ໃຊ້ຊີວິດຕາມການຊີ້ນຳຈາກພະລັງຂອງພະເຈົ້າຕໍ່ໆໄປ!
“ໃຫ້ພວກເຈົ້າໃຊ້ຊີວິດຕາມການຊີ້ນຳຈາກພະລັງຂອງພະເຈົ້າ.”—ຄາລາຊີ 5:16, ລ.ມ.
1, 2. ພີ່ນ້ອງຄົນໜຶ່ງໄດ້ຮູ້ຫຍັງກ່ຽວກັບຕົວເອງ ແລະລາວລົງມືເຮັດແນວໃດ?
ໂຣເບີດຮັບບັບເຕມາຕອນອາຍຸ 15 ປີ ແຕ່ລາວກໍບໍ່ໄດ້ໃຫ້ຄວາມຈິງເປັນສິ່ງສຳຄັນທີ່ສຸດໃນຊີວິດ. ລາວບອກວ່າ: “ຂ້ອຍບໍ່ເຄີຍເຮັດຫຍັງຜິດ ຂ້ອຍກໍເຮັດທຸກຢ່າງຕາມກິດຈະວັດ. ຂ້ອຍເບິ່ງຄືເປັນຄົນທີ່ມີຄວາມເຊື່ອເຂັ້ມແຂງ ຂ້ອຍໄປປະຊຸມເປັນປະຈຳ ແລະຂ້ອຍກໍສະໝັກເປັນໄພໂອເນຍສົບທົບ 2-3 ເທື່ອຕໍ່ປີ. ແຕ່ຂ້ອຍຮູ້ສຶກວ່າມີບາງຢ່າງຂາດຫາຍໄປ.”
2 ໂຣເບີດບໍ່ຮູ້ວ່າສິ່ງທີ່ຂາດຫາຍໄປນັ້ນຄືຫຍັງຈົນຫຼັງຈາກລາວແຕ່ງດອງ ຕອນທີ່ລາວກັບເມຍຫຼິ້ນເກມຖາມຄຳຖາມຈາກຄຳພີໄບເບິນ ເມຍຂອງລາວຮູ້ຈັກຄຳພີໄບເບິນຫຼາຍກວ່າລາວແລະຕອບຄຳຖາມໄດ້ງ່າຍໆ. ແຕ່ຫຼາຍເທື່ອໂຣເບີດຕອບບໍ່ຄ່ອຍໄດ້ແລະຮູ້ສຶກອາຍ. ລາວບອກວ່າ: “ມັນຄືກັບວ່າຂ້ອຍບໍ່ຮູ້ຫຍັງເລີຍ ຂ້ອຍຄິດໃນໃຈວ່າ ‘ຂ້ອຍຈະໃຫ້ເມຍນຳໜ້າຂ້ອຍເລື່ອງຄວາມເຊື່ອບໍນິ? ຂ້ອຍຕ້ອງເຮັດຫຍັງຈັກຢ່າງ!’” ແລ້ວລາວກໍໄດ້ລົງມືເຮັດ. ໂຣເບີດເລົ່າວ່າ: “ຂ້ອຍສຶກສາຄົ້ນຄວ້າຄຳພີໄບເບິນ ສຶກສາຫຼາຍອີ່ຫຼີ ແລະເມື່ອເຮັດແບບນີ້ຂ້ອຍກໍຮູ້ສຶກດີຂຶ້ນ. ຂ້ອຍເຂົ້າໃຈຄຳພີໄບເບິນຫຼາຍຂຶ້ນ ແລະທີ່ສຳຄັນທີ່ສຸດຄືຂ້ອຍສະໜິດກັບພະເຢໂຫວາຫຼາຍຂຶ້ນ.”
3. (ກ) ເຮົາໄດ້ບົດຮຽນຫຍັງແດ່ຈາກເລື່ອງຂອງໂຣເບີດ? (ຂ) ມີຈຸດສຳຄັນຫຍັງແດ່ທີ່ເຮົາຈະເບິ່ງນຳກັນ?
