ບົດທີ 24
ຢ່າໄດ້ກາຍເປັນຄົນຂີ້ລັກ!
ເຄີຍມີໃຜລັກສິ່ງຂອງອັນໜຶ່ງຈາກລູກບໍ?— ມັນເຮັດໃຫ້ລູກຮູ້ສຶກແນວໃດ?— ໃຜກໍຕາມທີ່ລັກສິ່ງຂອງຜູ້ນັ້ນເປັນຄົນຂີ້ລັກ ແລະບໍ່ມີໃຜມັກຄົນຂີ້ລັກ. ລູກຄິດວ່າຄົນເຮົາກາຍເປັນຄົນຂີ້ລັກໄດ້ແນວໃດ? ຄົນເຮົາເປັນຄົນຂີ້ລັກຕັ້ງແຕ່ເກີດພຸ້ນບໍ?—
ເຮົາຫາກໍຮຽນຮູ້ວ່າຄົນເຮົາເກີດມາພ້ອມກັບບາບ. ດັ່ງນັ້ນ ເຮົາໝົດທຸກຄົນຈຶ່ງບໍ່ສົມບູນແບບ. ແຕ່ບໍ່ມີໃຜເກີດມາເປັນຄົນຂີ້ລັກ. ຄົນທີ່ເປັນຂີ້ລັກອາດມາຈາກຄອບຄົວທີ່ດີກໍໄດ້. ພໍ່ແມ່ ອ້າຍ ເອື້ອຍ ແລະນ້ອງຂອງລາວອາດເປັນຄົນສັດຊື່. ແຕ່ຄວາມປາຖະໜາທີ່ຄົນນັ້ນມີຕໍ່ສິ່ງຕ່າງໆເຊັ່ນ ເງິນແລະສິ່ງທີ່ເງິນຊື້ໄດ້ອາດເຮັດໃຫ້ລາວກາຍເປັນຄົນຂີ້ລັກ.
ລູກບອກໄດ້ບໍວ່າໃຜເປັນຄົນຂີ້ລັກຄົນທຳອິດ?— ຄິດເບິ່ງດູ. ຄູຜູ້ຍິ່ງໃຫຍ່ຮູ້ຈັກຜູ້ນັ້ນເມື່ອພະອົງຢູ່ໃນສະຫວັນ. ຂີ້ລັກຜູ້ນັ້ນເປັນທູດສະຫວັນ. ແຕ່ເນື່ອງຈາກພະເຈົ້າສ້າງທູດສະຫວັນທັງໝົດໃຫ້ສົມບູນແບບ ທູດສະຫວັນອົງນັ້ນກາຍເປັນຂີ້ລັກໄດ້ແນວໃດ?— ດັ່ງທີ່ເຮົາໄດ້ຮຽນໃນບົດທີ 8 ຂອງປຶ້ມນີ້ ທູດສະຫວັນອົງນັ້ນຕ້ອງການໃນສິ່ງທີ່ບໍ່ແມ່ນຂອງຕົນເອງ. ລູກຈື່ບໍວ່າສິ່ງນັ້ນແມ່ນຫຍັງ?—
ຫຼັງຈາກທີ່ພະເຈົ້າສ້າງມະນຸດຊາຍຍິງຄູ່ທຳອິດ ທູດສະຫວັນອົງນັ້ນຕ້ອງການໃຫ້ມະນຸດນະມັດສະການມັນ. ມັນບໍ່ມີສິດທີ່ຈະໄດ້ຮັບການນະມັດສະການຈາກມະນຸດ. ການນະມັດສະການນັ້ນເປັນຂອງພະເຈົ້າ. ແຕ່ມັນລັກເອົາການນະມັດສະການນັ້ນ! ໂດຍເຮັດໃຫ້ອາດາມແລະເອວານະມັດສະການມັນ ທູດສະຫວັນອົງນັ້ນກາຍເປັນຂີ້ລັກ. ມັນກາຍເປັນຊາຕານພະຍາມານ.
