ບົດທີ 5
ເປັນຫຍັງຄືຍັງບໍລິສຸດຢູ່?
“ຂ້ອຍຮູ້ສຶກກົດດັນໃຫ້ຢາກລອງມີເພດສຳພັນ.”—ເຄລີ້
“ຂ້ອຍຮູ້ສຶກວ່າໂຕເອງແປກປະຫຼາດທີ່ຍັງບໍ່ເຄີຍມີເພດສຳພັນ.”—ຈໍແດນ
“ເຈົ້າຍັງບໍລິສຸດຢູ່ຫວາ?” ຄຳຖາມນີ້ອາດເຮັດໃຫ້ເຈົ້າສະດຸ້ງແລະຢ້ານ! ທີ່ຈິງ ໃນຫຼາຍໆປະເທດ ໄວລຸ້ນທີ່ຍັງບໍລິສຸດຢູ່ມັກຖືກເບິ່ງວ່າເປັນຄົນແປກປະຫຼາດ ຫຼືເປັນໂຕປະຫຼາດ. ຈຶ່ງບໍ່ແປກໃຈເລີຍທີ່ໜຸ່ມສາວຫຼາຍຄົນມີເພດສຳພັນຕອນທີ່ຍັງຢູ່ໃນຊ່ວງໄວລຸ້ນ!
ໂຕເອງກໍຕ້ອງການ ໝູ່ກໍກົດດັນ
ຖ້າເຈົ້າເປັນຄລິດສະຕຽນ ເຈົ້າຈະຮູ້ວ່າຄຳພີໄບເບິນບອກໃຫ້ເຈົ້າ “ງົດເວັ້ນຈາກການເຮັດຜິດສິນລະທຳທາງເພດ.” (1 ເທຊະໂລນິກ 4:3) ແຕ່ການຄວບຄຸມຄວາມຕ້ອງການທາງເພດອາດເປັນເລື່ອງຍາກ. ຊາຍໜຸ່ມຄົນໜຶ່ງຊື່ພໍລ໌ຍອມຮັບວ່າ: “ບາງເທື່ອ ຢູ່ຊື່ໆຄວາມຄິດເລື່ອງເພດກໍເຂົ້າມາໃນຫົວຂອງຂ້ອຍໂດຍທີ່ບໍ່ຮູ້ສາເຫດ.” ທີ່ຈິງ ຄວາມຮູ້ສຶກແບບນີ້ເປັນເລື່ອງທຳມະດາ.
ເຈົ້າຄືຊິຮູ້ສຶກອາຍທີ່ຖືກໝູ່ເວົ້າກວນຫຼືເຍາະເຍີ້ຍຢູ່ຕະຫຼອດວ່າເຈົ້າຍັງບໍລິສຸດຢູ່! ຕົວຢ່າງເຊັ່ນ ໝູ່ເຈົ້າອາດຈະເວົ້າວ່າຖ້າເຈົ້າບໍ່ເຄີຍມີເພດສຳພັນ ເຈົ້າກໍຜິດປົກກະຕິ. ເອວເລນບອກວ່າ: “ໝູ່ມັກຈະເວົ້າໃນທຳນອງທີ່ວ່າ ການມີເພດສຳພັນເປັນເລື່ອງທີ່ໜ້າຕື່ນເຕັ້ນແລະໃຜກໍເຮັດ. ຖ້າເຈົ້າຍັງບໍ່ເຄີຍມີເພດສຳພັນກັບໃຜເລີຍກໍສະແດງວ່າເຈົ້າແປກປະຫຼາດ.”
ແຕ່ໝູ່ຂອງເຈົ້າອາດຈະບໍ່ໄດ້ເວົ້າເຖິງຜົນອີກດ້ານໜຶ່ງຂອງການມີເພດສຳພັນກ່ອນແຕ່ງດອງ. ຕົວຢ່າງເຊັ່ນ ມາເຣຍທີ່ມີເພດສຳພັນກັບແຟນເທື່ອທຳອິດເລົ່າວ່າ: “ຫຼັງຈາກນັ້ນ ຂ້ອຍຮູ້ສຶກຜິດແລະລະອາຍໃຈ. ຂ້ອຍຊັງໂຕເອງແລະກໍຊັງແຟນນຳ.” ນີ້ເປັນປະສົບການທີ່ໄວລຸ້ນສ່ວນໃຫຍ່ເຈິ. ທີ່ຈິງແລ້ວ ການມີເພດສຳພັນກ່ອນແຕ່ງດອງມັກຈະເຮັດໃຫ້ຮູ້ສຶກເຈັບປວດແລະມີຜົນເສຍຫາຍຮ້າຍແຮງແທ້ໆ!
