ບົດ 19
ການສອນຍິງສະມາລີ
ລະຫວ່າງທາງຈາກແຂວງຢູເດໄປເຖິງຄາລິເລນັ້ນ ພະເຍຊູແລະສາວົກຂອງພະອົງເດີນທາງຜ່ານແຂວງສະມາລີ. ພວກເຂົາອ່ອນເພຍຈາກການເດີນທາງ ຕົກທ່ຽງເຂົາຈຶ່ງຢຸດພັກຢູ່ນ້ຳສ້າງໃກ້ເມືອງຊີຄາ. ຍາໂຄບໄດ້ຂຸດນ້ຳສ້າງນີ້ໄວ້ຫຼາຍຮ້ອຍປີກ່ອນ ແລະນ້ຳສ້າງນີ້ຍັງຢູ່ຈົນເຖິງທຸກມື້ນີ້ ໃກ້ເມືອງນາບລູສະໄໝປັດຈຸບັນ.
ຂະນະທີ່ພະເຍຊູພັກຜ່ອນຢູ່ຫັ້ນ ສາວົກຂອງພະອົງເຂົ້າໄປໃນເມືອງເພື່ອຫາຊື້ອາຫານ. ເມື່ອຍິງສະມາລີຜູ້ໜຶ່ງມາຕັກນ້ຳ ພະອົງກ່າວວ່າ “ຂໍໃຫ້ເຮົາກິນນ້ຳແດ່ເທີ້ນ.”
ຕາມປົກກະຕິຊາວຢິວແລະຊາວສະມາລີບໍ່ຕິດຕໍ່ຄົບຫາກັນ ເນື່ອງຈາກອະຄະຕິອັນເລິກທີ່ເຂົາມີຕໍ່ກັນ. ດັ່ງນັ້ນ ຍິງນັ້ນຖາມດ້ວຍຄວາມປະຫຼາດໃຈວ່າ “ທ່ານຜູ້ເປັນຊາວຢູເດຈະຂໍກິນນ້ຳແຕ່ຂ້າພະເຈົ້າ ຜູ້ເປັນຍິງຊາວສະມາລີ ເປັນການຢ່າງໃດ”?
ພະເຍຊູຕອບວ່າ “ຖ້າເຈົ້າຮູ້. . . . ເປັນຜູ້ໃດທີ່ກ່າວແກ່ເຈົ້າວ່າ ຂໍໃຫ້ເຮົາກິນນ້ຳແດ່ເທີ້ນ. ເຈົ້າຈະໄດ້ຂໍແຕ່ທ່ານແລະທ່ານຈະໄດ້ປະທານນ້ຳອັນມີຊີວິດຢູ່ໃຫ້ແກ່ເຈົ້າ.”
ນາງຕອບວ່າ “ທ່ານເຈົ້າຂ້າທ່ານບໍ່ມີສິ່ງໜຶ່ງສິ່ງໃດຈະຕັກແລະນ້ຳສ້າງກໍເລິກ ນ້ຳອັນມີຊີວິດນັ້ນທ່ານຈຶ່ງໄດ້ມາແຕ່ໃສ. ທ່ານໃຫຍ່ກວ່າທ່ານຍາໂຄບ ຜູ້ເປັນຕາຂອງພວກຂ້າພະເຈົ້າ ຜູ້ທີ່ໄດ້ປະທານນ້ຳສ້າງນີ້ໃຫ້ພວກຂ້າພະເຈົ້າຫຼື ແລະຕາເອງໄດ້ກິນ ກັບລູກແລະຝູງສັດທັງຫຼາຍແຫ່ງຕົນ.”
ພະເຍຊູຕອບວ່າ “ຄົນທຸກຄົນທີ່ກິນແຕ່ນ້ຳນີ້ກໍຈະຍັງຫິວນ້ຳອີກ. ແຕ່ວ່າຜູ້ທີ່ຈະກິນນ້ຳທີ່ເຮົາຈະປະທານໃຫ້ນັ້ນ ຜູ້ນັ້ນຈະບໍ່ຫອນຫິວນ້ຳສືບໆ ໄປ ແຕ່ວ່ານ້ຳທີ່ເຮົາຈະປະທານແກ່ເພິ່ນຈະເປັນນ້ຳພຸໃນເພິ່ນ ອັນຈະພຸ່ງອອກໃນຊີວິດອັນຕະຫຼອດໄປເປັນນິດ.”
