ບົດທີ 3
ຄົນນີ້ເໝາະກັບຂ້ອຍບໍ?
ໃຊ້ເວລາຈັກໜ້ອຍໜຶ່ງເຮັດແບບທົດສອບຕໍ່ໄປນີ້:
ເຈົ້າຄິດວ່າຄົນທີ່ຈະມາເປັນຄູ່ຊີວິດຂອງເຈົ້າຄວນມີຄຸນລັກສະນະແນວໃດ? ໃຫ້ເລືອກປະມານສີ່ຂໍ້ທີ່ເຈົ້າຮູ້ສຶກວ່າສຳຄັນໂດຍໝາຍ ✔ ທາງໜ້າ.
□ ຮູບຮ່າງໜ້າຕາດີ □ ມີສາຍສຳພັນທີ່ດີກັບພະເຈົ້າ
□ ເປັນກັນເອງ □ ໄວ້ໃຈໄດ້
□ ເປັນທີ່ນິຍົມ □ ເຮັດຕາມມາດຕະຖານຂອງພະເຈົ້າ
□ ຕະຫຼົກ □ ຈິງຈັງກັບເປົ້າໝາຍ
ຕອນເຈົ້າອາຍຸຍັງນ້ອຍ ເຈົ້າເຄີຍມັກໃຜບໍ? ຕອນນັ້ນເຈົ້າຄິດວ່າຄຸນລັກສະນະໃດສຳຄັນທີ່ສຸດ ໃຫ້ໝາຍ.
ຄຸນລັກສະນະໃນລາຍການທາງເທິງນັ້ນບໍ່ມີຂໍ້ໃດຜິດ. ແຕ່ລະຂໍ້ກໍດີໝົດ. ເມື່ອເຈົ້າຫຼົງຮັກຜູ້ໃດຜູ້ໜຶ່ງຕອນທີ່ອາຍຸຍັງນ້ອຍ ເຈົ້າກໍມັກຈະເບິ່ງຄົນນັ້ນແຕ່ຜິວເຜີນ. ເຈົ້າຈຶ່ງເລືອກຕອບຄຸນລັກສະນະທີ່ຢູ່ເບື້ອງຊ້າຍແມ່ນບໍ?
ແຕ່ເມື່ອເຈົ້າອາຍຸຫຼາຍຂຶ້ນ ເຈົ້າຈະເລີ່ມຮູ້ຈັກຄິດແລະສັງເກດສິ່ງຕ່າງໆຢ່າງເລິກເຊິ່ງຫຼາຍຂຶ້ນ. ແລ້ວເຈົ້າກໍຈະເລືອກຄຸນລັກສະນະທີ່ຢູ່ເບື້ອງຂວາ. ຕົວຢ່າງເຊັ່ນ ເຈົ້າເລີ່ມເຫັນວ່າຜູ້ຍິງງາມໆທີ່ຢູ່ແຖວບ້ານໄວ້ໃຈບໍ່ຄ່ອຍໄດ້ ຫຼືຜູ້ຊາຍທີ່ເປັນທີ່ນິຍົມທີ່ສຸດໃນຫ້ອງຮຽນອາດບໍ່ໄດ້ເຮັດຕາມມາດຕະຖານຂອງພະເຈົ້າ. ເມື່ອເຈົ້າກາຍໄວໜຸ່ມສາວໄປແລ້ວ ເຈົ້າກໍຈະບໍ່ເບິ່ງແຕ່ຄຸນລັກສະນະທີ່ຜິວເຜີນຕອນທີ່ເຈົ້າຢາກຮູ້ວ່າ “ຄົນນີ້ເໝາະກັບຂ້ອຍບໍ?”
ຮູ້ຈັກໂຕເອງກ່ອນ
ກ່ອນຈະເບິ່ງວ່າໃຜທີ່ເໝາະກັບເຈົ້າ ເຈົ້າຕ້ອງຮູ້ຈັກໂຕເອງໃຫ້ດີກ່ອນ. ເພື່ອຈະຮູ້ຈັກໂຕເອງຫຼາຍຂຶ້ນ ໃຫ້ຕອບຄຳຖາມຕໍ່ໄປນີ້:
ຂ້ອຍມີຂໍ້ດີຫຍັງແດ່? ․․․․․
ຂ້ອຍມີຂໍ້ເສຍຫຍັງແດ່? ․․․․․
ຂ້ອຍຢາກໃຫ້ຄູ່ແຕ່ງດອງເຮັດກັບຂ້ອຍແນວໃດ ແລະຂ້ອຍຢາກມີສາຍສຳພັນແບບໃດກັບພະເຈົ້າ? ․․․․․
ການຮູ້ຈັກໂຕເອງບໍ່ແມ່ນເລື່ອງງ່າຍ ແຕ່ການຖາມໂຕເອງດ້ວຍຄຳຖາມເຫຼົ່ານີ້ຈະຊ່ວຍເຈົ້າໄດ້. ເມື່ອເຈົ້າຮູ້ຈັກໂຕເອງຫຼາຍຂຶ້ນ ເຈົ້າກໍຈະຮູ້ວ່າຕ້ອງເລືອກຄົນແບບໃດຈຶ່ງຈະຊ່ວຍເສີມຂໍ້ດີຂອງເຈົ້າແທນທີ່ຈະເຮັດໃຫ້ເຫັນຂໍ້ເສຍຂອງເຈົ້າແຈ້ງຂຶ້ນ.a ແລ້ວເຈົ້າຈະເຮັດແນວໃດຖ້າເຈົ້າຄິດວ່າໄດ້ເຈິຄົນນັ້ນແລ້ວ?
ຂ້ອຍເລືອກແຕ່ງດອງກັບໃຜກໍໄດ້ ບໍ?
