ບົດ 3
ຜູ້ກຽມທາງກຳເນີດແລ້ວ
ເອລີຊາເບດເກືອບຈະຄອດລູກຢູ່ແລ້ວ. ສາມເດືອນທີ່ຜ່ານມານີ້ມາລີໄດ້ພັກເຊົາຢູ່ນຳນາງມາຕະຫຼອດ. ແຕ່ຕອນນີ້ເຖິງເວລາທີ່ມາລີຈະອຳລາແລະທຽວທາງໄກເມືອບ້ານທີ່ນາຊາເລດ. ອີກປະມານຫົກເດືອນນາງກໍຈະຄອດລູກຄືກັນ.
ມາລີກັບໄປບໍ່ດົນ ເອລີຊາເບດກໍໄດ້ຄອດລູກ. ໜ້າຍິນດີແທ້ໆ ທີ່ການຄອດປອດໄພ ແລະເອລີຊາເບດກັບລູກນ້ອຍຕ່າງກໍມີສຸຂະພາບດີ! ເມື່ອເອລີຊາເບດອູ້ມເອົາລູກນ້ອຍອອກມາໃຫ້ເພື່ອນບ້ານແລະພີ່ນ້ອງເບິ່ງ ທຸກຄົນກໍສະແດງຄວາມຍິນດີດ້ວຍກັນກັບນາງ.
ຕາມກົດໝາຍຂອງພະເຈົ້າ ຫຼັງຈາກຄອດໄດ້ແປດມື້ເດັກຊາຍໃນຍິດສະລາເອນຕ້ອງຮັບສິນຕັດ. ໃນໂອກາດນີ້ ເພື່ອນມິດແລະພີ່ນ້ອງຈຶ່ງມາຢາມ. ພວກເຂົາບອກວ່າໜ້າຈະຕັ້ງຊື່ເດັກນັ້ນວ່າຊະຄາເລຍຕາມຊື່ບິດາ. ແຕ່ເອລີຊາເບດທ້ວງວ່າ “ບໍ່ແມ່ນ ແຕ່ວ່າເພິ່ນຈະຊື່ວ່າໂຍຮັນ.” ຈື່ໄດ້ບໍວ່າ ທູດສະຫວັນຄາບລິເອນໄດ້ສັ່ງໃຫ້ຕັ້ງຊື່ເດັກຢ່າງນັ້ນ.
ຢ່າງໃດກໍຕາມ ເພື່ອນຂອງເຂົາຄັດຄ້ານວ່າ “ໃນພວກຍາດຕິພີ່ນ້ອງຂອງນາງ ບໍ່ມີຜູ້ໃດມີຊື່ຢ່າງນັ້ນ.” ດັ່ງນັ້ນພວກເຂົາໃຊ້ພາສາມື ຖາມພໍ່ຂອງເດັກນ້ອຍວ່າຢາກຕັ້ງຊື່ຫຍັງໃຫ້ລູກ. ຊະຄາເລຍຖາມຫາກະດານແລ້ວຂຽນວ່າ “ໂຍຮັນເປັນນາມຊື່ຂອງເພິ່ນ” ເຊິ່ງເຮັດໃຫ້ທຸກຄົນປະຫຼາດໃຈ.
ທັນໃດນັ້ນ ຊະຄາເລຍກໍເວົ້າໄດ້ດັ່ງເດີມຢ່າງອັດສະຈັນ. ເຈົ້າຄົງຈະຈື່ໄດ້ວ່າ ຊະຄາເລຍໄດ້ກາຍເປັນຄົນປາກກືກເມື່ອເຂົາບໍ່ເຊື່ອຄຳຖະແຫຼງຂອງທູດສະຫວັນທີ່ວ່າເອລີຊາເບດຈະມີລູກ. ແລ້ວເມື່ອຊະຄາເລຍເວົ້າໄດ້ ຄົນທັງຫຼາຍທີ່ຢູ່ບໍລິເວນນັ້ນກໍປະຫຼາດໃຈ ແລະຄິດໃນໃຈວ່າ “ເດັກນ້ອຍນັ້ນຈະເປັນສິ່ງໃດ”?
