ໜຸ່ມສາວຖາມວ່າ
ເປັນຫຍັງຕ້ອງໄປປະຊຸມຢູ່ຫໍປະຊຸມລາຊະອານາຈັກ?
ໃນແຕ່ລະອາທິດ ພະຍານພະເຢໂຫວາຈັດການປະຊຸມຂຶ້ນສອງມື້ໃນສະຖານທີ່ສຳລັບການນະມັດສະການຂອງເຂົາເຈົ້າເຊິ່ງເອີ້ນວ່າ ຫໍປະຊຸມລາຊະອານາຈັກ. ມີການເຮັດຫຍັງແດ່ຢູ່ຫັ້ນແລະເຈົ້າຈະໄດ້ຮັບປະໂຫຍດຫຍັງຈາກການໄປເຂົ້າຮ່ວມປະຊຸມ?
ມີການເຮັດຫຍັງແດ່ຢູ່ຫໍປະຊຸມລາຊະອານາຈັກ?
ຫໍປະຊຸມລາຊະອານາຈັກເປັນສູນການສຶກສາຄຳພີໄບເບິນທີ່ມີຄຳແນະນຳທີ່ໃຊ້ໄດ້ແທ້ໃນຊີວິດ. ການເຂົ້າຮ່ວມປະຊຸມຈະຊ່ວຍໃຫ້ເຈົ້າ:
ຮຽນຄວາມຈິງກ່ຽວກັບພະເຈົ້າ.
ເຂົ້າໃຈຄວາມໝາຍຂອງເຫດການຕ່າງໆທີ່ເກີດຂຶ້ນໃນປັດຈຸບັນ.
ເປັນຄົນທີ່ດີຂຶ້ນ.
ເຈິໝູ່ທີ່ດີ.
ເຈົ້າຮູ້ບໍ? ມີການເອີ້ນສະຖານທີ່ປະຊຸມຂອງພະຍານພະເຢໂຫວາວ່າ ຫໍປະຊຸມລາຊະອານາຈັກ ເພາະມີການເວົ້າລົມກັນກ່ຽວກັບລາຊະອານາຈັກຫຼືການປົກຄອງຂອງພະເຈົ້າຢູ່ຫັ້ນເລື້ອຍໆ.—ມັດທາຍ 6:9, 10; 24:14; ລູກາ 4:43
ເປັນຫຍັງເຈົ້າຄວນເຂົ້າຮ່ວມປະຊຸມ?
ຂໍ້ມູນທີ່ໄດ້ຮັບຈາກການປະຊຸມຊ່ວຍເຈົ້າໄດ້. ຫຼັກການຕ່າງໆໃນຄຳພີໄບເບິນທີ່ພິຈາລະນາຢູ່ການປະຊຸມຂອງພະຍານພະເຢໂຫວາຈະຊ່ວຍເຈົ້າໃຫ້ “ຊອກຫາສະຕິປັນຍາ.” (ສຸພາສິດ 4:5, ລ.ມ.) ນີ້ໝາຍຄວາມວ່າຄຳພີໄບເບິນຊ່ວຍເຈົ້າໃຫ້ຕັດສິນໃຈເລື່ອງຕ່າງໆໃນຊີວິດໄດ້ຢ່າງຖືກຕ້ອງ. ນອກຈາກນັ້ນ ຍັງຊ່ວຍເຈົ້າໃຫ້ພົບຄຳຕອບສຳລັບຄຳຖາມທີ່ສຳຄັນໃນຊີວິດ ເຊັ່ນ:
ນີ້ເປັນບາງຫົວເລື່ອງຂອງຄຳບັນຍາຍທີ່ມີການບັນຍາຍໃນການປະຊຸມທ້າຍອາທິດຂອງພວກເຮົາ:
ເປັນຫຍັງຕ້ອງໃຫ້ຄຳພີໄບເບິນນຳທາງ?
ໃນຍາມທຸກຍາກ ເຈົ້າຈະຫາຄວາມຊ່ວຍເຫຼືອໄດ້ຈາກບ່ອນໃດ?
