ບົດທີ 47
ເຮົາຮູ້ໄດ້ແນວໃດວ່າອະລະມະເຄໂດນໃກ້ເຂົ້າມາແລ້ວ
ລູກຮູ້ແລ້ວແມ່ນບໍວ່າສັນຍະລັກແມ່ນຫຍັງ?— ໃນບົດທີ 46 ເຮົາໄດ້ອ່ານກ່ຽວກັບສັນຍະລັກທີ່ພະເຈົ້າໃຫ້ໄວ້ວ່າພະອົງຈະບໍ່ທຳລາຍໂລກໂດຍໃຫ້ນ້ຳຖ້ວມອີກ. ນອກຈາກນັ້ນ ພວກອັກຄະສາວົກໄດ້ຖາມກ່ຽວກັບສັນຍະລັກທີ່ໃຫ້ເຂົາເຈົ້າຮູ້ຕອນທີ່ພະເຍຊູຈະກັບມາແລະຕອນສິ້ນສຸດຂອງໂລກ ຫຼືອະວະສານຂອງລະບົບນີ້ໄດ້ໃກ້ເຂົ້າມາແລ້ວ.—ມັດທາຍ 24:3.
ເນື່ອງຈາກວ່າພະເຍຊູມີຮ່າງກາຍທີ່ບໍ່ສາມາດເບິ່ງເຫັນໄດ້ເມື່ອຢູ່ໃນສະຫວັນ ສັນຍະລັກທີ່ຄົນເຮົາເຫັນໄດ້ຈຶ່ງຖືວ່າເປັນສິ່ງຈຳເປັນເພື່ອສະແດງໃຫ້ເຫັນວ່າພະອົງເລີ່ມຕົ້ນປົກຄອງແລ້ວ. ດັ່ງນັ້ນ ພະເຍຊູໄດ້ບອກກ່ຽວກັບເຫດການຕ່າງໆຢູ່ເທິງແຜ່ນດິນໂລກນີ້ທີ່ພວກສາວົກຄວນເຝົ້າເບິ່ງ. ເມື່ອສິ່ງເຫຼົ່ານີ້ເກີດຂຶ້ນ ກໍໝາຍຄວາມວ່າພະອົງກັບມາແລ້ວແລະເລີ່ມປົກຄອງເປັນກະສັດໃນສະຫວັນ.
ເພື່ອສອນພວກສາວົກກ່ຽວກັບຄວາມສຳຄັນຂອງການເຝົ້າລະວັງ ພະເຍຊູບອກເຂົາເຈົ້າວ່າ “ຈົ່ງເບິ່ງກົກໝາກເດື່ອເທດແລະກົກໄມ້ທັງຫຼາຍ ເວລາເຫັນ ເຂົາປົ່ງອອກແລ້ວ ທ່ານທັງຫຼາຍຮູ້ຈັກດ້ວຍລຳພັງເອງວ່າລະດູຮ້ອນມາໃກ້ແລ້ວ.” ລູກຮູ້ວ່າເມື່ອໃດທີ່ລະດູຮ້ອນໃກ້ຈະມາຮອດແລ້ວ. ແລະລູກກໍບອກໄດ້ວ່າເມື່ອໃດທີ່ອະລະມະເຄໂດນໃກ້ເຂົ້າມາແລ້ວຖ້າລູກເຫັນເຫດການຕ່າງໆທີ່ພະເຍຊູກ່າວໄວ້.—ລືກາ 21:29, 30.
ພະເຍຊູກຳລັງສອນບົດຮຽນອັນໃດເມື່ອພະອົງເວົ້າເຖິງຕົ້ນໝາກເດື່ອເທດ?
ໃນໜ້ານີ້ແລະໃນໜ້າຕໍ່ໄປ ເຮົາຈະເບິ່ງຮູບພາບເຫດການຕ່າງໆທີ່ພະເຍຊູກ່າວວ່າຈະເປັນສ່ວນໜຶ່ງຂອງສັນຍະລັກທີ່ສະແດງໃຫ້ເຫັນວ່າລາຊະອານາຈັກຂອງພະເຈົ້າຫຍັບໃກ້ເຂົ້າມາແລ້ວ. ເມື່ອເຫດການຕ່າງໆທັງໝົດເຫຼົ່ານີ້ເກີດຂຶ້ນ ລາຊະອານາຈັກຂອງພະເຈົ້າພ້ອມດ້ວຍພະຄລິດໃນຖານະເປັນຜູ້ປົກຄອງຈະທຳລາຍລັດຖະບານຕ່າງໆທັງໝົດໃຫ້ດັບສູນໄປ ຕາມທີ່ເຮົາໄດ້ອ່ານໃນບົດທີ 46.
