ບົດທີ 29
ຈະເຮັດແນວໃດຖ້າຂ້ອຍຄິດແຕ່ເລື່ອງເພດ?
ໄວລຸ້ນຄົນໜຶ່ງຊື່ໄມເຄິ້ນເວົ້າວ່າ: “ບາງເທື່ອຂ້ອຍບໍ່ມີສະມາທິເລີຍ ເພາະຄິດແຕ່ເລື່ອງຜູ້ສາວຢູ່ຕະຫຼອດທັງໆທີ່ເຂົາເຈົ້າກໍບໍ່ໄດ້ຢູ່ໃກ້ຂ້ອຍ. ມັນບໍ່ດີແທ້ໆ!”
ເຈົ້າເປັນຄືກັບໄມເຄິ້ນບໍທີ່ໝົດມື້ມີແຕ່ໃຈລອຍຫາເພດກົງກັນຂ້າມ? ຖ້າເປັນແບບນັ້ນ ເຈົ້າຄືຊິຕໍ່ສູ້ຢ່າງໜັກກັບຄວາມຄິດຂອງໂຕເອງ. ຄວາມຄິດໃນເລື່ອງເພດອາດໂຈມຕີເຈົ້າຄືກັບສັດຕູ. ໄມເຄິ້ນບອກວ່າ: “ຄວາມຄິດແບບນີ້ອາດຄອບງຳເຮົາໄດ້. ຜູ້ຊາຍບາງຄົນອາດຍ່າງອ້ອມກັບໄປລົດຂອງໂຕເອງເພື່ອຈະໄດ້ຍ່າງກາຍສາວໆທີ່ໜ້າຮັກ ຫຼືຍ່າງໄປຮ້ານຄ້າທັງໆທີ່ບໍ່ຈຳເປັນເພື່ອຈະໄດ້ເບິ່ງຜູ້ສາວໃກ້ໆ.”
ຂໍໃຫ້ຈື່ໄວ້ວ່າຄວາມຮູ້ສຶກໃນເລື່ອງເພດບໍ່ແມ່ນສິ່ງທີ່ບໍ່ດີ. ພະເຈົ້າສ້າງຜູ້ຊາຍກັບຜູ້ຍິງໃຫ້ດຶງດູດກັນ ແລະສະໜອງຄວາມຕ້ອງການທາງເພດໄດ້ຖ້າແຕ່ງງານກັນແລ້ວ. ແຕ່ຖ້າເຈົ້າຍັງໂສດ ເຈົ້າອາດຈະມີຄວາມຕ້ອງການທາງເພດທີ່ຮຸນແຮງ. ຖ້າເລື່ອງນີ້ເກີດຂຶ້ນກັບເຈົ້າ ຂໍຢ່າຄິດວ່າໂຕເອງເປັນຄົນບໍ່ດີຫຼືຄິດວ່າບໍ່ມີທາງຄວບຄຸມຄວາມຮູ້ສຶກນັ້ນໄດ້. ຖ້າເຈົ້າຕັ້ງໃຈ ເຈົ້າກໍຈະຄວບຄຸມຄວາມຮູ້ສຶກນັ້ນໄດ້ແນ່ນອນ! ສິ່ງທີ່ຊ່ວຍໄດ້ກໍຄື ພະຍາຍາມຄວບຄຸມຄວາມຄິດຂອງເຈົ້າໃຫ້ໄດ້ເມື່ອຄິດເຖິງແຕ່ເພດກົງກັນຂ້າມ. ແລ້ວຈະເຮັດແບບນັ້ນໄດ້ແນວໃດ?
