ບົດທີ 13

ຄົນເຫຼົ່ານີ້ທີ່ໄດ້ມາເປັນສາວົກຂອງພະເຍຊູ

Nathanael (also called Bartholomew) sits under a tree — ຜູ້ຊາຍຄົນນີ້ແມ່ນໃຜ ແລະລາວມາເປັນສາວົກຂອງພະເຍຊູໄດ້ແນວໃດ?

ໃຜແມ່ນຜູ້ຮັບໃຊ້ທີ່ດີທີ່ສຸດຂອງພະເຈົ້າເທົ່າທີ່ເຄີຍມີຊີວິດຢູ່ເທິງແຜ່ນດິນໂລກ?— ຖືກຕ້ອງແລ້ວ ແມ່ນພະເຍຊູຄລິດນັ້ນແຫຼະ. ລູກຄິດວ່າພວກເຮົາຈະເປັນຄືພະອົງໄດ້ບໍ?— ທີ່ຈິງ ຄຳພີໄບເບິນບອກວ່າພະອົງວາງຕົວຢ່າງໄວ້ໃຫ້ພວກເຮົາຕິດຕາມ. ແລະພະອົງເຊີນພວກເຮົາມາເປັນສາວົກຂອງພະອົງ.

ລູກຮູ້ບໍວ່າການເປັນສາວົກຂອງພະເຍຊູໝາຍເຖິງຫຍັງແດ່?— ໝາຍເຖິງຫຼາຍຢ່າງ. ທຳອິດ ພວກເຮົາຕ້ອງຮຽນຈາກພະອົງ. ແຕ່ນັ້ນຍັງບໍ່ພໍ. ພວກເຮົາຍັງຕ້ອງເຊື່ອຢ່າງແທ້ຈິງໃນສິ່ງທີ່ພະອົງເວົ້າ. ຖ້າເຮົາເຊື່ອ ພວກເຮົາຈະເຮັດສິ່ງທີ່ພະອົງບອກໃຫ້ເຮົາເຮັດ.

ຫຼາຍຄົນບອກວ່າເຂົາເຈົ້າເຊື່ອໃນພະເຍຊູ. ລູກຄິດວ່າເຂົາເຈົ້າທຸກຄົນເປັນສາວົກແທ້ຂອງພະອົງບໍ?— ບໍ່ແມ່ນ ເຂົາເຈົ້າສ່ວນຫຼາຍບໍ່ໄດ້ເປັນ. ເຂົາເຈົ້າອາດຈະໄປໂບດ ແຕ່ຫຼາຍຄົນອາດບໍ່ເຄີຍໃຊ້ເວລາເພື່ອຮຽນຮູ້ສິ່ງທີ່ພະເຍຊູສອນ. ທີ່ຈິງ ມີແຕ່ຜູ້ທີ່ຕິດຕາມຕົວຢ່າງຂອງພະເຍຊູເທົ່ານັ້ນທີ່ເປັນເຫຼົ່າສາວົກຂອງພະອົງ.

ໃຫ້ເຮົາເວົ້າເຖິງບາງຄົນທີ່ເປັນສາວົກຂອງພະເຍຊູຕອນທີ່ພະອົງຢູ່ເທິງແຜ່ນດິນໂລກ. ໜຶ່ງໃນສາວົກຊຸດທຳອິດແມ່ນຟີລິບ. ຟີລິບໄປຫາເພື່ອນທີ່ຊື່ວ່ານະທານາເອນ (ເອີ້ນອີກຊື່ໜຶ່ງວ່າບາເທເລມີ) ເຊິ່ງລູກເຫັນລາວກຳລັງນັ່ງຢູ່ກ້ອງຕົ້ນໄມ້. ເມື່ອນະທານາເອນມາຫາພະເຍຊູ ພະເຍຊູກ່າວວ່າ: ‘ເບິ່ງແມ ນີ້ເປັນຄົນສັດຊື່ເຊິ່ງເປັນຊາວຍິດສະລາເອນແທ້.’ ນະທານາເອນຮູ້ສຶກປະຫຼາດໃຈຈຶ່ງຖາມວ່າ: ‘ພະອົງຮູ້ຈັກຂ້າພະເຈົ້າໄດ້ແນວໃດ?’

Peter and Andrew watch as Jesus calls James and John to be his disciples — ພະເຍຊູເອີ້ນໃຜໃຫ້ມາເປັນສາວົກຂອງພະອົງ?