“ແລງນີ້ໄປກິນເຂົ້ານຳກັນບໍ່?” ເມື່ອໄດ້ຍິນຄຳຖາມນີ້ ເຈົ້າອາດຈະຮູ້ສຶກຢ້ານຈົນໂຕສັ່ນ ຫຼືດີໃຈຈົນເຕັ້ນໄປເຕັ້ນມາ ເຊິ່ງກໍຂຶ້ນຢູ່ກັບວ່າໃຜຖາມ. ຖ້າເຈົ້າຕອບຕົກລົງ. ເມື່ອເວລາຜ່ານໄປ ເຈົ້າຈະຮູ້ໄດ້ແນວໃດວ່າຄົນນີ້ແຫຼະເໝາະກັບເຈົ້າ?
ສົມມຸດວ່າເຈົ້າຢາກຊື້ເກີບໃໝ່. ເຈົ້າໄປຮ້ານແລະເຈິຄູ່ທີ່ເຈົ້າມັກ. ແຕ່ເມື່ອເຈົ້າລອງໃສ່ຄູ່ນັ້ນແລ້ວ ເຈົ້າພັດຮູ້ສຶກຜິດຫວັງຫຼາຍເພາະມັນຄັບໂພດ. ເຈົ້າຈະເຮັດແນວໃດ? ເຈົ້າຍັງຈະຊື້ເກີບຄູ່ນັ້ນບໍເຖິງວ່າມັນຈະຄັບ ຫຼືເຈົ້າຈະຊອກຫາຄູ່ໃໝ່? ແນ່ນອນ ເຈົ້າຄືຊິເອົາເກີບຄູ່ນັ້ນໄປໄວ້ບ່ອນເກົ່າ ແລ້ວຊອກຫາຄູ່ໃໝ່. ເຈົ້າຄືຊິບໍ່ພະຍາຍາມໃສ່ເກີບຄູ່ນັ້ນໃຫ້ໄດ້ແມ່ນບໍ?
ການເລືອກຄູ່ຊີວິດກໍຄືກັນ. ໃນຊ່ວງໄລຍະເວລາໜຶ່ງ ອາດຈະມີເພດກົງກັນຂ້າມຫຼາຍຄົນທີ່ຖືກໃຈເຈົ້າ ແຕ່ກໍບໍ່ແມ່ນທຸກຄົນທີ່ຈະເໝາະກັບເຈົ້າ. ເຈົ້າຄືຊິຢາກເຈິຄົນທີ່ຢູ່ນຳແລ້ວສະບາຍໃຈ ຍ້ອນເຂົ້າກັບເຈົ້າໄດ້ດີທັງດ້ານນິດໄສແລະເປົ້າໝາຍຊີວິດ. (ປະຖົມມະການ 2:18; ມັດທາຍ 19:4-6) ເຈົ້າເຈິຄົນແບບນີ້ແລ້ວບໍ? ຖ້າເຈິແລ້ວ ເຈົ້າຈະຮູ້ໄດ້ແນວໃດວ່າຄົນນີ້ເໝາະກັບເຈົ້າ?
ຢ່າເບິ່ງແຕ່ພາຍນອກ
ເພື່ອຈະຮູ້ວ່າຄົນນັ້ນເໝາະກັບເຈົ້າຫຼືບໍ່ ເຈົ້າຕ້ອງເບິ່ງຄົນນັ້ນຕາມຄວາມເປັນຈິງ. ຢ່າລືມວ່າ ເຈົ້າມັກຈະເຫັນແຕ່ສິ່ງທີ່ເຈົ້າຢາກເຫັນເທົ່ານັ້ນ. ດັ່ງນັ້ນ ໃຫ້ໃຈເຢັນໆ. ຄ່ອຍໆໃຊ້ເວລາສັງເກດວ່າຄົນນັ້ນເປັນແນວໃດແທ້ໆ. ສົມມຸດວ່າເຈົ້າຢາກຊື້ລົດຄັນໜຶ່ງ. ເຈົ້າຄືຊິຄົ້ນຄວ້າຂໍ້ມູນຢ່າງລະອຽດກ່ຽວກັບລົດທີ່ຈະຊື້ແມ່ນບໍ? ເຈົ້າຄືຊິບໍ່ເບິ່ງແຕ່ສະພາບພາຍນອກຂອງລົດ ແຕ່ຈະເບິ່ງເລິກລົງໄປອີກເຊັ່ນ ກວດເບິ່ງສະພາບຂອງເຄື່ອງຈັກແມ່ນບໍ?
