ບົດທີ 3

ພະຜູ້ສ້າງໝົດທຸກສິ່ງ

A boy feeds baby birds — ໃຜສ້າງສິ່ງທີ່ມີຊີວິດທັງໝົດ?

ມີສິ່ງທີ່ວິເສດຫຼາຍທີ່ພໍ່ (ແມ່) ຮູ້. ລູກຢາກຟັງບໍ?— ເບິ່ງມືຂອງລູກດູ. ພັບນິ້ວມືເຂົ້າອອກເບິ່ງ. ບັດນີ້ຈັບສິ່ງໃດສິ່ງໜຶ່ງຂຶ້ນມາ. ມືຂອງລູກເຮັດໄດ້ຕັ້ງຫຼາຍຢ່າງແລ້ວກໍຍັງເຮັດໄດ້ດີອີກ. ລູກຮູ້ບໍວ່າໃຜໄດ້ສ້າງມືຂອງເຮົາ?—

ແມ່ນແລ້ວ ເປັນຜູ້ດຽວທີ່ໄດ້ສ້າງປາກ ດັງ ແລະຕາຂອງເຮົາ. ຜູ້ນັ້ນແມ່ນພະເຈົ້າ ເຊິ່ງເປັນພໍ່ຂອງຄູຜູ້ຍິ່ງໃຫຍ່. ເຮົາດີໃຈທີ່ພະເຈົ້າໄດ້ໃຫ້ໜ່ວຍຕາແກ່ເຮົາແມ່ນບໍລູກ?— ເຮົາມອງເຫັນສິ່ງຕ່າງໆໄດ້ດ້ວຍຕາສອງໜ່ວຍນີ້ແຫຼະ. ເຮົາເຫັນດອກໄມ້. ເຮົາເຫັນຫຍ້າສີຂຽວແລະທ້ອງຟ້າສີຄາມ. ໃນພາບນີ້ເຮົາຍັງເຫັນນົກໂຕນ້ອຍໆທີ່ພວມອ້າປາກຢາກກິນ. ການທີ່ເຮົາເຫັນສິ່ງເຫຼົ່ານີ້ໄດ້ເປັນເລື່ອງທີ່ວິເສດແທ້ໆແມ່ນບໍລູກ?—

ແຕ່ວ່າໃຜສ້າງສິ່ງເຫຼົ່ານີ້? ມະນຸດໄດ້ສ້າງບໍ? ບໍ່. ມະນຸດອາດຈະສ້າງເຮືອນໄດ້. ແຕ່ບໍ່ມີມະນຸດຄົນໃດສ້າງຫຍ້າໃຫ້ຂຶ້ນມາໄດ້. ມະນຸດຈະສ້າງນົກນ້ອຍ ດອກໄມ້ຫຼືສິ່ງທີ່ມີຊີວິດອື່ນໆບໍ່ໄດ້. ລູກຮູ້ສິ່ງນີ້ບໍ?—

ພະເຈົ້າເປັນຜູ້ທີ່ໄດ້ສ້າງສິ່ງທັງໝົດນີ້. ພະເຈົ້າສ້າງສະຫວັນແລະແຜ່ນດິນໂລກ. ພະອົງຍັງສ້າງຄົນເຮົານຳອີກ. ພະອົງສ້າງຜູ້ຊາຍແລະຜູ້ຍິງຄູ່ທຳອິດ. ພະເຍຊູຄູຜູ້ຍິ່ງໃຫຍ່ສອນເຮົາຢ່າງນີ້.—ມັດທາຍ 19:4-6.

ພະເຍຊູຮູ້ໄດ້ແນວໃດວ່າພະເຈົ້າໄດ້ສ້າງຜູ້ຊາຍແລະຜູ້ຍິງ? ພະເຍຊູເຫັນພະເຈົ້າສ້າງບໍ?— ແມ່ນແລ້ວໄດ້ເຫັນ. ພະເຍຊູຢູ່ກັບພະເຈົ້າຕອນທີ່ພະເຈົ້າສ້າງຜູ້ຊາຍແລະຜູ້ຍິງ. ພະເຍຊູເປັນຜູ້ທຳອິດທີ່ພະເຈົ້າໄດ້ສ້າງ. ພະເຍຊູເຄີຍເປັນທູດສະຫວັນ ແລະພະອົງຢູ່ໃນສະຫວັນກັບພໍ່.