3 ເລື່ອງຂອງໂຣເບີດໃຫ້ບົດຮຽນທີ່ສຳຄັນກັບເຮົາຫຼາຍແທ້ໆ. ເຮົາອາດມີຄວາມຮູ້ໃນຄຳພີໄບເບິນ ເຂົ້າຮ່ວມປະຊຸມເປັນປະຈຳ ແລະອອກປະກາດເລື້ອຍໆ ແຕ່ນີ້ກໍບໍ່ໄດ້ເຮັດໃຫ້ເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ເຖິງວ່າເຮົາໄດ້ຮັບການຊີ້ນຳຈາກພະລັງຂອງພະເຈົ້າຢູ່ແລ້ວ ແຕ່ເມື່ອເຮົາກວດສອບຕົວເອງ ເຮົາກໍຈະເຫັນວິທີທີ່ຈະປັບປຸງໄດ້. (ຟີລິບ 3:16) ໃນບົດຄວາມນີ້ ເຮົາຈະຕອບຄຳຖາມ 3 ຂໍ້ທີ່ສຳຄັນ: (1) ອັນໃດຈະຊ່ວຍໃຫ້ເຮົາຮູ້ວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະສະໜິດກັບພະອົງ? (2) ເຮົາຈະສະໜິດກັບພະເຈົ້າຫຼາຍຂຶ້ນໄດ້ແນວໃດ? (3) ການສະໜິດກັບພະເຈົ້າສົ່ງຜົນຕໍ່ຊີວິດປະຈຳວັນຂອງເຮົາແນວໃດ?
ເຮົາຈະຮູ້ໄດ້ແນວໃດວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະສະໜິດກັບພະອົງ?
4. ຄຳແນະນຳໃນເອເຟດ 4:23, 24 ໃຊ້ກັບໃຜ?
4 ກ່ອນຈະຮັບບັບເຕມາ ເຮົາໄດ້ປ່ຽນແປງຕົວເອງຫຼາຍຢ່າງເຊິ່ງສົ່ງຜົນຕໍ່ທຸກແງ່ມຸມຂອງຊີວິດ ແຕ່ການປ່ຽນແປງນັ້ນບໍ່ໄດ້ຈົບຢູ່ທີ່ການຮັບບັບເຕມາ. ຄຳພີໄບເບິນບອກໃຫ້ເຮົາ “ປ່ຽນຄວາມຄິດຈິດໃຈໃໝ່ຢ່າງຕໍ່ເນື່ອງ.” (ເອເຟດ 4:23, 24, ລ.ມ.) ຍ້ອນເຮົາເປັນຄົນບໍ່ສົມບູນແບບ ເຮົາຈຶ່ງຕ້ອງເຮັດການປ່ຽນແປງຢ່າງຕໍ່ເນື່ອງ. ເຖິງວ່າເຮົາຈະຮັບໃຊ້ພະເຢໂຫວາມາຫຼາຍປີ ເຮົາກໍຕ້ອງເຮັດໃຫ້ສາຍສຳພັນຂອງເຮົາກັບພະເຢໂຫວາເຂັ້ມແຂງຢູ່ສະເໝີ.—ຟີລິບ 3:12, 13
5. ມີຄຳຖາມຫຍັງແດ່ທີ່ຈະຊ່ວຍໃຫ້ເຮົາຮູ້ວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຫຼືບໍ່?
5 ບໍ່ວ່າເຮົາຈະຍັງໜຸ່ມຫຼືເຖົ້າແລ້ວ ເຮົາຕ້ອງກວດສອບຕົວເອງຢ່າງສັດຊື່. ເຮົາອາດຖາມຕົວເອງວ່າ: “ຂ້ອຍຮູ້ສຶກໄດ້ບໍວ່າຂ້ອຍໃຫ້ພະລັງຂອງພະເຈົ້າຊີ້ນຳແລະສະໜິດກັບພະອົງຫຼາຍຂຶ້ນ? ຂ້ອຍຄືກັບພະເຍຊູຫຼາຍຂຶ້ນບໍ? ຄວາມຄິດແລະການກະທຳຂອງຂ້ອຍຢູ່ທີ່ການປະຊຸມບົ່ງບອກວ່າຂ້ອຍເປັນຄົນແນວໃດ? ເລື່ອງທີ່ຂ້ອຍເວົ້າສະແດງໃຫ້ເຫັນແນວໃດວ່າອັນໃດຄືສິ່ງທີ່ຂ້ອຍຕ້ອງການແທ້ໆໃນຊີວິດ? ນິດໄສການສຶກສາສ່ວນຕົວ ການແຕ່ງຕົວ ແລະວິທີທີ່ຂ້ອຍຕອບຮັບຄຳແນະນຳບົ່ງບອກວ່າຂ້ອຍເປັນຄົນແນວໃດ? ເມື່ອຂ້ອຍຖືກລໍ້ໃຈໃຫ້ເຮັດຜິດ ຂ້ອຍເຮັດແນວໃດ? ຂ້ອຍພະຍາຍາມຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ບໍ?” (ເອເຟດ 4:13) ຄຳຖາມເຫຼົ່ານີ້ຈະຊ່ວຍເຮົາໃຫ້ຮູ້ວ່າເຮົາສະໜິດກັບພະເຈົ້າຫຼາຍສ່ຳໃດ.
