ພະເຢຊູມີຮູບຮ່າງໜ້າຕາເປັນແນວໃດ?
ຄຳຕອບຈາກຄຳພີໄບເບິນ
ບໍ່ມີໃຜເຄີຍຮູ້ວ່າພະເຢຊູມີຮູບຮ່າງໜ້າຕາເປັນແນວໃດແທ້ໆ ຍ້ອນຄຳພີໄບເບິນບໍ່ໄດ້ບອກ ນີ້ສະແດງໃຫ້ເຫັນວ່າເລື່ອງນີ້ບໍ່ມີຄວາມສຳຄັນຫຍັງ ແຕ່ຄຳພີໄບເບິນກໍຊ່ວຍໃຫ້ເຮົາຮູ້ພໍປະມານວ່າພະເຢຊູມີຮູບຮ່າງໜ້າຕາແນວໃດ.
ໜ້າຕາ: ພະເຢຊູເປັນຄົນຢິວ ແລະອາດຈະມີລັກສະນະຮູບຮ່າງໜ້າຕາແບບຄົນຢິວທີ່ໄດ້ມາຈາກແມ່. (ເຮັບເຣີ 7:14) ໜ້າຕາຂອງພະເຢຊູອາດບໍ່ມີອັນໃດໂດດເດັ່ນເປັນພິເສດ ມີຢູ່ເທື່ອໜຶ່ງທ່ານສາມາດເດີນທາງຈາກແຂວງຄາລີເລໄປເມືອງເຢຣູຊາເລັມໂດຍບໍ່ມີໃຜສັງເກດເຫັນ. (ໂຢຮັນ 7:10, 11) ເບິ່ງຄືວ່າເພິ່ນຈະບໍ່ໄດ້ໂດດເດັ່ນອັນໃດແມ່ນແຕ່ເມື່ອຢູ່ກັບລູກສິດຫຼືຄົນສະໜິດ ຂະໜາດຢູດາອິດສະກາຣີອົດຍັງຕ້ອງບອກຄົນກຸ່ມໃຫຍ່ທີ່ຖືອາວຸດມາຈັບພະເຢຊູວ່າພະເຢຊູຄືຄົນໃດ.—ມັດທາຍ 26:47-49
ຜົມ: ພະເຢຊູອາດຈະບໍ່ຈົ່ງຜົມຍາວຍ້ອນຄຳພີໄບເບິນບອກວ່າ “ຜູ້ຊາຍຈົ່ງຜົມຍາວກໍເຮັດໃຫ້ລາວບໍ່ມີກຽດ.”—1 ໂກຣິນໂທ 11:14
ໜວດ: ພະເຢຊູມີໜວດ ເພິ່ນເຮັດຕາມກົດໝາຍຂອງຄົນຢິວທີ່ຫ້າມບໍ່ໃຫ້ຜູ້ຊາຍ “ຕັດໜວດເຄົາໃຫ້ເປັນຮູບຊົງແປກໆ.” (ລະບຽບພວກເລວີ 19:27; ຄາລາເຕຍ 4:4) ນອກຈາກນີ້ ຄຳພີໄບເບິນຍັງເວົ້າເຖິງໜວດຂອງພະເຢຊູໃນຄຳພະຍາກອນໜຶ່ງທີ່ບອກວ່າເພິ່ນຈະຕ້ອງທົນທຸກ.—ເອຊາຢາ 50:6
ຮູບຮ່າງ: ພະເຢຊູຕ້ອງເປັນຄົນທີ່ຮ່າງກາຍແຂງແຮງແທ້ໆ ເຫັນໄດ້ຈາກໃນຊ່ວງທີ່ເພິ່ນເຮັດວຽກຮັບໃຊ້ ເພິ່ນເດີນທາງຫຼາຍກິໂລແມັດ. (ມັດທາຍ 9:35) ເພິ່ນກຳຈັດຄວາມຊົ່ວໃນວິຫານ 2 ເທື່ອ ຂວ້ຳໂຕະຂອງພວກຄົນຮັບແລກເງິນ ແລະເພິ່ນຍັງເອົາເຊືອກມາເປັນແສ້ແລ້ວໄລ່ສັດອອກຈາກບໍລິເວນວິຫານ. (ລູກາ 