ບົດທີ 11
ຈະເປັນແນວໃດຖ້າມີໝູ່ທາງອອນລາຍ?
ເຈົ້າມັກຕິດຕໍ່ຄົນອື່ນແບບໃດ?
□ ໂຕຕໍ່ໂຕ
□ ໂທລະສັບ
□ ອິນເຕີເນັດ
ເຈົ້າມັກລົມກັບໃຜ?
□ ໝູ່ຢູ່ໂຮງຮຽນ
□ ຄົນໃນຄອບຄົວ
□ ໝູ່ຄລິດສະຕຽນ
ບ່ອນໃດທີ່ເຈົ້າຮູ້ສຶກວ່າລົມໄດ້ເຕັມທີ?
□ ຢູ່ໂຮງຮຽນ
□ ຢູ່ເຮືອນ
□ ຢູ່ຫໍປະຊຸມ
ລອງມາເບິ່ງຄຳຕອບຂໍ້ທຳອິດ. ເຈົ້າຄືຊິຕອບວ່າມັກຕິດຕໍ່ທາງອິນເຕີເນັດແມ່ນບໍ? ຖ້າແມ່ນກໍບໍ່ແປກ ເພາະໄວລຸ້ນໜຸ່ມສາວຫຼາຍຄົນມັກຫາໝູ່ແລະຕິດຕໍ່ໝູ່ທາງອິນເຕີເນັດ. ໄວລຸ້ນຍິງທີ່ຊື່ເອເລນບອກວ່າ: “ອິນເຕີເນັດເຮັດໃຫ້ເຮົາສາມາດຕິດຕໍ່ກັບຄົນທີ່ຢູ່ທົ່ວໂລກໄດ້ເຊິ່ງປົກກະຕິແລ້ວເປັນໄປໄດ້ຍາກ. ມັນໜ້າຕື່ນເຕັ້ນແທ້ໆ!” ທາມມີ້ອາຍຸ 19 ປີບອກອີກເຫດຜົນໜຶ່ງທີ່ເຮັດໃຫ້ມັກຫຼິ້ນອິນເຕີເນັດ. ລາວບອກວ່າ: ເມື່ອຢູ່ໃນອິນເຕີເນັດ ເຈົ້າຢາກເຮັດຫຍັງກໍໄດ້ເພື່ອໃຫ້ຄົນອື່ນມັກເຈົ້າ. ແຕ່ເມື່ອລົມກັນຕໍ່ໜ້າ ຖ້າເຂົາເຈົ້າບໍ່ມັກເຈົ້າ ເຈົ້າກໍເຮັດຫຍັງບໍ່ໄດ້.”
ຕອນນີ້ໃຫ້ມາເບິ່ງຄຳຕອບຂອງຂໍ້ທີສອງແລະສາມ. ຖ້າເຈົ້າຕອບວ່າເຈົ້າມັກລົມກັບໝູ່ຢູ່ໂຮງຮຽນຫຼາຍກວ່າລົມກັບໝູ່ຄລິດສະຕຽນທີ່ຢູ່ຫໍປະຊຸມ ກໍບໍ່ແມ່ນເລື່ອງແປກ. ຈັດສ໌ມິນ ອາຍຸ 18 ປີບອກວ່າ: “ຢູ່ໂຮງຮຽນເຈົ້າໄດ້ເຈິຄົນລຸ້ນດຽວກັນແລະຮຽນໜັງສືຄືກັນກັບເຈົ້າ. ມັນເລີຍມີຫຼາຍເລື່ອງທີ່ຈະລົມກັນໄດ້ງ່າຍ.”
ຫຼັງຈາກພິຈາລະນາສາມຄຳຖາມນັ້ນແລ້ວ ເບິ່ງຄືວ່າເປັນເລື່ອງທຳມະດາທີ່ເຈົ້າຢາກລົມກັບໝູ່ຢູ່ໂຮງຮຽນທາງອອນລາຍ. ທາມມີ້ກໍເຄີຍເຮັດແບບນັ້ນ. ລາວບອກວ່າ: “ໝູ່ຢູ່ໂຮງຮຽນທຸກຄົນມັກຈະລົມກັນທາງອອນລາຍ ແລະຂ້ອຍກໍບໍ່ຢາກຕ່າງໝູ່.”a ນາຕາລີ ອາຍຸ 20 ປີໄດ້ສ້າງໜ້າເວັບຂອງໂຕເອງເພື່ອຕິດຕໍ່ກັບໝູ່ຄູ່. ລາວບອກວ່າ: “ດຽວນີ້ເຕັກໂນໂລຊີກ້າວໜ້າຫຼາຍ ແລະມີວິທີໃໝ່ໆທີ່ຈະຕິດຕໍ່ກັນໄດ້. ການລົມກັນທາງອອນລາຍກໍເປັນວິທີໜຶ່ງທີ່ຂ້ອຍມັກຫຼາຍ.”