6. ມີອັນໃດອີກທີ່ຊ່ວຍເຮົາໃຫ້ຮູ້ວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຫຼືບໍ່?
6 ບາງຄັ້ງ ເຮົາຕ້ອງໃຫ້ຄົນອື່ນຊ່ວຍເພື່ອຈະຮູ້ວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະສະໜິດກັບພະອົງຫຼືບໍ່. ໂປໂລບອກວ່າຄົນທີ່ຄິດແບບໂລກຈະບໍ່ເຂົ້າໃຈວ່າການໃຊ້ຊີວິດຂອງເຂົາເຈົ້າເຮັດໃຫ້ພະເຈົ້າບໍ່ພໍໃຈ. ແຕ່ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະເຂົ້າໃຈຄວາມຄິດຂອງພະອົງ ເຂົາເຈົ້າຮູ້ວ່າພະເຈົ້າບໍ່ຍອມຮັບການໃຊ້ຊີວິດແບບໂລກ. (1 ໂກລິນໂທ 2:14-16; 3:1-3) ຜູ້ເຖົ້າແກ່ທີ່ມີຈິດໃຈຢ່າງພະຄລິດຈະສັງເກດເຫັນໄດ້ດີ ເມື່ອພີ່ນ້ອງບາງຄົນເລີ່ມໃຊ້ຊີວິດແບບຄົນທົ່ວໄປໃນໂລກແລະເຂົາເຈົ້າຈະພະຍາຍາມຊ່ວຍພີ່ນ້ອງ. ຖ້າຜູ້ເຖົ້າແກ່ພະຍາຍາມຊ່ວຍເຮົາ ເຮົາຈະຍອມຮັບຄວາມຊ່ວຍເຫຼືອແລະເຮັດຕາມຄຳແນະນຳຂອງເຂົາເຈົ້າບໍ? ຖ້າເຮົາເຮັດຕາມ ເຮົາກໍສະແດງໃຫ້ເຫັນວ່າເຮົາຢາກສະໜິດກັບພະເຈົ້າຫຼາຍຂຶ້ນ.—ຜູ້ເທສະໜາປ່າວປະກາດ 7:5, 9
ສະໜິດກັບພະເຈົ້າຫຼາຍຂຶ້ນ
7. ເຮົາຮູ້ໄດ້ແນວໃດວ່າການມີຄວາມຮູ້ໃນຄຳພີໄບເບິນຍັງບໍ່ພຽງພໍທີ່ຈະເຮັດໃຫ້ເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ?
7 ການມີຄວາມຮູ້ໃນຄຳພີໄບເບິນຍັງບໍ່ພໍທີ່ຈະເຮັດໃຫ້ເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ກະສັດຊາໂລໂມນຮູ້ກ່ຽວກັບພະເຢໂຫວາຫຼາຍແລະສິ່ງທີ່ລາວຂຽນກໍເປັນສ່ວນໜຶ່ງຂອງຄຳພີໄບເບິນນຳ. ແຕ່ຕໍ່ມາສາຍສຳພັນຂອງລາວກັບພະເຢໂຫວາກໍອ່ອນລົງແລະລາວກໍບໍ່ໄດ້ຮັກສາຄວາມສັດຊື່. (1 ກະສັດ 4:29, 30; 11:4-6) ດັ່ງນັ້ນ ນອກຈາກການມີຄວາມຮູ້ໃນຄຳພີໄບເບິນຫຼາຍຂຶ້ນແລ້ວ ເຮົາຍັງຕ້ອງເຮັດຫຍັງອີກ? ເຮົາຕ້ອງເສີມຄວາມເຊື່ອໃຫ້ເຂັ້ມແຂງຕໍ່ໆໄປ. (ໂກໂລດ 2:6, 7) ແຕ່ເຮົາຈະເຮັດແນວໃດ?
