ບົດ 115
ອຸດທະຍານໃໝ່ເທິງແຜ່ນດິນໂລກ
ຈົ່ງເບິ່ງຕົ້ນໄມ້ສູງໆ ດອກໄມ້ງາມໆ ແລະພູເຂົາສູງເຫຼົ່ານັ້ນ. ທຸກສິ່ງທີ່ນີ້ສວຍງາມແທ້ໆແມ່ນບໍ? ເບິ່ງກວາງພວມກິນອາຫານຈາກມືຂອງເດັກນ້ອຍຄົນນີ້ແດ່. ແລະເບິ່ງສິງໂຕແລະມ້າທີ່ຢືນຢູ່ທົ່ງຫຍ້າທີ່ນັ້ນ. ເຈົ້າຢາກມີເຮືອນເປັນທີ່ອາໄສໃນບ່ອນສວຍແບບນີ້ບໍ?
ພະເຈົ້າຕ້ອງການໃຫ້ເຈົ້າມີຊີວິດຕະຫຼອດໄປເທິງແຜ່ນດິນໂລກ. ພະອົງບໍ່ຢາກຈະໃຫ້ເຈົ້າມີຄວາມເຈັບປວດໃດໆທີ່ຄົນເຮົາໄດ້ຮັບທຸກມື້ນີ້. ພະຄຳພີມີຄຳສັນຍາໄວ້ແກ່ຄົນເຫຼົ່ານັ້ນຜູ້ທີ່ຈະຢູ່ໃນສວນອຸດທະຍານໃໝ່ດັ່ງນີ້: ‘ພະເຈົ້າຈະສະຖິດຢູ່ກັບເຂົາ. ຄວາມຕາຍຫຼືການຮ້ອງໄຫ້ ຫຼືຄວາມເຈັບປວດຈະບໍ່ມີອີກຕໍ່ໄປ. ບັນດາສິ່ງເກົ່າໆໄດ້ຜ່ານພົ້ນໄປແລ້ວ.’
ພະເຍຊູຈະຄອຍດູແລໃຫ້ການປ່ຽນແປງອັນໜ້າພິດສະຫວົງເຊັ່ນນີ້ມີຂຶ້ນ. ເຈົ້າຮູ້ບໍວ່າເມື່ອໃດ? ຈ້າວ ຫຼັງຈາກພະອົງຊຳລະລ້າງຄວາມຊົ່ວຮ້າຍແລະຄົນຊົ່ວທັງໝົດອອກໄປຈາກແຜ່ນດິນໂລກ. ຈື່ໄດ້ບໍ ເມື່ອພະເຍຊູຢູ່ທີ່ແຜ່ນດິນໂລກພະອົງປິ່ນປົວຄົນເຈັບປ່ວຍທຸກຊະນິດໃຫ້ຫາຍດີແລະພະອົງເຖິງກັບໄດ້ປຸກຄົນຕາຍແລ້ວໃຫ້ຂຶ້ນມາ. ພະເຍຊູໄດ້ເຮັດເຊັ່ນນີ້ເພື່ອສະແດງໃຫ້ຮູ້ເຖິງສິ່ງທີ່ພະອົງຈະເຮັດຕະຫຼອດທົ່ວໂລກເມື່ອພະອົງກາຍເປັນກະສັດແຫ່ງລາຊະອານາຈັກຂອງພະເຈົ້າ.
ລອງຄິດເບິ່ງວ່າ ຈະເປັນການດີວິເສດຫຼາຍປານໃດທີ່ຈະໄດ້ຢູ່ໃນອຸດທະຍານໃໝ່ເທິງແຜ່ນດິນໂລກ! ພະເຍຊູຈະປົກຄອງໃນສະຫວັນພ້ອມດ້ວຍຄົນເຫຼົ່ານັ້ນທີ່ພະອົງຄັດເລືອກໄວ້ນັ້ນ. ຜູ້ປົກຄອງເຫຼົ່ານີ້ຈະເອົາໃຈໃສ່ດູແລທຸກໆຄົນເທິງແຜ່ນດິນໂລກ ແລະຄອຍເບິ່ງແຍງໃຫ້ເຂົາມີຄວາມສຸກ. ໃຫ້ເຮົາກວດເບິ່ງວ່າມີອັນໃດທີ່ເຮົາຕ້ອງເຮັດເພື່ອໃຫ້ແນ່ໃຈວ່າ ພະເຈົ້າຈະໃຫ້ເຮົາມີຊີວິດຕະຫຼອດໄປໃນອຸດທະຍານໃໝ່ຂອງພະອົງ.
ຄຳປາກົດ 21:3, 4; 5:9, 10; 14:1-3.