ການເລືອກຄູ່ຊີວິດເປັນເລື່ອງທີ່ສຳຄັນກວ່າການເລືອກລົດ. ແຕ່ຫຼາຍຄົນທີ່ມີແຟນມັກເບິ່ງແຕ່ພາຍນອກ. ເຂົາເຈົ້າສົນໃຈແຕ່ຮູບຮ່າງໜ້າຕາຫຼືສົນໃຈແຕ່ວ່າເຂົາເຈົ້າມີຫຍັງທີ່ຄືກັນແດ່ເຊັ່ນ: ‘ເຮົາມັກຟັງເພງແນວດຽວກັນ.’ ‘ເຮົາມັກເຮັດນັ້ນເຮັດນີ້ຄືກັນ.’ ‘ເຮົາບໍ່ເຄີຍຂັດແຍ່ງກັນເລີຍ!’ ຄືທີ່ບອກໄວ້ແຕ່ຕອນຕົ້ນ ຖ້າເຈົ້າກາຍໄວໜຸ່ມສາວໄປແລ້ວ ເຈົ້າຈະບໍ່ເບິ່ງແຕ່ຄຸນລັກສະນະທີ່ຜິວເຜີນ ແຕ່ເຈົ້າຈະເບິ່ງເລິກລົງໄປເຖິງ “ຄວາມງາມທີ່ຢູ່ພາຍໃນ” ຂອງຄົນນັ້ນ.—1 ເປໂຕ 3:4; ເອເຟໂຊ 3:16
ຢ່າສົນໃຈແຕ່ວ່າພວກເຈົ້າທັງສອງມັກຫຍັງຄືກັນ ແຕ່ໃຫ້ສັງເກດວ່າເມື່ອມີຄວາມຄິດເຫັນບໍ່ກົງກັນ ແຕ່ລະຄົນຈະມີປະຕິກິລິຍາແນວໃດ. ຕົວຢ່າງເຊັ່ນ ເມື່ອຂັດແຍ່ງກັນ ລາວຍັງຢືນຢັນຈະເຮັດຕາມວິທີຂອງລາວແລະເຖິງຂັ້ນ “ໃຈຮ້າຍ” ຫຼື “ເວົ້າດູຖູກ” ບໍ? (ຄາລາເຕຍ 5:19, 20; ໂກໂລຊາຍ 3:8) ຫຼືລາວເປັນຄົນທີ່ມີເຫດຜົນ ແລະຍອມເຮັດຕາມຄວາມຕ້ອງການຂອງອີກຝ່າຍໜຶ່ງໃນເລື່ອງທີ່ບໍ່ຂັດກັບຫຼັກການຂອງພະເຈົ້າ?—ຢາໂກໂບ 3:17
ອີກຢ່າງໜຶ່ງທີ່ຕ້ອງສັງເກດແມ່ນ ຄົນນັ້ນມັກຄວບຄຸມຫຼືພະຍາຍາມໃຊ້ເລ່ລ່ຽມໃຫ້ເຈົ້າເຮັດຕາມໃຈລາວບໍ? ລາວຫຶງຫວງ ຫຼືຂີ້ອິດສາບໍ? ລາວຕ້ອງຮູ້ຕະຫຼອດບໍວ່າເຈົ້າໄປໃສມາໃສແດ່? ນິໂຄເວົ້າວ່າ: “ຂ້ອຍເຄີຍໄດ້ຍິນບາງຄູ່ຜິດກັນຍ້ອນຝ່າຍໜຶ່ງຮັບບໍ່ໄດ້ທີ່ອີກຝ່າຍໜຶ່ງບໍ່ໂທມາລາຍງານວ່າຕອນນີ້ຢູ່ໃສຫຼືເຮັດຫຍັງຢູ່. ຂ້ອຍຄິດວ່າຈັກໜ້ອຍກໍຄືຊິມີບັນຫາແທ້ໆແຫຼະ.”—1 ໂກຣິນໂທ 13:4
ບັນຫາຕ່າງໆທີ່ເວົ້າໄປເປັນເລື່ອງຂອງນິດໄສໃຈຄໍແລະການປະພຶດ. ແຕ່ອີກເລື່ອງໜຶ່ງທີ່ສຳຄັນກໍຄື ການຮູ້ຈັກຊື່ສຽງຂອງຄົນທີ່ເຈົ້າມັກ. ຄົນອື່ນເບິ່ງລາວແນວໃດ? ເຈົ້າໜ້າຈະລົມກັບບາງຄົນໃນປະຊາຄົມທີ່ຮູ້ຈັກລາວມາດົນພໍສົມຄວນ. ແລ້ວເຈົ້າກໍຈະຮູ້ວ່າລາວຖືກ ‘ເວົ້າເຖິງໃນແງ່ດີ’ ຫຼືບໍ່.—ກິດຈະການ 16:1, 2
ຖ້າເຈົ້າຢາກຮູ້ວ່າຄົນທີ່ເຈົ້າມັກເປັນຄົນແນວໃດແລະເໝາະກັບເຈົ້າແທ້ໆບໍ ກໍໃຫ້ເຈົ້າສັງເກດວ່າລາວເປັນແນວໃດໃນເລື່ອງຕໍ່ໄປນີ້.
ນິດໄສໃຈຄໍ ․․․․․
ການປະພຶດ ․․․․․
ຊື່ສຽງ ․․․․․
ເຈົ້າຍັງຈະໄດ້ຮັບປະໂຫຍດຈາກການສຶກສາຂອບ “ລາວຈະເປັນຜົວທີ່ດີບໍ?” ໃນໜ້າ 39 ຫຼື “ລາວຈະເປັນເມຍທີ່ດີບໍ?” ໃນໜ້າ 40. ຄຳຖາມເຫຼົ່ານັ້ນຈະຊ່ວຍໃຫ້ຮູ້ວ່າຄົນນັ້ນເໝາະທີ່ຈະເປັນຄູ່ຊີວິດຂອງເຈົ້າຫຼືບໍ່.
ຖ້າພິຈາລະນາແລ້ວເຫັນວ່າຄົນນີ້ອາດບໍ່ເໝາະກັບເຈົ້າເດ ຈະເຮັດແນວໃດ? ເຈົ້າກໍຕ້ອງຄິດດີໆວ່າ:
ເຮົາຄວນເລີກກັນບໍ?
ບາງເທື່ອການເລີກກັນກໍໜ້າຈະດີກວ່າ. ຂໍໃຫ້ເບິ່ງປະສົບການຂອງຈິວ. ລາວເວົ້າວ່າ: “ຕອນທຳອິດ ຂ້ອຍດີໃຈທີ່ແຟນຂ້ອຍເປັນຫ່ວງຢູ່ຕະຫຼອດວ່າຂ້ອຍຢູ່ໃສ ເຮັດຫຍັງຢູ່ ແລະຢູ່ກັບໃຜ. ແຕ່ຕໍ່ມາລາວກໍເປັນຫ່ວງຫຼາຍໂພດຈົນບໍ່ຍອມໃຫ້ຂ້ອຍຢູ່ກັບໃຜເລີຍນອກຈາກລາວ. ຕອນທີ່ໃຊ້ເວລາຢູ່ກັບຄອບຄົວ ລາວກໍຍັງອິດສາຮອດພໍ່ຂ້ອຍ. ເມື່ອຂ້ອຍເລີກກັບລາວ ຂ້ອຍຈຶ່ງຮູ້ສຶກໂລ່ງໃຈຫຼາຍແທ້ໆ!”
