ບົດຄວາມສຶກສາທີ 51
ເຮົາມີຄວາມສະຫງົບໃຈໄດ້ຕອນທີ່ເຈິຄວາມຍາກລຳບາກ
“ພວກເຈົ້າບໍ່ຕ້ອງທຸກໃຈແລະບໍ່ຕ້ອງຢ້ານ.”—ຢຮ. 14:27
ເພງ 112 ພະເຢໂຫວາ ພະເຈົ້າແຫ່ງສັນຕິສຸກ
ໃຈຄວາມສຳຄັນa
1. “ສັນຕິສຸກຂອງພະເຈົ້າ” ແມ່ນຫຍັງ ແລະເຮົາໄດ້ຮັບປະໂຫຍດແນວໃດຈາກການມີສັນຕິສຸກນີ້? (ຟີລິບປອຍ 4:6, 7)
ມີສັນຕິສຸກໜຶ່ງທີ່ຄົນໃນໂລກນີ້ບໍ່ຮູ້ ນັ້ນກໍຄື “ສັນຕິສຸກຂອງພະເຈົ້າ.” ສັນຕິສຸກນີ້ແມ່ນຄວາມສະຫງົບໃຈທີ່ໄດ້ຈາກການມີສາຍສຳພັນທີ່ໃກ້ຊິດກັບພະເຢໂຫວາ. ເມື່ອເຮົາມີສັນຕິສຸກຂອງພະເຈົ້າ ເຮົາຈະຮູ້ສຶກປອດໄພ. (ອ່ານຟີລິບປອຍ 4:6, 7) ເຮົາມີຄວາມສຸກທີ່ໄດ້ເປັນໝູ່ກັບຜູ້ທີ່ຮັກພະເຢໂຫວາ ແລະມີຄວາມສຸກທີ່ໄດ້ເປັນໝູ່ສະໜິດກັບ “ພະເຈົ້າຜູ້ໃຫ້ສັນຕິສຸກ.” (1ທຊ. 5:23) ເມື່ອເຮົາຮູ້ຈັກ ໄວ້ໃຈ ແລະເຊື່ອຟັງພະເຢໂຫວາ ສັນຕິສຸກຂອງພະເຈົ້າກໍຈະຊ່ວຍເຮົາໃຫ້ສະຫງົບໃຈໄດ້ເຖິງວ່າຈະເຈິບັນຫາຫຼາຍຢ່າງກໍຕາມ.
2. ເປັນຫຍັງເຮົາຈຶ່ງໝັ້ນໃຈໄດ້ວ່າເຮົາສາມາດມີສັນຕິສຸກຂອງພະເຈົ້າ?
2 ເປັນໄປໄດ້ບໍທີ່ເຮົາຈະມີຄວາມສຸກເມື່ອເຈິຄວາມຍາກລຳບາກເຊັ່ນ: ໂລກລະບາດ ໄພພິບັດ ຄວາມບໍ່ສະຫງົບໃນສັງຄົມ ຫຼືການຂົ່ມເຫງ? ສິ່ງເຫຼົ່ານີ້ອາດເຮັດໃຫ້ເຮົາຢ້ານ ແຕ່ພະເຢຊູບອກພວກລູກສິດຂອງເພິ່ນວ່າ: “ພວກເຈົ້າບໍ່ຕ້ອງທຸກໃຈແລະບໍ່ຕ້ອງຢ້ານ.” (ຢຮ. 14:27) ໃນທຸກມື້ນີ້ ພີ່ນ້ອງຫຼາຍຄົນໄດ້ເຮັດຕາມຄຳແນະນຳຂອງພະເຢຊູ. ແລ້ວພະເຢໂຫວາກໍຊ່ວຍເຂົາເຈົ້າໃຫ້ມີຄວາມສະຫງົບໃຈໄດ້ເຖິງຈະເຈິບັນຫາຫຼາຍຢ່າງ.
ເຮົາສະຫງົບໃຈໄດ້ເຖິງຈະມີໂລກລະບາດ
3. ໂລກລະບາດອາດເຮັດໃຫ້ເຮົາບໍ່ສະຫງົບໃຈແນວໃດ?
3 ໂລກລະບາດມີຜົນກະທົບຕໍ່ຊີວິດຂອງຄົນເຮົາຫຼາຍ. ຕົວຢ່າງເຊັ່ນ ການລະບາດຂອງພະຍາດໂຄວິດ-19 ສົ່ງຜົນຕໍ່ຫຼາຍຄົນ. ບົດຄົ້ນຄວ້າໜຶ່ງບອກວ່າ: ເມື່ອມີການລະບາດນີ້ ປະຊາຊົນຫຼາຍກວ່າເຄິ່ງໜຶ່ງມີບັນຫາເລື່ອງການນອນ. ຫຼາຍຄົນເປັນໂລກວິຕົກກັງວົນ ຊຶມເສົ້າ ຕິດເຫຼົ້າແລະໃຊ້ຢາໃນທາງທີ່ຜິດ ມີການໃຊ້ຄວາມຮຸນແຮງໃນຄອບຄົວແລະການພະຍາຍາມຂ້າໂຕຕາຍເພີ່ມຂຶ້ນ. ຖ້າບ່ອນທີ່ເຈົ້າຢູ່ມີໂລກລະບາດ ເຈົ້າຈະບໍ່ອຸກໃຈຫຼາຍເກີນໄປແລະຍັງມີສັນຕິສຸກຂອງພະເຈົ້າໄດ້ແນວໃດ?
