ບົດ 71
ພວກຟາລິຊຽນຈົງໃຈບໍ່ເຊື່ອ
ພໍ່ແມ່ຂອງຊາຍຂໍທານທີ່ເຄີຍຕາບອດຮູ້ສຶກຢ້ານເມື່ອຖືກເອີ້ນມາໃຫ້ການຕໍ່ໜ້າພວກຟາລິຊຽນ. ເຂົາເຈົ້າຮູ້ວ່າມີການຕົກລົງກັນວ່າ ຜູ້ໃດສະແດງຄວາມເຊື່ອໃນພະເຍຊູຈະຖືກໄລ່ອອກຈາກໂຮງທຳ. ການທີ່ຖືກຕັດຂາດບໍ່ໃຫ້ສຳພັນກັບຄົນອື່ນໃນຊຸມຊົນເຊັ່ນນີ້ກໍ່ໃຫ້ເກີດຄວາມລຳບາກຢ່າງຍິ່ງໂດຍສະເພາະກັບຄອບຄົວທີ່ຍາກຈົນ. ດັ່ງນັ້ນ ພໍ່ແມ່ຈຶ່ງຄອຍລະມັດລະວັງຕົວ.
ພວກຟາລິຊຽນຖາມວ່າ “ຜູ້ນີ້ເປັນລູກຊາຍຂອງຫມູ່ເຈົ້າທີ່ຫມູ່ເຈົ້າໄດ້ກ່າວວ່າ ເພິ່ນເກີດເປັນຕາບອດຫຼື ເຫດສັນໃດເພິ່ນເຫັນໄດ້ດຽວນີ້”?
ພໍ່ແມ່ຢືນຢັນວ່າ “ຫມູ່ເຮົາຮູ້ຈັກວ່າຜູ້ນີ້ເປັນລູກຊາຍຂອງຫມູ່ເຮົາທີ່ໄດ້ເກີດເປັນຕາບອດ. ແຕ່ວ່າເພິ່ນເຫັນຮຸ່ງດຽວນີ້ ຫມູ່ເຮົາບໍ່ຮູ້ຈັກດ້ວຍຢ່າງໃດ ແລະຜູ້ໃດໄດ້ປືດຕາຂອງເພິ່ນ ຫມູ່ເຮົາກໍບໍ່ຮູ້ຈັກ.” ແນ່ນອນລູກຊາຍຄົງໄດ້ເລົ່າເລື່ອງທັງໝົດໃຫ້ເຂົາເຈົ້າຟັງແລ້ວ ແຕ່ພໍ່ແມ່ກ່າວຢ່າງລະມັດລະວັງວ່າ “ເພິ່ນມີອາຍຸແກ່ແລ້ວ ເຊີນໂຈດຖາມເພິ່ນໆຈະປາກສຳລັບຕົວເອງ.”
ດັ່ງນັ້ນ ພວກຟາລິຊຽນໄດ້ເອີ້ນຊາຍຂໍທານນັ້ນມາອີກ. ເທື່ອນີ້ພວກເຂົາພະຍາຍາມຂູ່ວ່າ ເຂົາໂຮມເອົາຫຼັກຖານກ່າວໂທດພະເຍຊູໄດ້ແລ້ວ. ເຂົາສັ່ງວ່າ “ຈົ່ງຖວາຍລັດສະໝີແກ່ພະເຈົ້າ ຫມູ່ເຮົາຮູ້ຈັກວ່າທ່ານຜູ້ນັ້ນເປັນຄົນບາບ.”
ຊາຍທີ່ເຄີຍຕາບອດບໍ່ໄດ້ປະຕິເສດຂໍ້ກ່າວຫາຂອງຄົນເຫຼົ່ານັ້ນ ລາວເວົ້າວ່າ “ຖ້າທ່ານເປັນຄົນບາບເຮົາບໍ່ຮູ້ຈັກ.” ຊາຍນັ້ນເວົ້າຕໍ່ວ່າ “ເຮົາຮູ້ຈັກສິ່ງໜຶ່ງ ແຕ່ກ່ອນເຮົາເປັນຕາບອດ ແລະດຽວນີ້ເຮົາເຫັນຮຸ່ງ.”