ຊາຣາກໍມີປະສົບການທີ່ຄ້າຍໆກັນ. ລາວເລີ່ມສັງເກດເຫັນວ່າຈອນຊາຍໜຸ່ມທີ່ລາວຄົບຫາຢູ່ເປັນຄົນມັກເຮັດໃສ່ ເອົາແຕ່ໃຈໂຕເອງ ແລະບໍ່ມີມາລະຍາດ. ຊາຣາເລົ່າວ່າ: “ມີເທື່ອໜຶ່ງ ລາວມາຊ້າຕັ້ງສາມຊົ່ວໂມງ! ເມື່ອແມ່ຂ້ອຍເປີດປະຕູໃຫ້ ລາວກໍບໍ່ສົນໃຈແມ່ຂ້ອຍເລີຍ ແຕ່ລາວຫຼຽວມາຮ້າຍຂ້ອຍວ່າ: ‘ຂ້ຽວໄປເທາະ. ເຮົາຊ້າແລ້ວ.’ ລາວບໍ່ໄດ້ບອກວ່າ ‘ລາວຊ້າ’ ແຕ່ບອກວ່າ ‘ເຮົາຊ້າ.’ ລາວຄວນຈະຂໍໂທດຫຼືອະທິບາຍວ່າເປັນຫຍັງລາວຈຶ່ງມາຊ້າ. ທີ່ສຳຄັນ ລາວຄວນນັບຖືແມ່ຂອງຂ້ອຍ!” ແນ່ນອນວ່າ ການກະທຳທີ່ບໍ່ດີພຽງເທື່ອດຽວບໍ່ແມ່ນສາເຫດທີ່ເຮັດໃຫ້ເລີກກັນ. (ເພງສັນລະເສີນ 130:3) ເມື່ອຊາຣາຮູ້ວ່າຈອນບໍ່ໄດ້ເຮັດແບບນີ້ກັບແມ່ຂອງລາວເທົ່ານັ້ນ ແຕ່ຈອນເຮັດແບບນີ້ກັບທຸກຄົນຈົນເປັນນິດໄສ ລາວຈຶ່ງຕັດສິນໃຈເລີກກັບຈອນ.
ຄືກັບຈິວແລະຊາຣາ ຖ້າເຈົ້າຮູ້ສຶກວ່າຄົນທີ່ກຳລັງຄົບຢູ່ບໍ່ເໝາະທີ່ຈະເປັນຄູ່ຂອງເຈົ້າ ເຈົ້າຈະເຮັດແນວໃດ? ຢ່າເບິ່ງຂ້າມຄວາມຮູ້ສຶກນັ້ນ! ເຖິງວ່າຈະທຳໃຈໄດ້ຍາກ ແຕ່ເລີກກັນກໍໜ້າຈະດີກວ່າ. ສຸພາສິດ 22:3 ບອກວ່າ: “ຄົນສະຫຼາດເຫັນອັນຕະລາຍແລ້ວໜີໄປລີ້.” ດັ່ງນັ້ນ ຖ້າຄົນທີ່ເຈົ້າຄົບຢູ່ມີນິດໄສທີ່ບໍ່ດີຄືທີ່ບອກໄວ້ໃນໜ້າ 39 ແລະ 40 ເຈົ້າກໍຄວນເລີກກັບລາວ ຫຼືຢ່າງໜ້ອຍກໍຢຸດຄວາມສຳພັນໄວ້ຊົ່ວຄາວຈົນກວ່າລາວຈະປັບປຸງໂຕເອງໄດ້. ແມ່ນຢູ່ວ່າ ການເລີກກັນບໍ່ແມ່ນເລື່ອງງ່າຍ. ແຕ່ການແຕ່ງດອງເປັນການຜູກພັນຖາວອນ. ຍອມເຈັບປວດໃຈຊົ່ວຄາວໃນຕອນນີ້ ກໍດີກວ່າເສຍໃຈໄປຕະຫຼອດຊີວິດຍ້ອນເລືອກຄູ່ແຕ່ງດອງຜິດ!
ວິທີບອກເລີກ
ເຈົ້າຈະບອກເລີກລາວແນວໃດ? ທຳອິດ ໃຫ້ເລືອກບ່ອນເໝາະສົມທີ່ຈະລົມກັນ. ລອງຄິດເບິ່ງວ່າຖ້າເປັນເຈົ້າ ເຈົ້າຢາກໃຫ້ຄົນນັ້ນເຮັດແນວໃດ. (ມັດທາຍ 7:12) ເຈົ້າຄືຊິບໍ່ຢາກໃຫ້ລາວບອກເລີກເຈົ້າຕໍ່ໜ້າຄົນອື່ນແມ່ນບໍ? ການບອກເລີກໂດຍຝາກຂໍ້ຄວາມຜ່ານທາງເຄື່ອງຮັບໂທລະສັບ ສົ່ງຂໍ້ຄວາມ ຫຼືອີເມວກໍບໍ່ຄ່ອຍເໝາະປານໃດ ນອກຈາກອີກຝ່າຍຈະເປັນຄົນທີ່ຮຸນແຮງຫຼືລົມກັນຍາກ. ເຈົ້າຄວນເລືອກເວລາແລະສະຖານທີ່ທີ່ຈະລົມກັນເລື່ອງນີ້ໄດ້ສະດວກ.