ພະເຍຊູກ່າວວ່າ “ກ່ອນທ່ານຟີລິບໄດ້ເອີ້ນທ່ານ ເວລາທ່ານຢູ່ໃຕ້ກົກໝາກເດື່ອເທດເຮົາໄດ້ເຫັນທ່ານແລ້ວ.” ນະທານາເອນຮູ້ສຶກປະຫຼາດໃຈຫຼາຍທີ່ພະເຍຊູຮູ້ຢ່າງຄັກແນ່ວ່າລາວຢູ່ບ່ອນໃດ ດັ່ງນັ້ນນະທານາເອນຈຶ່ງເວົ້າວ່າ: “ພະອົງເປັນພະບຸດຂອງພະເຈົ້າ ພະອົງເປັນກະສັດແຫ່ງພວກຍິດສະລາເອນ.”—ໂຢຮັນ 1:49.

ຢູດາອີດສະກາລີໂອດ, ຢູດາ (ເອີ້ນອີກຊື່ໜຶ່ງວ່າຕາເດ), ຊີໂມນ — ຢູດາອີດສະກາລີໂອດ, ຢູດາ (ເອີ້ນອີກຊື່ໜຶ່ງວ່າຕາເດ), ແລະ ຊີໂມນ

ພວກຄົນອື່ນໄດ້ມາເປັນສາວົກຂອງພະເຍຊູກ່ອນຟີລິບແລະນະທານາເອນໜຶ່ງມື້. ຄົນເຫຼົ່ານີ້ແມ່ນອັນດະເລອາແລະເປໂຕອ້າຍຂອງລາວ ທັງໂຢຮັນແລະບາງທີກໍແມ່ນຢາໂກໂບອ້າຍຂອງໂຢຮັນນຳ. (ໂຢຮັນ 1:35-51) ຢ່າງໃດກໍຕາມ ຕໍ່ມາສີ່ຄົນນີ້ໄດ້ກັບຄືນໄປເຮັດວຽກຈັບປາອີກ. ແລ້ວມື້ໜຶ່ງຕອນທີ່ພະເຍຊູຍ່າງຢູ່ຮິມຝັ່ງທະເລຄາລິເລ ພະອົງເຫັນເປໂຕແລະອັນດະເລອາຢ່ອນດາງຈັບປາລົງທະເລ. ພະເຍຊູເວົ້າກັບເຂົາເຈົ້າວ່າ: “ຈົ່ງຕາມເຮົາມາເຖີ້ນ.”

ຢາໂກໂບ (ລູກຂອງອາລະເຟ), ໂທມາ, ມັດທາຍ — ຢາໂກໂບ (ລູກຂອງອາລະເຟ), ໂທມາ, ແລະ ມັດທາຍ

ເມື່ອຍ່າງໄປອີກໜ້ອຍໜຶ່ງ ພະເຍຊູເຫັນຢາໂກໂບແລະໂຢຮັນ. ເຂົາເຈົ້າຢູ່ເທິງເຮືອກັບພໍ່ ກຳລັງຈູນດາງຈັບປາ. ພະເຍຊູເອີ້ນເອົາເຂົາເຈົ້າໃຫ້ຕິດຕາມພະອົງໄປນຳຄືກັນ. ລູກຈະເຮັດແນວໃດຖ້າພະເຍຊູເອີ້ນລູກ? ລູກຈະຕິດຕາມພະອົງໄປທັນທີເລີຍບໍ?— ຄົນເຫຼົ່ານີ້ຮູ້ວ່າພະເຍຊູແມ່ນໃຜ. ເຂົາເຈົ້າຮູ້ວ່າພະເຈົ້າສົ່ງພະເຍຊູມາ. ດັ່ງນັ້ນ ເຂົາເຈົ້າຈຶ່ງປະວຽກຫາປາທັນທີແລ້ວຕິດຕາມພະເຍຊູໄປ.—ມັດທາຍ 4:18-22.