ອັນໃດທີ່ເຮັດໃຫ້ຄົນເຮົາກາຍເປັນຄົນຂີ້ລັກ?— ຍ້ອນຄວາມຢາກໄດ້ໃນສິ່ງທີ່ບໍ່ແມ່ນຂອງຕົນເອງ. ຄວາມຢາກໄດ້ນີ້ອາດຮຸນແຮງຫຼາຍຈົນສາມາດເຮັດໃຫ້ແມ່ນແຕ່ຄົນທີ່ດີເຮັດສິ່ງທີ່ບໍ່ດີ. ບາງຄັ້ງ ຄົນທີ່ກາຍເປັນຄົນຂີ້ລັກກໍບໍ່ໄດ້ຫັນກັບມາເຮັດສິ່ງທີ່ດີອີກເລີຍ. ຜູ້ໜຶ່ງໃນຈຳນວນຄົນເຫຼົ່ານີ້ແມ່ນສາວົກຂອງພະເຍຊູ. ລາວຊື່ຢູດາອີດສະກາລີໂອດ.
ຢູດາຮູ້ວ່າການລັກເປັນສິ່ງທີ່ຜິດເນື່ອງຈາກລາວໄດ້ຮັບການສອນກ່ຽວກັບກົດໝາຍຂອງພະເຈົ້າຕັ້ງແຕ່ເປັນເດັກນ້ອຍ. ລາວຮູ້ວ່າຄັ້ງໜຶ່ງພະເຈົ້າແມ່ນແຕ່ກ່າວຈາກສະຫວັນແລະບອກປະຊາຊົນຂອງພະອົງວ່າ: “ຢ່າລັກເອົາຂອງ.” (ອົບພະຍົບ 20:15) ເມື່ອຢູດາເຕີບໃຫຍ່ຂຶ້ນ ລາວພົບກັບຄູຜູ້ຍິ່ງໃຫຍ່ແລະໄດ້ມາເປັນສາວົກຄົນໜຶ່ງຂອງພະອົງ. ຕໍ່ມາພະເຍຊູເຖິງຂັ້ນເລືອກເອົາຢູດາໃຫ້ເປັນອັກຄະສາວົກຄົນໜຶ່ງໃນບັນດາອັກຄະສາວົກ 12 ຄົນ.
ພະເຍຊູແລະພວກອັກຄະສາວົກເດີນທາງໄປນຳກັນ. ເຂົາເຈົ້າກິນເຂົ້ານຳກັນ. ແລະເງິນທັງໝົດທີ່ເຂົາເຈົ້າມີໄດ້ເກັບໄວ້ຢູ່ໃນກ່ອງໜ່ວຍໜຶ່ງ. ພະເຍຊູໃຫ້ຢູດາເປັນຜູ້ເບິ່ງແຍງກ່ອງນັ້ນ. ແນ່ນອນວ່າເງິນນັ້ນບໍ່ໄດ້ເປັນຂອງຢູດາ. ແຕ່ລູກຮູ້ບໍວ່າຫຼັງຈາກນັ້ນບໍ່ດົນຢູດາໄດ້ເຮັດຫຍັງ?—
ເປັນຫຍັງຢູດາຈຶ່ງລັກ?
ຢູດາເລີ່ມເອົາເງິນອອກຈາກກ່ອງໃນເວລາທີ່ລາວບໍ່ຄວນຈະເອົາມັນອອກໄປ. ລາວຈະເອົາເງິນຕອນທີ່ຄົນອື່ນບໍ່ເຫັນ ແລະລາວເຖິງຂັ້ນພະຍາຍາມຊອກຫາວິທີທີ່ຈະເຮັດໃຫ້ໄດ້ເງິນຫຼາຍຕື່ມອີກ. ລາວເລີ່ມຄິດເຖິງແຕ່ເງິນຕະຫຼອດເວລາ. ຂໍໃຫ້ມາເບິ່ງວ່າຄວາມປາຖະໜາທີ່ຜິດນີ້ພາໄປສູ່ເຫດການອັນໃດພຽງບໍ່ເທົ່າໃດມື້ກ່ອນທີ່ຄູຜູ້ຍິ່ງໃຫຍ່ຈະຖືກປະຫານຊີວິດ.
