ບົດທີ 1
ພະເຈົ້າສ້າງຟ້າແລະໂລກ
ພະເຢໂຫວາພະເຈົ້າຂອງເຮົາເປັນຜູ້ສ້າງ. ເພິ່ນສ້າງທຸກສິ່ງທຸກຢ່າງ ທັງສິ່ງທີ່ເຮົາເບິ່ງເຫັນແລະເບິ່ງບໍ່ເຫັນ. ກ່ອນທີ່ເພິ່ນຈະສ້າງສິ່ງທີ່ເຮົາເບິ່ງເຫັນ ເພິ່ນໄດ້ສ້າງທູດສະຫວັນບັກຫຼາຍໆອົງ. ເຈົ້າຮູ້ບໍວ່າທູດສະຫວັນແມ່ນໃຜ? ທູດສະຫວັນແມ່ນຜູ້ທີ່ພະເຢໂຫວາສ້າງໃຫ້ມີລັກສະນະຄືກັບເພິ່ນ. ເຮົາເບິ່ງເຂົາເຈົ້າບໍ່ເຫັນ ຄືກັບທີ່ເຮົາເບິ່ງພະເຈົ້າບໍ່ເຫັນ. ພະເຢໂຫວາສ້າງທູດສະຫວັນອົງທຳອິດໃຫ້ເປັນຜູ້ຊ່ວຍຂອງເພິ່ນ. ທູດສະຫວັນອົງນີ້ໄດ້ຊ່ວຍພະເຢໂຫວາສ້າງດວງດາວຕ່າງໆແລະສິ່ງອື່ນໆທັງໝົດ. ໂລກກໍເປັນດາວດວງໜຶ່ງທີ່ພະເຈົ້າສ້າງໃຫ້ເປັນບ້ານທີ່ສວຍງາມຂອງເຮົາ.
ຕໍ່ມາ ເພິ່ນກໍໄດ້ກຽມໂລກໃຫ້ພ້ອມເພື່ອທີ່ສັດແລະມະນຸດຈະອາໄສຢູ່ໄດ້. ເພິ່ນເຮັດໃຫ້ມີແສງຕາເວັນສ່ອງໃສ່ໂລກ ໃຫ້ມີພູຜາ ທະເລ ແລະແມ່ນ້ຳລຳທານ.
ແລ້ວເພິ່ນຍັງໄດ້ສ້າງຫຍັງອີກ? ພະເຢໂຫວາເວົ້າວ່າ: ‘ເຮົາຈະສ້າງຫຍ້າ ພືດຜັກ ແລະຕົ້ນໄມ້ຕ່າງໆ’ ແລ້ວໝາກໄມ້ ຜັກ ແລະດອກໄມ້ຊະນິດຕ່າງໆກໍເລີ່ມງອກຂຶ້ນມາ. ຈາກນັ້ນ ພະເຢໂຫວາກໍສ້າງສັດທຸກຊະນິດ ບໍ່ວ່າຈະເປັນສັດທີ່ບິນໄດ້ ສັດນ້ຳ ແລະສັດເລືອຄານ. ເພິ່ນຍັງໄດ້ສ້າງສັດໂຕນ້ອຍໆ ເຊັ່ນ: ໂຕກະຕ່າຍ ແລະສັດໂຕໃຫຍ່ໆ ເຊັ່ນ: ໂຕຊ້າງ. ເຈົ້າມັກສັດຫຍັງຫຼາຍທີ່ສຸດ?
ຈາກນັ້ນ ພະເຢໂຫວາກໍເວົ້າກັບທູດສະຫວັນອົງທຳອິດວ່າ: “ໃຫ້ພວກເຮົາສ້າງມະນຸດ.” ພະເຈົ້າສ້າງມະນຸດໃຫ້ແຕກຕ່າງຈາກສັດ. ມະນຸດສາມາດສ້າງສິ່ງຕ່າງໆໄດ້ ສາມາດເວົ້າ ຫົວ ແລະອະທິດຖານໄດ້. ເຂົາເຈົ້າຈະເປັນຜູ້ເບິ່ງແຍງໂລກແລະສັດຕ່າງໆ. ເຈົ້າຮູ້ບໍວ່າໃຜແມ່ນມະນຸດຄົນທຳອິດ? ໃຫ້ເຮົາມາເບິ່ງນຳກັນ.
“ໃນຕອນທຳອິດພະເຈົ້າໄດ້ສ້າງຟ້າກັບໂລກ.”—ປະຖົມມະການ 1:1