ບົດທີ 15
ຂ້ອຍຈະຕ້ານທານແຮງກົດດັນຈາກໝູ່ໄດ້ແນວໃດ?
“ຢູ່ໂຮງຮຽນມີສິ່ງລໍ້ໃຈຫຼາຍຢ່າງ ເຊັ່ນ ການສູບຢາ ຢາເສບຕິດ ແລະການມີເພດສຳພັນ. ທັງທີ່ຮູ້ວ່າເລື່ອງເຫຼົ່ານີ້ເປັນສິ່ງທີ່ບໍ່ດີ ແຕ່ໃນທີ່ສຸດເຮົາກໍທົນແຮງກົດດັນຈາກໝູ່ບໍ່ໄດ້ແລະຕ້ອງຍອມແພ້.”—ອີບ
ເປັນເລື່ອງປົກກະຕິທີ່ເຮົາຢາກຈະໄດ້ຮັບການຍອມຮັບຈາກຄົນອື່ນ. ດັ່ງນັ້ນ ຄວາມກົດດັນຈາກໝູ່ຈຶ່ງມີອິດທິພົນຫຼາຍ. ຕົວຢ່າງເຊັ່ນ ຖ້າເຈົ້າໃຫຍ່ມາໃນຄອບຄົວທີ່ເປັນຄລິດສະຕຽນ ເຈົ້າກໍຮູ້ວ່າການມີເພດສຳພັນກ່ອນແຕ່ງດອງແລະການກິນເຫຼົ້າຫຼາຍເກີນໄປເປັນສິ່ງທີ່ຜິດ. (ຄາລາເຕຍ 5:19-21) ແຕ່ໝູ່ຫຼາຍຄົນພະຍາຍາມກົດດັນເຈົ້າໃຫ້ເຮັດສິ່ງເຫຼົ່ານັ້ນ. ລອງຄິດເບິ່ງວ່າ ທີ່ໝູ່ເຈົ້າເຮັດສິ່ງເຫຼົ່ານັ້ນຍ້ອນລາວຢາກເຮັດເອງບໍ? ຄືຊິບໍ່. ສ່ວນໃຫຍ່ແລ້ວ ໄວລຸ້ນມັກຈະເຮັດຕາມຄົນອື່ນ. ເຂົາເຈົ້າຢາກໃຫ້ຄົນອື່ນຍອມຮັບ ກໍເລີຍຍອມເຊື່ອແລະເຮັດຕາມສິ່ງທີ່ຄົນອື່ນບອກທັງທີ່ຮູ້ວ່າບໍ່ຖືກຕ້ອງ. ເຈົ້າເຮັດແບບດຽວກັນບໍ? ຫຼືເຈົ້າກ້າປົກປ້ອງຄວາມເຊື່ອຂອງເຈົ້າ?
ອາໂຣນອ້າຍຂອງໂມເຊກໍຍອມແພ້ຕໍ່ແຮງກົດດັນ. ເມື່ອພວກອິດສະຣາເອນພາກັນມາອ້ອມລາວແລະກົດດັນລາວໃຫ້ສ້າງພະເຈົ້າຂຶ້ນມາ ລາວກໍເຮັດຕາມທີ່ເຂົາເຈົ້າບອກ! (ອົບພະຍົບ 32:1-4) ລອງຄິດເບິ່ງ ອາໂຣນເປັນຜູ້ທີ່ເຄີຍຢູ່ຕໍ່ໜ້າຟາໂຣແລະປະກາດຄຳເວົ້າຂອງພະເຈົ້າຢ່າງກ້າຫານ ແຕ່ເມື່ອໝູ່ຮ່ວມຊາດກົດດັນຢ່າງໜັກ ລາວກໍຍອມແພ້. (ອົບພະຍົບ 7:1, 2, 16) ເບິ່ງຄືວ່າ ລາວຈະຮູ້ສຶກວ່າການປະເຊີນໜ້າກັບກະສັດເອຢິບງ່າຍກວ່າການຕ້ານທານແຮງກົດດັນຈາກໝູ່ຮ່ວມຊາດ!