19:45, 46; ໂຢຮັນ 2:14, 15) ສາລານຸກົມໄຊໂຄລພີເດຍຂອງແມກຄລິນທອກແລະສະຕຣອງບອກວ່າ: “ເລື່ອງທີ່ກ່ຽວກັບການເຜີຍແຜ່ທັງໝົດຊ່ວຍໃຫ້ເຫັນວ່າ [ພະເຢຊູ] ມີກຳລັງແຂງແຮງດີແລະມີສຸຂະພາບທີ່ແຂງແຮງ.”—ເຫຼັ້ມ 4 ໜ້າ 884
ໃບໜ້າ: ພະເຢຊູເປັນຄົນອົບອຸ່ນແລະມີຄວາມເຫັນອົກເຫັນໃຈຄົນອື່ນ ແລະສິ່ງນີ້ສະທ້ອນອອກມາທາງໃບໜ້າ. (ມັດທາຍ 11:28, 29) ຄົນທຸກຊະນິດມາຫາເພິ່ນເພື່ອຈະໄດ້ກຳລັງໃຈແລະໃຫ້ເພິ່ນຊ່ວຍ. (ລູກາ 5:12, 13; 7:37, 38) ຂະໜາດເດັກນ້ອຍຍັງຮູ້ສຶກສະບາຍໃຈເມື່ອຢູ່ກັບເພິ່ນ.—ມັດທາຍ 19:13-15; ມາຣະໂກ 9:35-37
ຄວາມເຊື່ອຜິດໆກ່ຽວກັບຮູບຮ່າງໜ້າຕາຂອງພະເຢຊູ
ບາງຄົນເຊື່ອວ່າ: ພະເຢຊູອາດຕ້ອງມີເຊື້ອສາຍເປັນຄົນອາຝຼິກກາເພາະໃນປຶ້ມພະນິມິດປຽບທຽບຜົມຂອງເພິ່ນວ່າຄືຂົນແກະແລະປຽບຕີນຂອງເພິ່ນວ່າຄື “ທອງແດງບໍລິສຸດ.”—ພະນິມິດ 1:14, 15
ຄວາມຈິງຄື: ພະນິມິດເປັນປຶ້ມທີ່ຂຽນ “ໂດຍໃຊ້ສັນຍາລັກ.” (ພະນິມິດ 1:1) ມີການໃຊ້ພາສາທີ່ເປັນສັນຍາລັກເມື່ອເວົ້າເຖິງຜົມແລະຕີນຂອງພະເຢຊູເພື່ອອະທິບາຍຄຸນລັກສະນະຂອງເພິ່ນຫຼັງຈາກທີ່ເພິ່ນຄືນມາຈາກຕາຍ ບໍ່ແມ່ນເພື່ອບອກວ່າເພິ່ນມີຮູບຮ່າງແນວໃດຕອນທີ່ຢູ່ເທິງໂລກ. ໃນພະນິມິດ 1:14 ເວົ້າເຖິງພະເຢຊູວ່າ: “ຜົມທີ່ຫົວຂອງເພິ່ນຂາວຄືກັບຂົນແກະສີຂາວແລະຄືກັບຫິມະ” ໃນຂໍ້ນີ້ມີການໃຊ້ສີບໍ່ແມ່ນເສັ້ນຜົມ ເພື່ອປຽບທຽບໃຫ້ເຫັນເຖິງສະຕິປັນຍາທີ່ມາກັບອາຍຸ. (ພະນິມິດ 3:14) ຂໍ້ຄຳພີນີ້ບໍ່ໄດ້ປຽບທຽບເສັ້ນຜົມຂອງຂອງພະເຢຊູວ່າຄືກັບຂົນແກະ ເຊິ່ງກໍຄືກັບທີ່ບໍ່ໄດ້ປຽບທຽບເສັ້ນຜົມຂອງເພິ່ນວ່າຄືກັບຫິມະນຳ.
