ຊີວິດຄລິດສະຕຽນ
ໃຜແມ່ນໝູ່ຂອງເຈົ້າໃນສື່ສັງຄົມອອນລາຍ?
ຄຳວ່າໝູ່ໝາຍເຖິງ “ຄົນທີ່ຮັກແລະສະໜິດກັນ” ເຊັ່ນ ໂຢນາທານກັບດາວິດເລີ່ມສະໜິດກັນຫຼັງຈາກທີ່ດາວິດຂ້າໂຄລີອາດ. (1ຊາມ 18:1) ທັງສອງຄົນມີນິດໄສທີ່ດີທີ່ເຮັດໃຫ້ເຂົາເຈົ້າຢາກເປັນໝູ່ກັນ. ດັ່ງນັ້ນ ເພື່ອເຮົາຈະສະໜິດກັບໃຜຄົນໜຶ່ງ ເຮົາຕ້ອງຮູ້ຈັກຄົນນັ້ນເປັນຢ່າງດີ ເຊິ່ງຕ້ອງໃຊ້ເວລາແລະຄວາມພະຍາຍາມ. ແຕ່ໃນສື່ສັງຄົມອອນລາຍພຽງແຕ່ກົດປຸ່ມເທື່ອດຽວກໍເປັນ “ໝູ່” ກັນໄດ້. ຄົນທີ່ຢູ່ໃນໂລກອອນລາຍວາງແຜນກ່ອນໄດ້ວ່າຈະເວົ້າຫຍັງ ແລະສ້າງພາບໄດ້ວ່າຢາກໃຫ້ຄົນອື່ນເບິ່ງລາວແບບໃດ ຈຶ່ງເຮັດໃຫ້ເຮົາບໍ່ຮູ້ຈັກຕົວຕົນແທ້ໆຂອງຄົນນັ້ນ. ດັ່ງນັ້ນ ເຈົ້າຕ້ອງຄິດດີໆວ່າຈະເປັນໝູ່ກັບໃຜໃນສື່ສັງຄົມອອນລາຍ. ບໍ່ຕ້ອງຢ້ານວ່າລາວຈະເສຍຄວາມຮູ້ສຶກຖ້າເຈົ້າປະຕິເສດຄຳຂໍເປັນໝູ່. ບາງຄົນບໍ່ໃຊ້ສື່ສັງຄົມອອນລາຍຍ້ອນຢ້ານວ່າຈະມີອັນຕະລາຍ ແຕ່ຖ້າເຈົ້າໃຊ້ສື່ສັງຄົມອອນລາຍ ເຈົ້າຕ້ອງຄິດເຖິງເລື່ອງຫຍັງແດ່?
ເບິ່ງວິດີໂອໃຊ້ໂຊຊຽວເນັດເວີກຢ່າງສະຫຼາດ ແລ້ວຕອບຄຳຖາມຕໍ່ໄປນີ້:
ເຈົ້າຕ້ອງຄິດເຖິງຫຍັງແດ່ກ່ອນທີ່ຈະໂພດສ໌ຂໍ້ຄວາມຫຼືຮູບພາບ?
ເປັນຫຍັງເຈົ້າຕ້ອງເລືອກໝູ່ໃນສື່ສັງຄົມອອນລາຍຢ່າງດີ?
ເປັນຫຍັງເຈົ້າຕ້ອງຈຳກັດເວລາໃຊ້ສື່ສັງຄົມອອນລາຍ?—ອຟຊ 5:15, 16