ເຈົ້າຄວນເວົ້າແນວໃດ? ອັກຄະສາວົກໂປໂລກະຕຸ້ນໃຫ້ຄລິດສະຕຽນ “ເວົ້າຄວາມຈິງ” ຕໍ່ກັນ. (ເອເຟໂຊ 4:25) ດັ່ງນັ້ນ ວິທີທີ່ດີທີ່ສຸດແມ່ນເວົ້າຢ່າງໜັກແໜ້ນແຕ່ກໍບໍ່ທຳຮ້າຍຈິດໃຈ. ບອກໃຫ້ຈະແຈ້ງວ່າເປັນຫຍັງເຈົ້າຈຶ່ງຮູ້ສຶກວ່າເປັນແຟນກັນຕໍ່ໄປບໍ່ໄດ້. ເຈົ້າບໍ່ຄວນຕຳໜິຫຼືເວົ້າເຖິງຂໍ້ຜິດພາດຂອງລາວຫຼາຍ. ຢ່າເວົ້າວ່າ “ເຈົ້າບໍ່ເຄີຍ” ເຮັດແບບນັ້ນແບບນີ້ ແຕ່ໃຫ້ເວົ້າເຖິງຄວາມຮູ້ສຶກຂອງເຈົ້າ ເຊັ່ນ “ຂ້ອຍຢາກຢູ່ກັບຄົນທີ່ . . . ” ຫຼື “ຂ້ອຍຄິດວ່າເຮົາຄວນເລີກກັນຍ້ອນ . . . ”
ເຈົ້າບໍ່ຄວນລັງເລຫຼືຍອມໃຫ້ຄົນນັ້ນເຮັດໃຫ້ເຈົ້າປ່ຽນໃຈ. ຈື່ໄວ້ວ່າ ເຈົ້າມີເຫດຜົນໜັກແໜ້ນທີ່ຈະເລີກກັບລາວ. ດັ່ງນັ້ນ ຖ້າລາວພະຍາຍາມໃຊ້ເລ່ລ່ຽມເພື່ອໃຫ້ເຈົ້າປ່ຽນໃຈ ກໍຢ່າຍອມ. ໄວລຸ້ນຍິງທີ່ຊື່ລໍຣີເວົ້າວ່າ: “ຫຼັງຈາກທີ່ເລີກກັນ ແຟນເກົ່າຂອງຂ້ອຍເຮັດທຳທ່າໝົດອາໄລຕາຍຢາກ. ຂ້ອຍຄິດວ່າລາວເຮັດເພື່ອໃຫ້ຂ້ອຍຮູ້ສຶກອີ່ຕົນລາວ. ຕອນນັ້ນຂ້ອຍອີ່ຕົນລາວອີ່ຫຼີ ແຕ່ຂ້ອຍກໍບໍ່ຍອມປ່ຽນໃຈ.” ຄືກັນກັບລໍຣີ ເຈົ້າຄວນຮູ້ໃຈໂຕເອງແລະເຮັດຕາມທີ່ໄດ້ຕັດສິນໃຈໄວ້. ໃຫ້ຄຳວ່າບໍ່ຂອງເຈົ້າໝາຍຄວາມວ່າບໍ່.—ຢາໂກໂບ 5:12
ຜົນຈາກການເລີກກັນ
ຫຼັງຈາກເລີກກັນ ເປັນເລື່ອງທຳມະດາທີ່ເຈົ້າຈະຮູ້ສຶກເສຍໃຈຫຼືບໍ່ສະບາຍໃຈຢູ່ໄລຍະໜຶ່ງ. ເຈົ້າອາດຮູ້ສຶກຄືກັບຜູ້ຂຽນເພງສັນລະເສີນທີ່ເວົ້າວ່າ: “ລູກທຸກໃຈແລະເສົ້າໃຈຫຼາຍ. ລູກຍ່າງໄປຍ່າງມາດ້ວຍຄວາມໂສກເສົ້າໝົດມື້.” (ເພງສັນລະເສີນ 38:6) ໝູ່ທີ່ຫວັງດີບາງຄົນອາດພະຍາຍາມຊ່ວຍເຈົ້າໂດຍສະໜັບສະໜູນໃຫ້ເຈົ້າກັບໄປຄົບກັບຄົນນັ້ນອີກເທື່ອໜຶ່ງ. ຢ່າລືມວ່າ ຜູ້ທີ່ຕ້ອງຮັບຜົນຈາກການຕັດສິນໃຈເທື່ອນີ້ແມ່ນເຈົ້າເອງ ບໍ່ແມ່ນໝູ່ທີ່ຫວັງດີ. ດັ່ງນັ້ນ ຂໍໃຫ້ເຈົ້າຢືນຢັດໝັ້ນຄົງຕໍ່ໄປເຖິງວ່າຈະເສຍໃຈກັບສິ່ງທີ່ເກີດຂຶ້ນກໍຕາມ.
ໃນທີ່ສຸດ ຄວາມຮູ້ສຶກເຈັບປວດຂອງເຈົ້າກໍຈະຫາຍໄປ. ແຕ່ໃນລະຫວ່າງນີ້ ໃຫ້ເຈົ້າລອງເຮັດແບບນີ້ເບິ່ງເພື່ອຈະຮູ້ສຶກດີຂຶ້ນ.
ໃຫ້ລະບາຍຄວາມຮູ້ສຶກຂອງເຈົ້າກັບຄົນທີ່ເຈົ້າໄວ້ໃຈ.b (ສຸພາສິດ 15:22) ອະທິດຖານບອກພະເຢໂຫວາກ່ຽວກັບເລື່ອງນີ້. (ເພງສັນລະເສີນ 55:22) ຢ່າປ່ອຍໃຫ້ໂຕເອງວ່າງ. (1 ໂກຣິນໂທ 15:58) ຢ່າແຍກໂຕຈາກຄົນອື່ນ! (ສຸພາສິດ 18:1) ໃຫ້ເລີ່ມຫຼິ້ນກັບໝູ່ທີ່ຈະເສີມສ້າງເຈົ້າແລະພະຍາຍາມຄິດໃນແງ່ບວກ.—ຟີລິບປອຍ 4:8
ເມື່ອເວລາຜ່ານໄປ ເຈົ້າອາດເຈິຄົນໃໝ່. ເທື່ອນີ້ເຈົ້າຮູ້ວ່າຄວນເລືອກຄົບຄົນແບບໃດຈຶ່ງຈະມີຄວາມສຸກເພາະເຈົ້າມີປະສົບການມາແລ້ວ. ເມື່ອຮອດຕອນນັ້ນ ເຈົ້າເອງອາດຈະໝັ້ນໃຈວ່າ ຄົນນີ້ແຫຼະທີ່ເໝາະກັບຂ້ອຍ.
