ບົດທີ 77
ຜູ້ຍິງທີ່ຢູ່ນ້ຳສ້າງ
ຫຼັງຈາກເທດສະການປັດສະຄາ ພະເຢຊູກັບພວກລູກສິດຂອງເພິ່ນກໍເດີນທາງກັບເມືອແຂວງຄາລີເຄໂດຍຜ່ານທາງແຂວງຊາມາເຣຍ. ພະເຢຊູໄດ້ຢຸດພັກຢູ່ນ້ຳສ້າງຂອງຢາໂຄບໃກ້ກັບເມືອງຊີຂາ. ຕອນທີ່ເພິ່ນກຳລັງພັກຢູ່ ພວກລູກສິດກໍເຂົ້າໄປຊື້ອາຫານຢູ່ໃນເມືອງ.
ມີຜູ້ຍິງຄົນໜຶ່ງມາຕັກນ້ຳຢູ່ນ້ຳສ້າງ ພະເຢຊູເວົ້າກັບລາວວ່າ: “ຂ້ອຍຂໍກິນນ້ຳແດ່.” ລາວຖາມວ່າ: ‘ເປັນຫຍັງເຈົ້າຈຶ່ງເວົ້າກັບຂ້ອຍທີ່ເປັນຄົນຊາມາເຣຍ. ຄົນຢິວບໍ່ເວົ້ານຳຄົນຊາມາເຣຍບໍ່ແມ່ນບໍ?’ ພະເຢຊູຕອບວ່າ: ‘ຖ້າເຈົ້າຮູ້ວ່າຂ້ອຍແມ່ນໃຜ ເຈົ້າຈະຂໍນ້ຳຈາກຂ້ອຍ. ແລ້ວຂ້ອຍຈະໃຫ້ນ້ຳທີ່ໃຫ້ຊີວິດກັບເຈົ້າ.’ ລາວຖາມເພິ່ນວ່າ: ‘ເຈົ້າໝາຍຄວາມວ່າແນວໃດ? ຄຸຕັກນ້ຳເຈົ້າກໍບໍ່ມີ.’ ພະເຢຊູຕອບລາວວ່າ: “ຄົນທີ່ກິນນ້ຳທີ່ຂ້ອຍເອົາໃຫ້ຈະບໍ່ຫິວນ້ຳອີກເລີຍ.” ລາວຈຶ່ງບອກພະເຢຊູວ່າ: “ຂ້ອຍຂໍກິນນ້ຳນັ້ນແດ່.”
ພະເຢຊູບອກລາວວ່າ: “ໄປເອີ້ນຜົວເຈົ້າມານີ້.” ລາວເວົ້າວ່າ: “ຂ້ອຍບໍ່ມີຜົວ.” ພະເຢຊູເວົ້າວ່າ: ‘ກະແມ່ນຄວາມເຈົ້າ. ເຈົ້າແຕ່ງດອງມາ 5 ເທື່ອແລ້ວແລະຄົນທີ່ເຈົ້າຢູ່ນຳຕອນນີ້ກໍຍັງບໍ່ໄດ້ແຕ່ງດອງນຳ.’ ລາວຈຶ່ງເວົ້າວ່າ: ‘ເຈົ້າແມ່ນຜູ້ພະຍາກອນ. ພວກເຮົາທີ່ເປັນຄົນຊາມາເຣຍເຊື່ອວ່າພວກເຮົາສາມາດນະມັດສະການພະເຈົ້າຢູ່ເທິງພູນີ້ໄດ້ ແຕ່ຄົນຢິວບອກວ່າຕ້ອງໄປນະມັດສະການຢູ່ເມືອງເຢຣູຊາເລັມເທົ່ານັ້ນ. ຂ້ອຍເຊື່ອວ່າຖ້າເມຊີອາມາ ເພິ່ນຈະສອນເຮົາວ່າຄວນນະມັດສະການພະເຈົ້າແນວໃດ.’ ພະເຢຊູຈຶ່ງບອກລາວວ່າ: ‘ຂ້ອຍແມ່ນເມຊີອາ.’ ນີ້ແມ່ນເທື່ອທຳອິດທີ່ພະເຢຊູບອກຄົນອື່ນວ່າເພິ່ນແມ່ນເມຊີອາ.
ຜູ້ຍິງຄົນນີ້ກໍຟ້າວເຂົ້າໄປໃນເມືອງແລະບອກຄົນຊາມາເຣຍວ່າ: ‘ຂ້ອຍຄິດວ່າຂ້ອຍເຈິເມຊີອາແລ້ວ. ລາວເວົ້າຖືກໝົດວ່າຂ້ອຍເຄີຍເຮັດຫຍັງມາແດ່. ມາເບິ່ງແມ້!’ ເຂົາເຈົ້າກໍນຳລາວໄປນ້ຳສ້າງແລະຟັງພະເຢຊູສອນ.
ຄົນຊາມາເຣຍຊວນພະເຢຊູພັກຢູ່ນຳເຂົາເຈົ້າ. ເພິ່ນພັກຢູ່ເມືອງນັ້ນ 2 ມື້ແລະສອນເຂົາເຈົ້າ. ມີຫຼາຍຄົນເຂົ້າມາເຊື່ອພະເຢຊູ ເຂົາເຈົ້າບອກຜູ້ຍິງຊາມາເຣຍຄົນນັ້ນວ່າ: ‘ເມື່ອໄດ້ຟັງເພິ່ນຜູ້ນີ້ສອນ ພວກເຮົາຮູ້ເລີຍວ່າເພິ່ນເປັນຜູ້ຊ່ວຍໂລກໃຫ້ລອດແທ້ໆ.’
“‘ເຊີນມາ.’ ໃຫ້ທຸກຄົນທີ່ຫິວນ້ຳມາເດີ້. ໃຫ້ຄົນທີ່ຢາກກິນນ້ຳທີ່ໃຫ້ຊີວິດມາກິນລ້າໆ.”—ພະນິມິດ 22:17