ຕີນຂອງພະເຢຊູ “ຄືທອງແດງບໍລິສຸດທີ່ເປັ່ງແສງໃນເຕົາຫຼອມ.” (ພະນິມິດ 1:15) ແລະໃບໜ້າຂອງເພິ່ນກໍ “ຄືກັບຕາເວັນທີ່ສ່ອງແສງກ້າ.” (ພະນິມິດ 1:16) ເນື່ອງຈາກບໍ່ມີຄົນຊາດໃດມີສີຜິວແບບນີ້ ນິມິດນີ້ຈຶ່ງເປັນສັນຍາລັກທີ່ສະແດງໃຫ້ເຫັນວ່າພະເຢຊູທີ່ຖືກປຸກໃຫ້ຄືນມາຈາກຕາຍເປັນຜູ້ “ຢູ່ໃນຄວາມສະຫວ່າງທີ່ບໍ່ມີໃຜເຂົ້າເຖິງໄດ້.”—1 ຕີໂມທຽວ 6:16
ບາງຄົນເຊື່ອວ່າ: ພະເຢຊູເປັນຄົນອ່ອນແອແລະຈ່ອຍແຫ້ງແຮງໜ້ອຍ
ຄວາມຈິງຄື: ພະເຢຊູມີຄວາມເຂັ້ມແຂງມີຄວາມເປັນລູກຜູ້ຊາຍຕົວຢ່າງເຊັ່ນ ເພິ່ນກ້າບອກວ່າເພິ່ນເປັນໃຜກັບຄົນກຸ່ມໃຫຍ່ທີ່ຖືອາວຸດມາຈັບເພິ່ນ. (ໂຢຮັນ 18:4-8) ພະເຢຊູຕ້ອງເປັນຄົນທີ່ແຂງແຮງແທ້ໆຍ້ອນຕ້ອງເຮັດວຽກເປັນຊ່າງໄມ້ທີ່ຕ້ອງໃຊ້ເຄື່ອງມືຕ່າງໆທີ່ໃຊ້ແຮງຫຼາຍ.—ມາຣະໂກ 6:3
ແລ້ວເປັນຫຍັງພະເຢຊູຕ້ອງໃຊ້ຄົນຊ່ວຍແບກເສົາທໍລະມານຂອງເພິ່ນ?ແລະເປັນຫຍັງພະເຢຊູຕາຍກ່ອນນັກໂທດອີກ 2 ຄົນທີ່ຖືກປະຫານພ້ອມກັບເພິ່ນ? (ລູກາ 23:26; ໂຢຮັນ 19:31-33) ກ່ອນທີ່ພະເຢຊູຈະຖືກປະຫານຮ່າງກາຍຂອງເພິ່ນອ່ອນແອຫຼາຍແລະບໍ່ໄດ້ນອນໝົດຄືນ ສ່ວນໜຶ່ງກໍເປັນຍ້ອນເພິ່ນຮູ້ສຶກເຄັ່ງຕຶງຫຼາຍ. (ລູກາ 22:42-44) ໃນຄືນນັ້ນ ຄົນຢິວປະຕິບັດກັບເພິ່ນຢ່າງໂຫດຮ້າຍແລະເຊົ້າມື້ຕໍ່ມາຄົນຢິວກໍມາທໍລະມານເພິ່ນອີກ. (ມັດທາຍ 26:67, 68; ໂຢຮັນ 19:1-3) ທັງໝົດນີ້ອາດເຮັດໃຫ້ເພິ່ນເສຍຊີວິດໄວຂຶ້ນ.
ບາງຄົນເຊື່ອວ່າ: ພະເຢຊູມີໜ້າຕາໂສກເສົ້າ ບໍ່ເບີກບານ
ຄວາມຈິງຄື: ພະເຢຊູສະທ້ອນຄຸນລັກສະນະຂອງພະເຢໂຫວາຜູ້ເປັນພໍ່ໃນສະຫວັນຢ່າງສົມບູນແບບ ແລະຄຳພີໄບເບິນເວົ້າເຖິງພະເຢໂຫວາວ່າ “ພະເຈົ້າຜູ້ມີຄວາມສຸກ.” (1 ຕີໂມທຽວ 1:11; ໂຢຮັນ 14:9) ທີ່ຈິງ ພະເຢຊູສອນຜູ້ຄົນໃຫ້ຮູ້ວ່າເຮັດແນວໃດຈຶ່ງຈະມີຄວາມສຸກ. (ມັດທາຍ 5:3-9; ລູກາ 11:28) ສິ່ງເຫຼົ່ານີ້ສະແດງວ່າພະເຢຊູອາດຈະຕ້ອງມີໃບໜ້າທີ່ສະແດງອອກເຖິງຄວາມສຸກຢູ່ສະເໝີ.