ດັ່ງນັ້ນ ຂໍໃຫ້ເບິ່ງຮູບພາບໃນສອງໜ້າກ່ອນນີ້ໃຫ້ຖີ່ຖ້ວນ ແລະເຮົາຈະເວົ້າເຖິງຮູບພາບເຫຼົ່ານີ້. ລູກສາມາດອ່ານກ່ຽວກັບສິ່ງທີ່ລູກເຫັນໃນຮູບພາບເຫຼົ່ານີ້ໄດ້ໃນພະທຳມັດທາຍ 24:6-14 ແລະລືກາ 21:9-11. ນອກຈາກນັ້ນຂໍໃຫ້ສັງເກດຕົວເລກນ້ອຍໆໃນແຕ່ລະຮູບ. ຈະເຫັນຕົວເລກດຽວກັນນີ້ຢູ່ທາງໜ້າຫຍໍ້ໜ້າທີ່ອະທິບາຍຮູບພາບນັ້ນ. ຕອນນີ້ໃຫ້ມາເບິ່ງວ່າຫຼາຍສ່ວນຂອງສັນຍະລັກທີ່ພະເຍຊູບອກໄວ້ກຳລັງສຳເລັດເປັນຈິງຫຼືບໍ່ໃນປັດຈຸບັນນີ້.
(1) ພະເຍຊູກ່າວວ່າ “ທ່ານທັງຫຼາຍຈະໄດ້ຍິນຂ່າວການທຳເສິກ ແລະເລື່ອງລືແຫ່ງການທຳເສິກ . . . ປະເທດຈະຢືນຂຶ້ນຕໍ່ສູ້ພວກປະເທດ ແລະແຜ່ນດິນຕໍ່ສູ້ແຜ່ນດິນ.” ລູກເຄີຍໄດ້ຍິນຂ່າວກ່ຽວກັບສົງຄາມບໍ?— ສົງຄາມໂລກຄັ້ງທີໜຶ່ງເກີດຂຶ້ນໃນປີ 1914 ຫາປີ 1918 ແລະຈາກນັ້ນກໍມີສົງຄາມໂລກຄັ້ງທີສອງເກີດຂຶ້ນໃນປີ 1939 ຫາປີ 1945. ບໍ່ເຄີຍມີສົງຄາມໂລກເກີດຂຶ້ນມາກ່ອນ! ບັດນີ້ມີສົງຄາມເກີດຂຶ້ນທົ່ວໂລກ. ເບິ່ງຄືວ່າທຸກມື້ເຮົາໄດ້ຍິນຫຼືໄດ້ອ່ານກ່ຽວກັບສົງຄາມທັງທາງໂທລະພາບ ວິທະຍຸ ແລະໃນໜັງສືພິມ.
(2) ພະເຍຊູຍັງກ່າວອີກວ່າ “ຄວາມອຶດຢາກຈະບັງເກີດມາ . . . ຢູ່ບ່ອນຕ່າງໆ.” ດັ່ງທີ່ລູກອາດຈະຮູ້ ບໍ່ແມ່ນໝົດທຸກຄົນມີອາຫານພໍກິນ. ແຕ່ລະມື້ມີຫຼາຍພັນຄົນເສຍຊີວິດຍ້ອນເຂົາເຈົ້າບໍ່ມີອາຫານກິນພຽງພໍ.
(3) ພະເຍຊູກ່າວຕື່ມວ່າ ‘ພາກ [“ໂລກລະບາດ,” ລ.ມ.] ຈະບັງເກີດມາໃນບ່ອນຕ່າງໆ.’ ລູກຮູ້ບໍວ່າໂລກລະບາດແມ່ນຫຍັງ?— ມັນຄືການເຈັບປ່ວຍຫຼືໂລກພະຍາດທີ່ເຮັດໃຫ້ຄົນມາກມາຍເສຍຊີວິດ. ໂລກລະບາດໃຫຍ່ຢ່າງໜຶ່ງທີ່ເອີ້ນວ່າໄຂ້ຫວັດສະເປນເຮັດໃຫ້ຜູ້ຄົນປະມານ 20 ລ້ານຄົນເສຍຊີວິດພາຍໃນເວລາພຽງໜຶ່ງປີຫຼືປະມານນັ້ນ. ໃນສະໄໝຂອງເຮົາມີຄົນຫຼາຍກວ່ານັ້ນອີກທີ່ອາດເສຍຊີວິດຍ້ອນໂລກເອດ. ແລະກໍມີໂລກມະເຮັງ ພະຍາດຫົວໃຈ ແລະຄວາມເຈັບປ່ວຍອື່ນໆທີ່ເຮັດໃຫ້ຫຼາຍພັນຄົນເສຍຊີວິດໃນທຸກໆປີ.
