ບົດ 14
ສາວົກຮຸ່ນທຳອິດຂອງພະເຍຊູ
ພາຍຫຼັງຢູ່ໃນປ່າໄດ້ 40 ມື້ ພະເຍຊູກັບໄປຫາໂຍຮັນ ຜູ້ທີ່ໄດ້ໃຫ້ພະອົງຮັບບັບເຕມາ. ໃນຂະນະທີ່ພະອົງເຂົ້າໃກ້ ເບິ່ງຄືວ່າໂຍຮັນຊີ້ໄປທີ່ພະອົງແລະກ່າວກັບຄົນອື່ນທີ່ຢູ່ຫັ້ນວ່າ “ຈົ່ງເບິ່ງລູກແພະ [“ແກະ,” ລ.ມ.] ແຫ່ງພະເຈົ້າ ຜູ້ຍົກບາບໂທດແຫ່ງມະນຸດສະໂລກອອກເສຍ. ເປັນແຕ່ພະອົງນີ້ທີ່ເຮົາໄດ້ກ່າວວ່າ ພະອົງທີ່ມາພາຍຫຼັງເຮົາກໍໃຫຍ່ກວ່າເຮົາ ເພາະພະອົງເປັນຢູ່ກ່ອນເຮົາແລ້ວ.” ແມ່ນວ່າໂຍຮັນອາຍຸຫຼາຍກວ່າພະເຍຊູລູກພີ່ລູກນ້ອງຂອງທ່ານກໍຕາມ ໂຍຮັນຮູ້ດີວ່າພະເຍຊູມີສະພາບເປັນບຸກຄົນວິນຍານໃນສະຫວັນກ່ອນທ່ານເກີດ.
ເຖິງແນວນັ້ນກໍດີ ສອງສາມສັບປະດາກ່ອນໜ້ານັ້ນ ເມື່ອພະເຍຊູມາເພື່ອຮັບບັບເຕມາ ເບິ່ງຄືວ່າ ໂຍຮັນບໍ່ແນ່ໃຈວ່າ ພະເຍຊູຈະເປັນພະເມຊີ. ໂຍຮັນຍອມຮັບວ່າ “ເຮົາບໍ່ໄດ້ຮູ້ຈັກພະອົງ ແຕ່ວ່າເພື່ອພະອົງຈະປາກົດໃຫ້ແຈ້ງແກ່ພວກຍິດສະລາເອນ ເພາະເຫດນັ້ນ ເຮົາໄດ້ມາໃຫ້ຮັບສິນບັບເຕມາໃນນ້ຳ.”
ໂຍຮັນອະທິບາຍຕໍ່ໄປເຖິງສິ່ງທີ່ເກີດຂຶ້ນ ເມື່ອທ່ານໃຫ້ພະເຍຊູຮັບບັບເຕມາ “ເຮົາໄດ້ເຫັນພະວິນຍານລົງມາຈາກສະຫວັນເໝືອນນົກເຂົາ ແລະພະວິນຍານໄດ້ຕັ້ງຢູ່ເທິງພະອົງ. ແລະຝ່າຍເຮົາ ເຮົາບໍ່ໄດ້ຮູ້ຈັກພະອົງ ແຕ່ວ່າຜູ້ທີ່ໄດ້ໃຊ້ເຮົາໄປໃຫ້ຮັບສິນບັບເຕມາໃນນ້ຳ ກໍໄດ້ກ່າວແກ່ເຮົາວ່າ ເຈົ້າຈະເຫັນພະວິນຍານລົງແລະຕັ້ງຢູ່ເທິງຜູ້ໃດ ຜູ້ນັ້ນເປັນຜູ້ໄດ້ຮັບສິນບັບເຕມາໃນພະວິນຍານບໍລິສຸດ. ແລະເຮົາໄດ້ເຫັນ ແລະເຮົາເປັນພິຍານແລ້ວວ່າ ຜູ້ນີ້ເປັນພະບຸດຂອງພະເຈົ້າ.”