ໄວລຸ້ນຄົນໜຶ່ງທີ່ຊື່ຊານດ້າຖາມວ່າ: “ເປັນຫຍັງພະເຈົ້າຈຶ່ງໃຫ້ໄວລຸ້ນມີຄວາມຕ້ອງການທາງເພດ ທັງທີ່ຮູ້ວ່າເຂົາເຈົ້າບໍ່ຄວນມີເພດສຳພັນຈົນກວ່າຈະແຕ່ງດອງ.” ນີ້ເປັນຄຳຖາມທີ່ໜ້າຄິດ. ແຕ່ໃຫ້ເຮົາມາພິຈາລະນາເລື່ອງຕໍ່ໄປນີ້ກ່ອນ:
ຄົນເຮົາມີຄວາມຮູ້ສຶກທີ່ຮຸນແຮງສະເພາະໃນເລື່ອງເພດບໍ? ບໍ່ເລີຍ. ພະເຢໂຫວາພະເຈົ້າສ້າງເຮົາໃຫ້ມີອາລົມຄວາມຮູ້ສຶກແລະຄວາມຕ້ອງການໃນຫຼາຍໆດ້ານ.
ຄົນເຮົາຕ້ອງເຮັດຕາມແຮງກະຕຸ້ນທຸກຢ່າງທີ່ຢູ່ໃນໂຕບໍ? ບໍ່. ເພາະພະເຈົ້າສ້າງເຮົາໃຫ້ສາມາດຄວບຄຸມການກະທຳຂອງເຮົາໄດ້ນຳ.
ເລື່ອງນີ້ສອນຫຍັງເຮົາ? ເຮົາບໍ່ສາມາດຄວບຄຸມຄວາມຕ້ອງການບາງຢ່າງບໍ່ໃຫ້ເກີດຂຶ້ນ ແຕ່ເຮົາສາມາດຄວບຄຸມໄດ້ວ່າຈະຕອບສະໜອງຕໍ່ຄວາມຕ້ອງການນັ້ນແນວໃດ. ທີ່ຈິງ ຖ້າທຸກເທື່ອທີ່ເຈົ້າມີຄວາມຕ້ອງການທາງເພດແລ້ວຕອບສະໜອງທັນທີກໍເປັນຄືກັບວ່າ ທຸກເທື່ອທີ່ເຈົ້າໃຈຮ້າຍເຈົ້າຈະຕ້ອງໄດ້ຕີໃຜຈັກຄົນໜຶ່ງ. ນີ້ເປັນການກະທຳທີ່ຜິດແລະບໍ່ສະຫຼາດເລີຍແມ່ນບໍ?
ຄວາມຈິງກໍຄື ພະເຈົ້າຢາກໃຫ້ເຮົາມີເພດສຳພັນແບບທີ່ເພິ່ນອອກແບບໄວ້. ຄຳພີໄບເບິນບອກວ່າ: “ໃຫ້ພວກເຈົ້າທຸກຄົນຮູ້ຈັກຄວບຄຸມຮ່າງກາຍຂອງໂຕເອງໃຫ້ບໍລິສຸດແລະມີກຽດ.” (1 ເທຊະໂລນິກ 4:4) ແລະຍັງບອກວ່າມີ “ເວລາຮັກແລະເວລາຊັງ.” ດັ່ງນັ້ນ ຈຶ່ງມີເວລາທີ່ຈະເຮັດຕາມຄວາມຕ້ອງການທາງເພດແລະມີເວລາທີ່ຈະບໍ່ເຮັດຄືກັນ. (ປັນຍາຈານ 3:1-8) ສະຫຼຸບແລ້ວ ເຈົ້າສາມາດຄວບຄຸມຄວາມຕ້ອງການຂອງເຈົ້າໄດ້!
