ພະເຈົ້າ​ອວຍ​ພອນ​ໃຫ້​ອັບລາຫາມ​ແລະ​ຄອບຄົວ​ຂອງ​ທ່ານ

ພະ​ເຢໂຫວາ​ຮູ້​ວ່າ​ໃນ​ມື້​ໜຶ່ງ​ລູກ​ທີ່​ພະອົງ​ຮັກ​ທີ່​ສຸດ​ຈະ​ຕ້ອງ​ທົນ​ທຸກ​ທໍລະມານ​ແລະ​ສິ້ນ​ຊີວິດ. ຄຳ​ພະຍາກອນ​ທີ່​ບັນທຶກ​ຢູ່​ໃນ​ຕົ້ນເດີມ 3:15 ບອກ​ເປັນ​ໄນ​ເຖິງ​ຄວາມ​ເປັນ​ຈິງ​ເລື່ອງ​ນັ້ນ. ພະເຈົ້າ​ຈະ​ໃຫ້​ມະນຸດ​ຮູ້​ບໍ​ວ່າ​ພະອົງ​ຕ້ອງ​ຈ່າຍ​ດ້ວຍ​ລາຄາ​ແພງ​ຫຼາຍ​ສ່ຳ​ໃດ​ສຳລັບ​ຄວາມ​ຕາຍ​ນັ້ນ? ຄຳພີ​ໄບເບິນ​ໃຫ້​ຕົວຢ່າງ​ເພື່ອ​ສົມ​ທຽບ. ພະເຈົ້າ​ສັ່ງ​ອັບລາຫາມ​ໃຫ້​ຖວາຍ​ອີຊາກ​ລູກ​ທີ່​ຮັກ​ຂອງ​ລາວ​ເປັນ​ເຄື່ອງ​ບູຊາ.

ອັບລາຫາມ​ມີ​ຄວາມ​ເຊື່ອ​ຫຼາຍ. ເຫັນ​ວ່າ​ພະເຈົ້າ​ໄດ້​ສັນຍາ​ກັບ​ລາວ​ວ່າ​ຜູ້​ຊ່ອຍ​ໃຫ້​ລອດ​ຫຼື​ເຊື້ອ​ສາຍ​ທີ່​ກ່າວ​ໄວ້​ລ່ວງ​ໜ້າ​ຈະ​ສືບ​ເຊື້ອ​ສາຍ​ຈາກ​ອີຊາກ. ໂດຍ​ເຊື່ອ​ວ່າ​ພະເຈົ້າ​ຈະ​ປຸກ​ອີຊາກ​ໃຫ້​ຟື້ນ​ຄືນ​ມາ​ຈາກ​ຕາຍ​ຖ້າ​ຈຳເປັນ ລາວ​ຈຶ່ງ​ຈະ​ຖວາຍ​ລູກ​ຊາຍ​ຂອງ​ຕົນ​ເປັນ​ເຄື່ອງ​ບູຊາ​ດ້ວຍ​ຄວາມ​ເຊື່ອ​ຟັງ. ແຕ່​ທູດ​ສະຫວັນ​ອົງ​ໜຶ່ງ​ຂອງ​ພະເຈົ້າ​ໄດ້​ຫ້າມ​ອັບລາຫາມ​ໄວ້​ທັນ​ພໍ​ດີ. ພະເຈົ້າ​ຊົມ​ເຊີຍ​ອັບລາຫາມ​ທີ່​ເຕັມ​ໃຈ​ຖວາຍ​ສິ່ງ​ທີ່​ມີ​ຄ່າ​ທີ່​ສຸດ ແລະ​ພະອົງ​ຈຶ່ງ​ໄດ້​ກ່າວ​ຊ້ຳ​ອີກ​ເຖິງ​ຄຳ​ສັນຍາ​ທີ່​ເຮັດ​ກັບ​ຊາຍ​ທີ່​ສັດ​ຊື່​ຜູ້​ນີ້.

ຕໍ່​ມາ ອີຊາກ​ມີ​ລູກ​ຊາຍ​ສອງ​ຄົນ ຄື​ເອຊາອຶ​ແລະ​ຢາໂຄບ. ບໍ່​ຄື​ກັບ​ເອຊາອຶ ຢາໂຄບ​ຮູ້​ຄຸນຄ່າ​ສິ່ງ​ຝ່າຍ​ວິນຍານ​ແລະ​ລາວ​ໄດ້​ຮັບ​ຜົນ​ຕອບ​ແທນ. ພະເຈົ້າ​ປ່ຽນ​ຊື່​ຢາໂຄບ​ເປັນ​ອິດສະລາແອນ ແລະ​ລູກ​ຊາຍ 12 ຄົນ​ຂອງ​ອິດສະລາແອນ​ຈຶ່ງ​ໄດ້​ກາຍ​ເປັນ​ຕົ້ນ​ຕະກູນ​ຂອງ​ຊາດ​ອິດສະລາແອນ. ແຕ່​ຄອບຄົວ​ນີ້​ໄດ້​ກາຍ​ເປັນ​ຊາດ​ໃຫຍ່​ໄດ້​ແນວ​ໃດ?