8, 9. (ກ) ສິ່ງໃດຈະຊ່ວຍເຮົາໃຫ້ເສີມຄວາມເຊື່ອໃຫ້ເຂັ້ມແຂງ? (ຂ) ຕອນທີ່ເຮົາສຶກສາແລະຄິດຕຶກຕອງ ເຮົາຄວນມີເປົ້າໝາຍຫຍັງ? (ເບິ່ງຮູບທຳອິດ)
8 ໃນສະຕະວັດທຳອິດ ໂປໂລສະໜັບສະໜູນຄລິດສະຕຽນໃຫ້ “ພະຍາຍາມກ້າວໜ້າໄປເພື່ອຈະໄດ້ເປັນຜູ້ໃຫຍ່.” (ເຫບເລີ 6:1, ລ.ມ.) ເຮົາຈະໃຊ້ຄຳແນະນຳນີ້ແນວໃດໃນທຸກມື້ນີ້? ວິທີໜຶ່ງກໍຄືສຶກສາປຶ້ມຈົ່ງຮັກສາຕົວໄວ້ໃນຄວາມຮັກຂອງພະເຈົ້າ ເພາະຈະຊ່ວຍເຈົ້າໃຫ້ຮູ້ວິທີໃຊ້ຫຼັກການໃນຄຳພີໄບເບິນໃນຊີວິດ. ຖ້າເຈົ້າສຶກສາປຶ້ມນີ້ຈົບແລ້ວກໍຍັງມີປຶ້ມອື່ນໆອີກທີ່ເຈົ້າສາມາດໃຊ້ສຶກສາຄົ້ນຄວ້າເພື່ອຈະຊ່ວຍເຈົ້າໃຫ້ມີຄວາມເຊື່ອທີ່ເຂັ້ມແຂງ. (ໂກໂລດ 1:23) ນອກຈາກນັ້ນ ເຮົາຕ້ອງຄິດຕຶກຕອງໃນສິ່ງທີ່ເຮົາຮຽນແລະຂໍພະເຢໂຫວາຊ່ວຍເຮົາໃຫ້ຮູ້ວິທີນຳເອົາໄປໃຊ້ໃນຊີວິດ.
9 ຕອນທີ່ເຮົາສຶກສາແລະຄິດຕຶກຕອງ ເປົ້າໝາຍຂອງເຮົາຄືຢາກເຊື່ອຟັງພະເຢໂຫວາແລະເຮັດໃຫ້ພະອົງພໍໃຈຫຼາຍຂຶ້ນ. (ຄຳເພງ 40:8; 119:97) ນອກຈາກນັ້ນ ເຮົາຍັງຕ້ອງປະຕິເສດທຸກຢ່າງທີ່ຈະເຮັດໃຫ້ເຮົາບໍ່ສະໜິດກັບພະເຢໂຫວາ.—ຕິໂຕ 2:11, 12
10. ໄວໜຸ່ມຈະສະໜິດກັບພະເຈົ້າຫຼາຍຂຶ້ນໄດ້ແນວໃດ?
10 ຖ້າເຈົ້າເປັນໄວໜຸ່ມ ເຈົ້າມີເປົ້າໝາຍໃນວຽກຮັບໃຊ້ບໍ? ພີ່ນ້ອງຊາຍຄົນໜຶ່ງທີ່ຮັບໃຊ້ຢູ່ເບເທນມັກລົມກັບໄວໜຸ່ມທີ່ຈະຮັບບັບເຕມາຢູ່ການປະຊຸມໝວດແລະຖາມເຂົາເຈົ້າວ່າມີເປົ້າໝາຍໃນວຽກຮັບໃຊ້ແນວໃດ. ລາວສັງເກດເຫັນວ່າຫຼາຍຄົນໄດ້ຄິດວາງແຜນຢ່າງດີວ່າຈະຮັບໃຊ້ພະເຢໂຫວາແບບໃດໃນອະນາຄົດ. ບາງຄົນວາງແຜນຮັບໃຊ້ແບບເຕັມເວລາ ແລະບາງຄົນກໍຢາກຮັບໃຊ້ໃນເຂດທີ່ມີຄວາມຕ້ອງການຜູ້ປະກາດຫຼາຍກວ່າ. ແຕ່ບາງຄົນກໍບໍ່ຮູ້ວ່າຈະຕອບຄຳຖາມນີ້ແນວໃດ. ເປັນໄປໄດ້ບໍທີ່ເຂົາເຈົ້າອາດຮູ້ສຶກວ່າບໍ່ຈຳເປັນຕ້ອງມີເປົ້າໝາຍໃນວຽກຮັບໃຊ້? ຖ້າເຈົ້າເປັນໄວໜຸ່ມ ຂໍໃຫ້ຖາມຕົວເອງວ່າ: ‘ຂ້ອຍໄປປະຊຸມໄປປະກາດພຽງເພາະພໍ່ແມ່ຢາກໃຫ້ເຮັດບໍ? ຫຼືຂ້ອຍພະຍາຍາມສ້າງສາຍສຳພັນກັບພະເຢໂຫວາດ້ວຍຕົວເອງ?’ ແນ່ນອນ ເຮົາທຸກຄົນຄວນມີເປົ້າໝາຍໃນວຽກຮັບໃຊ້ບໍ່ວ່າເຮົາຈະຍັງໜຸ່ມຫຼືເຖົ້າແລ້ວ. ເປົ້າໝາຍນີ້ຈະຊ່ວຍເຮົາໃຫ້ສະໜິດກັບພະເຢໂຫວາຫຼາຍຂຶ້ນ.—ຜູ້ເທສະໜາປ່າວປະກາດ 12:1, 13
11. (ກ) ເຮົາຕ້ອງເຮັດຫຍັງເພື່ອຈະເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ? (ຂ) ເຮົາຈະຮຽນແບບຕົວຢ່າງຂອງໃຜໃນຄຳພີໄບເບິນ?