ແຕ່ຈະເຮັດແນວໃດຖ້າມີຄົນເຍາະເຍີ້ຍເຈົ້າວ່າ: “ບໍ່ໜ້າເຊື່ອເລີຍ ເຈົ້າຍັງບໍລິສຸດຢູ່ແທ້ຫວະ?” ຢ່າອາຍ. ໃຫ້ຕອບໄປເລີຍວ່າ: “ແມ່ນ ຂ້ອຍຍັງບໍລິສຸດຢູ່ ແລະຂ້ອຍກໍພູມໃຈທີ່ເປັນແບບນີ້! ຫຼືເຈົ້າອາດເວົ້າວ່າ: “ນີ້ເປັນເລື່ອງສ່ວນໂຕທີ່ຂ້ອຍຈະບໍ່ລົມກັບຄົນອື່ນ.”a (ສຸພາສິດ 26:4; ໂກໂລຊາຍ 4:6) ແຕ່ຖ້າເຈົ້າຮູ້ສຶກວ່າຄົນທີ່ຖາມຢາກຮູ້ເຫດຜົນແທ້ໆ ເຈົ້າກໍອາດຈະອະທິບາຍຫຼັກການໃນຄຳພີໄບເບິນໃຫ້ລາວຟັງໄດ້.
ຖ້າມີຄົນເຍາະເຍີ້ຍເຈົ້າວ່າ “ບໍ່ໜ້າເຊື່ອເລີຍ ເຈົ້າຍັງບໍລິສຸດຢູ່ແທ້ຫວະ?” ເຈົ້າຈະຕອບແນວໃດ ຂໍໃຫ້ຂຽນໃສ່ທາງລຸ່ມ.
․․․․․
ຂອງຂວັນທີ່ລ້ຳຄ່າ
ພະເຈົ້າຮູ້ສຶກແນວໃດເມື່ອຄົນເຮົາມີເພດສຳພັນກ່ອນແຕ່ງດອງ? ລອງນຶກພາບວ່າເຈົ້າໄດ້ຊື້ຂອງຂວັນໃຫ້ໝູ່. ແຕ່ກ່ອນທີ່ເຈົ້າຈະໃຫ້ກັບໝູ່ຄົນນັ້ນ ລາວພັດໄປລັກເປີດເບິ່ງຂອງຂວັນຍ້ອນຢາກຮູ້ຢາກເຫັນແລະເອົາໄປໃຊ້ກ່ອນ. ເຈົ້າຄືຊິບໍ່ພໍໃຈແມ່ນບໍ? ຄັນຊັ້ນ ລອງຄິດເບິ່ງວ່າ ພະເຈົ້າຈະຮູ້ສຶກແນວໃດຖ້າເຈົ້າມີເພດສຳພັນກ່ອນແຕ່ງດອງ. ເພິ່ນຢາກໃຫ້ເຈົ້າລໍຖ້າຈົນກວ່າຈະແຕ່ງດອງແລ້ວຈຶ່ງມີຄວາມສຸກກັບຂອງຂວັນທີ່ເພິ່ນໃຫ້ເຊິ່ງກໍຄືການມີເພດສຳພັນ.—ປະຖົມມະການ 1:28
ເຈົ້າຈະຈັດການກັບຄວາມຮູ້ສຶກທາງເພດແນວໃດ? ຖ້າຕອບງ່າຍໆກໍຄື ຮຽນຮູ້ທີ່ຈະຄວບຄຸມມັນ. ເຈົ້າເຮັດແບບນັ້ນໄດ້! ອະທິດຖານຂໍພະເຢໂຫວາໃຫ້ຊ່ວຍເຈົ້າ. ພະລັງຂອງເພິ່ນຈະຊ່ວຍເຈົ້າໃຫ້ຄວບຄຸມໂຕເອງໄດ້ດີຂຶ້ນ. (ຄາລາເຕຍ 5:22, 23) ໃຫ້ເຕືອນໂຕເອງວ່າພະເຢໂຫວາ “ຈະບໍ່ຫວງແນວດີໆໄວ້ຈາກຄົນທີ່ໃຊ້ຊີວິດຢ່າງສັດຊື່.” (ເພງສັນລະເສີນ 84:11) ກໍດ໋ອນບອກວ່າ: “ເມື່ອຂ້ອຍເລີ່ມຄິດຢາກຈະລອງມີເພດສຳພັນ ຂ້ອຍກໍຈະຄິດຕຶກຕອງເຖິງຜົນທີ່ຕາມມາວ່າສາຍສຳພັນຂອງຂ້ອຍກັບພະເຢໂຫວາຈະເປັນແນວໃດ. ຈາກນັ້ນຂ້ອຍກໍເຫັນວ່າມັນບໍ່ຄຸ້ມເລີຍທີ່ຈະເຮັດບາບແລ້ວຕ້ອງສູນເສຍສາຍສຳພັນທີ່ດີກັບເພິ່ນ.”