ແລ້ວເຈົ້າເດ? ເຈົ້າຮູ້ສຶກວ່າມັນຍາກບໍທີ່ຈະຢືນຢັດເຮັດສິ່ງທີ່ຖືກຕ້ອງ? ເຈົ້າຢາກຈະຕ້ານທານແຮງກົດດັນຈາກຄົນອ້ອມຂ້າງໂດຍບໍ່ຮູ້ສຶກຢ້ານຫຼືອຶດອັດບໍ? ແນ່ນອນວ່າເຈົ້າເຮັດໄດ້! ສິ່ງສຳຄັນແມ່ນຕ້ອງເບິ່ງໃຫ້ອອກວ່າຈະມີຄວາມກົດດັນຫຍັງແລະຄິດລ່ວງໜ້າວ່າຈະຮັບມືແນວໃດ. ສີ່ຂັ້ນຕອນຕໍ່ໄປນີ້ຈະຊ່ວຍເຈົ້າໄດ້.
1. ໃຫ້ຄິດລ່ວງໜ້າ. (ສຸພາສິດ 22:3) ຫຼາຍເທື່ອ ເຈົ້າມັກເບິ່ງອອກວ່າຈະມີບັນຫາຫຍັງເກີດຂຶ້ນ. ຕົວຢ່າງເຊັ່ນ ເຈົ້າເຫັນນັກຮຽນກຸ່ມໜຶ່ງກຳລັງສູບຢາແລະຍ່າງມາຫາເຈົ້າ ເຈົ້າຄືຊິເດົາອອກວ່າເຂົາເຈົ້າຈະມາຊວນເຈົ້າໃຫ້ສູບຢາແມ່ນບໍ? ເມື່ອເຈົ້າຄິດລ່ວງໜ້າວ່າຈະເກີດຫຍັງຂຶ້ນ ເຈົ້າກໍຈະຕັດສິນໃຈໄດ້ວ່າຈະຫຼີກລ່ຽງຫຼືຈະປະເຊີນໜ້າກັບມັນ.
2. ຄິດ. (ເຮັບເຣີ 5:14) ເຈົ້າອາດຖາມໂຕເອງວ່າ ‘ຖ້າຂ້ອຍເຮັດຕາມໝູ່ ຂ້ອຍຈະຮູ້ສຶກແນວໃດຫຼັງຈາກນັ້ນ?’ ແມ່ນຢູ່ ໝູ່ຂອງເຈົ້າອາດຈະມັກເຈົ້າໄລຍະໜຶ່ງ. ແຕ່ເຈົ້າຈະຮູ້ສຶກແນວໃດເມື່ອຢູ່ກັບພໍ່ແມ່ຫຼືໝູ່ຄລິດສະຕຽນ? ເຈົ້າຈະຍອມສູນເສຍສາຍສຳພັນທີ່ດີກັບພະເຈົ້າເພື່ອເອົາໃຈໝູ່ບໍ?
3. ຕັດສິນໃຈ. (ພະບັນຍັດ 30:19) ໃນທີ່ສຸດ ຜູ້ຮັບໃຊ້ຂອງພະເຈົ້າທຸກຄົນຕ້ອງເລືອກວ່າ ລາວຈະສັດຊື່ແລ້ວໄດ້ຮັບຜົນດີ ຫຼືບໍ່ສັດຊື່ແລ້ວໄດ້ຮັບຜົນເສຍ. ໂຢເຊັບ ໂຢບ ແລະພະເຢຊູເລືອກຖືກ ສ່ວນກາອິນ ເອຊາວ ແລະຢູດາເລືອກຜິດ. ແລ້ວເຈົ້າເດຈະເລືອກຫຍັງ?