ຜູ້ຍິງນັ້ນຕອບວ່າ “ທ່ານເຈົ້າຂ້າ ຂໍນ້ຳນີ້ໃຫ້ແກ່ຂ້າພະເຈົ້າ ເພື່ອຂ້າພະເຈົ້າຈະບໍ່ຫິວນ້ຳອີກແລະບໍ່ມາຕັກນ້ຳທີ່ນີ້.”
ບັດນີ້ພະເຍຊູກ່າວກັບນາງວ່າ “ຈົ່ງໄປແລະເອີ້ນຜົວຂອງເຈົ້າແລະມາພີ້ເທີ້ນ.”
ນາງຕອບວ່າ “ຂ້າພະເຈົ້າບໍ່ມີຜົວ.”
ພະເຍຊູຢືນຢັນຄຳກ່າວຂອງນາງ. “ເຈົ້າເວົ້າຈິງວ່າ ຂ້າພະເຈົ້າບໍ່ມີຜົວ. ເພາະວ່າເຈົ້າໄດ້ຜົວຫ້າຄົນແລ້ວ ແລະຊາຍທີ່ເຈົ້າໄດ້ດຽວນີ້ບໍ່ເປັນຜົວເຈົ້າ.”
ຍິງນັ້ນເວົ້າດ້ວຍຄວາມປະຫຼາດໃຈວ່າ “ທ່ານເຈົ້າຂ້າ ຂ້າພະເຈົ້າເຫັນວ່າທ່ານເປັນຜູ້ທຳນວາຍ.” ນາງສະແດງໃຫ້ເຫັນຄວາມສົນໃຈທີ່ມີຕໍ່ສິ່ງຝ່າຍວິນຍານ ໂດຍບອກວ່າ ຊາວສະມາລີ “ຂາບໄຫວ້ເທິງພູເຂົານີ້ [ຄາລີຊີມເຊິ່ງຢູ່ໃກ້ໆ] ແລະທ່ານທັງຫຼາຍ [ຊາວຢິວ] ກ່າວວ່າຕ້ອງຂາບໄຫວ້ທີ່ເມືອງເຢຣຶຊາເລມ.”
ພະເຍຊູຊີ້ແຈງວ່າ ບ່ອນຂາບໄຫວ້ບໍ່ແມ່ນສິ່ງສຳຄັນ. ພະອົງກ່າວວ່າ “ຄາວມາແລະເປັນແລ້ວດຽວນີ້ວ່າ ຄົນທັງຫຼາຍທີ່ຂາບໄຫວ້ຈິງກໍຈະຂາບໄຫວ້ພະບິດາໃນວິນຍານແລະໃນຄວາມຈິງ ເພາະວ່າພະບິດາທັງມວນຊອກຫາຜູ້ຂາບໄຫວ້ຢ່າງນັ້ນ. ພະເຈົ້າເປັນວິນຍານ ແລະຄົນທັງຫຼາຍທີ່ຂາບໄຫວ້ພະເຈົ້າ ຕ້ອງຂາບໄຫວ້ພະອົງໃນວິນຍານແລະໃນຄວາມຈິງ.”
ຜູ້ຍິງນັ້ນຮູ້ສຶກປະທັບໃຈຢ່າງເລິກເຊິ່ງ. ນາງກ່າວວ່າ “ຂ້າພະເຈົ້າຮູ້ຈັກວ່າ ເມຊີຜູ້ເປັນທີ່ເອີ້ນຊື່ວ່າພະຄລິດກໍມາ ເມື່ອພະອົງຈະມາແລ້ວ ພະອົງຈະໃຫ້ພວກຂ້າພະເຈົ້າຮູ້ຈັກສັບພະທຸກສິ່ງ.”
ພະເຍຊູຖະແຫຼງວ່າ “ເຮົາທີ່ປາກກັບເຈົ້າ ເຮົາເປັນພະຄລິດ.” ລອງຄິດເບິ່ງ! ຍິງຜູ້ນີ້ມາຕັກນ້ຳຕອນທ່ຽງວັນ ບາງທີນາງອາດຈະຫຼົບຫຼີກບໍ່ຢາກພົບກັບພວກຜູ້ຍິງໃນຫມູ່ບ້ານ ເຊິ່ງລັງກຽດວິຖີຊີວິດຂອງນາງ ແຕ່ນາງໄດ້ຮັບພະພອນອັນພິເສດຈາກພະເຍຊູ. ພະອົງບອກນາງກົງໆ ກ່ຽວກັບສິ່ງທີ່ພະອົງຍັງບໍ່ເຄີຍເປີດເຜີຍໃຫ້ຄົນອື່ນຮູ້. ຜົນເປັນປະການໃດ?