ນາງມາລີເຊິ່ງເປັນເອື້ອຍຂອງທ້າວລາຊະໂລທີ່ເປັນຫມູ່ຂອງພະເຍຊູ ເອົານ້ຳມັນຫອມຢ່າງດີມາຖອກໃສ່ຕີນຂອງພະເຍຊູ. ແຕ່ຢູດາໄດ້ຈົ່ມ. ລູກຮູ້ບໍວ່າເປັນຫຍັງ?— ລາວບອກວ່າຄວນເອົານ້ຳມັນໄປຂາຍແລ້ວເອົາເງິນໄປແຈກຈ່າຍໃຫ້ກັບຄົນທຸກຍາກ. ແຕ່ທີ່ຈິງແລ້ວລາວຢາກໃຫ້ມີເງິນໃນກ່ອງຫຼາຍຂຶ້ນອີກເພື່ອຕົນສາມາດລັກເອົາເງິນນັ້ນ.—ໂຢຮັນ 12:1-6.
ພະເຍຊູບອກຢູດາວ່າຢ່າເຮັດໃຫ້ມາລີເຊິ່ງເປັນຄົນທີ່ມີໃຈກະລຸນາຫຼາຍຮູ້ສຶກລຳບາກໃຈ. ຢູດາບໍ່ມັກເມື່ອພະເຍຊູເວົ້າແນວນັ້ນກັບລາວ ດັ່ງນັ້ນລາວຈຶ່ງໄປຫາພວກປະໂລຫິດໃຫຍ່ເຊິ່ງເປັນສັດຕູຂອງພະເຍຊູ. ພວກເຂົາເຈົ້າຕ້ອງການຈັບພະເຍຊູ ແຕ່ເຂົາເຈົ້າຕ້ອງການເຮັດໃນເວລາກາງຄືນເພື່ອປະຊາຊົນຈະບໍ່ເຫັນ.
ຢູດາບອກພວກປະໂລຫິດວ່າ: ‘ຂ້ອຍຈະບອກພວກທ່ານວ່າຈະພົບແລະຈັບພະເຍຊູໄດ້ແນວໃດ ຖ້າພວກທ່ານເອົາເງິນໃຫ້ຂ້ອຍ. ພວກທ່ານຈະໃຫ້ຂ້ອຍເທົ່າໃດ?’
ພວກປະໂລຫິດໃຫຍ່ຕອບວ່າ: ‘ພວກເຮົາຈະເອົາເງິນໃຫ້ເຈົ້າສາມສິບແຜ່ນ.’—ມັດທາຍ 26:14-16.
ຢູດາຮັບເອົາເງິນນັ້ນ. ນັ້ນເທົ່າກັບວ່າລາວໄດ້ຂາຍຄູຜູ້ຍິ່ງໃຫຍ່ໃຫ້ກັບຄົນເຫຼົ່ານັ້ນ! ລູກວາດພາບອອກບໍວ່າມີໃຜເຮັດສິ່ງທີ່ຊົ່ວຮ້າຍແບບນັ້ນໄດ້?— ທີ່ຈິງ ນັ້ນເປັນການກະທຳທີ່ເກີດຂຶ້ນເມື່ອຄົນເຮົາກາຍເປັນຄົນຂີ້ລັກ ແລະໄດ້ລັກເງິນ. ລາວຮັກເງິນຫຼາຍກວ່າຮັກຜູ້ອື່ນຫຼືແມ່ນແຕ່ພະເຈົ້າ.
ບາງທີລູກອາດເວົ້າວ່າ ‘ລູກຈະບໍ່ມີວັນຮັກສິ່ງໃດໆຫຼາຍກວ່າຮັກພະເຢໂຫວາພະເຈົ້າ.’ ນັ້ນເປັນສິ່ງທີ່ດີທີ່ລູກຮູ້ສຶກແບບນັ້ນ. ເມື່ອພະເຍຊູເລືອກເອົາຢູດາໃຫ້ເປັນອັກຄະສາວົກ ຢູດາກໍຄົງຈະຮູ້ສຶກແບບນັ້ນເຊັ່ນກັນ. ຄົນອື່ນໆທີ່ກາຍເປັນຄົນຂີ້ລັກອາດຮູ້ສຶກແບບນັ້ນຄືກັນ. ໃຫ້ເຮົາມາເວົ້າເຖິງຄົນເຫຼົ່ານັ້ນບາງຄົນ.