ເພື່ອຈັບຜິດຈາກຄຳໃຫ້ການຂອງຊາຍຄົນນັ້ນໃຫ້ໄດ້ ພວກຟາລິຊຽນຖາມອີກວ່າ “ທ່ານໄດ້ກະທຳສິ່ງໃດແກ່ເຈົ້າ? ທ່ານໄດ້ປືດຕາຂອງເຈົ້າດ້ວຍຢ່າງໃດ”?
ຊາຍຂໍທານຈົ່ມວ່າ “ເຮົາໄດ້ບອກພວກທ່ານແລ້ວ ແລະທ່ານບໍ່ໄດ້ຟັງ. ເຫດສັນໃດພວກທ່ານຢາກໄດ້ຍິນອີກ”? ເຂົາເວົ້າເຍາະເຍີ້ຍວ່າ “ພວກທ່ານຢາກເປັນລູກສິດຂອງທ່ານດ້ວຍຫຼື”?
ຄຳຕອບນັ້ນເຮັດໃຫ້ພວກຟາລິຊຽນເດືອດແຄ້ນຂຶ້ນຈຶ່ງໄດ້ຫາເລື່ອງວ່າ “ຕົວເຈົ້າເປັນລູກສິດຂອງທ່ານຜູ້ນັ້ນ ແຕ່ວ່າຝ່າຍພວກເຮົາ ເຮົາເປັນລູກສິດຂອງທ່ານໂມເຊ. ຝ່າຍພວກເຮົາໆ ຮູ້ຈັກວ່າ ພະເຈົ້າໄດ້ປາກແກ່ທ່ານໂມເຊ ແຕ່ວ່າຝ່າຍທ່ານຜູ້ນີ້ ພວກເຮົາບໍ່ຮູ້ຈັກທ່ານມາແຕ່ທີ່ໃດ.”
ຄົນຂໍທານຕ່ຳຕ້ອຍຕອບຢ່າງແປກໃຈວ່າ “ໃນການນີ້ມີຄວາມອັນປະຫຼາດໃຈ ເປັນທີ່ພວກທ່ານບໍ່ຮູ້ຈັກທ່ານມາແຕ່ທີ່ໃດ ແລະທ່ານໄດ້ປືດຕາຂອງເຮົາ.” ຄວນຈະລົງຄວາມເຫັນວ່າຢ່າງໃດ? ຊາຍຂໍທານນັ້ນຊີ້ເຖິງຫຼັກຖານເຊິ່ງເປັນທີ່ຍອມຮັບກັນວ່າ “ເຮົາທັງຫຼາຍຮູ້ຈັກວ່າ ພະເຈົ້າບໍ່ຟັງຄົນບາບແຕ່ວ່າຖ້າຜູ້ໜຶ່ງຜູ້ໃດນັບຖືພະເຈົ້າ ແລະກະທຳຕາມນ້ຳໃຈຂອງພະເຈົ້າ ພະເຈົ້າຟັງຜູ້ນັ້ນ. ເຮົາທັງຫຼາຍບໍ່ຫ່ອນໄດ້ຍິນສັກເທື່ອວ່າຜູ້ໜຶ່ງຜູ້ໃດໄດ້ປືດຕາຂອງຄົນທີ່ໄດ້ເກີດເປັນຕາບອດ.” ສະນັ້ນ ຄວນສະຫລຸບງ່າຍໆ ວ່າ “ຖ້າທ່ານຜູ້ນີ້ບໍ່ໄດ້ມາແຕ່ພະເຈົ້າທ່ານອາດຈະກະທຳສິ່ງໜຶ່ງສິ່ງໃດກໍບໍ່ໄດ້.”
ເຫດຜົນທີ່ຊັດເຈນບໍ່ອ້ອມຄ້ອມແບບນັ້ນເຮັດໃຫ້ພວກຟາລິຊຽນປາກບໍ່ອອກ. ເຂົາເຈົ້າບໍ່ກ້າປະເຊີນກັບຄວາມຈິງຈຶ່ງໄດ້ດ່າຊາຍຂໍທານນັ້ນວ່າ “ເຈົ້າເປັນທີ່ເກີດໃນບາບທັງໝົດ ແລະເຈົ້າສັ່ງສອນພວກເຮົາຫຼື”? ແລ້ວໄດ້ໄລ່ຊາຍຄົນນັ້ນອອກໄປ ຄົງຈະເປັນການໄລ່ອອກຈາກໂຮງທຳ.
