ພະ​ເຍຊູ​ກ່າວ​ຄຳ​ພະຍາກອນ​ທີ່​ສົ່ງ​ຜົນ​ຕໍ່​ທົ່ວ​ໂລກ

ເມື່ອ​ຢູ່​ເທິງ​ພູເຂົາ​ກົກ​ໝາກ​ກອກ​ບ່ອນ​ທີ່​ມີ​ທິວ​ທັດ​ເມືອງ​ເຢຣຶຊາເລມ​ແລະ​ວິຫານ​ທີ່​ສະຫງ່າ​ງາມ ອັກຄະສາວົກ​ສີ່​ຄົນ​ມາ​ຖາມ​ພະອົງ​ເປັນ​ສ່ວນ​ຕົວ​ກ່ຽວ​ກັບ​ສິ່ງ​ທີ່​ພະອົງ​ໄດ້​ກ່າວ​ໄປ​ກ່ອນ​ໜ້າ​ນີ້. ພະ​ເຍຊູ​ໄດ້​ກ່າວ​ວ່າ​ວິຫານ​ໃນ​ເມືອງ​ເຢຣຶຊາເລມ​ຈະ​ຖືກ​ທຳລາຍ. ແລະ​ໃນ​ໂອກາດ​ໜຶ່ງ​ກ່ອນ​ໜ້າ​ນັ້ນ ພະອົງ​ບອກ​ເຂົາ​ເຈົ້າ​ກ່ຽວ​ກັບ “ທີ່​ສຸດ​ແຫ່ງ​ໂລກ​ນີ້.” (ມັດທາຍ 13:40, 49) ຕອນ​ນີ້​ອັກຄະສາວົກ​ຖາມ​ວ່າ: “ສິ່ງ​ໃດ​ຈະ​ເປັນ​ສຳຄັນ​ວ່າ​ພະອົງ​ສະເດັດ​ມາ​ແລະ​ເປັນ​ທີ່​ສຸດ​ແຫ່ງ​ໂລກ​ນີ້?”—ມັດທາຍ 24:3.

ໃນ​ຄຳຕອບ​ຂອງ​ພະ​ເຍຊູ ພະອົງ​ບອກ​ສິ່ງ​ທີ່​ຈະ​ເກີດ​ຂຶ້ນ​ກ່ອນ​ເມືອງ​ເຢຣຶຊາເລມ​ຖືກ​ທຳລາຍ. ແຕ່​ຄຳ​ເວົ້າ​ຂອງ​ພະອົງ​ກ່ຽວ​ຂ້ອງ​ຫຼາຍ​ກວ່າ​ນັ້ນ. ໃນ​ເວລາ​ຕໍ່​ມາ ຄຳ​ພະຍາກອນ​ຂອງ​ພະອົງ​ຈະ​ສຳເລັດ​ເປັນ​ຈິງ​ໃນ​ຂອບ​ເຂດ​ທີ່​ກວ້າງ​ຂວາງ​ທົ່ວ​ໂລກ. ພະ​ເຍຊູ​ພະຍາກອນ​ເຖິງ​ສິ່ງ​ທີ່​ເປັນ​ສັນຍະລັກ​ໄດ້​ແກ່​ເຫດການ​ຕ່າງໆແລະ​ສະພາບການ​ຂອງ​ໂລກ​ທີ່​ເກີດ​ຂຶ້ນ​ພ້ອມ​ກັນ. ສັນຍະລັກ​ນັ້ນ​ຈະ​ເຮັດ​ໃຫ້​ຜູ້​ຄົນ​ເທິງ​ໂລກ​ນີ້​ຮູ້​ວ່າ ພະ​ເຍຊູ​ເລີ່ມ​ຕົ້ນ​ເປັນ​ກະສັດ​ຢູ່​ໃນ​ສະຫວັນ​ແລ້ວ. ໃນ​ອີກ​ແງ່​ໜຶ່ງ ສັນຍະລັກ​ນັ້ນ​ກໍ​ຍັງ​ບົ່ງ​ບອກ​ວ່າ ພະ​ເຢໂຫວາ​ພະເຈົ້າ​ໄດ້​ແຕ່ງ​ຕັ້ງ​ພະ​ເຍຊູ​ໃຫ້​ເປັນ​ກະສັດ​ຂອງ​ລາຊະອານາຈັກ​ເມຊີ​ຕາມ​ທີ່​ສັນຍາ​ໄວ້​ດົນ​ນານ​ມາ​ແລ້ວ. ສັນຍະລັກ​ນັ້ນ​ໝາຍ​ຄວາມ​ວ່າ​ໃນ​ອີກ​ບໍ່​ດົນ​ລາຊະອານາຈັກ​ຈະ​ກຳຈັດ​ຄວາມ​ຊົ່ວ​ຮ້າຍ​ແລະ​ນຳ​ເອົາ​ສັນຕິສຸກ​ແທ້​ມາ​ໃຫ້​ມະນຸດ. ດັ່ງ​ນັ້ນ ສິ່ງ​ຕ່າງໆ​ທີ່​ພະ​ເຍຊູ​ບອກ​ລ່ວງ​ໜ້າ​ຈຶ່ງ​ເປັນ​ເຄື່ອງ​ໝາຍ​ຂອງ​ສະໄໝ​ສຸດ​ທ້າຍ​ແຫ່ງ​ລະບົບ​ໂລກ​ເກົ່າ ນັ້ນ​ກໍ​ແມ່ນ ສາສະໜາ ການ​ເມືອງ ແລະ​ລະບົບ​ສັງຄົມ​ທີ່​ມີ​ຢູ່​ໃນ​ຕອນ​ນີ້ ແລ້ວ​ລະບົບ​ໃໝ່​ກໍ​ຈະ​ເລີ່ມ​ຕົ້ນ.