ທ້າວອາການແລະທ່ານດາວິດຄິດເຖິງເລື່ອງຊົ່ວຮ້າຍອັນໃດ?
ຄົນໜຶ່ງທີ່ຮັບໃຊ້ພະເຈົ້າຊື່ອາການ ເຊິ່ງມີຊີວິດຢູ່ດົນນານກ່ອນຄູຜູ້ຍິ່ງໃຫຍ່ເກີດ. ທ້າວອາການເຫັນເສື້ອຄຸມງາມໂຕໜຶ່ງ ຄຳແທ່ງໜຶ່ງ ແລະກ້ອນເງິນຈຳນວນໜຶ່ງ. ສິ່ງເຫຼົ່ານີ້ບໍ່ໄດ້ເປັນຂອງລາວ. ຄຳພີໄບເບິນບອກວ່າສິ່ງເຫຼົ່ານີ້ເປັນຂອງພະເຢໂຫວາເພາະມັນຖືກຍຶດມາຈາກພວກສັດຕູຂອງປະຊາຊົນພະເຈົ້າ. ແຕ່ອາການຢາກໄດ້ຂອງນັ້ນຫຼາຍຈົນເຖິງຂັ້ນລັກເອົາ.—ໂຢຊວຍ 6:19; 7:11, 20-22.
ມີອີກຕົວຢ່າງໜຶ່ງ. ດົນນານມາແລ້ວພະເຢໂຫວາໄດ້ເລືອກເອົາທ່ານດາວິດໃຫ້ເປັນກະສັດປົກຄອງຊາວອິດສະລາແອນ. ໃນມື້ໜຶ່ງ ທ່ານດາວິດເລີ່ມເບິ່ງຜູ້ຍິງຄົນໜຶ່ງທີ່ໜ້າຕາງາມຊື່ບາດເຊບາ. ລາວເລີ່ມເຝົ້າເບິ່ງນາງບາດເຊບາແລະຄິດຈະເອົານາງນັ້ນມາຢູ່ເຮືອນນຳ. ແນວໃດກໍຕາມ ບາດເຊບາເປັນເມຍຂອງທ້າວອຶລີ. ດາວິດຄວນຈະເຮັດແນວໃດ?—
ດາວິດຄວນຈະເຊົາຄິດເລື່ອງທີ່ຈະໄດ້ບາດເຊບາ. ແຕ່ລາວບໍ່ໄດ້ເຮັດເຊັ່ນນັ້ນ. ດັ່ງນັ້ນ ດາວິດເອົາບາດເຊບາມາຢູ່ເຮືອນນຳແລະໄດ້ວາງແຜນໃຫ້ອຶລີຖືກຂ້າ. ເປັນຫຍັງດາວິດຈຶ່ງເຮັດສິ່ງທີ່ຊົ່ວຮ້າຍເຫຼົ່ານີ້?— ເນື່ອງຈາກລາວຢາກໄດ້ຜູ້ຍິງເຊິ່ງເປັນເມຍຂອງຄົນອື່ນ.—2 ຊາເມືອນ 11:2-27.
ທ້າວອາບຊາໂລມເປັນຄົນຂີ້ລັກໃນແງ່ໃດ?
ເນື່ອງຈາກດາວິດຮູ້ສຶກເສຍໃຈ ພະເຢໂຫວາຈຶ່ງໃຫ້ລາວມີຊີວິດຢູ່ຕໍ່ໄປ. ແຕ່ດາວິດກໍປະສົບກັບຄວາມຫຍຸ້ງຍາກຫຼາຍນັບຕັ້ງແຕ່ນັ້ນເປັນຕົ້ນມາ. ທ້າວອາບຊາໂລມຜູ້ເປັນລູກຢາກເປັນກະສັດແທນດາວິດ. ດັ່ງນັ້ນ ເມື່ອຄົນມາພົບດາວິດ ອາບຊາໂລມຈະໂອບກອດແລະຈູບເຂົາເຈົ້າ. ຄຳພີໄບເບິນກ່າວວ່າ: “ທ້າວອາບຊາໂລມໄດ້ລັກເອົາໃຈຂອງຊາວຍິດສະລາເອນທັງຫຼາຍ.” ລາວເຮັດໃຫ້ຄົນເຫຼົ່ານັ້ນຢາກໄດ້ລາວເປັນກະສັດແທນດາວິດ.—2 ຊາເມືອນ 15:1-12.