11 ເມື່ອເຮົາຮູ້ແລ້ວວ່າຕ້ອງປັບປຸງຈຸດໃດ ເຮົາກໍຕ້ອງເລີ່ມປ່ຽນ. ສິ່ງນີ້ສຳຄັນຫຼາຍເພາະມັນມີຜົນທີ່ຈະເຮັດໃຫ້ເຮົາໄດ້ຮັບຊີວິດຫຼືຕາຍກໍໄດ້. (ໂລມ 8:6-8) ເຖິງວ່າພະເຢໂຫວາບໍ່ໄດ້ຄາດໝາຍໃຫ້ເຮົາເຮັດໄດ້ຢ່າງສົມບູນແບບແລະພະອົງກໍໃຫ້ພະລັງບໍລິສຸດເພື່ອຊ່ວຍເຮົາ ແຕ່ເຮົາກໍຕ້ອງອອກຄວາມພະຍາຍາມດ້ວຍຕົວເອງ. ພີ່ນ້ອງ ຈອນ ບຣາ ເຊິ່ງເຄີຍຮັບໃຊ້ເປັນຄະນະກຳມະການປົກຄອງເຄີຍອອກຄວາມເຫັນກ່ຽວກັບລືກາ 13:24 ວ່າ: “ຫຼາຍຄົນຜ່ານເຂົ້າປະຕູແຄບກໍບໍ່ໄດ້ເພາະເຂົາເຈົ້າບໍ່ດຸໝັ່ນພໍທີ່ຈະເຮັດໃຫ້ຄວາມເຊື່ອເຂັ້ມແຂງ.” ເຮົາຕ້ອງເປັນຄືກັບຢາໂຄບທີ່ປ້ຳສູ້ກັບທູດສະຫວັນແລະບໍ່ຍອມແພ້ຈົນໄດ້ຮັບພອນ. (ຕົ້ນເດີມ 32:26-28) ເຖິງວ່າການສຶກສາຄຳພີໄບເບິນຈະມ່ວນ ແຕ່ເຮົາບໍ່ຄວນຄາດໝາຍວ່າການອ່ານຄຳພີໄບເບິນຈະມ່ວນຄືກັບການອ່ານນິຍາຍ. ເຮົາຕ້ອງຂຸດຄົ້ນຫາຄວາມຈິງທີ່ມີຄ່າທີ່ໃຫ້ປະໂຫຍດກັບເຮົາ.
12, 13. (ກ) ອັນໃດຈະຊ່ວຍເຮົາໃຫ້ເຮັດຕາມໂລມ 15:5? (ຂ) ຕົວຢ່າງແລະຄຳແນະນຳຂອງເປໂຕຊ່ວຍເຮົາແນວໃດ? (ຄ) ເຈົ້າຈະເຮັດຫຍັງເພື່ອຈະສະໜິດກັບພະເຈົ້າຫຼາຍຂຶ້ນ? (ເບິ່ງຂອບ “ວິທີທີ່ເຈົ້າຈະສະໜິດກັບພະເຈົ້າຫຼາຍຂຶ້ນ.”)