ໃຫ້ຄິດເຖິງອັນຕະລາຍ
ແນ່ນອນວ່າ ສຳລັບບາງຄົນຮູ້ສຶກວ່າງ່າຍກວ່າທີ່ຈະຫາໝູ່ແລະຕິດຕໍ່ໝູ່ທາງອອນລາຍ. ນາຕາລີບອກວ່າ: “ການລົມກັນທາງອິນເຕີເນັດເຮັດໃຫ້ເຈົ້າຮູ້ສຶກໝັ້ນໃຈຫຼາຍກວ່າການລົມກັນແບບໂຕຕໍ່ໂຕ.” ທາມມີ້ກໍເຫັນດີໃນເລື່ອງນີ້. ລາວບອກວ່າ: “ຖ້າເຈົ້າຂີ້ອາຍ ການລົມກັນທາງອອນລາຍຈະເຮັດໃຫ້ເຈົ້າມີໂອກາດກຽມໂຕກ່ອນວ່າຈະເວົ້າຫຍັງ.”
ແຕ່ການຕິດຕໍ່ກັນທາງອິນເຕີເນັດອາດມີອັນຕະລາຍຫຼາຍຢ່າງ ແລະຖ້າເຈົ້າສະຫຼາດກໍໜ້າຈະລະວັງເລື່ອງນີ້. ເພື່ອເປັນຕົວຢ່າງ: ຖ້າເຈົ້າຢູ່ໃນເຂດທີ່ອັນຕະລາຍ ເຈົ້າກໍຄືຊິບໍ່ປິດຕາຍ່າງໄປຕາມຫົນທາງແມ່ນບໍ? ຄັນຊັ້ນເປັນຫຍັງຈຶ່ງຈະຫຼິ້ນອິນເຕີເນັດໂດຍບໍ່ລະວັງແລະບໍ່ຄິດເຖິງອັນຕະລາຍຫຍັງເລີຍ?
ລອງຄິດເຖິງອັນຕະລາຍຂອງການພະຍາຍາມຫາໝູ່ທາງອິນເຕີເນັດ. ເອເລນເຄີຍແຊັດກັບຄົນແປກໜ້າ. ລາວບອກວ່າ “ໃນອິນເຕີເນັດ ມັນງ່າຍຫຼາຍທີ່ຈະເຈິຄົນທີ່ບໍ່ດີຫຼືໄວ້ໃຈບໍ່ໄດ້. ຢູ່ດີໆຄົນທີ່ເຈົ້າລົມນຳກໍອາດເວົ້າເລື່ອງລາມົກຂຶ້ນມາຫຼືຖາມວ່າ: ‘ເຈົ້າເຄີຍມີເພດສຳພັນບໍ? ເຈົ້າມັກມີເພດສຳພັນທາງປາກບໍ?’ ບາງຄົນອາດເຖິງຂັ້ນຊວນເຈົ້າໃຫ້ຫຼິ້ນໄຊເບີເຊັກ.”b
ແລ້ວຖ້າເຈົ້າແຊັດແຕ່ກັບໝູ່ທີ່ຮູ້ຈັກເດ? ເຖິງຈະເປັນແນວນັ້ນ ເຈົ້າກໍຍັງຕ້ອງລະວັງ. ຈອນບອກວ່າ: “ເຈົ້າອາດໃຊ້ເວລາຫຼາຍເກີນໄປໃນການແຊັດລົມກັບໝູ່ທີ່ເປັນເພດກົງກັນຂ້າມ. ແຮ່ງເຈົ້າສົ່ງຂໍ້ຄວາມເຖິງຄົນນັ້ນຫຼາຍເທົ່າໃດ ເຈົ້າກໍແຮ່ງຈະສະໜິດກັນຫຼາຍຂຶ້ນຈົນກ້າເວົ້າເລື່ອງທີ່ບໍ່ເໝາະສົມ.”
