລາຍງານສະບັບໜຶ່ງຂອງອົງກອນດ້ານສິດທິມະນຸດແຫ່ງອາຝຼິກກາສະແດງໃຫ້ເຫັນວ່າທຸກຄລິດຕະຈັກຕ່າງກໍມີສ່ວນຮ່ວມໃນການຂ້າລ້າງເຜົ່າພັນໃນຣະວັນດາເມື່ອປີ 1994 “ຍົກເວັ້ນພະຍານພະເຢໂຫວາ.”
ອາຈານຢູ່ໂຮງຮຽນມັດທະຍົມຄົນໜຶ່ງຈົ່ມກ່ຽວກັບການສັງຫານໝູ່ໂດຍພວກນາຊີວ່າ: “ບໍ່ມີຄົນກຸ່ມໃດຫຼືອົງກອນໃດເລີຍທີ່ອອກມາປະນາມການຂີ້ຕົວະຕ່າງໆ ລວມທັງຄວາມປ່າເຖື່ອນ ແລະຄວາມໂຫດຮ້າຍອຳມະຫິດ.” ແຕ່ຫຼັງຈາກໄດ້ໄປທີ່ພິພິທະພັນອະນຸສອນການສັງຫານໝູ່ໂດຍພວກນາຊີແຫ່ງສະຫະລັດ ລາວຂຽນວ່າ: “ຕອນນີ້ຂ້ອຍຮູ້ຄຳຕອບແລ້ວ.” ລາວໄດ້ຮູ້ວ່າພະຍານພະເຢໂຫວາເປັນຜູ້ທີ່ຢືນຢັດໝັ້ນຄົງເພື່ອຄວາມເຊື່ອເຖິງຈະຖືກປະຕິບັດຢ່າງໂຫດຮ້າຍທາລຸນກໍຕາມ.
ແລ້ວຫຼັກສິນລະທຳທີ່ພະຍານພະເຢໂຫວາຍຶດຖືເປັນແນວໃດ? ວາລະສານຍູ. ເອສ. ກາໂຕລິກ ບອກວ່າ: “ໜຸ່ມສາວກາໂຕລິກສ່ວນໃຫຍ່ໃນທຸກມື້ນີ້ບໍ່ເຫັນດີກັບຄຳສອນຂອງຄລິດຕະຈັກໃນເລື່ອງການຢູ່ນຳກັນ [ແລະ] ມີເພດສຳພັນກັນກ່ອນແຕ່ງດອງ.” ວາລະສານສະບັບນີ້ຍົກຄຳເວົ້າຂອງມັກຄະນາຍົກຄົນໜຶ່ງທີ່ບອກວ່າ: “ຂ້ອຍເຫັນວ່າມີຄລິດສະຕຽນຈຳນວນຫຼາຍ ອາດຈະຫຼາຍກວ່າ 50 ເປີເຊັນດ້ວຍຊ້ຳທີ່ກິນຢູ່ນຳກັນກ່ອນແຕ່ງດອງ.” ສາລານຸກົມບຣິແທນນິກາສະບັບໃໝ່ ບອກວ່າພະຍານພະເຢໂຫວາ “ຮັກສາມາດຕະຖານທີ່ສູງສົ່ງດ້ານສິນລະທຳຂອງໂຕເອງຢ່າງເຄັ່ງຄັດ.”