ທີ່ຈິງ ການທີ່ເຈົ້າຍັງບໍລິສຸດຢູ່ບໍ່ແມ່ນເລື່ອງແປກຫຼືຜິດປົກກະຕິ. ແຕ່ການເຮັດຜິດສິນລະທຳນັ້ນແຫຼະທີ່ເຮັດໃຫ້ເສື່ອມເສຍ ໜ້າອັບອາຍ ແລະເປັນອັນຕະລາຍ. ດັ່ງນັ້ນ ຢ່າຍອມໃຫ້ຄວາມຄິດຜິດໆຂອງໂລກນີ້ມາຊັກຈູງເຈົ້າໃຫ້ຄິດວ່າ ໂຕເອງຜິດປົກກະຕິຖ້າຍຶດໝັ້ນກັບມາດຕະຖານຂອງຄຳພີໄບເບິນ. ເມື່ອເຈົ້າຮັກສາຄວາມບໍລິສຸດ ເຈົ້າກໍຈະມີສຸຂະພາບດີ ອາລົມດີ ແລະທີ່ສຳຄັນທີ່ສຸດແມ່ນ ມີສາຍສຳພັນທີ່ດີກັບພະເຈົ້າ.
ອ່ານເພີ່ມເຕີມກ່ຽວກັບຫົວຂໍ້ນີ້ໃນເຫຼັ້ມທີ 1 ບົດທີ 24
[ຂໍ້ຄວາມໄຂເງື່ອນ]
a ຕອນທີ່ເຮໂຣດຖາມພະເຢຊູ ເພິ່ນກໍເລືອກທີ່ຈະບໍ່ຕອບ. (ລູກາ 23:8, 9) ດັ່ງນັ້ນ ຖ້າມີໃຜມາຖາມຄຳຖາມທີ່ບໍ່ເໝາະສົມ ວິທີທີ່ດີທີ່ສຸດກໍຄືການງຽບ.
ຂໍ້ຄຳພີຫຼັກ
“ຜູ້ໃດທີ່ຕັ້ງໃຈແທ້ໆແລ້ວວ່າຈະຢູ່ເປັນໂສດ . . . ລາວກໍເຮັດດີແລ້ວ.”—1 ໂກຣິນໂທ 7:37
ຄຳແນະນຳ
ຢ່າຄົບຫາກັບຄົນທີ່ບໍ່ເຮັດຕາມມາດຕະຖານທາງສິນລະທຳຂອງພະເຈົ້າ ເຖິງເຂົາເຈົ້າຈະອ້າງວ່າເປັນພະຍານພະເຢໂຫວາຄືກັນກັບເຈົ້າກໍຕາມ.
ເຈົ້າຮູ້ບໍ . . . ?
ຄົນທີ່ຍອມມີເພດສຳພັນກັບຄົນອື່ນແບບງ່າຍໆມັກຈະບໍ່ປ່ຽນນິດໄສເຖິງວ່າເຂົາເຈົ້າຈະແຕ່ງດອງແລ້ວ. ກົງກັນຂ້າມ ຄົນທີ່ຍຶດໝັ້ນກັບມາດຕະຖານທາງສິນລະທຳຂອງພະເຈົ້າກ່ອນແຕ່ງດອງມັກຈະສັດຊື່ຕໍ່ຄູ່ຂອງໂຕເອງ.
ແຜນພາກປະຕິບັດ!