4. ປະຕິບັດ. ເຈົ້າອາດຄິດວ່ານີ້ເປັນຂັ້ນຕອນທີ່ຍາກທີ່ສຸດ. ແຕ່ບໍ່ແມ່ນແບບນັ້ນເລີຍ! ຖ້າເຈົ້າຄິດເຖິງຜົນໄດ້ຜົນເສຍແລະຕັດສິນໃຈແລ້ວ ການບອກຈຸດຢືນຂອງເຈົ້າກໍຈະເປັນເລື່ອງງ່າຍຈົນບໍ່ໜ້າເຊື່ອແລະໄດ້ຮັບຜົນດີນຳ. (ສຸພາສິດ 15:23) ບໍ່ຕ້ອງກັງວົນ ເຈົ້າບໍ່ຈຳເປັນຕ້ອງອະທິບາຍຄຳພີໄບເບິນໃຫ້ໝູ່ຟັງຢ່າງລະອຽດ. ການປະຕິເສດງ່າຍໆແຕ່ໜັກແໜ້ນອາດພຽງພໍແລ້ວ. ຫຼືຖ້າເຈົ້າຢາກໃຫ້ໝູ່ເຂົ້າໃຈຢ່າງຈະແຈ້ງວ່າເຈົ້າຕັດສິນໃຈແນວໃດ ເຈົ້າອາດຈະເວົ້າວ່າ:
“ຂ້ອຍບໍ່ເຮັດນຳດອກ!”
“ຂ້ອຍບໍ່ເຮັດແບບນັ້ນ!”
“ເຈົ້າກໍໜ້າຈະຮູ້ດີວ່າຂ້ອຍບໍ່ເຮັດແບບນັ້ນ!”
ສິ່ງສຳຄັນແມ່ນ ເຈົ້າຕ້ອງຕອບທັນທີແລະເວົ້າດ້ວຍຄວາມໝັ້ນໃຈ. ຖ້າເຮັດແບບນັ້ນ ໝູ່ອາດຈະບໍ່ມາກົດດັນເຈົ້າອີກເລີຍ! ແຕ່ຖ້າເຂົາເຈົ້າເຍາະເຍີ້ຍເຈົ້າເດ? ຖ້າເຂົາເຈົ້າເວົ້າວ່າ “ເປັນຫຍັງບໍ່ກ້າ ຂີ້ຢ້ານຫວະ?” ໃຫ້ຈື່ໄວ້ວ່ານີ້ແຫຼະເປັນວິທີທີ່ໝູ່ພະຍາຍາມກົດດັນເຈົ້າ. ແລ້ວເຈົ້າຈະຕອບແນວໃດ? ຢ່າງໜ້ອຍມີສາມທາງໃຫ້ເລືອກ.
● ເຈົ້າອາດຍອມຮັບໄປເລີຍກໍໄດ້. (“ແມ່ນ ຂ້ອຍຢ້ານ!” ຈາກນັ້ນ ບອກເຫດຜົນສັ້ນໆ)
● ເຈົ້າອາດບອກຈຸດຢືນເພື່ອປ່ຽນຄວາມສົນໃຈໂດຍທີ່ບໍ່ຕ້ອງໂຕ້ຖຽງເລື່ອງທີ່ລາວເຍາະເຍີ້ຍ.
● ເຈົ້າອາດກົດດັນຄືນ. ບອກເຫດຜົນທີ່ເຈົ້າບໍ່ເຮັດຕາມ ແລ້ວຖາມລາວຄືນເພື່ອໃຫ້ລາວໄດ້ຄິດ. (“ເບິ່ງເຈົ້າກໍຄືວ່າສະຫຼາດ ແຕ່ເປັນຫຍັງຈຶ່ງສູບຢາ!”)
ຖ້າໝູ່ຍັງກົດດັນເຈົ້າຢູ່ ກໍໃຫ້ຍ່າງອອກຈາກບ່ອນນັ້ນ! ແຮ່ງຢູ່ດົນ ຄວາມກົດດັນກໍແຮ່ງຈະຫຼາຍຂຶ້ນ. ຂໍຈື່ໄວ້ວ່າ ຖ້າເຈົ້າຍ່າງອອກມາ ເຈົ້າກໍຈະເປັນຜູ້ທີ່ຄວບຄຸມສະຖານະການ ແລະບໍ່ຍອມໃຫ້ໝູ່ກົດດັນເຈົ້າໄດ້!