(4) ພະເຍຊູກ່າວເຖິງອີກສ່ວນໜຶ່ງຂອງສັນຍະລັກໂດຍກ່າວວ່າ “[ຈະມີ ] ແຜ່ນດິນຫວັ່ນໄຫວຢູ່ບ່ອນຕ່າງໆ.” ລູກຮູ້ບໍວ່າແຜ່ນດິນໄຫວແມ່ນຫຍັງ?— ແຜ່ນດິນໄຫວເຮັດໃຫ້ພື້ນດິນທີ່ລູກຢຽບສັ່ນສະເທືອນ. ເຮືອນຊານພັງທະລາຍ ແລະມັກເຮັດໃຫ້ຄົນເສຍຊີວິດ. ນັບແຕ່ປີ 1914 ມີແຜ່ນດິນໄຫວເກີດຂຶ້ນຫຼາຍແຫ່ງໃນທຸກປີ. ລູກເຄີຍໄດ້ຍິນເລື່ອງແຜ່ນດິນໄຫວບໍ?—
(5) ພະເຍຊູກ່າວວ່າອີກສ່ວນໜຶ່ງຂອງສັນຍະລັກກໍຄື “ການຊົ່ວຮ້າຍຈະມາກຂຶ້ນຫຼາຍ.” ນັ້ນເປັນສາເຫດທີ່ມີການລັກແລະຄວາມຮຸນແຮງມາກມາຍ. ຜູ້ຄົນທຸກຫົນແຫ່ງຢ້ານກົວວ່າອາດມີຄົນພະຍາຍາມງັດເຂົ້າເຮືອນຂອງເຂົາເຈົ້າ. ບໍ່ເຄີຍມີອາດຊະຍາກຳແລະຄວາມຮຸນແຮງໃນທຸກສ່ວນຂອງໂລກຫຼາຍເທົ່າກັບທີ່ເກີດຂຶ້ນໃນເວລານີ້.
(6) ພະເຍຊູກ່າວເຖິງອີກສ່ວນໜຶ່ງທີ່ສຳຄັນຂອງສັນຍະລັກ ເມື່ອພະອົງກ່າວວ່າ “ຄຳປະເສີດນີ້ແຫ່ງແຜ່ນດິນ [“ຂ່າວດີເລື່ອງລາຊະອານາຈັກ,” ລ.ມ.] ຂອງພະເຈົ້າຈະເປັນທີ່ເທສະໜາປ່າວປະກາດໄປທົ່ວແຜ່ນດິນໂລກ ເພື່ອຈະເປັນພິຍານແກ່ພວກຕ່າງປະເທດທັງປວງ ແລະເມື່ອນັ້ນທີ່ສຸດຈະມາເຖິງ.” (ມັດທາຍ 24:14) ຖ້າລູກເຊື່ອໃນ “ຂ່າວດີ” ນີ້ ລູກກໍຄວນຈະເວົ້າເລື່ອງນີ້ກັບຄົນອື່ນໆ. ໂດຍວິທີນີ້ລູກສາມາດມີສ່ວນຮ່ວມໃນຄວາມສຳເລັດຂອງສັນຍະລັກສ່ວນນີ້.
ບາງຄົນອາດເວົ້າວ່າ ສິ່ງຕ່າງໆທີ່ພະເຍຊູບອກລ່ວງໜ້າໄດ້ເກີດຂຶ້ນແຕ່ໃດໆມາ. ແຕ່ກໍບໍ່ເຄີຍມີມາກ່ອນທີ່ວ່າທຸກສິ່ງທີ່ກ່າວມານີ້ໄດ້ເກີດຂຶ້ນໃນຫຼາຍສ່ວນຂອງໂລກແລະໃນເວລາພ້ອມໆກັນ. ດັ່ງນັ້ນ ລູກເຂົ້າໃຈບໍວ່າສັນຍະລັກໝາຍຄວາມວ່າແນວໃດ?— ມັນໝາຍຄວາມວ່າເມື່ອເຮົາເຫັນເຫດການທັງໝົດນີ້ເກີດຂຶ້ນ ນັ້ນສະແດງວ່າອີກບໍ່ດົນໂລກໃໝ່ຂອງພະເຈົ້າຈະເຂົ້າມາປ່ຽນແທນໂລກທີ່ຊົ່ວຮ້າຍນີ້.