4. ເປັນຫຍັງການຮູ້ເລື່ອງຄຳພະຍາກອນຂອງພະເຢຊູກ່ຽວກັບສະໄໝສຸດທ້າຍຈຶ່ງເຮັດໃຫ້ເຮົາສະຫງົບໃຈ?
4 ພະເຢຊູບອກລ່ວງໜ້າວ່າ ໃນສະໄໝສຸດທ້າຍຈະມີໂລກລະບາດເກີດຂຶ້ນ “ໃນບ່ອນຕ່າງໆ.” (ລກ. 21:11) ການຮູ້ເລື່ອງນີ້ຊ່ວຍເຮົາໃຫ້ມີຄວາມສະຫງົບໃຈແນວໃດ? ຊ່ວຍເຮົາບໍ່ໃຫ້ຕື່ນຕົກໃຈເມື່ອມີໂລກລະບາດ ເພາະເຮົາຮູ້ວ່າເຫດການຕ່າງໆທີ່ພະເຢຊູບອກໄວ້ຈະເກີດຂຶ້ນແນ່ນອນ. ດັ່ງນັ້ນ ເຮົາຈຶ່ງມີເຫດຜົນທີ່ຈະເຮັດຕາມຄຳແນະນຳຂອງພະເຢຊູທີ່ວ່າ: “ຢ່າຕົກໃຈຢ້ານ.”—ມທ. 24:6
ການຟັງຟາຍສຽງການອ່ານຄຳພີໄບເບິນຊ່ວຍເຈົ້າໃຫ້ມີຄວາມສະຫງົບໃຈໄດ້ໃນຊ່ວງທີ່ມີໂລກລະບາດ (ເບິ່ງຂໍ້ 5)
5. (ກ) ຕາມຟີລິບປອຍ 4:8, 9 ເຮົາຄວນອະທິດຖານຂໍຫຍັງຕອນທີ່ມີໂລກລະບາດ? (ຂ) ການຟັງຟາຍສຽງການອ່ານຄຳພີໄບເບິນເປັນປະໂຫຍດຕໍ່ເຈົ້າແນວໃດ?
5 ໂລກລະບາດເຮັດໃຫ້ເຮົາຢ້ານແລະຮູ້ສຶກກັງວົນຫຼາຍ. ເລື່ອງນີ້ໄດ້ເກີດຂຶ້ນກັບພີ່ນ້ອງຍິງຄົນໜຶ່ງທີ່ຊື່ ເດຊີ້.b ຫຼັງຈາກທີ່ອາວ ລູກຊາຍກົກຂອງອາວ ແລະໝໍປະຈຳຂອງເດຊີ້ຕາຍຍ້ອນພະຍາດໂຄວິດ-19 ລາວກໍຢ້ານວ່າຕົວເອງຈະຕິດພະຍາດນີ້ ແລ້ວເອົາໄປຕິດໃສ່ແມ່ທີ່ເຖົ້າແລ້ວ. ນອກຈາກນັ້ນ ລາວຍັງຢ້ານວ່າຈະຕົກວຽກ ແລະບໍ່ມີເງິນຊື້ອາຫານການກິນແລະຈ່າຍຄ່າເຊົ່າເຮືອນ. ຄວາມກັງວົນນີ້ວົນວຽນຢູ່ໃນຄວາມຄິດຂອງລາວແລະເຮັດໃຫ້ລາວນອນບໍ່ຫຼັບ. ແຕ່ໃນທີ່ສຸດ ເດຊີ້ກໍສະຫງົບໃຈໄດ້. ຍ້ອນຫຍັງ? ຍ້ອນລາວອະທິດຖານຂໍພະເຢໂຫວາຊ່ວຍໃຫ້ລາວສະຫງົບໃຈແລະຄິດໃນແງ່ບວກ. (ອ່ານຟີລິບປອຍ 4:8, 9) ລາວຟັງພະເຢໂຫວາເວົ້າໂດຍທາງຟາຍສຽງການອ່ານຄຳພີໄບເບິນ. ລາວບອກວ່າ: “ສຽງຂອງຜູ້ອ່ານຄຳພີໄບເບິນເຮັດໃຫ້ຂ້ອຍບໍ່ກັງວົນຫຼາຍເກີນໄປ ແລະເຕືອນຂ້ອຍວ່າພະເຢໂຫວາເປັນຫ່ວງຂ້ອຍແທ້ໆ.”—ເພງ. 94:19
6. ການສຶກສາສ່ວນຕົວແລະເຂົ້າຮ່ວມການປະຊຸມຈະຊ່ວຍເຮົາແນວໃດ?