ໝູ່ບາງຄົນອາດເຍາະເຍີ້ຍເຈົ້າວ່າ ເປັນຫຍັງເຈົ້າບໍ່ຮູ້ຈັກຄິດເອງ. ແຕ່ເຈົ້າບໍ່ໄດ້ເປັນແບບນັ້ນ! ທີ່ຈິງ ການທີ່ເຈົ້າບໍ່ເຮັດຕາມໝູ່ສະແດງວ່າເຈົ້າຄິດເອງຢູ່ແລ້ວ. ພະເຢໂຫວາຢາກໃຫ້ເຈົ້າພິສູດດ້ວຍໂຕເອງວ່າການເຮັດຕາມມາດຕະຖານຂອງພະເຈົ້າເປັນສິ່ງທີ່ດີທີ່ສຸດ. (ໂຣມ 12:2) ຄັນຊັ້ນເປັນຫຍັງຈຶ່ງຈະຍອມໃຫ້ໝູ່ຄວບຄຸມຊີວິດເຈົ້າຄືກັບຫຸ່ນຍົນ? (ໂຣມ 6:16) ຂໍໃຫ້ເຈົ້າຢືນຢັດເຮັດສິ່ງທີ່ຖືກຕ້ອງ!
ໃນຊີວິດຈິງມັນເປັນໄປບໍ່ໄດ້ທີ່ຈະຫຼີກລ່ຽງບໍ່ໃຫ້ເຈິຄວາມກົດດັນຈາກໝູ່. ແຕ່ສິ່ງທີ່ເຈົ້າເຮັດໄດ້ແມ່ນ ຕັດສິນໃຈ ບອກຈຸດຢືນ ແລ້ວຄວບຄຸມສະຖານະການໃຫ້ໄດ້. ໃນທີ່ສຸດ ເຈົ້າກໍຕ້ອງເລືອກເອງ!—ໂຢຊວຍ 24:15
ອ່ານເພີ່ມເຕີມກ່ຽວກັບຫົວຂໍ້ນີ້ໃນເຫຼັ້ມທີ 1 ບົດທີ 9
ເຈົ້າໃຊ້ຊີວິດແບບຕີສອງໜ້າບໍ? ເປັນຫຍັງເຈົ້າບໍ່ຄວນປິດບັງພໍ່ແມ່?
ຂໍ້ຄຳພີຫຼັກ
“ຄົນທີ່ຄົບກັບຄົນສະຫຼາດຈະສະຫຼາດ ແຕ່ຄົນທີ່ຄົບກັບຄົນໂງ່ຈະເດືອດຮ້ອນ.”—ສຸພາສິດ 13:20
ຄຳແນະນຳ
ໃຫ້ອ່ານປະສົບການຂອງຜູ້ຮັບໃຊ້ພະເຢໂຫວາໃນປັດຈຸບັນທີ່ຢືນຢັດເຮັດສິ່ງທີ່ຖືກຕ້ອງ ແລ້ວເຈົ້າກໍຈະກ້າເຮັດແບບດຽວກັນ.
ເຈົ້າຮູ້ບໍ . . . ?
ຫຼັງຈາກທີ່ຮຽນຈົບໄປໄດ້ໜຶ່ງປີ ຈະມີໝູ່ພຽງບໍ່ເທົ່າໃດຄົນທີ່ຍັງຕິດຕໍ່ເຈົ້າຢູ່. ບາງຄົນອາດຈື່ຊື່ເຈົ້າບໍ່ໄດ້ດ້ວຍຊ້ຳ. ແຕ່ຄອບຄົວຂອງເຈົ້າຮັກແລະສົນໃຈເຈົ້າສະເໝີ. ທີ່ສຳຄັນທີ່ສຸດແມ່ນ ພະເຢໂຫວາພະເຈົ້າ ຈະເບິ່ງແຍງເຈົ້າແລະບໍ່ມີທາງຖິ້ມເຈົ້າແນ່ນອນ.—ເພງສັນລະເສີນ 37:23-25
ແຜນພາກປະຕິບັດ!