ພະ​ເຍຊູ​ຊີ້​ແຈງ​ເຖິງ​ສິ່ງ​ທີ່​ຈະ​ເກີດ​ຂຶ້ນ​ເທິງ​ແຜ່ນດິນ​ໂລກ​ລະຫວ່າງ​ການ​ປະທັບ​ຂອງ​ພະອົງ​ຖານະ​ກະສັດ​ໃນ​ສະຫວັນ ພະອົງ​ກ່າວ​ວ່າ​ຈະ​ມີ​ສົງຄາມ​ລະຫວ່າງ​ປະເທດ ການ​ຂາດແຄນ​ອາຫານ ແຜ່ນດິນ​ໄຫວ​ໃຫຍ່ ແລະ​ໂລກ​ລະ​ບາດ. ການ​ບໍ່​ເຄົາລົບ​ກົດ​ໝາຍ​ຈະ​ເພີ່ມ​ຂຶ້ນ. ສາວົກ​ແທ້​ຂອງ​ພະ​ເຍຊູ​ຈະ​ປະກາດ​ຂ່າວ​ດີ​ເລື່ອງ​ລາຊະອານາຈັກ​ຂອງ​ພະເຈົ້າ​ທົ່ວ​ໂລກ. ສິ່ງ​ທັງ​ໝົດ​ນີ້​ຈະ​ມາ​ເຖິງ​ຈຸດ​ສຸດ​ຍອດ​ໃນ “ຄວາມ​ທຸກ​ລຳບາກ​ໃຫຍ່, ລ.ມ.” ເຊິ່ງ​ບໍ່​ເຄີຍ​ເກີດ​ຂຶ້ນ​ມາ​ກ່ອນ.—ມັດທາຍ 24:21.

ຜູ້​ຕິດ​ຕາມ​ພະ​ເຍຊູ​ຈະ​ຮູ້​ໄດ້​ແນວ​ໃດ​ວ່າ​ຄວາມ​ທຸກ​ລຳບາກ​ໃຫຍ່​ໃກ້​ເຂົ້າ​ມາ​ແລ້ວ? ພະ​ເຍຊູ​ກ່າວ​ວ່າ “ຈົ່ງ​ຮຽນ . . . ດ້ວຍ​ກົກ​ໝາກ​ເດື່ອ​ເທດ.” (ມັດທາຍ 24:32) ເມື່ອ​ເຫັນ​ກົກ​ໝາກ​ເດື່ອ​ແຕກ​ໃບ​ຈຶ່ງ​ເປັນ​ສັນຍະລັກ​ທີ່​ບອກ​ວ່າ​ລະດູ​ຮ້ອນ​ໃກ້​ເຂົ້າ​ມາ​ແລ້ວ. ໃນ​ທຳນອງ​ດຽວ​ກັນ ເມື່ອ​ເຫັນ​ສິ່ງ​ຕ່າງໆທີ່​ພະ​ເຍຊູ​ບອກ​ໄວ້​ລ່ວງ​ໜ້າ​ເກີດ​ຂຶ້ນ​ໃນ​ໄລຍະ​ເວລາ​ໜຶ່ງ ນັ້ນ​ເປັນ​ສັນຍະລັກ​ທີ່​ສະແດງ​ຈະ​ແຈ້ງ​ວ່າ​ອະວະສານ​ໃກ້​ເຂົ້າ​ມາ​ແລ້ວ. ນອກ​ຈາກ​ຜູ້​ເປັນ​ພໍ່ ບໍ່​ມີ​ໃຜ​ຮູ້​ວັນ​ແລະ​ເວລາ​ທີ່​ແນ່ນອນ​ເມື່ອ​ຄວາມ​ທຸກ​ລຳບາກ​ຄັ້ງ​ໃຫຍ່​ຈະ​ເລີ່ມ​ຕົ້ນ. ດັ່ງ​ນັ້ນ ພະ​ເຍຊູ​ຈຶ່ງ​ກະຕຸ້ນ​ສາວົກ​ຂອງ​ພະອົງ​ວ່າ: “ຈົ່ງ​ເຝົ້າ​ລະວັງ . . . ເຫດ​ວ່າ​ທ່ານ​ທັງ​ຫຼາຍ​ບໍ່​ຮູ້ຈັກ​ເວລາ​ນັ້ນ​ຈະ​ມາ​ເຖິງ​ເມື່ອ​ໃດ.”—ມາລະໂກ 13:33.

—ຂໍ້​ມູນ​ມາ​ຈາກ​ມັດທາຍ​ບົດ 24 ແລະ 25; ມາລະໂກ​ບົດ 13; ລືກາ​ບົດ 21.