ຄຳພີໄບເບິນບອກເຮົາວ່າພະເຈົ້າກ່າວດັ່ງນີ້: “ພວກເຮົາຈົ່ງສ້າງມະນຸດ.” (ຕົ້ນເດີມ 1:26) ລູກຮູ້ບໍວ່າພະເຈົ້າເວົ້າກັບຜູ້ໃດ?— ພະອົງເວົ້າກັບລູກຂອງພະອົງ. ລູກຄົນນັ້ນແມ່ນພະເຍຊູເຊິ່ງພາຍຫຼັງນັ້ນໄດ້ມາຢູ່ເທິງແຜ່ນດິນໂລກນີ້.

ເປັນເລື່ອງໜ້າຕື່ນເຕັ້ນແມ່ນບໍ? ລອງຄິດເບິ່ງແມ! ເມື່ອເຮົາຟັງພະເຍຊູ ກໍແມ່ນເຮົາກຳລັງຮັບການສອນຈາກຜູ້ທີ່ເຄີຍຢູ່ກັບພະເຈົ້າຕອນທີ່ພະເຈົ້າສ້າງແຜ່ນດິນໂລກແລະສິ່ງອື່ນໆທັງໝົດ. ພະເຍຊູຮຽນຮູ້ຫຼາຍສິ່ງຈາກການເຮັດວຽກນຳກັນກັບພໍ່ຂອງພະອົງໃນສະຫວັນ. ບໍ່ແປກທີ່ພະເຍຊູເປັນຄູຜູ້ຍິ່ງໃຫຍ່!

ລູກຄິດວ່າຕອນທີ່ພະເຈົ້າຢູ່ຜູ້ດຽວກ່ອນພະອົງສ້າງລູກຊາຍ ພະເຈົ້າຂາດຄວາມສຸກບໍ?— ບໍ່ຂາດ ພະອົງມີຄວາມສຸກ. ຖ້າພະອົງມີຄວາມສຸກແລ້ວເປັນຫຍັງພະອົງຈຶ່ງສ້າງສິ່ງມີຊີວິດອື່ນໆ?— ພະອົງເຮັດເຊັ່ນນັ້ນຍ້ອນວ່າພະອົງເປັນພະເຈົ້າແຫ່ງຄວາມຮັກ. ພະອົງຢາກໃຫ້ຜູ້ອື່ນມີຊີວິດແລະຊື່ນຊົມກັບຊີວິດ. ເຮົາຄວນຂອບໃຈພະເຈົ້າທີ່ພະອົງໃຫ້ຊີວິດແກ່ເຮົາ.

ທຸກໆສິ່ງທີ່ພະເຈົ້າເຮັດສະແດງເຖິງຄວາມຮັກຂອງພະອົງ. ພະເຈົ້າສ້າງຕາເວັນ. ຕາເວັນໃຫ້ແສງສະຫວ່າງແກ່ເຮົາແລະເຮັດໃຫ້ເຮົາອົບອຸ່ນ. ຖ້າບໍ່ມີຕາເວັນ ທຸກສິ່ງກໍຈະເຢັນຫຼາຍແລະບໍ່ມີສິ່ງທີ່ມີຊີວິດຢູ່ເທິງແຜ່ນດິນໂລກນີ້. ລູກດີໃຈບໍທີ່ພະເຈົ້າໄດ້ສ້າງຕາເວັນ?—

ພະເຈົ້າຍັງເຮັດໃຫ້ຝົນຕົກນຳອີກ. ລາງເທື່ອລູກອາດຈະບໍ່ມັກຝົນ ເພາະຕອນທີ່ຝົນຕົກລູກອອກໄປຫຼິ້ນທາງນອກບໍ່ໄດ້. ແຕ່ວ່າຝົນຊ່ອຍໃຫ້ດອກໄມ້ງອກງາມຂຶ້ນ. ດັ່ງນັ້ນ ເມື່ອເຮົາເຫັນດອກໄມ້ງາມໆເຮົາຄວນຂອບໃຈໃຜ?— ພະເຈົ້ານັ້ນແຫຼະ. ແລະເຮົາຄວນຂອບໃຈໃຜເມື່ອເຮົາກິນໝາກໄມ້ແລະຜັກຕ່າງໆທີ່ແຊບດີ?— ເຮົາຄວນຈະຂອບໃຈພະເຈົ້າເພາະຕາເວັນແລະນ້ຳຝົນຂອງພະອົງເຮັດໃຫ້ສິ່ງເຫຼົ່ານີ້ຈະເລີນງອກງາມຂຶ້ນ.