ນະທານາເອນ, ຟີລິບ, ໂຢຮັນ — ນະທານາເອນ, ຟີລິບ, ແລະ ໂຢຮັນ

ເມື່ອຄົນເຫຼົ່ານີ້ໄດ້ມາເປັນຜູ້ຕິດຕາມພະເຍຊູ ນັ້ນໝາຍຄວາມວ່າຫຼັງຈາກນັ້ນເຂົາເຈົ້າເຮັດສິ່ງທີ່ຖືກຕ້ອງສະເໝີບໍ?— ບໍ່ແມ່ນ. ລູກອາດຈະຈື່ໄດ້ວ່າ ຄົນເຫຼົ່ານີ້ຍັງໄດ້ຖຽງກັນວ່າໃຜເປັນໃຫຍ່ທີ່ສຸດໃນພວກເຂົາເຈົ້າ. ແຕ່ເຂົາເຈົ້າຟັງພະເຍຊູ ແລະເຂົາເຈົ້າເຕັມໃຈປັບປ່ຽນຄວາມຄິດແລະການກະທຳຂອງຕົນ. ຖ້າເຮົາເຕັມໃຈປັບປ່ຽນ ເຮົາກໍເປັນສາວົກຂອງພະເຍຊູໄດ້ຄືກັນ.

ພະເຍຊູເຊີນຄົນທຸກປະເພດໃຫ້ມາເປັນສາວົກຂອງພະອົງ. ຄັ້ງໜຶ່ງຜູ້ປົກຄອງຫນຸ່ມທີ່ມັ່ງມີຄົນໜຶ່ງມາຫາພະເຍຊູແລະຖາມເຖິງວິທີຈະໄດ້ຊີວິດຕະຫຼອດໄປ. ເມື່ອຜູ້ຄຸ້ມຄອງກ່າວວ່າລາວໄດ້ເຊື່ອຟັງພະບັນຍັດຕັ້ງແຕ່ນ້ອຍ ພະເຍຊູໄດ້ເຊີນລາວວ່າ: “ຈົ່ງມາຕາມເຮົາໄປເຖີ້ນ.” ລູກຮູ້ບໍວ່າເກີດຫຍັງຂຶ້ນ?—

ເອົາລະ ເມື່ອຊາຍຄົນນີ້ໄດ້ຍິນວ່າການເປັນສາວົກຂອງພະເຍຊູສຳຄັນກວ່າການເປັນຄົນຮັ່ງມີ ລາວຮູ້ສຶກເປັນທຸກຫຼາຍ. ລາວບໍ່ໄດ້ມາເປັນສາວົກຂອງພະເຍຊູເພາະວ່າລາວຮັກເງິນຄຳຫຼາຍກວ່າຮັກພະເຈົ້າ.—ລືກາ 18:18-25.

ຫຼັງຈາກພະເຍຊູປະກາດໄດ້ເກືອບປີເຄິ່ງ ພະອົງໄດ້ເລືອກເອົາສາວົກ 12 ຄົນໃຫ້ເປັນອັກຄະສາວົກ. ອັກຄະສາວົກແມ່ນຜູ້ທີ່ພະອົງສົ່ງອອກໄປເຮັດວຽກພິເສດ. ລູກຮູ້ຊື່ຂອງເຂົາເຈົ້າບໍ?— ລອງເບິ່ງວ່າເຮົາຈະຈື່ຊື່ຂອງເຂົາເຈົ້າໄດ້. ເບິ່ງຮູບເຂົາເຈົ້າຢູ່ນີ້ດູ ແລະລອງເບິ່ງວ່າລູກຈະອ່ານຊື່ຂອງເຂົາເຈົ້າໄດ້ບໍ່. ລູກລອງທ່ອງຊື່ຂອງເຂົາເຈົ້າເບິ່ງດູ.

Women who became disciples of Jesus travel with him, wash his clothes, and help prepare his meals — ຜູ້ຍິງເຫຼົ່ານັ້ນທີ່ຊ່ອຍເຫຼືອພະເຍຊູຕອນທີ່ພະອົງໄປປະກາດມີຜູ້ໃດແດ່?

ໃນທີ່ສຸດ ອັກຄະສາວົກຄົນໜຶ່ງໃນ 12 ຄົນນີ້ໄດ້ກາຍເປັນຄົນບໍ່ດີ. ລາວແມ່ນຢູດາອີດສະກາລີໂອດ. ຫຼັງຈາກນັ້ນ ສາວົກອີກຄົນໜຶ່ງກໍໄດ້ຖືກເລືອກໃຫ້ມາເປັນອັກຄະສາວົກ. ລູກຮູ້ຊື່ຂອງລາວບໍ?— ລາວຊື່ມັດເທຍ. ຕໍ່ມາໂປໂລແລະບານາບາກໍໄດ້ມາເປັນອັກຄະສາວົກນຳ ແຕ່ເຂົາເຈົ້າບໍ່ໄດ້ຢູ່ໃນກຸ່ມອັກຄະສາວົກ 12 ຄົນ.—ກິດຈະການ 1:23-26; 14:14.