ການປົກຄອງຂອງພະເຈົ້າກຳລັງເຮັດຫຍັງເພື່ອເຮົາໃນຕອນນີ້?
“ມີໝູ່ນັກຮຽນມາປະຊຸມກັບຂ້ອຍເທື່ອໜຶ່ງ. ລາວນັ່ງກັບຄອບຄົວຂອງເຮົາ ແລະເຮົາໃຫ້ລາວເບິ່ງປຶ້ມນຳກັນກັບເຮົາ. ຫຼັງຈາກນັ້ນ ລາວບອກຂ້ອຍວ່າ ລາວຮູ້ສຶກປະທັບໃຈຫຼາຍກັບຄຳຕອບຂອງຄົນໃນຫໍປະຊຸມໃນສ່ວນທີ່ເປີດໃຫ້ມີການອອກຄວາມຄິດເຫັນ. ລາວຍັງບອກນຳວ່າໂບດຂອງລາວບໍ່ມີໜັງສືສຳລັບສຶກສາຄືກັບຂອງເຮົາ.”—ເບຣນດາ
ເຈົ້າຮູ້ບໍ? ເຈົ້າເຂົ້າຮ່ວມການປະຊຸມໄດ້ຟຣີ ແລະບໍ່ມີການເກັບຫຼືແຜ່ເງິນ.
ການຄົບຫາເວົ້າລົມກັນຈະຊ່ວຍໃຫ້ເຈົ້າໄດ້ກຳລັງໃຈ. ຄຳພີໄບເບິນບອກວ່າເຫດຜົນໜຶ່ງທີ່ຄລິດສະຕຽນຄວນປະຊຸມຮ່ວມກັນກໍເພື່ອ “ໃຫ້ກຳລັງໃຈກັນ.” (ເຮັບເຣີ 10:24, 25) ການຄົບຫາເວົ້າລົມກັນຂອງກຸ່ມຄົນທີ່ສົນໃຈພະເຈົ້າແລະຄົນອື່ນຫຼາຍກວ່າໂຕເອງ ເປັນສິ່ງທີ່ເຮັດໃຫ້ສົດຊື່ນຫຼາຍໃນໂລກທີ່ມີແຕ່ຄວາມເຫັນແກ່ໂຕໃນທຸກມື້ນີ້.
“ຫຼັງຈາກມື້ທີ່ແສນຍາວນານ ຂ້ອຍຮູ້ສຶກໝົດກຳລັງໃຈແລະໝົດແຮງ ແຕ່ຜູ້ຄົນຢູ່ຫໍປະຊຸມລາຊະອານາຈັກເຮັດໃຫ້ຂ້ອຍຮູ້ສຶກດີຂຶ້ນສະເໝີ. ຕອນເມືອເຮືອນຫຼັງຈາກເລີກປະຊຸມ ຂ້ອຍຮູ້ສຶກມີຄວາມສຸກຫຼາຍແລະພ້ອມຮັບມືກັບມື້ຕໍ່ໆໄປ.”—ເອລິສາ
ເຈົ້າຮູ້ບໍ? ຕອນນີ້ມີປະຊາຄົມຂອງພະຍານພະເຢໂຫວາທົ່ວໂລກຫຼາຍກວ່າ 120.000 ປະຊາຄົມ ປະຊຸມກັນໃນບ່ອນຕ່າງໆຫຼາຍກວ່າ 60.000 ບ່ອນ. ໃນແຕ່ລະປີ ມີການສ້າງຫໍປະຊຸມລາຊະອານາຈັກໂດຍສະເລ່ຍ ຫຼາຍກວ່າ 1.500 ບ່ອນເພື່ອຮອງຮັບຈຳນວນຜູ້ເຂົ້າຮ່ວມປະຊຸມທີ່ຫຼາຍຂຶ້ນ.a
a ເພື່ອຊອກຫາສະຖານທີ່ປະຊຸມ ໄປທີ່ໜ້າ “ການປະຊຸມປະຈຳປະຊາຄົມຂອງພະຍານພະເຢໂຫວາ” ແລະກົດ “ຊອກຫາສະຖານທີ່ໃກ້ເຮືອນທ່ານ.”