6 ເຖິງວ່າໂລກລະບາດຈະມີຜົນກະທົບຕໍ່ຊີວິດຂອງເຮົາ ແຕ່ກໍຢ່າຍອມໃຫ້ເລື່ອງນັ້ນມາເຮັດໃຫ້ເຮົາບໍ່ໄດ້ສຶກສາສ່ວນຕົວຫຼືເຂົ້າຮ່ວມການປະຊຸມ. ປະສົບການເລື່ອງຊີວິດຈິງທີ່ຢູ່ໃນວິດີໂອແລະປຶ້ມຕ່າງໆຂອງອົງການຈະຊ່ວຍເຮົາໃຫ້ເຫັນວ່າ ພີ່ນ້ອງຫຼາຍຄົນໄດ້ຮັກສາຄວາມສັດຊື່ຕໍ່ພະເຢໂຫວາເຖິງຈະມີບັນຫາທີ່ຄ້າຍຄືກັບເຮົາ. (1ປຕ. 5:9) ການປະຊຸມຈະຊ່ວຍເຮົາໃຫ້ຄິດໃນແງ່ບວກແລະເປີດໂອກາດໃຫ້ເຮົາໄດ້ຮັບກຳລັງໃຈຈາກພີ່ນ້ອງແລະໄດ້ໃຫ້ກຳລັງໃຈພີ່ນ້ອງນຳ. (ຣມ. 1:11, 12) ເມື່ອເຮົາຄິດເຖິງວິທີທີ່ພະເຢໂຫວາຊ່ວຍຜູ້ຮັບໃຊ້ທີ່ສັດຊື່ຕອນທີ່ເຂົາເຈົ້າເຈັບປ່ວຍ ຮູ້ສຶກຢ້ານຫຼືໂດດດ່ຽວ ເຮົາກໍຈະມີຄວາມເຊື່ອທີ່ເຂັ້ມແຂງຂຶ້ນແລະໝັ້ນໃຈວ່າພະເຢໂຫວາຈະຊ່ວຍເຮົາຄືກັນ.
7. ເຮົາໄດ້ບົດຮຽນຫຍັງຈາກຕົວຢ່າງຂອງອັກຄະສາວົກໂຢຮັນ?
7 ໃຫ້ພະຍາຍາມຕິດຕໍ່ກັບພີ່ນ້ອງ. ໂລກລະບາດອາດເຮັດໃຫ້ເຮົາບໍ່ໄດ້ຢູ່ໃກ້ກັບພີ່ນ້ອງເຖິງວ່າຈະນະມັດສະການພະເຢໂຫວານຳກັນ. ເຈົ້າອາດຮູ້ສຶກຄືກັບອັກຄະສາວົກໂຢຮັນທີ່ຢາກເຈິຄາໂຢໝູ່ຂອງລາວແບບໜ້າຕໍ່ໜ້າ. (3ຢຮ. 13, 14) ເຖິງວ່າຕອນນັ້ນໂຢຮັນຈະໄປເຈິຄາໂຢບໍ່ໄດ້ ແຕ່ລາວກໍເຮັດສິ່ງທີ່ລາວເຮັດໄດ້ໂດຍຂຽນຈົດໝາຍໄປຫາຄາໂຢ. ຖ້າເຮົາໄປຫາພີ່ນ້ອງແບບໜ້າຕໍ່ໜ້າບໍ່ໄດ້ ກໍໃຫ້ພະຍາຍາມຕິດຕໍ່ຫາເຂົາເຈົ້າໂດຍສົ່ງຂໍ້ຄວາມ ໂທຫາ ຫຼືລົມກັນແບບເຫັນໜ້າ. ຖ້າເຮົາພະຍາຍາມຕິດຕໍ່ກັບພີ່ນ້ອງ ເຮົາກໍຈະບໍ່ຮູ້ສຶກເຫງົາຫຼາຍເກີນໄປແລະສະຫງົບໃຈຫຼາຍຂຶ້ນ. ແຕ່ຖ້າເຮັດແບບນີ້ແລ້ວເຮົາຍັງຮູ້ສຶກເຫງົາຢູ່ ກໍຂໍໃຫ້ລົມກັບຜູ້ດູແລແລະຍອມຮັບການຊ່ວຍເຫຼືອຈາກເຂົາເຈົ້າ.—ອຊຢ. 32:1, 2
ເຮົາສະຫງົບໃຈໄດ້ເຖິງຈະເຈິໄພພິບັດ
8. ໄພພິບັດອາດເຮັດໃຫ້ເຈົ້າບໍ່ສະຫງົບໃຈແນວໃດ?
8 ເຈົ້າເຄີຍປະສົບກັບໄພພິບັດບໍ ເຊັ່ນ: ນ້ຳຖ້ວມ ແຜ່ນດິນໄຫວ ຫຼືໄຟໄໝ້? ຖ້າເຄີຍ ເຈົ້າອາດຮູ້ສຶກກັງວົນຫຼາຍເຖິງວ່າເລື່ອງນັ້ນຈະຜ່ານມາແລ້ວກໍຕາມ. ຖ້າເຈົ້າສູນເສຍຊັບສິນ ຫຼືຄົນທີ່ເຈົ້າຮັກຕາຍ ເຈົ້າອາດຈະຮູ້ສຶກເສຍໃຈຫຼາຍ ໝົດຫວັງ ແລະໃຈຮ້າຍ. ແຕ່ນີ້ບໍ່ໄດ້ໝາຍຄວາມວ່າເຈົ້າເປັນຄົນທີ່ຮັກເງິນຄຳຫຼືຂາດຄວາມເຊື່ອ. ເມື່ອເຈິບັນຫາແບບນີ້ ບາງຄົນອາດຈະເວົ້າໃຫ້ເຈົ້າໃນແງ່ລົບ. (ໂຢບ 1:11) ແລ້ວເຈົ້າຈະຍັງມີຄວາມສະຫງົບໃຈໄດ້ແນວໃດເຖິງຈະເຈິບັນຫາເຫຼົ່ານີ້?