ອ່ານເພີ່ມເຕີມກ່ຽວກັບຫົວຂໍ້ນີ້ໃນເຫຼັ້ມທີ 1 ບົດທີ 31
ລະຫວ່າງທີ່ເປັນແຟນກັນ ເຈົ້າທັງສອງຈະສະແດງຄວາມຮັກຕໍ່ກັນສ່ຳໃດຈຶ່ງເໝາະສົມ?
[ຂໍ້ຄວາມໄຂເງື່ອນ]
a ການພິຈາລະນາຄຳຖາມໃນຫົວຂໍ້ຍ່ອຍ “ເຈົ້າພ້ອມທີ່ຈະແຕ່ງດອງແລ້ວບໍ? ຂອງບົດທີ 1 ຈະຊ່ວຍເຈົ້າໃຫ້ຮູ້ຈັກໂຕເອງຫຼາຍຂຶ້ນ”
b ພໍ່ແມ່ຫຼືຜູ້ໃຫຍ່ຄົນອື່ນໆ ເຊັ່ນ ຜູ້ເບິ່ງແຍງຄລິດສະຕຽນສາມາດຊ່ວຍເຈົ້າໄດ້. ບາງຄົນອາດເລົ່າໃຫ້ເຈົ້າຟັງວ່າ ສະໄໝທີ່ລາວຍັງເປັນໄວລຸ້ນ ລາວກໍເຄີຍເຈິເລື່ອງທີ່ເຮັດໃຫ້ເຈັບປວດໃຈຄ້າຍໆກັບເຈົ້າ.
ຂໍ້ຄຳພີຫຼັກ
“ການກະທຳຂອງເດັກນ້ອຍເຮັດໃຫ້ຄົນອື່ນຮູ້ໄດ້ວ່າ ລາວເປັນຄົນທີ່ບໍລິສຸດແລະສັດຊື່ຫຼືບໍ່.”—ສຸພາສິດ 20:11
ຄຳແນະນຳ
ເຮັດກິດຈະກຳທີ່ເຮັດໃຫ້ເຫັນຄຸນລັກສະນະຂອງກັນແລະກັນເຊັ່ນ:
● ສຶກສາຄຳພີໄບເບິນນຳກັນ.
● ສັງເກດວ່າອີກຝ່າຍໜຶ່ງເປັນແນວໃດໃນເລື່ອງການປະຊຸມປະຊາຄົມແລະການປະກາດ.
● ອະນາໄມຫໍປະຊຸມແລະຊ່ວຍວຽກໂຄງການກໍ່ສ້າງຫໍປະຊຸມນຳກັນ.
ເຈົ້າຮູ້ບໍ . . . ?
ຈາກການວິໄຈສະແດງໃຫ້ເຫັນວ່າຄູ່ຜົວເມຍທີ່ນັບຖືສາສະໜາຕ່າງກັນມັກມີໂອກາດຢ່າຮ້າງຫຼາຍກວ່າຄູ່ຜົວເມຍທີ່ນັບຖືສາສະໜາດຽວກັນ.
ແຜນພາກປະຕິບັດ!
ຖ້າຂ້ອຍມັກຄົນທີ່ບໍ່ໄດ້ເປັນພະຍານພະເຢໂຫວາ ຂ້ອຍຈະ ․․․․․
ຖ້າຢາກຮູ້ວ່າຄົນທີ່ຂ້ອຍມັກມີຊື່ສຽງແນວໃດ ຂ້ອຍສາມາດ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເຈົ້າມີຂໍ້ດີຫຍັງແດ່ທີ່ຈະຊ່ວຍໃຫ້ຊີວິດຄູ່ມີຄວາມສຸກ?
● ເຈົ້າຄິດວ່າຄູ່ແຕ່ງດອງຂອງເຈົ້າຕ້ອງເປັນຄົນແນວໃດ?
● ຖ້າເຈົ້າແຕ່ງດອງກັບຄົນທີ່ບໍ່ມີຄວາມເຊື່ອຄືເຈົ້າ ເຈົ້າຈະເຈິບັນຫາຫຍັງແດ່?
● ເຈົ້າຈະຮູ້ຈັກນິດໄສໃຈຄໍ ການປະພຶດ ແລະຊື່ສຽງຂອງຄົນທີ່ເຈົ້າມັກໄດ້ແນວໃດ?
[ຖ້ອຍຄຳທີ່ຍົກມາໜ້າ 37]
”ແຟນຂອງເຈົ້າເຮັດກັບຄອບຄົວຂອງລາວເອງແນວໃດ ລາວກໍຈະເຮັດກັບເຈົ້າແນວນັ້ນຄືກັນ.”—ໂທນີ
[ຂອບໜ້າ 34]
“ຢ່າມີສ່ວນຮ່ວມ”
ຫຼັກການໃນຄຳພີໄບເບິນທີ່ຢູ່ໃນ 2 ໂກຣິນໂທ 6:14 ບອກວ່າ “ຢ່າມີສ່ວນຮ່ວມຫຍັງກັບຄົນທີ່ບໍ່ເຊື່ອ.” ເຈົ້າຄືຊິຍອມຮັບວ່າຫຼັກການນີ້ດີ. ແຕ່ເຈົ້າອາດຈະຍັງມັກຄົນທີ່ບໍ່ເຊື່ອຢູ່ດີ. ຍ້ອນຫຍັງ? ບາງເທື່ອກໍເປັນຍ້ອນວ່າຄົນນັ້ນງາມຫຼືຫຼໍ່. ໄວລຸ້ນຊາຍທີ່ຊື່ມາກເວົ້າວ່າ: “ຕອນທີ່ຮຽນວິຊາພາລະສຶກສາ ຂ້ອຍເຈິຜູ້ຍິງຄົນນີ້ຕະຫຼອດ. ລາວມັກຈະຍ່າງມາຫາຂ້ອຍແລະຊວນຂ້ອຍລົມນຳ. ເຮົາກໍເລີຍສະໜິດກັນ.”