ສົມມຸດມີຄົນຖາມລູກວ່າ ‘ພະເຈົ້າສ້າງຄົນແລະສັດນຳບໍ?’ ລູກຈະຕອບລາວແນວໃດ?— ຖືກແລ້ວທີ່ລູກຕອບວ່າ: “ແມ່ນ ພະເຈົ້າສ້າງຄົນແລະສັດ.” ແຕ່ຫາກວ່າມີບາງຄົນບໍ່ເຊື່ອວ່າພະເຈົ້າໄດ້ສ້າງມະນຸດເດ? ແລະຖ້າເຂົາເຈົ້າບອກວ່າຄົນມາຈາກສັດເດຊັ້ນ? ທີ່ຈິງ ຄຳພີໄບເບິນບໍ່ໄດ້ສອນແນວນັ້ນ. ຄຳພີໄບເບິນບອກວ່າພະເຈົ້າໄດ້ສ້າງສິ່ງທີ່ມີຊີວິດທັງໝົດ—ຕົ້ນເດີມ 1:26-31.

Two girls play near a house in a garden with flowers, trees, and animals — ນື່ອງຈາກມີຄົນສ້າງເຮືອນ ແລ້ວໃຜສ້າງດອກໄມ້ ຕົ້ນໄມ້ ແລະສັດຕ່າງໆ?

ແຕ່ບາງຄົນອາດບອກວ່າລາວບໍ່ເຊື່ອວ່າມີພະເຈົ້າ. ຊັ້ນລູກຈະເວົ້າແນວໃດ?— ລູກລອງຍົກຕົວຢ່າງເລື່ອງເຮືອນເບິ່ງ? ແລ້ວຖາມລາວວ່າ: “ໃຜໄດ້ສ້າງເຮືອນຫຼັງນັ້ນ?” ທຸກຄົນຮູ້ວ່າຈະຕ້ອງມີຄົນໃດຄົນໜຶ່ງທີ່ສ້າງເຮືອນຂຶ້ນມາ. ແນ່ນອນເຮືອນບໍ່ເຄີຍສ້າງມັນເອງ!—ເຫບເລີ 3:4.

ຈາກນັ້ນພາຄົນນັ້ນເຂົ້າໄປໃນສວນ ຊີ້ໃຫ້ລາວເບິ່ງດອກໄມ້ແລະຖາມລາວວ່າ ໃຜໄດ້ສ້າງດອກໄມ້ນີ້? ບໍ່ມີມະນຸດຄົນໃດໄດ້ສ້າງດອກໄມ້. ຄືກັບທີ່ເຮືອນບໍ່ໄດ້ສ້າງມັນເອງ ດອກໄມ້ກໍບໍ່ໄດ້ສ້າງມັນເອງຄືກັນ. ມີຜູ້ໜຶ່ງສ້າງມັນ. ຜູ້ນັ້ນແມ່ນພະເຈົ້າ.

ຂໍໃຫ້ຄົນນັ້ນລອງຟັງສຽງນົກຮ້ອງເພງເບິ່ງ. ແລ້ວຖາມລາວວ່າ “ໃຜໄດ້ສ້າງນົກແລະສອນໃຫ້ມັນຮ້ອງເພງ?” ພະເຈົ້ານັ້ນແຫຼະ. ພະເຈົ້າເປັນຜູ້ສ້າງສະຫວັນແລະແຜ່ນດິນໂລກແລະສິ່ງທີ່ມີຊີວິດທັງໝົດ! ພະອົງເປັນຜູ້ໃຫ້ຊີວິດ.

ແຕ່ບາງຄົນອາດຈະບອກວ່າລາວເຊື່ອສິ່ງທີ່ລາວເຫັນເທົ່ານັ້ນ. ລາວອາດຈະເວົ້າວ່າ: ‘ຖ້າຂ້ອຍເບິ່ງບໍ່ເຫັນ ຂ້ອຍກໍຈະບໍ່ເຊື່ອ.’ ດັ່ງນັ້ນ ລາງຄົນບອກວ່າລາວບໍ່ເຊື່ອວ່າມີພະເຈົ້າເພາະລາວບໍ່ເຫັນພະອົງ.

ແມ່ນແລ້ວເຮົາບໍ່ເຫັນພະເຈົ້າ. ຄຳພີໄບເບິນກ່າວວ່າ: ‘ບໍ່ມີໃຜເຫັນພະເຈົ້າໄດ້.’ ບໍ່ວ່າຜູ້ຊາຍ ຜູ້ຍິງ ຫຼືເດັກນ້ອຍທີ່ຢູ່ເທິງແຜ່ນດິນໂລກ ບໍ່ມີຈັກຄົນເຄີຍເຫັນພະເຈົ້າ. ດັ່ງນັ້ນ ເຮົາຈຶ່ງບໍ່ຄວນພະຍາຍາມແຕ້ມຫຼືປັ້ນຮູບຂອງພະເຈົ້າ. ແມ່ນແຕ່ພະເຈົ້າເອງກໍບອກພວກເຮົາວ່າບໍ່ໃຫ້ເຮັດຮູບຈຳລອງຂອງພະອົງ. ດັ່ງນັ້ນ ພະເຈົ້າຈະບໍ່ພໍໃຈຖ້າເຮົາມີສິ່ງເຫຼົ່ານັ້ນຢູ່ໃນເຮືອນ.—ອົບພະຍົບ 20:4, 5; 33:20; ໂຢຮັນ 1:18.

