ບົດ 25
ຍ້າຍຄອບຄົວໄປຢູ່ປະເທດອີຢີບ
ໂຍເຊບບໍ່ສາມາດບັງຄັບຄວາມຮູ້ສຶກຂອງເຂົາໄວ້ໄດ້ອີກຕໍ່ໄປ. ເຂົາບອກໃຫ້ຄົນຮັບໃຊ້ທັງໝົດຂອງຕົນອອກໄປຈາກຫ້ອງ. ຂະນະທີ່ຢູ່ກັບພວກອ້າຍຂອງຕົນຕາມລຳພັງ ໂຍເຊບເລີ່ມຮ້ອງໄຫ້. ເຮົາສາມາດນຶກພາບໄດ້ວ່າພວກອ້າຍຈະຮູ້ສຶກແປກໃຈເຖິງຂະໜາດໃດ ເພາະບໍ່ຮູ້ວ່າເປັນຫຍັງເຂົາຈຶ່ງໄດ້ຮ້ອງໄຫ້. ໃນທີ່ສຸດເຂົາກໍ່ບອກວ່າ: ‘ຂ້ອຍຄືໂຍເຊບ. ພໍ່ຂອງຂ້ອຍຍັງມີຊີວິດຢູ່ບໍ?’
ພວກອ້າຍຕ່າງກໍ່ແປກໃຈແທ້ໆຈົນເຖິງກັບເວົ້າບໍ່ອອກ. ພວກເຂົາຕົກໃຈຢ້ານ. ແຕ່ໂຍເຊບກ່າວວ່າ: ‘ເຊີນເຂົ້າມາໃກ້ໆ.’ ເມື່ອພວກເຂົາເຂົ້າມາໃກ້ແລ້ວ ໂຍເຊບຈຶ່ງບອກວ່າ: ‘ຂ້ອຍຄືໂຍເຊບນ້ອງຊາຍຂອງພວກເຈົ້າ ຜູ້ທີ່ເຈົ້າໄດ້ຂາຍມາຍັງອີຢີບນີ້ແຫຼະ.’
ໂຍເຊບກ່າວຕໍ່ໄປດ້ວຍຄວາມກະລຸນາດັ່ງນີ້: ‘ຢ່າຕິຕຽນຕົວເອງເລີຍທີ່ຂາຍຂ້ອຍມາທີ່ນີ້. ແທ້ຈິງແລ້ວແມ່ນພະເຈົ້າທີ່ສົ່ງຂ້ອຍມາຍັງອີຢີບເພື່ອຊ່ວຍຊີວິດຜູ້ຄົນ. ຟາໂລໄດ້ຕັ້ງຂ້ອຍໃຫ້ເປັນຜູ້ປົກຄອງປະເທດນີ້ທັງໝົດ. ເພາະສະນັ້ນບັດນີ້ຈົ່ງຮີບກັບບ້ານໄປຫາພໍ່ຂອງຂ້ອຍແລະບອກເພິ່ນກ່ຽວກັບເລື່ອງນີ້. ແລະບອກເພິ່ນໃຫ້ມາຢູ່ທີ່ນີ້.’
ແລ້ວໂຍເຊບກໍ່ເອົາແຂນໂອບຮອບພວກອ້າຍ ທັງກອດແລະຈູບພວກເຂົາທຸກຄົນ. ເມື່ອຟາໂລໄດ້ຂ່າວວ່າພວກພີ່ນ້ອງຂອງໂຍເຊບມາ ທ່ານຈຶ່ງບອກໂຍເຊບວ່າ: ‘ຈົ່ງໃຫ້ພວກເຂົາເອົາລົດມ້າໄປແລະຮັບພໍ່ແລະຄອບຄົວຂອງພວກເຂົາດ້ວຍແລະກັບມາຢູ່ທີ່ນີ້. ເຮົາຈະປະທານທີ່ດິນດີທີ່ສຸດໃນປະເທດອີຢີບໃຫ້ພວກເຂົາ.’
ພວກເຂົາໄດ້ປະຕິບັດຕາມຄຳສັ່ງ. ຢູ່ລຸ່ມນີ້ເຈົ້າຈະເຫັນຕອນທີ່ໂຍເຊບພົບພໍ່ຂະນະທີ່ລາວມາເຖິງອີຢີບພ້ອມດ້ວຍຄອບຄົວທັງໝົດ.
ຄອບຄົວຂອງຍາໂຄບໄດ້ກາຍເປັນຄອບຄົວໃຫຍ່ຫຼາຍ. ທັງໝົດລວມກັນແລ້ວໄດ້ 70 ຄົນເມື່ອພວກເຂົາຍ້າຍໄປຢູ່ອີຢີບ ນັບຍາໂຄບທັງລູກໆແລະຫຼານໆຂອງເຂົາ. ແຕ່ກໍ່ຍັງມີພວກເມຍເຂົາ ແລະຄົງຈະມີຄົນໃຊ້ຫຼາຍຄົນດ້ວຍ. ຄົນທັງໝົດເຫຼົ່ານີ້ໄດ້ຕັ້ງຖິ່ນຖານຢູ່ອີຢີບ. ພວກເຂົາຖືກເອີ້ນວ່າຊົນຍິດສະລາເອນ ເພາະວ່າພະເຈົ້າໄດ້ປ່ຽນຊື່ຍາໂຄບເປັນຍິດສະລາເອນ. ຊົນຍິດສະລາເອນໄດ້ກາຍເປັນຊົນຊາດພິເສດຂອງພະເຈົ້າ ດັ່ງທີ່ເຮົາຈະໄດ້ຮູ້ພາຍຫຼັງ.