ຖ້າເຈົ້າຮູ້ຈັກໂຕເອງດີ ມີຄວາມໝັ້ນໃຈໃນມາດຕະຖານຂອງພະເຈົ້າ ແລະເປັນຜູ້ໃຫຍ່ພໍທີ່ຈະບໍ່ເຮັດຫຍັງຕາມອາລົມຄວາມຮູ້ສຶກ ເຈົ້າກໍຈະຮູ້ວ່າຄວນເຮັດແນວໃດ. ເຖິງວ່າຄົນທີ່ເຈົ້າມັກຈະໜ້າຕາດີ ມີສະເໜ່ ຫຼືນິດໄສດີສ່ຳໃດ ລາວກໍຊ່ວຍເຈົ້າໃຫ້ມີສາຍສຳພັນທີ່ດີກັບພະເຈົ້າບໍ່ໄດ້.—ຢາໂກໂບ 4:4
ແນ່ນອນວ່າ ຖ້າເຈົ້າສະໜິດກັບລາວຈົນເປັນແຟນກັນ ແລ້ວຄິດທີ່ຈະເລີກກໍຄືຊິບໍ່ງ່າຍ. ໄວລຸ້ນຍິງທີ່ຊື່ຊິນດີ້ກໍເຈິເລື່ອງແບບນີ້. ລາວເລົ່າວ່າ: “ຂ້ອຍຮ້ອງໄຫ້ທຸກມື້. ຂ້ອຍຄິດຮອດຜູ້ຊາຍຄົນນີ້ຕະຫຼອດເວລາແມ່ນແຕ່ຕອນທີ່ກຳລັງປະຊຸມຢູ່. ຂ້ອຍຮັກລາວຫຼາຍຈົນຄິດວ່າຂ້ອຍຍອມຕາຍດີກວ່າທີ່ຈະເສຍລາວໄປ.” ແຕ່ຫຼັງຈາກນັ້ນບໍ່ດົນ ຊິນດີ້ກໍເຫັນວ່າດີແລ້ວທີ່ແມ່ແນະນຳບໍ່ໃຫ້ຄົບກັບຄົນທີ່ບໍ່ເຊື່ອ. ລາວເລົ່າຕໍ່ວ່າ: “ດີທີ່ຂ້ອຍເລີກກັບລາວ. ຂ້ອຍໝັ້ນໃຈວ່າພະເຢໂຫວາຈະໃຫ້ສິ່ງທີ່ດີທີ່ສຸດກັບຂ້ອຍ.”
ເຈົ້າຕົກຢູ່ໃນສະຖານະການຄ້າຍກັບຊິນດີ້ບໍ? ຖ້າເປັນແນວນັ້ນ ກໍຢ່າຮັບມືດ້ວຍໂຕເອງ! ເຈົ້າສາມາດລົມເລື່ອງນີ້ກັບພໍ່ແມ່ໄດ້. ຈິມກໍເຮັດແບບນັ້ນຄືກັນເມື່ອລາວຫຼົງໄຫຼຜູ້ຍິງຄົນໜຶ່ງຢູ່ໂຮງຮຽນ. ລາວເວົ້າວ່າ: “ຂ້ອຍໄດ້ຂໍຄວາມຊ່ວຍເຫຼືອຈາກພໍ່ແມ່. ນີ້ຈຶ່ງຊ່ວຍຂ້ອຍໃຫ້ເອົາຊະນະຄວາມຮູ້ສຶກນັ້ນໄດ້.” ຜູ້ເບິ່ງແຍງໃນປະຊາຄົມກໍສາມາດຊ່ວຍເຈົ້າໄດ້ຄືກັນ. ເຈົ້າໜ້າຈະລອງໄປຫາຜູ້ເບິ່ງແຍງແລະເລົ່າເລື່ອງທີ່ເຈົ້າກຳລັງເຈິຢູ່ໃຫ້ເຂົາເຈົ້າຟັງ.—ເອຊາຢາ 32:1, 2
[ຂອບ/ຮູບພາບໜ້າ 39]
ສາລະບານແບບສອບຖາມ
ລາວຈະເປັນຜົວທີ່ດີບໍ?