ຊາວສະມາລີຫຼາຍຄົນເຊື່ອ
ເມື່ອສາວົກກັບຈາກເມືອງຊີຄາພ້ອມດ້ວຍອາຫານ ພວກເຂົາພົບພະເຍຊູຍັງຢູ່ທີ່ນ້ຳສ້າງຂອງຍາໂຄບ ສົນທະນາກັບຍິງຊາວສະມາລີ. ພໍສາວົກມາເຖິງ ນາງກໍຈາກໄປ ປະໝໍ້ນ້ຳໄວ້ແລະເຂົ້າໄປໃນເມືອງ.
ເນື່ອງຈາກນາງສົນໃຈຫຼາຍໃນເລື່ອງຕ່າງໆ ທີ່ໄດ້ຟັງຈາກພະເຍຊູ ນາງບອກນຳພວກຜູ້ຊາຍໃນເມືອງວ່າ “ຈົ່ງມາເບິ່ງຄົນຜູ້ໜຶ່ງທີ່ໄດ້ກ່າວແກ່ຂ້າພະເຈົ້າ ຍັງສັບພະທຸກສິ່ງທີ່ຂ້າພະເຈົ້າໄດ້ກະທຳແລ້ວ.” ແລ້ວດ້ວຍວິທີປຸກຮ້າວໃຫ້ເກີດຄວາມຢາກຮູ້ຢາກເຫັນ ນາງຖາມວ່າ “ຜູ້ນີ້ຈະບໍ່ເປັນພະຄລິດຫຼື”? ຄຳຖາມນັ້ນໄດ້ຜົນຕາມຈຸດປະສົງ ພວກເຂົາໄດ້ພາກັນອອກໄປເບິ່ງດ້ວຍຕົນເອງ.
ໃນລະຫວ່າງເວລານັ້ນ ພວກສາວົກຊວນໃຫ້ພະເຍຊູຮັບປະທານອາຫານທີ່ເຂົາຊື້ມາຈາກໃນເມືອງ. ແຕ່ພະອົງຕອບວ່າ “ເຮົາມີອາຫານກິນທີ່ທ່ານທັງຫຼາຍບໍ່ຮູ້ຈັກ.”
ສາວົກຈຶ່ງຖາມກັນວ່າ “ຜູ້ໜຶ່ງຜູ້ໃດໄດ້ເອົາອາຫານມາໃຫ້ພະອົງກິນຫຼື”? ພະເຍຊູຊີ້ແຈງວ່າ “ອາຫານຂອງເຮົາເປັນອັນທີ່ເຮົາກະທຳຕາມນ້ຳໃຈຂອງພະເຈົ້າທີ່ໄດ້ໃຊ້ເຮົາມາແລະໃຫ້ກິດຈະການຂອງພະເຈົ້າສຳເລັດແລ້ວ. ຝ່າຍທ່ານທັງຫຼາຍທ່ານບໍ່ເວົ້າຫຼື ຍັງມີສີ່ເດືອນຈົນເຖິງລະດູກ່ຽວ.” ແຕ່ພະອົງກ່າວໂດຍໃນເຖິງການເກັບກ່ຽວຝ່າຍວິນຍານວ່າ “ຈົ່ງແຫງນຕາແລະເບິ່ງທົ່ງນາເຂົ້າທັງຫຼາຍ ເພາະວ່າເຂົ້າເຫຼືອງພໍກ່ຽວແລ້ວໆ. ຜູ້ທີ່ກ່ຽວເຂົ້າກໍຮັບຈ້າງ ແລະໂຮມໝາກໄວ້ສຳລັບຊີວິດອັນຕະຫຼອດໄປເປັນນິດ ເພື່ອວ່າຜູ້ທີ່ຫວ່ານແລະຜູ້ທີ່ກ່ຽວຈະໄດ້ຊົມຊື່ນຍິນດີພ້ອມກັນ.”
ບາງເທື່ອພະເຍຊູມອງເຫັນຜົນອັນດີເລີດຈາກການພົບປະກັບຍິງຊາວສະມາລີຢູ່ແລ້ວ—ຫຼາຍຄົນສະແດງຄວາມເຊື່ອໃນພະອົງ ເນື່ອງຈາກການໃຫ້ຄຳພະຍານຂອງນາງ. ນາງກ່າວກັບຊາວເມືອງວ່າ “ພະອົງໄດ້ກ່າວແກ່ຂ້າພະເຈົ້າຍັງສັບພະທຸກສິ່ງທີ່ຂ້າພະເຈົ້າໄດ້ກະທຳ.” ດັ່ງນັ້ນ ເມື່ອຄົນຊາວເມືອງຊີຄາມາຫາພະອົງຢູ່ນ້ຳສ້າງ ພວກເຂົາທູນຂໍໃຫ້ພະອົງພັກນຳແລະສົນທະນານຳເຂົາຫຼາຍຂຶ້ນ. ພະເຍຊູຕອບຮັບຄຳເຊີນແລະຄ້າງຢູ່ຫັ້ນສອງມື້.