9. ພະເຢຊູໄດ້ກຽມເຮົາແນວໃດໃຫ້ພ້ອມສຳລັບເຫດການທີ່ບໍ່ດີທີ່ຈະເກີດຂຶ້ນ?
9 ຂໍໃຫ້ຄິດເຖິງສິ່ງທີ່ພະເຢຊູບອກໄວ້ລ່ວງໜ້າ. ບາງຄົນຄິດວ່າເຂົາເຈົ້າຈະບໍ່ປະສົບກັບໄພພິບັດດອກ ແຕ່ເຮົາຮູ້ວ່າໃນສະໄໝຂອງເຮົາຈະມີໄພພິບັດຫຼາຍຂຶ້ນ ແລະເຮົາກໍຈະປະສົບກັບເລື່ອງນີ້ແນ່ນອນ. ເພາະພະເຢຊູບອກວ່າຈະມີ “ແຜ່ນດິນໄຫວໃຫຍ່” ແລະໄພພິບັດອື່ນໆເກີດຂຶ້ນກ່ອນທີ່ຈຸດຈົບຈະມາເຖິງ. (ລກ. 21:11) ແລະເພິ່ນຍັງບອກຕື່ມວ່າຈະມີ “ຄວາມຊົ່ວເພີ່ມຂຶ້ນ” ເຊິ່ງໃນທຸກມື້ນີ້ເຮົາກໍເຫັນວ່າມີອາດຊະຍາກຳ ຄວາມຮຸນແຮງ ແລະການກໍ່ການຮ້າຍ. (ມທ. 24:12) ພະເຢຊູບໍ່ໄດ້ບອກວ່າເລື່ອງນີ້ຈະມີຜົນກະທົບຕໍ່ຜູ້ທີ່ບໍ່ໄດ້ຮັບໃຊ້ພະເຢໂຫວາເທົ່ານັ້ນ ເພາະຜູ້ຮັບໃຊ້ຂອງພະເຢໂຫວາຫຼາຍຄົນກໍເຈິກັບເຫດການນີ້ຄືກັນ. (ອຊຢ. 57:1; 2ກຣ. 11:25) ພະເຢໂຫວາອາດຈະບໍ່ໄດ້ເຮັດການອັດສະຈັນເພື່ອປົກປ້ອງເຮົາຈາກບັນຫາ ແຕ່ເພິ່ນຈະໃຫ້ເຮົາມີສິ່ງທີ່ຈຳເປັນເຊິ່ງຈະຊ່ວຍເຮົາໃຫ້ສະຫງົບໃຈໄດ້.
10. ເປັນຫຍັງການກຽມພ້ອມຕັ້ງແຕ່ຕອນນີ້ກ່ອນທີ່ຈະມີໄພພິບັດຈຶ່ງເປັນການສະແດງຄວາມເຊື່ອໃນພະເຢໂຫວາ? (ສຸພາສິດ 22:3)
10 ຖ້າເຮົາກຽມຕົວລ່ວງໜ້າວ່າຈະຮັບມືກັບໄພພິບັດແນວໃດ ມັນກໍງ່າຍທີ່ເຮົາຈະສະຫງົບໃຈເມື່ອເກີດເຫດສຸກເສີນ. ແຕ່ການກຽມຕົວລ່ວງໜ້າສະແດງວ່າເຮົາບໍ່ໄວ້ໃຈພະເຢໂຫວາບໍ? ບໍ່. ທີ່ຈິງ ການກຽມຕົວລ່ວງໜ້າເປັນການສະແດງຄວາມເຊື່ອໃນພະເຢໂຫວາ. ເພາະຄຳພີໄບເບິນກໍບອກໃຫ້ເຮົາກຽມຕົວລ່ວງໜ້າກັບໄພພິບັດທີ່ຈະເກີດຂຶ້ນ. (ອ່ານສຸພາສິດ 22:3) ອົງການຂອງພະເຢໂຫວາເຕືອນເຮົາຕະຫຼອດຜ່ານທາງບົດຄວາມໃນປຶ້ມຕ່າງໆ ການປະຊຸມປະຈຳປະຊາຄົມແລະຄຳປະກາດເພື່ອໃຫ້ເຮົາກຽມພ້ອມກັບໄພພິບັດທີ່ຈະເກີດຂຶ້ນ.c ເຮົາໄວ້ໃຈພະເຢໂຫວາບໍ? ຖ້າເຮົາໄວ້ໃຈເພິ່ນ ເຮົາກໍຄວນຈະເຮັດຕາມຄຳແນະນຳຂອງເພິ່ນຕັ້ງແຕ່ຕອນນີ້ ກ່ອນທີ່ຈະມີໄພພິບັດ.