ລະວັງເລື່ອງການຄົບໝູ່. ຖ້າໝູ່ໃນໂຮງຮຽນເລີ່ມລົມກັນເລື່ອງເພດ ເຈົ້າອາດຢາກຮ່ວມວົງສົນທະນານຳເພາະບໍ່ຢາກແຕກຕ່າງຈາກໝູ່. ແຕ່ການເຮັດແບບນັ້ນແຮ່ງຈະເຮັດໃຫ້ເຈົ້າຄວບຄຸມຄວາມຄິດໄດ້ຍາກຂຶ້ນ. ແລ້ວເຈົ້າຄວນເຮັດແນວໃດ? ໃຫ້ລຸກຂຶ້ນແລ້ວຍ່າງໜີໂລດ ແລະບໍ່ຕ້ອງຮູ້ສຶກອາຍທີ່ເຮັດແບບນັ້ນ! ທີ່ຈິງແລ້ວ ເຈົ້າກໍຄືຊິຫາທາງອອກມາໄດ້ໂດຍບໍ່ໃຫ້ໝູ່ເຍາະເຍີ້ຍຫຼືເວົ້າໃສ່ເຈົ້າ.
ຫຼີກລ່ຽງຄວາມບັນເທີງທີ່ຜິດສິນລະທຳ. ແນ່ນອນວ່າ ໜັງຫຼືເພງທຸກຢ່າງກໍບໍ່ແມ່ນວ່າບໍ່ດີ. ແຕ່ຄວາມບັນເທີງສ່ວນຫຼາຍໃນທຸກມື້ນີ້ຕັ້ງໃຈກະຕຸ້ນຄົນເບິ່ງໃຫ້ເກີດອາລົມທາງເພດ. ຄຳພີໄບເບິນບອກວ່າ: “ໃຫ້ພວກເຮົາເຮັດໃຫ້ໂຕເອງສະອາດຈາກທຸກສິ່ງທີ່ເຮັດໃຫ້ຮ່າງກາຍແລະຈິດໃຈເປິເປື້ອນ ແລະໃຫ້ຄວາມຢ້ານຢຳພະເຈົ້າຊ່ວຍພວກເຮົາໃຫ້ບໍລິສຸດຫຼາຍຂຶ້ນເລື້ອຍໆ.” (2 ໂກຣິນໂທ 7:1) ໃຫ້ຫຼີກລ່ຽງຄວາມບັນເທີງທຸກຮູບແບບທີ່ກະຕຸ້ນຄວາມຮູ້ສຶກທາງເພດ.a
ບັນຫາເລື່ອງການສະໜອງຄວາມຕ້ອງການທາງເພດດ້ວຍໂຕເອງ
ເມື່ອໄວລຸ້ນບາງຄົນມີຄວາມຕ້ອງການທາງເພດ ເຂົາເຈົ້າຈະລະບາຍອອກມາດ້ວຍການສະໜອງຄວາມຕ້ອງການທາງເພດດ້ວຍໂຕເອງ. ແຕ່ການເຮັດແບບນີ້ຈະເກີດຜົນເສຍຫາຍຮ້າຍແຮງ. ຄຳພີໄບເບິນກະຕຸ້ນເຕືອນຄລິດສະຕຽນວ່າ: “ໃຫ້ພວກເຈົ້າກຳຈັດຄວາມຕ້ອງການຂອງອະໄວຍະວະຕ່າງໆໃນຮ່າງກາຍເຊິ່ງແມ່ນການເຮັດຜິດສິນລະທຳທາງເພດ ການກະທຳທີ່ບໍ່ສະອາດ ຕັນຫາແບບທີ່ບໍ່ມີການຄວບຄຸມ ຄວາມຕ້ອງການທີ່ສ້າງຄວາມເສຍຫາຍ ແລະຄວາມໂລບ.” (ໂກໂລຊາຍ 3:5) ການສະໜອງຄວາມຕ້ອງການທາງເພດດ້ວຍໂຕເອງແທນທີ່ຈະເປັນການ ‘ກຳຈັດຕັນຫາ’ ແຮ່ງກະຕຸ້ນໃຫ້ເກີດຄວາມຮູ້ສຶກຫຼາຍຂຶ້ນ!