ມື້ຕໍ່ມາໂຍຮັນຢືນຢູ່ກັບສາວົກສອງຄົນ. ອີກເທື່ອໜຶ່ງ ເມື່ອພະເຍຊູສະເດັດເຂົ້າມາໃກ້ ທ່ານກ່າວວ່າ “ຈົ່ງເບິ່ງລູກແພະ [“ແກະ,” ລ.ມ.] ແຫ່ງພະເຈົ້າ”! ແລ້ວສາວົກທັງສອງຂອງໂຍຮັນຜູ້ໃຫ້ບັບເຕມາກໍໄດ້ຕາມພະເຍຊູໄປ. ໜຶ່ງໃນສອງຄົນນີ້ແມ່ນອັນດະເລອາ ແລະອີກຄົນໜຶ່ງຄືຈະເປັນຄົນດຽວກັນທີ່ໄດ້ບັນທຶກເລື່ອງນີ້ເຊິ່ງມີຊື່ໂຍຮັນຄືກັນ. ໂຍຮັນຄົນນີ້ຄືຈະເປັນລູກພີ່ລູກນ້ອງຂອງພະເຍຊູ ປາກົດວ່າເປັນລູກຊາຍຂອງນາງຊະໂລເມນ້ອງສາວຂອງມາລີ.
ເມື່ອຫັນໄປເຫັນອັນດະເລອາແລະໂຍຮັນພວມຕາມມາ ພະເຍຊູຖາມເຂົາວ່າ “ທ່ານທັງສອງຊອກຫາສິ່ງໃດ”?
ເຂົາທູນຖາມວ່າ “ລັບບີ ພະອົງອາໄສຢູ່ທີ່ໃດ”?
ພະເຍຊູຕອບວ່າ “ທ່ານທັງສອງຈົ່ງມາເບິ່ງເທີ້ນ.”
ຕອນນັ້ນເປັນເວລາປະມານບ່າຍສີ່ໂມງ ສ່ວນເວລາທີ່ເຫຼືອຂອງມື້ນັ້ນອັນດະເລອາແລະໂຍຮັນໄດ້ຢູ່ກັບພະເຍຊູ. ຫຼັງຈາກນັ້ນ ອັນດະເລອາຮູ້ສຶກຕື່ນເຕັ້ນຫຼາຍຈຶ່ງຟ້າວໄປຫາອ້າຍຂອງຕົນທີ່ຊື່ວ່າເປໂຕ. ເຂົາບອກອ້າຍວ່າ “ຫມູ່ເຮົາໄດ້ພົບເມຊີ” ແລະໄດ້ພາເປໂຕໄປຫາພະເຍຊູ. ອາດຈະເປັນເວລາດຽວກັນທີ່ໂຍຮັນພໍ້ຍາໂກໂບນ້ອງຊາຍແລະພາເຂົາມາພົບພະເຍຊູ; ແຕ່ຕາມລັກສະນະນິດໄສແລ້ວ ໂຍຮັນບໍ່ໄດ້ກ່າວເຖິງເລື່ອງສ່ວນຕົວນີ້ໃນກິດຕິຄຸນຂອງທ່ານ.
ມື້ຕໍ່ມາ ພະເຍຊູພໍ້ຟີລິບ ຜູ້ເຊິ່ງມາຈາກເບດຊາອີດາ ເມືອງດຽວກັນກັບອັນດະເລອາແລະເປໂຕ. ພະອົງຊວນເຂົາວ່າ “ຈົ່ງຕາມເຮົາໄປເທີ້ນ.”