“ຄົນທີ່ບໍ່ຈິງໃຈ”
ກະສັດດາວິດຮູ້ດີວ່າຕ້ອງລະວັງໝູ່ທີ່ບໍ່ດີ. ລາວຂຽນວ່າ: “ລູກບໍ່ຄົບຫາກັບຄົນຂີ້ຕົວະ ແລະບໍ່ໄປໃກ້ຄົນທີ່ບໍ່ຈິງໃຈ.”—ເພງສັນລະເສີນ 26:4
ຕອນທີ່ຫຼິ້ນອິນເຕີເນັດ ເຈົ້າເຄີຍເຈິຄົນແບບທີ່ດາວິດເວົ້າເຖິງບໍ? ເຂົາເຈົ້າເປັນ “ຄົນທີ່ບໍ່ຈິງໃຈ” ແນວໃດແລະຍ້ອນຫຍັງ? ․․․․․
ໃນທາງກົງກັນຂ້າມ ເຈົ້າເອງເປັນຄົນທີ່ບໍ່ຈິງໃຈຫຼືປິດບັງຕົວຕົນຕອນທີ່ຫຼິ້ນອິນເຕີເນັດບໍ? ອາບີເກວທີ່ເຄີຍໃຊ້ແຊັດຣູມຫຼືຫ້ອງສົນທະນາບອກວ່າ: “ຕອນທີ່ຂ້ອຍແຊັດ ຂ້ອຍຈະພະຍາຍາມປັບໂຕເອງໃຫ້ເຂົ້າກັບເລື່ອງທີ່ກຳລັງລົມກັນ.”
ຜູ້ຍິງຊື່ລີແອນເຄີຍໃຊ້ອີກຮູບແບບໜຶ່ງເພື່ອປິດບັງຕົວຕົນ. ລາວເລົ່າວ່າ: “ຂ້ອຍລົມກັບຜູ້ຊາຍຄົນໜຶ່ງທີ່ຢູ່ປະຊາຄົມໃກ້ຄຽງທາງອອນລາຍເປັນປະຈຳ. ບໍ່ດົນ ເຮົາກໍເລີ່ມລົມກັນເລື່ອງຮັກໆໃຄ່ໆ. ເມື່ອພໍ່ແມ່ຂອງຂ້ອຍຍ່າງມາ ຂ້ອຍກໍຈະຫຍໍ້ໜ້າຈໍໃຫ້ນ້ອຍລົງເພື່ອບໍ່ໃຫ້ພໍ່ແມ່ຈັບໄດ້ວ່າເຮົາລົມເລື່ອງຫຍັງກັນ. ເຂົາເຈົ້າຄືຊິຄິດບໍ່ເຖິງວ່າລູກສາວອາຍຸ 13 ປີຈະສົ່ງຄຳກອນຫວານໆຫາຜູ້ຊາຍອາຍຸ 14 ປີ. ເຂົາເຈົ້າຄືຊິນຶກພາບບໍ່ອອກແທ້ໆ.”
ປອດໄພໄວ້ກ່ອນ
ແນ່ນອນວ່າ ບາງເທື່ອກໍເໝາະທີ່ຈະຕິດຕໍ່ກັນທາງອິນເຕີເນັດ. ຕົວຢ່າງເຊັ່ນ ຜູ້ໃຫຍ່ຫຼາຍຄົນໃຊ້ອິນເຕີເນັດເພື່ອຕິດຕໍ່ກັບໝູ່. ແຕ່ຖ້າເຈົ້າຕິດຕໍ່ໝູ່ດ້ວຍວິທີນີ້ ເຈົ້າຕ້ອງລະວັງຫຍັງແດ່? ລອງເຮັດຕາມຄຳແນະນຳຕໍ່ໄປນີ້.
