ວິທີຊ່ວຍຜູ້ຍິງທີ່ຖືກປະຕິບັດແບບບໍ່ດີ
“ຢູ່ທົ່ວໂລກມີຜູ້ຍິງແລະເດັກນ້ອຍຜູ້ຍິງຫຼາຍລ້ານຄົນຖືກທຳຮ້າຍ. ເຈົ້າເດເຄີຍເຈິເລື່ອງແບບນີ້ຄືກັນບໍ? ຂໍໃຫ້ອ່ານເບິ່ງວ່າເປັນຫຍັງພະເຈົ້າຈຶ່ງຖືວ່າຄວາມປອດໄພຂອງເຈົ້າສຳຄັນສຳລັບເພິ່ນ ແລະໃນອະນາຄົດເພິ່ນຈະເຮັດຫຍັງເພື່ອຊ່ວຍຜູ້ຍິງທີ່ຖືກປະຕິບັດແບບບໍ່ດີ.”
ຂໍ້ຄວາມຂ້າງເທິງນີ້ຍົກມາຈາກຕອນຕົ້ນຂອງບົດຄວາມ “ຊີວິດຜູ້ຍິງມີຄ່າ—ມຸມມອງຈາກຄຳພີໄບເບິນ” ທີ່ຢູ່ໃນເວັບໄຊ jw.org. ໃນຕອນທ້າຍບົດຄວາມມີລິ້ງທີ່ເຈົ້າສາມາດດາວໂຫຼດບົດຄວາມນີ້ເປັນຟາຍພີດີເອັບ (PDF) ແລ້ວກໍພິມອອກໄດ້. ຈາກນັ້ນ ໃຫ້ພັບເປັນຄືກັບແຜ່ນພັບທີ່ມີ 4 ໜ້າ. ພີ່ນ້ອງຍິງຊື່ສະເຕຊີຈາກປະເທດອາເມຣິກາເວົ້າວ່າ: “ຂ້ອຍພິມບົດຄວາມນີ້ຫຼາຍໆໃບ ແລ້ວຂ້ອຍກັບພີ່ນ້ອງຍິງຄົນໜຶ່ງກໍເອົາໄປສູນລີ້ໄພສຳລັບຜູ້ຍິງທີ່ຢູ່ໃນເຂດປະກາດຂອງປະຊາຄົມເຮົາ.”
ພະນັກງານຄົນໜຶ່ງທີ່ເຮັດວຽກຢູ່ຫັ້ນຂໍບົດຄວາມນີ້ຕື່ມອີກເພື່ອຈະເອົາໄປໃຫ້ຄົນທີ່ຢູ່ໃນສູນ. ພີ່ນ້ອງຍິງ 2 ຄົນຈຶ່ງເອົາແຜ່ນພັບນີ້ໄປໃຫ້ຕື່ມອີກ 40 ໃບພ້ອມກັບນາມບັດ jw.org 30 ອັນ. ຕໍ່ມາ ຫົວໜ້າສູນຢາກໃຫ້ພະຍານພະເຢໂຫວາມາສາທິດວິທີຮຽນຄຳພີໄບເບິນໃຫ້ຜູ້ຍິງທີ່ຢູ່ໃນສູນເບິ່ງ.
ພີ່ນ້ອງສະເຕຊີກັບພີ່ນ້ອງຍິງອີກ 2 ຄົນໄປສູນລີ້ໄພອີກບ່ອນໜຶ່ງ ແລະຢູ່ຫັ້ນມີຄົນຮັບເອົາແຜ່ນພັບນີ້ 5 ໃບ ແລະຍັງໄດ້ຂໍຕື່ມອີກ. ພະນັກງານຜູ້ໜຶ່ງທີ່ເຮັດວຽກຢູ່ຫັ້ນເວົ້າວ່າ: “ພວກເຮົາຕ້ອງການແຜ່ນພັບນີ້ຍ້ອນມັນຊ່ວຍພວກຜູ້ຍິງທີ່ຢູ່ນີ້ໄດ້ຫຼາຍອີ່ຫຼີ.” ຕໍ່ມາ ເມື່ອພວກພີ່ນ້ອງຍິງກັບໄປສູນນັ້ນອີກກໍມີຜູ້ຍິງຫຼາຍຄົນມາເບິ່ງການສາທິດວິທີຮຽນຄຳພີໄບເບິນ ແລະມີ 2 ຄົນຢາກເຂົ້າຮ່ວມການປະຊຸມໃນທ້າຍອາທິດຕໍ່ມາຢູ່ຫໍປະຊຸມ.
ພີ່ນ້ອງສະເຕຊີເວົ້າວ່າ: “ເຮົາດີໃຈແທ້ໆທີ່ເຫັນຄົນມີຄວາມສຸກຫຼາຍທີ່ໄດ້ອ່ານບົດຄວາມດີໆແບບນີ້. ເມື່ອພິມອອກມາແລ້ວກໍພັບໃຫ້ເປັນຄືກັບແຜ່ນພັບ ມັນເປັນວິທີທີ່ຄັກອີ່ຫຼີທີ່ຈະບອກເລື່ອງການປົກຄອງຂອງພະເຈົ້າກັບຜູ້ຍິງກຸ່ມທີ່ພິເສດນີ້. ເຮົາດີໃຈຫຼາຍທີ່ເຫັນວ່າຄົນມີຄວາມສຸກແທ້ໆທີ່ໄດ້ຮັບຂ່າວສານແບບນີ້ ແລະເຮົາຕື່ນເຕັ້ນທີ່ຈະເຫັນວິທີທີ່ພະເຢໂຫວາຈະຊ່ວຍເຮົາຕໍ່ໆໄປໃນການປະກາດຂ່າວດີກັບຜູ້ຍິງເຫຼົ່ານີ້.”