ຖ້າເຈົ້າສະໜອງຄວາມຕ້ອງການທາງເພດດ້ວຍໂຕເອງ ເຈົ້າກໍຕົກເປັນທາດຂອງຄວາມຕ້ອງການນັ້ນ. (ຕີໂຕ 3:3) ວິທີໜຶ່ງທີ່ຈະຊ່ວຍເຈົ້າໃຫ້ເອົາຊະນະນິດໄສນີ້ໄດ້ແມ່ນລະບາຍໃຫ້ໃຜຈັກຄົນຟັງ. ຄລິດສະຕຽນຄົນໜຶ່ງທີ່ເຄີຍມີບັນຫາເລື່ອງນີ້ແລະພະຍາຍາມຕໍ່ສູ້ມາຫຼາຍປີເວົ້າວ່າ: “ຕອນຂ້ອຍເປັນໄວລຸ້ນຂ້ອຍຢາກລົມເລື່ອງນີ້ກັບໃຜຈັກຄົນ ແຕ່ກໍບໍ່ກ້າ! ຄວາມຮູ້ສຶກຜິດມັນລົບກວນຂ້ອຍຢູ່ຫຼາຍປີ. ມັນຍັງສົ່ງຜົນເສຍຮ້າຍແຮງຕໍ່ຄວາມສຳພັນຂອງຂ້ອຍກັບຄົນອື່ນ ແລະທີ່ສຳຄັນຄືຕໍ່ກັບພະເຢໂຫວາ.”
ແລ້ວເຈົ້າຄວນລະບາຍໃຫ້ໃຜຟັງ? ສ່ວນຫຼາຍແລ້ວການລົມກັບພໍ່ແມ່ກໍເປັນທາງເລືອກທີ່ດີທີ່ສຸດ ຫຼືພີ່ນ້ອງຄລິດສະຕຽນທີ່ເປັນຜູ້ໃຫຍ່ໃນປະຊາຄົມກໍສາມາດຊ່ວຍເຈົ້າໄດ້. ເຈົ້າອາດເລີ່ມເວົ້າແບບນີ້: “ຂ້ອຍມີເລື່ອງທີ່ອຸກໃຈຫຼາຍແລະມັນກໍລົບກວນຂ້ອຍຕະຫຼອດ ຂ້ອຍຂໍລົມນຳໄດ້ບໍ?”
ອັງເດຣດີໃຈທີ່ໄດ້ລົມກັບຜູ້ເບິ່ງແຍງໃນປະຊາຄົມ. ລາວເລົ່າວ່າ: “ຕອນທີ່ຂ້ອຍເລົ່າໃຫ້ຜູ້ເບິ່ງແຍງຟັງ ລາວກໍນ້ຳຕາຫຸ້ມປໍ້. ເມື່ອເລົ່າຈົບແລ້ວ ລາວກໍເຮັດໃຫ້ຂ້ອຍໝັ້ນໃຈເຖິງຄວາມຮັກທີ່ພະເຢໂຫວາມີຕໍ່ຂ້ອຍ ແລະບອກຂ້ອຍວ່າຫຼາຍຄົນກໍເຈິບັນຫານີ້. ລາວສັນຍາວ່າຈະຊ່ວຍຂ້ອຍເປັນໄລຍະໆແລະຫາຄຳແນະນຳຈາກປຶ້ມຂອງອົງການມາໃຫ້. ຫຼັງຈາກໄດ້ລົມກັບລາວ ຂ້ອຍກໍຕັ້ງໃຈທີ່ຈະຕໍ່ສູ້ກັບບັນຫານີ້ຕໍ່ໆໄປເຖິງວ່າມັນຈະກັບມາອີກ.”
ມາຣິໂອ້ໄດ້ຕັດສິນໃຈລົມກັບພໍ່ ແລະປາກົດວ່າພໍ່ເຫັນອົກເຫັນໃຈແລະເຂົ້າໃຈລາວດີ. ພໍ່ເຖິງຂັ້ນບອກມາຣິໂອ້ວ່າ ຕອນທີ່ລາວເປັນໄວລຸ້ນມັນກໍຍາກສຳລັບລາວຄືກັນທີ່ຈະເອົາຊະນະບັນຫານີ້ໄດ້. ມາຣິໂອ້ບອກວ່າ: “ເມື່ອໄດ້ລົມກັບພໍ່ແບບກົງໆແລະຈິງໃຈກໍເຮັດໃຫ້ຂ້ອຍໄດ້ກຳລັງໃຈແລະປະທັບໃຈຫຼາຍຈົນຮ້ອງໄຫ້ອອກມາ. ຂ້ອຍຄິດວ່າຖ້າພໍ່ເອົາຊະນະມັນໄດ້ ຂ້ອຍກໍຕ້ອງເຮັດໄດ້ຄືກັນ.”