ມີ​ເຫດການ​ອັນ​ຕໍ່​ເນື່ອງ​ເລີ່ມ​ຂຶ້ນ ເມື່ອ​ພວກ​ອ້າຍ​ພາ​ກັນ​ອິດສາ​ໂຢເຊບ​ຜູ້​ເປັນ​ນ້ອງ​ຊາຍ. ເຂົາ​ເຈົ້າ​ຈຶ່ງ​ພາ​ກັນ​ຂາຍ​ລາວ​ໃຫ້​ໄປ​ເປັນ​ທາດ ແລະ​ໂຢເຊບ​ຖືກ​ພາ​ໄປ​ຢູ່​ໃນ​ປະເທດ​ເອຢິບ. ແຕ່​ພະເຈົ້າ​ໄດ້​ອວຍ​ພອນ​ຊາຍ​ຫນຸ່ມ​ທີ່​ສັດ​ຊື່​ແລະ​ກ້າຫານ​ຜູ້​ນີ້. ເຖິງ​ແມ່ນ​ວ່າ​ມີ​ຄວາມ​ຍາກ​ລຳບາກ​ຫຼາຍ​ຢ່າງ ໃນ​ທີ່​ສຸດ​ຟາໂລ​ຜູ້​ປົກຄອງ​ຂອງ​ເອຢິບ​ເລືອກ​ໂຢເຊບ​ແລະ​ໃຫ້​ລາວ​ມີ​ສິດ​ອຳນາດ​ຫຼາຍ. ກົງ​ເວລາ​ພໍ​ດີ ເພາະ​ຕອນ​ນັ້ນ​ມີ​ການ​ຂາດແຄນ​ອາຫານ ຢາໂຄບ​ຈຶ່ງ​ໃຊ້​ລູກ​ຊາຍ​ບາງ​ຄົນ​ໄປ​ຊອກ​ຊື້​ສະບຽງ​ອາຫານ​ຢູ່​ປະເທດ​ເອຢິບ​ປາກົດ​ວ່າ​ໃນ​ຕອນ​ນັ້ນ​ໂຢເຊບ​ເປັນ​ຜູ້​ເບິ່ງ​ແຍງ​ເລື່ອງ​ສະບຽງ​ອາຫານ​ທັງ​ໝົດ! ຫຼັງ​ຈາກ​ໄດ້​ພົບ​ພໍ້​ຢ່າງ​ໜ້າ​ຕື່ນ​ເຕັ້ນ​ກັບ​ພວກ​ອ້າຍ​ທີ່​ສຳນຶກ​ຜິດ​ແລ້ວ ໂຢເຊບ​ຍົກ​ໂທດ​ໃຫ້​ແກ່​ເຂົາ​ເຈົ້າ​ແລະ​ຂໍ​ໃຫ້​ພາ​ຄອບຄົວ​ທັງ​ໝົດ​ຍ້າຍ​ໄປ​ຢູ່​ປະເທດ​ເອຢິບ. ເຂົາ​ເຈົ້າ​ໄດ້​ຮັບ​ດິນ​ຕອນ​ທີ່​ດີ​ທີ່​ສຸດ ເຊິ່ງ​ເປັນ​ບ່ອນ​ທີ່​ເຂົາ​ເຈົ້າ​ຂະຫຍາຍ​ຄອບຄົວ​ອອກ​ແລະ​ຈະເລີນ​ຮຸ່ງເຮືອງ​ຕໍ່ໆໄປ. ໂຢເຊບ​ເຂົ້າ​ໃຈ​ວ່າ​ແມ່ນ​ພະເຈົ້າ​ທີ່​ໃຫ້​ເຫດການ​ເປັນ​ໄປ​ແບບ​ນັ້ນ ເພື່ອ​ຄຳ​ສັນຍາ​ຂອງ​ພະອົງ​ຈະ​ໄດ້​ສຳເລັດ​ເປັນ​ຈິງ.

ຢາໂຄບ​ເຊິ່ງ​ເຖົ້າ​ແກ່​ແລ້ວ​ໄດ້​ອາໄສ​ຢູ່​ໃນ​ປະເທດ​ເອຢິບ​ຈົນ​ສິ້ນ​ຊີວິດ ເຊິ່ງ​ຫ້ອມ​ລ້ອມ​ດ້ວຍ​ຄອບຄົວ​ທີ່​ມີ​ສະມາຊິກ​ເພີ່ມ​ຂຶ້ນ. ກ່ອນ​ຈະ​ຕາຍ​ຢາໂຄບ​ບອກ​ລ່ວງ​ໜ້າ​ວ່າ ເຊື້ອ​ສາຍ​ຫຼື​ຜູ້​ຊ່ວຍ​ໃຫ້​ລອດ​ຕາມ​ທີ່​ສັນຍາ​ໄວ້​ຈະ​ເປັນ​ຜູ້​ປົກຄອງ​ທີ່​ມີ​ສິດ​ອຳນາດ​ເຊິ່ງ​ຈະ​ເກີດ​ຈາກ​ລູກ​ຊາຍ​ຂອງ​ລາວ​ໃນ​ຕະກູນ​ຂອງ​ຢູດາ. ຫຼາຍ​ປີ​ຕໍ່​ມາ ກ່ອນ​ໂຢເຊບ​ຈະ​ຕາຍ ລາວ​ໄດ້​ພະຍາກອນ​ໄວ້​ວ່າ​ມື້​ໜຶ່ງ​ພະເຈົ້າ​ຈະ​ນຳ​ເອົາ​ຄອບຄົວ​ຂອງ​ຢາໂຄບ​ອອກ​ຈາກ​ປະເທດ​ເອຢິບ.

—ຂໍ້​ມູນ​ມາ​ຈາກ​ຕົ້ນເດີມ​ບົດ 20 ເຖິງ​ບົດ 50; ເຫບເລີ 11:17-22.