ການກຽມຕົວລ່ວງໜ້າຈະຊ່ວຍເຈົ້າໃຫ້ລອດຈາກໄພພິບັດ (ເບິ່ງຂໍ້ 11)d
11. ເຈົ້າໄດ້ບົດຮຽນຫຍັງຈາກຕົວຢ່າງຂອງມາກາເຣັດ?
11 ໃຫ້ເຮົາມາເບິ່ງປະສົບການຂອງພີ່ນ້ອງຍິງທີ່ຊື່ ມາກາເຣັດ. ເຈົ້າໜ້າທີ່ໄດ້ບອກລາວໃຫ້ຟ້າວອອກຈາກເຮືອນເພາະມີໄຟປ່າເກີດຂຶ້ນໃນບ່ອນທີ່ລາວຢູ່. ຍ້ອນມີຫຼາຍຄົນອົບພະຍົບອອກຈາກບ່ອນນັ້ນ ເລີຍເຮັດໃຫ້ລົດຕິດເຕັມຫົນທາງຈົນເໜັງໄປໃສບໍ່ໄດ້ ອາກາດກໍກາຍເປັນຄວັນດຳໝົດ ແລະມາກາເຣັດກໍອອກຈາກລົດບໍ່ໄດ້ເລີຍ. ແຕ່ໃນທີ່ສຸດມາກາເຣັດກໍລອດ ເພາະລາວໄດ້ກຽມພ້ອມຢ່າງດີ. ລາວມີແຜນທີ່ທີ່ບອກທາງລັດເພື່ອຈະໜີໄປໄດ້ງ່າຍໃນຍາມສຸກເສີນແລະລາວກໍເກັບແຜນທີ່ນັ້ນໄວ້ໃນກະເປົ໋າເງິນ. ກ່ອນທີ່ຈະເກີດໄພພິບັດ ລາວໄດ້ລອງຂັບລົດໄປຕາມເສັ້ນທາງນັ້ນເພື່ອຈະຮູ້ວ່າຕ້ອງໄປທາງໃດ. ຍ້ອນມາກາເຣັດກຽມພ້ອມຢ່າງດີ ລາວຈຶ່ງລອດຈາກເຫດການຄັ້ງນັ້ນ.
12. ເປັນຫຍັງການເຮັດຕາມຄຳແນະນຳຈຶ່ງປົກປ້ອງເຮົາ?
12 ເພື່ອຈະປົກປ້ອງເຮົາແລະຄົນອື່ນ ອຳນາດການປົກຄອງອາດຈະຂໍໃຫ້ເຮົາເຮັດຕາມຄຳສັ່ງຕ່າງໆ ເຊັ່ນ: ຫ້າມອອກຈາກເຮືອນໃນເວລາທີ່ກຳນົດໄວ້ ອົບພະຍົບ ຫຼືຄຳແນະນຳອື່ນໆ. ບາງຄົນບໍ່ຢາກເຮັດຕາມຄຳແນະນຳນັ້ນທັນທີ ແລະບາງຄົນກໍບໍ່ຢາກເຮັດຕາມເລີຍ ເພາະເຂົາເຈົ້າເປັນຫ່ວງວັດຖຸສິ່ງຂອງ. ແລ້ວຄລິດສະຕຽນຄວນເຮັດແນວໃດ? ຄຳພີໄບເບິນບອກວ່າ: “ເພື່ອເຫັນແກ່ຜູ້ເປັນນາຍ ໃຫ້ພວກເຈົ້າຍອມຢູ່ໃຕ້ອຳນາດທຸກຢ່າງທີ່ມະນຸດຕັ້ງຂຶ້ນ ບໍ່ວ່າຈະເປັນກະສັດທີ່ມີອຳນາດສູງກວ່າ ຫຼືເຈົ້າແຂວງເຊິ່ງກະສັດສົ່ງມາ.” (1ປຕ. 2:13, 14) ອົງການຂອງພະເຢໂຫວາຍັງໃຫ້ຄຳແນະນຳທີ່ຊ່ວຍປົກປ້ອງເຮົາ ເຊັ່ນ: ຜູ້ດູແລມັກຈະບອກເຮົາໃຫ້ເອົາຂໍ້ມູນຕິດຕໍ່ຫຼ້າສຸດຂອງເຮົາໃຫ້ເຂົາເຈົ້າ ເພື່ອທີ່ເຂົາເຈົ້າຈະຕິດຕໍ່ເຮົາໄດ້ຍາມທີ່ເກີດເຫດສຸກເສີນ. ເຈົ້າໄດ້ເຮັດຕາມຄຳແນະນຳນີ້ແລ້ວບໍ? ນອກຈາກນັ້ນ ເຮົາອາດໄດ້ຮັບຄຳແນະນຳວ່າຈະຕ້ອງໄດ້ຢູ່ເຮືອນຄືເກົ່າຫຼືຕ້ອງໄດ້ອົບພະຍົບອອກໄປ ຈະຮັບເອົາເຄື່ອງບັນເທົາທຸກຕອນໃດແລະຈະຊ່ວຍເຫຼືອຄົນອື່ນແນວໃດ. ຖ້າເຮົາບໍ່ເຊື່ອຟັງ ເຮົາອາດເຮັດໃຫ້ເຮັດຕົວເອງແລະຜູ້ດູແລຕົກຢູ່ໃນອັນຕະລາຍ. ຂໍໃຫ້ຈື່ໄວ້ວ່າ ຜູ້ດູແລເຫຼົ່ານີ້ກຳລັງເບິ່ງແຍງເຮົາຢູ່. (ຮຣ. 13:17) ມາກາເຣັດບອກວ່າ: “ຂ້ອຍໝັ້ນໃຈວ່າການເຮັດຕາມຄຳແນະນຳຂອງຜູ້ດູແລ ແລະອົງການຂອງພະເຢໂຫວາໄດ້ປົກປ້ອງຊີວິດຂ້ອຍແທ້ໆ.”