ຕອນນີ້ຊະຄາເລຍເຕັມໄປດ້ວຍພະວິນຍານບໍລິສຸດ ແລະເວົ້າດ້ວຍຄວາມຊື່ນຊົມຍິນດີວ່າ “ຄວາມສັນລະເສີນຈົ່ງມີແກ່ພະເຢໂຫວາ ພະເຈົ້າແຫ່ງພວກຍິດສະລາເອນ ເຫດວ່າພະອົງໄດ້ມາຢາມແລະໄດ້ໄຖ່ພວກຂອງພະອົງ. ແລະໄດ້ກະທຳໃຫ້ເຂົາຊົນແຫ່ງຄວາມພົ້ນ ເກີດສຳລັບພວກເຮົາ ໃນເຊື້ອສາຍຂອງກະສັດດາວິດຂ້າໃຊ້ຂອງພະອົງ.” ແນ່ນອນ “ເຂົາຊົນແຫ່ງຄວາມພົ້ນ” ນີ້ແມ່ນພະເຍຊູອົງພະຜູ້ເປັນເຈົ້າທີ່ຈະໄດ້ເກີດມາ. ຊະຄາເລຍກ່າວວ່າ ໂດຍທາງພະອົງ ພະເຈົ້າ “ຈະໂຜດປະທານໃຫ້ພວກເຮົາທີ່ໄດ້ພົ້ນຈາກມືສັດຕູຂອງເຮົາ ແລ້ວຈຶ່ງຈະບົວລະບັດພະອົງປາສະຈາກຄວາມຢ້ານ. ໃນຄວາມບໍລິສຸດແລະໃນຄວາມຊອບທຳຕໍ່ໜ້າພະເຈົ້າທຸກວັນໆ ເຖິງສຸດອາຍຸຂອງພວກເຮົາ.”
ແລ້ວຊະຄາເລຍບອກລ່ວງໜ້າກ່ຽວກັບລູກຂອງຕົນວ່າ “ເຈົ້າລູກນ້ອຍເອີຍ ເຈົ້າຈະເປັນທີ່ເອີ້ນຊື່ວ່າ ຜູ້ທຳນວາຍຂອງພະເຈົ້າອົງທີ່ສູງສຸດ ເພາະວ່າເຈົ້າຈະໄປກ່ອນໜ້າພະເຢໂຫວາ ເພື່ອຈະຈັດແຈ່ງຫົນທາງທັງຫຼາຍຂອງພະອົງ. ເພື່ອຈະປະທານໃຫ້ພວກຂອງພະອົງຮູ້ຈັກຄວາມພົ້ນດ້ວຍການຍົກບາບໂທດຂອງເຂົາ. ດ້ວຍໃຈສັງເວດແຫ່ງຄວາມອີດູແຫ່ງພະເຈົ້າຂອງພວກເຮົາດ້ວຍຄວາມອີດູນັ້ນແຈ້ງທິດຕາເວັນອອກໄດ້ລົງແຕ່ທັງເທິງມາຢາມພວກເຮົາ. ເພື່ອຈະສ່ອງແຈ້ງແກ່ຄົນທັງຫຼາຍ ທີ່ນັ່ງຢູ່ໃນທີ່ມືດແລະໃນຮົ່ມເງົາແຫ່ງຄວາມຕາຍ ເພື່ອຈະພາຕີນຂອງພວກເຮົາໄປໃນທາງຂອງຄວາມສຸກສຳລານ.”
ຕອນນີ້ມາລີ ເຊິ່ງຍັງບໍ່ໄດ້ແຕ່ງດອງ ໄດ້ກັບມາເຖິງບ້ານໃນເມືອງນາຊາເລດ. ມີຫຍັງຈະເກີດຂຶ້ນກັບນາງເມື່ອປາກົດວ່ານາງມີຄັນ? ລຶກາ 1:56-80; ພວກເລວີ 12:2, 3.
▪ ໂຍຮັນມີອາຍຸຫຼາຍກວ່າພະເຍຊູຈັກເດືອນ?
▪ ເມື່ອຕອນໂຍຮັນອາຍຸໄດ້ແປດມື້ມີສິ່ງໃດເກີດຂຶ້ນ?
▪ ພະເຈົ້າມາຢາມພວກໄພ່ພົນຂອງພະອົງຢ່າງໃດ?
▪ ມີການບອກລ່ວງໜ້າວ່າໂຍຮັນຈະເຮັດວຽກຫຍັງແດ່?