ຕອນທີ່ພະເຍຊູໄດ້ຂ່າວການກະທຳຂອງເຂົາ ພະອົງໄປຫາຊາຍຄົນນັ້ນແລະກ່າວວ່າ “ເຈົ້າເຊື່ອໃນພະບຸດຂອງພະເຈົ້າຫຼື”?
ຊາຍທີ່ເຄີຍຕາບອດໄດ້ຖາມວ່າ “ພະອົງເຈົ້າຂ້າເປັນຜູ້ໃດ ເພື່ອຂ້າພະເຈົ້າຈະເຊື່ອໃນພະອົງໄດ້”?
ພະເຍຊູຕອບວ່າ “ເປັນພະອົງນັ້ນທີ່ປາກນຳເຈົ້າ.”
ຊາຍນັ້ນກົ້ມຄຳນັບພະເຍຊູທັນທີແລະກ່າວວ່າ “ຂ້າພະເຈົ້າເຊື່ອພະອົງເຈົ້າຂ້າ.”
ແລ້ວພະເຍຊູຊີ້ແຈງວ່າ “ເຮົາໄດ້ມາໃນໂລກນີ້ ສຳລັບການຕັດສິນ ເພື່ອຄົນທັງຫຼາຍທີ່ບໍ່ເຫັນ ຈະເຫັນໄດ້ ແລະເພື່ອຄົນທັງຫຼາຍທີ່ເຫັນ ຈະກາຍເປັນຕາບອດ.”
ພວກຟາລິຊຽນທີ່ກຳລັງຟັງຢູ່ຖາມຂຶ້ນວ່າ “ຝ່າຍພວກເຮົາໆເປັນຄົນຕາບອດທັງມວນຫຼື”? ຫາກເຂົາຍອມຮັບວ່າເຂົາມືດບອດທາງຈິດໃຈ ເຂົາກໍພໍຈະມີຂໍ້ແກ້ຕົວສຳລັບການຕໍ່ຕ້ານພະເຍຊູ. ດັ່ງທີ່ພະເຍຊູໄດ້ກ່າວແກ່ເຂົາວ່າ “ຖ້າທ່ານທັງຫຼາຍເປັນຄົນຕາບອດ ທ່ານທັງຫຼາຍຈະບໍ່ມີບາບ.” ພວກເຂົາຍັງແຂງໃຈຢືນຢັນອີກວ່າຕາເຂົາບໍ່ບອດແລະບໍ່ຕ້ອງການແສງຝ່າຍວິນຍານ. ດັ່ງນັ້ນ ພະເຍຊູກ່າວວ່າ “ດຽວນີ້ທ່ານທັງຫຼາຍເວົ້າວ່າ ພວກເຮົາເຫັນຮຸ່ງ ເຫດສັນນີ້ບາບຂອງທ່ານທັງຫຼາຍກໍຢູ່.” ໂຍຮັນ 9:19-41.
▪ ເຫດໃດພໍ່ແມ່ຂອງຊາຍຂໍທານທີ່ເຄີຍຕາບອດຈຶ່ງຮູ້ສຶກຢ້ານເມື່ອຖືກເອີ້ນມາໃຫ້ການຕໍ່ພວກຟາລິຊຽນ ແລະເຂົາເຈົ້າລະວັງຄຳຕອບຂອງຕົນຢ່າງໃດ?
▪ ພວກຟາລິຊຽນພະຍາຍາມຂູ່ຊາຍທີ່ເຄີຍຕາບອດນັ້ນຢ່າງໃດ?
▪ ຊາຍນັ້ນໃຫ້ເຫດຜົນຫຍັງ ເຊິ່ງເຮັດໃຫ້ພວກຟາລິຊຽນຮ້າຍເປັນຟືນເປັນໄຟຂຶ້ນມາ?
▪ ເປັນຫຍັງພວກຟາລິຊຽນແກ້ຕົວບໍ່ໄດ້ໃນການທີ່ເຂົາເຈົ້າຕໍ່ຕ້ານພະເຍຊູ?