13. ສິ່ງໃດເຮັດໃຫ້ຄລິດສະຕຽນທີ່ອົບພະຍົບໄປຢູ່ບ່ອນອື່ນຍັງມີຄວາມສຸກແລະສະຫງົບໃຈໄດ້?
13 ພີ່ນ້ອງຫຼາຍຄົນຕ້ອງໄດ້ອົບພະຍົບອອກຈາກເຮືອນຊານບ້ານຊ່ອງຍ້ອນສົງຄາມ ໄພພິບັດ ຫຼືຄວາມບໍ່ສະຫງົບໃນສັງຄົມ. ເຂົາເຈົ້າໄດ້ພະຍາຍາມຫຼາຍແທ້ໆທີ່ຈະປັບໂຕໃຫ້ເຂົ້າກັບບ່ອນຢູ່ໃໝ່ ແລະຮັບໃຊ້ພະເຢໂຫວາຫຼາຍຂຶ້ນ. ຄືກັບຄລິດສະຕຽນໃນສະຕະວັດທຳອິດທີ່ກະຈັດກະຈາຍກັນໄປຍ້ອນຖືກຂົ່ມເຫງ ແຕ່ເຂົາເຈົ້າກໍຍັງເຮັດວຽກ “ປະກາດຂ່າວດີ” ຕໍ່ໆໄປ. (ກຈກ. 8:4) ການປະກາດຊ່ວຍເຂົາເຈົ້າໃຫ້ເບິ່ງໄປທີ່ການປົກຄອງຂອງພະເຈົ້າ ແທນທີ່ຈະເບິ່ງແຕ່ບັນຫາຂອງຕົວເອງ. ນີ້ຈຶ່ງເຮັດໃຫ້ເຂົາເຈົ້າຍັງມີຄວາມສຸກແລະສະຫງົບໃຈໄດ້.
ເຮົາສະຫງົບໃຈໄດ້ເຖິງຈະຖືກຂົ່ມເຫງ
14. ການຂົ່ມເຫງຈະເຮັດໃຫ້ເຮົາບໍ່ສະຫງົບໃຈແນວໃດ?
14 ການຂົ່ມເຫງສາມາດເຮັດໃຫ້ເຮົາບໍ່ສະຫງົບໃຈ. ເຮົາມີຄວາມສຸກຫຼາຍຕອນທີ່ເຮົາສາມາດພົບກັບພີ່ນ້ອງ ໄປປະກາດນຳກັນ ແລະເຮັດສິ່ງຕ່າງໆທີ່ເຮົາເຄີຍເຮັດເປັນປະຈຳໂດຍທີ່ບໍ່ຕ້ອງຢ້ານວ່າຈະຖືກຈັບ. ແຕ່ຖ້າເຮົາບໍ່ມີອິດສະຫຼະທີ່ຈະເຮັດສິ່ງເຫຼົ່ານີ້ ເຮົາອາດຈະຮູ້ສຶກອຸກໃຈແລະຢ້ານວ່າຕໍ່ຈາກນີ້ຈະເປັນແນວໃດ. ເປັນເລື່ອງທຳມະດາທີ່ຈະຮູ້ສຶກແບບນີ້ ແຕ່ເຮົາຕ້ອງລະວັງ ເພາະພະເຢຊູບອກວ່າການຂົ່ມເຫງສາມາດເຮັດໃຫ້ພວກລູກສິດສູນເສຍຄວາມເຊື່ອໄດ້. (ຢຮ. 16:1, 2) ແລ້ວເຮົາຕ້ອງເຮັດຫຍັງເພື່ອຈະຍັງມີຄວາມສະຫງົບໃຈເຖິງວ່າຈະຖືກຂົ່ມເຫງ?