ຂ້ອຍສາມາດກຽມໂຕຮັບມືກັບຄວາມກົດດັນຈາກໝູ່ໄດ້ໂດຍ ․․․․․
ຖ້າໝູ່ພະຍາຍາມກົດດັນຂ້ອຍໃຫ້ເຮັດສິ່ງທີ່ຜິດ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເຈົ້າຈະໃຊ້ສີ່ຂັ້ນຕອນທີ່ສະຫຼຸບໄວ້ໃນບົດນີ້ເມື່ອເຈິສະຖານະການໃດແດ່?
● ຈະເກີດຫຍັງຂຶ້ນຖ້າເຈົ້າຍອມເຮັດຕາມທີ່ໝູ່ກົດດັນ?
● ມີວິທີໃດແດ່ທີ່ຈະຊ່ວຍເຈົ້າໃຫ້ຕ້ານທານແຮງກົດດັນຈາກໝູ່?
[ຖ້ອຍຄຳທີ່ຍົກມາໜ້າ 131]
“ໝູ່ຫຼາຍຄົນຮູ້ວ່າຂ້ອຍເປັນພະຍານພະເຢໂຫວາ ເຂົາເຈົ້າກໍຍອມຮັບແລະໃຫ້ກຽດຂ້ອຍ. ຖ້າເຂົາເຈົ້າຈະລົມກັນກ່ຽວກັບເລື່ອງທີ່ບໍ່ດີ ເຂົາເຈົ້າກໍມັກຈະບອກຂ້ອຍວ່າ ‘ໄມ ພວກເຮົາກຳລັງຈະເວົ້າເລື່ອງແບບນັ້ນ. ຖ້າເຈົ້າບໍ່ຢາກຟັງກໍອອກໄປເດີ້.’”—ໄມ
[ຕາຕະລາງໜ້າ 132, 133]
ສາລະບານແບບສອບຖາມ
ແຜນຮັບມືກັບຄວາມກົດດັນຈາກໝູ່
ຕົວຢ່າງ
1 ໃຫ້ຄິດລ່ວງໜ້າ
ຈະເກີດບັນຫາຫຍັງ? ສູບຢາ
ຂ້ອຍມັກເຈິບັນຫານີ້ຢູ່ໃສ? ຢູ່ຫ້ອງນ້ຳ
2 ຄິດ
ຖ້າຂ້ອຍຍອມເຮັດຕາມຈະເປັນແນວໃດ?
ຂ້ອຍຈະເຮັດໃຫ້ພະເຢໂຫວາແລະພໍ່ແມ່ເສຍໃຈ. ມີໃຈຮູ້ຜິດຮູ້ຖືກທີ່ບໍ່ດີ. ເທື່ອຕໍ່ໄປຂ້ອຍກໍແຮ່ງຈະບໍ່ກ້າປະຕິເສດ.
ຖ້າຂ້ອຍບໍ່ຍອມເຮັດຕາມຈະເປັນແນວໃດ?
ຂ້ອຍອາດຈະຖືກເຍາະເຍີ້ຍ ແລະໝູ່ບາງຄົນອາດບໍ່ຢາກຫຼິ້ນກັບຂ້ອຍ. ແຕ່ຂ້ອຍຈະເຮັດໃຫ້ພະເຢໂຫວາດີໃຈ ແລະຂ້ອຍເອງກໍຈະເຂັ້ມແຂງຫຼາຍຂຶ້ນ.
3 ຕັດສິນໃຈ
ຖ້າຂ້ອຍຍອມເຮັດຕາມກໍຍ້ອນ
ຂ້ອຍກຽມໂຕຮັບມືກັບຄວາມກົດດັນຈາກໝູ່ບໍ່ດີພໍ. ຂ້ອຍເຫັນວ່າໝູ່ສຳຄັນກວ່າພະເຢໂຫວາ.
ຂ້ອຍຈະບໍ່ຍອມເຮັດຕາມຍ້ອນ
ຂ້ອຍຮູ້ວ່າພະເຢໂຫວາບໍ່ພໍໃຈແລະການສູບຢາອາດທຳລາຍສຸຂະພາບຂອງຂ້ອຍໄດ້.