ເມື່ອຊາວສະມາລີໄດ້ຟັງພະເຍຊູ ອີກຫຼາຍຄົນເຊື່ອ. ແລ້ວເຂົາເວົ້າກັບຍິງນັ້ນວ່າ “ບໍ່ໃຊ່ເພາະຖ້ອຍຄຳຂອງເຈົ້າ ຫມູ່ເຮົາເຊື່ອດຽວນີ້ເພາະວ່າຫມູ່ເຮົາເອງໄດ້ຍິນພະອົງແລະຫມູ່ເຮົາຮູ້ຈັກວ່າ ພະອົງນີ້ເປັນຜູ້ຊ່ອຍອັນແທ້ແຫ່ງມະນຸດສະໂລກ.” ແນ່ແລ້ວ ຍິງຊາວສະມາລີຄົນນີ້ໃຫ້ຕົວຢ່າງທີ່ດີໃນວິທີເຊິ່ງເຮົາສາມາດໃຫ້ຄຳພະຍານເຖິງພະເຍຊູ ໂດຍການປຸກຮ້າວຄວາມຢາກຮູ້ຢາກເຫັນຈົນຜູ້ຟັງຈະສືບຫາຕໍ່ໄປ!
ຈົ່ງຈື່ໄວ້ວ່າ ອີກສີ່ເດືອນຈະເປັນລະດູເກັບກ່ຽວ—ເບິ່ງຄືວ່າເປັນການເກັບກ່ຽວເຂົ້າບາເລ ເຊິ່ງໃນປະເທດປາແລັດສະຕິນຈະກ່ຽວກັນໃນລະດູໃບໄມ້ປົ່ງ. ສະນັ້ນ ຕອນນັ້ນຄົງຈະເປັນເດືອນພະຈິກຫຼືເດືອນທັນວາ. ນັ້ນໝາຍຄວາມວ່າ ຫຼັງຈາກເທສະການປັດສະຄາຂອງປີສາກົນສັກກະຫຼາດ 30 ພະເຍຊູແລະສາວົກຂອງພະອົງໄດ້ໃຊ້ເວລາຮາວໆ ແປດເດືອນສັ່ງສອນແລະໃຫ້ການຮັບບັບເຕມາໃນແຂວງຢູເດ. ຕອນນີ້ເຂົາເຈົ້າເດີນທາງເມືອແຂວງຄາລິເລທີ່ເປັນບ້ານເກີດຂອງເຂົາ. ເຂົາຈະໄປພໍ້ກັບສິ່ງໃດຢູ່ຫັ້ນ? ໂຍຮັນ 4:3-43.
▪ ເຫດໃດຍິງຊາວສະມາລີຈຶ່ງແປກໃຈທີ່ພະເຍຊູສົນທະນາກັບນາງ?
▪ ພະເຍຊູສອນຫຍັງແກ່ນາງກ່ຽວກັບເລື່ອງນ້ຳທີ່ໃຫ້ຊີວິດແລະສະຖານທີ່ຂາບໄຫວ້?
▪ ພະເຍຊູເປີດເຜີຍໃຫ້ນາງຮູ້ດ້ວຍວິທີໃດວ່າພະອົງແມ່ນຜູ້ໃດ ແລະເຫດໃດການເປີດເຜີຍນີ້ຈຶ່ງເປັນເລື່ອງແປກແທ້ໆ?
▪ ຍິງຊາວສະມາລີໃຫ້ຄຳພະຍານແບບໃດແລະໄດ້ຜົນຢ່າງໃດ?
▪ ອາຫານຂອງພະເຍຊູກ່ຽວຂ້ອງຢ່າງໃດກັບລະດູເກັບກ່ຽວ?
▪ ເຮົາຈະຄຳນວນໄລຍະເວລາທີ່ພະເຍຊູເທສະໜາສັ່ງສອນໃນແຂວງຢູເດຫຼັງຈາກເທສະການປັດສະຄາໃນປີສາກົນສັກກະຫຼາດ 30 ໄດ້ຢ່າງໃດ?