ເມື່ອພະເຍຊູກ່າວເຖິງເລື່ອງສັນຍະລັກນີ້ ພະອົງຍັງໄດ້ກ່າວເຖິງລະດູໜຶ່ງໂດຍສະເພາະອີກດ້ວຍ. ພະອົງກ່າວວ່າ “ຈົ່ງອ້ອນວອນຂໍເພື່ອເມື່ອທ່ານທັງຫຼາຍຕ້ອງປົບໜີຈະບໍ່ບັງເກີດໃນລະດູໜາວ.” (ມັດທາຍ 24:20) ລູກຄິດວ່າພະອົງຈະໝາຍຄວາມວ່າແນວໃດເມື່ອກ່າວເຊັ່ນນັ້ນ?—
ຄືວ່າຖ້າຜູ້ໃດຜູ້ໜຶ່ງຕ້ອງປົບໜີໄພພິບັດບາງຢ່າງໃນລະຫວ່າງລະດູໜາວ ເມື່ອສະພາບອາກາດອາດເຮັດໃຫ້ການເດີນທາງລຳບາກຫຼາຍຫຼືເຖິງຂັ້ນອັນຕະລາຍດ້ວຍຊ້ຳ ອັນໃດອາດຈະເກີດຂຶ້ນໄດ້?— ຖ້າລາວປົບໜີໄດ້ແທ້ໆກໍຄົງຈະເປັນໄປດ້ວຍຄວາມຍາກລຳບາກຫຼາຍ. ຄົງຈະເປັນເລື່ອງເສົ້າໃຈບໍ່ແມ່ນບໍ ຖ້າບາງຄົນຕ້ອງຕາຍໃນພາຍຸລະດູໜາວພຽງຍ້ອນວ່າລາວຫຍຸ້ງໂພດກັບການເຮັດສິ່ງອື່ນໆຈົນບໍ່ໄດ້ອອກເດີນທາງໄປກ່ອນໜ້ານີ້?—
ເມື່ອພະເຍຊູເວົ້າເຖິງເລື່ອງການພະຍາຍາມປົບໜີໃນລະຫວ່າງລະດູໜາວ ພະອົງກຳລັງສອນບົດຮຽນອັນໃດ?
ລູກເຂົ້າໃຈທີ່ພະເຍຊູເວົ້າບໍເມື່ອພະອົງບອກວ່າຢ່າລໍຖ້າຈົນຮອດລະດູໜາວແລ້ວຈຶ່ງປົບໜີ?— ພະອົງກຳລັງບອກພວກເຮົາວ່າເນື່ອງຈາກເຮົາຮູ້ວ່າອະລະມະເຄໂດນໃກ້ເຂົ້າມາແລ້ວ ເຮົາບໍ່ຕ້ອງການຊັກຊ້າໃນການພິສູດວ່າເຮົາຮັກພະເຈົ້າດ້ວຍການຮັບໃຊ້ພະອົງ. ຖ້າເຮົາຊັກຊ້າ ນັ້ນອາດຊ້າໂພດສຳລັບເຮົາ. ເມື່ອເປັນແນວນັ້ນ ເຮົາກໍຄົງເປັນຄືຄົນເຫຼົ່ານັ້ນໃນສະໄໝນ້ຳຖ້ວມໃຫຍ່ເຊິ່ງໄດ້ຍິນຄຳເຕືອນຂອງທ່ານໂນເອ ແຕ່ບໍ່ໄດ້ເຂົ້າໄປຢູ່ໃນນາວາ.
ຕໍ່ຈາກນີ້ໃຫ້ເຮົາມາເວົ້າເຖິງສິ່ງທີ່ຈະເກີດຂຶ້ນເມື່ອສົງຄາມອະລະມະເຄໂດນສິ້ນສຸດລົງແລ້ວ. ເຮົາຈະຮຽນຮູ້ວ່າພະເຈົ້າຈັດຕຽມສິ່ງໃດໄວ້ສຳລັບພວກເຮົາທຸກຄົນທີ່ຮັກແລະຮັບໃຊ້ພະອົງໃນຕອນນີ້.
ຕໍ່ໄປນີ້ແມ່ນຂໍ້ພະຄຳພີອື່ນໆທີ່ສະແດງໃຫ້ເຫັນວ່າອະລະມະເຄໂດນໃກ້ເຂົ້າມາແລ້ວ: 2 ຕີໂມເຕ 3:1-5 ແລະ 2 ເປໂຕ 3:3, 4.