ດັ່ງທີ່ເຮົາໄດ້ຮຽນໃນບົດທີ 1 ຂອງປຶ້ມນີ້ ພະເຍຊູສະແດງຄວາມສົນໃຈຕໍ່ເດັກນ້ອຍ. ເປັນຫຍັງພະອົງຈຶ່ງເຮັດແນວນັ້ນ?— ເພາະພະອົງຮູ້ວ່າເດັກນ້ອຍອາດຈະມາເປັນສາວົກຂອງພະອົງກໍໄດ້ຄືກັນ. ທີ່ຈິງ ເດັກນ້ອຍມັກຈະເວົ້າເຖິງສິ່ງຕ່າງໆໃນວິທີທີ່ຜູ້ໃຫຍ່ກໍຍັງຢາກຟັງແລະຢາກຮຽນຮູ້ເລື່ອງກ່ຽວກັບຄູຜູ້ຍິ່ງໃຫຍ່ຫຼາຍຂຶ້ນ.

ນອກຈາກນັ້ນ ຜູ້ຍິງຫຼາຍຄົນກໍຍັງໄດ້ມາເປັນສາວົກຂອງພະເຍຊູ. ບາງຄົນເດີນທາງໄປກັບພະອົງເມື່ອພະອົງໄປປະກາດຕາມເມືອງຕ່າງໆ. ມາລີມັກດາລາ ໂຢຮັນນາ ແລະຊຶຊັນນາໄດ້ເຮັດເຊັ່ນນັ້ນ. ເຂົາເຈົ້າອາດຈະຊ່ອຍກຽມອາຫານແລະຊັກເສື້ອຜ້າໃຫ້ພະອົງນຳ.—ລືກາ 8:1-3.

ລູກຕ້ອງການເປັນສາວົກຂອງພະເຍຊູບໍ?— ໃຫ້ຈື່ໄວ້ວ່າພຽງແຕ່ເວົ້າວ່າເຮົາເປັນສາວົກຂອງພະອົງນັ້ນຈະບໍ່ເຮັດໃຫ້ເຮົາເປັນສາວົກ. ເຮົາຕ້ອງປະຕິບັດໃຫ້ເປັນຄືສາວົກຂອງພະອົງບໍ່ວ່າເຮົາຈະຢູ່ບ່ອນໃດກໍຕາມ ບໍ່ແມ່ນແຕ່ຕອນທີ່ປະຊຸມຄລິດສະຕຽນເທົ່ານັ້ນ. ລູກຄິດອອກບໍວ່າຢູ່ບ່ອນໃດແດ່ເຊິ່ງສຳຄັນທີ່ເຮົາຈະປະຕິບັດຕົວໃຫ້ເປັນຄືສາວົກຂອງພະເຍຊູ?—

ແມ່ນແລ້ວ ເຮົາຄວນເຮັດແບບນັ້ນຢູ່ບ້ານ. ແຕ່ຍັງມີອີກບ່ອນໜຶ່ງ ແມ່ນຢູ່ທີ່ໂຮງຮຽນ. ສິ່ງທີ່ລູກແລະພໍ່ (ແມ່) ບໍ່ຄວນຈະລືມແມ່ນ ເພື່ອຈະເປັນສາວົກແທ້ຂອງພະເຍຊູ ເຮົາຕ້ອງປະຕິບັດຕົວຄືກັບພະອົງຢູ່ຕະຫຼອດເວລາ ທຸກໆມື້ ບໍ່ວ່າເຮົາຈະຢູ່ບ່ອນໃດກໍຕາມ.

At school, a boy studies while his classmates misbehave — ຢູ່ບ່ອນໃດແດ່ສຳຄັນທີ່ເຮົາຈະປະຕິບັດຕົວເປັນສາວົກຂອງພະເຍຊູ?

ຕອນນີ້ໃຫ້ເຮົາອ່ານນຳກັນເຖິງສິ່ງທີ່ຄຳພີໄບເບິນບອກກ່ຽວກັບສາວົກຂອງພະເຍຊູ ຢູ່ໃນພະທຳມັດທາຍ 28:19, 20; ລືກາ 6:13-16; ໂຢຮັນ 8:31, 32; ແລະ 1 ເປໂຕ 2:21.