● ກວດເບິ່ງເວລາທີ່ເຈົ້າໃຊ້ຕອນຫຼິ້ນອິນເຕີເນັດ. ຢ່າຫຼິ້ນອິນເຕີເນັດຫຼາຍເກີນໄປຈົນບໍ່ມີເວລາເຮັດສິ່ງທີ່ສຳຄັນກວ່າເຊິ່ງລວມເຖິງການນອນຫຼັບພັກຜ່ອນ. ຊາຍໜຸ່ມຄົນໜຶ່ງຊື່ໄບຣອັນບອກວ່າ: “ບາງຄົນຢູ່ໂຮງຮຽນຫຼິ້ນອິນເຕີເນັດຈົນຮອດສາມໂມງເຊົ້າ.”—ເອເຟໂຊ 5:15, 16
● ຕິດຕໍ່ສະເພາະກັບຄົນທີ່ເຈົ້າຮູ້ຈັກຫຼືຄົນທີ່ເຈົ້າກວດສອບຕົວຕົນໄດ້. ຄົນທີ່ບໍ່ດີມັກຈະໃຊ້ອິນເຕີເນັດເພື່ອຫາຜົນປະໂຫຍດຈາກໜຸ່ມສາວທີ່ບໍ່ລະວັງໂຕ.—ໂຣມ 16:18
● ຕ້ອງລະວັງເປັນພິເສດເມື່ອຕິດຕໍ່ເລື່ອງທຸລະກິດ. ຢ່າໃຫ້ຂໍ້ມູນສ່ວນໂຕກັບໃຜງ່າຍ. ຄັນບໍ່ຊັ້ນ ເຈົ້າອາດຖືກໂກງ ຫຼືອາດເຈິເລື່ອງທີ່ຮ້າຍແຮງກວ່ານັ້ນ.—ມັດທາຍ 10:16
● ຖ້າຈະສົ່ງຮູບຖ່າຍໃຫ້ໝູ່ ລອງຖາມໂຕເອງວ່າ ‘ນີ້ແມ່ນຮູບຂອງຄົນທີ່ບອກວ່າຮັບໃຊ້ພະເຈົ້າແທ້ບໍ?’—ຕີໂຕ 2:7, 8
● ໃຫ້ເຊົາແຊັດທັນທີ. ຖ້າການລົມກັນທາງອິນເຕີເນັດເລີ່ມລາມໄປຫາ “ສິ່ງທີ່ບໍ່ເໝາະສົມ” ກໍໃຫ້ເຊົາລົມກັນທັນທີ.—ເອເຟໂຊ 5:3, 4
● ໃຊ້ອິນເຕີເນັດແບບປິດບັງ. ຖ້າເຈົ້າມັກປິດບັງພໍ່ແມ່ ສະແດງວ່າມີບາງຢ່າງຜິດປົກກະຕິ. ໄວລຸ້ນຄົນໜຶ່ງຊື່ຄາຣີບອກວ່າ: “ຂ້ອຍບໍ່ເຄີຍປິດບັງແມ່. ຂ້ອຍໃຫ້ລາວເບິ່ງຕະຫຼອດວ່າຂ້ອຍກຳລັງເຮັດຫຍັງທາງອອນລາຍ.”—ເຮັບເຣີ 13:18
“ມັນຄຸ້ມຄ່າທີ່ລໍຖ້າ!”
ເປັນເລື່ອງປົກກະຕິທີ່ເຈົ້າຢາກມີໝູ່. ພະເຈົ້າບໍ່ໄດ້ສ້າງມະນຸດໃຫ້ຢູ່ຄົນດຽວ ແຕ່ໃຫ້ມີໝູ່. (ປະຖົມມະການ 2:18) ດັ່ງນັ້ນ ທີ່ເຈົ້າຮູ້ສຶກຢາກມີໝູ່ ກໍຍ້ອນເຈົ້າຖືກສ້າງຂຶ້ນມາແບບນັ້ນ! ແຕ່ເຈົ້າຕ້ອງຮູ້ວິທີເລືອກໝູ່.
ຖ້າເຈົ້າເລືອກໝູ່ຕາມມາດຕະຖານຂອງພະເຢໂຫວາ ເຈົ້າກໍໝັ້ນໃຈໄດ້ວ່າເຈົ້າຈະມີໝູ່ທີ່ດີທີ່ສຸດ. ຜູ້ຍິງຄົນໜຶ່ງອາຍຸ 15 ປີບອກວ່າ: “ການຫາໝູ່ທີ່ຮັກພະເຢໂຫວາແລະຮັກເຈົ້າເປັນເລື່ອງຍາກ. ແຕ່ເມື່ອຫາເຈິ ເຈົ້າກໍຈະຮູ້ສຶກວ່າມັນຄຸ້ມຄ່າທີ່ລໍຖ້າ!”