ແຕ່ຖ້າລູກບໍ່ສາມາດເຫັນພະເຈົ້າ ແລ້ວລູກຈະຮູ້ໄດ້ຢ່າງໃດວ່າມີພະເຈົ້າແທ້? ລອງຄິດແບບນີ້ເບິ່ງ. ລູກເຫັນລົມບໍ?— ບໍ່ມີໃຜເຫັນລົມ. ແຕ່ລູກເຫັນສິ່ງທີ່ລົມເຮັດໃຫ້ເກີດຂຶ້ນ. ລູກຈະເຫັນໃບໄມ້ເໜັງຕີງເມື່ອລົມພັດໃສ່ກິ່ງໄມ້. ດັ່ງນັ້ນ ລູກຈຶ່ງເຊື່ອວ່າມີລົມ.

A boy and a girl have difficulty walking in the wind — ລູກຮູ້ໄດ້ແນວໃດວ່າມີລົມ?

ລູກເຫັນສິ່ງຕ່າງໆທີ່ພະເຈົ້າໄດ້ເຮັດໄວ້ຄືກັນ. ເມື່ອລູກເຫັນດອກໄມ້ງາມໆຈັກດອກໜຶ່ງຫຼືນົກຕົວໜຶ່ງ ລູກກໍເຫັນສິ່ງທີ່ພະເຈົ້າສ້າງ. ນັ້ນຈຶ່ງເຮັດໃຫ້ລູກເຊື່ອວ່າມີພະເຈົ້າແທ້ໆ.

ບາງຄົນອາດຈະຖາມລູກວ່າ ‘ໃຜສ້າງດວງຕາເວັນແລະໜ່ວຍໂລກ?’ ຄຳພີໄບເບິນບອກວ່າ: “ພະເຈົ້າໄດ້ນິລະມິດສ້າງຟ້າທັງຫຼາຍແລະແຜ່ນດິນໂລກ.” (ຕົ້ນເດີມ 1:1) ແມ່ນແລ້ວ ພະເຈົ້າໄດ້ສ້າງສິ່ງທີ່ວິເສດສຸດທັງໝົດນີ້! ລູກຮູ້ສຶກແນວໃດໃນເລື່ອງນີ້?—

ການມີຊີວິດເປັນສິ່ງທີ່ດີອີ່ຫຼີແມ່ນບໍ? ເຮົາໄດ້ຍິນສຽງໂຕນົກຮ້ອງເພງ. ເຮົາໄດ້ເຫັນດອກໄມ້ແລະສິ່ງອື່ນໆທີ່ພະເຈົ້າສ້າງໄວ້. ແລະເຮົາໄດ້ກິນອາຫານທີ່ພະເຈົ້າປະທານແກ່ເຮົາ.

ເຮົາຄວນຂອບໃຈພະເຈົ້າສຳລັບສິ່ງທັງໝົດນີ້. ຍິ່ງກວ່າສິ່ງໃດ ເຮົາຄວນຈະຂອບໃຈພະອົງທີ່ໄດ້ໃຫ້ຊີວິດແກ່ເຮົາ. ຖ້າເຮົາສຳນຶກບຸນຄຸນຕໍ່ພະເຈົ້າແທ້ໆ ເຮົາຈະເຮັດສິ່ງໃດສິ່ງໜຶ່ງ. ຈະເຮັດຫຍັງແດ່?— ເຮົາຈະເຊື່ອຟັງພະເຈົ້າ ແລະເຮົາຈະເຮັດຕາມສິ່ງທີ່ພະອົງບອກໄວ້ໃນຄຳພີໄບເບິນ. ໂດຍວິທີນີ້ເຮົາສະແດງວ່າເຮົາຮັກຜູ້ທີ່ສ້າງໝົດທຸກສິ່ງ.

ເຮົາຄວນສະແດງຄວາມຮູ້ຄ່າສຳລັບທຸກສິ່ງທີ່ພະເຈົ້າໄດ້ສ້າງເພື່ອເຮົາ. ໂດຍວິທີໃດ? ລອງອ່ານເບິ່ງສິ່ງທີ່ຂຽນໄວ້ໃນຄຳເພງ 139:14; ໂຢຮັນ 4:23, 24; 1 ໂຢຮັນ 5:21; ແລະຄຳປາກົດ 4:11.