ສິ່ງສຳຄັນທີ່ຕ້ອງຮູ້ກ່ຽວກັບລາວ
◻ ລາວໃຊ້ອຳນາດແນວໃດ?—ມັດທາຍ 20:25, 26
◻ ລາວມີເປົ້າໝາຍຫຍັງ?—1 ຕີໂມທຽວ 4:15
◻ ຕອນນີ້ລາວກຳລັງພະຍາຍາມເຮັດຕາມເປົ້າໝາຍນັ້ນບໍ?—1 ໂກຣິນໂທ 9:26, 27
◻ ລາວເຮັດກັບຄົນໃນຄອບຄົວຂອງລາວແນວໃດ?—ອົບພະຍົບ 20:12
◻ ໝູ່ຂອງລາວເປັນຄົນແນວໃດ?—ສຸພາສິດ 13:20
◻ ລາວມັກລົມເລື່ອງຫຍັງແດ່?—ລູກາ 6:45
◻ ລາວຄິດແນວໃດກ່ຽວກັບເງິນ?—ເຮັບເຣີ 13:5, 6
◻ ລາວມັກຄວາມບັນເທີງແບບໃດ?—ເພງສັນລະເສີນ 97:10
◻ ລາວສະແດງຄວາມຮັກຕໍ່ພະເຢໂຫວາແນວໃດ?—1 ໂຢຮັນ 5:3
ຂໍ້ດີ
◻ ລາວເປັນຄົນດຸໝັ່ນບໍ?—ສຸພາສິດ 6:9-11
◻ ລາວມີຄວາມຮັບຜິດຊອບໃນເລື່ອງເງິນບໍ?—ລູກາ 14:28
◻ ລາວມີຊື່ສຽງທີ່ດີບໍ?—ກິດຈະການ 16:1, 2
◻ ລາວຄິດເຖິງຄົນອື່ນບໍ?—ຟີລິບປອຍ 2:4
ນິດໄສບໍ່ດີທີ່ຊີ້ໃຫ້ເຫັນບັນຫາ
◻ ລາວໃຈຮ້າຍງ່າຍບໍ?—ສຸພາສິດ 22:24
◻ ລາວພະຍາຍາມໂນ້ມນ້າວໃຫ້ເຈົ້າເຮັດຜິດສິນລະທຳທາງເພດບໍ?—ຄາລາເຕຍ 5:19
◻ ລາວທຳຮ້າຍຜູ້ອື່ນທາງຮ່າງກາຍຫຼືເວົ້າຫຍາບຄາຍບໍ?—ເອເຟໂຊ 4:31
◻ ລາວຮູ້ສຶກວ່າບໍ່ມ່ວນຖ້າບໍ່ໄດ້ກິນເຫຼົ້າບໍ?—ສຸພາສິດ 20:1
◻ ລາວຂີ້ອິດສາແລະເຫັນແກ່ໂຕບໍ?—1 ໂກຣິນໂທ 13:4, 5
[ຂອບ/ຮູບພາບໜ້າ 40]
ສາລະບານແບບສອບຖາມ
ລາວຈະເປັນເມຍທີ່ດີບໍ?
ສິ່ງສຳຄັນທີ່ຕ້ອງຮູ້ກ່ຽວກັບລາວ
◻ ລາວເປັນຄົນທີ່ຍອມຢູ່ໃຕ້ອຳນາດຂອງຄອບຄົວຫຼືໃນປະຊາຄົມບໍ?—ເອເຟໂຊ 5:21, 22
◻ ລາວເຮັດກັບຄົນໃນຄອບຄົວຂອງລາວແນວໃດ?—ອົບພະຍົບ 20:12
◻ ໝູ່ຂອງລາວເປັນຄົນແນວໃດ?—ສຸພາສິດ 13:20
◻ ລາວມັກລົມເລື່ອງຫຍັງ?—ລູກາ 6:45
◻ ລາວຄິດແນວໃດກ່ຽວກັບເງິນ?—1 ໂຢຮັນ 2:15-17
◻ ລາວມີເປົ້າໝາຍຫຍັງ?—1 ຕີໂມທຽວ 4:15
◻ ຕອນນີ້ລາວກຳລັງພະຍາຍາມເຮັດຕາມເປົ້າໝາຍນັ້ນບໍ?—1 ໂກຣິນໂທ 9:26, 27
◻ ລາວມັກຄວາມບັນເທີງແບບໃດ?—ເພງສັນລະເສີນ 97:10
◻ ລາວສະແດງຄວາມຮັກຕໍ່ພະເຢໂຫວາແນວໃດ?—1 ໂຢຮັນ 5:3
ຂໍ້ດີ
◻ ລາວເປັນຄົນດຸໝັ່ນບໍ?—ສຸພາສິດ 31:17, 19, 21, 22, 27
◻ ລາວມີຄວາມຮັບຜິດຊອບໃນເລື່ອງເງິນບໍ?—ສຸພາສິດ 31:16, 18
◻ ລາວມີຊື່ສຽງທີ່ດີບໍ?—ນາງຣຸດ 3:11
◻ ລາວຄິດເຖິງຄົນອື່ນບໍ?—ສຸພາສິດ 31:20
ນິດໄສບໍ່ດີທີ່ຊີ້ໃຫ້ເຫັນບັນຫາ
◻ ລາວມັກຫາເລື່ອງຜິດຖຽງກັນບໍ?—ສຸພາສິດ 21:19
◻ ລາວພະຍາຍາມໂນ້ມນ້າວໃຫ້ເຈົ້າເຮັດຜິດສິນລະທຳທາງເພດບໍ?—ຄາລາເຕຍ 5:19
◻ ລາວທຳຮ້າຍຜູ້ອື່ນທາງຮ່າງກາຍຫຼືເວົ້າຫຍາບຄາຍບໍ?—ເອເຟໂຊ 4:31
◻ ລາວຮູ້ສຶກວ່າບໍ່ມ່ວນຖ້າບໍ່ໄດ້ດື່ມເຫຼົ້າບໍ?—ສຸພາສິດ 20:1
◻ ລາວຂີ້ອິດສາແລະເອົາແຕ່ໃຈໂຕເອງບໍ?—1 ໂກຣິນໂທ 13:4, 5
[ຮູບພາບໜ້າ 30]
ບໍ່ແມ່ນເກີບທຸກຂະໜາດທີ່ເຈົ້າຈະໃສ່ໄດ້ພໍດີ ຄ້າຍຄືກັນ ບໍ່ແມ່ນທຸກຄົນທີ່ຈະເໝາະກັບເຈົ້າ
[ຮູບພາບໜ້າ 31]
ຖ້າເຈົ້າຊື້ລົດ ເຈົ້າຄືຊິບໍ່ເບິ່ງແຕ່ສະພາບພາຍນອກແມ່ນບໍ? ເມື່ອເລືອກຄູ່ແຕ່ງດອງ ເຈົ້າກໍແຮ່ງຕ້ອງເບິ່ງເລິກລົງໄປຫຼາຍກວ່ານັ້ນອີກ!