15. ເປັນຫຍັງເຮົາບໍ່ຄວນຢ້ານການຂົ່ມເຫງ? (ໂຢຮັນ 15:20; 16:33)
15 ຄຳພີໄບເບິນບອກວ່າ: “ທຸກຄົນ ທີ່ຕັ້ງໃຈໃຊ້ຊີວິດດ້ວຍຄວາມເຫຼື້ອມໃສພະເຈົ້າແລະເປັນລູກສິດຂອງພະຄລິດເຢຊູກໍຈະຖືກຂົ່ມເຫງຄືກັນ.” (2ຕມ. 3:12) ພີ່ນ້ອງຊາຍທີ່ຊື່ ອັນເດຣ ຍາກທີ່ຈະຍອມຮັບຄວາມຈິງໃນເລື່ອງນີ້ຫຼັງຈາກທີ່ວຽກປະກາດໃນປະເທດຂອງລາວຖືກສັ່ງຫ້າມ. ລາວຫາເຫດຜົນກັບຕົວເອງວ່າ: ‘ຢູ່ນີ້ມີພະຍານພະເຢໂຫວາບັກຫຼາຍໆຄົນ ຕຳຫຼວດຄືຊິຈັບໝົດທຸກຄົນບໍ່ໄດ້ດອກ!’ ການຄິດແບບນັ້ນບໍ່ໄດ້ເຮັດໃຫ້ອັນເດຣສະຫງົບໃຈ ລາວອຸກໃຈຫຼາຍ. ແຕ່ພີ່ນ້ອງຄົນອື່ນໆໄດ້ໄວ້ໃຈພະເຢໂຫວາ ແລະບໍ່ໄດ້ຄິດວ່າຕົວເອງຈະບໍ່ຖືກຈັບ ເຂົາເຈົ້າຮູ້ວ່າມື້ໃດມື້ໜຶ່ງອາດຈະຖືກຈັບກໍໄດ້. ການຄິດແບບນີ້ເຮັດໃຫ້ເຂົາເຈົ້າຮູ້ສຶກອຸກໃຈໜ້ອຍກວ່າອັນເດຣ. ໃນທີ່ສຸດ ອັນເດຣກໍປັບຄວາມຄິດຂອງຕົວເອງແລະໄວ້ໃຈພະເຢໂຫວາ. ບໍ່ດົນລາວກໍຮູ້ສຶກສະຫງົບໃຈແລະມີຄວາມສຸກໄດ້ເຖິງວ່າຈະຍັງມີບັນຫາຢູ່. ເລື່ອງນີ້ສາມາດເກີດຂຶ້ນກັບເຮົາໄດ້ຄືກັນ. ເຖິງພະເຢຊູຈະບອກວ່າເຮົາຕ້ອງເຈິການຂົ່ມເຫງ ແຕ່ເພິ່ນກໍຮັບຮອງກັບເຮົາວ່າເຮົາຈະຮັກສາຄວາມສັດຊື່ໄດ້.—ອ່ານໂຢຮັນ 15:20; 16:33
16. ເຮົາຕ້ອງເຮັດຕາມຄຳແນະນຳຫຍັງຕອນທີ່ຖືກຂົ່ມເຫງ?
16 ເມື່ອວຽກປະກາດຂອງເຮົາຖືກສັ່ງຫ້າມຫຼືຖືກຈຳກັດ ເຮົາອາດໄດ້ຮັບຄຳແນະນຳຈາກສຳນັກງານສາຂາແລະຜູ້ດູແລ. ຄຳແນະນຳເຫຼົ່ານີ້ຈະຊ່ວຍປົກປ້ອງເຮົາແລະເຮັດໃຫ້ແນ່ໃຈວ່າເຮົາຈະໄດ້ຮັບຄວາມຮູ້ທີ່ເສີມຄວາມເຊື່ອເຊິ່ງຈະຊ່ວຍເຮົາໃຫ້ເຮັດວຽກປະກາດຕໍ່ໆໄປເທົ່າທີ່ເຮັດໄດ້. ໃຫ້ເຮົາພະຍາຍາມເຮັດຕາມຄຳແນະນຳທຸກຢ່າງທີ່ໄດ້ຮັບເຖິງວ່າຈະບໍ່ເຂົ້າໃຈທັງໝົດກໍຕາມ. (ຢກບ. 3:17) ນອກຈາກນັ້ນ ຂໍເຮົາຢ່າບອກຂໍ້ມູນຂອງພີ່ນ້ອງແລະຂອງປະຊາຄົມໃຫ້ກັບຜູ້ທີ່ບໍ່ມີສິດຮູ້.—ຜູ້ປ. 3:7
ສິ່ງໃດຈະຊ່ວຍເຮົາໃຫ້ມີຄວາມສະຫງົບໃຈຕອນທີ່ເຈິຄວາມຍາກລຳບາກ. (ເບິ່ງຂໍ້ 17)e
17. ຄືກັບພວກອັກຄະສາວົກໃນສະຕະວັດທຳອິດ ເຮົາຄວນຕັ້ງໃຈທີ່ຈະເຮັດຫຍັງ?