ຄືກັບອັງເດຣແລະມາຣິໂອ້ ມີຄົນພ້ອມທີ່ຈະຊ່ວຍເຈົ້າໃຫ້ເອົາຊະນະນິດໄສການສະໜອງຄວາມຕ້ອງການທາງເພດດ້ວຍໂຕເອງ. ເຖິງວ່າບາງເທື່ອເຈົ້າຈະກັບໄປເຮັດອີກ ກໍຢ່າຟ້າວທໍ້ໃຈ. ເຈົ້າສາມາດເອົາຊະນະບັນຫານີ້ໄດ້ແນ່ນອນ.b
ຄວບຄຸມຄວາມຄິດຂອງເຈົ້າ
ອັກຄະສາວົກໂປໂລເວົ້າວ່າ: “ຂ້ອຍຝຶກຝົນຮ່າງກາຍຢ່າງໜັກຈົນຄວບຄຸມໄດ້ຄືກັບຄວບຄຸມທາດ.” (1 ໂກຣິນໂທ 9:27) ເມື່ອຄວາມຄິດທີ່ບໍ່ເໝາະສົມກ່ຽວກັບເພດກົງກັນຂ້າມຜຸດຂຶ້ນມາໃນຫົວເຈົ້າ ເຈົ້າກໍຕ້ອງພະຍາຍາມບັງຄັບຄວາມຄິດນັ້ນໃຫ້ໄດ້. ຖ້າຄວາມຄິດນັ້ນຍັງບໍ່ຫາຍໄປ ໃຫ້ລອງອອກກຳລັງກາຍເບິ່ງ. ຄຳພີໄບເບິນບອກວ່າ: “ການຝຶກຝົນຮ່າງກາຍມີປະໂຫຍດ.” (1 ຕີໂມທຽວ 4:8) ການຍ່າງໄວໆຫຼືອອກກຳລັງກາຍພຽງບໍ່ເທົ່າໃດນາທີອາດຊ່ວຍເຈົ້າໃຫ້ກຳຈັດຄວາມຄິດນັ້ນອອກໄປໄດ້.
ສິ່ງທີ່ສຳຄັນ ຢ່າລືມວ່າພະເຢໂຫວາພໍ່ໃນສະຫວັນພ້ອມທີ່ຈະຊ່ວຍເຈົ້າ. ຄລິດສະຕຽນຄົນໜຶ່ງບອກວ່າ: “ຖ້າຕອນໃດທີ່ຂ້ອຍມີຄວາມຕ້ອງການທາງເພດ ຂ້ອຍຈະພະຍາຍາມບັງຄັບໂຕເອງໃຫ້ອະທິດຖານຂໍພະເຢໂຫວາຊ່ວຍ.” ແນ່ນອນວ່າ ພະເຈົ້າບໍ່ໄດ້ເຮັດໃຫ້ເຈົ້າເຊົາສົນໃຈເພດກົງກັນຂ້າມເລີຍ ແຕ່ເພິ່ນຈະຊ່ວຍເຈົ້າໃຫ້ຄິດເຖິງເລື່ອງທີ່ໜ້າສົນໃຈອີກຫຼາຍເລື່ອງ.
[ຂໍ້ຄວາມໄຂເງື່ອນ]
a ຈະມີການພິຈາລະນາເລື່ອງການພັກຜ່ອນຢ່ອນໃຈແລະຄວາມບັນເທີງຢ່າງລະອຽດໃນຕອນທີ 8 ຂອງປຶ້ມຫົວນີ້.
b ສຳລັບຂໍ້ມູນເພີ່ມເຕີມກ່ຽວກັບການສະໜອງຄວາມຕ້ອງການທາງເພດດ້ວຍໂຕເອງ ຂໍໃຫ້ເບິ່ງເຫຼັ້ມ 1 ບົດທີ 25.