4 ປະຕິບັດ
ຂ້ອຍຈະ
ເວົ້າວ່າບໍ່ ແລ້ວກໍຍ່າງໜີ.
ເມື່ອໝູ່ທ້າ
ຖ້າໝູ່ເວົ້າວ່າ: “ມາ ມາສູບຢາ. ຫຼືເຈົ້າຢ້ານຫວາ?”
ຂ້ອຍຈະຮັບມືກັບຄວາມກົດດັນຈາກໝູ່ໂດຍ
ຍອມຮັບ
“ແມ່ນ ຂ້ອຍຢ້ານ. ຂ້ອຍບໍ່ຢາກເປັນມະເຮັງປອດ.”
ບອກຈຸດຢືນ
“ຢ່າເສຍຢາສູບໃຫ້ຂ້ອຍເລີຍ ຂ້ອຍບໍ່ສູບດອກ.”
ກົດດັນຄືນ
“ບໍ່ເປັນຫຍັງ ຂອບໃຈ. ເບິ່ງເຈົ້າກໍຄືວ່າສະຫຼາດ ແຕ່ເປັນຫຍັງຈຶ່ງສູບຢາ!”
ຂໍ້ສັງເກດ: ຖ້າໝູ່ຂອງເຈົ້າຍັງບໍ່ເຊົາກົດດັນເຈົ້າ ກໍໃຫ້ຮີບຍ່າງອອກຈາກບ່ອນນັ້ນໄວໆ. ແຮ່ງເຈົ້າຢູ່ດົນເທົ່າໃດ ເຈົ້າກໍແຮ່ງຈະມີໂອກາດຍອມແພ້ຕໍ່ຄວາມກົດດັນຫຼາຍຂຶ້ນເທົ່ານັ້ນ. ຕອນນີ້ ໃຫ້ລອງຂຽນແຜນຂອງເຈົ້າເອງໃນໜ້າຕໍ່ໄປ.
ແຜນຮັບມືກັບຄວາມກົດດັນຈາກໝູ່
ຄັດລອກໜ້ານີ້!
1 ໃຫ້ຄິດລ່ວງໜ້າ
ຈະເກີດບັນຫາຫຍັງ? ․․․․․
ຂ້ອຍມັກເຈິບັນຫານີ້ຢູ່ໃສ? ․․․․․
2 ຄິດ
ຖ້າຂ້ອຍຍອມເຮັດຕາມຈະເປັນແນວໃດ?
․․․․․
ຖ້າຂ້ອຍບໍ່ຍອມເຮັດຕາມຈະເປັນແນວໃດ?
․․․․․
3 ຕັດສິນໃຈ
ຖ້າຂ້ອຍຍອມເຮັດຕາມກໍຍ້ອນ . . .
․․․․․
ຂ້ອຍຈະບໍ່ຍອມເຮັດຕາມຍ້ອນ . . .
․․․․․
4 ປະຕິບັດ
․․․․․
ຂ້ອຍຈະ . . .
․․․․․
ຖ້າໝູ່ເວົ້າວ່າ: ․․․․․
ຂ້ອຍຈະຮັບມືກັບຄວາມກົດດັນຈາກໝູ່ໂດຍ
ເມື່ອໝູ່ທ້າ
ຍອມຮັບ
․․․․․
ບອກຈຸດຢືນ
․․․․․
ກົດດັນຄືນ
․․․․․
ເມື່ອຂຽນແລ້ວ ລອງເອົາໄປຝຶກເວົ້າກັບພໍ່ແມ່ຫຼືໝູ່ທີ່ແນະນຳເຈົ້າໄດ້.
[ຮູບພາບໜ້າ 135]
ຖ້າເຈົ້າຍອມແພ້ຕໍ່ຄວາມກົດດັນຈາກໝູ່ ເຈົ້າຈະກາຍເປັນຫຸ່ນຍົນໃຫ້ເຂົາເຈົ້າຄວບຄຸມ