12 ເມື່ອເຮົາພະຍາຍາມສະໜິດກັບພະເຈົ້າຫຼາຍຂຶ້ນ ພະລັງບໍລິສຸດຈະຊ່ວຍໃຫ້ເຮົາປ່ຽນວິທີຄິດ ເຮົາກໍຈະຄ່ອຍໆຮຽນຮູ້ທີ່ຈະຄິດແບບພະຄລິດ. (ໂລມ 15:5) ພະລັງບໍລິສຸດສາມາດຊ່ວຍເຮົາໃຫ້ກຳຈັດຄວາມຕ້ອງການທີ່ຜິດໆແລະພັດທະນາຄຸນລັກສະນະທີ່ພະເຈົ້າພໍໃຈ. (ຄາລາຊີ 5:16, 22, 23) ຖ້າເຮົາເຫັນວ່າຕົວເອງກຳລັງໃຫ້ຄວາມສຳຄັນກັບສິ່ງຝ່າຍວັດຖຸຫຼືຄວາມມ່ວນຊື່ນຫຼາຍເກີນໄປ ເຮົາບໍ່ຄວນຍອມແພ້. ເຮົາຕ້ອງຂໍພະລັງບໍລິສຸດຈາກພະເຢໂຫວາເລື້ອຍໆເພື່ອຊ່ວຍເຮົາໃຫ້ປັບຄວາມຄິດແລະໃຫ້ຄວາມສຳຄັນກັບສິ່ງທີ່ຖືກຕ້ອງ. (ລືກາ 11:13) ຂໍໃຫ້ຄິດເຖິງອັກຄະສາວົກເປໂຕ ລາວບໍ່ໄດ້ຄິດແບບພະຄລິດສະເໝີ. (ມັດທາຍ 16:22, 23; ລືກາ 22:34, 54-62; ຄາລາຊີ 2:11-14) ແຕ່ລາວບໍ່ຍອມແພ້ ແລະພະເຢໂຫວາກໍຊ່ວຍລາວ. ເປໂຕຄ່ອຍໆຮຽນຮູ້ທີ່ຈະຄິດແບບພະຄລິດ ແລະເຮົາກໍເຮັດແບບນັ້ນໄດ້ຄືກັນ.
13 ຕໍ່ມາເປໂຕເວົ້າເຖິງຄຸນລັກສະນະຕ່າງໆທີ່ເຮົາຄວນຈະມີ. (ອ່ານ 2 ເປໂຕ 1:5-8) ເຮົາຕ້ອງພະຍາຍາມຢ່າງໜັກເພື່ອຈະຝຶກໃຫ້ມີການຄວບຄຸມຕົວເອງ ຄວາມອົດທົນ ຄວາມຮັກຕໍ່ພີ່ນ້ອງ ແລະຄຸນລັກສະນະອື່ນໆ. ໃຫ້ເຮົາຖາມຕົວເອງທຸກມື້ວ່າ: ‘ມື້ນີ້ຂ້ອຍຈະສະແດງຄຸນລັກສະນະຫຍັງເພື່ອຈະຊ່ວຍຂ້ອຍສະໜິດກັບພະເຢໂຫວາຫຼາຍຂຶ້ນ?’
ໃຊ້ຫຼັກການຄຳພີໄບເບິນທຸກມື້
14. ການສະໜິດກັບພະເຈົ້າສົ່ງຜົນຕໍ່ຊີວິດປະຈຳວັນຂອງເຮົາແນວໃດ?
14 ຖ້າເຮົາຄິດຄືກັບພະຄລິດ ສິ່ງນີ້ຈະສົ່ງຜົນຕໍ່ການປະພຶດຂອງເຮົາເມື່ອຢູ່ບ່ອນເຮັດວຽກແລະໂຮງຮຽນ ຕໍ່ວິທີທີ່ເຮົາເວົ້າແລະການຕັດສິນໃຈໃນແຕ່ລະມື້. ການຕັດສິນໃຈຂອງເຮົາຈະສະແດງໃຫ້ເຫັນວ່າເຮົາພະຍາຍາມຮຽນແບບພະຄລິດ. ເນື່ອງຈາກເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ ເຮົາບໍ່ຢາກໃຫ້ສິ່ງໃດມາທຳລາຍສາຍສຳພັນຂອງເຮົາກັບພະເຢໂຫວາ. ເມື່ອເຮົາຖືກລໍ້ໃຈໃຫ້ເຮັດສິ່ງທີ່ຜິດ ການສະໜິດກັບພະເຢໂຫວາຈະຊ່ວຍໃຫ້ເຮົາຕ້ານທານການລໍ້ໃຈໄດ້. ກ່ອນທີ່ເຮົາຈະຕັດສິນໃຈ ເຮົາຕ້ອງຢຸດຄິດແລະຖາມຕົວເອງວ່າ: ‘ຫຼັກການຂໍ້ໃດແດ່ໃນຄຳພີໄບເບິນທີ່ຊ່ວຍຂ້ອຍໄດ້? ພະເຍຊູຈະເຮັດແນວໃດເມື່ອເຈິກັບສະຖານະການນີ້? ສິ່ງໃດຈະເຮັດໃຫ້ພະເຢໂຫວາພໍໃຈ? ’ເຮົາຕ້ອງຝຶກຄິດແບບນີ້ຈົນເປັນນິດໄສ. ຂໍໃຫ້ເຮົາມາເບິ່ງບາງສະຖານະການນຳກັນ ແລະເບິ່ງວ່າຫຼັກການໃນຄຳພີໄບເບິນຂໍ້ໃດແດ່ທີ່ຈະຊ່ວຍເຮົາໃຫ້ຕັດສິນໃຈຢ່າງສຸຂຸມ.