ລູກເຄີຍຢາກໄດ້ສິ່ງໃດສິ່ງໜຶ່ງຫຼາຍແທ້ໆຄືກັບອາການ ດາວິດ ແລະອາບຊາໂລມບໍ?— ຖ້າສິ່ງນັ້ນເປັນຂອງຄົນອື່ນ ການເອົາສິ່ງຂອງນັ້ນໄປໂດຍບໍ່ໄດ້ຮັບອະນຸຍາດຖືເປັນການລັກ. ລູກຈື່ໄດ້ບໍວ່າຊາຕານເຊິ່ງເປັນຂີ້ລັກຜູ້ທຳອິດຢາກໄດ້ຫຍັງ?— ມັນຢາກໃຫ້ຜູ້ຄົນນະມັດສະການມັນແທນທີ່ຈະນະມັດສະການພະເຈົ້າ. ດັ່ງນັ້ນ ຊາຕານກຳລັງລັກເມື່ອມັນເຮັດໃຫ້ອາດາມແລະເອວາເຊື່ອຟັງມັນ.
ເມື່ອບຸກຄົນໜຶ່ງເປັນເຈົ້າຂອງສິ່ງໃດສິ່ງໜຶ່ງ ລາວມີສິດທີ່ຈະອະນຸຍາດໃຫ້ໃຜກໍໄດ້ໃຊ້ສິ່ງຂອງນັ້ນ. ຕົວຢ່າງເຊັ່ນ ລູກອາດໄປຫຼິ້ນກັບເດັກນ້ອຍຄົນອື່ນຢູ່ເຮືອນຂອງເຂົາເຈົ້າ. ມັນຖືກຕ້ອງບໍທີ່ຈະເອົາບາງສິ່ງຈາກເຮືອນນັ້ນກັບມາເຮືອນຂອງເຮົາ?— ມັນບໍ່ຖືກຕ້ອງ ຍົກເວັ້ນແຕ່ວ່າຜູ້ເປັນພໍ່ຫຼືເປັນແມ່ຂອງເດັກນ້ອຍເຫຼົ່ານັ້ນອະນຸຍາດໃຫ້ລູກເອົາມາໄດ້. ຖ້າລູກເອົາສິ່ງໃດສິ່ງໜຶ່ງມາໂດຍບໍ່ໄດ້ຂໍອະນຸຍາດ ນັ້ນຄືການລັກ.
ເປັນຫຍັງລູກຈຶ່ງຮູ້ສຶກວ່າຖືກດຶງດູດໃຫ້ລັກ?— ກໍຍ້ອນວ່າລູກຢາກໄດ້ໃນສິ່ງທີ່ບໍ່ໄດ້ເປັນຂອງລູກ. ເຖິງແມ່ນວ່າຄົນອື່ນບໍ່ໄດ້ເຫັນວ່າລູກເອົາສິ່ງນັ້ນໄປ ແຕ່ວ່າໃຜເຫັນ?— ພະເຢໂຫວາພະເຈົ້າເຫັນ. ແລະເຮົາຕ້ອງຈື່ໄວ້ວ່າພະເຈົ້າກຽດຊັງການລັກ. ດັ່ງນັ້ນ ຄວາມຮັກທີ່ລູກມີຕໍ່ພະເຈົ້າແລະຕໍ່ເພື່ອນບ້ານຈະຊ່ວຍລູກບໍ່ໃຫ້ກາຍເປັນຄົນຂີ້ລັກ.
ຄຳພີໄບເບິນເວົ້າຢ່າງຈະແຈ້ງວ່າການລັກເປັນສິ່ງທີ່ຜິດ. ຂໍໃຫ້ອ່ານພະທຳມາລະໂກ 10:17-19; ໂລມ 13:9; ແລະເອເຟດ 4:28.