ແລ້ວຟີລິບພົບນະທານາເອນ ຜູ້ທີ່ຮຽກອີກຊື່ໜຶ່ງວ່າບາເທເລມີ ແລະບອກວ່າ “ຫມູ່ເຮົາໄດ້ພົບພະອົງ ທີ່ທ່ານໂມເຊໄດ້ຂຽນເຖິງພະອົງໃນພະບັນຍັດ ແລະພວກຜູ້ທຳນວາຍໄດ້ຂຽນດ້ວຍ ເປັນພະເຍຊູລູກຊາຍຂອງທ່ານໂຍເຊບຊາວເມືອງນາຊາເລດ.” ນະທານາເອນຖາມຢ່າງສົງໄສວ່າ “ສິ່ງໃດສິ່ງໜຶ່ງອັນດີຈະມາແຕ່ເມືອງນາຊາເລດໄດ້ຫຼື”?
ຟີລິບກ່າວຊວນວ່າ “ທ່ານຈົ່ງມາເບິ່ງເທີ້ນ.” ເມື່ອທັງສອງໄປຫາພະເຍຊູ ພະອົງກ່າວເຖິງນະທານາເອນວ່າ “ຜູ້ນີ້ເປັນຊາວຍິດສະລາເອນອັນຈິງ ບໍ່ມີຄວາມອຸບາຍໃນທ່ານ.”
ນະທານາເອນທູນຖາມວ່າ “ພະອົງຮູ້ຈັກຂ້າພະເຈົ້າແຕ່ທີ່ໃດ”?
ພະເຍຊູຕອບວ່າ “ກ່ອນທ່ານຟີລິບໄດ້ເອີ້ນທ່ານ ເວລາທ່ານຢູ່ໃຕ້ກົກໝາກເດື່ອເທດເຮົາໄດ້ເຫັນທ່ານແລ້ວ.”
ນະທານາເອນຈຶ່ງປະຫຼາດໃຈ ແລະທູນວ່າ “ພະອາຈານເຈົ້າຂ້າ ພະອົງເປັນພະບຸດຂອງພະເຈົ້າ ພະອົງເປັນກະສັດແຫ່ງພວກຍິດສະລາເອນ.”
ພະເຍຊູຖາມເຂົາວ່າ “ທ່ານເຊື່ອເພາະເຮົາໄດ້ກ່າວແກ່ທ່ານວ່າເຮົາໄດ້ເຫັນທ່ານ ເວລາທ່ານຢູ່ໃຕ້ກົກໝາກເດື່ອເທດ ທ່ານຈະເຫັນສິ່ງອັນໃຫຍ່ກວ່າສິ່ງທັງຫຼາຍນີ້ອີກ.” ແລ້ວພະອົງໄດ້ສັນຍາວ່າ “ຈິງແທ້ໆ ເຮົາກ່າວແກ່ທ່ານທັງຫຼາຍວ່າ ແຕ່ນີ້ຕໍ່ໄປ ພວກທ່ານຈະເຫັນສະຫວັນແຫວກອອກແລ້ວ ແລະພວກທູດຂອງພະເຈົ້າຂຶ້ນໄປແລະລົງມາເທິງບຸດມະນຸດ.”
ຈາກນັ້ນບໍ່ດົນ ພະເຍຊູພ້ອມກັບສາວົກໃໝ່ທີ່ພະອົງໄດ້ຮັບໄວ້ກໍອອກຈາກຮ່ອມພູຢູລະເດນ ແລະເດີນທາງໄປຄາລິເລ. ໂຍຮັນ 1:29-51.
▪ ສາວົກຮຸ່ນທຳອິດຂອງພະເຍຊູແມ່ນໃຜແດ່?
▪ ເປໂຕແລະບາງທີຍາໂກໂບດ້ວຍ ໄດ້ມາຮູ້ຈັກພະເຍຊູໄດ້ຢ່າງໃດ?
▪ ແມ່ນຫຍັງເຮັດໃຫ້ນະທານາເອນໝັ້ນໃຈວ່າພະເຍຊູເປັນພະບຸດຂອງພະເຈົ້າ?