15, 16. ການຄິດແບບພະຄລິດຊ່ວຍເຮົາແນວໃດໃຫ້ຕັດສິນໃຈຢ່າງສຸຂຸມກ່ຽວກັບ (ກ) ການເລືອກຄູ່ແຕ່ງດອງ? (ຂ) ການເລືອກໝູ່?
15 ການເລືອກຄູ່ແຕ່ງດອງ. ຫຼັກການໃນຄຳພີໄບເບິນຢູ່ 2 ໂກລິນໂທ 6:14, 15. (ອ່ານ) ໂປໂລບອກຢ່າງຈະແຈ້ງວ່າຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າບໍ່ໄດ້ເບິ່ງສິ່ງຕ່າງໆຄືກັບຄົນທີ່ຄິດແບບໂລກເບິ່ງ. ຫຼັກການນີ້ຊ່ວຍເຈົ້າແນວໃດເມື່ອຕ້ອງເລືອກຄູ່ແຕ່ງດອງ?
16 ການເລືອກໝູ່. ຫຼັກການໃນຄຳພີໄບເບິນຢູ່ 1 ໂກລິນໂທ 15:33. (ອ່ານ) ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະບໍ່ເປັນໝູ່ກັບຄົນທີ່ຈະເຮັດໃຫ້ຄວາມເຊື່ອຂອງລາວອ່ອນແອລົງ. ລອງຄິດເບິ່ງວ່າເຈົ້າຈະໃຊ້ຫຼັກການຂໍ້ນີ້ໄດ້ແນວໃດໃນສະຖານະການຕ່າງໆ ເຊັ່ນ: ຫຼັກການນີ້ຈະຊ່ວຍເຈົ້າແນວໃດໃຫ້ຕັດສິນໃຈເລື່ອງການໃຊ້ເຄືອຂ່າຍສັງຄົມອອນລາຍ? ຫຼັກການນີ້ຈະຊ່ວຍເຈົ້າໃຫ້ຕັດສິນໃຈແນວໃດວ່າຄວນຫຼິ້ນເກມອອນລາຍກັບຄົນແປກໜ້າຫຼືບໍ່?
ການຕັດສິນໃຈໃນເລື່ອງຕ່າງໆຂອງຂ້ອຍຈະຊ່ວຍຂ້ອຍໃຫ້ສະໜິດກັບພະເຈົ້າບໍ? (ເບິ່ງຂໍ້ 17)
17-19. ການເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຊ່ວຍເຈົ້າແນວໃດ (ກ) ໃຫ້ຫຼີກລ່ຽງກິດຈະກຳທີ່ບໍ່ເປັນປະໂຫຍດ? (ຂ) ໃຫ້ມີເປົ້າໝາຍທີ່ດີ? (ຄ) ເມື່ອມີບັນຫາກັບຄົນອື່ນ?
17 ກິດຈະກຳທີ່ເປັນອັນຕະລາຍຕໍ່ສາຍສຳພັນຂອງເຮົາກັບພະເຈົ້າ. ເຮົາພົບຄຳເຕືອນນີ້ໃນເຫບເລີ 6:1. (ອ່ານ) ຈາກຂໍ້ນີ້ “ການທີ່ຕາຍແລ້ວ” ອັນໃດທີ່ເຮົາຄວນຫຼີກລ່ຽງ? ການກະທຳເຫຼົ່ານີ້ຄືກິດຈະກຳທີ່ບໍ່ມີປະໂຫຍດເຊິ່ງບໍ່ໄດ້ຊ່ວຍເຮົາໃຫ້ສະໜິດກັບພະເຢໂຫວາຫຼາຍຂຶ້ນ. ຄຳເຕືອນໃນຂໍ້ນີ້ຊ່ວຍເຮົາໃຫ້ຕອບຄຳຖາມ ເຊັ່ນ: ‘ກິດຈະກຳນີ້ເປັນປະໂຫຍດຫຼືບໍ່? ຂ້ອຍຄວນລົງທຶນໃນທຸລະກິດນີ້ບໍ? ເປັນຫຍັງຂ້ອຍບໍ່ຄວນເຂົ້າຮ່ວມກຸ່ມທີ່ພະຍາຍາມຈະປ່ຽນແປງໂລກ?’