ໃຜບອກວ່າຄຳເວົ້າທຳຮ້າຍເຮົາບໍ່ໄດ້? ການຊຸບຊິບນິນທາສາມາດແທງໄດ້ຄືດາບ. ເຈົ້າຈະເຊົານິນທາໄດ້ແນວໃດ?
[ຂໍ້ຄວາມໄຂເງື່ອນ]
b ໄຊເບີເຊັກແມ່ນການລົມກັນທາງອອນລາຍກ່ຽວກັບເລື່ອງເພດເພື່ອສະໜອງຄວາມຕ້ອງການທາງເພດ.
ຂໍ້ຄຳພີຫຼັກ
“ລູກບໍ່ຄົບຫາກັບຄົນຂີ້ຕົວະ ແລະບໍ່ໄປໃກ້ຄົນທີ່ບໍ່ຈິງໃຈ.”—ເພງສັນລະເສີນ 26:4
ຄຳແນະນຳ
ເມື່ອເຈົ້າໃຊ້ອິນເຕີເນັດ ເວລາຈະຜ່ານໄປໄວຫຼາຍປານຕິດປີກ! ດັ່ງນັ້ນ ໃຫ້ກຳນົດເວລາທີ່ຈະໃຊ້ ແລ້ວເຮັດຕາມນັ້ນ. ຖ້າຈຳເປັນ ໃຫ້ຕັ້ງໂມງປຸກວ່າເຈົ້າຕ້ອງເຊົາຫຼິ້ນຕອນຈັກໂມງ.
ເຈົ້າຮູ້ບໍ . . . ?
ການໄດ້ຂໍ້ມູນທາງອິນເຕີເນັດພຽງແຕ່ໜ້ອຍດຽວ ເຊັ່ນ ນາມສະກຸນ ຊື່ໂຮງຮຽນ ຫຼືເບີໂທລະສັບຂອງເຈົ້າ ກໍເຮັດໃຫ້ຄົນທີ່ບໍ່ດີສາມາດຫາເຈົ້າເຈິໄດ້.
ແຜນພາກປະຕິບັດ!
ຂ້ອຍຢາກຈຳກັດເວລາໃນການຫຼິ້ນອິນເຕີເນັດພຽງແຕ່ຕໍ່ອາທິດ ແລະຂ້ອຍຈະເຮັດແບບນີ້ໂດຍ ․․․․․
ຖ້າຂ້ອຍເຈິຄົນທີ່ຂ້ອຍບໍ່ຮູ້ຈັກທາງອິນເຕີເນັດ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ໃຫ້ປຽບທຽບວ່າການລົມກັນທາງອິນເຕີເນັດແລະການລົມກັນແບບໂຕຕໍ່ໂຕມີຂໍ້ດີແລະຂໍ້ເສຍແນວໃດ?
● ຕອນທີ່ຫຼິ້ນອິນເຕີເນັດ ເປັນຫຍັງເຮົາຈຶ່ງມັກປ່ຽນບຸກຄະລິກໄປເປັນອີກຄົນໜຶ່ງ?
● ເຈົ້າຈະຈຳກັດເວລາທີ່ເຈົ້າຫຼິ້ນອິນເຕີເນັດໄດ້ແນວໃດ?
● ການຕິດຕໍ່ກັນທາງອິນເຕີເນັດມີຂໍ້ດີຫຍັງແດ່?
[ຮູບພາບໜ້າ 100, 101]
ເຈົ້າຈະປິດຕາຍ່າງໄປຕາມຫົນທາງໃນເຂດທີ່ອັນຕະລາຍບໍ? ຄັນຊັ້ນເປັນຫຍັງຈຶ່ງຈະຫຼິ້ນອິນເຕີເນັດໂດຍບໍ່ລະວັງຫຍັງເລີຍ?
[ຖ້ອຍຄຳທີ່ຍົກມາໜ້າ 103]
“ຂ້ອຍບໍ່ຕິດຕໍ່ທາງອອນລາຍກັບຄົນທີ່ຂ້ອຍບໍ່ຮູ້ຈັກຫຼືຄົນທີ່ຂ້ອຍບໍ່ຢາກຄົບຫານຳໃນຊີວິດຈິງ.”—ຈອນ