17 ເຫດຜົນຫຼັກຢ່າງໜຶ່ງທີ່ຊາຕານຕໍ່ຕ້ານປະຊາຊົນຂອງພະເຈົ້າກໍຍ້ອນເຂົາເຈົ້າ “ເຮັດວຽກປະກາດເລື່ອງພະເຢຊູ.” (ພນມ. 12:17) ຢ່າຍອມໃຫ້ຊາຕານແລະຄົນຂອງມັນມາເຮັດໃຫ້ເຮົາຢ້ານ. ຖ້າເຮົາປະກາດແລະສອນຕໍ່ໆໄປເຖິງວ່າຈະຖືກຕໍ່ຕ້ານ ເຮົາຈະມີຄວາມສຸກແລະຄວາມສະຫງົບໃຈ. ໃນສະຕະວັດທຳອິດ ຜູ້ທີ່ມີອຳນາດຄົນຢິວໄດ້ສັ່ງໃຫ້ພວກອັກຄະສາວົກເຊົາປະກາດ. ແຕ່ເຂົາເຈົ້າກໍເລືອກທີ່ຈະເຊື່ອຟັງພະເຈົ້າຫຼາຍກວ່າ ເຂົາເຈົ້າຍັງປະກາດຕໍ່ໆໄປແລະວຽກນີ້ເຮັດໃຫ້ເຂົາເຈົ້າມີຄວາມສຸກ. (ກຈກ. 5:27-29, 41, 42) ກໍແມ່ນຢູ່ວ່າເມື່ອວຽກປະກາດຂອງເຮົາຖືກສັ່ງຫ້າມເຮົາຕ້ອງໄດ້ລະວັງຫຼາຍຂຶ້ນຕອນທີ່ປະກາດ ແຕ່ຖ້າເຮົາພະຍາຍາມທີ່ຈະປະກາດຕໍ່ໆໄປ ເຮົາກໍຈະມີຄວາມສຸກທີ່ໄດ້ເຮັດໃຫ້ພະເຢໂຫວາພໍໃຈ ແລະໄດ້ປະກາດຂ່າວສານທີ່ຊ່ວຍຊີວິດຜູ້ຄົນໃຫ້ລອດ.—ມທ. 10:16
“ພະເຈົ້າທີ່ມີສັນຕິສຸກຈະຢູ່ກັບພວກເຈົ້າ”
18. ເຮົາຄວນຈື່ຫຍັງໄວ້ກ່ຽວກັບຜູ້ທີ່ໃຫ້ສັນຕິສຸກກັບເຮົາ?
18 ເຮົາໝັ້ນໃຈວ່າໃນຊ່ວງທີ່ຍາກລຳບາກ ເຮົາສາມາດມີຄວາມສະຫງົບໃຈໄດ້. ເຮົາຕ້ອງຈື່ໄວ້ວ່າຄວາມສະຫງົບໃຈຫຼືສັນຕິສຸກທີ່ເຮົາມີ ເປັນສັນຕິສຸກຂອງພະເຈົ້າ ເຊິ່ງມີແຕ່ພະເຢໂຫວາເທົ່ານັ້ນທີ່ຈະໃຫ້ເຮົາໄດ້. ໃຫ້ເຮົາໄວ້ໃຈພະເຢໂຫວາເມື່ອມີໂລກລະບາດ ໄພພິບັດຫຼືການຂົ່ມເຫງ. ໃຫ້ເຮັດຕາມຄຳແນະນຳຂອງອົງການສະເໝີ. ເບິ່ງໄປທີ່ອະນາຄົດທີ່ດີທີ່ລໍຖ້າເຮົາຢູ່ ຖ້າເຮົາເຮັດແບບນີ້ ‘ພະເຈົ້າທີ່ມີສັນຕິສຸກຈະຢູ່ກັບເຮົາ.’ (ຟລປ. 4:9) ໃນບົດຄວາມຕໍ່ໄປ ເຮົາຈະມາເບິ່ງວ່າເຮົາຈະຊ່ວຍພີ່ນ້ອງທີ່ເຈິຄວາມຍາກລຳບາກໃຫ້ມີສັນຕິສຸກຂອງພະເຈົ້າໄດ້ແນວໃດ.
ເພງ 38 ພະອົງຈະເຮັດໃຫ້ເຈົ້າເຂັ້ມແຂງ
a ພະເຢໂຫວາສັນຍາວ່າຈະໃຫ້ສັນຕິສຸກກັບຜູ້ທີ່ຮັກເພິ່ນ. “ສັນຕິສຸກຂອງພະເຈົ້າ” ແມ່ນຫຍັງ ແລະເຮົາຈະມີສັນຕິສຸກນີ້ໄດ້ແນວໃດ? “ສັນຕິສຸກຂອງພະເຈົ້າ” ຈະຊ່ວຍເຮົາແນວໃດເມື່ອມີໂລກລະບາດ ໄພພິບັດ ຫຼືການຂົ່ມເຫງ? ໃນບົດຄວາມນີ້ຈະຕອບຄຳຖາມເຫຼົ່ານີ້.
b ຊື່ສົມມຸດ.
c ເບິ່ງບົດຄວາມທີ່ຊື່ວ່າ “ວິທີລອດຊີວິດຈາກໄພພິບັດ” ໃນຕື່ນເຖີດ ສະບັບທີ 5 2017 (ພາສາໄທ).
d ຄຳອະທິບາຍຮູບພາບ: ພີ່ນ້ອງຍິງທີ່ກຽມຕົວໄວ້ລ່ວງໜ້າສາມາດອົບພະຍົບອອກຈາກບ້ານເມື່ອເກີດເຫດສຸກເສີນ.
e ຄຳອະທິບາຍຮູບພາບ: ພີ່ນ້ອງຊາຍເຊິ່ງຢູ່ໃນເຂດທີ່ວຽກປະກາດຖືກຈຳກັດໄດ້ປະກາດຢ່າງສຸຂຸມຕໍ່ໆໄປ.