ການຕັດສິນໃຈໃນເລື່ອງຕ່າງໆຂອງຂ້ອຍຈະຊ່ວຍຂ້ອຍຕັ້ງເປົ້າໝາຍໃນວຽກຮັບໃຊ້ບໍ? (ເບິ່ງຂໍ້ 18)
18 ເປົ້າໝາຍໃນວຽກຮັບໃຊ້. ຕອນທີ່ພະເຍຊູບັນລະຍາຍຢູ່ເທິງພູເຂົາ ເພິ່ນໃຫ້ຄຳແນະນຳທີ່ດີກ່ຽວກັບການຕັ້ງເປົ້າໝາຍ. (ມັດທາຍ 6:33) ຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າຈະໃຫ້ລາຊະອານາຈັກຂອງພະເຈົ້າມາເປັນສິ່ງສຳຄັນທີ່ສຸດໃນຊີວິດ. ຫຼັກການຂໍ້ນີ້ຈະຊ່ວຍເຮົາໃຫ້ຕອບຄຳຖາມເຊັ່ນ: ‘ຖ້າຂ້ອຍຮຽນຈົບມັດທະຍົມ ຂ້ອຍຄວນຮຽນຕໍ່ມະຫາວິທະຍາໄລບໍ? ຂ້ອຍຄວນເຮັດວຽກນີ້ບໍ?’
ການຕັດສິນໃຈໃນເລື່ອງຕ່າງໆຂອງຂ້ອຍຈະຊ່ວຍຂ້ອຍຢູ່ຢ່າງສະຫງົບສຸກກັບຄົນອື່ນບໍ? (ເບິ່ງຂໍ້ 19)
19 ມີບັນຫາກັບຄົນອື່ນ. ຄຳແນະນຳທີ່ໂປໂລໃຫ້ກັບຄລິດສະຕຽນໃນໂລມຈະຊ່ວຍເຮົາໄດ້ເມື່ອມີບັນຫາກັບຄົນອື່ນ. (ໂລມ 12:18) ພວກເຮົາທີ່ເປັນຜູ້ຕິດຕາມພະຄລິດຕ້ອງ “ມີຄວາມສຸກສຳລານ [“ຢູ່ຢ່າງສະຫງົບສຸກ,” ລ.ມ.]” ກັບທຸກຄົນ. ເຮົາມີທ່າທີແນວໃດເມື່ອມີບັນຫາກັບຄົນອື່ນ? ເຮົາຮູ້ສຶກວ່າຍາກບໍທີ່ຈະຍອມຮັບຄວາມຄິດຂອງຄົນອື່ນ? ເຮົາເປັນທີ່ຮູ້ຈັກບໍວ່າເຮົາເປັນຄົນທີ່ສ້າງສັນຕິສຸກ?—ຢາໂກໂບ 3:18
20. ເປັນຫຍັງເຈົ້າຢາກໃຊ້ຊີວິດຕາມການຊີ້ນຳຈາກພະລັງຂອງພະເຈົ້າຕໍ່ໆໄປ?
20 ຕົວຢ່າງເຫຼົ່ານີ້ເຮັດໃຫ້ເຫັນວ່າຫຼັກການໃນຄຳພີໄບເບິນຊ່ວຍເຮົາໃຫ້ຕັດສິນໃຈຢ່າງຖືກຕ້ອງ ເຊິ່ງພິສູດວ່າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າ. ຖ້າເຮົາເປັນຄົນທີ່ໄດ້ຮັບການຊີ້ນຳຈາກພະລັງຂອງພະເຈົ້າແລະສະໜິດກັບພະອົງ ເຮົາຈະມີຊີວິດທີ່ມີຄວາມສຸກແລະຄວາມສະຫງົບໃຈ. ໂຣເບີດທີ່ເວົ້າເຖິງໃນຕອນທຳອິດບອກວ່າ: “ເມື່ອຂ້ອຍສະໜິດກັບພະເຢໂຫວາຫຼາຍຂຶ້ນ ຂ້ອຍກໍເປັນຜົວແລະພໍ່ທີ່ດີຂຶ້ນ. ຂ້ອຍມີຄວາມສຸກແລະຄວາມອີ່ມໃຈພໍໃຈ.” ຖ້າເຮົາເຮັດສຸດຄວາມສາມາດເພື່ອຈະໃຊ້ຊີວິດຕາມການຊີ້ນຳຈາກພະລັງຂອງພະເຈົ້າຕໍ່ໆໄປ ເຮົາຍັງຈະໄດ້ຮັບປະໂຫຍດຫຼາຍຢ່າງ. ເຮົາຈະມີຊີວິດທີ່ມີຄວາມສຸກຫຼາຍຂຶ້ນໃນຕອນນີ້ ແລະໃນອະນາຄົດເຮົາຈະໄດ້ ‘ຊີວິດແທ້.’—1 ຕີໂມເຕ 6:19