ຂໍ້ຄຳພີຫຼັກ
“ສິ່ງໃດທີ່ດີ ແລະສິ່ງໃດທີ່ເປັນຕາຍົກຍ້ອງ ໃຫ້ຄິດເຖິງສິ່ງເຫຼົ່ານີ້ສະເໝີ.”—ຟີລິບປອຍ 4:8.
ຄຳແນະນຳ
ຖ້າເຈົ້າສະໜອງຄວາມຕ້ອງການທາງເພດດ້ວຍໂຕເອງອີກ ກໍຢ່າຍອມແພ້ ໃຫ້ສູ້ຕໍ່ໄປ! ຫາສາເຫດວ່າອັນໃດເຮັດໃຫ້ເຈົ້າກັບໄປເຮັດອີກ ແລ້ວພະຍາຍາມຫຼີກລ່ຽງສິ່ງນັ້ນ.
ເຈົ້າຮູ້ບໍ . . . ?
ສິ່ງທີ່ເຈົ້າຮັບເຂົ້າມາໃນຄວາມຄິດຈະມີຜົນຕໍ່ນິດໄສແລະການກະທຳຂອງເຈົ້າ.—ຢາໂກໂບ 1:14, 15.
ແຜນພາກປະຕິບັດ!
ຖ້າຂ້ອຍບໍ່ຢາກຄິດກ່ຽວກັບເພດກົງກັນຂ້າມ ຂ້ອຍຈະ ․․․․․
ຖ້າໝູ່ເລີ່ມລົມກັນກ່ຽວກັບເລື່ອງທີ່ບໍ່ເໝາະສົມຫຼືລາມົກ ຂ້ອຍຈະ ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ ․․․․․
ເຈົ້າຄິດແນວໃດ?
● ເປັນຫຍັງຄວາມຕ້ອງການທາງເພດຈຶ່ງບໍ່ແມ່ນເລື່ອງທີ່ບໍ່ດີສະເໝີໄປ?
● ເປັນຫຍັງເຈົ້າຄວນຄວບຄຸມຄວາມຮູ້ສຶກທາງເພດໃຫ້ໄດ້?
● ຄວາມບັນເທີງແບບໃດທີ່ເຮັດໃຫ້ເຈົ້າຄິດແຕ່ເລື່ອງເພດກົງກັນຂ້າມ?
● ຖ້າໝູ່ເລີ່ມເວົ້າເລື່ອງລາມົກ ເປັນຫຍັງຈຶ່ງສຳຄັນທີ່ເຈົ້າຈະຍ່າງໜີອອກມາ?
[ຖ້ອຍຄຳທີ່ຍົກມາໜ້າ 240]
“ສິ່ງທີ່ຊ່ວຍຂ້ອຍໄດ້ແມ່ນພະຍາຍາມຄິດເຖິງເລື່ອງອື່ນ ແລະຢຸດຄິດເລື່ອງທີ່ຈະກະຕຸ້ນໃຫ້ມີອາລົມທາງເພດ. ຂ້ອຍຍັງເຕືອນໂຕເອງອີກວ່າດຽວຄວາມຮູ້ສຶກຫຼືແຮງກະຕຸ້ນນີ້ຈະຫາຍໄປໃນທີ່ສຸດ.”—ສະກັອດ
[ຮູບພາບໜ້າ 239]
ເຈົ້າຈະປ່ອຍໃຫ້ຄອມພິວເຕີຂອງເຈົ້າຕິດໄວຣັສບໍ? ຄັນຊັ້ນ ເປັນຫຍັງປ່ອຍໃຫ້ຄວາມຄິດທີ່ຜິດສິນລະທຳເຂົ້າມາໃນຫົວຂອງເຈົ້າ?