ຖ້າຂ້ອຍຈະຮັກສາຄວາມບໍລິສຸດຈົນກວ່າຂ້ອຍຈະແຕ່ງດອງ ຂ້ອຍຕ້ອງ․․․․․
ຖ້າໝູ່ກົດດັນຂ້ອຍໃຫ້ມີເພດສຳພັນກ່ອນແຕ່ງດອງ ຂ້ອຍກໍຈະ․․․․․
ສິ່ງທີ່ຂ້ອຍຢາກຖາມພໍ່ແມ່ກ່ຽວກັບເລື່ອງນີ້ແມ່ນ․․․․․
ເຈົ້າຄິດແນວໃດ?
● ເປັນຫຍັງບາງຄົນຈຶ່ງມັກເຍາະເຍີ້ຍຄົນທີ່ຍັງບໍລິສຸດ?
● ເປັນຫຍັງການຮັກສາຄວາມບໍລິສຸດຈຶ່ງເປັນເລື່ອງຍາກ?
● ການບໍ່ມີເພດສຳພັນກ່ອນແຕ່ງດອງດີແນວໃດ?
● ເຈົ້າຈະອະທິບາຍໃຫ້ນ້ອງຟັງແນວໃດວ່າລາວບໍ່ຄວນມີເພດສຳພັນກ່ອນແຕ່ງດອງ?
[ຮູບພາບໜ້າ 51]
“”ສິ່ງທີ່ຊ່ວຍຂ້ອຍໃຫ້ຕ້ານທານການລໍ້ໃຈໄດ້ແມ່ນ ການຈື່ໄວ້ສະເໝີວ່າ ‘ຄົນທີ່ເຮັດຜິດສິນລະທຳທາງເພດຫຼືຄົນທີ່ເຮັດສິ່ງທີ່ບໍ່ສະອາດຈະບໍ່ມີສ່ວນໃນການປົກຄອງຂອງພະເຈົ້າ.’” (ເອເຟໂຊ 5:5)—ລີເດຍ
[ຂອບໜ້າ 49]
ສາລະບານແບບສອບຖາມ
ແທ້ໆແລ້ວຈະເກີດຫຍັງຂຶ້ນ?
ໝູ່ຄູ່ແລະຄວາມບັນເທີງຕ່າງໆມັກຈະປົກປິດຜົນເສຍຈາກການມີເພດສຳພັນກ່ອນແຕ່ງດອງ. ໃຫ້ເຮົາມາເບິ່ງ 3 ສະຖານະການຕໍ່ໄປນີ້. ແລ້ວໃຫ້ເຈົ້າລອງຄິດວ່າ ແທ້ໆແລ້ວຈະເກີດຫຍັງຂຶ້ນກັບໄວລຸ້ນເຫຼົ່ານີ້?
● ໝູ່ຄົນໜຶ່ງຢູ່ໂຮງຮຽນເວົ້າອວດວ່າລາວມີເພດສຳພັນກັບຜູ້ຍິງຫຼາຍຄົນ. ລາວບອກວ່າມັນສຸດຍອດເລີຍແລະບໍ່ເຫັນຊິມີໃຜເປັນຫຍັງ. ແທ້ໆແລ້ວຈະເກີດຫຍັງຂຶ້ນກັບລາວແລະພວກຜູ້ຍິງເຫຼົ່ານັ້ນ? ․․․․․
● ໜັງເລື່ອງໜຶ່ງຈົບດ້ວຍສາກທີ່ໄວລຸ້ນສອງຄົນສະແດງຄວາມຮັກຕໍ່ກັນໂດຍການມີເພດສຳພັນ. ໃນຊີວິດຈິງຈະເກີດຫຍັງຂຶ້ນຫຼັງຈາກນັ້ນ? ․․․․․
● ເຈົ້າເຈິຜູ້ຊາຍຫຼໍ່ໆຄົນໜຶ່ງແລະລາວຂໍມີເພດສຳພັນກັບເຈົ້າ. ລາວບອກວ່າບໍ່ມີໃຜຮູ້ດອກ. ແທ້ໆແລ້ວຈະເກີດຫຍັງຂຶ້ນຖ້າເຈົ້າຍອມມີເພດສຳພັນກັບລາວແລະພະຍາຍາມປົກປິດເລື່ອງນີ້ໄວ້? ․․․․․
[ຮູບພາບໜ້າ 54]
ການມີເພດສຳພັນກ່ອນແຕ່ງດອງກໍເປັນຄືກັບການລັກເປີດຂອງຂວັນກ່ອນທີ່ຈະໄດ້ຮັບ